ប្រទេសថៃ ៖ កងទ័ពថៃបានហាមពលរដ្ឋបង្ហោះរូបភាពផ្សេងៗ និងចែកចាយព័ត៌មានទីតាំងកងទ័ពក្នុងបណ្តាញសង្គម ក៏ដូចជាហាមពលរដ្ឋចូលទៅកាន់តំបន់ពង្រាយកងទ័ពនៅព្រំដែនកម្ពុជា-ថៃដើម្បីសុវត្ថិភាព ។ ការហាមឃាត់បែបនេះ គឺដើម្បីឱ្យកងទ័ពថៃងាយស្រួលចល័តកម្លាំងទៅកាន់តំបន់ព្រំដែន និងមិនចង់ឱ្យមានការបែកធ្លាយក្នុងបណ្តាញសង្គម ។

កាលពីថ្ងៃទី២៣ ខែកញ្ញា ឆ្នាំ២០២៥ នៅទីបញ្ជាការកងទ័ព លោក រីឆា សុខស៊ុវ៉ាណុន អ្នកនាំពាក្យកងទ័ពជើងគោកចោទប្រកាន់ថា បច្ចុប្បន្ន កម្ពុជាបានបង្កើនកម្លាំងកងទ័ព ល្មើសបទឈប់បាញ់ បង្កប់មីនថ្មី បង្ហោះដ្រូនសង្កេតការណ៍ ហើយថៃចាត់ទុកថា សកម្មភាពផ្សេងទៀតរបស់កម្ពុជា គឺជាការញុះញង់ជាបន្តបន្ទាប់ ។ ហេតុនេះ ដើម្បីឱ្យកងទ័ពបំពេញតួនាទីយ៉ាងសុវត្ថិភាព និងប្រសិទ្ធភាព គឺកងទ័ពសូមកិច្ចសហការពីពលរដ្ឋទាំងអស់អនុវត្តតាមវិធានការដូចខាងក្រោម ៖

១-ការផ្តល់សម្ភារៈ និងសួរសុខទុក្ខកងទ័ព ៖ ពលរដ្ឋដែលមានបំណងផ្តល់សម្ភារៈ និងសួរសុខទុក្ខកងទ័ព ចូរទំនាក់ទំនងមកកាន់ផ្នែកទទួលខុសត្រូវជាមុន រូចហើយ ពលរដ្ឋអាចផ្តល់សម្ភារៈ និងសួរសុខទុក្ខកងទ័ពក្នុងតំបន់ដែលកំណត់តែប៉ុណ្ណោះ ។

២-ការធ្វើដំណើរមកកាន់ទីតាំងកងទ័ពតាមព្រំដែន ៖ កងទ័ពជើងគោកពុំអនុញ្ញាតឱ្យពលរដ្ឋ ឬបុគ្គលខាងក្រៅចូលមកធ្វើសកម្មភាពផ្សេងៗក្នុងបរិវេណទីតាំងកងទ័ពដាច់ខាត បើពលរដ្ឋចាំបាច់ត្រូវមកកាន់ទីតាំងកងទ័ព ត្រូវតែទទួលការអនុញ្ញាតពីកងទ័ពជាមុន ។

៣-ហាមបង្ហោះរូបភាព និងចែកចាយព័ត៌មានទីតាំងកងទ័ពក្នុងបណ្តាញសង្គម ៖ សូមពលរដ្ឋ និងស្ថាប័នផ្សេងៗបញ្ឈប់ការបង្ហោះរូបភាព និងចែកចាយពីប្រតិបត្តិការកងទ័ព ដូចជា ៖ ផែនទីបង្ហាញការពង្រាយកម្លាំង ទីតាំងសំខាន់ៗក្នុងតំបន់ និងព័ត៌មានពាក់ព័ន្ធការបំពេញភារកិច្ចកងទ័ព ។

កងទ័ពថៃក៏បានអរគុណគ្រប់វិស័យទាំងអស់ដែលបានគាំទ្រ និងកិច្ចសហការពីពលរដ្ឋ ពីព្រោះវានឹងជាកម្លាំងដ៏សំខាន់ក្នុងការផ្តល់កម្លាំងចិត្តដល់កងទ័ពបំពេញភារកិច្ចនៅតំបន់ព្រំដែនកម្ពុជា-ថៃយ៉ាងសុវត្ថិភាព និងប្រសិទ្ធភាពបំផុត ។

លោក រីឆា សុខស៊ុវ៉ាណុន អ្នកនាំពាក្យកងទ័ពជើងគោកពុំបានបញ្ជាក់ថា តើបច្ចុប្បន្ន កងទ័ពថៃចល័តកម្លាំង និងធ្វើសកម្មភាពអ្វីខ្លះនៅព្រំដែនកម្ពុជា-ថៃទេ ទើបហាមពលរដ្ឋបង្ហោះរូបភាព និងចែកចាយព័ត៌មានទីតាំងកងទ័ពក្នុងបណ្តាញសង្គមដើម្បីសុវត្ថិភាព ។ ក្នុងនាមយើងជាពលរដ្ឋខ្មែរក៏ដូចគ្នាដែរ សូមកុំបង្ហោះរូបភាព និងចែកចាយទីតាំងកងទ័ពរបស់យើង ដើម្បីកុំឱ្យបែកធ្លាយព័ត៌មានទៅដល់កងទ័ពឈ្លានពានថៃ ពីព្រោះពួកគេចង់ដឹងពីទីតាំងកងទ័ព និងអាវុធរបស់យើង ៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Khaosod កាលពីថ្ងៃទី២២ ខែកញ្ញា ឆ្នាំ២០២៥ ឱ្យដឹងថា ភ្ញៀវទេសចរខកបំណងយ៉ាងខ្លាំងពុំហ៊ានមកកម្សាន្ត ឬចុះលេងទឹកសមុទ្រនៅឆ្នេរបាងសែន ស្ថិតក្នុងឃុំសែនសុខ ស្រុកមឿង ខេត្តឈុនបុរី ដោយសារនៅលើឆ្នេរខ្សាច់មានសំរាមច្រើនពេកបណ្តាលឱ្យកខ្វក់ខ្លាំង ។ អាជ្ញាធរខេត្តព្យាយាមប្រមូលសំរាមសម្អាតឆ្នេរឡើងវិញដើម្បីស្តារមុខមាត់ប្រទេសជាតិដែលធ្លាប់ទាក់ទាញភ្ញៀវទេសចរ និងមានសណ្តាប់ធ្នាប់ក្នុងការបោះចោលសំរាម ។

កាលពីថ្ងៃទី២២ ខែកញ្ញា ឆ្នេរបាងសែនដ៏ល្បីល្បាញរបស់ថៃពោរពេញទៅដោយសំរាមយ៉ាងច្រើននៅលើខ្សាច់ និងគ្មានភ្ញៀវទេសចរមកបោះតង់សម្រាក ឬទទួលទានអាហារដូចមុនទេ ដោយសារគ្មានខ្យល់បរិសុទ្ធ និងមានគំរាមសំរាមជុំវិញខ្លួន ។ សំរាមជាច្រើនប្រភេទត្រូវបានទឹករលកបោកបក់មកលើខ្សាច់ ដូចជា ៖ ថង់ផ្លាស្ទិកច្រកចំណីអាហារ កែវភេសជ្ជៈ ដបទឹក និងកំទេចកំទីឈើ ជាហេតុធ្វើឱ្យអាជ្ញាធរខេត្តឈុនបុរីបញ្ជូនកម្លាំងមកប្រមូលសំរាមតាមឆ្នេរជាបន្ទាន់ ។

អាជីវករនៅឆ្នេរបាងសែន លោក វិឆ័យ ប្លៀនប្រាសឺត អាយុ៧១ឆ្នាំ និយាយថា សំរាមទាំងនេះត្រូវបានខ្យល់បក់មកពីកន្លែងផ្សេង ហើយក្រោយពីភ្លៀងធ្លាក់ខ្លាំងធ្វើឱ្យទឹកភ្លៀងលាយសំរាមហូរចូលសមុទ្រ ។ បន្ទាប់មក ទឹករលកក៏បោកបក់សំរាមឡើងលើខ្សាច់វិញ ទើបធ្វើឱ្យឆ្នេរនេះពោរពេញដោយសំរាមយ៉ាងច្រើន ពេលភ្ញៀវទេសចរឃើញ ក៏លែងហ៊ានលេងទឹកសមុទ្រ ។ តាមពិត វាជាធម្មជាតិដែលខ្យល់បក់សំរាមមកពីកន្លែងផ្សេង វាមិនមែនជាសំរាមរបស់ភ្ញៀវទេសចរបោះចោលទេ ពីព្រោះនៅទីនេះ មានធុងសំរាមគ្រប់កន្លែង ។

លោកចង់ផ្តាំផ្ញើទៅអ្នករស់នៅតាមមាត់ប្រឡាយ ឬនៅជិតសមុទ្រ ត្រូវចោលសំរាមក្នុងធុងឱ្យបានត្រឹមត្រូវ កុំចោលសំរាមក្នុងទឹក ពីព្រោះបើមានភ្លៀងធ្លាក់វានឹងនាំសំរាមហូរចូលក្នុងសមុទ្រ ។ នេះជាការបំពុលបរិស្ថាន និងបំផ្លាញធនធានធម្មជាតិ រួមទាំងសត្វផ្សេងៗរស់នៅក្នុងសមុទ្រ ។

ចំណែកលោក ណាត់ថាផុង ជេមក្រាចាង អាយុ៤៤ឆ្នាំ ជាភ្ញៀវទេសចរនិយាយថា លោកបានធ្វើដំណើរមកឆ្នេរសមុទ្របាងសែនកាលពីថ្ងៃទី២១ ខែកញ្ញា ប៉ុន្តែពេលមកដល់ ស្រាប់តែឃើញសំរាមយ៉ាងច្រើនលើខ្សាច់ ។ កន្លងមក លោកតែងតែឃើញឆ្នេរនេះមានភាពស្រស់ស្អាត ប៉ុន្តែមកលើកនេះខកបំណងយ៉ាងខ្លាំង ងាកទៅណាឃើញតែសំរាម ទើបពុំហ៊ានលេងទឹកសមុទ្រ ។

អាជ្ញាធរខេត្តឈុនបុរីបានបញ្ជូនកម្លាំងមកប្រមូលសំរាមតាមឆ្នេរ រួចហើយ ដាក់ក្នុងរថយន្តយកទៅបោះចោល ដើម្បីធ្វើឱ្យទេសភាពមាត់សមុទ្រត្រឡប់មកស្អាត មានខ្យល់បរិសុទ្ធដូចមុន ។ ទោះយ៉ាងណា ភ្នាក់ងារប្រមូលសំរាមពុំអាចសម្អាតឆ្នេរទាន់ពេលវេលាទេ និងសំណូមពរភ្ញៀវទេសចរចោលសំរាមឱ្យបានត្រឹមត្រូវ ក៏ដូចជាសំណូមពរឱ្យអាជីវករនៅឆ្នេររក្សាអនាម័យ ចោលសំរាមក្នុងហាងរបស់ខ្លួន និងចូលរួមសម្អាតឆ្នេរជាមួយអាជ្ញាធររៀងរាល់ថ្ងៃអង្គារ ៕

ប្រទេសថៃ ៖ កាលពីថ្ងៃទី២៣ ខែកញ្ញា ឆ្នាំ២០២៥ អ្នកអានព័ត៌មានថៃដ៏ល្បី២រូបក្នុងហ្វេសប៊ុកផេកឈ្មោះ «Morning News TV3» គឺលោក សរ៉ាយុទ្ធ ស៊ុថាសាណាក់ចិន្តា និងអ្នកនាង ផិឆាយ៉ាតាន់ ចាន់ពុធ បានអានព័ត៌មានជាភាសាថៃ ប៉ុន្តែធ្វើត្រាប់តាមសំនៀងពលរដ្ឋខ្មែរ ថែមទាំងសើ.ចចំអ.ក បែរជារងនូវការរិះគ.ន់ពីអ្នកលេងបណ្តាញសង្គមនៅប្រទេសថៃថា ពុំមែនជារឿងអស់សំណើចទេ ខណៈពេលនេះ កម្ពុជា-ថៃកំពុងមានបញ្ហាជាមួយគ្នា ។

អ្នកលេងបណ្តាញសង្គមថៃពុំអស់សំណើចជាមួយអ្នកអានព័ត៌មានទាំង២រូប ពីព្រោះការនិយាយត្រាប់តាមបែបនេះជាការមើលងា.យជាតិសាសន៍ដទៃ ហើយវាជាគំរូអាក្រក់សម្រាប់ក្មេងៗជំនាន់ក្រោយ ។ ក្រោយពីមហាជនរិះគ.ន់ខ្លាំង អ្នកអានព័ត៌មានទាំង២រូប ក៏បានសូមទោសទទួលស្គាល់កំហុសថា អ្នកសារព័ត៌មានពុំគួរនិយាយត្រាប់បែបនេះ ។

នៅថ្ងៃទី២៥ ខែកញ្ញា លោក សរ៉ាយុទ្ធ បានសូមទោស ដែលខ្លួនលោក និងអ្នកនាង ផិឆាយ៉ាតាន់ និយាយត្រាប់តាមសំនៀងពលរដ្ឋខ្មែរ ថែមទាំងសើ.ចចំ.អកក្នុងកម្មវិធី ។ លោកគិតថា វាគួរឱ្យអស់សំណើច ប៉ុន្តែបែរជា Influencer និងអ្នកលេងបណ្តាញសង្គមរិះគន់ការនិយាយត្រាប់ លោកព្រមទទួលស្គាល់កំហុស និងទទួលយកការរិះគន់ពីសាធារណជន លោកខុសខ្លួនឯង ពីព្រោះជាអ្នកអានព័ត៌មានពុំគួរមើលងាយជាតិសាសន៍ដទៃ ។

លោកបន្តថា អ្នកនាង ផិឆាយ៉ាតាន់ គ្មានកំហុសទេ គឺលោកខុសខ្លួនឯងដែលឱ្យនាងនិយាយត្រាប់តាមសំនៀងពលរដ្ឋខ្មែរ ។ ហេតុនេះ សាធារណជនអាចជេរស្តី រិះគន់ ថ្កោលទោសបាន ពីព្រោះលោកមានកំហុស ត្រូវតែទទួលស្គាល់កំហុស ។ លោកជាអ្នកអានព័ត៌មានពុំគួរនិយាយត្រាប់ជាតិសាសន៍ណាមួយ ពីព្រោះជាតិសាសន៍ណាក៏ដោយមានអត្តសញ្ញាណរបស់ខ្លួន ដូច្នេះ សូមអ្នកទាំងអស់គ្នាលើកលែងទោសឱ្យផង ។

ចុងក្រោយ អ្នកអានព័ត៌មានរូបនេះសន្យាថា នឹងឈប់និយាយត្រាប់តាមសំនៀងពលរដ្ឋខ្មែរទៀតហើយ ដោយសារលើកនេះភ្លេចខ្លួន ។ លោកពិតជាសូមអភ័យទោសពីសាធារណជន និងរីករាយទទួលយកការថ្កោសទោស ។

គួរបញ្ជាក់ថា ទោះជាលោក សរ៉ាយុទ្ធ ទទួលស្គាល់កំហុស ប៉ុន្តែបែរជានិយាយចោទប្រកាន់ពលរដ្ឋខ្មែរយកទឹកដីថៃនៅតាមព្រំដែន និងចោទពលរដ្ឋខ្មែរចូលមកដាំស្វាយលើទឹកដីថៃ ទើបភ្លេចខ្លួន ក៏និយាយត្រាប់តាម ។ ប៉ុន្តែអ្នកអានព័ត៌មានរូបនេះសំណូមពរកុំឱ្យស្តីបន្ទោសអ្នកនាង ផិឆាយ៉ាតាន់ ជាដៃគូអានព័ត៌មាន ពីព្រោះនាងត្រូវខ្លួនបង្ខំឱ្យនិយាយត្រាប់ ។

ការនិយាយត្រាប់តាមសំនៀមពលរដ្ឋខ្មែរ គឺបញ្ជាក់ថា អ្នកអានព័ត៌មានរបស់ថៃគ្មានវិជ្ជាជីវៈក្នុងខ្លួនទាល់តែសោះ ពីព្រោះសំនៀងជាតិសាសន៍នីមួយៗមិនដូចគ្នាទេ ។ សូម្បីតែពលរដ្ឋថៃខ្លួនឯងក៏និយាយខុសសំនៀងគ្នាដែរ អាស្រ័យតាមតំបន់រស់នៅ និងមានភាពខុសប្លែកគ្នារវាងសំនៀងរបស់អ្នកនៅទីក្រុងបាងកក អ្នកនៅខេត្តភាគឦសាន និងភាគខាងជើង ៕

ទីក្រុងញូយ៉ក៖ ប្រធានាធិបតីអាមេរិកលោក Donald Trump បានធ្វើការរិះគ.ន់ចំៗទៅលើអង្គការសហប្រជាជាតិថាមិនបានយកចិត្តទុកដាក់បញ្ឈប់សង្រ្គា.មរបស់ប្រទេសជាច្រើន និងចោ.ទប្រកាន់អង្គការនេះថាបានបរាជ័យក្នុងបេសកកម្មជាមូលដ្ឋានបំផុតរបស់ខ្លួន ក្នុងការទប់ស្កាត់សង្គ្រាម។ នេះបើយោងតាមទីភ្នាក់ងារព័ត៌មាន BBC កាលពីថ្ងៃពុធសប្ដាហ៍នេះ។

ថ្លែងនៅក្នុងមហាសន្និបាតរបស់អង្គការសហប្រជាតិនៅទីក្រុងញូយ៉ក មេដឹកនាំកំពូលរបស់សហរដ្ឋអាមេរិកបានអះអាងថា UN ជាញឹកញាប់តែងសង្កត់ធ្ងន់លើសេចក្តីថ្លែងការណ៍ និងអនុម័តដំណោះស្រាយដោយមិនពិនិត្យមើលឲ្យច្បាស់លាស់នូវអត្ថន័យដែលគូជម្លោះចង់បាននោះទេ។ លោក Trump បានប្រកាសថា “អង្គការសហប្រជាជាតិត្រូវបានបង្កើតឡើងដើម្បីបញ្ឈប់សង្គ្រាម ប៉ុន្តែមិនដែលបានបញ្ឈប់អ្វីបាននោះទេ។ លោកបានអះអាងទៀតថា ជម្លោះរាប់មិនអស់នៅជុំវិញពិភពលោកបានបន្តផ្ទុះឡើង ខណៈដែលស្ថាប័នពិភពលោកមួយនេះនៅតែគ្មានប្រសិទ្ធភាព។

លោក Trump ក៏បានបន្តចោទស្ថាប័ននេះថាលាក់ខ្លួនពីក្រោយ«ពាក្យគ្មានបានការ» ជាជាងចាត់វិធានការម៉ឺងម៉ាត់ដើម្បីដោះស្រាយវិបត្តិ។ លោក Trump ថែមទាំងបានដកស្រង់កំណត់ត្រាផ្ទាល់ខ្លួនរបស់លោកដោយអួតពីខ្លួនឯងថា គាត់បានបញ្ចប់នូវអ្វីដែលគាត់បានពិពណ៌នាថាជា “សង្រ្គាមដែលមិនអាចបញ្ចប់បានចំនួនប្រាំពីរ” ខណៈពេលដែលចោទប្រកាន់អង្គការសហប្រជាជាតិថាឈរនៅស្ងៀម។

យ៉ាងណាក៏ដោយ ក្រុមអ្នករិះគន់បានជំទាស់នឹងការលើកឡើងរបស់លោក Trump ដោយកត់សម្គាល់ថាជម្លោះជាច្រើនដែលគាត់បានចូលខ្លួនទៅធ្វើជាអាជ្ញាកណ្ដាលនោះ នៅតែមិនទាន់ត្រូវបានដោះស្រាយចប់សព្វគ្រប់នៅឡើយ។

បកទៅកាន់ការថ្លែងរបស់លោក Trump នៅលើវេទិការបស់អង្គការសហប្រជាជាតិខាងលើ វាបានឆ្លុះបញ្ជាំងឲ្យឃើញថា សុន្ទរកថានេះបានទាក់ទាញប្រតិកម្មយ៉ាងមុតស្រួចពីមេដឹកនាំពិភពលោកនានាជាច្រើន ដែលអ្នកខ្លះបានការពារសារៈសំខាន់នៃកិច្ចសហប្រតិបត្តិការអន្តរជាតិរបស់អង្គការនេះ ចំពោះមុខលោក Trump វិញភ្លាមៗ។

តួយ៉ាង ប្រធានាធិបតីបារាំងលោក Emmanuel Macron បានធ្វើការស្តីបន្ទោសលោក Trump ដោយបើកចំហថា បញ្ហាសកលមិនអាចដោះស្រាយបានតាមរយៈ “ច្បាប់នៃភាពខ្លាំង” របស់អង្គការសហប្រជាជាតិបានទេ ប៉ុន្តែវាអាចធ្វើទៅបានតាមរយៈការប្តេជ្ញាចិត្តរួមគ្នាចំពោះសន្តិភាព និងសន្តិសុខពីគ្រប់ភាគីទាំងអស់ ៕

ឲ្យផលច្បាស់ៗពេកមិនជឿដូចជាមិនសម! គ្រោះធម្មជាតិនៅប្រទេសថៃក្នុងឆ្នាំនេះ មានសភាពខ្លាំងក្លាលើសពីឆ្នាំមុនៗ ដែលជំរុញឲ្យមានការសង្ស័យថាប្រទេសនេះហាក់កំពុងត្រូវបណ្ដាសារដូនតាខ្មែរ និងទទួលរងផលកម្មដែលខ្លួនបានឈ្លានពានមកលើកម្ពុជា ជាពិសេសការធ្វើឲ្យខូចខាតប្រាង្គប្រាសាទព្រះវិហារតាមរយៈការទម្លាក់គ្រាប់បែ.កក្នុងអំឡុងពេលនៃសង្រ្គា.មកាលពីចុងខែកក្កដាកន្លងមក។

ដូចបានដឹងស្រាប់មកហើយថា នៅក្នុងអរិយធម៌ខ្មែរយើងជំនឿអរូបិយដើរតួនាទីយ៉ាងសំខាន់ក្នុងការថែរក្សាការពារជនល្អ និងដាក់ទោសជនដែលប្រព្រឹត្តខុស ឬបៀតបៀនអ្នកដទៃ។ ជាក់ស្ដែងដូចជាការសាងសង់ប្រាសាទ ការធ្វើបដិមា និងការថ្វាយដង្វាយផ្សេងៗទៅដល់ទេព ឬប្រាសាទ អតីតព្រះមហាក្សត្យខ្មែរ ឬបុព្វបុរសជំនាន់ដើម តែឆ្លាក់ចារលើសិលាចារឹកឬធ្វើពិធីដាក់បណ្ដាសារដល់ជនណាម្នាក់ ឬក្រុមណាមួយដែលមានបំណងបំផ្លាញសមិទ្ធទាំងនោះ ឲ្យធ្លាក់នរក និងរងទុក្ខទោសវិនាសហិនហោច។

ជាក់ស្ដែង បើយោងតាមឯកសារចងក្រងនៃបណ្ដាសារដូនតាខ្មែរបានបង្ហាញពីបណ្ដាសារមួយក្នុងចំណោមបណ្ដាសារជាច្រើនផ្សេងទៀតដែលអត្ថន័យយ៉ាងដូច្នេះថា៖ ប្រទេសណា ជនសាសន៍ណា ដែលរុករាន ទន្ទ្រាន ឈ្លានពាន ទឹកដី ទ្រព្យសម្បត្តិ ដោយប្រព្រឹត្តិអំពើ ឃោរឃៅ ព្រៃផ្សៃ ធ្វើបាប ប្រមាថ មើលងាយប្រជាពលរដ្ឋ «ព្រះនគរកម្ពុជា» សូមឲ្យប្រទេសនោះ ជន នានានោះ ទទួលបាបកម្ម រងទុក្ខទោស ជួបគ្រោះអាសន្ន មហន្តរាយ វិនាសហិនហាយ ឈ្លោះទាស់ទែង ខ្វែងគំនិតគ្នា អាប់ឱនកេរ្តិ៍ឈ្មោះ ជួបគ្រោះកាចហូរហែ កុំបីអាក់ខាន គ្មានសុខក្សេមក្សាន្ត បានតែក្តៅក្រហាយ ពុំសប្បាយក្នុងស្រុកនិងជាតិសាសន៍ខ្លួននោះពុំលែងឡើយ។ សូមអស់ទេពនិករ អមរមេឃ ទេវតា ឥន្ទ្រ ព្រហ្ម យម យក្ស ទេព្រក្ស ល្បាក់សា អារក្ស អ្នកតា យាយទេព បង់បទ ខ្មោច ព្រាយ បិសាច អសុរកំណាចក្លោងខ្លាំងផងទាំងពួង ជួយជាសាក្សី កុំបីរំលងផងចុះ!

ជុំវិញការលើកឡើងពីពាក្យផ្ដាសារខាងលើនេះ វាបានធ្វើឲ្យយើងចាប់អារម្មណ៍នឹងរឿងរ៉ាវ និងបញ្ហាទាំងឡាយដែលកំពុងកើតមាននៅក្នុងប្រទេសថៃ ដែលមានទាំងការវា.យប្រហារដោយគ្រោះធម្មជាតិជាប់ៗគ្នាឥតឈប់ឈររួមមាន គ្រោះរញ្ជួយដី ខ្យល់ព្យុះ ទឹកជំនន់ និងការបាក់ស្រុតដីក្នុងពេលថ្មីៗនេះ ក៏ដូចជាបញ្ហាប្រឈមទាំងឡាយដូចជាអស្ថិរភាពនយោបាយ បញ្ហាសេដ្ឋកិច្ច និងជំងឺឆ្លងផ្សេងៗ បានឆ្លុះបញ្ជាំងយ៉ាងច្បាស់ពីភាពមិនប្រក្រតីជាជាងការចៃដន្យ។

យ៉ាងណាក៏ដោយ ទាំងនេះគឺជាជំនឿសម្រាប់បុគ្គលម្នាក់ៗដាច់ដោយឡែកពីគ្នាអាស្រ័យទៅតាមការគិតពិចារណារៀងៗខ្លួន។ ជាក់ស្ដែងសម្រាប់ប្រជាជនថៃផ្ទាល់បានយល់ឃើញថា ការលើកឡើងពីបណ្ដាសាររបស់ដូនតាខ្មែរនេះ គឺគ្រាន់តែជារឿងមិនពិតដែលពលរដ្ឋកម្ពុជាបង្កើតឡើងដើម្បីសើចចម្អកថៃចំពេលមានទុក្ខ និងមិនទទួលស្គាល់ជាដាច់ខាតថាវាជាកម្មផល ត្បិតកន្លងមកថៃជឿជាក់ថាខ្លួនមិនដែលបានបំពានលើកម្ពុជាឡើយ ហើយបញ្ហាដែលបានកើតមានទាំងអស់គឺជាការចៃដន្យ និងកន្លងមកថៃក៏ធ្លាប់ជួបប្រទះនឹងគ្រោះធម្មជាតិបែបនេះដូចគ្នា។

ជាងនេះទៅទៀត ពលរដ្ឋថៃថែមទាំងចោ.ទប្រកាន់កម្ពុជាវិញថា ឆ្លៀតពេលដែលថៃជួបទុក្ខលំបាក ពលរដ្ឋកម្ពុជាបែរជានាំគ្នាអបអរសាទរ ចម្អកឌឺដង បង្ហាញពីភាពគ្មានមនុស្សធម៌ក្នុងនាមជាអ្នកជិតខាងនឹងគ្នា។ កត្តានេះបានជំរុញឲ្យពលរដ្ឋខ្មែរហួសចិត្តជាខ្លាំង ព្រោះកន្លងមកថៃខ្លួនឯងតែងប្រមាថមើលងាយមកកាន់កម្ពុជាជារឿយៗ ប៉ុន្តែពេលនេះបែរជាមកនិយាយពីគុណធម៌ និងមនុស្សធម៌ដូចខ្លួនជាមនុស្សត្រឹមត្រូវទៅវិញ៕