ប្រទេសថៃ ៖ វាបានក្លាយជាទម្លាប់ឱ្យតែស្រុកទេសមានសន្តិភាពឡើងវិញ ស្ថានការណ៍នៅព្រំដែនស្ងប់ស្ងាត់ ស្រាប់តែមានព័ត៌មានពីខាងថៃថាកងទ័ពខ្លួនជាន់មីនភ្លាម ដែលនេះជាចេតនារបស់ថៃប្រឌិតរឿងជាន់មីនធ្វើឱ្យស្ថានការណ៍តានតឹង និងទម្លាក់កំហុសលើកម្ពុជាម្តងហើយម្តងទៀត ។ ហេតុការណ៍កងទ័ពថៃជាន់មីននៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ក៏ជាការប្រឌិតដែរ ដើម្បីថៃមានលេសមិនដោះលែងវីរកងទ័ពកម្ពុជាទាំង១៨រូប និងផ្អាកអនុវត្តកិច្ចព្រមព្រៀងសន្តិភាពជាមួយកម្ពុជា ដែលចុះហត្ថលេខានៅទីក្រុងកូឡាឡាំពួរ ក្រោមវត្តមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ។

ក្រោយថៃប្រឌិតរឿងកងទ័ពខ្លួន២នាក់ជាន់មីនដាច់ជើងស្តាំ និងរងរបួស នៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត កាលពីថ្ងៃទី១០ ខែវិច្ឆិកា ឆ្នាំ២០២៥ ប្រធានគណបក្សថៃសាងថៃ អ្នកស្រី Sudarat Keyuraphan បានណែនាំឱ្យរដ្ឋាភិបាលថៃចាត់វិធានការយ៉ាងម៉ឺងម៉ាត់ ដោយអ្នកស្រីថា ថៃពុំទាន់ទទួលបានអធិបតេយ្យភាព តំបន់ព្រំដែនពោរពេញដោយហានិភ័យ ការចរចាសន្តិភាពគ្មានប្រយោជន៍ ហើយជនជាតិថៃប្រឈមនឹងគ្រោះថ្នាក់រហូតមក ។

កាលពីថ្ងៃទី១០ ខែវិច្ឆិកា ប្រធានគណបក្សថៃសាងថៃ អ្នកស្រី Sudarat បាននិយាយពីកងទ័ពថៃជាន់មីននៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ថា ការចុះហត្ថលេខាលើកិច្ចព្រមព្រៀងសន្តិភាពនៅទីក្រុងកូឡាឡាំពួរ ប្រទេសម៉ាឡេស៊ី កន្លងមក គឺគ្មានប្រយោជន៍សម្រាប់ថៃ ជាពិសេស ថៃមិនទទួលបានទឹកដីរបស់កម្ពុជា ។ ពលរដ្ឋថៃសួរថា តើរដ្ឋាភិបាលអាចដណ្តើមយកតំបន់នៅប្រាសាទតាក្របី ច្រកអានសេះ និងតំបន់ផ្សេងៗរបស់កម្ពុជាដែរឬទេ?

ប្រធានគណបក្សថៃសាងថៃបន្តថា ការបញ្ជាឱ្យឈប់បាញ់ពេលសង្គ្រាមកន្លងមក ធ្វើឱ្យកងទ័ពថៃបាត់បង់ឱកាសដណ្តើមយកទឹកដីកម្ពុជា និងថៃចាញ់ប្រៀបផ្នែកកងទ័ពនាថ្ងៃអនាគត ខណៈពលរដ្ឋនៅព្រំដែនរស់នៅប្រឈមនឹងគ្រោះថ្នាក់ ។ ការឈប់បាញ់មិនបានជួយការពារអធិបតេយ្យទេ ប៉ុន្តែវាឆ្លុះបញ្ចាំងពីរដ្ឋាភិបាលថៃខ្វះសមត្ថភាពក្នុងការចរចាទ្វេភាគី ថែមទាំងបាត់បង់ប្រយោជន៍ ។

ការចុះហត្ថលេខាលើសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពកម្ពុជា-ថៃ មិនទាន់មានលទ្ធផលនៅឡើយ ពីព្រោះកងទ័ពថៃនៅតែមានគ្រោះថ្នាក់ដោយសារជាន់មីនជាបន្តបន្ទាប់ វាធ្វើឱ្យពលរដ្ឋបារម្ភពីរដ្ឋាភិបាលមានចំណាត់ការដូចម្តេចនៅតំបន់ព្រំដែន ។ ហេតុនេះ រដ្ឋាភិបាលគួរបង្ហាញផែនការសកម្មភាពក្នុងកិច្ចព្រមព្រៀងសន្តិភាពឱ្យបានច្បាស់លាស់ ដោយកំណត់តំបន់គោលដៅ ពេលវេលា ថវិកា និងយន្តការតាមដានលទ្ធផលជាមួយអាជ្ញាធរមូលដ្ឋាន ដើម្បីធានាថា ការចុះកិច្ចព្រមព្រៀងសន្តិភាពមិនមែនជាការទូត ប៉ុន្តែទទួលបានលទ្ធផលជាក់ស្តែង និងកាត់បន្ថយហានិភ័យ ។

លោកនាយករដ្ឋមន្ត្រី Anutin Charnvirakul និងរដ្ឋាភិបាលថៃ ត្រូវតែចាត់វិធានការយ៉ាងម៉ឺងម៉ាត់ជាមួយរឿងមីន មិនអាចព្រងើយកន្តើយ ឬចាត់ទុកជាគ្រោះថ្នាក់ ។ រដ្ឋាភិបាលត្រូវប្រញាប់ចាត់វិធានការជាបន្ទាន់ដើម្បីការពារអធិបតេយ្យ ផ្តល់សុវត្ថិភាពដល់ពលរដ្ឋនៅព្រំដែន ។ នេះបើតាមការលើកឡើងរបស់ប្រធានគណបក្សនយោបាយថៃ ។

គួរបញ្ជាក់ថា ក្រោយថៃប្រឌិតរឿងកងទ័ពខ្លួនជាន់មីននៅខេត្តស៊ីសាកេត នាយករដ្ឋមន្ត្រីថៃបានប្រកាសផ្អាកអនុវត្តកិច្ចព្រមព្រៀងសន្តិភាពជាមួយកម្ពុជា និងមិនដោះលែងវីរកងទ័ពកម្ពុជាទាំង១៨រូប ។ រាជរដ្ឋាភិបាលកម្ពុជាបារម្ភយ៉ាងខ្លាំងក្រោយពីប្រព័ន្ធផ្សព្វផ្សាយជាច្រើនដកស្រង់សម្តីរបស់ថ្នាក់ដឹកនាំថៃ ដែលបង្ហាញថាថៃផ្អាកការអនុវត្តនូវសេចក្តីថ្លែងការណ៍រួមដែលនាយករដ្ឋមន្ត្រីកម្ពុជា-ថៃបានចុះហត្ថលេខាក្រោមវត្តមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim នៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃទី២៦ ខែតុលា ឆ្នាំ២០២៥ ។

ក្រសួងការពារជាតិកម្ពុជាបានបញ្ជាក់យ៉ាងមុតមាំថា តាំងពីក្លាយជារដ្ឋភាគីនៃអនុសញ្ញាអូតាវ៉ា កម្ពុជាតែងតែប្រកាន់ខ្ជាប់នូវគោលការណ៍ និងកាតព្វកិច្ចរបស់ខ្លួននៅក្រោមច្បាប់អន្តរជាតិ ដោយមិនដែលដាក់មីនថ្មីដែលគំរាមកំហែងដល់សន្តិសុខ និងសុវត្ថិភាពរបស់មនុស្សជាតិឡើយ ។ ក្រសួងការពារជាតិកម្ពុជាបន្តប្តេជ្ញាចិត្តធ្វើការឱ្យបានជិតស្និទ្ធជាមួយភាគីថៃ ក្នុងការលើកកម្ពស់សន្តិភាព និងស្ថិរភាពរវាងប្រទេសទាំងពីរ ជាពិសេស ធានាសន្តិសុខ និងសុវត្ថិភាពរបស់ពលដ្ឋ ស្របតាមសេចក្តីថ្លែងការណ៍រួមស្តីពីសន្តិភាពរវាងកម្ពុជា-ថៃ ៕

ប្រទេសថៃ៖ កងទ័ពអាកាសថៃ បានប្រកាសថាខ្លួននឹងបញ្ចប់ការអនុវត្តកិច្ចព្រមព្រៀងសន្តិភាពទាំងអស់រវាងប្រទេសថៃ និងកម្ពុជា រហូតដល់សកម្មភាពអរិភាពណាមួយរបស់កម្ពុជាត្រូវបានបញ្ឈប់។ ការប្រកាសនេះ គឺជាការសម្រេចចិត្តដោយឯកតោភាគីរបស់ភាគីថៃ។ នេះបើតាមការចុះផ្សាយរបស់សារព័ត៌មាន Khaosod។

នៅម៉ោង ៤រសៀល ថ្ងៃទី១០ ខែវិច្ឆិកា ឆ្នាំ២០២៥ បន្ទាប់ពីកើតមានហេតុការណ៍ទាហានថៃបានដើរជាន់មីនផ្ទុះរងរបួសចំនួនពីរនាក់បន្ថែមទៀត ទំព័រហ្វេសប៊ុកផ្លូវការរបស់កងទ័ពអាកាសថៃបានចេញសេចក្ដីជូនដំណឹងមួយដើម្បីបញ្ជាក់ថា “កងទ័ពអាកាសភូមិន្ទថៃ នឹងបញ្ចប់ការអនុវត្តកិច្ចព្រមព្រៀងគ្រប់បែបយ៉ាងរវាងប្រទេសថៃ និងកម្ពុជា រហូតដល់សកម្មភាពគំរាមកំហែ.ងរបស់កម្ពុជាត្រូវបានបញ្ឈប់។

សេចក្ដីជូនដំណឹងនេះបានបញ្ជាក់ថា “កងទ័ពអាកាសថៃ នឹងអនុវត្តកាតព្វកិច្ចរបស់ខ្លួនដោយកិត្តិយស សេចក្តីថ្លៃថ្នូរ និងដោយចាត់ទុកផលប្រយោជន៍ល្អបំផុតរបស់ប្រទេសជាតិជាអាទិភាព”។

ជាមួយគ្នានេះដែរ បើតាមសេចក្តីប្រកាសព័ត៌មានរបស់កងទ័ពភូមិន្ទថៃ (RTA) ស្ដីពីលទ្ធផលនៃការចុះពិនិត្យទីតាំង ការផ្ទុះនៅតំបន់ Huai Tamaria គ្រាប់មីនដែលផ្ទុះកាលពីម្សិលមិញនេះបានអះអាងថា គឺជាគ្រាប់មីនទើបដាក់ដាំថ្មីៗ ដែលនេះជាការបំពានលើសេចក្តីប្រកាសរួម និងជាអំពើបង្កអរិភាព ដែលនាំឱ្យមានភាពជៀសមិនផុតពីការបញ្ចប់កិច្ចព្រមព្រៀងសន្តិភាពរវាងគ្នាទៅវិញទៅមក។

ឆ្លើយតបនឹងការចោ.ទប្រកាន់ដោយគ្មានមូលដ្ឋានច្បាស់លាស់ និងផ្អែកលើការសម្រេចចិត្តដោយឯកតោភាគីបែបនេះ រាជរដ្ឋាភិបាលកម្ពុជា តាមរយៈសេចក្ដីថ្លែងការណ៍របស់ក្រសួងការបរទេស បានគូសបញ្ជាក់យ៉ាងច្បាស់ថា កម្ពុជាសូមបដិសេធយ៉ាងដាច់អហង្ការចំពោះរាល់ការចោទប្រកាន់របស់ប្រទេសថៃ ថាកម្ពុជាបានដាក់មីនថ្មីនៅតាមព្រំដែនជាមួយប្រទេសថៃ។

រាជរដ្ឋាភិបាលកម្ពុជា ក៏សូមបញ្ជាក់ជាថ្មីដែរថា កម្ពុជានៅតែប្តេជ្ញាអនុវត្តសេចក្តីថ្លែងការណ៍រួម ដែលត្រូវ បានចុះហត្ថលេខាជាមួយនិងការសាទរយ៉ាងខ្លាំងក្លាពីសហគមន៍អន្តរជាតិ។ ក្នុងនាមជាប្រទេសដែលបាន គាំទ្រយ៉ាងមុតមាំ និងជារដ្ឋភាគីនៃអនុសញ្ញាហាមឃាត់មីនប្រឆាំងមនុស្ស កម្ពុជាមិនដែលបានប្រើប្រាស់ ហើយក៏នឹងមិនប្រើប្រាស់មីនថ្មីឡើយ។

ជាមួយគ្នានេះ រាជរដ្ឋាភិបាលកម្ពុជា ក៏បានបង្ហាញការព្រួយបារម្ភយ៉ាងខ្លាំងផងដែរចំពោះ ការសម្រេចចិត្តដោយឯកតោភាគីរបស់ភាគីថៃ ក្នុងការផ្អាកការអនុវត្តសេចក្តីថ្លែងការណ៍រួម ទាំងដែលសេចក្តីថ្លែងការណ៍រួម ក៏ដូចជាកិច្ចព្រមព្រៀងនានាដែលចុះហត្ថលេខានៅប្រទេសម៉ាឡេសុី ត្រូវបានចូលរួមធ្វើជាសាក្សី និងមានការសម្របសម្រួលដោយសហរដ្ឋអាមេរិក និងម៉ាឡេសុី ក៏ដោយ៕

រាជធានីភ្នំពេញ៖ រាជរដ្ឋាភិបាលកម្ពុជាបង្ហាញការព្រួយបារម្ភយ៉ាងខ្លាំងចំពោះសារព័ត៌មានថៃជាច្រើន ដែលបានដកស្រង់សម្តីពីថ្នាក់ដឹកនាំថៃថា ប្រទេសថៃផ្អាកការអនុវត្តសេចក្តីថ្លែងការណ៍រួម រវាងកម្ពុជា និងថៃ ដែលចុះហត្ថលេខានៅប្រទេសម៉ាឡេសុី បន្ទាប់ពីទាហានថៃដើរជាន់មីនផ្ទុះរងរបួសធ្ងន់នៅថ្ងៃទី១០ ខែវិច្ឆិកា នេះ។

រាជរដ្ឋាភិបាលកម្ពុជា តាមរយៈសេចក្ដីថ្លែងការណ៍របស់ក្រសួងការបរទេសបានបញ្ជាក់ថា កម្ពុជាមានការព្រួយបារម្ភយ៉ាងខ្លាំងចំពោះសេចក្តីរាយការណ៍តាមប្រព័ន្ធផ្សព្វផ្សាយ ជាច្រើន ដកស្រង់សំដីរបស់ថ្នាក់ដឹកនាំថៃ ដែលបង្ហាញថាប្រទេសថៃបានផ្អាកការអនុវត្តនូវសេចក្តីថ្លែង ការណ៍រួមរវាងនាយករដ្ឋមន្ត្រីកម្ពុជា និងថៃ ដែលត្រូវបានចុះហត្ថលេខា ដោយមានវត្តមានរបស់ឯកឧត្តម ដូណាល់ ត្រាំ ប្រធានាធិបតីសហរដ្ឋអាមេរិក និង ឯកឧត្តម អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និង ជាប្រធានអាស៊ាន ធ្វើជាសាក្សី នៅទីក្រុងគូឡាឡាំពួ ប្រទេសម៉ាឡេស៊ី នាថ្ងៃទី២៦ ខែតុលា ឆ្នាំ២០២៥។

សេចក្តីរាយការណ៍ព័ត៌មានទាំងនេះក៏បានឱ្យដឹងដែរថា ព្រឹត្តិការណ៍ផ្ទុះមីននៅថ្ងៃទី១០ ខែវិច្ឆិកា ឆ្នាំ២០២៥ ដែលបានធ្វើឱ្យទាហានថៃពីរនាក់រងរបួសនៅព្រំដែនកម្ពុជា-ថៃ ត្រង់តំបន់ភ្នំទ្រព្យ ស្ថិតជិត ប្រាសាទព្រះវិហាររបស់កម្ពុជា ត្រូវបានលើកឡើងថាជាមូលហេតុនៃការផ្អាកអនុវត្តសេចក្តីថ្លែងការណ៍រួម ខាងលើនេះ រួមទាំងការលុបចោលគម្រោងដោះលែងយោធិនខ្មែរ ១៨រូប ពីការឃុំឃាំងនៅប្រទេសថៃ ដែលភាគីថៃបានប្រកាសថានឹងអនុវត្តនៅថ្ងៃទី១២ ខែវិច្ឆិកា ឆ្នាំ២០២៥។

រាជរដ្ឋាភិបាលកម្ពុជាសូមបដិសេធយ៉ាងដាច់អហង្ការចំពោះរាល់ការចោទប្រកាន់របស់ប្រទេសថៃ ថាកម្ពុជាបានដាក់មីនថ្មីនៅតាមព្រំដែនជាមួយប្រទេសថៃ។ វាជាការសំខាន់ដែលត្រូវកត់សម្គាល់ពីការដឹងឮ យ៉ាងសុះសាយនូវការពិតថា ចម្ការមីនភាគច្រើនតាមបណ្តោយព្រំដែនកម្ពុជា-ថៃ ដែលបន្សល់ទុកពីជំនាន់ សង្គ្រាមស៊ីវិលកម្ពុជារយៈជិត៣០ឆ្នាំ ក្នុងទសវត្សរ៍ ១៩៧០ និង១៩៨០ មិនទាន់ត្រូវបានបោសសម្អាតនៅ ឡើយទេ ដោយសារតែភូមិសាស្ត្រលំបាក និងស្ថានភាពមិនទាន់មានការកំណត់ខណ្ឌសីមាព្រំដែន។

រាជរដ្ឋាភិបាលកម្ពុជាសូមបញ្ជាក់ជាថ្មីថា កម្ពុជានៅតែប្តេជ្ញាអនុវត្តសេចក្តីថ្លែងការណ៍រួម ដែលត្រូវ បានចុះហត្ថលេខាជាមួយនិងការសាទរយ៉ាងខ្លាំងក្លាពីសហគមន៍អន្តរជាតិ។ ក្នុងនាមជាប្រទេសដែលបាន គាំទ្រយ៉ាងមុតមាំ និងជារដ្ឋភាគីនៃអនុសញ្ញាហាមឃាត់មីនប្រឆាំងមនុស្ស កម្ពុជាមិនដែលបានប្រើប្រាស់ ហើយក៏នឹងមិនប្រើប្រាស់មីនថ្មីឡើយ៕

ប្រទេសថៃ ៖ ក្រោយពីថៃប្រឌិតរឿងកងទ័ពខ្លួន២នាក់ជាន់មីនបណ្តាលឱ្យដាច់ជើងនិងរងរបួសពេលដើរល្បាតនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត (ទល់មុខប្រាសាទព្រះវិហារ) កាលពីថ្ងៃទី១០ ខែវិច្ឆិកា ឆ្នាំ២០២៥ និងចោទប្រកាន់កម្ពុជាបង្កប់មីនថ្មី នាយករដ្ឋមន្ត្រីថៃ លោក Anutin Charnvirakul ក៏ប្រកាសថា ថៃនឹងផ្អាកអនុវត្តកិច្ចព្រមព្រៀងសន្តិភាពជាមួយកម្ពុជា និងមិនបន្តសុពលភាពប័ណ្ណការងារឱ្យពលករខ្មែរជិត១សែននាក់ ពីព្រោះបារម្ភពីការបង្កអសន្តិសុខ និងឧក្រិដ្ឋ.កម្មឆ្លងដែន ថៃមិនអនុញ្ញាតឱ្យពលករខ្មែរធ្វើការបន្តទេ ។

កាលពីថ្ងៃទី១០ ខែវិច្ឆិកា នាយករដ្ឋមន្ត្រីថៃ លោក Anutin បានបញ្ជាឱ្យពន្យារពេលការចុះហត្ថលេខាលើសេចក្តីព្រាងរបស់ក្រសួងមហាផ្ទៃ ដែលអនុញ្ញាតឱ្យពលករខ្មែរស្នាក់នៅថៃក្នុងករណីពិសេសតាមសេចក្តីសម្រេចរបស់គណៈរដ្ឋមន្ត្រីកាលពីថ្ងៃទី១៩ ខែសីហា ឆ្នាំ២០២៥ ។ សេចក្តីព្រាងនេះធ្វើឡើងដោយរដ្ឋាភិបាលគណបក្សភឿថៃក្នុងអំឡុងពេលលោក Phumtham Wechayachai ធ្វើជានាយករដ្ឋមន្ត្រីស្តីទី ក្រោមហេតុផលចាំបាច់ត្រូវត្រួតពិនិត្យទិន្នន័យឱ្យលម្អិត និងអនុវត្តតាមច្បាប់យ៉ាងតឹងរ៉ឹង ។

បច្ចុប្បន្ន មានពលករខ្មែរធ្វើការនៅថៃជិត១សែននាក់ ដែលមានប័ណ្ណការងារផុតសុពលភាពតាំងពីខែកុម្ភៈ ឆ្នាំ២០២៥ ហើយត្រូវបានរដ្ឋាភិបាលថៃអាណត្តិមុន (រដ្ឋាភិបាលរបស់លោកស្រី ផេថងថាន ស៊ីណាវ៉ាត់) អនុញ្ញាតឱ្យធ្វើការនៅថៃបន្តក្នុងករណីពិសេស ដោយសារថៃបិទព្រំដែនជាឯកតោភាគី ។ ប៉ុន្តែក្រោយពីកងទ័ពថៃ២នាក់ជាន់មីននៅខេត្តស៊ីសាកេត នាយករដ្ឋមន្ត្រីថៃមិនអនុញ្ញាតឱ្យពលករខ្មែរធ្វើការបន្តទេ ដោយសារបារម្ភពីពលករខ្មែរបង្កអសន្តិសុខ, លួចចូលដីថៃខុសច្បាប់ និងប្រព្រឹត្តឧក្រិដ្ឋកម្មឆ្លងដែន ។

លេខានាយករដ្ឋមន្ត្រី អ្នកស្រី ត្រៃសុលី ត្រៃសារៈណាក់គុន និយាយថា លោកនាយករដ្ឋមន្ត្រី Anutin ផ្តោតសំខាន់លើការគ្រប់គ្រងពលករបរទេសធ្វើការនៅថៃស្របច្បាប់ ដើម្បីកុំឱ្យប៉ះពាល់ដល់អសន្តិសុខ និងសេដ្ឋកិច្ច ។ លោក Anutin ក៏បានបញ្ជាឱ្យក្រសួងមហាផ្ទៃ និងក្រសួងការងារសហការពិនិត្យមើលទិន្នន័យពលករបរទេសយ៉ាងលម្អិតថា តើពួកគេធ្វើការស្របច្បាប់ដែរឬទេ?

កាលពីថ្ងៃទី១៩ ខែសីហា ឆ្នាំ២០២៥ គណៈរដ្ឋមន្ត្រីថៃបានសម្រេចឱ្យពលករបរទេសសញ្ជាតិខ្មែរ ឡាវ មីយ៉ាន់ម៉ា និងវៀតណាម ដែលមានប័ណ្ណការងារផុតសុពលភាពអាចស្នាក់នៅ និងធ្វើការនៅថៃបន្តរយៈពេល១ឆ្នាំ ដើម្បីកាត់បន្ថយផលប៉ះពាល់ដោយសារខ្វះខាតកម្លាំងពលកម្ម ប៉ុន្តែសេចក្តីសម្រេចរបស់គណៈរដ្ឋមន្ត្រីត្រូវចុះហត្ថលេខាដោយរដ្ឋមន្ត្រីក្រសួងមហាផ្ទៃមុនពេលចូលជាធរមាន ។

អ្នកស្រី ត្រៃសុលី បន្តថា រដ្ឋាភិបាលថ្មីនឹងអនុវត្តតាមច្បាប់យ៉ាងតឹងរ៉ឹង និងមិនបន្តសុពលភាពប័ណ្ណការងារឱ្យពលករខ្មែរ លុះត្រាតែទទួលបានទិន្នន័យ និងឯកសារផ្សេងៗត្រឹមត្រូវ ដើម្បីផលប្រយោជន៍ប្រទេស និងពលរដ្ឋថៃ ។

គួរបញ្ជាក់ថា នាយករដ្ឋមន្ត្រីថៃប្រកាសមិនបន្តសុពលភាពប័ណ្ណការងារឱ្យពលករខ្មែរជិត១សែននាក់ ក្រោយពីថៃប្រឌិតរឿងកងទ័ពខ្លួន២នាក់ជាន់មីនដាច់ជើងនិងរងរបួសពេលល្បាតនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត កាលពីថ្ងៃទី១០ ខែវិច្ឆិកា និងចោទប្រកាន់កម្ពុជាបង្កប់មីនថ្មី ។ ថៃមិនអនុញ្ញាតឱ្យពលករខ្មែរដែលផុតសុពលភាពប័ណ្ណការងារស្នាក់នៅថៃបន្តទេ ហើយអាចប្រឈមនឹងសមត្ថកិច្ចថៃចាប់ខ្លួនក្រោមហេតុផលធ្វើការខុសច្បាប់ ៕