ថៃ៖ នាយកដ្ឋានបង្ការ និងកាត់បន្ថយគ្រោះមហន្តរាយ (DDPM) កំពុងសម្របសម្រួលឲ្យប្រជាជននៅខេត្តចំនួន 10 រួមទាំងទីក្រុងបាងកក ប្រញាប់ស្វែងរកទីទួលសុវត្ថិភាពជាបន្ទាន់ ខណៈកម្ពស់ទឹកក្នុងទន្លេចៅប្រាយ៉ា ត្រូវបានគេរំពឹងថានឹងកើនឡើងពី 0.30 ទៅ 1.10 ម៉ែត្រ ហើយទំនប់ទឹកសម្រាប់ទន្លេនេះកំពុងរងសម្ពាធដោយសារទឹកបុកខ្លាំងទៅៗ។ នេះបើតាមសារព័ត៌មាន Khaosod។

នៅថ្ងៃទី 5 ខែកញ្ញា ឆ្នាំ 2025 នាយកដ្ឋានធារាសាស្ត្របានព្យាករណ៍ពីបរិមាណទឹកក្នុងរយៈពេល 1-9 ថ្ងៃបន្ទាប់ថា ប្រជាជនត្រូវមានការប្រុងប្រយ័ត្នឲ្យបានខ្ពស់បំផុត ជាពិសេសប្រជាជនដែលរស់នៅខេត្តទាំង10 រួមមាន Uthai Thani, Chai Nat, Sing Buri, Ang Thong, Suphan Buri, Ayutthaya, Lop Buri, Pathum Thani, Nonthaburi និង Samut Prakan រួមទាំងរាជធានី បាងកកផងដែរ ខណៈដែលកម្ពស់ទឹកក្នុងទន្លេចៅប្រាយ៉ានឹងកើនឡើងខ្លាំងឡើងៗ។

ការកើនឡើងនេះគឺដោយសារតែកំណើននៃលំហូរទឹកនៅស្ថានីយ៍ C.2 ក្នុងខេត្ត Nakhon Sawan ត្រូវបានគេព្យាករណ៍ថានឹងហក់ឡើងពី 1,900-2,300 ម៉ែត្រគូបក្នុងមួយវិនាទី ពីលំហូរធម្មតាដែលមានកម្រិតត្រឹម 1,500 ទៅ 2,000 ម៉ែត្រគូបក្នុងមួយវិនាទី រួមជាមួយនឹងលំហូរចេញពីទន្លេ Sakae Krang និងដៃទន្លេផ្សេងៗទៀត។

ដើម្បីគ្រប់គ្រងស្ថានការណ៍ទឹកជំនន់ចំពេលដែលទំនប់ ចៅប្រាយ៉ា នាយកដ្ឋានបង្ការ និងកាត់បន្ថយគ្រោះមហន្តរាយ បានប្រកាសឱ្យអ្នករស់នៅក្បែរទន្លេ និងនៅតំបន់ដែលងាយរងគ្រោះដោយទឹកជំនន់ឱ្យប្រញាប់ផ្លាស់ទីទៅដីខ្ពស់ជាបន្ទាន់ដើម្បីសុវត្ថិភាព។

ជាមួយគ្នានេះ អាជ្ញាធរមូលដ្ឋានត្រូវបានណែនាំឱ្យពង្រឹងទំនប់ ពិនិត្យរបាំងទឹកជំនន់ និងរៀបចំឧបករណ៍សង្គ្រោះគ្រោះមហន្តរាយឲ្យបានរួចរាល់ និងត្រៀមចេញប្រតិបត្តិការជួយសង្រ្គោះប្រជាពលរដ្ឋឋ24/24។ ចំណែកសាធារណជនត្រូវបានណែនាំឲ្យរក្សាការប្រុងប្រយ័ត្ន និងត្រូវធ្វើតាមការណែនាំផ្លូវការ និងទាក់ទងទៅបណ្តាញទូរស័ព្ទទាន់ហេតុការណ៍ 1784 ឬគណនី “DDPM 1784” Line សម្រាប់ជំនួយ។ ការអាប់ដេតគ្រោះមហន្តរាយក៏អាចត្រូវបានត្រួតពិនិត្យតាមរយៈកម្មវិធី “ការជូនដំណឹងអំពីគ្រោះមហន្តរាយថៃ” ផងដែរ៕

បាងកក៖ មេដឹកនាំគណបក្ស Bhumjaithai លោក Anutin Chanvirakul ត្រូវបានតែងតាំង ជានាយករដ្ឋមន្ត្រីថ្មីរបស់ប្រទេសថៃ បន្ទាប់ពីមានការប៉ុនប៉ង ដ៏ជោគជ័យមួយ ដែលគាំទ្រ ដោយបក្សប្រជាជនរបស់ថៃ ។ សម្ព័ន្ធភាពបានយកឈ្នះបេក្ខជនបក្សភឿថៃ លោក Chaikasem Nitisiri ដោយអនុញ្ញាតឱ្យលោក Anutin បង្កើតរដ្ឋាភិបាលភាគតិច ។ នេះយោងតាមសារព័ត៌មាន The Nation ចេញផ្សាយនៅថ្ងៃទី៥ ខែកញ្ញា។

ប្រភពខាងលើនេះបានឲ្យដឹងថា ប្រធានសភាថៃ លោក Wan Muhammad Nor Matha ឥឡូវនេះ នឹងស្វែងរកការយល់ព្រមពីព្រះមហាក្សត្រ របស់ព្រះអង្គ មុនពេល លោក Anutin ចូលកាន់តំណែងជាផ្លូវការ និងបង្កើតគណៈរដ្ឋមន្ត្រីថ្មី។

ក្នុងការឡើងកាន់តំណែងថ្មីនេះ លោក Anutin បានទទួលសំឡេងគ្រប់គ្រាន់ជាមួយនឹងការគាំទ្រពីគណបក្សប្រជាជន ដែលបានទាមទារឲ្យលោករំលាយសភាក្នុងរយៈពេល ៤ខែ និងធ្វើប្រជាមតិសម្រាប់រដ្ឋធម្មនុញ្ញថ្មី។

គួរជម្រាបថា មុនបោះឆ្នោតថ្ងៃនេះ លោក Anutin ធ្លាប់បាននិយាយថា គោលដៅរបស់គាត់គឺដើម្បីប្រគល់អំណាចជូនប្រជាជន និងដឹកនាំប្រទេសថៃតាមរយៈការផ្លាស់ប្តូរដ៏ខ្លីមួយ នៅមុនការបោះឆ្នោតថ្មី។

ជ័យជម្នះរបស់លោកកើតឡើងបន្ទាប់ពីតុលាការធម្មនុញ្ញ បានដកតំណែងអតីតនាយករដ្ឋមន្ត្រីលោកស្រី ផែថងថាន ស៊ីណាវ៉ាត្រ កាលពីថ្ងៃទី២៩ខែសីហា ពីបទបំពានច្បាប់ក្រមសីលធម៌ក្នុងការហៅទូរសព្ទជាមួយសម្ដេចតេជោ ហ៊ុន សែន ប្រធានព្រឹទ្ធសភាកម្ពុជា។ លោកស្រី ផែថងថាន គឺជានាយករដ្ឋមន្ត្រីថៃទី៥ ដែលត្រូវបានតុលាការធម្មនុញ្ញដកតំណែងក្នុងរយៈពេល១៧ឆ្នាំកន្លងមកនេះ៕

ថៃ៖ សារព័ត៌មាន The Nation របស់ថៃ បានចុះផ្សាយបំភ្លៃការពិតថា រដ្ឋាភិបាលកម្ពុជាកំពុងប្រើប្រាស់ប្រជាជននៅភូមិជោគជ័យ ដែលជាព្រំដែនទល់មុខភូមិបានណងចាន់ មកធ្វើជាខែលមនុស្សដាក់សម្ពាធលើយោធាថៃ ដើម្បីបន្ថែមភាពតានតឹង និងបង្កើតជាសមរភូមិថ្មី។

នៅថ្ងៃទី5 ខែកញ្ញា ឆ្នាំ2025 សារព័ត៌ខាងលើនេះបានចុះផ្សាយថា ប្រមុខរដ្ឋស្តីទីកម្ពុជា លោក ហ៊ុន សែន ហាក់ដូចជាកំពុងប្រើប្រាស់តំបន់ Ban Nong Chan ជាសមរភូមិថ្មី ដើម្បីបង្កើនភាពតានតឹងជាមួយប្រទេសថៃ។ ពួកគេបានបន្ថែមថា រដ្ឋាភិបាលកម្ពុជាត្រូវបានគេរាយការណ៍ថាបានប្រើស្ត្រី កុមារ និងមនុស្សចាស់ដើម្បីបង្កប្រតិកម្ម ដោយសង្ឃឹមថានឹងទទួលបានការគាំទ្រពីអន្តរជាតិ។

ប្រភពដដែលនេះបានគូសបញ្ជាក់ថា ដូច្នេះជាការឆ្លើយតប រដ្ឋាភិបាលថៃនឹងចាប់ផ្តើមវិធីសាស្រ្តជាដំណាក់កាល ដើម្បីបណ្តេញជនជាតិខ្មែរឲ្យអស់ពីភូមិសាស្រ្តខាងលើ ដោយប្រើវិធានការដែលមានចាប់ពីស្រាលទៅធ្ងន់ ដើម្បីធានាថាដំណើរការនេះនៅតែត្រឹមត្រូវតាមច្បាប់។

ដោយឡែកបើងាកមកមើលការពីតជាក់ស្ដែង ការផ្ទុះចលនាតវ៉ារបស់ប្រជាជននៅភូមិជោគជ័យកន្លងមកគឺជាប្រតិកម្មធម្មតារបស់មនុស្ស នៅពេលដែលខ្លួនត្រូវបានគេបៀតបៀន និងរងភាពអយុត្តិធម៌ប៉ុណ្ណោះ ពុំមែនជាការរៀបចំ ជួលមនុស្សឲ្យមកសម្ដែងដើម្បីទាមទារចំណាប់អារម្មណ៍ ដូចថៃធ្លាប់ធ្វើជាមួយពលរដ្ឋខ្លួនឡើយ។

សកម្មភាពរបស់បងប្អូនប្រជាជនខ្មែរនៅភូមិជោគជ័យនេះទៀតសោត គឺបានមកពីការឈឺចាប់ពិតៗ ដែលដី ផ្ទះ ភូមិ និងស្រែចម្ការរបស់ខ្លួនសុខៗក៏ត្រូវបានជនឈ្លានពា.ន ដែលមានគំនិតជាចោ.រមកព័ទ្ធយកទៅបាត់ ថែមទាំងចោ.ទពួកគាត់ថារស់នៅលើដីរបស់គេ ហើយបណ្ដេញពួកគាត់ឲ្យរុះរើផ្ទះចាកចេញទៅវិញ នេះគឺជាអ្វីដែលមិនអាចទទួលយកបានជាដាច់ខាត។

គួរបញ្ចាក់ថា បើទោះបីជាមានបទឈប់បា.ញ់ដែលបានចូលជាធរមាន និងមានការឯកភាពគ្នាជាច្រើនចំណុចនៅក្នុងកិច្ចប្រជុំ GBC JBC និង RBC រវាងថៃនិងកម្ពុជាហើយក៏ដោយ ប៉ុន្តែភាគីថៃគឺពុំបានអនុវត្តតាមកិច្ចព្រមព្រៀងសន្តិភាពណាមួយឡើយ។ ថៃនៅតែបន្តពង្រីកជម្លោះតាមព្រំដែនឥតឈប់ឈរ តាមរយៈសកម្មភាពឈ្លានពានគ្រប់រូបភាព ដើម្បីដុតកំហឹ.ងប្រជាជន ធ្វើឲ្យមានការបែ.កបាក់ផ្ទៃក្នុងប៉ុណ្ណោះ។

ជាមួយគ្នានេះដែរ អ្នកនាំពាក្យរាជរដ្ឋាភិបាល បានចេញសចក្តីថ្លែងការណ៍និងអំពាវនាវម្ដងហើយម្ដងទៀត ស្នើសុំឲ្យបងប្អូនប្រជាពលរដ្ឋខ្មែរជឿជាក់លើរាជរដ្ឋាភិបាល និងទុកចិត្តលើកងកម្លាំងរបស់យើង ក្នុងការដោះស្រាយបញ្ហាជម្លោះព្រំដែនជាមួយប្រទេសថៃដោយសន្តិវិធី៕

ប្រទេសនេប៉ាល់ ៖ កាលពីថ្ងៃទី៤ ខែកញ្ញា ឆ្នាំ២០២៥ រដ្ឋាភិបាលនេប៉ាល់បានប្រកាសបិទបណ្តាញសង្គមមួយចំនួនក្នុងប្រទេសរបស់ខ្លួន រួមទាំងបិទហ្វេសប៊ុកផងដែរ ដោយសារបណ្តាញសង្គមទាំងនេះមិនគោរពច្បាប់ដែលរដ្ឋាភិបាលនេប៉ាល់កំណត់នៅពេលចុះឈ្មោះ ដែលជាផ្នែកមួយនៃវិធានការទប់ស្កាត់ការប្រើប្រាស់បណ្តាញសង្គមក្នុងផ្លូវខុសប៉ះពាល់សន្តិសុខសង្គម ។ នេះបើតាមការផ្សព្វផ្សាយរបស់សារព័ត៌មានរ៉យទ័រ កាលពីថ្ងៃទី៥ ខែកញ្ញា ឆ្នាំ២០២៥ ។

រដ្ឋាភិបាលនេប៉ាល់បញ្ជាក់ថា បណ្តាញសង្គមបានក្លាយជាប្រភពធ្វើឱ្យមានការស្អប់ខ្ពើមគ្នា បង្កើតពាក្យចចាមអារ៉ាម ឧក្រិដ្ឋកម្មអ៊ីនធើរណេត និងបែកបាក់ក្នុងសង្គម ដែលបញ្ហាទាំងនេះបានកើតឡើងក្នុងប្រទេសនេប៉ាល់ដែលមានពលរដ្ឋប្រើប្រាស់អ៊ីនធើរណេតច្រើនរហូតដល់៩០% ក្នុងចំណោមពលរដ្ឋចំនួន៣០លាននាក់ ។

កាលពីថ្ងៃទី៣ ខែកញ្ញា ក្រសួងទំនាក់ទំនង និងបច្ចេកវិទ្យាព័ត៌មានរបស់នេប៉ាល់បានកំណត់ថ្ងៃឱ្យបណ្តាញសង្គមនានាចុះឈ្មោះជាមួយរដ្ឋាភិបាល ព្រមទាំងឱ្យបណ្តាញសង្គមតែងតាំងអ្នកតំណាងក្នុងប្រទេសនេប៉ាល់ រួមទាំងអ្នកទទួលខុសត្រូវដោះស្រាយបញ្ហាផ្សេងៗដោយខ្លួនឯង បើពុំដូច្នោះទេ នេប៉ាល់នឹងបិទបណ្តាញសង្គមនេះមិនឱ្យពលរដ្ឋប្រើប្រាស់ ។

មន្ត្រីក្រសួងទំនាក់ទំនង និងបច្ចេកវិទ្យាព័ត៌មាននិយាយមកកាន់សារព័ត៌មានរ៉យទ័រថា បណ្តាញសង្គមដែលបានចុះឈ្មោះជាមួយរដ្ឋាភិបាលនេប៉ាល់រួចហើយ រួមមាន ៖ TikTok, Viber, WeTalk, Nimbuzz និង Poppo Live ប៉ុន្តែ Facebook ពុំទាន់បានចុះឈ្មោះទេ ។ រីឯ Meta គឺជាក្រុមហ៊ុនមេរបស់ Facebook, WhatsApp និង Instagram ពុំបាននិយាយអ្វីទេពាក់ព័ន្ធនឹងការបិទបណ្តាញសង្គមនៅនេប៉ាល់ ។

តាមប្រភពដដែល គឺនេប៉ាល់បានទុកពេលឱ្យបណ្តាញសង្គមនានាគ្រប់គ្រាន់ហើយក្នុងការចុះឈ្មោះជាមួយរដ្ឋាភិបាលនេប៉ាល់ និងសំណូមពរជាច្រើនលើកឱ្យបណ្តាញសង្គមអនុវត្តតាមការកំណត់ ប៉ុន្តែពួកគេមិនអើពើ ទើបនេប៉ាល់បិទបណ្តាញសង្គម ។

គួរបញ្ជាក់ថា រដ្ឋាភិបាលប្រទេសជាច្រើននៅលើពិភពលោក ដូចជា ៖ សហរដ្ឋអាមេរិក សហភាពអឺរ៉ុប ប្រេស៊ីល និងអូស្ត្រាលី បានចាប់ផ្តើមកំណត់វិធានការគ្រប់គ្រងបណ្តាញសង្គម និងក្រុមហ៊ុនបច្ចេកវិទ្យាធំៗខ្លាំងជាងមុន ដើម្បីទប់ស្កាត់ការចែកចាយព័ត៌មានក្លែងក្លាយ ការពារទិន្នន័យផ្ទាល់ខ្លួន សុវត្ថិភាពអនឡាញ និងសន្តិសុខ ៕

ប្រទេសថៃ ៖ ភ្ញៀវទេសចរបរទេសមកលេងខេត្តឈៀងម៉ៃធ្លាក់ចុះយ៉ាងខ្លាំង ជាពិសេស ភ្ញៀវទេសចរចិន ដោយសារប្រទេសថៃគ្មានសុវត្ថិភាព និងបាត់បង់កេរ្តិ៍ឈ្មោះនៅលើពិភពលោក ។ ហេតុនេះ ក្រុមប្រឹក្សាទេសចរណ៍បានពន្លឿនការចរចាជាមួយអាជ្ញាធរទេសចរណ៍ថៃ ដើម្បីរកមធ្យោបាយជំរុញចំនួនភ្ញៀវទេសចរបរទេសឱ្យកើនឡើង តាមរយៈការរៀបចំកម្មវិធីផ្សេងៗពេញមួយឆ្នាំទាក់ទាញភ្ញៀវទេសចរ ។ នេះបើតាមការផ្សព្វផ្សាយរបស់សារព័ត៌មានថៃ នៅថ្ងៃទី៥ ខែកញ្ញា ឆ្នាំ២០២៥ ។

នៅត្រីមាសទី២ (ចាប់ពីមេសា ដល់ខែមិថុនា) ឆ្នាំ២០២៥ មានភ្ញៀវទេសចរបរទេសមកលេងខេត្តឈៀងម៉ៃ ត្រឹមតែ៧២៤,៩៨១នាក់ (ជាង៧២ម៉ឺននាក់) ខណៈរយៈពេលដូចគ្នាកាលពីឆ្នាំ២០២៤ មានភ្ញៀវទេសចរបរទេសរហូតដល់៧៦១,៨៤៣នាក់ (ជាង៧៦ម៉ឺននាក់) ។ បើទោះជាចំនួនភ្ញៀវទេសចរបរទេសក្នុងឆ្នាំទាំងពីរមានគម្លាតមិនខុសគ្នាប៉ុន្មាន ប៉ុន្តែក្នុងនោះភ្ញៀវទេសចរចិនបានធ្លាក់ចុះរហូតដល់ជាង៣០% ។

បើគិតទាំងភ្ញៀវទេសចរថៃ និងភ្ញៀវទេសចរបរទេស ដែលធ្វើដំណើរមកលេងខេត្តឈៀងម៉ៃក្នុងរយៈពេល៦ខែដំបូងឆ្នាំ២០២៥ គឺស្មើប្រមាណ៦លាន៧សែននាក់ ក្នុងនោះភ្ញៀវទេសចរបរទេសស្មើត្រឹមតែ១លាន៨សែននាក់ ។ ភ្ញៀវទេសចរមកពីតំបន់អាស៊ី និងបណ្តាប្រទេសអាស៊ានមកលេងខេត្តឈៀងម៉ៃបានធ្លាក់ចុះខ្លាំងបំផុត ដោយសារកត្តាជាច្រើន រួមមាន ៖ ថៃបាត់បង់កេរ្តិ៍ឈ្មោះ គ្មានសុវត្ថិភាព និងអត្រាប្តូរប្រាក់ប្រែប្រួល ។

ការបាត់បង់ចំនួនភ្ញៀវទេសចរបរទេសធ្វើឱ្យប៉ះពាល់ដល់វិស័យទេសចរណ៍ខេត្តឈៀងម៉ៃ ដូចជា ៖ សណ្ឋាគារលំដាប់ផ្កាយ៣ ហាងលក់ទំនិញ ភោជនីយដ្ឋាន និងហាងលក់វត្ថុអនុស្សាវីយ៍ ។ ការធ្លាក់ចុះវិស័យទេសចរណ៍ខេត្តឈៀងម៉ៃធ្វើឱ្យថៃបារម្ភយ៉ាងខ្លាំងពីចំនួនភ្ញៀវទេសចរមកលេងខេត្តនេះក្នុងឆ្នាំ២០២៥ គឺស្មើមិនដល់១៦លាននាក់ ។

ក្រោយពីចំនួនភ្ញៀវទេសចរធ្លាក់ចុះខ្លាំងពេក ក្រុមប្រឹក្សាទេសចរណ៍ និងអាជ្ញាធរទេសចរណ៍ថៃបានប្រជុំស្វែងរកដំណោះស្រាយបញ្ហាចំនួនភ្ញៀវទេសចរធ្លាក់ចុះ ដែលមានអ្នកតំណាងមកពីស្ថាប័នទេសចរណ៍ និងក្រុមហ៊ុនទេសចរណ៍ចូលរួមជាង២៥០នាក់ ។ អ្នកចូលរួមបានជជែកពីវិធីជំរុញកំណើនភ្ញៀវទេសចរមកលេងខេត្តឈៀងម៉ៃ ទាំងរយៈពេលខ្លី និងរយៈពេលវែង ។

ក្រុមប្រឹក្សាទេសចរណ៍ខេត្តឈៀងម៉ៃ នឹងរៀបចំគម្រោងឈ្មោះ «City Promotion» ដើម្បីទាក់ទាញភ្ញៀវទេសចរមកលេងខេត្តឈៀងម៉ៃ រួមទាំងបង្កើតគម្រោងជំរុញសេដ្ឋកិច្ចវិស័យទេសចរណ៍ស្ថិតក្រោមគម្រោង «រយៈពេល១២ខែ បង្កើត១២កម្មវិធី» ។ ហេតុនេះ ភ្ញៀវទេសចរនឹងមកលេងខេត្តឈៀងម៉ៃពេញមួយឆ្នាំ ហើយធ្វើឱ្យខេត្តឈៀងម៉ៃផ្តល់នូវទំនុកចិត្ត និងទាក់ទាញភ្ញៀវទេសចរមកពីជុំវិញពិភពលោក ៕