រដ្ឋយូថាស៖ អាជ្ញាធររដ្ឋយូថាសបានបញ្ជាក់ថា បុរសដែលគេសង្ស័យថាបានបា.ញ់សម្លា.ប់អ្នកអត្ថាធិប្បាយអភិរក្សនិយមអាមេរិក Charlie Kirk ត្រូវបានចាប់យកទៅឃុំខ្លួន តាមរយៈសេចក្ដីរាយការណ៍ពីឪពុករបស់គេ ថាកូនប្រុសរបស់គាត់បានសារភាពពីសកម្មភាពបា.ញ់ប្រហា.រនោះ។ នេះបើយោងតាមទីភ្នាក់ងារព័ត៌មាន BBC។

នៅថ្ងៃទី 13 ខែកញ្ញា ប្រភពពីសមត្ថកិច្ចបានឲ្យដឹងថា បន្ទាប់ពីបានប្រព្រឹត្តសកម្មភាពលបឆ្មក់បា.ញ់ប្រហារទៅលើ Charlie Kirk ជនសង្ស័យដែលជាយុវជនមានវ័យទើបតែ 22ឆ្នាំម្នាក់ ឈ្មោះ Tyler Robinson បានរត់ទៅសារភាពប្រាប់ឪពុក ថាខ្លួនពិតជាបានជាប់ពាក់ព័ន្ធក្នុងការសម្លា.ប់នេះ អំឡុងពេលសន្ទនានៅក្នុងផ្ទះរបស់ពួកគេ ដែលជំរុញឱ្យឪពុករបស់គេ បានជូនដំណឹងមកកាន់ប៉ូលីស។ ក្រោយពីទទួលបានព័ត៌មាននេះភ្លាម កម្លាំងជំនាញបានចុះទៅឃាត់ខ្លួនជនសង្ស័យយកមកសាកសួរ ។

បន្ថែមពីលើការឃា.ត់ខ្លួន ក្រុមស៊ើបអង្កេតកំពុងបន្តបំបែកសំណុំរឿង និងដើមចមដែលឈានដល់ការប្រព្រឹត្តបទល្មើសដូចខាងលើ។ ទោះបីជាមិនទាន់មានមូលហេតុផ្លូវការណាមួយត្រូវបានចេញផ្សាយក៏ដោយ ក៏អាជ្ញាធរបាននិយាយថា ព័ត៌មានលម្អិតបន្ថែមនឹងត្រូវបានបង្ហាញជាសាធារណៈនៅក្នុងពេលឆាប់ៗខាងមុខ។

គួរឲ្យដឹងផងដែរថា ការចាប់ខ្លួននេះបានទាក់ទាញការចាប់អារម្មណ៍ជាសាធារណៈយ៉ាងផុសផុល ដែលបានផ្តល់តួនាទីខ្ពស់ដល់លោក Kirk នៅក្នុងផ្នែកនយោបាយរបស់សហរដ្ឋអាមេរិក និងឥទ្ធិពលរបស់គាត់ក្នុងចំណោមទស្សនិកជនដែលជាក្រុមអភិរក្សនិយម។
យ៉ាងណាមិញ ប៉ូលីសដែលកំពុងទទួលខុសត្រូវលើករណីនេះបានសង្កត់ធ្ងន់ថា ខណៈការស៊ើបអង្កេតនៅតែបន្ត អាជ្ញាធរសូមអំពាវនាវដល់សាធារណជនទាំងអស់កុំធ្វើការសន្និដ្ឋានដោយផ្អែកលើហេតុផលដែលគ្មានមូលដ្ឋានច្បាស់លាស់ណាមួយឲ្យសោះ រង់ចាំឲ្យខាងប៉ូលីសធ្វើការរហូតដល់មានការផ្ដល់ព័ត៌មានបន្ថែម៕

ប្រទេសថៃ ៖ ក្រោយរដ្ឋាភិបាលថៃមានគម្រោងបើកព្រំដែនជាមួយកម្ពុជាមួយចំនួនបន្ទាប់ពីបញ្ចប់កិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅ (GBC) នៅខេត្តកោះកុង កាលពីថ្ងៃទី១០ ខែកញ្ញា ឆ្នាំ២០២៥ ដើម្បីដឹកទំនិញ និងកាត់បន្ថយផលប៉ះពាល់សេដ្ឋកិច្ច គឺមានមតិយល់ឃើញផ្សេងៗគ្នាពាក់ព័ន្ធនឹងការបើកព្រំដែនទាំងគាំទ្រ និងមិនគាំទ្រ ។ មតិមិនគាំទ្រលើកឡើងថា ថៃពុំគួរប្រញាប់បើកព្រំដែនពេលនេះទេ ត្រូវរង់ចាំមើលកម្ពុជាបង្ហាញភាពស្មោះត្រង់សិន ម្យ៉ាងទៀត ការបើកព្រំដែននឹងធ្វើឱ្យថៃខាតប្រយោជន៍ ។

ដូចគ្នានេះ មេបញ្ជាការយោធភូមិភាគ២ លោក ប៊ុនស៊ីន ផាកក្លាង ស្នើពិចារណាឱ្យច្បាស់លាស់មុនសម្រេចបើកព្រំដែនកម្ពុជា-ថៃ ដោយសារបារម្ភពីថៃខាតប្រយោជន៍ ហើយថា ការបិទព្រំដែនដើម្បីទប់ស្កាត់ពលរដ្ឋថៃទៅលេងកាស៊ីណូនៅកម្ពុជា និងទប់ស្កាត់កុំឱ្យពលរដ្ឋថៃបោកពលរដ្ឋថៃគ្នាឯងតាមអនឡាញ ។ លោកយល់ពីអាជីវកម្មថៃរងផលប៉ះពាល់ដោយសារការបិទព្រំដែន ប៉ុន្តែត្រូវគិតពីផលប្រយោជន៍ជាតិជាធំ ។

នៅថ្ងៃទី១១ ខែកញ្ញា មេបញ្ជាការយោធភូមិភាគ២ លោក ប៊ុនស៊ីន ផាកក្លាង បានចូលរួមកម្មវិធី «រួបរួមឈាមដើម្បីរក្សាអធិបតេយ្យជាតិ» នៅសាកលវិទ្យាល័យរ៉ាជឆាផាត់យ៉ាឡា ដែលមានការចូលរួមពីនិស្សិតសាកលវិទ្យាល័យនេះ ។ ពេលមានការសាកសួរពីកម្ពុជា-ថៃពិចារណាបើកព្រំដែនក្នុងកិច្ចប្រជុំ GBC លោក ប៊ុនស៊ីន និយាយថា ហេតុអ្វីពលរដ្ឋថៃត្រូវប្រកែកគ្នារឿងការបើក-បិទព្រំដែនជាមួយកម្ពុជា? ដោយសារវាពាក់ព័ន្ធនឹងសេដ្ឋកិច្ចកម្ពុជា ។ ការបិទព្រំដែនធ្វើឱ្យពលរដ្ឋថៃពុំអាចទៅលេងកាស៊ីណូនៅកម្ពុជា ហើយលោកនិយាយបំភ្លៃថា ពលរដ្ឋថៃមួយចំនួនឆ្លងដែនទៅកម្ពុជាដើម្បីបោកប្រាស់ថៃគ្នាឯងតាមអនឡាញ ។

លោកនិយាយបំភ្លៃទៀតថា នៅព្រំដែនកម្ពុជាមានទាំងកាស៊ីណូ និងការបោកប្រាស់តាមអនឡាញ ទើបធ្វើឱ្យកម្ពុជាមានលទ្ធភាពធ្វើសង្គ្រាមជាមួយថៃ ដែលនេះជាមូលហេតុថៃត្រូវបិទព្រំដែន ។ លោកសំណូមពរឱ្យគិតពីផលប្រយោជន៍ជាតិខ្លាំងជាងផលប្រយោជន៍ឯកជន សម្រាប់អាជីវកម្មរបស់ពលរដ្ឋថៃរងផលប៉ះពាល់ដោយសារការបិទព្រំដែនត្រូវតែទទួលស្គាល់ ប៉ុន្តែពលរដ្ឋថៃផ្សេងទៀតពុំគាំទ្រការបើកព្រំដែន និងចង់ឱ្យថៃធ្វើសង្គ្រាមឈ្នះ ។

ការបើកព្រំដែននឹងធ្វើឱ្យកម្ពុជារឹងមាំដោយសារការនាំចូលផលិតផលពីប្រទេសថៃ រួមមាន ៖ ប្រេងឥន្ធនៈ ស៊ីម៉ងត៍ និងផលិតផលប្រើប្រាស់ ទើបលោកនិយាយជានិច្ចថា ត្រូវតែពិចារណាឱ្យច្បាស់លាស់មុនសម្រេចបើកព្រំដែន ។ ក្រៅពីនេះ លោក ប៊ុនស៊ីន ក៏បានសំណូមពរឱ្យពលរដ្ឋថៃរួមគ្នាការពារអធិបតេយ្យជាតិ និងតាមដានព័ត៌មានពីរដ្ឋាភិបាល ដោយសាររដ្ឋាភិបាលអាចមានហេតុផល ។

លោក ប៊ុនស៊ីន នឹងចូលនិវត្តន៍ពីការងារកងទ័ពនៅថ្ងៃទី៣០ ខែកញ្ញា នេះ លោកជាមនុស្សនិយាយបាតដៃ ខ្នងដៃ និងចូលចិត្តញុះញង់ឱ្យពលរដ្ឋថៃមានគំនិតជាតិនិយមជ្រុល ។ កាលពីគណបក្សភឿថៃគ្រប់គ្រងរដ្ឋាភិបាល លោកចង់ឃើញប្រទេសទាំងពីរមានសុខសន្តិភាពបញ្ចប់ជម្លោះឆាប់ៗ ប៉ុន្តែពេលប្រទេសថៃមានរដ្ឋាភិបាលថ្មី មាននាយករដ្ឋមន្ត្រីថ្មី បែរជាលោកពុំគាំទ្រការបើកព្រំដែនក្រោមហេតុផលជាច្រើន ។

គួរបញ្ជាក់ថា ក្រោយកម្ពុជា-ថៃបានបញ្ចប់កិច្ចប្រជុំ GBC ស្រាប់តែសារព័ត៌មាននានារបស់ថៃ រួមទាំងសារព័ត៌មាន Khaosod និង Thairath ផ្សាយថា ក្រោយបញ្ចប់កិច្ចប្រជុំ GBC ត្រឹម១ថ្ងៃ កងទ័ពភូមិភាគ២ថៃ បានឃើញកងទ័ពខ្មែរបង្កើនកម្លាំង និងអាវុធនៅព្រំដែន ដែលធ្វើឱ្យកងទ័ពថៃតាមដានយ៉ាងដិតដល់ ។ សារព័ត៌មានថៃពុំគួរផ្សាយព័ត៌មានក្លែងក្លាយទេ ក្នុងពេលប្រទេសទាំងពីរកំពុងចរចារកសន្តិភាពដើម្បីឱ្យស្ថានការណ៍ត្រឡប់មកប្រក្រតី ម្យ៉ាងទៀត ការផ្សាយព័ត៌មានក្លែងក្លាយរបស់ថៃធ្វើឱ្យប៉ះពាល់ទំនាក់ទំនងប្រទេសទាំងពីរ ៕

ប្រទេសថៃ ៖ សភាពាណិជ្ជកម្មថៃបានគាំទ្ររដ្ឋាភិបាល និងកងទ័ព ដែលចរចាបើកព្រំដែនកម្ពុជា-ថៃមួយចំនួនក្នុងកិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅ (GBC) នៅខេត្តកោះកុង កាលពីថ្ងៃទី១០ ខែកញ្ញា ឆ្នាំ២០២៥ ដោយថៃគ្រោងបើកព្រំដែននៅខេត្តចាន់បុរី និងខេត្តត្រាតមុនគេដោយសារមានហានិភ័យទាប ។ សភាពាណិជ្ជកម្មថៃរំពឹងថា ការបើកព្រំដែននឹងជួយឱ្យអាជីវកម្មនានាដំណើរការឡើងវិញ ហើយការរស់នៅរបស់ពលរដ្ឋនឹងវិលមករកភាពប្រក្រតី ។

លោក ផុតអារ៉ាម វឌ្ឍនាណុន ប្រធានសភាពាណិជ្ជកម្មថៃបានគាំទ្រលទ្ធផលកិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅ (GBC) កម្ពុជា-ថៃ ដែលរៀបចំនៅខេត្តកោះកុង ហើយលោកចាត់ទុកកិច្ចប្រជុំនេះជាការបោះជំហ៊ានយ៉ាងសំខាន់តាមរយៈយន្តការទ្វេភាគីឈានទៅរកសន្តិភាព និងកិច្ចសហការរវាងប្រទេសទាំងពីរ ។ កិច្ចប្រជុំបានឯកភាពលើការគ្រប់គ្រងតំបន់ព្រំដែន និងពិចារណាបើកព្រំដែនមួយចំនួនដើម្បីកាត់បន្ថយផលប៉ះពាល់អាជីវកម្ម ពាណិជ្ជកម្មព្រំដែន និងការដឹកទំនិញ ។

ប្រទេសថៃបានបែងចែកព្រំដែនកម្ពុជា-ថៃជា៣តំបន់ អាស្រ័យលើស្ថានការណ៍តានតឹងខ្លាំង ឬតិច រួមមាន ៖

-តំបន់ទី១ ៖ ស្ថានការណ៍តានតឹងខ្លាំងស្ថិតក្រោមការគ្រប់គ្រងរបស់កងទ័ពភូមិភាគ២ ដូចជា ៖ ខេត្តឧប៊ុនរ៉ាជថានី ស៊ីសាកេត សុរិន្ទ និងបុរីរាំ
-តំបន់ទី២ ៖ ស្ថិតក្រោមការគ្រប់គ្រងរបស់កងទ័ពភូមិភាគ២ គឺខេត្តស្រះកែវ និង
-តំបន់ទី៣ ៖ ស្ថានការណ៍តានតឹងតិចជាងតំបន់ផ្សេងៗ ដែលតំបន់នេះមានខេត្តចាន់បុរី និងខេត្តត្រាត ។

ក្រោយមានការសំណូមពរពីអ្នកប្រកបអាជីវកម្មឱ្យបើកព្រំដែនដើម្បីសម្រួលការដឹកទំនិញ ទើបថៃគ្រោងបើកព្រំដែននៅតំបន់ទី៣មុនគេ គឺព្រំដែនខេត្តចាន់បុរី និងខេត្តត្រាត ដោយសារតំបន់នេះមានស្ថានការណ៍តានតឹងតិចជាងតំបន់ផ្សេងៗ ។ ជំហ៊ានដំបូង ត្រូវទំនាក់ទំនងជាមួយនាយកដ្ឋានគយ ក្រសួងពាណិជ្ជកម្ម និងឧស្សាហកម្ម ដើម្បីប្រមូលទិន្នន័យសម្រាប់ការចរចាបើកព្រំដែន ។

លោក ផុតអារ៉ាម វឌ្ឍនាណុន ប្រធានសភាពាណិជ្ជកម្មបានអរគុណរដ្ឋាភិបាល, ក្រសួងការពារជាតិ, លោក ណាត់ថាផុង ណាកផានិច រដ្ឋមន្ត្រីក្រសួងការពារជាតិ, កងទ័ព និងអរគុណគ្រប់ស្ថាប័ន ដែលបានរួមគ្នាជំរុញ និងចរចាក្នុងកិច្ចប្រជុំ GBC ឱ្យសម្រេចបាននូវលទ្ធផលជាវិជ្ជមាន ។ ការបើកព្រំដែនមួយចំនួននឹងធ្វើឱ្យពលរដ្ឋរស់នៅដោយសន្តិភាព ក៏ដូចជាជួយឱ្យអាជីវកម្មរងផលប៉ះពាល់ដោយសារការបិទព្រំដែន អាចដំណើរការឡើងវិញ ។

ទោះជាសភាពាណិជ្ជកម្មថៃគាំទ្រការបើកព្រំដែនកម្ពុជា-ថៃនៅតំបន់មានហានិភ័យទាបក្តី ប៉ុន្តែពលរដ្ឋថៃភាគច្រើនពុំគាំទ្រការបើកព្រំដែនឡើងវិញទេ ជាពិសេស ពលរដ្ឋនៅខេត្តសុរិន្ទ ស្នើឱ្យរដ្ឋាភិបាលបិទព្រំដែនបន្តទៀតដោយសារពុំទុកចិត្តស្ថានការណ៍ ។ ពលរដ្ឋខេត្តសុរិន្ទចង់ឱ្យដោះស្រាយបញ្ហានៅប្រាសាទតាក្របី និងតំបន់ផ្សេងៗឱ្យរួចរាល់ ទើបអាចបើកព្រំដែន បើថៃបើកព្រំដែនបញ្ជូនផលិតផល និងចំណីអាហារទៅកម្ពុជាពេលនេះ នឹងធ្វើឱ្យពលរដ្ឋខ្មែរបរិភោគអាហារថៃមានកម្លាំងកំហែងធ្វើសង្គ្រាមជាមួយថៃទៀត ។

រហូតមកដល់ពេលនេះ ពលរដ្ឋថៃភាគច្រើននៅតែគិតថា កម្ពុជាពឹងផ្អែកយ៉ាងខ្លាំងលើការនាំចូលផលិតផលពីថៃ និងពុំអាចខ្វះផលិតផលថៃបាន ទើបពួកគេសំណូមពរឱ្យរដ្ឋាភិបាលបិទព្រំដែនបន្តដើម្បីបញ្ឈប់ការនាំចេញផលិតផលមកកម្ពុជា ។ នេះជាការគិតខុស ពីព្រោះពលរដ្ឋខ្មែរឈប់ទិញផលិតផលថៃយូរហើយ និងងាកមកគាំទ្រផលិតផលខ្មែរខ្លាំងជាងមុនដើម្បីជំរុញសេដ្ឋកិច្ចជាតិ និងឱ្យពលរដ្ឋខ្មែរមានការងារធ្វើក្នុងប្រទេសរបស់ខ្លួន ៕

ខេត្តសុងក្លា៖ ប្រញាប់ទៅបង្រ្កាបក្រុមបះបោរផង ស្គាល់ផ្លូវមិនច្បាស់ផង ឡានយោធាថៃមួយគ្រឿងដែលកំពុងបើកបរយ៉ាងលឿនបានជួបប្រទះនឹងបញ្ហាដាច់ហ្វ្រាំងរអិលធ្លាក់ចូលជ្រោះទាំងកម្រោលធ្វើឲ្យទាហាន8នាក់រងរបួសធ្ងន់ ខណៈពេលដែលកំពុងធ្វើដំណើរទៅអន្តរាគមន៍ការប៉ះទង្គិចប្រដាប់អាវុ.ធរវាងកងកម្លាំងសន្តិសុខជាតិ និងក្រុមផ្តាច់ខ្លួនថៃ-ម៉ាឡេមូស្លីម នៅស្រុក Saba Yoi ខេត្ត Songkhla។ នេះបើតាមការចុះផ្សាយដោយសារព័ត៌មាន Khaosod ។

នៅថ្ងៃទី 11 ខែកញ្ញា ឆ្នាំ 2025 មានទាហានថៃចំនួន 8នាក់បានរងរបួសខ្លះបា.ក់ឆ្អឹង ខ្លះសន្លប់ស្ដូកស្ដឹង នៅក្នុងឧបទ្ទវហេតុរថពាសដែក ឬឡានយោធាមួយគ្រឿងបានរមាលក្រឡាប់ធ្លាក់ផ្លូវនៅក្នុងភូមិលេខ 16 ឃុំណាថាវី ស្រុកណាថាវី ខេត្តសុងក្លា។ ក្នុងនោះមាន6នាក់ដែលរបួសធ្ងន់ធ្ងរខ្លាំងត្រូវបានគេបញ្ជូនទៅមន្ទីរពេទ្យ Na Thawi រួចហើយ។

ភ្លាមៗមិនមានមន្ត្រីជំនាញ ឬអាជ្ញាធរក្នុងតំបន់បានដឹងនិងចុះទៅសម្របសម្រួលនៅក្នុងហេតុការណ៍នេះឡើយ ដោយសារតែតំបន់ខាងលើមិនមានសេវាទូរស័ព្ទដើម្បីទំនាក់ទំនង។ រហូតក្រោយមកទើបមានប្រជាពលរដ្ឋបានប្រទះឃើញ នឹងរាយការណ៍ពីរឿងនេះទើបក្រុមសង្រ្គោះបានចុះមកបើកប្រតិបត្តិការ។

ចំពោះការស៊ើបអង្កេតបឋមបានបង្ហាញថា ឧបទ្ទវហេតុនេះគឺបណ្តាលមកពីការមិនស្គាល់ពីទីតាំងភូមិសាស្រ្តនៃផ្លូវច្បាស់លាស់ រួមផ្សុំនឹងការប្រញាប់ប្រញាល់ទៅបង្រ្កាបក្រុមបះបោរនៅ ដែលកំពុងបង្កភាពចលាចលនៅក្នុងតំបន់។

គួរជម្រាបថា នៅថ្ងៃទី11 ខែកញ្ញានេះ មានសេចក្ដីរាយការណ៍បន្ទាន់ថាក្រុមបះបោរនៅភាគខាងត្បូង បានបើកប្រតិបត្តិការវា.យប្រហារលើមូលដ្ឋានប៉ុស្តិ៍ត្រួតពិនិត្យរបស់ប៉ូលីសនៅស្រុក Baan Huai Tao ក្នុងខេត្ត Songkhla ទាំងព្រឹកព្រលឹម។ ស្ថានភាពដ៏តានតឹងនិងមិនអាចស្មានដឹងមុននេះ បានជំរុញឲ្យកងកម្លាំងសន្តិសុខជាតិក្នុងតំបន់ ប្រកាសប្រមូលផ្ដុំកម្លាំងភ្លាមៗ ដើម្បីយកទៅទប់ទល់ជាមួយក្រុមឧទ្ទាមផ្ដាច់ខ្លួន។

ប្រទេសថៃ ៖ រដ្ឋមន្ត្រីក្រសួងការពារជាតិថៃ លោក ណាត់ថាផុង ណាកផានិច បានរងការខឹងសម្បារយ៉ាងខ្លាំងពីពលរដ្ឋដែលគ្រោងបើកព្រំដែននៅខេត្តចាន់បុរី-ខេត្តត្រាតមុនគេ និងបើកព្រំដែនផ្សេងៗសម្រាប់ដឹកទំនិញក្រោយពីជប៉ុនសំណូមពរ ។ គម្រោងបើកព្រំដែននេះ គឺបន្ទាប់ពីលោកចូលរួមប្រជុំពិសេសលើកទី១ របស់គណៈកម្មាធិការព្រំដែនទូទៅ (GBC) នៅខេត្តកោះកុង កាលពីថ្ងៃទី១០ ខែកញ្ញា ឆ្នាំ២០២៥ ។ ពលរដ្ឋថៃប្រឆាំងដាច់ខាតក្នុងបណ្តាញសង្គមមិនគាំទ្រការបើកព្រំដែន មិនថាសម្រាប់ដឹកទំនិញ និងឱ្យមនុស្សឆ្លងកាត់ ពួកគេសួរថា បើចង់បើកព្រំដែន ហេតុអ្វីមិនសួរមតិពលរដ្ឋ និងកងទ័ព ។

កាលពីថ្ងៃទី១០ ខែកញ្ញា លោក ណាត់ថាផុង ណាកផានិច រដ្ឋមន្ត្រីក្រសួងការពារជាតិថៃបានធ្វើដំណើរមកខេត្តកោះកុង ដើម្បីចូលរួមប្រជុំពិសេសលើកទី១ របស់គណៈកម្មាធិការព្រំដែនទូទៅ (GBC) ជាមួយឯកឧត្តមនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា រួមទាំងមន្ត្រីពាក់ព័ន្ធជាច្រើនរូប ។ ពេលត្រឡប់ទៅថៃវិញ លោក ណាត់ថាផុង ក៏បានប្រកាសពីលទ្ធផលកិច្ចប្រជុំសម្រេចបានច្រើនចំណុច ក្នុងនោះកម្ពុជា និងថៃពិចារណាបើកច្រកព្រំដែនសម្រាប់ដឹកទំនិញចាំបាច់ ដោយសារជប៉ុនសំណូមពរ ។

លោក ណាត់ថាផុង បានប្រកាសពីលទ្ធផលកិច្ចប្រជុំ GBC កាលពីថ្ងៃទី១០ ខែកញ្ញា ថា ប្រទេសទាំងពីរបានព្រមព្រៀងគ្នាកាត់បន្ថយភាពតានតឹង តាមរយៈការកែសម្រួលនូវយុទ្ធោបករណ៍ និងសម្ភារៈយោធា, ការបោសសម្អាតមីន, ការបង្ក្រាបឧក្រិដ្ឋកម្មអនឡាញ, ដោះស្រាយបញ្ហានៅព្រំដែនភូមិណងចាន់ (ទល់មុខភូមិជោគជ័យ) និងបើកច្រកព្រំដែនកម្ពុជា-ថៃមួយចំនួនសម្រាប់ដឹកទំនិញដោយសារការស្នើរបស់ជប៉ុន ដោយជំហ៊ានដំបូង ថៃគ្រោងបើកព្រំដែននៅខេត្តចាន់បុរី-ខេត្តត្រាត ។

ប៉ុន្តែពលរដ្ឋថៃបានប្រឆាំងដាច់ខាត និងរិះគន់រដ្ឋមន្ត្រីក្រសួងការពារជាតិក្នុងបណ្តាញសង្គមថា ពុំគួរបើកព្រំដែនពេលនេះទេ ទោះជាបើកព្រំដែនសម្រាប់ដឹកជញ្ជូនទំនិញក្តី ហើយពួកគេសួរទៅកាន់រដ្ឋាភិបាលមុនពេលបើកព្រំដែនកម្ពុជា-ថៃ តើបានសួរមតិពលរដ្ឋ និងកងទ័ពហើយឬនៅ ។ ពលរដ្ឋថៃរិះគន់ថា នាយករដ្ឋមន្ត្រីថ្មី លោក អនុថីន ឆាន់វីរៈគូន កាន់តំណែងភ្លាម ចង់បើកព្រំដែនភ្លាម ដូច្នេះ ពលរដ្ឋនឹងបណ្តេញលោកចុះចេញពីតំណែង គឺលោកអាចកាន់តំណែងត្រឹមតែ២ខែប៉ុណ្ណោះ មិនដល់៤ខែទេ ។

ជាការឆ្លើយតបនឹងការរិះគន់ពីសំណាក់ពលរដ្ឋ លោក ណាត់ថាផុង រដ្ឋមន្ត្រីក្រសួងការពារជាតិបញ្ជាក់ថា ថៃគ្រោងបើកព្រំដែនខេត្តចាន់បុរី-ខេត្តត្រាតសម្រាប់តែដឹកទំនិញប៉ុណ្ណោះ ពុំមែនបើកឱ្យមនុស្សឆ្លងដែនទេ ហើយក៏ពុំអនុញ្ញាតឱ្យរថយន្តដឹកទំនិញឆ្លងដែនសេរីដែរ គឺកំណត់ចំនួនរថយន្ត ។ កម្ពុជា និងថៃពុំបានលើកឡើងក្នុងកិច្ចប្រជុំ GBC ពីការបើកព្រំដែន ប៉ុន្តែនេះជាការសំណូមពររបស់ប្រទេសទី៣ (ជប៉ុន) ឱ្យកម្ពុជា-ថៃបើកព្រំដែនមួយចំនួន ដូច្នេះ សូមពលរដ្ឋយល់ពីរដ្ឋាភិបាលមុននឹងប្រឆាំងការបើកព្រំដែន ។

ប្រទេសជប៉ុនថា បើកម្ពុជា-ថៃមានជម្លោះជាមួយគ្នា តើវាពាក់ព័ន្ធអ្វីនឹងជប៉ុនដែរ គឺជប៉ុនរងផលប៉ះពាល់ពុំអាចបញ្ជូនទំនិញតាមរយៈព្រំដែនកម្ពុជា-ថៃ ទើបប្រទេសទាំងពីរយល់ពីផលប៉ះពាល់របស់ជប៉ុន និងស្វែងរកវិធីដោះស្រាយដោយការបើកព្រំដែនមួយចំនួនសម្រាប់ដឹកទំនិញ ។ ក្រៅពីនេះ លោក ណាត់ថាផុង បានលើកឡើងពីការផ្សព្វផ្សាយព័ត៌មានក្លែងក្លាយប៉ះពាល់ទំនាក់ទំនងរវាងប្រទេសទាំងពីរ និងធ្វើឱ្យពលរដ្ឋខ្មែរ-ថៃស្អប់ខ្ពើមគ្នា លោកសំណូមពរឱ្យកាត់បន្ថយការចែកចាយព័ត៌មានក្លែងក្លាយ ពីព្រោះជាមូលហេតុដែលពលរដ្ឋខ្មែរ-ថៃស្អប់ខ្ពើមគ្នា ៕