ធនាគារ ព្រីនស៍ បានប្រកាសពីគោលជំហររបស់ខ្លួនក្នុងដំណើរប្រតិបត្តិការដោយឯករាជ្យភាព និងប្តេជ្ញារក្សាភាពស្មោះត្រង់ ស្ថិរភាពហិរញ្ញវត្ថុ និងការពារសិទិ្ធប្រយោជន៍ជូនដល់អតិថិជនគ្រប់រូប បើទោះជាប្រធានសម្ព័ន្ធ ព្រីនស៍ ហូលឌីងគ្រុប ដែលជាក្រុមហ៊ុនមេ កំពុងស្ថិតក្រោមការតាមចាប់ខ្លួនរបស់សហរដ្ឋអាមេរិក និងត្រូវបានគេរឹបអូសទ្រព្យសម្បត្តិជារូបិយវត្ថុ Bitcoin សរុបអស់ 15ពាន់លានដុល្លារក៏ដោយ។

យោងតាមសេចក្ដីប្រកាសរបស់ធនាគារ ព្រីនស៍ (Prince Bank Plc.) នៅរសៀលថ្ងៃទី15 ខែតុលានេះបានឲ្យដឹងថា ធនាគារនឹងនៅតែបន្តប្រតិបត្តិការយ៉ាងឯករាជ្យ ស្របច្បាប់ និងមានអាជ្ញាប័ណ្ណពេញលេញ ជាធនាគារពាណិជ្ជក្រោមការត្រួតពិនិត្យរបស់ធនាគារជាតិនៃកម្ពុជា (NBC)។ ជាមួយគ្នានេះ ធនាគារបានបញ្ជាក់ថា សម្រាប់ប្រតិបត្តិការធនាគារទាំងអស់ សេវាអេធីអឹម វេទិកាធនាគារឌីជីថល និងសេវានៅតាមសាខា គឺនៅតែដំណើរការយ៉ាងពេញលេញជាធម្មតា។

បន្ថែមពីនេះ ធនាគារ ព្រីនស៍ បានធ្វើការអះអាងថា ធនាគារនឹងនៅតែប្តេជ្ញារក្សាភាពស្មោះត្រង់ ស្ថិរភាពហិរញ្ញវត្ថុ និងការពារសិទិ្ធប្រយោជន៍អតិថិជនគ្រប់រូប។ យើងនឹងបន្តធ្វើការយ៉ាងជិតស្និទ្ធជាមួយធនាគារជាតិនៃកម្ពុជា ដើម្បីធានាថាប្រតិបត្តិការរបស់យើងអនុលោមតាមច្បាប់យ៉ាងពេញលេញ និងមានតម្លាភាពគ្រប់ដំណាក់កាល។

គួរជម្រាបថា ជុំវិញការប្រកាសរបស់ធនាគារដូចខាងលើនេះគឺធ្វើឡើងបន្ទាប់ពីប្រធានក្រុមហ៊ុន Prince Group លោក Chen Zhi ត្រូវបានសហរដ្ឋអាមេរិករកឃើញថាមានជាប់ពាក់ព័ន្ធនឹងបទឧក្រិដ្ឋឆបោ.កតាមអនឡាញ និងការលាងលុយកខ្វក់ដ៏ធំសម្បើមនៅ ដោយបានកេងប្រវ័ញ្ចលើជនរងគ្រោះនៅទូទាំងពិភពលោករាប់លាននាក់ និងបង្កើតប្រាក់ចំណេញខុសច្បាប់រាប់ពាន់លានដុល្លារ។

ប្រតិបត្តិការបង្ក្រាបដ៏កក្រើកនេះ រឹបអូសបាន 127,271 Bitcoin ដែលបច្ចុប្បន្នមានតម្លៃប្រហែល 15 ពាន់លានដុល្លារ ដែលទាំងនោះគឺជាប្រាក់ចំណូលពីការក្លែងបន្លំ និងសកម្មភាពលាងលុយកខ្វក់របស់ Chen Zhi។

រដ្ឋអាជ្ញាសហរដ្ឋអាមេរិកនៅទីក្រុង Brooklyn និងទីក្រុងញូវយ៉ក បានចោ.ទប្រកាន់ក្រុមហ៊ុន Prince Group របស់លោក Chen ដែលរកសុីខាងអចលនទ្រព្យ និងហិរញ្ញវត្ថុនៅកម្ពុជា ថាវាបានប្រែក្លាយដោយសម្ងាត់ទៅជា “អង្គការឧក្រិដ្ឋកម្មឆ្លងដែនដ៏ធំបំផុតមួយនៅអាស៊ី” ខណៈមានបុគ្កលិកជាច្រើនត្រូវបានពួកគេជួញដូរ បង្ខាំងទុក និងបង្ខំឱ្យធ្វើការងារ ផ្នែកឆបោកតាមអ៊ីនធឺណិតក្រោមការគំរាមកំហែង និងទារុ.ណកម្ម។

ប្រតិបត្តិការបង្រ្កាបឧក្រិដ្ឋជនឆបោ.ក និងលាងលុយកខ្វក់ដែលមានគោលដៅសង្កត់ធ្ងន់នៅកម្ពុជានេះ កំពុងទាញទម្លាក់កេរ្តិ៍ឈ្មោះរបស់កម្ពុជានៅលើឆាកអន្តរជាតិ ខណៈក្រសួងរតនាគារសហរដ្ឋអាមេរិកបានហាមឃាត់ក្រុមហ៊ុន និងពលរដ្ឋអាមេរិកមិនឱ្យធ្វើអាជីវកម្មជាមួយក្រុមហ៊ុន និងបណ្ដាញព្រីនស៍គ្រុបជាដាច់ខាត៕

ប្រទេសថៃ ៖ នៅថ្ងៃទី១៥ ខែតុលា ឆ្នាំ២០២៥ សារព័ត៌មានមួយចំនួនរបស់ថៃបានផ្សាយបំភ្លៃថា សម្តេចតេជោ ហ៊ុន សែន ប្រធានព្រឹទ្ធសភាកម្ពុជាដាក់សម្ពាធឱ្យថៃបើកព្រំដែនឡើងវិញនៅថ្ងៃទី២០ ខែតុលានេះ ប៉ុន្តែត្រូវបានអ្នកនាំពាក្យក្រសួងការពារជាតិថៃឆ្លើយតបទៅវិញថា កម្ពុជាត្រូវតែអនុវត្តតាមលក្ខខណ្ឌរបស់ថៃ៤ចំណុចជាមុនសិន ទើបថៃជជែកពីប្រធានបទផ្សេង ។

តាមការចុះផ្សាយរបស់សារព័ត៌មានថៃ The Better នៅថ្ងៃទី១៥ ខែតុលា ឱ្យដឹងថា លោក ស៊ុរ៉ាសាន់ គង់ស៊ិរិ អ្នកនាំពាក្យក្រសួងការពារជាតិថៃនិយាយថា ពេលនេះ ថៃមិនទាន់មានវិធានការផ្សេងក្រៅពីការកំណត់លក្ខខណ្ឌ៤ចំណុច រួមមាន ៖ ១-ដកអាវុធធុនធ្ងន់ ២-ដោះមីន ៣-បង្ក្រាបបទល្មើសឆ្លងដែន និង៤-គ្រប់គ្រងតំបន់ព្រំដែនដែលមានបញ្ហាតាមសំណើក្នុងកិច្ចប្រជុំ GBC កម្ពុជា-ថៃ ព្រមទាំងមានយន្តការសហការដើម្បីពិភាក្សាគ្នាឱ្យភាគីទាំងពីរឈានដល់កិច្ចព្រមព្រៀងសិន ចាំជជែករឿងផ្សេង ។ ថៃនិយាយច្បាស់លាស់ថា បើមានកិច្ចចរចា គឺកម្ពុជាត្រូវយល់ព្រមតាមលក្ខខណ្ឌ៤ចំណុចនេះ ទើបជជែកពីប្រធានបទផ្សេងទៀត ។

ឆ្លើយតបនឹងសំណួររបស់សារព័ត៌មានថៃដែលចោទប្រកាន់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា ថាដាក់សម្ពាធឱ្យថៃបើកព្រំដែនដោយសារបាត់បង់ចំណូល លោក ស៊ុរ៉ាសាន់ អ្នកនាំពាក្យក្រសួងការពារជាតិថៃនិយាយថា គ្មានទិន្នន័យពីការបាត់បង់ចំណូលរបស់កម្ពុជាទេ ប៉ុន្តែលោកគិតថា កម្ពុជាអាចរងផលប៉ះពាល់ផ្នែកពាណិជ្ជកម្មតាមព្រំដែនដោយសារវិធានការបិទព្រំដែនរបស់ថៃ ។ ទោះយ៉ាងណា ការបិទព្រំដែនរបស់ថៃមានភាពសមស្រប និងដើម្បីដាក់សម្ពាធកម្ពុជា ។

លោក ស៊ុរ៉ាសាន់ បញ្ជាក់ថា ៖ «កម្ពុជាក៏ត្រូវក្រឡេកមើលខ្លួនឯងថា តើបានត្រៀមខ្លួនកម្រិតណាមុននឹងនិយាយឱ្យថៃបើកព្រំដែន ពីព្រោះពេលនេះ ភាគីថៃមានគោលជំហរដូចគ្នាទាំងអស់ ចាប់ពីរដ្ឋាភិបាលរហូតដល់ថ្នាក់តំបន់ គឺត្រូវអនុវត្តតាមលក្ខខណ្ឌ៤ចំណុច មុននឹងជជែកពីប្រធានបទផ្សេង» ។

ចំណែកនាយករដ្ឋមន្ត្រីថៃ លោក អនុថីន ឆាន់វីរៈគូន ក៏បានបញ្ជាក់ពីលក្ខខណ្ឌ៤ចំណុចថា កម្ពុជាត្រូវយល់ព្រមជាមុន ទើបឈានទៅរកការចរចា ។ រីឯថ្នាក់តំបន់ក៏បញ្ជាក់ពីគោលជំហរតែមួយដែរ ត្រូវមានផែនការសកម្មភាពច្បាស់លាស់ រួមមាន ៖ ការដោះមីន និងជម្លៀសពលរដ្ឋចេញពីតំបន់ព្រំដែនដែលថៃចោទប្រកាន់ល្មើសអធិបតេយ្យ ប៉ុន្តែកម្ពុជាបែរជាគ្មានផែនការសកម្មភាពណាមួយ ។

រីឯកងទ័ពភូមិភាគទី២ថៃក៏បានជូនដំណឹងទៅកម្ពុជា អំពីការលើកពេលកិច្ចប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) ជាមួយយោធភូមិភាគទី៤កម្ពុជាដោយគ្មានពេលកំណត់ ដោយសារកម្ពុជាពុំទាន់បញ្ជូនផែនការសកម្មភាព ។

លោក ស៊ុរ៉ាសាន់ បន្តថា ចំពោះគោលជំហររបស់ប្រធានាធិបតីអាមេរិក លោក Donald Trump ដែលត្រៀមធ្វើជាសាក្សីក្នុងការចរចាសន្តិភាពកម្ពុជា-ថៃ គឺអាមេរិកមានសក្តានុពលចាត់វិធានការ និងមានប្រទេសជាមិត្តផ្សេងៗគាំទ្រ ។ វាជារឿងល្អក្នុងតំបន់ និងបង្ហាញឱ្យឃើញថា អាមេរិកបារម្ភពីតំបន់អាស៊ាន ។ បញ្ហាសំខាន់ក្នុងការដោះស្រាយបញ្ហារវាងកម្ពុជា-ថៃ គឺបង្កើតសន្តិសុខ ហើយលោកយល់ថា កត្តាសំខាន់ឈានទៅរកការចរចាមួយផ្នែក គឺអាចមកពីសេដ្ឋកិច្ចកម្ពុជា ខណៈថៃក៏ចង់បន្ធូរបន្ថយភាពតានតឹងនៅតាមព្រំដែនដើម្បីឱ្យពលរដ្ឋរស់នៅក្នុងបរិយាកាសដូចមុន គ្មានការភ័យខ្លាច ឬបារម្ភពីការប៉ះទង្គិចនៅព្រំដែន ។

គួរបញ្ជាក់ថា នៅថ្ងៃទី១៥ ខែតុលានេះ សារព័ត៌មានមួយចំនួនរបស់ថៃបានចុះផ្សាយបំភ្លៃថា សម្តេចតេជោ ហ៊ុន សែន ប្រធានព្រឹទ្ធសភាកម្ពុជាដាក់សម្ពាធឱ្យថៃបើកព្រំដែននៅថ្ងៃទី២០ ខែតុលា ប៉ុន្តែពុំបានបង្ហាញពីការដកស្រង់ប្រភពច្បាស់លាស់នោះទេ ។

កន្លងមក សម្តេចតេជោ ហ៊ុន សែន ថ្លែងថា ចាប់តាំងពីយោធាថៃបិទព្រំដែនជាឯកតោភាគីមក កម្ពុជាមិនដែលបានសុំភាគីថៃបើកច្រកវិញទេ គ្រាន់តែប្រាប់ទៅភាគីថៃថា ថៃជាអ្នកបិទ ថៃគឺជាអ្នកបើក មិនបាច់ចរចាជាមួយកម្ពុជាទេ ហើយកម្ពុជានឹងបើកតាមក្រោយយ៉ាងយូរ៥ម៉ោង ។ ជំហរកម្ពុជានឹងមិនផ្លាស់ប្តូរ ហើយកម្ពុជាក៏មិនធ្វើថោកទៅសុំថៃបើកច្រកព្រំដែននោះដែរ ថៃអាចបន្តបិទសូម្បី១០០ឆ្នាំទៀត ក៏កម្ពុជាមិនស្លាប់ដែរ ៕

កូរ៉េខាងជើង ទទួលបានជំនួយបច្ចេកទេស ក្នុងការអភិវឌ្ឍនាវាមុជទឹ ដែលមានសមត្ថភាពបាញ់មីស៊ីលបាលិស្ទិកចេញក្រោមបាតសមុទ្រ។

បើយោតាម រដ្ឋមន្រ្តីការពារជាតិកូរ៉េខាងត្បូងលោក Ahn Gyu-back បានលើកឡើងថា៖” វាហាក់បីដូចជាលឿនពេក ដែលកូរ៉េខាងជើងអាចមានសមត្ថភាពផលិតនាវាមុជទឹក ដើរដោយថាមពលនុយក្លេអ៊ែរ ដោយគ្មានជំនួយពីប្រទេសដ៏ទៃ”។

ថ្លែងនៅចំពោះមុខគណៈកម្មាធិការការពារជាតិនៃរដ្ឋសភា រដ្ឋមន្រ្តីការពារជាតិរូបនេះ បានអះអាងថា៖” កូរ៉េខាងជើង ទំនងជាទទួលបានជំនួយបច្ចេកវិទ្យាផ្សេងៗក្នុងការអភិវឌ្ឍនាវាមុជទឹកប្រទេសរុស្សុី ខណៈរយៈពេលពីរឆ្នាំកន្លងមកនេះ ប្រទេសទាំង២បានពង្រឹងកិច្ចសហប្រតិបត្តិការយោធាយ៉ាងស៊ីជម្រៅ។

ក្រៅពីពង្រឹងសមត្ថភាពនាវាមុជទឹក រុស្សុី និងកូរ៉េខាងជើង ក៏បានរួមគ្នាអភិវឌ្ឍន៍មីស៊ីលផ្លូវអាកាសដែលមានសមត្ថភាពខ្លាំងមួយប្រភេទទៀតផងដែរ។

គួរបញ្ជាក់ថា កូរ៉េខាងជើង បានបញ្ជូនទ័ពជាងមួយម៉ឺននាក់ទៅជួយរុស្ស៊ីក្នុងសង្រ្គាមនៅអ៊ុយក្រែន ដើម្បីជាជាថ្នូរ នៃការផ្តល់ជំនួយបច្ចេកវិទ្យាសម្រាប់ការអភិវឌ្ឍវិស័យការពារជាតិរបស់ខ្លួន៕

ប្រទេសថៃ ៖ បន្ទាប់ពីសមាជិកព្រឹទ្ធសភា មន្ត្រីសិទ្ធិមនុស្ស ប្រធានគណបក្សប្រឆាំង និងសកម្មជនសិទ្ធិស្ត្រីនៅប្រទេសថៃ រិះគ.ន់បុគ្គល កាន់ ចមផ្លាំង Influencer ប្រព្រឹត្តទង្វើបំពា.នសិទ្ធិមនុស្សផ្ទុយនឹងច្បាប់អន្តរជាតិ ដោយបើកឧបករណ៍បំពងសំឡេងខ្លាំងៗរំខានពលរដ្ឋខ្មែរនៅភូមិជោគជ័យ និងភូមិព្រៃចាន់ ដូចជា ៖ សំឡេងខ្មោច សំឡេងយន្តហោះចម្បាំង ឆ្កែលូ និងបញ្ចាំងកុនឯកសារ បុគ្គលនេះក៏ប្រកាសឈប់បើកសំឡេងរំខាន ។ ប៉ុន្តែនៅថ្ងៃទី១៤ ខែតុលា ស្រាប់តែប្រកាសថា នឹងបើកសំឡេងរំខានពលរដ្ឋខ្មែរទៀត បើទទួលបានការគាំទ្រពីមហាជន ។

តាមការចុះផ្សាយរបស់សារព័ត៌មាន Khaosod កាលពីថ្ងៃទី១៤ ខែតុលា ឆ្នាំ២០២៥ ឱ្យដឹងថា បុគ្គល កាន់ ចមផ្លាំង បានសន្យាឈប់បើកសំឡេងខ្មោចលងបន្លាចពលរដ្ឋខ្មែរទៀតហើយ ពីព្រោះជាការរំលោភសិទ្ធិមនុស្ស ព្រមទាំងរងការរិះគន់ពីសមាជិកព្រឹទ្ធសភា មន្ត្រីសិទ្ធិមនុស្ស និងពលរដ្ឋថៃមួយចំនួន ប៉ុន្តែបើពលរដ្ឋថៃគាំទ្រ ខ្លួននឹងបើកសំឡេងរំខានទៀត ។ បុគ្គលនេះសួរថា ពេលកម្ពុជាធ្វើអ្វី ហេតុអ្វីមិនឃើញមន្ត្រីសិទ្ធិមនុស្សចេញមកអំពាវនាវឱ្យបញ្ឈប់សកម្មភាព ។

កាលពីថ្ងៃទី១៤ ខែតុលា កន្លងមក មេបញ្ជាការកងទ័ពភូមិភាគទី២ លោក វីរៈយុទ្ធ រ៉ាក់ស៊ីន ព្រមទាំងកងទ័ពមួយចំនួនបានទៅផ្តល់កម្លាំងចិត្តដល់កងទ័ពថៃនៅប្រាសាទតាមាន់ធំ ព្រំដែនកម្ពុជា-ថៃ ។ ជាមួយគ្នានោះ បុគ្គល កាន់ថាត់ ផុងផៃប៊ូនវេត (ឬ កាន់ ចមផ្លាំង) បានធ្វើដំណើរទៅវត្តមួយកន្លែងនៅស្រុកភ្នំដងរ៉ាក់ ខេត្តសុរិន្ទ យកសម្ភារៈចែកឱ្យកងទ័ព ព្រមទាំងឡើងប្រាសាទតាមាន់ធំដើម្បីមើលលេណដ្ឋាន និងបន្ទប់ទឹកដែលខ្លួនធ្វើ ក៏ជួបជាមួយមេបញ្ជាការកងទ័ពភូមិភាគទី២ ។

បុគ្គលទាំងពីរបានបរិភោគអាហារ និងជជែកគ្នាពីស្ថានការណ៍ព្រំដែនកម្ពុជា-ថៃ ដោយបុគ្គល កាន់ ចមផ្លាំង បាននិយាយពីមន្ត្រីសិទ្ធិមនុស្សនៅប្រទេសថៃរិះគន់ខ្លួនរឿងការបើកសំឡេងរំខាន ហើយថា ចាប់ពីពេលនេះ ខ្លួននឹងឈប់ជួលថយន្តធុងបាស់ទៅព្រំដែនបើកសំឡេងរំខានទៀតហើយ ។

បុគ្គល កាន់ ចមផ្លាំង និយាយថា ខ្លួនមានអារម្មណ៍ធុញទ្រាន់ជាមួយអ្នកចិត្តល្អនៅថៃ មិនមែនមានតែថៃទេ កម្ពុជាក៏ធ្លាប់បើកសំឡេងដែរ ប៉ុន្តែគ្មានមន្ត្រីសិទ្ធិមនុស្សណាម្នាក់រិះគន់ ឬអំពាវនាវឱ្យកម្ពុជាឈប់បើកសំឡេងរំខានពលរដ្ឋថៃទេ ។ លើសពីនេះ ក្មេងថៃស្លាប់ដោយសារសង្គ្រាមកម្ពុជា-ថៃ ក៏គ្មានមន្ត្រីសិទ្ធិមនុស្សទាមទាររកយុត្តិធម៌ដល់ប្រទេសថៃដែរ ។ ទោះជាការសំឡេងរំខានពលរដ្ឋខ្មែរត្រូវបានបញ្ឈប់ក្តី ប៉ុន្តែបើពលរដ្ឋថៃទាមទារឱ្យបើកម្តងទៀត ខ្លួននឹងធ្វើតាមសំណូមពរមហាជន ។

គួរបញ្ជាក់ថា Influencer រូបនេះទទួលបានការគាំទ្រពីពលរដ្ឋថៃយ៉ាងខ្លាំងបន្ទាប់ពីចេញមុខឈ្លានពានទឹកដីកម្ពុជា ជាពិសេស បុគ្គលនេះកាន់តែមានប្រជាប្រិយភាពខ្លាំងពេលបញ្ជូនរថយន្តដឹកលាមក ជាង១០គ្រឿងត្រៀមបាញ់ស្រោចលើពលរដ្ឋខ្មែរនៅភូមិជោគជ័យ និងភូមិព្រៃចាន់ នៅឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។ កន្លងមក បុគ្គលនេះបានចេញមុខប្រឆាំងពលរដ្ឋខ្មែរធ្វើការខុសច្បាប់នៅថៃ និងប្រាប់ឱ្យពលរដ្ឋថៃរាយការណ៍ បើឃើញពលរដ្ឋខ្មែរធ្វើការខុសច្បាប់ នឹងនាំសមត្ថកិច្ចទៅចាប់ភ្លាម ។

ប៉ុន្តែការចាក់សំឡេងរំខានពលរដ្ឋខ្មែរនៅភូមិជោគជ័យ និងភូមិព្រៃចាន់នាពេលថ្មីៗនេះ ពុំទទួលបានការគាំទ្រពីពលរដ្ឋថៃទាំងអស់ទេ ដោយសារធ្វើឱ្យថៃអាម៉ាស់មុខ និងខូចកេរ្តិ៍ឈ្មោះលើពិភពលោក ។ អ្នកលេងបណ្តាញសង្គមថៃមួយចំនួនបានរិះគន់បុគ្គលនេះដែលប្រព្រឹត្តថោកទាប ទង្វើរំលោភសិទ្ធិមនុស្ស រើសអើងជាតិសាសន៍ ៕

ស្ថានទូតសាធារណរដ្ឋកូរ៉េខាងត្បូងប្រចាំនៅប្រទេសថៃ បានចេញសេចក្ដីប្រកាសច្រានចោលទាំងស្រុង ចំពោះការចុះផ្សាយរបស់សារព័ត៌មានបាងកកប៉ុស្តិ៍ដែលថា «កូរ៉េខាងត្បូងនឹងចាត់វិធានការយោធា និងអាចដាក់ពង្រាយកងកម្លាំងខ្លួននៅក្នុងតំបន់ដើម្បីប្រឆាំងឧក្រិដ្ឋជនអនឡាញ» ដោយស្ថានទូតកូរ៉េបានបញ្ជាក់ថា ការផ្សាយនេះគឺមិនមែនជាការពិតនោះទេ។

យោងតាមការបង្ហោះនៅលើទំព័រហ្វេសប៊ុករបស់ស្ថានទូតសាធារណរដ្ឋកូរ៉េខាងត្បូងប្រចាំនៅប្រទេសថៃ នៅថ្ងៃពុធ ទី១៥ ខែតុលា បានឲ្យដឹងថា ទាក់ទងនឹងអត្ថបទដែលមានចំណងជើងថា * “កិច្ចព្រមព្រៀងបញ្ឈប់ការឆបោ.កតាមប្រព័ន្ធអនឡាញ គឺជាគន្លឹះសំខាន់ដើម្បីសន្តិភាព”* ដែលបានចុះផ្សាយនៅលើទំព័រមុខរបស់កាសែត Bangkok Post នៅថ្ងៃទី ១៥ ខែតុលា រដ្ឋាភិបាលកូរ៉េជំហរដូចតទៅ៖

រដ្ឋាភិបាលកូរ៉េខាងត្បូងកំពុងខិតខំប្រឹងប្រែងផ្នែកការទូតដើម្បីការពារពលរដ្ឋរបស់ខ្លួន។ ទោះជាយ៉ាងណាក៏ដោយ សេចក្តីថ្លែងការណ៍នៅក្នុងអត្ថបទរបស់ Bangkok Post ដែលបានសរសេថា “ការព្រមាននាពេលថ្មីៗនេះពីកូរ៉េខាងត្បូង ថាអាចនឹងចាត់វិធានការយោធាប្រឆាំងនឹងជនឆបោ.កឆ្លងដែន” និងអត្ថបទមួយទៀតដែលបានផ្សាយថា “ការគំរាមកំហែងរបស់ទីក្រុងសេអ៊ូលក្នុងការដាក់ពង្រាយយោធារបស់ខ្លួនដើម្បីប្រយុទ្ធប្រឆាំងនឹងជនឆបោ.កនៅក្នុងតំបន់” — នោះមិនមែនជាការពិតទេ។

ក្នុងន័យនេះ បើតាមសេចក្ដីថ្លែងការរបស់រដ្ឋាភិបាលកូរ៉េនាពេលថ្មីៗនេះជុំវិញបញ្ហាឆបោ.កតាមអនឡាញលើប្រជាជនខ្លួន ដែលកើតមាននៅកម្ពុជានោះបានបញ្ជាក់ថា ទីក្រុងសេអ៊ូលនឹងជួបពិភាក្សាជាមួយសមត្ថកិច្ចកម្ពុជានៅថ្ងៃទី២៣ ខែតុលាខាងមុខ ដោយបន្ទាប់ពីនោះកូរ៉េខាងត្បូងនឹងបញ្ជូនមន្រ្តីប៉ូលីសរបស់ខ្លួនមកធ្វើការនៅកម្ពុជា ក្រោមអង្គភាព Korean Desk ដើម្បីស៊ើបអង្កេត និងដោះស្រាយបញ្ហាផ្សេង ជាពិសេសពាក់ព័ន្ធនឹងបទល្មើសចាប់ជំរឹត ឬឆបោ.កជនជាតិកូរ៉េនៅក្នុងប្រទេសម្ចាស់ផ្ទះនោះ។

គួរបញ្ជាក់ដេរថា អង្គភាពពិសេសនេះក៏ត្រូវបានបង្កើតឡើងនៅក្នុងប្រទេសថៃផងដែរ ពោលគឺកូរ៉េបានបញ្ជូនមន្រ្តីរបស់ខ្លួនមកធ្វើការនៅក្នុងប្រទេសថៃមុនកម្ពុជា តាំងពីច្រើនឆ្នាំមុនមកហើយ។ មិនតែប៉ុណ្ណោះ អង្គភាពនេះ ក៏មាននៅក្នុងប្រទេសក្នុងតំបន់ផ្សេងទៀតដូចជាហ្វីលីពីនផងដែរ ដែលប៉ូលីសកូរ៉េទាំងនេះមានតួនាទីគាំពា និងស៊ើបអង្កេតក្នុងករណីពលរដ្ឋមានគ្រោះថ្នាក់ផ្សេងៗ ដោយសហការជាមួយប៉ូលីសរបស់ប្រទេសជាម្ចាស់ផ្ទះ មិនមានទាក់ទងនឹងចលនាយោធា ឬការបង្រ្កាបបែបហិង្សាណាមួយនោះទេ។

សរុបមកការចុះផ្សាយរបស់សារព័ត៌មានថៃខាងលើនេះ បានបង្ហាញពីចេតនាឆ្លៀតឱកាសចង់កេងចំណេញលើស្ថានការណ៍ ដើម្បីជាន់ពន្លិច លាបពណ៌ និងបន្ទោសបង្អាប់ទៅលើកម្ពុជាបន្ទាប់ពីផ្ទុះនូវករណីដែលនិស្សិតកូរ៉េម្នាក់ត្រូវបានគេចាប់ជំរិត និងស្លា.ប់នៅកម្ពុជា ទាំងដែលជាក់ស្ដែងរដ្ឋាភិបាលកូរ៉េខាងត្បូងបានបញ្ចាក់ហើយថានឹងដោះស្រាយបញ្ហានេះ តាមរយៈយន្តការទូត ដែលស្របតាមច្បាប់ប៉ុណ្ណោះ៕