ប្រទេសថៃ ៖ អគ្គនាយកនៃនាយកដ្ឋានពាណិជ្ជកម្មបរទេសរបស់ថៃអះអាងថា មន្ត្រីស្ថានទូតថៃ និងការិយាល័យលើកកម្ពស់ពាណិជ្ជកម្មក្រៅប្រទេសប្រចាំទីក្រុងយ៉ាំងហ្គន នឹងពិភាក្សាជាមួយរដ្ឋមន្ត្រីក្រសួងពាណិជ្ជកម្មមីយ៉ាន់ម៉ាឱ្យបើកព្រំដែនមេស៊ត-មៀវឌីដើម្បីសម្រួលដល់ការនាំចេញទំនិញ និងសង្ឃឹមពាណិជ្ជកម្មជាមួយកម្ពុជាវិលរកប្រក្រតីឆាប់ៗ ដោយនាយកដ្ឋាននឹងផ្តល់ចំណេះដឹងដល់អាជីវកម្មពីការនាំទំនិញចេញចូលពេលជម្លោះស្ងប់ស្ងាត់ និងបើកព្រំដែនកម្ពុជា-ថៃ ។ នេះបើតាមការផ្សព្វផ្សាយរបស់សារព័ត៌មានថៃ នៅថ្ងៃទី៨ ខែកញ្ញា ឆ្នាំ២០២៥ ។

អ្នកស្រី អារ៉ាដា ហ្វឿងថង អគ្គនាយកនៃនាយកដ្ឋានពាណិជ្ជកម្មបរទេសបាននិយាយនៅថ្ងៃទី៨ ខែកញ្ញា ថា ស្ថានទូតថៃនៅមីយ៉ាន់ម៉ា និងមន្ត្រីការិយាល័យលើកកម្ពស់ពាណិជ្ជកម្មក្រៅប្រទេសប្រចាំទីក្រុងយ៉ាំងហ្គន ត្រៀមពិភាក្សាជាមួយរដ្ឋមន្ត្រីក្រសួងពាណិជ្ជកម្មមីយ៉ាន់ម៉ា សុំសម្រួលការនាំចេញទំនិញតាមព្រំដែនមេស៊ត-មៀវឌី ដើម្បីឱ្យពាណិជ្ជកម្មព្រំដែនវិលរកភាពប្រក្រតីវិញឆាប់ៗ ។ កន្លងមក មានការកំណត់ការនាំចេញ នាំចូលទំនិញ ដោយសារមីយ៉ាន់ម៉ាបារម្ភពីប្រព័ន្ធគ្រប់គ្រងប្រាក់ចំណូលបានពីការនាំចេញទំនិញ និងអាជ្ញាប័ណ្ណនាំចូលទំនិញ ហើយថៃរីករាយស្តាប់មតិយោបល់ កែប្រែ និងស្វែងរកដំណោះស្រាយរួមគ្នា ។

ក្រៅពីនេះ នាយកដ្ឋាននឹងផ្តល់ភាពងាយស្រួលដល់អាជីវកម្មនានាក្នុងការត្រៀមឯកសារ ត្រួតពិនិត្យស្តង់ដារទំនិញ និងផ្តល់ទិន្នន័យពេញលេញ ដើម្បីឱ្យពាណិជ្ជកម្មព្រំដែនជាមួយមីយ៉ាន់ម៉ាដំណើរការដោយរលូន និងមានស្ថិរភាពជាងមុន ។

ដោយឡែក ស្ថានការណ៍ព្រំដែនជាមួយកម្ពុជា គឺនាយកដ្ឋានបានតាមដានស្ថានការណ៍យ៉ាងដិតដល់ និងសង្ឃឹមថា ជម្លោះព្រំដែនរវាងប្រទេសទាំងពីរនឹងធូរស្រាលឆាប់ៗ ដើម្បីឱ្យពាណិជ្ជកម្មព្រំដែនដំណើរការប្រក្រតីឡើងវិញ ។ នាយកដ្ឋាននឹងផ្តល់ចំណេះដឹងដល់អាជីវកម្មនានាពីការនាំទំនិញចេញ-ចូល ក៏ដូចជាត្រៀមជួយសង្គ្រោះ និងផ្តល់ភាពងាយស្រួលដល់អាជីវកម្មពេលជម្លោះព្រំដែនកម្ពុជា-ថៃស្ងប់ស្ងាត់ ។


ទោះជាបច្ចុប្បន្ន ប្រទេសថៃកំពុងស្ថិតក្នុងពេលផ្លាស់ប្តូររដ្ឋាភិបាល ប៉ុន្តែការបំពេញការងាររបស់មន្ត្រីនាយកដ្ឋានពាណិជ្ជកម្មបរទេសនៅតែដំណើរការជាបន្តបន្ទាប់ស្ថិតក្រោមថវិកាឆ្នាំ២០២៦ ដោយនាយកដ្ឋានបានអនុវត្តការងារតាមគោលនយោបាយកំណត់ និងបំពេញការងារដើម្បីពលរដ្ឋ ។

មីយ៉ាន់ម៉ាបិទព្រំដែនមេស៊ត និងមៀវឌី ធ្វើឱ្យថៃបាត់បង់ចំណូលពីការនាំចេញទំនិញរាប់ពាន់លានបាតក្នុង១ខែ ដោយសារវាជាច្រកនាំចេញទំនិញថៃដ៏សំខាន់ទៅមីយ៉ាន់ម៉ា ។ ថៃអាចដឹកជញ្ជូនទំនិញទៅដល់ចំណុចកណ្តាលប្រទេសមីយ៉ាន់ម៉ាដោយចំណាយពេលមិនដល់១ថ្ងៃ និងចំណាយថ្លៃដឹកជញ្ជូនតិចដោយសារផ្លូវងាយស្រួលធ្វើដំណើរ រីឯការដឹកទំនិញតាមច្រកព្រំដែនផ្សេងពិបាក ខណៈការដឹកទំនិញតាមផ្លូវទឹកទៅទីក្រុងយ៉ាំងហ្គន ចំណាយពេលរហូតដល់៣ថ្ងៃ ។

ឈ្មួញថៃបារម្ភយ៉ាងខ្លាំងពីការបិទព្រំដែនរបស់មីយ៉ាន់ម៉ានៅចំណុចស្រុកមេស៊ត-មៀវឌី ដោយសារពួកគេបានរងផលប៉ះពាល់ដោយសារកងទ័ពថៃបិទព្រំដែនជាឯកតោភាគីជាមួយកម្ពុជា ។ បច្ចុប្បន្ន ការនាំចេញទំនិញថៃទៅប្រទេសជិតខាងជួបឧបសគ្គ បាត់បង់ចំណូល អាជីវកម្មដួលរលំ និងរង់ចាំឱ្យនាយករដ្ឋមន្ត្រីថ្មីដែលទើបកាន់តំណែងដោះស្រាយបញ្ហាទាំងនេះ ៕

ប្រទេសកូរ៉េខាងត្បូង ៖ ថ្មីៗនេះ សមត្ថកិច្ចអន្តោប្រវេសន៍អាមេរិកបានឆែកឆេរពលករបរទេសធ្វើការក្នុងរោងចក្រ Hyundai នៅរដ្ឋ Georgia និងចា.ប់ខ្លួនពលករកូរ៉េខាងត្បូងជាង៣០០នាក់ ពីបទធ្វើការខុសច្បាប់ ។ រដ្ឋាភិបាលកូរ៉េខាងត្បូងក៏បានជួយអន្តរាគមន៍ និងឈានដល់ការធ្វើកិច្ចព្រមព្រៀងជាមួយអាមេរិកនៅថ្ងៃទី៧ ខែកញ្ញា សុំដោះលែងពលកររបស់ខ្លួន និងត្រៀមបញ្ជូនយន្តហោះទៅដឹកពលករត្រឡប់មកប្រទេសវិញ ។ នេះបើតាមការផ្សាយរបស់សារព័ត៌មានបរទេស នៅថ្ងៃទី៨ ខែកញ្ញា ឆ្នាំ២០២៥ ។

លោក Kang Hoon-sik ប្រធានមន្ត្រីរបស់ប្រធានាធិបតីកូរ៉េខាងត្បូង និយាយថា នៅពេលបញ្ចប់ដំណើរការនីតិវិធីផ្សេងៗ កូរ៉េខាងត្បូងនឹងបញ្ជូនយន្តហោះទៅទទួលពលកររបស់ខ្លួនជាង៣០០នាក់ត្រឡប់មកប្រទេសវិញ ដែលពួកគេត្រូវបានសមត្ថកិច្ចអន្តោប្រវេសន៍អាមេរិកចាប់ខ្លួនពីបទធ្វើការខុសច្បាប់ ។ រដ្ឋាភិបាលកូរ៉េខាងត្បូងបានព្យាយាមកែលម្អប្រព័ន្ធទិដ្ឋាការដើម្បីការពារកុំឱ្យកើតហេតុការណ៍បែបនេះទៀតនាថ្ងៃអនាគត ។

កាលពីថ្ងៃទី៥ ខែកញ្ញា កន្លងមក សមត្ថកិច្ចអន្តោប្រវេសន៍អាមេរិកបានចូលឆែកឆេរក្នុងរោងចក្រផលិតថ្មនៅរដ្ឋ Georgia ដែលគ្រប់គ្រងដោយក្រុមហ៊ុន Hyundai និងក្រុមហ៊ុន LG Energy Solution ។ ការចុះឆែកឆេរនេះ សមត្ថកិច្ចអន្តោប្រវេសន៍អាមេរិកក៏បានចាប់ខ្លួនពលករបរទេសសរុបជាង៤៧៥នាក់ ក្នុងនោះមានពលករកូរ៉េខាងត្បូងជាង៣០០នាក់ ពីបទធ្វើការនៅអាមេរិកខុសច្បាប់ ។

តាមការបញ្ជាក់របស់ការិយាល័យគយ និងអន្តោប្រវេសន៍អាមេរិក គឺពលករបរទេសដែលកាន់ទិដ្ឋាការរយៈពេលខ្លី (ឬទិដ្ឋាការភ្ញៀវទេសចរ) ពុំទទួលបានការអនុញ្ញាតឱ្យធ្វើការនៅអាមេរិកទេ ។ ការចុះឆែកឆេរពលករបរទេសធ្វើការក្នុងរោងចក្រ Hyundai នេះមានភាពចាំបាច់ ដើម្បីកុំឱ្យពលករបរទេសធ្វើការងាររបស់ពលរដ្ឋអាមេរិក ។

ចំណែកមន្ត្រីស៊ើបអង្កេតសន្តិសុខអាមេរិក លោក Steven Schrank បានបញ្ជាក់ក្នុងសេចក្តីថ្លែងការណ៍ថា ការចាប់ខ្លួនពលករធ្វើការនៅអាមេរិកខុសច្បាប់ គឺជាការផ្ញើសារច្បាស់លាស់ទៅកាន់ជនឆ្លៀតឱកាសទាញយកផលប្រយោជន៍ពីប្រព័ន្ធ និងធ្វើឱ្យប៉ះពាល់ដល់ការងាររបស់ពលរដ្ឋអាមេរិក ត្រូវតែទទួលខុសត្រូវ ។

កន្លងមក ក្រុមហ៊ុន LG បានប្រកាសពីពលករបរទេសភាគច្រើនត្រូវបានចាប់ខ្លួនពេលកំពុងធ្វើដំណើរទៅធ្វើការដោយប្រើប្រាស់ទិដ្ឋាការផ្សេងៗ ឬធ្វើការនៅអាមេរិកក្រោមគម្រោងលើកលែងទិដ្ឋាការ ។ ក្រោយការចាប់ខ្លួនពលករបរទេស ក្រុមហ៊ុន LG ក៏សម្រេចផ្អាកបញ្ជូនពលករទៅធ្វើការនៅអាមេរិក និងបញ្ជាឱ្យពលករកំពុងធ្វើការនៅអាមេរិកធ្វើដំណើរត្រឡប់មកប្រទេសវិញជាបន្ទាន់ ៕

បាងកក៖ អតីតនាយករដ្ឋមន្ត្រីថាក់ស៊ីន ស៊ីណាវ៉ាត្រា លោកនឹងត្រឡប់ចូលទឹកដីថៃវិញមិនឲ្យលើសពីថ្ងៃទី៨ ខែកញ្ញា ដើម្បីចូលខ្លួនទៅកាន់តុលាការកំពូលជុំវិញសំណុំរឿងបណ្ដឹងរបស់លោកនៅថ្ងៃទី៩ ខែកញ្ញា ឆ្នាំ២០២៥។ នេះបើតាមចុះផ្សាយរបស់កាសែតថៃ Khaosod នាល្ងាចថ្ងៃអាទិត្យ ទី៧ កញ្ញា។

យោងតាមសេចក្តីរាយការណ៍ចុងក្រោយបង្អស់ លោកថាក់ស៊ីន គ្រោងនឹងចាកចេញពីទីក្រុងឌូបៃនៅយប់នេះនៅម៉ោង ៩ យប់ តាមយន្តហោះឯកជនប្រភេទ T7GTS ឆ្ពោះទៅប្រទេសសិង្ហបុរីមុននឹងបន្តទៅទីក្រុងបាងកក។ គាត់ត្រូវបានគេរំពឹងថានឹងមកដល់ប្រទេសថៃនៅម៉ោង ៥ ល្ងាច ថ្ងៃច័ន្ទ ទី ៨ ខែកញ្ញា ឆ្នាំ ២០២៥។

មនុស្សជាច្រើនកំពុងតែរង់ចាំមើលដំណើររបស់លោក ថាក់សុីន ដោយសារពួកគេមានអារម្មណ៍សង្ស័យថា អតីតនាយករដ្ឋមន្រ្តីរូបនេះ មានបំណងរត់គេចខ្លួនទៅក្រៅប្រទេស ក្រោយលោកបានសុំការអនុញ្ញាតពីតុលាការដើម្បីទៅពិនិត្យសុខភាពនៅសឹង្ហបុរី ប៉ុន្តែជាជិះហួសរហូតធ្លា.យទៅដល់ទីក្រុងឌូបៃ។

ជាការឆ្លើយនឹងការសង្ស័យខាងលើ លោក ថាក់សុីន បានបកស្រាយនៅលើបណ្ដាញសង្គម X របស់លោកថា ដើមឡើយគាត់មានគម្រោងធ្វើដំណើរទៅប្រទេសសិង្ហបុរីដើម្បីពិនិត្យសុខភាពពិតមែន ប៉ុន្តែមុននឹងចាកចេញទៅបាន មន្ត្រីអន្តោប្រវេសន៍ថៃបានពន្យារពេលគាត់ជិតពីរម៉ោងជាមួយនឹងការសួរនាំជាច្រើន ព្រោះពួកគេយល់ថាលោកមិនទាន់ដាច់ស្រេចជាមួយនឹងការសម្រេចរបស់តុលាការ។

លោកថាក់សុីន បានគូសបញ្ជាក់បន្ថែមទៀតថា ដោយសារតែការពន្យាពេលនេះ ទើបធ្វើឲ្យយន្តហោះរបស់គាត់នឹងមិនអាចចុះចតនៅអាកាសយានដ្ឋានសម្រាប់យន្តហោះឯកជន Seletar របស់សឹង្ហបុរីបានទេ ក៏ព្រោះតែវាត្រូវបិទនៅម៉ោង 10 យប់ម៉ោងក្នុងស្រុកសឹង្ហបុរី។

ទោះជាយ៉ាងណាក៏ដោយ អតីតនាយករដ្ឋមន្រ្តីថៃរូបនេះបានសន្យាថា ខ្លួននឹងមិនរត់គេចទៅណានោះទេ គឺគាត់នឹងវិលត្រឡប់ទៅប្រទេសថៃវិញដើម្បីចូលរួមក្នុងសវនាការរបស់តុលាការកំពូល៕

ប្រទេសថៃ ៖ ទីក្រុងប៉ាតាយ៉ាដ៏ល្បីល្បាញរបស់ប្រទេសថៃបានរងគ្រោះដោយទឹកជំនន់ធ្ងន់ធ្ងរក្រោយពីភ្លៀងធ្លាក់ខ្លាំងមិនដល់១ម៉ោង ដែលធ្វើឱ្យពលរដ្ឋថៃត្រូវធ្វើដំណើរកាត់ទឹកលិចត្រឹមចង្កេះ ខណៈកន្លែងខ្លះនៅផ្លូវសុខុមវីដលិចរហូតដល់ត្រឹមក ។ រថយន្ត និងម៉ូតូបើកបរតាមផ្លូវបានលិចទឹករលត់ម៉ាស៊ីន ខូចខាត និងអណ្តែតទឹកជាច្រើនគ្រឿង រីឯម្ចាស់ជាប់ក្នុងរថយន្តរង់ចាំការជួយសង្គ្រោះ ។ នេះបើតាមការផ្សព្វផ្សាយរបស់សារព័ត៌មានថៃ Khaosod កាលពីថ្ងៃទី៧ ខែកញ្ញា ឆ្នាំ២០២៥ ។

នាវេលាម៉ោង៩យប់ ថ្ងៃទី៧ ខែកញ្ញា សារព័ត៌មានថៃរាយការណ៍ថា នៅទីក្រុងប៉ាតាយ៉ា ខេត្តឈុនបុរី មានភ្លៀងធ្លាក់ខ្លាំងមិនដល់១ម៉ោងផង ប៉ុន្តែធ្វើឱ្យទីកន្លែងជាច្រើនក្នុងទីក្រុងនេះលិចទឹកខ្លាំងពិបាកដល់ការធ្វើដំណើររបស់ពលរដ្ឋ ។ ជំនន់ទឹកភ្លៀងបានលិចជ្រៅក្នុងតំបន់ទំនាប ដូចជា ៖ នៅផ្លូវរថភ្លើងម្តុំផ្លូវខោតាឡូ និងផ្លូវជាតិប៉ាតាយ៉ា ដែលធ្វើឱ្យរថយន្ត និងម៉ូតូជាច្រើនគ្រឿងខូចខាត ខណៈរថយន្តខ្លះទៀតពុំអាចបើកបរតាមផ្លូវបាន ។

សមត្ថកិច្ច និងមន្ត្រីពាក់ព័ន្ធនៅទីក្រុងប៉ាតាយ៉ា បានលើកផ្ទាំងបដាដាស់តឿនពលរដ្ឋ ដោយបិទផ្លូវនានា និងដោះស្រាយការបង្ហូរទឹកតាមប្រព័ន្ធលូ ពីព្រោះពេលភ្លៀងធ្លាក់ម្តងៗ ប្រព័ន្ធលូចំណាយពេលចាប់ពី១ម៉ោង ទៅ២ម៉ោង ទើបបង្ហូរទឹកអស់ពីទីក្រុង ។ នៅពេលដោះស្រាយបញ្ហាបង្ហូរទឹករួច អាជ្ញាធរក៏បានបើកផ្លូវឱ្យពលរដ្ឋធ្វើដំណើរធម្មតាវិញ ។

ជំនន់ទឹកភ្លៀងនៅទីក្រុងប៉ាតាយ៉ាលើកនេះធ្វើឱ្យរថយន្តបើកបរតាមផ្លូវរលត់ម៉ាស៊ីនអណ្តែតទឹក ខណៈអ្នកបើកបរមួយចំនួនជាប់ក្នុងរថយន្តចេញពុំរួច ។ អាជ្ញាធរបានចាត់កម្លាំងជួយសង្គ្រោះម្ចាស់រថយន្តចេញមកក្រៅដោយសុវត្ថិភាព ហើយគ្រោះធម្មជាតិដ៏ធ្ងន់ធ្ងរនេះមិនមែនទើបតែកើតឡើងនៅទីក្រុងប៉ាតាយ៉ាទេ កន្លងមក ទីក្រុងនេះបានលិចទឹកជាញឹកញាប់ ។

ចំណែកខេត្តផ្សេងៗទៀតរបស់ថៃក៏រងផលប៉ះពាល់ធ្ងន់ធ្ងរដោយសារគ្រោះធម្មជាតិផងដែរ រួមទាំងការបាក់ដី ទឹកហូរលិចស្ពាន និងរន្ទះបាញ់ ដែលធ្វើឱ្យអាជ្ញាធរជូនដំណឹងទៅពលរដ្ឋដើម្បីបង្កើនការប្រុងប្រយ័ត្ន និងការពារខ្លួនពីគ្រោះថ្នាក់ ។ ដូចគ្នានេះ នៅទីក្រុងបាងកក និងខេត្តជាច្រើន អាជ្ញាធរបានប្រកាសឱ្យពលរដ្ឋរស់នៅក្បែរទន្លេផ្លាស់ទីជាបន្ទាន់ដើម្បីសុវត្ថិភាព ដោយសារទឹកទន្លេចៅប្រាយ៉ាកើនឡើងកាន់តែខ្ពស់ ។

គួរបញ្ជាក់ថា គ្រោះធម្មជាតិបានវាយប្រហារប្រទេសថៃជាញឹកញាប់ និងខ្លាំងក្លាជាងគេ បើធៀបនឹងប្រទេសនានាក្នុងតំបន់អាស៊ីអាគ្នេយ៍ ដូចជា ៖ ទឹកជំនន់ ខ្យល់ព្យុះ និងគ្រោះរញ្ជួយដី ដែលធ្វើឱ្យនាយករដ្ឋមន្ត្រីថ្មី លោក អនុថីន ឆាន់វីរៈគូន ប្តេជ្ញាជួយសង្គ្រោះ និងផ្តល់ប្រាក់ឧបត្ថម្ភដល់ពលរដ្ឋរងផលប៉ះពាល់ដោយសារគ្រោះធម្មជាតិ ៕

ប្រទេសថៃ ៖ បន្ទាប់ពីរដ្ឋសភាថៃបានបោះឆ្នោតជ្រើសរើសនាយករដ្ឋមន្ត្រីថ្មីកាលពីថ្ងៃទី៥ ខែកញ្ញា ឆ្នាំ២០២៥ ដែលមានភាពរអាក់រអួលប្រព័ន្ធរាប់សំឡេងឆ្នោតជាច្រើនលើក នៅទីបំផុត លោក អនុថីន ឆាន់វីរៈគូន ប្រធានគណបក្សភូមិចៃថៃ បានទទួលសំឡេងគាំទ្រពីសមាជិករដ្ឋសភាច្រើនជាងលោក ឆ័យក្សេម និទិស៊ិរី មកពីគណបក្សភឿថៃ ។ លោក អនុថីន ត្រូវបានព្រះមហាក្សត្រតែងតាំងជានាយករដ្ឋមន្ត្រីថៃថ្មីជាផ្លូវការ ហើយលោកសន្យាអនុវត្តតាមលក្ខខណ្ឌកំណត់របស់គណបក្សប្រជាជន រួមទាំងបង្ហាញឆន្ទៈដោះស្រាយជម្លោះព្រំដែនជាមួយកម្ពុជាដោយសនិ្តវិធី ។

លោក អនុថីន ឆាន់វីរៈគូន នាយករដ្ឋមន្ត្រីថៃថ្មី ទី៣២ ប្តេជ្ញាដោះស្រាយបញ្ហាធំៗនៅប្រទេសថៃ ចំនួន៤ ជាបន្ទាន់ ដែលធ្វើឱ្យប៉ះពាល់ដល់ការរស់នៅរបស់ពលរដ្ឋ ក្នុងនោះលោកនឹងដោះស្រាយជម្លោះព្រំដែនជាមួយកម្ពុជាដោយសន្តិវិធីដើម្បីកុំឱ្យប្រទេសទាំងពីរខាតបង់ ប៉ុន្តែថៃនឹងមិនបាត់បង់ទឹកដីសូម្បី១សង់ទីម៉ែត្រ ។ នេះបើតាមការផ្សព្វផ្សាយរបស់សារព័ត៌មានថៃ The Nation កាលពីថ្ងៃទី៧ ខែកញ្ញា ឆ្នាំ២០២៥ ។

បញ្ហាធំៗចំនួន៤ ដែលនាយករដ្ឋមន្ត្រីថៃថ្មីប្រកាសដោះស្រាយជាបន្ទាន់ រួមមាន ៖

១-សេដ្ឋកិច្ច ៖ នឹងពន្លឿនវិធានការកាត់បន្ថយការចំណាយក្នុងជីវភាពប្រចាំថ្ងៃរបស់ពលរដ្ឋ, កាត់បន្ថយការចំណាយលើថាមពល ការធ្វើដំណើរ និងការដឹកជញ្ជូនផ្សេងៗ ព្រមទាំងដោះស្រាយបញ្ហាការជំពាក់បំណុលរបស់កសិករ និងពលរដ្ឋមានប្រាក់ចំណូលទាប ។

២-សន្តិសុខ ៖ នឹងពន្លឿនការដោះស្រាយបញ្ហាជម្លោះព្រំដែនជាមួយប្រទេសកម្ពុជាដោយសន្តិវិធី ប៉ុន្តែថៃនឹងប្រកាន់យកគោលការណ៍ពុំបាត់បង់ទឹកដីសូម្បី១សង់ទីម៉ែត្រ ។

៣-គ្រោះធម្មជាតិ ៖ នឹងពន្លឿនការបង្កើតប្រព័ន្ធជូនដំណឹងដល់ពលរដ្ឋពីគ្រោះធម្មជាតិ ដែលលោក អនុថីន បានផ្តួចផ្តើមគំនិតនេះតាំងពីពេលកាន់តំណែងជារដ្ឋមន្ត្រីក្រសួងមហាផ្ទៃ ។ លើសពីនេះ លោកនឹងជំរុញការផ្តល់ប្រាក់សំណងឱ្យពលរដ្ឋរងគ្រោះដោយសារគ្រោះធម្មជាតិដោយស្មើភាព ។

៤-បញ្ហាសង្គម ៖ នឹងពន្លឿនការបង្ក្រាបការជួញដូរថ្នាំញៀន ការជួញដូរមនុស្ស Scammer និងភ្នាល់អនឡាញ ដោយសហការជាមួយប្រទេសជិតខាង និងបណ្តាប្រទេសជាមិត្ត ។

នាយករដ្ឋមន្ត្រីថ្មី លោក អនុថីន បញ្ជាក់ថា ការកាន់តំណែងជានាយករដ្ឋមន្ត្រីរបស់លោកពុំបានកើតឡើងដោយសារបុណ្យគុណអ្នកណាទេ លើកលែងតែបុណ្យគុណរបស់ពលរដ្ឋ តាមរយៈការបោះឆ្នោតក្នុងសភាតំណាងរាស្ត្រ ។ ក្រៅពីនេះ លោកក៏បានអរគុណការផ្តល់សំឡេងគាំទ្រ និងអរគុណគណបក្សប្រជាជនផងដែរ ហើយលោកសន្យាប្រឹងប្រែងបំពេញការងារដើម្បីដោះស្រាយបញ្ហាផ្សេងៗដែលថៃកំពុងជួបប្រទះនាពេលបច្ចុប្បន្ន ពីព្រោះលោកគ្មានពេលវេលាច្រើន ៕

ទីក្រុហតូក្យូ៖ នៅថ្ងៃអាទិត្យ ទី០៧ ខែកញ្ញាឆ្នាំ២០២៥នេះ នាយករដ្ឋមន្ត្រីជប៉ុន លោក Shigeru Ishiba បានប្រកាសថា លោកនឹងចុះចេញពីតំណែង បន្ទាប់ពីគណបក្សប្រជាធិបតេយ្យសេរី (LDP) ដែលកំពុងកាន់អំណាចបច្ចុប្បនរបស់លោក បានជាប់ពាក់ព័ន្ធនឹងរឿងអាស្រូវរៃអង្គាសប្រាក់នយោបាយជាបន្តបន្ទាប់។ នេះបើយោងតាមទីភ្នាក់សារព័ត៌មានអន្តរជាតិ NHK។

តាមប្រភពខាងលើនេះបានរាយការណ៍នៅថ្ងៃអាទិត្យថា លោកIshiba បានសម្រេចចិត្តលាលែងពីតំណែង ដើម្បីជៀសវាងការបែកបាក់គ្នា រវាងអ្នកនយោបាយនៅក្នុងគណបក្ស។ នៅក្នុងសន្និសីទសារព័ត៌មានលោក Ishiba បាននិយាយថា៖ លោកនឹងចាប់ផ្តើមដំណើរការរៀបចំការបោះឆ្នោតជ្រើសរើសថ្នាក់ដឹកនាំបក្ស ដើម្បីជ្រើសរើសអ្នកជំនួសរូបលោក។

គួរជម្រាបថា លោក Shigeru Ishiba បានចូលកាន់តំណែងជានាយករដ្ឋមន្ត្រីប្រទេសជប៉ុន កាលពីខែតុលាឆ្នាំមុន ជាមួយការសន្យាថា នឹងដោះស្រាយបញ្ហាអតិផរណា ក៏ដូចជាកំណែទម្រង់គណបក្សនៅក្នុងប្រទេសជប៉ុន។ ប៉ុន្តែក្រោយមក គណបក្យ LDP បានជាប់ពាក់ព័ន្ធនឹងរឿងអាស្រូវរៃអង្គាសប្រាក់នយោបាយជាបន្តបន្ទាប់ បណ្ដាលឲ្យគណបក្ស LDP និងដៃគូសម្ព័ន្ធរបស់ខ្លួនគណបក្ស Komeito បានបាត់បង់សំឡេងភាគច្រើននៅក្នុងការបោះឆ្នោតសភាជាន់ទាបភ្លាមៗចាប់ពីខែកក្កដាមក។

នេះគឺជាការបរាជ័យលើកទីពីរជាប់ៗគ្នា សម្រាប់ក្រុមគណបក្សចម្រុះដែលកំពុងកាន់អំណាចដែលដឹកនាំដោយនាយករដ្ឋមន្ត្រី Shigeru Ishiba ដែលជំរុញឲ្យលោកត្រូវរងភាពអាម៉ាសនិង សម្ពាធជាខ្លាំង ក៏សម្រេចចុះចេញពីតំណែងដោយស្ម័គ្រចិត្ត ពីដៃគូប្រជែងស្តាំនិយមភាគច្រើន នៅក្នុងគណបក្សរបស់លោក អស់រយៈពេលជាងមួយខែមកនេះ៕