វៀតណាមបញ្ជូនស្រ្តីកែភេ.ទដំបូងគេទៅប្រកួតបវរកញ្ញាចក្រវាលឆ្នាំ ២០២៥

គណៈកម្មាធិការរៀបចំបវរកញ្ញាចក្រវាលវៀតណាមនាល្ងាចថ្ងៃទី២៤ ខែកញ្ញា បានប្រកាសជាផ្លូវការថា Huong Giang នឹងក្លាយជាតំណាងរបស់វៀតណាមទៅចូលរួមប្រកួតបវរកញ្ញាចក្រវាលឆ្នាំ ២០២៥ ដែលគ្រោងនឹងប្រព្រឹត្តទៅនៅខែវិច្ឆិកានៅប្រទេសថៃ។ នេះជាលើកទីមួយហើយដែលវៀតណាមបញ្ជូនស្រ្តីកែភេទទៅប្រកួតបវរកញ្ញាចក្រវាល ដែលជាចំណុចរបត់ថ្មីមួយ។

ការជ្រើសរើស Huong Giang បានបង្កើតឱ្យមានការចាប់អារម្មណ៍ជាសាធារណៈ។ អ្នករៀបចំកម្មវិធី បានបញ្ជាក់ថា ពួកគេពិតជាកោតសរសើរយ៉ាងខ្លាំងចំពោះការប្តេជ្ញាចិត្តរបស់ភាពស្រស់ស្អាត រូបភាពលើកទឹកចិត្ត និងជម្រៅនៃសកម្មភាពសហគមន៍ បន្ទាប់ពីសកម្មភាពសិល្បៈជាច្រើនឆ្នាំរបស់នាង។ មុនពេលប្រឡងប្រជែងថ្មីនៅបវរកញ្ញាចក្រវាល Huong Giang មានស្នាដៃគួរឱ្យកត់សម្គាល់ក្នុងការប្រកួតបវរកញ្ញាកែភេទ។

ឈ្មោះពេញរបស់នាងគឺ Nguyen Huong Giang អាយុ ៣៤ ឆ្នាំមកពីទីក្រុងហាណូយ ហើយនាងបានទាក់ទាញការចាប់អារម្មណ៍ពីទស្សនិកជននៅពេលនាងបានចូលក្នុង Top 4 នៃ Vietnam Idol 2012។ ក្នុងឆ្នាំ ២០១៨ នាង បានក្លាយជា Miss International Queen នៅប្រទេសថៃ។ បន្ទាប់នាងមកមានសកម្មភាពជាច្រើនទាក់ទងនឹងបវរកញ្ញាក្នុងប្រទេស ដូចជាការរៀបចំកម្មវិធីប្រកួតសម្រស់សម្រាប់អ្នកកែភេទ ការធ្វើជាគ្រូបង្វឹកសម្រាប់កម្មវិធីប្រកួតសម្រស់-តារាបង្ហាញម៉ូតជាដើម។

នៅឆ្នាំ២០២៤ Huong Giang បានដើរតួជាអ្នកផលិតបវរកញ្ញាចក្រវាលវៀតណាម។ ពោលគឺចាប់តាំងពីគ្រងតំណែងរបស់ខ្លួនមកនាងបានផ្តោតលើតន្ត្រី ទូរទស្សន៍ ការផលិតកម្មវិធី និងគម្រោងសង្គម។ ជាមួយនឹងសមិទ្ធិផលដ៏គួរឱ្យចាប់អារម្មណ៍ និងបទពិសោធន៍ដ៏សម្បូរបែបក្នុងវិស័យបវរកញ្ញា អ្នកគាំទ្រវៀតណាមសង្ឃឹមថា Huong Giang នឹងបន្តបង្កើតប្រវត្តិសាស្ត្រក្នុងការប្រកួតសម្រស់ Miss Universe នៅប្រទេសថៃ៕