ប្រទេសថៃ ៖ នាយករដ្ឋមន្ត្រីថៃ លោក Anutin Charnvirakul នឹងប្រជុំជាមួយស្ថាប័នកងទ័ពដើម្បីបញ្ឈប់ការអនុវត្តកិច្ចព្រមព្រៀងសន្តិភាពជាមួយកម្ពុជា ដែលភាគីទាំងពីរចុះហត្ថលេខានៅទីក្រុងកូឡាឡាំពួរ ប្រទេសម៉ាឡេស៊ី ក្រោមវត្តមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim កាលពីថ្ងៃទី២៦ ខែតុលា ឆ្នាំ២០២៥ បន្ទាប់ពីសារព័ត៌មាននានារបស់ថៃចុះផ្សាយថា កងទ័ពថៃ២នាក់បានដើរល្បាតជាន់មីនដាច់ជើងនិងរងរបួសនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត (ទល់មុខប្រាសាទព្រះវិហារ) ។

តាមការចុះផ្សាយរបស់សារព័ត៌មាន The Better News នាយករដ្ឋមន្ត្រីថៃនឹងកោះប្រជុំជាមួយស្ថាប័នកងទ័ពនៅថ្ងៃទី១១ ខែវិច្ឆិកា ឆ្នាំ២០២៥ ដើម្បីបញ្ឈប់ការអនុវត្តកិច្ចព្រមព្រៀងសន្តិភាពជាមួយកម្ពុជា និងអនុញ្ញាតឱ្យក្រសួងការពារជាតិ និងក្រសួងការបរទេសថៃអនុវត្តការងារណាដែលប្រទេសថៃត្រូវការប៉ុណ្ណោះ ។ រីឯការដោះលែងវីរកងទ័ពកម្ពុជាទាំង១៨រូបត្រឡប់ទៅប្រទេសវិញ គ្មានការពន្យារពេលទេ គឺថៃនឹងពុំដោះលែងតែម្តង ។

បន្ទាប់ពីបញ្ចប់កិច្ចប្រជុំគណៈរដ្ឋមន្ត្រីនៅថ្ងៃទី១១ ខែវិច្ឆិកា លោកនាយករដ្ឋមន្ត្រី Anutin នឹងទៅសួរសុខទុក្ខកងទ័ពរងរបួសដោយសារជាន់មីន រួចហើយ លោកនឹងទៅពិនិត្យនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត (ទល់មុខប្រាសាទព្រះវិហារ) ព្រមទាំងធ្វើជាប្រធានកិច្ចប្រជុំដើម្បីបញ្ឈប់ការអនុវត្តសេចក្តីថ្លែងការណ៍រួម (Joint Declaration) ស្តីពីកិច្ចព្រមព្រៀងសន្តិភាពកម្ពុជា-ថៃ ដែលចុះហត្ថលេខានៅទីក្រុងកីឡាឡាំពួរ ប្រទេសម៉ាឡេស៊ី ក្រោមវត្តមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ។

នាយករដ្ឋមន្ត្រីថៃជ្រាបពីកងទ័ពថៃ២នាក់ដើរជាន់មីនពេលកំពុងល្បាតនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត បណ្តាលឱ្យដាច់ជើងស្តាំនិងរងរបួស ហើយលោកគាំទ្រការចាត់វិធានការរបស់ក្រសួងការពារជាតិ និងកងទ័ពថៃ ។ ហេតុនេះ កិច្ចព្រមព្រៀងផ្សេងៗដែលបានអនុវត្តកន្លងមក នឹងត្រូវបញ្ឈប់រហូតដល់មានភាពច្បាស់លាស់រឿងមីន លោកប្រាប់ទៅក្រសួងការពារជាតិ និងក្រសួងការបរទេសថា ត្រូវបំពេញកិច្ចការអ្វីតាមប្រទេសថៃត្រូវការប៉ុណ្ណោះ ។

លោក Anutin ថា ការអនុវត្តកិច្ចព្រមព្រៀងកន្លងមកនឹងធ្វើឱ្យការរគំរាមកំហែងមកលើប្រទេសខ្លួនធ្លាក់ចុះ ប៉ុន្តែវាពុំធ្លាក់ចុះឡើយ យើងមិនអាចធ្វើអ្វីលើសពីនេះបានទេ ។ ហេតុនេះ យើងត្រូវផ្អាកការអនុវត្តកិច្ចព្រមព្រៀងទាំងអស់ ដោយឱ្យរដ្ឋមន្ត្រីក្រសួងការពារជាតិ និងកងទ័ពជូនដំណឹងពីព័ត៌មានលម្អិត ហើយលោកគាំទ្រចំណាត់ការរបស់ក្រសួងការពារជាតិ និងក្រសួងការបរទេស ។

គួរបញ្ជាក់ថា កន្លងមក នាយករដ្ឋមន្ត្រីថៃបានបដិសេធការធ្វើដំណើរទៅចូលរួមកិច្ចប្រជុំកំពូលអាស៊ាននៅទីក្រុងកូឡាឡាំពួរ ប្រទេសម៉ាឡេស៊ី ដែលប្រធានាធិបតីអាមេរិកកំណត់ឱ្យកម្ពុជា-ថៃចុះហត្ថលេខាលើកិច្ចព្រមព្រៀងសន្តិភាព ដោយនាយករដ្ឋមន្ត្រីថៃលើកពីហេតុផលព្រះមាតារបស់ព្រះមហាក្សត្រថៃ សោយទិវង្គត ។ បន្ទាប់មក ក៏កែប្រែពាក្យសម្តីយល់ព្រមទៅចុះហត្ថលេខាលើកិច្ចព្រមព្រៀងសន្តិភាពវិញ ក្រោមការរិះគន់ពីពលរដ្ឋថៃថា អាមេរិកដាក់សម្ពាធ ។

ចំណែកកងទ័ពថៃជាន់មីនដាច់ជើងនាពេលនេះ គឺគ្រាន់តែជាឆាកល្ខោនរបស់ថៃដើម្បីយកលេសបញ្ឈប់ការអនុវត្តកិច្ចព្រមព្រៀងសន្តិភាពជាមួយកម្ពុជាប៉ុណ្ណោះ ពីព្រោះថៃគ្មានលេសអ្វីផ្សេងក្រៅពីនេះទេ ។ ការជាន់មីនជាល្បិចចាស់ដដែលៗ ដែលថៃបានអនុវត្តជាញឹកញាប់ដើម្បីទម្លាក់កំហុសលើកម្ពុជា និងឡាំប៉ាលុបចោលកិច្ចព្រមព្រៀងសន្តិភាព ដែលអាមេរិក និងម៉ាឡេស៊ីព្យាយាមស្វែងរកសន្តិភាពរវាងកម្ពុជា-ថៃ ៕

ប្រទេសហ្វីលីពីន៖ មនុស្សយ៉ាងហោចណាស់ 2នាក់ បានបាត់បង់ជីវិត និងជាង 1លាននាក់ ត្រូវបង្ខំចិត្តចាកចោលផ្ទះសម្បែងទៅរកទីទួលសុវត្ថិភាព បន្ទាប់ពីព្យុះបិសា.ច ហ្វុង-វុង បានវាយប្រ.ហារលើភាគខាងជើង ប្រទេសហ្វីលីពីន ដោយបង្កផលប៉ះពាល់យ៉ាងដំណមដល់ហេដ្ឋារចនាសម្ព័ន្ធ និងការរស់នៅរបស់ប្រជាជន។ នេះបើតាមសេចក្ដីរាយការណ៍របស់ទីភ្នាក់ងារ Reuters នៅថ្ងៃចន្ទនេះ។

ត្រឹមរយៈពេលតែមួយយប់ ឥទ្ធិពលរបស់ខ្យល់ព្យុះ ហ្វុង-វុង បានគ្របដណ្ដប់ទៅលើទីក្រុងឌីណាឡុងហ្គានភាគខាងកើតនៃខេត្តអូរ៉ូរ៉ា ប្រទេសហ្វីលីពីន ដែលនាំមកនូវខ្យល់បក់ខ្លាំង ផ្គរ រន្ទះ និងភ្លៀងធ្លាក់ខ្លាំងពេញមួយយប់ បណ្ដាលឲ្យបា.ក់រលំដើមឈើ ការរអិលបា.ក់ដី និងជំនន់ទឹកភ្លៀងកើនឡើងបានកាត់ផ្ដា.ច់ផ្លូវធ្វើដំណើរជាដើម។

យោងតាមរបាយការណ៍ដំបូងពីការិយាល័យការពារជនស៊ីវិលហ្វីលីពីន យ៉ាងហោចណាស់មានមនុស្សពីរនាក់បានស្លា.ប់ និងពីរនាក់ទៀតរងរបួស ដោយសារព្យុះទីហ្វុងដ៏កំណាចមួយនេះ។ លោក Patrick Alexis Angara អភិបាលរងខេត្ត Aurora បាននិយាយថា ពេលនេះទីក្រុងធំៗចំនួនបីត្រូវរងការខូចខាតយ៉ាងដំណមមិនអាចធ្វើដំណើរចូលបានឡើយ ដោយសារតែមានការបាក់ដី និងស្រុតផ្លូវ។

ទីភ្នាក់ងារអាកាសធាតុរដ្ឋបាននិយាយថា ឥឡូវនេះព្យុះទីហ្វុងនេះកំពុងធ្វើដំណើរឆ្លងកាត់សមុទ្រចិនខាងត្បូង និងត្រូវបានគេព្យាករណ៍ថា វានឹងផ្លាស់ប្តូរទៅទិសឦសានហើយធ្វើដំណើរឆ្ពោះទៅកាន់តៃវ៉ាន់វិញម្ដង។

សេចក្ដីរាយការណ៍នេះបន្តព្រមានថា ទោះជាយ៉ាងណា ផ្នែកធំនៃប្រទេសហ្វីលីពីននឹងនៅតែប្រឈមមុខនឹងភ្លៀងធ្លាក់ខ្លាំង និងខ្យល់បក់ខ្លាំង រួមជាមួយនឹងរលកព្យុះនៅតំបន់ឆ្នេរសមុទ្រផងដែរ។ អ្នកត្រួតពិនិត្យអាកាសចរណ៍ស៊ីវិលបាននិយាយថា មកទល់ពេលនេះ មានជើងហោះហើរសរុបជាង 400 ហើយដែលត្រូវបានលុបចោលរាប់ចាប់តាំងពីថ្ងៃអាទិត្យមក។

សូមជម្រាបថា ព្យុះទីហ្វុង Fung-wong គឺជាព្យុះទី 21 ដែលបានវាយប្រហារប្រទេសហ្វីលីពីននៅឆ្នាំនេះ។ វាបានកើតឡើងភ្លាមៗបន្ទាប់ពីព្យុះទីហ្វុង Kalmaegi កាលពីសប្តាហ៍មុនដែលបានសម្លា.ប់មនុស្ស 224 នាក់នៅក្នុងប្រទេស និង 5 នាក់ទៀតនៅក្នុងប្រទេសវៀតណាម៕

ប្រទេសថៃ ៖ ដូចការសន្និដ្ឋានមិនខុស ថៃបានលើកយកករណីកងទ័ពខ្លួន២នាក់ជាន់មីននៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត (ទល់មុខប្រាសាទព្រះវិហារ) នៅព្រឹកថ្ងៃទី១០ ខែវិច្ឆិកា ឆ្នាំ២០២៥ បណ្តាលឱ្យដាច់ជើងនិងរងរបួស មកធ្វើជាហេតុផលមិនដោះលែងវីរកងទ័ពកម្ពុជាទាំង១៨រូបត្រឡប់មកប្រទេសវិញ បើទោះជាកម្ពុជាបានអនុវត្តតាមលក្ខខណ្ឌនានារបស់ថៃក៏ដោយ ។ រដ្ឋមន្ត្រីក្រសួងការបរទេសថៃប្រកាសពន្យារពេលដោះលែងវីរកងទ័ពកម្ពុជាក្រោយពីកងទ័ពខ្លួនជាន់មីននៅខេត្តស៊ីសាកេត និងបញ្ជាឱ្យត្រួតពិនិត្យជាមីនចាស់ឬថ្មី ។

តាមការចុះផ្សាយរបស់សារព័ត៌មាន Khaosod នៅថ្ងៃទី១០ ខែវិច្ឆិកា រដ្ឋមន្ត្រីក្រសួងការពារជាតិ លោក Natthaphon Narkphanit បានប្រកាសពន្យារពេលដោះលែងវីរកងទ័ពកម្ពុជាទាំង១៨រូប ។ លោកបញ្ជាឱ្យផ្ញើលិខិតតវ៉ាពីការផ្ទុះមីនបណ្តាលឱ្យកងទ័ពខ្លួនដាច់ជើងនិងរងរបួស ទៅកាន់ក្រុមអ្នកសង្កេតការណ៍អន្តរកាល (IOT) និងបញ្ជាទៅកាន់មេបញ្ជាការកងទ័ពភូមិភាគទី២ ឱ្យត្រួតពិនិត្យ តើជាមីនចាស់ឬថ្មី ។ ជំហ៊ានដំបូង មេបញ្ជាការកងទ័ពភូមិភាគទី២ សន្និដ្ឋានថា ជាមីនថ្មី ។

រដ្ឋមន្ត្រីក្រសួងការពារជាតិ លោក Natthaphon និយាយថា កងទ័ពថៃ២រូបបានជាន់មីននៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ពេលកំពុងយាមល្បាតបណ្តាលឱ្យម្នាក់ដាច់ជើងស្តាំ និងម្នាក់ទៀតរងរបួស ដែលហេតុការណ៍នេះកើតឡើងនៅតំបន់ប្រាសាទព្រះវិហារ និងភ្នំទ្រព្យ ដែលថៃកំពុងបណ្តេញកងទ័ពកម្ពុជាឱ្យចាកចេញ ។ លោកបានបញ្ជាឱ្យមេបញ្ជាការកងទ័ពភូមិភាគទី២ ត្រួតពិនិត្យតើជាមីនចាស់ឬថ្មី? បើតាមសន្និដ្ឋានថា ជាមីនថ្មី ។ រីឯវីរកងទ័ពកម្ពុជាទាំង១៨រូបដែលត្រៀមដោះលែង គឺត្រូវពន្យារពេលសិនដោយសារកងទ័ពថៃជាន់មីន ។ យើងនឹងជជែកលម្អិតរឿងនេះ បើរកឃើញថា កម្ពុជាមានចេតនាធ្វើឱ្យកងទ័ពថៃរងរបួស នឹងមានបញ្ហាខ្លាំងជាងនេះមិនខាន ។

នៅថ្ងៃដដែល លោក Siripong Angkasakulkiat អ្នកនាំពាក្យរដ្ឋាភិបាលថៃថា លោកនាយករដ្ឋមន្ត្រី Anutin Charnvirakul បានបញ្ជាឱ្យក្រសួងការពារជាតិ និងក្រសួងការបរទេសថៃតវ៉ាទៅកាន់ក្រុមអ្នកសង្កេតការណ៍អន្តរកាល (IOT) អំពីកងទ័ពថៃជាន់មីនពេលដើរល្បាតនៅព្រំដែន ដើម្បីចាត់វិធានការ, ជួយសង្គ្រោះ និងរាយការណ៍ពីហេតុការណ៍ជាន់មីនជាបន្តបន្ទាប់ ។

លោក Anutin បានទទួលសេចក្តីរាយការណ៍ពីកងទ័ពជើងគោករឿងកងទ័ពថៃជាន់មីននៅតំបន់ហួយតាម៉ារៀ បណ្តាលឱ្យដាច់ជើងនិងរងរបួស គឺលោកមិនសប្បាយចិត្តយ៉ាងខ្លាំងដោយប្រកាសផ្អាកកិច្ចព្រមព្រៀងផ្សេងៗជាមួយកម្ពុជា និងឱ្យក្រសួងការពារជាតិ និងក្រសួងការបរទេសរាយការណ៍ប្រាប់ក្រុមអ្នកសង្កេតការណ៍អន្តរកាល (IOT) ចាត់វិធានការយ៉ាងឆាប់បំផុត ។ នាយករដ្ឋមន្ត្រីថៃបានណែនាំកងទ័ព និងស្ថាប័នពាក់ព័ន្ធឱ្យយកចិត្តទុកដាក់ក្នុងការព្យាបាលកងទ័ពរងរបួស ព្រមទាំងរាយការណ៍ពីស្ថានការណ៍ ។

មុននេះ កងទ័ពថៃបានប្រកាសត្រៀមដោះលែងវីរកងទ័ពកម្ពុជាទាំង១៨រូបត្រឡប់មកប្រទេសវិញនៅថ្ងៃទី១២ ខែវិច្ឆិកា ខាងមុខ ក្រោយពីកម្ពុជាអនុវត្តតាមលក្ខខណ្ឌនានារបស់ខ្លួន និងថាការដោះលែង គ្មានសម្ពាធពីអាមេរិក និងម៉ាឡេស៊ីទេ ។ ប៉ុន្តែក្រោយពីមានព័ត៌មានរឿងកងទ័ពថៃជាន់មីននៅខេត្តស៊ីសាកេត ថៃក៏កែប្រែពាក្យសម្តីរបស់ខ្លួនវិញ គឺគ្មានការដោះលែងវីរកងទ័ពកម្ពុជានាពេលឆាប់ៗទេ ។

គួរបញ្ជាក់ថា ថៃតែងតែប្រើល្បិចចាស់ និងរៀបចំឆាកល្ខោនរឿងគ្រាប់មីនដើម្បីទម្លាក់កំហុសលើកម្ពុជាម្តងហើយម្តងទៀត ដោយយកលេសការផ្ទុះមីននៅថ្ងៃទី១០ ខែវិច្ឆិកានេះ មកធ្វើជាហេតុផលមិនដោះលែងវីរកងទ័ពកម្ពុជា ។ ម្យ៉ាងទៀត ថៃនឹងមានហេតុផលប្រាប់អាមេរិកពីការមិនដោះលែងវីរកងទ័ពកម្ពុជា ខណៈប្រធានាធិបតីអាមេរិកប្រាប់ឱ្យថៃដោះលែងតាំងពីប្រទេសទាំងពីរចុះហត្ថលេខាលើកិច្ចព្រមព្រៀងសន្តិភាពនៅទីក្រុងកូឡាឡាំពួរ ៕

ប្រទេសថៃ ៖ កងទ័ពថៃតែងប្រើល្បិចចាស់ដដែលៗរឿងជាន់មីនដើម្បីទម្លាក់កំហុស និងចោទប្រកាន់កម្ពុជា ជាពិសេស ពេលស្ថានការណ៍នៅតំបន់ព្រំដែនស្ងប់ស្ងាត់ សារព័ត៌មាននានារបស់ថៃក៏ផ្សាយថា កងទ័ពថៃជាន់មីន បើទោះជាកម្ពុជាបានបញ្ជាក់ម្តងហើយម្តងទៀតថា វាជាមីនចាស់បន្សល់តាំងពីសម័យសង្គ្រាមក្តី ។ ដូចទម្លាប់រាល់ដង នៅថ្ងៃទី១០ ខែវិច្ឆិកា ឆ្នាំ២០២៥នេះ គ្រប់សារព័ត៌មានថៃរាយការណ៍ថា កងទ័ពថៃ២នាក់ដើរជាន់មីនពេលកំពុងល្បាតនៅតំបន់ហួយតាម៉ារៀ ខេត្តស៊ីសាកេត ដែលព័ត៌មាននេះធ្វើឱ្យសង្គមថៃទម្លាក់កំហុសមកលើកម្ពុជា ។

សារព័ត៌មានថៃនានារាយការណ៍ថា នៅព្រឹកថ្ងៃទី១០ ខែវិច្ឆិកា ឆ្នាំ២០២៥ កងទ័ពថៃចំនួន២នាក់ បានដើរជាន់មីននៅតំបន់ហួយតាម៉ារៀ ស្ថិតក្នុងស្រុកកាន់ថាឡាក់ ខេត្តស៊ីសាកេត (ទល់មុខប្រាសាទព្រះវិហារ) បណ្តាលឱ្យដាច់ជើងខាងស្តាំម្នាក់ និងម្នាក់ទៀតណែនទ្រូង ។ ក្រោយហេតុការណ៍នេះ កងទ័ពថៃទាំង២រូបត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យកាន់ថាឡាក់ ហើយសារព័ត៌មានកំពុងរង់ចាំព័ត៌មានលម្អិត ។

កាលពីវេលាម៉ោង៩និង៣០នាទីព្រឹក ថ្ងៃទី១០ ខែវិច្ឆិកា កងទ័ពជើងគោកថៃបានទទួលសេចក្តីរាយការណ៍ពីកងកម្លាំងស៊ុណារីថា កងទ័ពថៃ២នាក់ដើរជាន់មីននៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ក្នុងអំឡុងពេលកំពុងដើរល្បាត រួមមាន ១-ឈ្មោះ ថេតសាក់ សាម៉ាផុង ដាច់ជើងស្តាំ និង២-ឈ្មោះ វ៉ាឈិរ៉ាក់ ផាន់ថាណា ណែនទ្រូង ។

នេះគ្រាន់តែជាល្បិចចាស់របស់កងទ័ពថៃដើម្បីទម្លាក់កំហុសលើកម្ពុជា ជាពិសេស នៅពេលតំបន់ព្រំដែនកម្ពុជា-ថៃមានស្ថានការណ៍ស្ងប់ស្ងាត់ គ្មានជម្លោះ ស្រាប់តែមានព័ត៌មានជាន់មីន ។ តើថៃមានចេតនាអ្វីឱ្យប្រាកដដែលចោទប្រកាន់រឿងមីន ស្របពេលប្រទេសទាំងពីរបានចុះហត្ថលេខាលើកិច្ចព្រមព្រៀងសន្តិភាពនៅទីក្រុងកូឡាឡាំពួរ ប្រទេសម៉ាឡេស៊ីរួចហើយ ។

គួរបញ្ជាក់ថា បច្ចុប្បន្ន ក្រុមការងារនៃមជ្ឈមណ្ឌលសកម្មភាពកម្ចាត់មីនកម្ពុជា (CMAC) និងក្រុមការងារនៃមជ្ឈមណ្ឌលសកម្មភាពកម្ចាត់មីនថៃ (TMAC) បានពិភាក្សាលម្អិតពីការដោះមីនតំបន់សាកល្បងក្នុងតំបន់អាទិភាពនៅព្រំដែនកម្ពុជា-ថៃ ស្របតាមការសម្រេចរបស់ក្រុមការងារសម្របសម្រួលចម្រុះ (JCTF) ក្នុងកិច្ចប្រជុំកាលពីថ្ងៃទី៣១ ខែតុលា ឆ្នាំ២០២៥ ។

កន្លងមក ក្រសួងការពារជាតិកម្ពុជាបានច្រានចោលទាំងស្រុងចំពោះការចោទប្រកាន់ដោយគ្មានមូលដ្ឋានច្បាស់លាស់របស់ថៃពាក់ព័ន្ធនឹងការបង្កប់មីនថ្មី ដោយកម្ពុជានៅតែរក្សាជំហរយ៉ាងម៉ឺងម៉ាត់ គឺគ្មានការប្រើប្រាស់ និងមិនប្រើប្រាស់មីនថ្មីដាច់ខាត ។ កម្ពុជា ជារដ្ឋភាគីនៃអនុសញ្ញាហាមប្រាមការប្រើប្រាស់មីនប្រឆាំងមនុស្ស ដែលកម្ពុជាបានផ្តល់សច្ចាប័នក្នុងឆ្នាំ១៩៩៩ ក៏ត្រូវបានទទួលស្គាល់ជាអន្តរជាតិចំពោះសមិទ្ធផលនៃការបោសសម្អាតមីន និងគ្មានការប្រើប្រាស់មីនប្រឆាំងមនុស្សឡើយ ៕