ប្រទេសដាណឺម៉ាក ៖ ទោះជាបណ្តាញសង្គមផ្តល់នូវគុណសម្បត្តិជាច្រើនដូចជា ស្រាវជ្រាវឯកសារ ស្វែងរកទិន្នន័យយ៉ាងទូលំទូលាយ មិនថាទិន្នន័យបច្ចេកវិទ្យា ការផ្តល់ចំណេះដឹងអប់រំ និងភ្ជាប់ទំនាក់ទំនង ប៉ុន្តែវាក៏ផ្តល់នូវគុណវិបត្តិដែរ ជាពិសេស កុមារ ។ បណ្តាញសង្គមធ្វើឱ្យកុមារនៅប្រទេសនានាញៀននឹងការចុចទូរស័ព្ទ បោះបង់ការអានសៀវភៅ ពុំចូលរួមសកម្មភាពសង្គម ដែលផលប៉ះពាល់ទាំងនេះធ្វើឱ្យប្រទេសដាណឺម៉ាកគ្រោងបង្កើតច្បាប់ហាមឃាត់កុ.មារអាយុក្រោម១៥ឆ្នាំលេងបណ្តាញសង្គម ។

ដាណឺម៉ាកនឹងបង្កើតច្បាប់ហាមឃាត់កុ.មារអាយុក្រោម១៥ឆ្នាំលេងបណ្តាញសង្គមដើម្បីកាត់បន្ថយផលប៉ះពាល់សុខភាពផ្លូវចិត្ត និងអាកប្បកិរិយាកុមារ-យុវជន ដែលការហាមឃាត់នេះចាត់ទុកជាវិធានការសុវត្ថិភាពឌីជីថលដ៏តឹងរ៉ឹងបំផុតនៅតំបន់អឺរ៉ុប បន្ទាប់ពីអូស្ត្រាលី ។ នេះបើតាមការចុះផ្សាយរបស់សារព័ត៌មានបរទេសនៅថ្ងៃទី៨ ខែតុលា ឆ្នាំ២០២៥ ។

នាយករដ្ឋមន្ត្រីដាណឺម៉ាក លោកស្រី Mette Frederiksen បានថ្លែងពីការបង្កើតច្បាប់ហាមឃាត់កុមារអាយុក្រោម១៥ឆ្នាំលេងបណ្តាញសង្គម ពេលលោកស្រីថ្លែងទៅកាន់រដ្ឋសភាក្នុងពិធីបើកសម័យប្រជុំនារដូវស្លឹកឈើជ្រុះ ។ ការបង្កើតច្បាប់នេះមានគោលបំណងកាត់បន្ថយផលប៉ះពាល់លើសុខភាពផ្លូវចិត្ត និងអាកប្បកិរិយាកុមារ-យុវជនដោយសារការលេងបណ្តាញសង្គម វាជាវិធានការសុវត្ថិភាពឌីជីថលសម្រាប់កុមារដ៏តឹងរ៉ឹងបំផុតនៅតំបន់អឺរ៉ុប ប៉ុន្តែលោកស្រីពុំបានបញ្ជាក់ តើនឹងហាមឃាត់កុមារលេងបណ្តាញសង្គមណាខ្លះ និងអនុវត្តបែបណា ។

លោកស្រី Frederiksen ថ្លែងថា ទូរស័ព្ទដៃ និងបណ្តាញសង្គម កំពុងតែលួចពេលវេលារបស់កុមារនៅប្រទេសដាណឺម៉ាក បច្ចុប្បន្ន ក្មេងប្រុសដាណឺម៉ាក អាយុពី១១ឆ្នាំ ទៅ១៩ឆ្នាំ រហូតដល់៦០% សុខចិត្តនៅផ្ទះលេងបណ្តាញសង្គម និងបដិសេធការចូលរួមជាមួយមិត្តភក្តិនៅខាងក្រៅ ។ វាឆ្លុះបញ្ចាំងពីការផ្លាស់ប្តូរក្នុងសង្គមដោយសារការញៀនបណ្តាញសង្គម និងបច្ចេកវិទ្យា ។

គួរបញ្ជាក់ថា ដាណឺម៉ាកមិនមែនជាប្រទេសដំបូងទេដែលបង្កើតច្បាប់ហាមឃាត់កុមារលេងបណ្តាញសង្គម គឺកាលពីឆ្នាំ២០២៤ ប្រទេសអូស្ត្រាលីបានប្រកាសហាមកុមារអាយុក្រោម១៦ឆ្នាំលេងបណ្តាញសង្គមដូចគ្នា ប៉ុន្តែគ្មានព័ត៌មានលម្អិត តើអូស្ត្រាលីអនុវត្តវិធានការនេះដូចម្តេចទៅលើការលេង Facebook, Snapchat, TikTok និង YouTube ។

ចំណែកប្រទេសក្រិកបានស្នើកំណត់អាយុពលរដ្ឋអាចប្រើប្រាស់បណ្តាញសង្គមទៅកាន់សហភាពអឺរ៉ុប ដើម្បីរឹតបន្តឹងការលេងបណ្តាញសង្គមរបស់កុមារ ខណៈឪពុក-ម្តាយក៏ពុំអនុញ្ញាតឱ្យកូនៗលេងបណ្តាញសង្គមដែរ ពីព្រោះបារម្ភពីផលប៉ះពាល់ទាំងផ្លូវចិត្ត និងលទ្ធផលរៀនសូត្រ ៕

ប្រទេសថៃ៖ ស្ថានភាពទឹកជំនន់ដ៏ធ្ងន់ធ្ងរនៅប្រទេសថៃបានបន្តវា.យប្រហារលើខេត្តចំនួន 19 ដែលបណ្ដាលឲ្យមនុស្សចំនួន 22នាក់ហើយបានបាត់បង់ជីវិត និងបង្ខំឲ្យជិត 37មុឺននាក់ផ្សេងទៀតត្រូវជម្លៀសចេញពីផ្ទះរបស់ពួកគេជាបន្ទាន់ ហើយនៅពេលនេះកំពុងដង្ហើយរកជំនួយពីរដ្ឋាភិបាល។ នេះបើតាមការចុះផ្សាយរបស់សារព័ត៌មាន The Nation នាថ្ងៃទី8 ខែតុលា ឆ្នាំ2025។

បើតាមរបាយការណ៍របស់នាយកដ្ឋានបង្ការ និងកាត់បន្ថយគ្រោះមហន្តរាយរបស់ថៃ (DDPM) បានបញ្ជាក់ថា ទឹកជំនន់នៅតែបន្តវាយលុកខេត្តចំនួន 19 នៅទូទាំងប្រទេសថៃ ដោយបានប៉ះពាល់ដល់ស្រុកចំនួន 84 ស្រុក 541 ស្រុក និងភូមិចំនួន 3,036 ។ សរុបមក វាបានធ្វើឲ្យប្រជាពលរដ្ឋថៃប្រមាណ 109,26 គ្រួសារ ឬ 369,724 នាក់បានទទួលរងផលប៉ះពាល់ដោយផ្ទាល់។ ក្នុងនោះចំនួនអ្នកស្លា.ប់បានកើនឡើងដល់ 22នាក់ហើយ នេះបើតាមការផ្ទៀងផ្ទាត់ចុងក្រោយ។

ទិន្នន័យខាងលើនេះបានរៀបរាប់បន្ថែមថា ជនរងគ្រោះទាំងនោះគឺបានបា.ត់បង់ជីវិតនៅក្នុងខេត្តចំនួន 6 រួមមាន៖ ខេត្ត Phichit ចំនួន 1នាក់, ខេត្តPhetchabun ចំនួន 1នាក់, ខេត្ត Phitsanulok ចំនួន 1នាក់, ខេត្ត Yasothon ចំនួន 3នាក់, ខេត្ត Ayutthaya ចំនួន 8នាក់ និងខេត្ត Uttaradit ចំនួន 8នាក់។

ជាការឆ្លើយតប ក្រោយមានការអំពាវនាវពីពលរដ្ឋ រដ្ឋាភិបាលថៃដែលដឹកនាំដោយនាយករដ្ឋមន្រ្តី Anutin បានប្រកាសផ្ដល់ជំនួយជាទឹកថវិកាក្នុងមួយគ្រួសារចំនួន 9,000បាត (ជិត 250ដុល្លារ)។ ការសម្រេចនេះស្របនឹងដំណោះស្រាយដែលបានអនុម័តក្នុងកិច្ចប្រជុំលើកដំបូងរបស់គណៈកម្មាធិការជាតិគ្រប់គ្រងគ្រោះមហន្តរាយឆ្នាំ2025 ដែលធ្វើឡើងនៅថ្ងៃទី6 ខែតុលា។

យ៉ាងណាក៏ដោយ បើតាមការអះអាងរបស់ពលរដ្ឋថៃនៅតាមតំបន់មួយបានបង្ហាញថា ពួកគេមានការអន់ចិត្តនឹងរដ្ឋាភិបាលខ្លួនជាខ្លាំង ដោយសារតែស្ថានភាពទឹកជំនន់នេះ បានប៉ះពាល់ដល់ការរស់នៅ របររកសុី និងជីវភាពរបស់ពួកគាត់អស់រយៈពេលជាង 2ខែមកហើយ ប៉ុន្តែមកទល់ពេលនេះទទួលបានត្រឹមជំនួយតិចតួច។

ចំណែកពលរដ្ឋផ្សេងទៀតនៅខេត្តអយុធ្យាបានអង្វរឱ្យស្ថាប័នរដ្ឋាភិបាល និងផ្នែកឯកជន ជួយផ្តល់ជំនួយសង្រ្គោះដល់ពលរដ្ឋឱ្យបានគ្រប់ៗគ្នាផង ពីព្រោះស្ថានភាពទឹកទន្លេហាក់ទំនងជាមិនងាយនឹងស្រកនោះទេ រីឯការរស់នៅរបស់ពួកគេកាន់តែលំបាកខ្លាំងឡើង ជាពិសេសផ្ទះដែលមានមនុស្សចាស់និងកុមារតូចៗ។

គួរជម្រាបថា ការជន់លិចដោយទឹកជំនន់នៅថៃបានកើតមាន និងវា.យប្រហារលើខេត្តជាច្រើនរបស់ថៃ រួមទាំងទីក្រុងបាងកកផងដែរ។ ទន្ទឹមនឹងនេះ ភ្លៀងនៅតែបន្តធ្លាក់ខ្លាំងៗឥតឈប់ឈរតាមរយៈឥទ្ធិពលរបស់ព្យុះខុសៗគ្នាដែលបានប្ដូរវេនគ្នាបក់បោកមកលើថៃជាបន្តបន្ទាប់ បណ្ដាលឲ្យពលរដ្ឋថៃរងទុក្ខលំបាកអស់រយៈពេលជាង2ខែមកហើយ៕

ប្រធានាធិបតីអាមេរិក លោក Donald Trump បានកំណត់លក្ខខណ្ឌធ្វើជាប្រធានពិធីចុះហត្ថលេខាលើកិច្ចព្រមព្រៀងសន្តិភាពរវាងកម្ពុជា-ថៃក្នុងកិច្ចប្រជុំកំពូលអាស៊ាននៅចុងខែតុលា ឆ្នាំ២០២៥ ដើម្បីទទួលបានពានរង្វាន់ណូបែលសន្តិភាពប្រចាំឆ្នាំ២០២៥ បន្ទាប់ពីលោកបញ្ចប់សង្គ្រា.មជាច្រើនប្រទេស រួមទាំងសង្គ្រាមកម្ពុជា-ថៃ ដែលបង្កឡើងដោយកងទ័ពឈ្លា.នពានថៃ ។ នេះបើតាមការចុះផ្សាយរបស់សារព័ត៌មានចិននៅថ្ងៃទី៧ ខែតុលា ឆ្នាំ២០២៥ ។

តាមប្រភពព័ត៌មានពីមន្ត្រីរដ្ឋាភិបាល និងមន្ត្រីទូតម៉ាឡេស៊ី ចំនួន៤នាក់ ឱ្យដឹងថា ប្រធានាធិបតីអាមេរិក លោក Trump បានកំណត់លក្ខខណ្ឌធ្វើជាប្រធានពិធីចុះហត្ថលេខាលើកិច្ចព្រមព្រៀងសន្តិភាពកម្ពុជា-ថៃ ទើបលោកចូលរួមក្នុងកិច្ចប្រជុំកំពូលអាស៊ាននៅទីក្រុងកូឡាឡាំពួរ ប្រទេសម៉ាឡេស៊ី នាចុងខែតុលា ។ លោក Trump ស្នើរៀបចំពិធីពិសេសមួយនៅក្រៅកិច្ចប្រជុំកំពូលអាស៊ាន ។

បណ្តាប្រទេសអាស៊ានសង្ឃឹមកិច្ចប្រជុំកំពូលដែលនឹងរៀបចំចាប់ពីថ្ងៃទី២៦ ដល់ថ្ងៃទី២៨ ខែតុលា គឺជាចរចាឱ្យលោក Trump បន្ធូរបន្ថយវិធានការពន្ធទំនិញដ៏តឹងរ៉ឹងដែលអាមេរិកអនុវត្តជាមួយបណ្តាប្រទេសដៃគូពាណិជ្ជកម្មទូទាំងពិភពលោក ស្របពេលមានស្ថានការណ៍តាងតឹងរវាងកម្ពុជា-ថៃ ។ រីឯលោក Trump បានស្វែងរកសន្តិភាពរវាងប្រទេសទាំងពីរដើម្បីទទួលពានរង្វាន់សន្តិភាព ។

សង្គ្រាមនៅតំបន់ព្រំដែនកម្ពុជា-ថៃរយៈពេល៥ថ្ងៃកន្លងមក គឺបង្កឡើងដោយកងទ័ពឈ្លានពានថៃ ហើយប្រទេសទាំងពីរក៏ចាប់ផ្តើមចរចាសន្តិភាពក្រោយពីលោក Trump ថ្លែងថា នឹងពុំចរចាពន្ធទំនិញ បើប្រទេសទាំងពីរមិនឈប់បាញ់ ។ កម្ពុជា-ថៃបានធ្វើកិច្ចព្រមព្រៀងបទឈប់បាញ់បន្ទាន់ដោយឥតលក្ខខណ្ឌ ប៉ុន្តែស្ថានការណ៍ព្រំដែនបានតានតឹងម្តងទៀត ក្រោយរដ្ឋាភិបាល និងកងទ័ពថៃ គំរាមបណ្តេញពលរដ្ឋខ្មែរចេញពីភូមិជោគជ័យ និងភូមិព្រៃចាន់ មុនថ្ងៃទី១០ ខែតុលា ។

រយៈពេល១ឆ្នាំមកនេះ លោក Trump ព្យាយាមបញ្ចប់សង្គ្រាមនៅប្រទេសជាច្រើន រួមទាំងសង្គ្រាមកម្ពុជា-ថៃ ដើម្បីទទួលបានពានរង្វាន់ណូបែលសន្តិភាពប្រចាំឆ្នាំ២០២៥ ។ តាំងពីត្រឡប់មកកាន់តំណែងជាប្រធានាធិបតីអាមេរិកកាលពីខែមករា ឆ្នាំ២០២៥ លោកបានជួយបញ្ចប់សង្គ្រាម និងជម្លោះ រហូតដល់៧កន្លែងនៅលើពិភពលោក ។

សេចក្តីរាយការណ៍របស់គេហទំព័រព័ត៌មាន Politico អាមេរិកដែលដកស្រង់ប្រភពព័ត៌មានពីមន្ត្រីសេតវិមានជាច្រើនរូប គឺលោក Trump បានកំណត់លក្ខខណ្ឌធ្វើជាប្រធានពិធីចុះហត្ថលេខាសន្តិភាពកម្ពុជា-ថៃ ទើបលោកចូលរួមកិច្ចប្រជុំកំពូលអាស៊ាន ។ លោក Trump ក៏បានស្នើឱ្យអ្នករៀបចំកិច្ចប្រជុំដកមន្ត្រីចិនចេញពីកិច្ចប្រជុំ ប៉ុន្តែពុំទាន់មានព័ត៌មានច្បាស់ថា តើនឹងមានពិធីចុះហត្ថលេខាសន្តិភាពកម្ពុជា-ថៃក្នុងកិច្ចប្រជុំកំពូលអាស៊ានឬយ៉ាងណា ដោយត្រូវរង់ចាំការសម្រេចចិត្ត ។

គួរបញ្ជាក់ថា ក្រៅពីវត្តមានលោក Trump ក្នុងកិច្ចប្រជុំកំពូលអាស៊ាន គឺនៅមានមន្ត្រីជាន់ខ្ពស់ជាច្រើនរូបទៀតមកចូលរួមកិច្ចប្រជុំដែរ រួមមាន ៖ លោក Li Qiang នាយករដ្ឋមន្ត្រីចិន, លោក Narendra Modi នាយករដ្ឋមន្ត្រីឥណ្ឌា, លោក Luiz Inacio Lula da Silva ប្រធានាធិបតីប្រេស៊ីល និងលោក Cyril Ramaphosa ប្រធានាធិបតីអាហ្វ្រិកខាងត្បូង ៕

ប្រទេសថៃ ៖ នាយករដ្ឋមន្ត្រីថៃ លោក អនុថីន ឆាន់វីរៈគូន បាននិយាយនាពេលថ្មីៗនេះថា ការបណ្តេញពលរដ្ឋខ្មែរចេញពីតំបន់ព្រំដែនភូមិណងចាន់ ខេត្តស្រះកែវ មុនថ្ងៃទី១០ ខែតុលា គឺគ្រាន់តែជាការកំណត់ពេលវេលារបស់អភិបាលខេត្តស្រះកែវប៉ុណ្ណោះ ។ ភាគីទាំងពីរត្រូវចរចា និងអនុវត្តវិធានការផ្លូវច្បាប់ច្រើន មិនមែនបណ្តេញពលរដ្ឋខ្មែរចេញភ្លាមៗពេលកម្ពុជា-ថៃកំពុងប្រឈមមុខគ្នាទេ ប៉ុន្តែនៅថ្ងៃទី៧ ខែតុលា លោកបែរជាស្នើកម្ពុជាអនុវត្តតាមកិច្ចប្រជុំ GBC ដោយបណ្តេញពលរដ្ឋខ្មែរចេញពីតំបន់នេះមុនថ្ងៃទី១០ ខែតុលា បើមិនដូច្នោះទេ ថៃនឹងមិនចរចា ។

តាមការចុះផ្សាយរបស់សារព័ត៌មាន Thairath នៅថ្ងៃទី៧ ខែតុលា ឆ្នាំ២០២៥ ឱ្យដឹងថា នាយករដ្ឋមន្ត្រីថៃ លោក អនុថីន ឆាន់វីរៈគូន បានចោទប្រកាន់ពលរដ្ឋខ្មែរល្មើសអធិបតេយ្យនៅតំបន់ព្រំដែនភូមិណងចាន់ និងស្នើកម្ពុជាអនុវត្តតាមកិច្ចប្រជុំ GBC ដោយបណ្តេញពលរដ្ឋខ្មែរចេញពីតំបន់នេះមុនថ្ងៃទី១០ ខែតុលា ។ លោកបានប្រគល់អំណាចពេញលេញទៅឱ្យកងទ័ព ក្រសួងការបរទេស និងអភិបាលខេត្តស្រះកែវ ចាត់វិធានការនៅព្រំដែនកម្ពុជា-ថៃ បើមន្ត្រីទាំងនេះសម្រេចបែបណា គឺដូចគ្នានឹងការសម្រេចចិត្តរបស់នាយករដ្ឋមន្ត្រីដែរ ។

នៅថ្ងៃទី៧ ខែតុលា នៅវិមានរដ្ឋាភិបាល លោក អនុថីន បាននិយាយពីថៃកំណត់ឱ្យពលរដ្ឋខ្មែរចាកចេញពីតំបន់ព្រំដែនភូមិណងចាន់ ខេត្តស្រះកែវ មុនថ្ងៃទី១០ ខែតុលា ។ លោកថា កាលពីថ្ងៃទី៦ ខែតុលា លោកបានប្រជុំពិភាក្សាជាមួយមន្ត្រីពាក់ព័ន្ធដោយកំណត់ឱ្យកម្ពុជាអនុវត្តតាមកិច្ចព្រមព្រៀង GBC ដែលពិភាក្សាចំនួន៤ប្រធានបទ រួមមាន ៖ ការដកអាវុធ, ដកកម្លាំងទ័ព, សហការបង្ក្រាប Scammer និងរួមគ្នារៀបចំសណ្តាប់ធ្នាប់ព្រំដែន មានន័យថា តំបន់ណាជារបស់ថៃ គឺពលរដ្ឋខ្មែរត្រូវចាកចេញ ។

លោកបន្តថា ពលរដ្ឋថៃត្រូវទទួលបានភាពយុត្តិធម៌ ពលរដ្ឋថៃគ្រប់រូបស្ថិតក្រោមច្បាប់តែមួយ ។ អ្នកល្មើសអធិបតេយ្យថៃ ត្រូវតែចាកចេញ បើមិនចាកចេញ ថៃនឹងមិនចរចាឡើយ ។ លោកមិនចង់និយាយអ្វីច្រើនទេ ដោយសារបានប្រគល់អំណាចពេញលេញឱ្យកងទ័ពរក្សាអធិបតេយ្យ ការពារទឹកដី ខណៈរដ្ឋាភិបាលជាអ្នកគាំទ្រកងទ័ព ។ ការចរចាការទូត និងលក្ខខណ្ឌផ្សេងៗ គឺជាតួនាទីរបស់ក្រសួងការបរទេស រីឯអភិបាលខេត្តស្រះកែវមើលខុសត្រូវតំបន់ព្រំដែនស្រះកែវ ។

ករណីការលើកពេលកិច្ចប្រជុំ RBC ទៅពាក់កណ្តាលខែតុលា គឺគ្រប់យ៉ាងមានហេតុផល លោកបានប្រគល់អំណាចឱ្យមន្ត្រីពាក់ព័ន្ធទទួលខុសត្រូវ ។ មន្ត្រីពាក់ព័ន្ធអាចចរចា ឬចាត់វិធានការរឿងនេះ ពីព្រោះលោកប្រគល់អំណាចឱ្យរួចហើយ បើមន្ត្រីសម្រេចបែបណា គឺវាដូចគ្នានឹងការសម្រេចចិត្តរបស់នាយករដ្ឋមន្ត្រី ។ លោកនឹងចុះពិនិត្យមើលស្ថានការណ៍នៅតំបន់ព្រំដែនភូមិណងចាន់ ខេត្តស្រះកែវ ពេលកងទ័ពស្នើ ។ នេះបើតាមការលើកឡើងរបស់នាយករដ្ឋមន្ត្រីថៃ ។

គួរបញ្ជាក់ថា ករណីភូមិជោគជ័យ និងភូមិព្រៃចាន់ ដែលកងទ័ពភូមិភាគទី១ថៃស្នើឱ្យកម្ពុជាជម្លៀសពលរដ្ឋចេញ ទើបកងទ័ពភូមិភាគទី១ថៃចូលរួមប្រជុំណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) ចាប់ពីថ្ងៃទី១០ ដល់ថ្ងៃទី១២ ខែតុលា ឆ្នាំ២០២៥ នៅខេត្តបន្ទាយមានជ័យ គឺកម្ពុជាស្នើថៃត្រូវអនុវត្តតាមអ្វីដែលជាការព្រមព្រៀងគ្នារបស់គណៈកម្មាធិការព្រំដែនទូទៅ GBC នៃប្រទេសទាំងពីរ កាលពីថ្ងៃទី១០ ខែកញ្ញា ឆ្នាំ២០២៥ កន្លងទៅ ពិសេសក្នុងចំណុចទី៨ នៃកំណត់ហេតុកិច្ចប្រជុំដែលបានប្រគល់ភារកិច្ចឱ្យ JBC ដែលជាយន្តការមានសមត្ថកិច្ចក្នុងការប្រជុំដោះស្រាយ ។ ដោយឡែក កិច្ចប្រជុំ RBC ក្នុងកម្រិតយោធភូមិភាគ គឺមានភារកិច្ចត្រឹមតែសម្រួលបញ្ហានៅនឹងកន្លែង បន្ធូរបន្ថយការតានតឹង និងដោះស្រាយបញ្ហាដោយសន្តិវិធី ប៉ុន្តែគ្មានសមត្ថកិច្ចកំណត់ខ្សែព្រំដែនទេ ៕

ប្រទេសឥណ្ឌា៖ ប្រទេសឥណ្ឌាបានហាមឃា.ត់ការលក់ស៊ីរ៉ូក្អកមួយប្រភេទ បន្ទាប់ពីកុមារយ៉ាងហោចណាស់ 14 នាក់បានស្លា.ប់នៅក្នុងរដ្ឋខុសៗគ្នា ក្រោយពីពួកគេបានប្រើប្រាស់សុីរ៉ូក្អកដែលមានផ្ទុកសារធាតុគីមីគ្រោះថ្នាក់បណ្ដាលឲ្យពុល បង្កឱ្យមានការព្រួយបារម្ភទូទាំងប្រទេសអំពីសុវត្ថិភាពនៃឱសថ។ នេះបើយោងតាមការចុះផ្សាយដោយសារព័ត៌មានក្នុងស្រុកឥណ្ឌា។

បើតាមអត្ថបទព័ត៌មានរបស់ Reuters នាថ្ងៃចន្ទ ទី6 ខែតុលានេះបានឲ្យដឹងថា ប៉ូលីសឥណ្ឌាបានបើកការស៊ើបអង្កេតលើការស្លា.ប់របស់កុមារយ៉ាងតិច 14 នាក់ដែលជាប់ទាក់ទងនឹងថ្នាំទឹកសុីរ៉ូក្អកដែលមានជាតិពុល។

របាយការណ៍នោះបានបង្ហាញថា កុមាររងគ្រោះភាគច្រើនមានអាយុក្រោមប្រាំឆ្នាំ ហើយបានស្លា.ប់ដោយសារជំងឺខ្សោយតម្រងនោមកាលពីខែមុន បន្ទាប់ពីពួកគេបានប្រើប្រាស់ថ្នាំក្អកម៉ាក Coldrif Syrup ដែលជាថ្នាំព្យាបាលក្អកដែលផលិតដោយក្រុមហ៊ុន Sresan Pharmaceuticals ក្នុងរដ្ឋ Tamil Nadu។ ទឹកស៊ីរ៉ូនេះមានផ្ទុកជាតិពុល diethylene glycol ក្នុងបរិមាណជិត 500 ដងលើសការកំណត់សុវត្ថិភាពដែលអាចអនុញ្ញាតបាន នេះបើយោងតាមពាក្យបណ្តឹងរបស់ប៉ូលីសបានឃើញដោយ Reuters ។

កាលពីថ្ងៃអាទិត្យនេះ ប៉ូលីសនៅរដ្ឋ Madhya Pradesh បាននិយាយថា “កុមារតូចៗទាំងនោះមានរោគសញ្ញាដំបូងនៃជំងឺផ្តាសាយ ឬគ្រុនក្តៅធម្មតាប៉ុណ្ណោះ ហើយបន្ទាប់មកពួកគេត្រូវបានផ្តល់ទឹកស៊ីរ៉ូ Coldrif និងក្រោយមកកុមារទាំងនោះក៏ចាប់ផ្ដើមមានជំងឺតម្រងនោម និងបញ្ហាគ្រលៀនធ្ងន់ធ្ងរ”។

បើតាមទិន្នន័យរបស់អ្នកជំនាញផ្នែកវេជ្ជសាស្រ្តបានបញ្ជាក់ថាសារធាតុ Diethylene glycol ដែលបានរកឃើញនៅក្នុងសុីរ៉ូក្អកកុមារនោះជាទូទៅតែងត្រូវបានគេប្រើប្រាស់ប្រឆាំងនឹងការកក របស់ផលិតផលគ្រឿងសំអាង និងប្រេងរំអិល ដែលប្រសិនបើមនុស្សទទួលទានវាចូលទៅ នោះវានឹងបណ្តាលឱ្យមានរោគសញ្ញាចាប់ពីក្អួត និងឈឺពោះ រហូតដល់ខូចតម្រងនោមរហូតអាចដល់បាត់បង់ជីវិតតែម្ដង។

បច្ចុប្បន្នប៉ូលីសបានដាក់ក្រុមហ៊ុនផលិតសុីរ៉ូម៉ាក Coldrif ដែលមានឈ្មោះ Sresan Pharma ជាជនជាប់ចោទសំខាន់នៅក្នុងបញ្ហានេះ ខណៈវេជ្ជបណ្ឌិតម្នាក់ដែលចេញវេជ្ជបញ្ជាឲ្យប្រើប្រាស់ថ្នាំនេះដល់កុមារត្រូវបានចាប់ខ្លួន។

ក្រុមហ៊ុន Sresan Pharma មិនបានឆ្លើយតបនឹងសំណើសុំការអត្ថាធិប្បាយទេ។ តែទោះជាយ៉ាងណា អាជ្ញាធរសហព័ន្ធរបស់ឥណ្ឌាបាននិយាយថា ពួកគេត្រៀមនឹងដកអាជ្ញាប័ណ្ណរបស់ក្រុមហ៊ុននេះចោល ហើយរដ្ឋមួយចំនួនបានចាប់ផ្ដើមហាមឃា.ត់ការចរាចរលក់ទឹកឱសថដែលជាប់ពាក់ព័ន្ធនឹងក្រុមហ៊ុនខាងលើ នេះបើយោងតាមការសង្ខេបរបស់រដ្ឋាភិបាលនៃការលក់ថ្នាំដែលរកឃើញដោយ Reuters កាលពីថ្ងៃចន្ទសប្ដាហ៍នេះ៕