រដ្ឋធានីកៀវ៖ ដោយសារតែគ្រឿងសឹកចម្បាំងដ៏ទំនើបៗ ផ្គត់ផ្គង់មកពីបណ្ដាប្រទេសបស្ចិមលោក ទើបធ្វើឲ្យកងទ័ពការពារទឹកដីអ៊ុយក្រែន មានលទ្ធភាព វាយបង្ក្រាប រហូតធ្វើឲ្យកម្លាំងទាហានរុស្ស៊ី បាក់ទ័ពជាហូរហែ និង រំដោះទឹកដីរបស់ខ្លួនយ៉ាងច្រើន យកមកគ្រប់គ្រងវិញ ហើយឥឡូវនេះ ក្រុងកៀវ បន្ដទទួលរថពាសដែកប្រយុទ្ធ មកពីប្រទេសលោកខាងលិចបន្ថែមទៀត។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃព្រហស្បតិ៍ ទី៥ ខែមករា ថា លោក អែមម៉ាញ៉ែល ម៉ាក្រុង (Emmanuel Macron) ប្រធានាធិបតីបារាំង បានប្រាប់ដល់សមភាគីអ៊ុយក្រែន លោក វ៉ូឡូឌីមៀរ ហ្សេឡែនស្គី (Volodymyr Zelenskyy) តាមទូរស័ព្ទ កាលពីថ្ងៃពុធ ថា រដ្ឋាភិបាលរបស់គាត់ នឹងបញ្ជូនរថចម្បាំង ប្រភេទ AMX-10 RC ផលិត នៅក្នុងប្រទេសបារាំង ទៅជួយជ្រោមជ្រែង ដល់កិច្ចខិតខំប្រឹងប្រែងការពារទឹកដីរបស់អ៊ុយក្រែន។

មន្រ្ដីបារាំង បានបញ្ជាក់ ក្រោយជំនួបតាមទូរស័ព្ទរបស់មេដឹកនាំទាំងពីរ ថា «នេះជាលើកទី១ ដែលរថចម្បាំង ផលិតដោយបស្ចិមលោក កំពុងតែបញ្ជូន ទៅជួយគាំទ្រ ដល់កងទ័ពការពារទឹកដីរបស់អ៊ុយក្រែន»។

ទោះជាយ៉ាង មន្រ្ដីរដ្ឋាភិបាលបារាំង មិនបានផ្ដល់ព័ត៌មានលម្អិត អំពីចំនួនរថពាសដែក ដែលនឹងត្រូវដឹកបញ្ជូន ទៅកាន់ប្រទេសអ៊ុយក្រែន នោះឡើយ។ ប៉ុន្ដែមន្រ្ដីបារាំង គ្រាន់តែប្រាប់ ថា គ្រឿងសឹកទាំងនោះ ជាប្រភេទយានយន្ដយោធារបស់កងទ័ពបារាំង។

រយៈពេលមួយម៉ោង ក្រោយពេលមេដឹកនាំបារាំង និង អ៊ុយក្រែន បានជួបគ្នារួចមក លោក ចូ បៃដិន (Joe Biden) ប្រធានាធិបតីសហរដ្ឋអាមេរិក បានបញ្ជាក់ ថា ក្រុងវ៉ាស៊ីនតោន កំពុងតែគិតពិចារណា អំពីការបញ្ជូនរថចម្បាំង Brdley ទៅជួយដល់ប្រទេសអ៊ុយក្រែន បន្ថែមទៀត។

Bradley ជារថពាសដែកប្រយុទ្ធមធ្យម អាចបម្រើការងារ ជាយានដឹកកងទ័ព ហើយវាមានទម្ងន់ស្រាល និង អាចបត់បែនបានយ៉ាងរហ័សរហួន ជាងប្រភេទរថចម្បាំងផ្សេងៗទៀត។ រថពាសដែក ប្រភេទនេះ អាចដឹកកងទ័ពបាន ប្រហែលចំនួន១០នាក់ ឬ ត្រូវជំនួសមកវិញ ដោយការផ្ទុកគ្រាប់រំសេវ ឬ ឧបករណ៍ទំនាក់ទំនងបន្ថែមផ្សេងៗទៀត។

រហូតមកដល់ពេលនេះ សហរដ្ឋអាមេរិក បានបំពាក់រថពាសដែក Bradleys រាប់ពាន់គ្រឿង ដល់កងទ័ពរបស់ខ្លួន ហើយពួកគេអាចនឹងផ្គត់ផ្គង់គ្រាប់រំសេវបន្ថែមទៀត ជួយដល់កងទ័ពការពារទឹកដីរបស់អ៊ុយក្រែន ដែលកំពុងវាយប្រយុទ្ធ នៅលើសមរភូមិប្រយុទ្ធ និង បង្កើនសមត្ថភាព ទប់ទល់នឹងសង្គ្រាមរបស់រុស្ស៊ី។

មន្ទីរបញ្ចកោណ បានបញ្ជូនរថពាសដែកជាង២ពាន់គ្រឿងរួចមកហើយ នាំទៅផ្គត់ផ្គង់ដល់ប្រទេសអ៊ុយក្រែន រួមទាំង យានទប់ទល់នឹងគ្រាប់មីន ចំនួន៤៧៧គ្រឿង និង រថយន្ដយោធា Humvee ជាង ១២០០គ្រឿង។

ការផ្គត់ផ្គង់គ្រឿងសឹកចុងក្រោយរបស់បណ្ដាប្រទេសមហាអំណាចបស្ចិមលោក ជួយដល់ក្រុងកៀវ នៅតែមានការខ្វះខាត ដោយមិនបានផ្ដល់រថក្រោះដ៏ទំនើប Abrams ផលិតដោយសហរដ្ឋអាមេរិក និង រថក្រោះ Leopard ផលិតដោយអាល្លឺម៉ង់។ ក្រុងកៀវ តែងតែស្នើសុំម្តងហើយម្តងទៀត ជំរុញឲ្យសម្ពន្ធមិត្តលោកខាងលិច ជួយផ្គត់ផ្គង់យ៉ាងពិសេសនូវរថក្រោះប្រភេទទាំងនេះ ខណៈកងទ័ពការពារទឹកដីរបស់អ៊ុយក្រែន កំពុងតែប្រយុទ្ធជាមួយនឹងទាហានរុស្ស៊ី នៅក្នុងសង្គ្រាមរដូវរងា ហើយដែនដីរបស់ខ្លួន ក្រាលដោយទឹកកក អាចងាយស្រួល ប្រើប្រាស់រថក្រោះធុនធ្ងន់ នៅតាមជនបទ នៃប្រទេសអ៊ុយក្រែន។

ប្រធានាធិបតីអ៊ុយក្រែន បានសង្កត់ធ្ងន់ ថា «យើងត្រូវតែបញ្ចប់នូវការឈ្លានពានរបស់រុស្ស៊ី នៅឆ្នាំ។ រថក្រោះ និង រថពាសដែកដ៏ទំនើបៗរបស់បណ្ដាប្រទេសបស្ចិមលោក ក្លាយជាទ្រព្យសម្បត្ដិដ៏សំខាន់ ដែលអ៊ុយក្រែន ចង់បានបំផុត សម្រាប់វាយបណ្ដេញទាហានរបស់ក្រុងមូស្គូ ឲ្យចេញអស់ពីប្រទេសរបស់គាត់»។

លោក អេនឌ្រី ឆឺនៀក (Andriy Cherniak) មន្រ្ដីទីភ្នាក់ងារស៊ើបការណ៍សម្ងាត់របស់ក្រសួងការពារជាតិអ៊ុយក្រែន បានអះអាង ថា «នៅក្នុងរយៈពេល៤-៥ខែខាងមុខ រុស្ស៊ី អាចនឹងបាត់បង់ទាហានបន្ថែម រហូតដល់ ៧០ ០០០នាក់។ ចំណែកមេដឹកនាំ នៅក្នុងតំបន់កាន់កាប់ដោយរុស្ស៊ី ក៏នឹងត្រូវបាត់បង់ដូចគ្នាផងដែរ។ ចំណែកមេដឹកនាំរុស្ស៊ី ក៏បានដឹងខ្លួន កាន់តែច្បាស់ហើយថា ក្រុងមូស្គូ នឹងចាញ់សង្គ្រាមនេះ ប៉ុន្ដែពួកគេនៅតែមិនមានគម្រោងបញ្ចប់សង្គ្រាមនេះឡើយ»។

ដោយឡែក បណ្ដាប្រទេសបស្ចិមលោក បានមើលឃើញសញ្ញាថ្មីមួយ ថា ក្រុងមូស្គូ នឹងមិនដកខ្លួនថយចេញពីអ៊ុយក្រែន នោះទេ ព្រោះប្រធានាធិបតីរុស្ស៊ី លោក Vladimir Putin កាលពីថ្ងៃពុធ បានបញ្ជូននាវាចម្បាំង បំពាក់ដោយមីស៊ីល មានល្បឿនលឿនជាងសំឡេងជំនាន់ថ្មី អាចហោះលឿនជាងសំឡេងជាង៥ដង បញ្ជូនទៅធ្វើប្រតិបត្ដិការ នៅក្នុងមហាសមុទ្រអាត្លង់ទិក មហាសមុទ្រឥណ្ឌា និង សមុទ្រមីឌីទែររ៉ាណេ៕

វៀតណាម៖ មន្ត្រីវៀតណាមបញ្ជាក់យ៉ាងដូច្នេះថាក្មេងប្រុសអាយុ១០ឆ្នាំម្នាក់ដែលបានធ្លាក់ចូលក្នុងរណ្តៅបេតុងជម្រៅ ៣៥ ម៉ែត្របបន្ទាប់ពីទៅរើសអេតចាយជាមួយមិត្តភ័ក្តិ បានទទួលមរណភាពហើយក្រោយពីខណៈប្រតិបត្តិការពីក្រុមជួយសង្គ្រោះនៅមិនទាន់អាចយកសាកសពមកខាងលើបាន។

នាថ្ងៃទី៥ ខែមករា ឆ្នាំ២០២២ទីភ្នាក់ងារសារព័ត៌មានបរទេសរាយការណ៍ពីទីក្រុងហាណូយ នៃប្រទេសវៀតណាម អំពីករណីក្មេងប្រុស Tai Li Hao Nam អាយុ១០ឆ្នាំ បានធ្លាក់ចូលទៅក្នុងរណ្តៅបេតុង ជម្រៅ៣៥ម៉ែត្រ និងទទឹងតែ២៥សង់ទីម៉ែត្រ ហើយបានជាប់នៅក្នុងនោះតាំងពីថ្ងៃចូលឆ្នាំសកល ពេលចេញ ទៅដើររកអេតចាយជាមួយមិត្តភ័ក្តិ ៣ នាក់ទៀតនៅតំបន់គម្រោងសាងសង់ស្ពាននៅស្រុក Thang Binh នៃខេត្តដុងថាប វៀតណាមខាងត្បូង។

ជាមួយគ្នានោះ ដែលមន្រ្តីបានបញ្ជាក់ថា ក្រុមអ្នកេជួយសង្គ្រោះបានព្យាយាមអស់ពីសមត្ថភាពដើម្បីជួយ Tai Li Hao Nam ប៉ុន្តែពួកគេមិនអាចរកឃើញជនរងគ្រោះឡើយ ខណ៖”សញ្ញាឆ្លើយតប” ពីក្មេងប្រុសតាំងពីថ្ងៃច័ន្ទកន្លងមកបានបាត់បងលលែងមានសញ្ញានៃជីវិតអ្វីទាំងអស់។

យ៉ាងណាមិញថ្មីៗនេះអាជ្ញាធរខេត្ត Dong Thap បានចេញផ្សាយរបាយការណ៍មួយទៅកាន់ប្រព័ន្ធផ្សព្វផ្សាយបញ្ជាក់ថា ក្មេងប្រុសរងគ្រោះនោះបានស្លាប់ហើយ  ហើយជំហានបន្ទាប់ គឺជាប្រតិបត្តិការមួយដើម្បីយកសពក្មេងប្រុសមកខាងលើវិញ ទីបំផុតគេបានរកឃើញ និងបានបង្ហាញថាជនរងគ្រោះមានស្នាមរបួសយ៉ាងធ្ងន់ធ្ងរលើដងខ្លួន និងកង្វះអុកស៊ីសែន។

ជាមួយគ្នានោះផងដែរប្រព័ន្ធផ្សព្វផ្សាយក្នុងស្រុករបស់វៀតណាមបានរាយការណ៍ដូចគ្នា ទាក់ទងនឹង ការយល់ឃើញរបស់មហាជន ដោយមានការភ្ញាក់ផ្អើល និងមានការរិះគន់យ៉ាងខ្លាំងដែល ទាក់ទងនឹងការសាងសង់ស្ពាននេះបានចាប់ផ្តើមប្រហែលប្រាំមួយខែមុនមុនកើតហេតុ​ ប៉ុន្តែតំបន់នោះមិនត្រូវបានដាក់បំរាមហាមឃាត ឬបិទនោះទេ៕ ប្រភព៖ Dailynews

តៃវ៉ាន់ ៖ តៃវ៉ាន់នឹងចែកប្រាក់ចំនួន៦.០០០ដុល្លារតៃវ៉ាន់ដល់ពលរដ្ឋរបស់ខ្លួននៅឆ្នាំ២០២៣ ដោយបញ្ជាក់ថា ប្រាក់នេះជាការតបស្នងពីការលូតលាស់សេដ្ឋកិច្ចស្មើ៦,៤៥%ក្នុងឆ្នាំ២០២១ វាជាការលូតលាស់យ៉ាងរហ័សតាំងពីឆ្នាំ២០១០ ។

លោកនាយករដ្ឋមន្ត្រីតៃវ៉ាន់ Su Zhengchang បានប្រកាសកាលពីថ្ងៃទី៤ ខែមករាថា រដ្ឋាភិបាលតៃវ៉ាន់នឹងផ្តល់ប្រាក់ដល់ពលរដ្ឋក្នុងម្នាក់៦.០០០ដុល្លារតៃវ៉ាន់ ដោយប្រើប្រាស់ទឹកប្រាក់សរុប១៤០.០០០លានដុល្លារតៃវ៉ាន់ ។ វាជាប្រាក់ចំណូលមួយផ្នែករបស់រដ្ឋាភិបាល ដែលបានពីការប្រមូលពន្ធលើសគោលដៅ ។ រដ្ឋាភិបាលនឹងបែងចែកផលសម្រេចខាងសេដ្ឋកិច្ចដល់ពលរដ្ឋតៃវ៉ាន់គ្រប់រូប ប៉ុន្តែការបែងចែកនេះត្រូវឆ្លងកាត់ការយល់ព្រមពីរដ្ឋសភាតៃវ៉ាន់ផងដែរ ។

លោកនាយករដ្ឋមន្ត្រីបន្តថា លោកជូនពរដល់ពលរដ្ឋតៃវ៉ាន់ទាំងអស់ជួបតែសេចក្តីសុខក្នុងឱកាសបុណ្យចូលឆ្នាំចិនខាងមុខនេះ ដែលនឹងចាប់ផ្តើមតាំងពីថ្ងៃទី២០ ខែមករា តែលោកមិនបានបង្ហើបថា រដ្ឋាភិបាលនឹងចែកប្រាក់នោះទៅពលរដ្ឋតាមវិធីណាទេ ។

តៃវ៉ាន់ គឺជាអ្នកនាំចេញទំនិញបច្ចេកវិទ្យាធំមួយ មានបន្ទះអេឡិចត្រូនិកជាផ្នែកសំខាន់ មានអត្រាលូតលាស់ខាងសេដ្ឋកិច្ចខ្ពស់ដល់៦,៤៥%ក្នុងឆ្នាំ២០២១ គឺបានលូតលាស់យ៉ាងឆាប់រហ័សតាំងពីឆ្នាំ២០១០មក ដែលមានតួលេខខ្ពស់ដល់១០,២៥% ។ រដ្ឋាភិបាលតៃវ៉ាន់បានដាក់ផែនការផ្តល់ទឹកប្រាក់បន្ថែមចំនួន៣៨០.០០០លានដុល្លារតៃវ៉ាន់ដើម្បីជំរុញសេដ្ឋកិច្ច និងការពារតៃវ៉ាន់ពីការជាប់គាំងសេដ្ឋកិច្ច ដូចជា ការប្រគល់ប្រាក់ឧបត្ថម្ភថ្លៃអគ្គិសនី ការជួលកម្លាំងពលកម្ម និងថ្លៃធានារ៉ាប់រងសុខភាព ៕

ប្រភព ៖ TNN World

ប្រទេសចិន៖ ក្រុមហ៊ុនស្រាវជ្រាវទិន្នន័យរបស់ចក្រភពអង់គ្លេសបានធ្វើការបង្ហាញថា ចំនួនជនរងគ្រោះដោយសារ ជំងឺកូវីដ-១៩នៅក្នុងប្រទេសចិន អាចមានដល់ទៅ ៩,០០០ សាកសពក្នុងមួយថ្ងៃ ខណៈដែលអង្គការសុខភាពពិភពលោក (WHO) ព្រមានចិនថាបានវាយតម្លៃស្ថានភាពកូវីដ-១៩ ទាបជាងការពិត ជាពិសេសបានលាក់បាំងទិន្ន័យចំនួនអ្នកស្លាប់ខុសពីការពិតផងដែរ។

នាថ្ងៃទី៥ ខែមករា ឆ្នាំ ២០២៣ ទីភ្នាក់ងារសារព័ត៌មានបរទេសបានរាយការណ៍ថា លោកវេជ្ជបណ្ឌិត Michael Ryan នាយកផ្នែកស្ថានភាពអាសន្ននៃអង្គការសុខភាពពិភពលោក បានលើកឡើងពីស្ថានភាព  ជំងឺកូវីដ-១៩ នៅប្រទេសចិន ខណៈប្រទេសនេះកំពុងតែត្រៀមបើកប្រទេសនៅថ្ងៃទី ៨ ខែមករាខាងមុខ។

ដោយអង្គការបានលើកឡើងភ្ជាប់ជាមួយនឹងបញ្ហា ដែលត្រូវបានគេជឿថា ការផ្ដល់ទិន្នន័យរបស់ប្រទេសចិន អំពីចំនួនមនុស្សដែលរងផលប៉ះពាល់ពីការឆ្លងកូវីដ-១៩ គឺទាបជាងការពិត មិនថាចំនួនអ្នកជំងឺដែលចូលមន្ទីរពេទ្យ ចំនួនអ្នកជំងឺធ្ងន់ធ្ងរដែលតម្រូវឱ្យចូលបន្ទប់ ICU  និងជាពិសេសចំនួនអ្នកស្លាប់ដោយសារ កូវីដ-១៩នោះឡើយ។

ទោះជាយ៉ាង បើតាមក្រុមហ៊ុនទិន្នន័យសុខភាព Airfinity ដែលមានមូលដ្ឋាននៅចក្រភពអង់គ្លេសបាននិយាយកាលពីថ្ងៃព្រហស្បតិ៍កន្លងទៅថា បើតាមការស្រាវជ្រាវ និងការស្រង់ទិន្នន័យដោយសម្ងាត់ពីមន្ទីរពេទ្យចិន មនុស្សប្រហែល ៩,០០០ នាក់នៅក្នុងប្រទេសបានស្លាប់ជារៀងរាល់ថ្ងៃដោយសារជំងឺកូវីដ-១៩។ ហើយបើគិតចាប់ពីថ្ងៃទី១ ខែធ្នូ ឆ្នាំ២០២២ទំនងជាអ្នកស្លាប់សរុបឈានដល់ ១០០,០០០នាក់  ក្នុងចំណោមអ្នកឆ្លងសរុបចំនួន ១៨.៦ លាននាក់។

ការឆ្លងជំងឺកូវីដ-១៩ដ៏ខ្លាំងក្លានេះ បានចាប់ផ្តើមរីករាលដាលពាសពេញប្រទេសចិនក្នុងខែវិច្ឆិកា ២០២២ ក្រោយពីទីក្រុងប៉េកាំងបានរុះរើគោលនយោបាយគ្មានទេ-កូវីដ របស់ខ្លួន រួមទាំងការធ្វើតេស្ត PCR ជាទៀងទាត់លើចំនួនប្រជាជនរបស់ខ្លួន និងការបោះពុម្ពផ្សាយទិន្នន័យស្តីពីករណីគ្មានរោគសញ្ញា។

បន្ថែមពីនោះក្រុមហ៊ុន Airfinity រំពឹងថាការឆ្លងជំងឺកូវីដក្នុងប្រទេសចិននឹងឈានដល់កម្រិតកំពូលដំបូងនៅថ្ងៃទី ១៣ ខែមករា ឆ្នាំនេះ ជាមួយនឹងករណីឆ្លងចំនួន ៣.៧ លាននាក់ក្នុងមួយថ្ងៃ។ ហើយគេរំពឹងទៀតថាការស្លាប់នឹងកើនឡើងដល់កំពូលនៅថ្ងៃទី ២៣ ខែមករា ២០២៣ ដែលមានរហូតដល់ ២៥,០០០នាក់ក្នុងមួយថ្ងៃ៕ ប្រភព៖ Thairath

ប៉េកាំង៖ ក្រសួងការបរទេសចិន នៅថ្ងៃព្រហស្បតិ៍នេះបានប្រកាសថា ចិន និងហ្វីលីពីនបានយល់ព្រមបង្កើតបណ្តាញទំនាក់ទំនងដោយផ្ទាល់ លើបញ្ហាសមុទ្រចិនខាងត្បូង និងការដោះស្រាយជម្លោះដោយសន្តិវិធី។ នេះបើយោងតាមការចុះផ្សាយដោយទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី៥ ខែមករា ឆ្នាំ២០២៣។

តាមរយៈក្នុងសេចក្តីថ្លែងការណ៍រួម ប្រទេសទាំងពីរបានអះអាងសារជាថ្មីអំពីសារៈសំខាន់នៃការរក្សា និងលើកកម្ពស់សន្តិភាព ស្ថិរភាពក្នុងតំបន់ ក៏ដូចជាសេរីភាពនៃការធ្វើនាវាចរ និងការហោះហើរពីលើតំបន់សមុទ្រចិនខាងត្បូង។ ប្រទេសទាំងពីរក៏បានព្រមព្រៀងគ្នាផងដែរក្នុងការអភិវឌ្ឍន៍ពាណិជ្ជកម្មទ្វេភាគីបន្ថែមទៀត សំដៅស្តារឡើងវិញ និងបង្កើនទំហំពាណិជ្ជកម្មឲ្យបានច្រើនជាងមុនវិបត្តិជំងឺកូវីដ១៩។

គួរបញ្ជាក់ថា ប្រធានាធិបតីហ្វលីពីន កំពុងបំពេញទស្សនកិច្ចរយៈពេល ៣ថ្ងៃ នៅក្នុងទីក្រុងប៉េកាំងនៃប្រទេសចិន។ ក្នុងជំនួបជាមួយលោក ស៉ី ជិនពីង នៅថ្ងៃពុធសប្តាហ៍នេះ ហ្វីលីពីន និងចិន បានព្រមព្រៀងចាប់ផ្តើមការរុករកប្រេង និងឧស្ម័នឡើងវិញ និងចុះហត្ថលេខាលើកិច្ចព្រមព្រៀងទ្វេភាគីចំនួន១៤ ក្នុងនោះរួមមានកិច្ចព្រមព្រៀងលើកសិកម្ម ហេដ្ឋារចនាសម្ព័ន្ធ កិច្ចសហប្រតិបត្តិការអភិវឌ្ឍ សន្តិសុខសមុទ្រ និងទេសចរណ៍ជាដើម ៕

រដ្ឋធានីមូស្គូ៖ រហូតមកដល់មកពេលនេះ ថ្វីបើក្រុងមូស្គូ កំពុងតែជាប់ផុង ត្រដរដកខ្លួន ចេញពីសង្គ្រាម អស់រយៈពេលជាង៣១០ថ្ងៃមិនរួចយ៉ាងណាក្ដី ក៏មេដឹកនាំវិមាន នៅតែប្រកាសអួតអាង ទៅកាន់ពិភពលោក អំពីអានុភាពកម្លាំងទ័ពរបស់ខ្លួនដ៏ខ្លាំងក្លា ជាមួយនឹងការដាក់ពង្រាយនូវនាវាចម្បាំង បំពាក់មីស៊ីលមានល្បឿនលឿនជាងសំឡេង រហូតដល់ជាង៥ដង សម្រាប់ប្រយុទ្ធប្រឆាំងនឹងសត្រូវ។

សារព័ត៌មាន Al Jazeera បានចេញផ្សាយ កាលពីថ្ងៃទី៤ ខែមករា ថា លោក វ៉្លាឌីមៀ ពូទីន (Vladimir Putin) ប្រធានាធិបតីរុស្ស៊ី បានដាក់ពង្រាយនាវាចម្បាំងមួយគ្រឿង បំពាក់ដោយមីស៊ីលគ្រូស សម្រាប់ធ្វើនាវាចរណ៍ ទៅកាន់មហាសមុទ្រអាត្លង់ទិក និង មហាសមុទ្រឥណ្ឌា នៅក្នុងការបង្ហាញកម្លាំងយោធារបស់ខ្លួន ខណៈក្រុងមូស្គូកំពុងធ្វើសង្គ្រាម នៅលើទឹកដីរបស់អ៊ុយក្រែន។

លោក ពូទីន បានចូលរួមនៅក្នុងពិធីនោះ កាលពីថ្ងៃពុធ តាមរយៈប្រព័ន្ធវីដេអូ ដើម្បីសម្ពោធនាវាចម្បាំង Admiral Gorshkov ។ ស្របគ្នានោះដែរ លោក ស៊ើរហ្គេ ស៊ុយហ្គុ (Sergei Shoigu) រដ្ឋមន្ដ្រីក្រសួងការពារជាតិរុស្ស៊ី និង លោក អ៊ីហ្គ័រ ក្រូខ្មាល់ (Igor Krokhmal) មេបញ្ជាការនាវាចម្បាំង Admiral Gorshkov ក៏បានចូលរួមផងដែរ។

លោក ពូទីន បានបញ្ជាក់ ថា «នាវានេះ នឹងបំពាក់ទៅដោយប្រព័ន្ធមីស៊ីល មានល្បឿនលឿនជាងសំឡេង ប្រភេទ Zircon ។ ខ្ញុំនឹងសូមបួងសួងឲ្យនាវិកទាំងអស់ ទទួលបានជោគជ័យ នៅក្នុងកាតព្វកិច្ចរបស់ពួកគេ សម្រាប់បុព្វហេតុជាតិមាតុប្រទេស»។

លោករដ្ឋមន្រ្ដីក្រសួងការពារជាតិរុស្ស៊ី បានបញ្ជាក់ ថា នាវាចម្បាំង Admiral Gorshkov នឹងធ្វើនាវាចរណ៍ ទៅកាន់មហាសមុទ្រអាត្លង់ទិក មហាសមុទ្រឥណ្ឌា និង សមុទ្រមីឌីទែររ៉ាណេ ( Mediterranea) ។ នាវាចម្បាំងនេះ មានសមត្ថភាពវាយប្រហារដ៏ជាក់លាក់ និង ខ្លាំងក្លាប្រឆាំងនឹងសត្រូវ នៅលើសមុទ្រ និង នៅលើដីគោក។ គេអាចនិយាយបាន ថា កាំជ្រួចមានល្បឿនលឿនជាងសំឡេង នៅលើនាវា អាចយកឈ្នះទៅលើប្រព័ន្ធការពារមីស៊ីលណាមួយរបស់សត្រូវ ហើយអាចបាញ់ នៅក្នុងរយៈចម្ងាយជាង ១០០០គីឡូម៉ែត្រ។ អាវុធបំពាក់នៅលើនាវានេះ អាចហោះបានលឿនជាងសំឡេង រហូតដល់ទៅជាង៥ដង។

ប្រទេសរុស្ស៊ី បានបាញ់សាកល្បងមីស៊ីល Zircon ចេញពីនាវាចម្បាំង និង នាវាមុជទឹក កាលពីឆ្នាំមុន ខណៈមានការរត់ប្រណាំងកាន់តែខ្លាំងឡើង សម្រាប់ការបង្កើតគ្រឿងសព្វាវុធ មានល្បឿនលឿនជាងសំឡេង កាន់តែពុះកញ្ជ្រោលឡើង ជាមួយសហរដ្ឋអាមេរិក និង ចិន។

លោក Shoigu បានបន្ថែម ថា «ការផ្តោតយ៉ាងសំខាន់ សម្រាប់បេសកកម្មនេះ នឹងត្រូវប្រឆាំងជាមួយនឹងការគំរាមកំហែង មកលើប្រទេសរុស្ស៊ី ហើយការគាំទ្រដល់សន្តិភាព និង ស្ថិរភាព នៅក្នុងតំបន់ រួមជាមួយប្រទេសជាសម្ពន្ធមិត្តរបស់ក្រុងមូស្គូ។ សមយុទ្ធនេះ នឹងបណ្តុះបណ្តាលដល់នាវិក នៅក្នុងការដាក់ពង្រាយអាវុធល្បឿនលឿនជាងសំឡេង និង កាំជ្រួចមីស៊ីល រយៈចម្ងាយឆ្ងាយ»។

ថ្វីបើរុស្ស៊ី បានអួតអាង អំពីមីស៊ីល Zircon ជាកាំជ្រួចមានល្បឿនលឿនជាងសំឡេងយ៉ាងណាក្ដី ប៉ុន្ដែសម្រាប់ក្រុមអ្នកវិភាគយោធាបស្ចិមលោក វិញ បានលើកឡើង ថា លក្ខណៈពិសេសដ៏ចម្បង នៃអាវុធល្បឿនលឿនជាងសំឡេងប្រភេទនេះ មិនលឿនដូចឈ្មោះទេ។ ជួនកាល វាអាចដូចជាក្បាលគ្រាប់មីស៊ីលបាល្លិស្ទីកបែបបុរាណប៉ុណ្ណោះ ប៉ុន្តែវាគ្រាន់តែអាចបត់បែនបាន។

សព្វាវុធ ប្រភេទនេះ ត្រូវបានគេមើលឃើញ ថា វាជាមធ្យោបាយមួយ សម្រាប់ទទួលបានភាពខ្លាំងក្លា លើគូសត្រូវណាមួយ ព្រោះថា មីស៊ីល Zircon អាចគេចផុតពីខែលការពារមីស៊ីល និង ប្រព័ន្ធព្រមាន មុនពេលកំណត់៕

នាពេលថ្មីៗនេះផ្ទុះការសរសើរពេញទាំងក្នុងបណ្ដាញសង្គម​ ក្រោយពីមាននិស្សិតថៃជាច្រើននាក់បានលើកយកបទចម្រៀងប្រពៃណីរបស់ខ្មែរមួយបទមានចំណងជើង “នារីជាជួរ”ជាសំនៀងខ្មែរ លើកយកមកច្រៀងក្នុងកម្មវិធីប្រគុំតន្ត្រីដ៏ធំរបស់សាលាដែលពួកគេបានរៀន។

ល្បីពេញក្នុងបណ្ដាញសង្គម ក្រោយពីមានការបង្ហោះពីម្ចាស់អាខោនហ្វេសប៊ុកដែលមានឈ្មោះថា Sok Visal ដែលបានធ្វើការបង្ហោះជាមួយនឹងនិស្សិតជាជនជាតិថៃ តែបែរជាជ្រើសរើសបទចម្រៀងរបស់ខ្មែរ “នារីជាជួរ” យកទៅច្រៀងយ៉ាងពិរោះដើម្បីបង្ហាញពីសមត្ថភាពក្នុងការក្នុងកម្មវិធី ការប្រគំតន្រ្តីថៃកម្រិតឧត្តមសិក្សា លើកទី ៤៥ ហើយពួកគេជានិស្សិតថៃនៃខេត្តបុរីរម្យ រៀនផ្នែកបច្ចេកវិទ្យា និងផ្នែកកុំព្យូទ័រ។

ពិតណាស់ក្រោយពីមានការបង្ហោះពីក្រុមនិស្សិតក្មេងៗមានសម្ថតភាព និងទេពកោសល្យក្នុងការច្រៀងយ៉ាងពិរោះ និងជាពិសេលលើកយកបទ នារីជាជួរ ជាសំនៀងខ្មែរមកច្រៀងយ៉ាងអស្ចារ្យនេះរួចមក ក៏ផ្ទុះការសរសើរជាខ្លាំងពីសំណាក់ប្រជាជនកម្ពុជា និងថៃពីគំនិតស្រឡាញ់ជាមួយនិងវប្បធ៌មរបស់ប្រទេសផ្សេងៗ និងការខិតខំហាត់រៀនច្រៀងបានយ៉ាងច្បាស់ បើទោះបីជាមិនមែនជាភាសាខ្លួនក៏ដោយ៕

សហរដ្ឋអាមេរិក ៖ គណៈកម្មការម្ហូបអាហារ និងថ្នាំពេទ្យរបស់អាមេរិក FDA បានអនុញ្ញាតឱ្យឱសថស្ថានទូទៅនៅអាមេរិកចែកចាយថ្នាំឈប់មានផ្ទៃពោះ ឬថ្នាំរំលូតកូនជាលើកដំបូងក្នុងប្រវត្តិសាស្ត្រ ដល់អ្នកដែលមានវេជ្ជបញ្ជាត្រឹមត្រូវពីគ្រូពេទ្យ ។

តាមទិន្នន័យឱ្យដឹងថា ឱសថស្ថានទូទៅអាចស្នើសុំលិខិតអនុញ្ញាតការចែកចាយថ្នាំរំលូតកូនជាផ្លូវការ ជាប្រភេទថ្នាំគ្រាប់នៅអាមេរិក ។ បើបានទទួលការអនុញ្ញាតហើយ ឱសថស្ថានទាំងនោះអាចចែកចាយថ្នាំដល់អតិថិជនរបស់ខ្លួនដែលមានវេជ្ជបញ្ជាត្រឹមត្រូវពីគ្រូពេទ្យ ។

នេះជាលើកទីមួយហើយបន្ទាប់ពី FDA បញ្ជាក់កាលពីខែធ្នូ ឆ្នាំ២០២១ថា នឹងបន្ធូរបន្ថយរឿងហានិភ័យ និងយុទ្ធសាស្ត្រកាត់បន្ថយផលប៉ះពាល់នៃថ្នាំគ្រាប់ដែលបានប្រើប្រាស់តាំងពីឆ្នាំ២០០០មក ប៉ុន្តែរដ្ឋាភិបាលអាមេរិកបានប្រកាសឱ្យផ្អាកប្រើថ្នាំនេះបណ្តោះអាសន្នសិន ដោយសារស្ថានការណ៍រាតត្បាតរបស់ជំងឺកូវីត-១៩ ។

ទោះបីជា FDA បើកភ្លើងខៀវដល់ឱសថស្ថានអាចស្នើសុំចែកចាយថ្នាំរំលូតកូននេះក្តី តែបណ្តាឱសថស្ថានធំៗនៅអាមេរិកនៅតែពិចារណាថា តើពួកគេគួរតែស្នើសុំលិខិតអនុញ្ញាតចែកចាយថ្នាំប្រភេទនេះឬអត់ ខណៈរដ្ឋជាច្រើនរបស់អាមេរិកកំពុងប្រឆាំងនឹងនីតិវិធីរំលូតកូន ៕

ប្រភព TNN World