ទីក្រុងក្យុងជូ៖ លោកនាយករដ្ឋមន្ត្រីថៃ Anutin Charnvirakul បានស្នើសុំឲ្យប្រទេសកូរ៉េ ជួយដោះស្រាយការហាមឃាត់ចូលប្រទេសសម្រាប់អ្នកទេសចរថៃ និងបើកផ្លូវឲ្យពលករថៃអាចចូលបម្រើការងារនៅប្រទេសកូរ៉េឲ្យបានច្រើនដើម្បីពង្រឹងភាពជាដៃគូរ ខណៈកន្លងមកពលរដ្ឋថៃជាច្រើន ត្រូវបានបដិសេធមិនឲ្យចូលប្រទេសកូរ៉េ។

យោងតាមការចុះផ្សាយរបស់សារព័ត៌មាន The Nation នៅថ្ងៃទី30 ខែតុលា ឆ្នាំ2025 បានឲ្យដឹងថា លោក Anutin នៅក្នុងជំនួបទ្វេភាគីជាមួយប្រធានាធិបតីកូរ៉េខាងត្បូង លោក Lee Jae Myung នៅប្រទេសកូរ៉េ កាលពីថ្មីៗនេះ បានជំរុញឲ្យរដ្ឋាភិបាលកូរ៉េខាងត្បូង ដោះស្រាយបញ្ហាពលរដ្ឋថៃកាន់តែច្រើនឡើង ដែលត្រូវបានបដិសេធមិនអនុញ្ញាតឲ្យចូលប្រទេសកូរ៉េ ក្រោយពេលទៅដល់ ក្នុងនោះរួមមានទាំងអ្នកទៅទេសចរ និងពលករចំណាកស្រុកទៅធ្វើការផងដែរ។

លោក Anutin បានកត់សម្គាល់ថា បញ្ហានេះបានបង្កឱ្យមានការព្រួយបារម្ភពីសាធារណជន និងអាចប៉ះពាល់ដល់ទេសចរណ៍រវាងប្រទេសទាំងពីរ។ ជាមួយគ្នានេះ លោក Anutin ក៏បានស្នើសុំឲ្យទីក្រុងសេអ៊ូល ពិនិត្យឡើងវិញនូវនីតិវិធីអន្តោប្រវេសន៍របស់ខ្លួន ដើម្បីធានាបាននូវការប្រព្រឹត្តដោយយុត្តិធម៌ និងពង្រឹងទំនាក់ទំនងរវាងប្រជាជន និងប្រជាជន។

ក្រៅពីនេះ នាយករដ្ឋមន្រ្តីថៃ ក៏បានឆ្លៀតអញ្ជើញលោកប្រធានាធិបតី Lee Jae Myung ឲ្យមកបំពេញទស្សនកិច្ចជាផ្លូវការនៅប្រទេសថៃផងដែរ ព្រមទាំងអញ្ជើញវិនិយោគិនកូរ៉េខាងត្បូងឱ្យស្វែងយល់ពីច្រករបៀងសេដ្ឋកិច្ចខាងកើត (EEC) របស់ប្រទេសថៃ ដើម្បីពង្រឹងទំនាក់ទំនងពាណិជ្ជកម្មរវាងប្រទេសទាំងពីរ។

គួរជម្រាបថា បើតាមរបាយការណ៍របស់ឯកអគ្គរាជទូតថៃប្រចាំនៅប្រទេសកូរ៉េ លោកស្រី Thanee Saengrat បានឲ្យដឹងថា គិតត្រឹមខែឧសភា ឆ្នាំ2025 ជនជាតិថៃចំនួន 145,810នាក់ កំពុងធ្វើការខុសច្បាប់នៅក្នុងប្រទេសកូរ៉េ ដែលស្មើនឹងពីរភាគបីនៃចំនួនពលករថៃនៅប្រទេសកូរ៉េសរុបចំនួន 181,842នាក់។

ចំនួននេះមានអត្រាខ្ពស់ជាងគេ បើធៀបនឹងចំនួនពលករខុសច្បាប់របស់ប្រទេសផ្សេងទៀតក្នុងតំបន់ ខណៈវាក៏ជាមូលហេតុដែលរដ្ឋាភិបាលរបស់កូរ៉េខាងត្បូង បានរឹតត្បិតការចូលមកកាន់ប្រទេសរបស់ខ្លួនពីសំណាក់ពលរដ្ឋថៃ មិនថាជាការមកទេសចរណ៍ ឬចំណាកស្រុករកការងារធ្វើឡើយ៕

ប្រទេសរុស្ស៊ី ៖ រដ្ឋាភិបាលរុស្ស៊ីបានប្រកាសកាលពីថ្ងៃទី៣០ ខែតុលា ឆ្នាំ២០២៥ ថា ការចរចាសន្តិភាពជាមួយជប៉ុនដើម្បីបញ្ចប់សង្គ្រា.មលោកលើកទី២ជាផ្លូវការ លុះត្រាតែជប៉ុនលុបចោលគោលនយោបាយប្រឆាំងរុស្ស៊ី ដែលរដ្ឋាភិបាលក្រុងមូស្គូចាត់ទុកគោលនយោបាយនេះជាគ្រោះថ្នា.ក់ដល់ប្រទេស និងពលរដ្ឋរុស្ស៊ី ។ នេះបើតាមការចុះផ្សាយរបស់សារព័ត៌មាន Reuters ។

អ្នកនាំពាក្យក្រសួងការបរទសរុស្ស៊ី លោកស្រី Maria Zakharova បានឆ្លើយតបសំណួររបស់សារព័ត៌មាន Reuters ថា ៖ «រុស្ស៊ីអាចត្រឡប់មកចរចាសន្តិភាពជាមួយជប៉ុន លុះត្រាតែរដ្ឋាភិបាលក្រុងតូក្យូបញ្ឈប់គោលនយោបាយប្រឆាំងរុស្ស៊ីដែលមានបំណងបំផ្លាញប្រទេសរុស្ស៊ី ។ ជប៉ុនបង្ហាញអាកប្បកិរិយាមិនមែនជាមិត្តធ្វើឱ្យទំនាក់ទំនងរវាងប្រទេសទាំងពីរដើរទៅរកផ្លូវទាល់ច្រក» ។

ការលើកឡើងរបស់អ្នកនាំពាក្យក្រសួងការបរទេសរុស្ស៊ី គឺក្រោយពីនាយករដ្ឋមន្ត្រីថ្មីរបស់ជប៉ុន លោកស្រី Sanae Takaichi ថ្លែងសុន្ទរកថាកាលពីសប្តាហ៍ទី៤ ខែតុលា ឆ្នាំ២០២៥ ដោយរិះគន់រុស្ស៊ីធ្វើសង្គ្រាមឈ្លានពានអ៊ុយក្រែន ហើយថាជប៉ុននៅតែប្រកាន់ខ្ជាប់នូវគោលនយោបាយដោះស្រាយជម្លោះទឹកដី និងធ្វើសន្ធិសញ្ញាសន្តិភាពជាមួយរុស្ស៊ី ។

ជម្លោះទឹកដីរវាងជប៉ុន-រុស្ស៊ី គឺពាក់ព័ន្ធនឹងកោះចំនួន៤ នៅភាគខាងជើងប្រទេសជប៉ុន ដែលកងទ័ពសូវៀតបានកាន់កាប់កាលពីបញ្ចប់សង្គ្រាមលោកលើកទី២ ដែលត្រូវបានគេស្គាល់ថា «ប្រជុំកោះ Kurils ភាគខាងត្បូង» ឬ «Southern Kurils» ។ ជប៉ុនបញ្ជាក់ថា កោះទាំង៤កន្លែងនេះត្រូវបានរុស្ស៊ីកាន់កាប់ដោយខុសច្បាប់ ហើយរុស្ស៊ីបង្ខំឱ្យពលរដ្ឋជប៉ុនប្រមាណ១ម៉ឺន៧ពាន់នាក់ជម្លៀសចេញពីកោះ ។

ទោះជារដ្ឋាភិបាលក្រុងតូក្យូបានចុះហត្ថលេខាលើសេចក្តីប្រកាសជាមួយរដ្ឋាភិបាលក្រុងមូស្គូកាលពីឆ្នាំ១៩៥៦ ដើម្បីបញ្ចប់សង្គ្រាមរវាងគ្នា ប៉ុន្តែប្រទេសទាំងពីរពុំទាន់បានចុះហត្ថលេខាលើសន្ធិសញ្ញាសន្តិភាពជាផ្លូវការទេ ដោយសារគ្មានការព្រមព្រៀងរឿងទឹកដី ។ ជប៉ុនថា កោះទាំង៤ មិនមែនស្ថិតនៅប្រជុំកោះ Kurils ភាគខាងត្បូង ដូចការលើកឡើងរបស់សហភាពសូវៀតដែលទាមទារយកកោះទាំង៤ ក្រោមកិច្ចព្រមព្រៀងយ៉ាល់តាកាលពីឆ្នាំ១៩៤៥ទេ ខណៈរុស្ស៊ីថា កោះទាំង៤ ជារបស់រុស្ស៊ីដែលបានពីកិច្ចព្រមព្រៀងកាលពីចុងសង្គ្រាមលោកលើកទី២ ។

នាយករដ្ឋមន្ត្រីជប៉ុន លោកស្រី Sanae Takaichi និយាយថា ការចល័តកងទ័ពរុស្ស៊ី ចិន និងកូរ៉េខាងជើង ជាការគំរាមកំហែងយ៉ាងខ្លាំងដល់ស្ថិរភាពក្នុងតំបន់ ។ រីឯមន្ត្រីរដ្ឋាភិបាលជប៉ុនបាននិយាយមកកាន់សារព័ត៌មាន Reuters ថា នាយករដ្ឋមន្ត្រីជប៉ុនបានប្រាប់ទៅប្រធានាធិបតីអាមេរិក លោក Donald Trump ក្នុងអំឡុងពេលជួបគ្នានៅទីក្រុងតូក្យូ ប្រទេសជប៉ុន ថា ទោះជាជប៉ុនមានជម្លោះទឹកដីជាមួយរុស្ស៊ី ប៉ុន្តែជប៉ុនពិបាកបញ្ឈប់ការនាំចូលឧស្ម័នទាំងស្រុងពីរុស្ស៊ី ដោយសារថាមពលមានសារៈសំខាន់សម្រាប់ជប៉ុន ៕

ការស៊ើបអង្កេតថ្មីមួយដោយ Consumer Reports បានបង្កឲ្យការព្រួយបារម្ភអំពីសុខភាព បន្ទាប់ពីរកឃើញថា មានកម្រិត លោហៈធាតុសំណ (lead) ខ្ពស់នៅក្នុងផលិតផលតែគុជ (bubble tea) ពេញនិយមមួយចំនួន។

តែគុជ ដែលមានដើមកំណើតពីតៃវ៉ាន់ គឺជាភេសជ្ជៈផ្អែមមានទឹកដោះគោ និងគុជឈ្ងុយឆ្ងាញ់ ដែលក្លាយជាប្រភេទភេសជ្ជៈពេញនិយមយ៉ាងខ្លាំងនៅសហរដ្ឋអាមេរិក។ ប៉ុន្តែការសិក្សាថ្មីបង្ហាញថា តែគុជខ្លះអាចមានគ្រោះថ្នាក់សម្រាប់សុខភាព ប្រសិនបើផឹកញឹកញាប់។

យោងតាម Consumer Reports ក្រុមអ្នកស្រាវជ្រាវបានធ្វើតេស្តលើគុជ និងភេសជ្ជៈតែពីម៉ាកល្បីៗ ដូចជា Gong Cha, Kung Fu Tea, Trader Joe’s និង WuFuYuan ដើម្បីពិនិត្យរកវត្តមាននៃលោហៈធាតុធ្ងន់ដូចជា សំណ អាសេនិច កាដមីញ៉ូម និងបារត។

ជាលទ្ធផល បង្ហាញថាមិនមានគំរូណាមួយមានអាសេនិច កាដមីញ៉ូម ឬបារតក្នុងកម្រិតគំរាមកំហែងទេ ប៉ុន្តែ បីគំរូក្នុងចំណោមបួន មានកម្រិតសំណខ្ពស់ជាងកម្រិតគួរឱ្យព្រួយបារម្ភ ដែលអាចឈានដល់ 83% នៃស្តង់ដារសុវត្ថិភាព។ ក្នុងនោះ Trader Joe’s Instant Boba Kit មានកម្រិតខ្ពស់ជាងគេ។

លោកបណ្ឌិត James E. Rogers នាយកផ្នែកស្រាវជ្រាវ និងតេស្តសុវត្ថិភាពអាហាររបស់ Consumer Reports បាននិយាយថា លទ្ធផលនេះជាការបង្ហាញឲ្យឃើញថា តែគុជគួរតែត្រូវផឹកជាអាហារសម្រន់ម្តងម្កាល មិនមែនជាភេសជ្ជៈប្រចាំថ្ងៃទេ។ “ទោះបីជាបរិមាណសំណតិចតួចក៏ដោយ ការប៉ះពាល់ជាបន្តបន្ទាប់អាចបង្កផលប៉ះពាល់ដល់សុខភាពបាន,”។ នេះបើតាមកាសែត Fox News។

អ្នកជំនាញសុខភាពព្រមានថា ការប៉ះពាល់នឹងសំណអាចប៉ះពាល់ដល់ ខួរក្បាល និងប្រព័ន្ធសរសៃប្រសាទ ជាពិសេសសម្រាប់ ស្ត្រីមានផ្ទៃពោះ និងកុមារតូចៗ។ ចំពោះមនុស្សពេញវ័យ ការប៉ះពាល់នឹងសំណអាចបង្កហានិភ័យនៃ ជំងឺបេះដូង និងសរសៃឈាម ដែលជាហេតុនាំឲ្យមានមនុស្សស្លាប់ប្រមាណ ២៥៦,០០០ នាក់ក្នុងមួយឆ្នាំ។

ទោះជាយ៉ាងណា ការសិក្សានេះមានទំហំតូចប៉ុណ្ណោះ ហើយមិនតំណាងឲ្យផលិតផលតែគុជទាំងមូលនៅលើទីផ្សារនោះឡើយ ប៉ុន្តែអ្នកប្រើប្រាស់គួរតែ កំណត់ការផឹកតែគុជជាប្រចាំ ដើម្បីកាត់បន្ថយហានិភ័យពីលោហៈធាតុធ្ងន់ ដែលអាចឲ្យប៉ះពាល់សុខភាពធ្ងន់ធ្ងរនៅថ្ងៃខាងមុខ។

យ៉ាងណាម៉ិញ បន្ទាប់ពីរបាយការណ៍ត្រូវចេញផ្សាយ Trader Joe’s បានប្រកាសបញ្ឈប់ការលក់ផលិតផល Instant Boba Kit របស់ខ្លួន។ ខណៈពេលដែលក្រុមហ៊ុនមេរបស់ WuFuYuan នៅប្រទេសចិនគឺ Shanghai ZhouShi បានថ្លែងថា ក្រុមហ៊ុនយកចិត្តទុកដាក់ខ្ពស់ចំពោះសុវត្ថិភាពផលិតផល និងនឹងពង្រឹងវិធានការគ្រប់គ្រងគុណភាពបន្ថែមទៀត។

សូមរំលឹកថា សំណត្រូវបានរកឃើញជាទូទៅទៅហើយនៅក្នុងអាហារ ទឹក និងបរិស្ថានជុំវិញខ្លួនយើង ប៉ុន្តែអ្នកជំនាញនៅតែបានណែនាំឲ្យព្យាយាមកុំប៉ះពាល់វាឬគួរប៉ះពាល់តិចតួចបំផុត៕

បរទេស៖ ឈ្មោះរបស់លោកយាយ Baba Vanga នៅតែបន្តបង្កឱ្យមានការចង់ដឹងចង់ឃើញដល់សព្វថ្ងៃនេះ។ ការទស្សន៍ទាយរបស់គ្រូទាយអាថ៌កំបាំងជនជាតិប៊ុលហ្គារីពិការភ្នែករូបនេះបានទាក់ទាញមនុស្សរាប់លាននាក់អស់រយៈពេលជាច្រើនឆ្នាំ បើទោះបីជាលោកយាយបានទទួលមរណភាពតាំងពីឆ្នាំ ១៩៩៦ ក៏ដោយ ជាពិសេសនៅពេលដែលវាហាក់ដូចជាស្របនឹងព្រឹត្តិការណ៍សកល។

នៅពេលដែលឆ្នាំ ២០២៦ ខិតជិតមកដល់ រលកថ្មីនៃការទស្សន៍ទាយរបស់លោកយាយ Baba Vanga កំពុងទាក់ទាញចំណាប់អារម្មណ៍ម្តងទៀត។ ការទស្សន៍ទាយដែលត្រូវបានពិភាក្សាច្រើនបំផុតសម្រាប់ឆ្នាំ ២០២៦ គឺសង្គ្រាមសកល ដែលលោកយាយបានទាយថានឹងចាប់ផ្តើមនៅបូព៌ា ហើយនាំទៅរក “ការបំផ្លិចបំផ្លាញ” នៃបស្ចិមលោក។ អ្នកខ្លះជឿថា លោកយាយ Baba Vanga កំពុងសំដៅទៅលើជម្លោះទ្រង់ទ្រាយធំដែលអាចផ្លាស់ប្តូរអំណាចសកលជារៀងរហូត។ ឯអ្នកផ្សេងទៀតគិតថាវាអាចជានិមិត្តរូបនៃការផ្លាស់ប្តូរនយោបាយ និងសេដ្ឋកិច្ច។

ទំនាយមួយទៀតបានព្រមានអំពីគ្រោះមហន្តរាយធម្មជាតិដ៏ធំសម្បើម ដូចជាការរញ្ជួយដី ការផ្ទុះភ្នំភ្លើង និងអាកាសធាតុអាក្រក់ដែលបំផ្លាញដីស្ទើរតែមួយភាគដប់នៃពិភពលោក។ ដោយសារការប្រែប្រួលអាកាសធាតុកំពុងធ្វើឱ្យព្យុះ ទឹកជំនន់ និងរលកកំដៅកាន់តែអាក្រក់ទៅៗ ពាក្យសម្ដីរបស់លោកយាយហាក់ដូចជាអ្វីដែលអ្នកវិទ្យាសាស្ត្រកំពុងព្រមានឥឡូវនេះផងដែរ។

បន្ថែមពីនេះ លោកយាយ Baba Vanga ក៏បានទាយទុកជាមុនអំពីអនាគតមួយដែលនិយាយពីបញ្ញាសិប្បនិម្មិតរីកចម្រើនហួសពីការគ្រប់គ្រងរបស់មនុស្ស។ យោងតាមរបាយការណ៍មួយ លោកយាយបានទាយថា AI នឹងចាប់ផ្តើមធ្វើការសម្រេចចិត្តសំខាន់ៗ ដែលមានឥទ្ធិពលចំពោះសង្គម និងសេដ្ឋកិច្ច។

ក្រៅពីនេះ ការទស្សន៍ទាយដ៏គួរឱ្យភ្ញាក់ផ្អើលបំផុតមួយរបស់លោកយាយនោះគឺថា មនុស្សនឹងទាក់ទងជាមួយជីវិតក្រៅភពនៅឆ្នាំ ២០២៦។ ទិន្នន័យមួយចំនួនបាននិយាយអំពីយានអវកាសដ៏ធំមួយដែលមកដល់ផែនដីនាពេលខាងមុខ ដែលនាំឲ្យមានការភ័យខ្លាចជាសកល។

គួរបញ្ជាក់ថា ទោះបីជាមិនមានរបាយការណ៍ច្បាស់លាស់ណាមួយ បញ្ជាក់ថាលោកយាយ Baba Vanga ទស្សន៍ទាយរឿងទាំងនេះក៏ដោយ ក៏អ្នកដែលមានជំនឿលើលោកយាយ ជឿជាក់ថាឆ្នាំ ២០២៦ និងមានការផ្លាស់ប្ដូរដ៏ធំសម្បើមសម្រាប់ពិភពលោក ព្រោះកន្លងមកទំនាយរបស់លោកយាយស្ទើរតែដូចទាំងស្រុងទៅហើយ៕

ប្រទេសថៃ ៖ តាមការចុះផ្សាយរបស់សារព័ត៌មាន Amarin News នៅថ្ងៃទី៣០ ខែតុលា ឆ្នាំ២០២៥ ឱ្យដឹងថា បុគ្គលជ្រុលនិយម វីរៈ ស៊ុមក្វាមឃិត ដែលតែងតែចេញមុខប្រឆាំងជាមួយរដ្ឋាភិបាលថៃនោះ បានបញ្ជាក់ជាថ្មីនឹងទៅបណ្តេញពលរដ្ឋខ្មែរចេញពីភូមិជោគជ័យ (ទល់មុខភូមិណងចាន់) បើទោះជាមានការរារាំងពីកងកម្លាំងថៃធ្វើឱ្យខ្លួនរងរបួសក្តី ក៏មិនខ្លាចដែរ គឺនៅតែប្រកាន់គោលជំហរបណ្តេញពលរដ្ឋខ្មែរចេញឱ្យបាន ។ បុគ្គលនេះស្តីបន្ទោសនាយករដ្ឋមន្ត្រីថៃដែលចុះហត្ថលេខាលើកិច្ចព្រមព្រៀងសន្តិភាពជាមួយកម្ពុជា ទើបធ្វើឱ្យកងទ័ពថៃពុំអាចធ្វើសកម្មភាពនៅតំបន់ព្រំដែនខេត្តស្រះកែវ ។

បុគ្គល វីរៈ ស៊ុមក្វាមឃិត បាននិយាយនៅចំពោះមុខសារព័ត៌មាននៅថ្ងៃទី៣០ ខែតុលា ថា ពលរដ្ឋថៃឱ្យខ្លួនតវ៉ាទាមទារទឹកដីនេះតាំងពីថ្ងៃទី២ ខែសីហា ឆ្នាំ២០១០ មកម៉្លេះ ខ្លួនមិនធ្លាប់បានជាន់លើទឹកដីចំនួន៦៤រ៉ៃ (ឬប្រមាណជាង១០ហិកតា) ទេ ប៉ុន្តែនៅថ្ងៃទី៣១ ខែតុលា ខ្លួននឹងជាន់លើទឹកដីនេះ ទោះជាកងទ័ព និងសមត្ថកិច្ចថៃធ្វើឱ្យខ្លួនរងរបួសក៏ដោយ ។ ថៃត្រូវតែបណ្តេញពលរដ្ឋខ្មែរចេញពីទឹកដីជាង១០ហិកតាឱ្យអស់ ទើបខ្លួនឈប់តវ៉ា បើមិនអាចបណ្តេញពលរដ្ឋខ្មែរទេ គ្មានសិទ្ធិមកហាមឃាត់ខ្លួនទេ ពីព្រោះរដ្ឋាភិបាលថៃធ្វើខុសច្បាប់រហូតមក បើកងកម្លាំងថៃចង់ធ្វើខុសច្បាប់ដែរ គឺនៅថ្ងៃទី៣១ ខែតុលា ដឹងគ្នាមិនខាន ។

កន្លងមក វីរៈ ស៊ុមក្វាមឃិត កើតទុក្ខមិនសុខចិត្តជាមួយលទ្ធផលកិច្ចប្រជុំពេញអង្គគណៈកម្មការចម្រុះខណ្ឌសីមាព្រំដែនគោកកម្ពុជា-ថៃ (JBC) នៅខេត្តចន្ទបុរី ប្រទេសថៃ ចាប់ពីថ្ងៃទី២១ ដល់ថ្ងៃទី២២ ខែតុលា ឆ្នាំ២០២៥ ថា ថៃចាញ់ប្រៀបកម្ពុជាក្នុងកិច្ចប្រជុំ JBC ទើបប្រមូលក្រុមជ្រុលនិយមថៃទៅបណ្តេញពលរដ្ឋខ្មែរចេញពីភូមិជោគជ័យ (ភូមិណងចាន់) នៅថ្ងៃទី៣១ ខែតុលា ។

កាលពីថ្ងៃទី២៣ ខែតុលា វីរៈ ស៊ុមក្វាមឃិត បានបង្ហោះសារក្នុងហ្វេសប៊ុកនិយាយពីកិច្ចប្រជុំ JBC កម្ពុជា-ថៃ នៅខេត្តចន្ទបុរី ថា ថៃចាញ់ប្រៀប ថៃមានចេតនាលក់ជាតិឱ្យកម្ពុជា ទើបធ្វើឱ្យការបណ្តេញពលរដ្ឋខ្មែរចេញពីភូមិជោគជ័យ និងភូមិព្រៃចាន់ ត្រូវអូសបន្លាយពេល ហើយថៃប្រឈមនឹងការគ្មានសិទ្ធិកាន់កាប់ទឹកដីនេះជារៀងរហូត ទើបចង់ឱ្យក្រុមជ្រុលនិយមជួយគ្នាបណ្តេញពលរដ្ឋខ្មែរឱ្យអស់ ។ ការញុះញង់មិនឈប់ឈរធ្វើឱ្យលោកនាយករដ្ឋមន្ត្រី Anutin Charnvirakul មិនពេញចិត្ត និងថា បុគ្គលនេះមិនធ្លាប់ធ្វើអ្វីជាប្រយោជន៍ដល់ជាតិ ។

លើសពីនេះ វីរៈ ស៊ុមក្វាមឃិត បានដាក់ពាក្យប្តឹងខែសីហាកន្លងមក ឱ្យចាប់មេបញ្ជាការយោធភូមិភាគ១ ពីបទពុំបណ្តេញពលរដ្ឋខ្មែរចេញពីភូមិជោគជ័យ និងភូមិព្រៃចាន់ ព្រមទាំងប្តឹងចាប់អភិបាលខេត្តស្រះកែវ ក្រោយពីផ្តល់សម្ភាសន៍និយាយការពិតថា តំបន់ដែលកងទ័ពថៃរាយបន្លាលួសជាទឹកដីរបស់កម្ពុជា ថៃគ្មានឯកសារកាន់កាប់ដីធ្លី ដែលធ្វើឱ្យពលរដ្ឋថៃខឹងសម្បារទូទាំងប្រទេស ។

គួរបញ្ជាក់ថា វីរៈ ស៊ុមក្វាមឃិត បានចំណាយពេលរហូតដល់១៥ឆ្នាំ ដើម្បីឱ្យពលរដ្ឋថៃទូទាំងប្រទេសព្រមទទួលស្គាល់ និងជឿថា ភូមិជោគជ័យ និងភូមិព្រៃចាន់ គឺជាទឹកដីថៃ ។ កាលពីប៉ុន្មានឆ្នាំមុន បុគ្គលនេះ និងមិត្តភក្តិ៨នាក់ទៀតបានដើរចូលទឹកដីកម្ពុជាខុសច្បាប់ ហើយកម្ពុជាក៏បញ្ជូនមកពន្ធនាគារ ទើបបុគ្គលនេះមានគំនិតគុំគួនរហូតមក និងសូមឱ្យថៃគ្រប់គ្រងភូមិទាំងពីរឱ្យបាន១០០% ។ ទោះជារដ្ឋាភិបាលថៃពេលនោះ (នៅឆ្នាំ២០១០) ប្រាប់ឱ្យ វីរៈ ស៊ុមក្វាមឃិត ព្រមទទួលទទួលកំហុស ប៉ុន្តែនៅតែពុំទទួលស្គាល់កំហុសដដែល ។

បច្ចុប្បន្ន មានរយៈពេល១៥ឆ្នាំហើយ ដែល វីរៈ ស៊ុមក្វាមឃិត ប្រឹងប្រែងធ្វើឱ្យពលរដ្ឋថៃជឿថា ខ្លួនធ្វើសកម្មភាពមានប្រយោជន៍សម្រាប់ជាតិ និងចោទប្រកាន់រដ្ឋាភិបាលថៃបណ្តោយឱ្យពលរដ្ឋខ្មែរចូលមករស់នៅតំបន់ព្រំដែនខេត្តស្រះកែវ ប្រមាណ៤០ឆ្នាំ ៕