ប្រទេសថៃ ៖ ទោះជាសមាជិកព្រឹទ្ធសភា ប្រធានគណបក្សប្រឆាំង និងមន្ត្រីសិទ្ធិមនុស្សនៅប្រទេសថៃ ចាត់ទុកការបើកសំឡេងខ្លាំងៗរបស់ Influencer កាន់ ចមផ្លាំង ដូចជា ៖ សំឡេងខ្មោច យន្តហោះចម្បាំង និងឆ្កែលូ រំខានដំណេកពលរដ្ឋខ្មែរ គឺជាការរំលោ.ភសិទ្ធិមនុស្សយ៉ាងធ្ងន់ធ្ងរ រំខានសុខភាពផ្លូវកាយ ផ្លូវចិត្តកុ.មារ ស្ត្រី ចាស់ជរា អ្នកជំងឺ ជនពិការ ក៏ដូចជាបំពានលើបទឈប់បា.ញ់ និងគោលការណ៍ធម្មនុញ្ញអង្គការសហប្រជាជាតិ ប៉ុន្តែបុគ្គលនេះទទួលបានការគាំទ្រយ៉ាងខ្លាំងពីសង្គមថៃ ជាពិសេស ក្រុមជ្រុលនិយម ថែមទាំងមានអ្នកប្រគល់ពានរង្វាន់ «បុគ្គលមានប្រយោជន៍ដល់សង្គម» ឱ្យ Influencer ទៀតផង ។

តាមការចុះផ្សាយរបស់សារព័ត៌មាន Thairath នៅថ្ងៃទី២ ខែវិច្ឆិកា ឆ្នាំ២០២៥ Influencer កាន់ ចមផ្លាំង បានទទួលពានរង្វាន់ «បុគ្គលមានប្រយោជន៍ដល់សង្គម» ក្រោយពីបង្កសកម្មភាពអុកឡុក និងចាក់សំឡេងខ្លាំងៗរំខានពលរដ្ឋខ្មែរនៅភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ (ទល់មុខភូមិណងចាន់ និងភូមិណងយ៉ាកែវ ឃុំឃូកសូង ខេត្តស្រះកែវ) ។ សកម្មភាពរំលោភសិទ្ធិមនុស្សរបស់បុគ្គលនេះដែលអន្តរជាតិមិនឱ្យតម្លៃ បែរជាសង្គមថៃគាំទ្រលើកតម្កើងជាវីរបុរសក្លាហាន និងប្រគល់ពានរង្វាន់ «បុគ្គលមានប្រយោជន៍ដល់សង្គម» និងជំរុញឱ្យធ្វើសកម្មភាពរំខានពលរដ្ឋខ្មែរបន្តទៀត ។

ក្រោយពីទទួលបានពានរង្វាន់ «បុគ្គលមានប្រយោជន៍ដល់សង្គម» ពីក្រុមសិល្បករសង្គមច្នៃប្រឌិតនៅប្រទេសថៃ កាន់ ចមផ្លាំង និយាយថា បើមានឱកាស ខ្លួននឹងត្រឡប់មកធ្វើសកម្មភាពរំខានពលរដ្ឋខ្មែរនៅព្រំដែនខេត្តស្រះកែវឡើងវិញ រួមទាំងអរគុណដល់អ្នកគាំទ្រផងដែរដែលជំរុញឱ្យខ្លួនធ្វើសកម្មភាពនៅព្រំដែន ។

កាលពីថ្ងៃទី២ ខែវិច្ឆិកា កាន់ ចមផ្លាំង បានបង្ហោះរូបភាព និងសរសេរក្នុងហ្វេសប៊ុកថា «ក្រុមសិល្បករសង្គមច្នៃប្រឌិតបានប្រគល់ពានរង្វាន់ឱ្យខ្ញុំ ខណៈពេលនេះ មានទាំងអ្នកស្រឡាញ់ និងអ្នកមិនចូលចិត្ត ។ ពីដំបូង គិតថាឈប់ធ្វើសកម្មភាពនៅព្រំដែនទៀតហើយ ប៉ុន្តែសង្គមបានគាំទ្រឱ្យធ្វើសកម្មភាពបន្តទៀត បើមានឱកាស នឹងធ្វើសកម្មភាពនៅព្រំដែនខេត្តស្រះកែវឡើងវិញ ដើម្បីកុំឱ្យអ្នកប្រគល់ពានរង្វាន់ឱ្យខកបំណង ។ អរគុណដែលផ្តល់កម្លាំងចិត្តជំរុញឱ្យខ្ញុំចង់ធ្វើសកម្មភាពបន្ត និងអរគុណអ្នកគាំទ្រទាំងអស់ដែលតែងតែជំរុញគ្រប់ពេលវេលា» ។

គួរបញ្ជាក់ថា ទន្ទឹមនឹងមានអ្នកស្រឡាញ់ចូលចិត្ត Influencer រូបនេះក៏រងនូវរិះគន់ពីសង្គមផងដែរ ពាក់ព័ន្ធនឹងការកេងបន្លំប្រាក់មូលនិធិដែលពលរដ្ឋថៃផ្ញើចូលគណនីធនាគារសម្រាប់ធ្វើសកម្មភាពនៅព្រំដែន ដូចជា ៖ រៀបចំលេណដ្ឋាន បន្ទប់ទឹក និងបើកសំឡេងរំខានពលរដ្ឋខ្មែរ ដោយសារចំណាយខុសគោលដៅ និងគ្មានបញ្ជីចំណូល ចំណាយច្បាស់លាស់ ។ មតិភាគច្រើនសង្ស័យថា ប្រមូលប្រាក់មូលនិធិដែល កាន់ ចមផ្លាំង ប្រមូលបានរាប់រយលានបាត គឺពាក់ព័ន្ធនឹងផលប្រយោជន៍របស់រដ្ឋមន្ត្រីក្រសួងកសិកម្ម និងយកទៅទិញរថយន្តទំនើបជិះ រហូតធ្វើឱ្យ កាន់ ចមផ្លាំង ផ្អាកសកម្មភាពនៅព្រំដែនមួយរយៈ ។

ទោះយ៉ាងណា ពលរដ្ឋថៃនៅព្រំដែនគាំទ្រ កាន់ ចមផ្លាំង និងប្រាប់ឱ្យមកធ្វើសកម្មភាពរំខានពលរដ្ឋខ្មែរបន្ត ដោយពួកគេថា សមាជិកព្រឹទ្ធសភា និងមន្ត្រីសិទ្ធិមនុស្ស បានតែរិះគន់ប៉ុណ្ណោះ មិនដែលចុះមកមើលពលរដ្ឋនៅព្រំដែនដោយផ្ទាល់ទេ ។ ក្រុមជ្រុលនិយមថៃថែមទាំងរិះគន់ខ្លាំងៗទៅលើសមាជិកព្រឹទ្ធសភា អ្នកស្រី អាំងខាណា នីឡៈផៃជិត ក្រោយពីរិះគន់ Influencer និង និយាយការពិតពីថៃឈ្លានពានកម្ពុជា ដូចជា ៖ បើកសំឡេងរំខានពលរដ្ឋខ្មែរនៅភូមិជោគជ័យ និងភូមិព្រៃចាន់ ដែលជាការរំលោភសិទ្ធិមនុស្សយ៉ាងធ្ងន់ធ្ងរ និងប្រើប្រាស់យន្តហោះចម្បាំង F-16 ទម្លាក់គ្រាប់បែកលើមូលដ្ឋានកងទ័ពកម្ពុជា ៕

តារាចម្រៀង G-Dragon នៃសមាជិក BIGBANG បានធ្វើឱ្យអ្នកគាំទ្រ (VIP) បង្ហាញអារម្មណ៍រំភើបរីករាយនិងមានមោទនភាពយ៉ាងខ្លាំងបន្ទាប់ពីតារាចម្រៀងរូបនេះបានសម្តែងបទចម្រៀង Kpop នៅពីមុខមេដឹកនាំកំពូលៗនៅក្នុងកិច្ចប្រជុំកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក(APEC)។

កិច្ចប្រជុំ APEC ស្វាគមន៍អាហារពេលល្ងាចត្រូវបានប្រារព្ធឡើងនៅ Lahan Hotel Grand Ballroom ក្នុងទីក្រុង Gyeongju នៅថ្ងៃទី៣១ តុលា។ បន្ទាប់ពីទទួលទានអាហារពេលល្ងាច ការសំដែងវប្បធម៌ក្រោមប្រធានបទ «Journey of Butterfly: Together, We Fly» ត្រូវបានបង្ហាញ។ G-Dragon គឺជាសិល្បករ K-pop តែម្នាក់គត់ដែលបានសម្តែងនៅទីនេះដោយបានសម្តែងរយៈពេល ១០ នាទី។

G-Dragon បានណែនាំខ្លួនយ៉ាងខ្លីដោយនិយាយថា«ខ្ញុំគឺ G-Dragon ដែលជាទូតសុឆ្ឆនៈផ្សព្វផ្សាយសម្រាប់ APEC 2025» ហើយបានចាប់ផ្តើមជាមួយនឹងបទ «Power» ដែលជាបទបានចេញផ្សាយកាលពីខែតុលា ឆ្នាំ២០២៤។ គួរកត់សម្គាល់ថា G-Dragon បានទាក់ទាញការចាប់អារម្មណ៍ជាមួយនឹងការតុបតែងខ្លួនដោយមានគុជខ្យង និងមួកបែបប្រពៃណីកូរ៉េ។ រូបរាងរបស់តារាចម្រៀងវ័យ៣៧ឆ្នាំរូបនេះក៏បានរំលឹក Jinwoo ពីក្រុម Saja Boys នៅក្នុងគំនូរជីវចល «KPop Demon Hunters»ផងដែរ។ លោកបានបន្តបង្កើនបរិយាកាសជាមួយនឹងបទចម្រៀងបន្តទៀតគឺបទ “Drama” “Home Sweet Home” ។

ថ្នាក់ដឹកនាំបានឆ្លើយតបយ៉ាងរីករាយ។ ប្រធានាធិបតីកូរ៉េ Lee Jae-myung បានទស្សនាការសម្តែងរបស់ G-Dragon ពេលកំពុងសន្ទនាជាមួយប្រធានាធិបតីចិន Xi Jinping ។ នាយករដ្ឋមន្ត្រីកាណា រដ្ឋមន្ត្រីការបរទេសឈីលី និងថ្នាក់ដឹកនាំផ្សេងទៀតបានថតការសម្តែងរបស់ G-Dragon។ ក្រៅពី G-Dragon កម្មវិធីជប់លៀងអាហារពេលល្ងាចនេះក៏មានវត្តមានរបស់ Cha Eun-woo ធ្វើជាពិធីករផងដែរ។

អាហារពេលល្ងាចនេះមានការចូលរួមពីភ្ញៀវចំនួន ៤០០ នាក់ រួមទាំងប្រធានាធិបតីដឹកនាំកូរ៉េ ចិន និងមេដឹកនាំរួមទាំងភរិយាមកពីសមាជិក APEC ចំនួន ២១ និងប្រទេសដែលបានអញ្ជើញមកទស្សនាកូរ៉េខាងត្បូងសម្រាប់កិច្ចប្រជុំកំពូល តំណាងអង្គការអន្តរជាតិ នាយកប្រតិបត្តិពិភពលោក និងឥស្សរជនក្នុងស្រុក និងអន្តរជាតិដ៏លេចធ្លោផ្សេងទៀត៕

ប្រទេសថៃ ៖ ពលរដ្ឋថៃនៅខេត្តស្រះកែវកំពុងទន្ទឹងរង់ចាំ តើរដ្ឋាភិបាល និងកងទ័ពបើកព្រំដែនឡើងវិញពេលណា ក្រោយពីថៃបិទព្រំដែនជាឯកតោភាគីជាច្រើនខែ និងគ្មានព័ត៌មានរឿងបើកព្រំដែន ។ បរិយាកាសនៅមុខច្រកព្រំដែនបានឃ្លងលឹក ស្រុកអារញ្ញប្រាថេត ខេត្តស្រះកែវ ទល់មុខច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ នៅថ្ងៃទី១ ខែវិច្ឆិកា ឆ្នាំ២០២៥ មានសភាពស្ងប់ស្ងាត់ គ្មានមនុស្សឆ្លងដែន ឬរថយន្តដឹកទំនិញឆ្លងកាត់ ។ មន្ត្រីច្រកព្រំដែនបានឃ្លងលឹកធ្វើការធម្មតា ប៉ុន្តែមិនអនុញ្ញាតឱ្យមានការឆ្លងដែនគ្រប់ប្រភេទ ដោយការបើកព្រំដែនពេលណា គឺរង់ចាំបញ្ជាពីថ្នាក់លើ ។ នេះបើតាមការចុះផ្សាយរបស់សារព័ត៌មាន Thai PBS News នៅថ្ងៃទី១ ខែវិច្ឆិកា ។

តាមមេបញ្ជាការយោធភូមិភាគទី១ថៃ ពេលនេះ នៅមិនទាន់ទទួលបញ្ជាឱ្យបើកច្រកព្រំដែនបានឃ្លងលឹក រួមទាំងបើកច្រកព្រំដែនផ្សេងៗនៅខេត្តស្រះកែវទេ ហើយកងទ័ពយោធភូមិភាគទី១ និងកងទ័ពបូព៌ា (ឬកងកម្លាំងបូរ៉ាផា) បានអនុវត្តតាមវិធានការរក្សាសន្តិសុខនៅតំបន់ព្រំដែនយ៉ាងតឹងរ៉ឹង ព្រមទាំងយាមកាមការលួចឆ្លងដែនខុសច្បាប់ ។ លើសពីនេះ ក៏បានបញ្ជាឱ្យកងទ័ពគ្រប់អង្គភាពប្រុងប្រៀបខ្លួនជានិច្ច បើមានស្ថានការណ៍បន្ទាន់កើតឡើង ។

ពលរដ្ឋថៃ និងអ្នករកស៊ីលក់ដូរនៅច្រកព្រំដែនបានឃ្លងលឹក កំពុងទន្ទឹងរង់ចាំភាពច្បាស់លាស់ពីរដ្ឋាភិបាល និងកងទ័ពថៃ ថានឹងពិចារណាបើកព្រំដែនឡើងវិញពេលណា? ដើម្បីឱ្យសេដ្ឋកិច្ចព្រំដែនល្អប្រសើរឡើងវិញ បច្ចុប្បន្ន ពួកគេបាត់បង់ចំណូលទាំងស្រុងដោយសារគ្មានភ្ញៀវទេសចរ ។ ក្រោយពីពលរដ្ឋសួរនាំរឿងការបើកព្រំដែន កងទ័ពថៃឆ្លើយថា ត្រូវរង់ចាំការវាយតម្លៃស្ថានការណ៍ឱ្យគ្រប់ជ្រុងជ្រោយសិន មុននឹងអនុញ្ញាតឱ្យបើកព្រំដែនកម្ពុជា-ថៃតាមធម្មតា ។

យោងតាមនាយកដ្ឋានពាណិជ្ជកម្មបរទេសរបស់ថៃបង្ហាញថា ពាណិជ្ជកម្មព្រំដែនរបស់ប្រទេសថៃ ក្នុងខែកញ្ញា ឆ្នាំ២០២៥នេះ បានធ្លាក់ចុះ២២.២% ដែលស្មើនឹងការថយចុះទឹកប្រាក់ប្រមាណ ១៤១,៦៩៤លានបាត ( ឬប្រហែល ៣.៨៧ពាន់លានដុល្លារ) ដោយសារការបិតព្រំដែនជាមួយកម្ពុជា និងមីយ៉ាន់ម៉ា ។

ម្ចាស់អាជីវកម្មថៃជាច្រើនបានទាមទារសុំជំនួយពីរដ្ឋាភិបាលរបស់ខ្លួនដោយព្រមានថា ការបិទព្រំដែនជាមួយកម្ពុជាដែលកំពុងអូសបន្លាយនេះ អាចបង្កការខាតបង់យ៉ាងធ្ងន់ធ្ងរដល់សេដ្ឋកិច្ចថៃ ដោយពួកគេទាមទារឱ្យមានវិធានការសង្គ្រោះជាបន្ទាន់ ។ របាយការណ៍របស់ Bloomberg News បង្ហាញថា បន្ទាប់ពីបិទច្រកព្រំដែនគោករវាងកម្ពុជា-ថៃ ធុរកិច្ចថៃបានខាតបង់ប្រាក់ប្រមាណ ១៥ពាន់លានបាត (ឬ ៤៥៨លានដុល្លារ) ក្នុង១ខែ ដែលរបាយការណ៍នេះបានគណនាទុកមុនថា ការខាតបង់សរុបអាចនឹងឈានដល់ ១០០ពាន់លានបាត (ឬ ៣.១ពាន់លានដុល្លារ) បើព្រំដែននៅតែបន្តបិទរហូតដល់ចុងឆ្នាំ ។

ទោះយ៉ាងណា រដ្ឋាភិបាលថៃនៅតែប្រកាន់គោលជំហរមិនបើកព្រំដែនវិញដោយងាយឡើយ ដោយចង់ឲ្យកម្ពុជាជាអ្នកបន្ទន់ឥរិយាបថទៅចរចា និងអនុវត្តតាមលក្ខខណ្ឌដែលថៃបានកំណត់ទាំង៤ចំណុចជាមុនសិន ទាំងដែលបញ្ហានេះគឺថៃជាអ្នកធ្វើឡើងជាឯកតោភាគីកាលពីខែមិថុនាកន្លងទៅក៏ដោយ ៕

ប្រទេសថៃ៖ កងទ័ពជើងគោកថៃ (RTA) បានបដិសេធមិនទទួលស្គាល់គ្រាប់បែ.កចង្កោ.ម ដែលបង្កការផ្ទុះស្លា.ប់កុមារាម្នាក់ នៅខេត្តព្រះវិហារថាជារបស់ខ្លួនដាច់ខាត និងថែមទាំងចោ.ទបកមកកម្ពុជាវិញថា បានធ្វើសេចក្តីថ្លែងការណ៍មិនពិត និងប្រឌិតភ័ស្តុងតាងដើម្បីទម្លាក់កំហុសលើថៃ។ នេះបើយោងតាមការចុះផ្សាយរបស់សារព័ត៌មាន The Nation។

នៅថ្ងៃទី៣១ ខែតុលា ឆ្នាំ២០២៥ កងទ័ពជើងគោកថៃ (RTA) បានលើកឡើងពីការព្រួយបារម្ភអំពីការផ្ទុះមួយនៅស្រុកជាំក្សាន្ត ខេត្តព្រះវិហារ ដែលបានសម្លា.ប់កុមារា អាយុ ១០ ឆ្នាំម្នាក់ និងធ្វើឱ្យឪពុកគេរងរបួសយ៉ាងធ្ងន់ធ្ងរ ថាបណ្តាលមកពីគ្រាប់បែកចង្កោមប្រភេទ M85 ពីគ្រាប់កាំភ្លើងធំ M396 155mmដែលចេញពីគ្រាប់កាំភ្លើងធំរបស់ថៃ។

អ្នកនាំពាក្យកងទ័ពភូមិន្ទថៃ លោក Winthai Suvaree បានបញ្ជាក់ថា ទាក់ទងនឹងសេចក្តីថ្លែងការណ៍របស់កម្ពុជា និងប្រៀបធៀបភស្តុតាងជាមួយនឹងទិន្នន័យបច្ចេកទេសលើប្រភេទគ្រាប់កាំភ្លើងធំដែលបានបញ្ជាក់ គឺមានភាពមិនស៊ីសង្វាក់គ្នា ក្នុងនោះថៃបានពិនិត្យឃើញសំខាន់ៗមួយចំនួនរួមមាន៖
១. ប្រទេសថៃមានគ្រាប់រំសេវធម្មតា ដែលវិវត្តពីរប្រភេទគ្រាប់ទំហំ 155 មីលីម៉ែត្រ (DPICM) ដែលបញ្ចេញគ្រាប់រំសេវ M85 នៅពេលផ្ទុះ។ ទោះជាយ៉ាងណាក៏ដោយ គ្រាប់រំសេវទាំងនេះត្រូវបានរចនាឡើងដើម្បីបំផ្ទុះខ្លួនឯងដោយស្វ័យប្រវត្តិ មិនអាចស្ថិតនៅក្នុងសមរភូមិជាសំណល់មិនទាន់ផ្ទុះឡើយ។
២. គ្រាប់រំសេវ M85 នីមួយៗមានផ្ទុកសារធាតុផ្ទុះខ្ពស់ ដែលប្រើសម្រាប់បញ្រ្ចាបចូលទៅក្នុងពាសដែក ឬគោលដៅដែលមានកំពែងរឹងមាំ ហើយមិនមានផ្ទុកសារធាតុដែក ឬសមាសធាតុបង្កើតអំបែងផ្សេងទៀតទេ។
៣. រូបថតដែលចេញផ្សាយដោយកម្ពុជាបង្ហាញពីស្នាមទម្លុះជាច្រើននៅលើដំបូលផ្ទះ និងពាសទឹក រួមជាមួយនឹងបំណែកផ្ទុះទូទៅ។ គំរូនេះមិនស៊ីសង្វាក់គ្នានឹងផលប៉ះពាល់នៃការផ្ទុះរបស់ M85 ដែលជាធម្មតាបណ្តាលឱ្យមានស្នាមរលាយ ឬឆេះដោយសារតែការផ្ទុះដែលមានកម្ដៅដ៏ក្ដៅរបស់វា មិនមែនបែ.កសាចបែបនេះនោះទេ។

យ៉ាងណាមិញ ទាំងនេះគឺគ្រាន់តែជាការបដិសេធរបស់ទ័ពភូមិន្ទថៃ ដែលមិនដែលទទួលស្គាល់ការពិតតែប៉ុណ្ណោះ ខណៈកម្ពុជាមានភ័ស្តុតាងដែលបានរកឃើញជាច្រើនអាចបញ្ជាក់បានថា គ្រាប់ដែលបង្កគ្រោះថ្នាក់កាលពីថ្មីៗនេះ គឺពិតជាសំណល់យុទ្ធភណ្ឌសង្គ្រាម ដែលកងទ័ពថៃបានបាញ់មកលើទឹកដីកម្ពុជាក្នុងសង្គ្រាមថ្ងៃទី២៤-២៨ ខែកក្កដា ឆ្នាំ២០២៥។

បន្ថែមពីនេះ បើតាមការបញ្ជាក់របស់អាជ្ញាធរមីនកម្ពុជាបានឲ្យដឹងផងដែរថា ក្រៅពីគ្រាប់បែ.កចង្កោម M85 នេះកម្ពុជាក៏បានរកឃើញនូវសំណល់យុទ្ធភណ្ឌមិនទាន់ផ្ទុះប្រភេទផ្សេងៗទៀត រួមទាំងសារធាតុគីមីច្រើនជាង៧០មុខ នៅពាសពេញទឹក ដី និងក្នុងស្រែចម្ការបស់បងប្អូនប្រជាពលរដ្ឋកម្ពុជារស់នៅតំបន់ប្រឈម ដែលសុទ្ធតែជាសំណល់យុទ្ធភណ្ឌថ្មីៗត្រូវបានបន្សុលទុកដោយយោធាថៃ៕

ទីក្រុងគ្យុងជូ៖ នាយករដ្ឋមន្រ្តីថៃ លោក អនុទីន ឆាន់វិរៈគុល បានស្កាត់ជួបជាមួយប្រធានាធិបតីចិន លោក សុី ជីនពីង ក្នុងអំឡុងពេលកិច្ចប្រជុំនៅប្រទេសកូរ៉េខាងត្បូង ដើម្បីរំលឹកលោក សុី កុំឲ្យភ្លេចជួយប្រមូលទិញអង្ករប្រមាណ ៥០មុឺនតោនពីប្រទេសថៃ ដើម្បីពង្រឹងទំនាក់ទំនងពាណិជ្ជកម្មទ្វេភាគី និងជួយដល់ជីវភាពរបស់កសិករថៃ។ នេះបើតាមការចុះផ្សាយរបស់សារព័ត៌មាន The Nation។

លោកនាយករដ្ឋមន្ត្រីថៃ អនុទីន ឆាន់វីរៈគុល បានរំលឹកប្រធានាធិបតីចិន លោក ស៊ី ជីនពីង ឲ្យបន្តជំរុញផែនការនាំចេញអង្កររបស់ប្រទេសថៃទៅកាន់ប្រទេសចិនតាមការកិច្ចព្រមព្រៀងជាមួយគ្នាកន្លងមក។ ការលើកឡើងនេះត្រូវបានធ្វើឡើងក្នុងអំឡុងពេលកិច្ចប្រជុំទ្វេភាគីរបស់ពួកគេនៅឯសប្តាហ៍មេដឹកនាំសេដ្ឋកិច្ច APEC លើកទី ៣២ នៅទីក្រុងគ្យុងជូ ប្រទេសកូរ៉េខាងត្បូង។

បន្ទាប់ពីកិច្ចប្រជុំទ្វេភាគីត្រូវបានបញ្ចប់ លោកអនុទីន បាននិយាយទៅកាន់លោកស៊ី ថាសូម “កុំភ្លេចទិញអង្ករពីថៃ” ក្នុងគោលបំណងពន្លឿនចិនឲ្យជួយទិញអង្ករពីថៃចំនួន៥០០,០០០ តោន និងធ្វើការនាំចេញទៅកាន់ប្រទេសចិនឲ្យបានឆាប់រហ័ស។ លោកថាការពន្លឿនទិញអង្កររបស់ថៃចូលប្រទេសចិននឹងជួយដល់កសិករថៃជាច្រើនពាន់គ្រួសារ។

ខណៈការជំរុញឱ្យប្រទេសចិនពន្លឿនការទិញអង្ករពីថៃនេះ ត្រូវបានបញ្ចូលជាបៀបវារៈសំខាន់មួយរបស់លោក អនុទីន ក្នុងកិច្ចប្រជុំជាមួយចិន ប្រទេសថៃមានការរំពឹងខ្ពស់ថា វានឹងបង្កើតប្រាក់ចំណូលសម្រាប់កសិកររបស់ប្រទេសថៃ និងជួយធ្វើឱ្យតម្លៃអង្ករមានស្ថេរភាព ក៏ដូចជាពង្រីកពាណិជ្ជកម្មកសិកម្មជាមួយប្រទេសចិន ដែលជាដៃគូពាណិជ្ជកម្មធំបំផុតរបស់ប្រទេសថៃ។

ក្រសួងពាណិជ្ជកម្មថៃវរំពឹងថា ការនាំចេញអង្កររបស់ថៃនឹងធ្វើដំណើរទៅកាន់ប្រទេសចិននៅខែក្រោយដើម្បីបញ្ចប់កិច្ចព្រមព្រៀងនេះ។ ថៃរដ្ឋាភិបាលថៃចាត់ទុកវាជាកិច្ចព្រមព្រៀងដ៏ជោគជ័យមួយ ហើយជឿជាក់ថាវាមិនត្រឹមតែនឹងជួយជំរុញសេដ្ឋកិច្ចជនបទប៉ុណ្ណោះទេ ប៉ុន្តែថែមទាំងបញ្ជាក់ជាថ្មីនូវតួនាទីរបស់ថៃ ក្នុងនាមជាប្រទេសដែលនាំចេញអង្ករកំពូលមួយរបស់ពិភពលោកផងដែរ៕

សហរដ្ឋអាមេរិក ៖ 1X Technologies ជាក្រុមហ៊ុនបច្ចេកវិទ្យានៅរដ្ឋកាលីហ្វ័រញ៉ា សហរដ្ឋអាមេរិក បានបង្ហាញមនុស្សយន្ត Humanoid ដ៏ឆ្លាតវៃអាចធ្វើការងារផ្ទះគ្រប់បែបយ៉ាងតាមបញ្ជាដើម្បីសម្រួលដល់ម្ចាស់ផ្ទះ ប៉ុន្តែតម្លៃវិញមិនថោកទេ ដែលមនុស្សយន្តនេះឈ្មោះ «NEO» មានកម្ពស់១ម៉ែត្រ៦៧ មានតម្លៃ២ម៉ឺនដុល្លារ ។ ការបង្ហាញមនុស្សយន្តនេះធ្វើឱ្យមនុស្សជាច្រើនចង់ទិញវាយកទៅប្រើប្រាស់ ខណៈអ្នកខ្លះទៀតបារម្ភពីសុវត្ថិភាព ។ នេះបើតាមការចុះផ្សាយរបស់សារព័ត៌មានបរទេសកាលពីថ្ងៃទី៣០ ខែតុលា ឆ្នាំ២០២៥ ។

«ក្រុមហ៊ុន 1X Technologies មានគម្រោងលក់មនុស្សយន្តឆ្លាតវៃនៅសហរដ្ឋអាមេរិកនាដើមឆ្នាំ២០២៦ ក្នុងតម្លៃ២ម៉ឺនដុល្លារ ឬអាចបង់ក្នុងប្រព័ន្ធសមាជិកប្រចាំខែ ចំនួន៤៩៩ដុល្លារ ។ មនុស្សយន្ត Humanoid អាចធ្វើការងារផ្ទះគ្រប់យ៉ាង ដែលវាធ្លាប់ជាក្តីសុបិនរបស់ពលរដ្ឋអាមេរិកពីមុនមក ទើបក្រុមហ៊ុនបច្ចេកវិទ្យាស្រាវជ្រាវពីការផលិត ពេលនេះ មនុស្សយន្ត Humanoid ឈ្មោះ «NEO» បានបង្ហាញរូបរាងពិតប្រាកដហើយ» ។ នេះបើតាមការលើកឡើងរបស់អ្នកស្រី Bernt Bornich ជា CEO របស់ក្រុមហ៊ុន 1X Technologies ។

ក្រុមហ៊ុនបើកឱ្យអតិថិជនកុម្ម៉ង់ទិញជាមុនចាប់ពីដើមខែវិច្ឆិកា ឆ្នាំ២០២៥ តទៅ អតិថិជនត្រូវកក់ប្រាក់មុនចំនួន២០០ដុល្លារ ។ មនុស្សយន្ត NEO ត្រូវបានផលិតឡើងដើម្បីជួយធ្វើការងារផ្ទះផ្សេងៗ ដូចជា ៖ បើកទ្វារផ្ទះទទួលភ្ញៀវ ឬទទួលម្ចាស់ផ្ទះត្រឡប់ពីធ្វើការ, ជួយរើសវត្ថុនានា, ដើរបិទភ្លើងតាមបន្ទប់ផ្សេងៗពេលយប់ និងធ្វើការងារក្នុងផ្ទះបាយ វានឹងមានសមត្ថភាពខ្លាំងឡើងនៅពេលអាប់ឌេត Software ។

គុណសម្បត្តិនៃការធ្វើការងារផ្ទះរបស់មនុស្សយន្ត គឺម្ចាស់ផ្ទះអាចបញ្ជាវាឱ្យធ្វើការងារជុំវិញផ្ទះ រួមទាំងអាចដាស់តឿនពេលវេលាទៅម្ចាស់ផ្ទះដើម្បីធ្វើការងារអ្វីមួយឱ្យរួចរាល់ ។ ម្ចាស់អាចត្រួតពិនិត្យវាធ្វើការតាម App ទូរស័ព្ទ តាមរយៈកាមេរ៉ាបំពាក់លើមុខមនុស្សយន្ត ដែលកាមេរ៉ានេះនឹងថតរូបភាពកន្លែងណាដែលវាមើលឃើញ ។ រីឯការងារខ្លះដែលវាពុំអាចធ្វើបាន គឺម្ចាស់អាចណាត់ជួបអ្នកជំនាញរបស់ក្រុមហ៊ុនផលិតដើម្បីអាប់ឌេត Software ឱ្យវាអាចធ្វើការបន្ថែមទៀត ។

ក្រុមហ៊ុនផលិតបានប្រើប្រាស់បច្ចេកវិទ្យា AI លើរូបភាពនិងសំឡេង ដើម្បីជួយឱ្យមនុស្សយន្តអាចចងចាំសំឡេងម្ចាស់ផ្ទះ និងឆ្លើយតបពេលមានអ្នកណាម្នាក់ហៅ ។ បច្ចេកវិទ្យា AI ក៏ជួយបង្កើនប្រសិទ្ធភាពពេលធ្វើការក្នុងផ្ទះបាយផងដែរ ដូចជា ៖ ចងចាំគ្រឿងផ្សំ និងបន្លែផ្សេងៗសម្រាប់ចម្អិនអាហារ, ណែនាំមុខម្ហូប និងអាចតុបតែងខ្លួនវាដោយស្វ័យប្រវត្តិពេលម្ចាស់ប្រើឱ្យធ្វើការច្រើនម៉ោង ។

អ្នកបានឃើញរូបរាងវា សរសើរពីគុណសម្បត្តិ និងកុម្ម៉ង់ទិញពីក្រុមហ៊ុន ដោយសារចង់ដឹងតើវាអាចធ្វើការងារផ្ទះបានច្រើនកម្រិតណា ប៉ុន្តែអ្នកខ្លះទៀតបែរជាបារម្ភពីបច្ចេកវិទ្យា AI បំពាក់លើមនុស្សយន្តធ្វើការងារផ្ទះ ។ ពួកគេសួរថា តើគួរធ្វើដូចម្តេចពេលវាមានបញ្ហា ឬមិនស្តាប់បញ្ជា ហើយក៏សម្លាប់ម្ចាស់ពេលកំពុងសម្រាន្តលក់ ៕