បរទេស៖ ម្ចាស់ភោជនីយដ្ឋាន និងជាមេចុងភៅនៅក្នុងហាងមួយកន្លែង ក្នុងរដ្ឋ Kerala របស់ប្រទេសឥណ្ឌាត្រូវបានចាប់ខ្លួនក្នុងការកាត់ទោស បន្ទាប់ពីអតិថិជនបានពុលអាហាររហូតដល់ស្លាប់ បន្ទាប់ពីកុម្ម៉ង់ម្ហូបពីហាងនេះ។

កាលពីពេលថ្មីៗនេះ មានសេចក្ដីរាយការណ៍ពីសារព័ត៌មាន BBC បានឱ្យដឹងថា ​ប៉ូលីសនៅខេរ៉ាឡា ប្រទេសឥណ្ឌាខាងត្បូង បានធ្វើការចាប់ខ្លួនម្ចាស់ភោជនីយដ្ឋាន រួមទាំងមេចុងភៅរបស់ភោជនីយដ្ឋានមួយកន្លែង ដោយចោទប្រកាន់ពីបទមនុស្សឃាតដោយអចេតនា ក្រោយពីមនុស្ស ២១ នាក់បានកុម្ម៉ង់អាហារពីភោជនីយដ្ឋាននេះហើយធ្លាក់ខ្លួនឈឺដោយសារពុលអាហារ។

ហើយម្នាក់ក្នុងចំណោមពួកគេបានស្លាប់ ដោយអ្នកស្លាប់គឺជាគិលានុបដ្ឋាយិកាធ្វើការនៅ Kottayam ដែលបញ្ជាទិញបាយ និងសាច់មាន់ BBQ ពីភោជនីយដ្ឋាននេះតាមអ៊ីនធឺណិត ប៉ុន្តែមិនយូរប៉ុន្មានបន្ទាប់ពីនាងទទួលទាន ក៏ចាប់ផ្ដើមធ្លាក់ខ្លួនឈឺរហូតដល់ត្រូវចូលមន្ទីរពេទ្យនៅថ្ងៃទី ៣០ ធ្នូ ឆ្នាំ២០២២កន្លងទៅ។

ជាមួយគ្នានោះប្រព័ន្ធផ្សព្វផ្សាយក្នុងស្រុកបាននិយាយថាមុនពេលនាងស្លាប់នៅ ថ្ងៃ ទី ២ ខែ មករា ការធ្វើកោសល្យវិច័យបឋមនៃការស្លាប់បានបង្ហាញថានាងស្លាប់ដោយសារឆ្លងមេរោគក្នុងសរីរាង្គខាងក្នុង។

បន្ថែមពីនោះប៉ូលីសបាននិយាយពីការស៊ើបអង្កេតត្រូវបានគេបញ្ជាក់ថាគិលានុបដ្ឋាយិកាពិតជាបានស្លាប់ដោយសារពុលអាហារ។ ហើយបានរកឃើញថាពីការចុះត្រួតពិនិត្យគុណភាពម្ហូបអាហារក្នុង ភោជនីយដ្ឋាននោះគឺស្ថិតក្នុងកម្រិតទាប។

ទោះជាយ៉ាងណាឧបទ្ទវហេតុនេះគឺជាករណីមួយក្នុងចំណោមករណីជាច្រើនទាក់ទងនឹងការពុលអាហារនៅក្នុងរដ្ឋ Kerala ។ ដោយករណីពុលអាហារជាច្រើនករណីក៏ត្រូវបានគេរាយការណ៍នៅផ្នែកផ្សេងទៀតនៃរដ្ឋក្នុងសប្តាហ៍កន្លងទៅ ដូចជាមានសេចក្តីរាយការណ៍កាលពីកន្លងទៅថាសិស្ស និង ឪពុកម្តាយរបស់ពួកគេបានធ្លាក់ខ្លួនឈឺក្រោយ ហូបបាយសាលា។ ហើយមនុស្សជិត ១០០ នាក់ក៏ត្រូវបានគេរាយការណ៍ថាបានធ្លាក់ខ្លួនឈឺបន្ទាប់ពីបានបរិភោគអាហារដែលបានផ្តល់ជូននៅឯពិធីបុណ្យជ្រមុជទឹក។

យ៉ាងណាមិញនេះបានបង្កើនការព្រួយបារម្ភអំពីស្តង់ដារសុវត្ថិភាពអាហារពី ភោជនីយដ្ឋាន។

បន្ទាប់ពីករណីនេះកើតឡើង បុគ្គលិកទទួលបន្ទុកសុវត្ថិភាពចំណីអាហារ បានបញ្ជូនកងកម្លាំងរបស់ខ្លួនទៅត្រួតពិនិត្យភោជនីយដ្ឋានជាង ៥០០ កន្លែងនៅទូទាំងរដ្ឋ Kerala ហើយភោជនីយដ្ឋានប្រហែល ៤៨ ត្រូវបានបញ្ជាឱ្យបិទ បន្ទាប់ពីពួកគេត្រូវបានរកឃើញថាស្ថិតក្នុងស្ថានភាពគ្មានអនាម័យ ឬរកឃើញថាមិនមានអាជ្ញាប័ណ្ណត្រឹមត្រូវ ហើយនឹងបន្តស៊ើបអង្កេតបន្តទៀត៕ ប្រភព៖ Thairath

បរទេស៖ ក្មេងអាយុ២ឆ្នាំ ជិះកង់ធ្លាក់ចូលស្រះគេបោះបង់ចោលជម្រៅ៦០ម៉ែត្រ ឪពុកឃើញខំស្ទុះលោតចូលទឹកដើម្បីជួយសង្គ្រោះកូន ចុងក្រោយស្លាប់ទាំងពីរ។

កាលពីពេលកន្លងទៅថ្មីៗនេះមានសេចក្ដីរាយការណ៍ពីសារព័ត៌មាន The Sun បានរាយការណ៍ពីឧប្បត្តិហេតុនៃសោកនាដកម្មមួយនៅក្នុង ប្រទេសទួរគី បន្ទាប់ពីក្មេងប្រុសអាយុ ២ ឆ្នាំម្នាក់បានធ្លាក់ចូលទៅក្នុងអណ្តូងដែលគេបោះបង់ចោលក្នុងជម្រៅជាង ៦០ ម៉ែត្រ ខណៈកំពុងជិះកង់នៅជិតកន្លែងលេង។

ជាលទ្ធផលឪពុកដែលបានមើលកូនប្រុសរបស់គេពីចម្ងាយ ក៏បានប្រញាប់ប្រញាល់រកមកកន្លែងកើតហេតុ និងបានសម្រេចចិត្តលោតចូលទៅក្នុងអណ្តូងដោយសង្ឃឹមថានឹងជួយសង្គ្រោះកូនប្រុសរបស់គាត់ឱ្យរួចជីវិត។

ប៉ុន្តែគួរឱ្យសោកស្ដាយ នៅទីបំផុតវាបានក្លាយទៅជាសោកនាដកម្មក្រោយពី អ្នកទាំងពីរបានបាត់បង់ជីវិតទាំងឪពុក និងកូនប្រុស។

ទោះជាយ៉ាងណាបើតាមសម្ដីសាក្សីនៅក្បែរនោះបានបញ្ជាក់ថា ខណៈពេលដែលលោក Aytak ដែលត្រូវជាឪពុកក្មែង និងជាជនរងគ្រោះ បានព្យាយាមស្រែកឱ្យគេជួយ ស្របពេលនោះអ្នកធ្វើដំណើរបាន ឮសំឡេងក៏ប្រញាប់ហៅទូរសព្ទសង្គ្រោះបន្ទាន់។ ហើយមិនយូរប៉ុន្មានក្រុមអ្នកជួយសង្គ្រោះបានមក ដល់កន្លែងកើតហេតុដោយ ព្រមជាមួយនឹងឧបករណ៍ជួយសង្គ្រោះ និងកាមេរ៉ាសម្រាប់មើលស្ថានភាពនៅក្នុងស្រះ។

បន្ទាប់មកមន្ត្រីបានចាប់ផ្តើមជីករណ្តៅដើម្បីចូលទៅជួយឪពុកកូន លោក Aytak និង កូនប្រុងBatu។

ប្រភាពដដែលបានបន្តថា ក្រោយរយៈពេលជាង១០ម៉ោង មន្ត្រីជំនាញបានជីករណ្តៅជម្រៅ ១៥ម៉ែត្រ ប្រហែលមួយភាគបួននៃជម្រៅដែលជនរងគ្រោះធ្លាក់។ និងបន្តការជិករហូតទីបំផុតទៅដល់ឪពុកនិង កូនប៉ុន្តែ ជាអកុសល្យ និងហួសពេល ដោយអ្នកទាំងពីរស្លាប់ ដោយសារលិចក្នុងទឹកភក់នៅបាតអណ្ដូង។

ចុងក្រោយសមត្ថកិច្ចបានស្រង់សាកសព ឪពុកកូនទាំងពីរឲ្យក្រុមគ្រួសារយកទៅធ្វើបុណ្យតាមសាសនា។

យ៉ាងណាមិញអាជ្ញាធរក៏បានចាប់ខ្លួនជនសង្ស័យពីរនាក់ ដែលអាចជាប់ពាក់ព័ន្ធ និងជាអ្នកគ្រប់គ្រង ក្រុមហ៊ុន Wasfi Kagir ដែលជាអ្នកទទួលបន្ទុកជីកអណ្តូង ហើយត្រូវបានចោទប្រកាន់ផងដែរថាបាន បង្កឱ្យមានមនុស្សស្លាប់ជាច្រើននាក់ពីការធ្វេសប្រហែសហើយអាជ្ញាធរបានចាក់បេតុងគ្របលើអណ្តូង ដែលគេបោះបង់ចោល៕ ប្រភព៖ Khaosod

ប៉េកាំង៖ នាថ្ងៃអង្គារនេះ ចិនបានចាប់ផ្តើមចេញចំណាត់ការសងសឹកប្រឆាំងជប៉ុននិងកូរ៉េខាងត្បូង ដែលបានអនុវត្តការរឹតត្បិតលើ​អ្នកដំណើរមកពីប្រទេសចិន ពាក់ព័ន្ធជំងឺកូវីដ១៩។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអង្គារ ទី១០ ខែមករា ឆ្នាំ២០២៣។

ស្ថានទូតចិនប្រចាំទីក្រុងសេអ៊ូល បានប្រកាសថា ខ្លួនសម្រេចផ្អាកការចេញទិដ្ឋាការរយៈពេលខ្លី ឱ្យអ្នកដំណើរមកពីកូរ៉េខាងត្បូង។ រីឯទីភ្នាក់ងារព័ត៌មានជប៉ុន ក្យូដូ (Kyodo) បានរាយការណ៍ថា ទីក្រុងប៉េកាំងក៏បានអនុវត្តចំណាត់ការស្រដៀងគ្នាប្រឆាំងជប៉ុនដែរ។ ស្ថានទូតចិនបាននិយាយថា ខ្លួននឹងកែសម្រួលគោលការណ៍ផ្តល់ទិដ្ឋាការថ្មីចុងក្រោយនេះ ដោយស្របទៅតាមការដកចេញវិញ នូវអ្វីដែលខ្លួនហៅថា «ការរឹតត្បិតបែបរើសអើង» ពាក់ព័ន្ធការចូលក្នុងប្រទេសកូរ៉េខាងត្បូង។ បើតាម Kyodo ទីក្រុងប៉េកាំងក៏បានប្រាប់​​បណ្តាទីភ្នាក់ងារទេសចរណ៍ថា ខ្លួនសម្រេចឈប់ចេញទិដ្ឋាការថ្មីៗនៅជប៉ុនផងដែរ។

គួរបញ្ជាក់ថា ជប៉ុននិងកូរ៉េខាងត្បូង បានចូលរួមជាមួយប្រទេសមួយចំនួនទៀត រួមមានទាំងសហរដ្ឋអាមេរិក ដែលបានកំណត់ឱ្យ​អ្នកដំណើរមកពីប្រទេសចិន ត្រូវបង្ហាញលទ្ធផលអវិជ្ជមាននៃការធ្វើតេស្តរកជំងឺកូវីដ១៩។ ចិនបានចាប់ផ្តើមបើកព្រំប្រទល់របស់ខ្លួន​ទាំងស្រុងឡើងវិញ កាលពីថ្ងៃអាទិត្យចុងសប្តាហ៍មុន៕

ប្រទេសជប៉ុន៖ អាជ្ញាធរក្នុងប្រទេសជប៉ុនបានសម្លាប់សត្វស្លាបជិត ១០ លានក្បាលនៅទូទាំងប្រទេសក្នុងគោលបំណងទប់ស្កាត់ភាពធ្ងន់ធ្ងរនៃការ ផ្ទុះឡើងនៃជំងឺផ្ដាសាយបក្សីថ្មី។

ទីភ្នាក់ងារសារព័ត៌មាន Xinhua បានរាយការណ៍ពីទីក្រុងតូក្យូ ប្រទេសជប៉ុននៅថ្ងៃទី ១០ ខែមករា ឆ្នាំ២០២៣ ថាក្រសួងកសិកម្មរុក្ខាប្រមាញ់ និង នេសាទជប៉ុន បានរបាយការណ៍ពីការសម្លាប់សត្វបក្សី  ក្នុងរដូវជំងឺគ្រុនផ្ដាសាយបក្សីនាពេលបច្ចុប្បន្ន។

ដោយសត្វបក្សីជាង ៩,៩៨ លានក្បាលត្រូវបានគេដាក់ប្រមូលផ្ដុំគ្នាសម្រាប់ធ្វើការសម្រាប​ចោលជាទ្រង់ទ្រាយធំ ដែលនេះជាកំណត់ត្រាដ៏ខ្ពស់បំផុតមួយ។

ទន្ទឹមនឹងនោះផងដែរ សម្រាប់ស្ថិតិនៃជំងឺគ្រុនផ្តាសាយបក្សីបច្ចុប្បន្ននៅប្រទេសជប៉ុនដែលបានចាប់ផ្តើមរីករាលដាល តាំងពីខែតុលា ឆ្នាំ២០២២កន្លងទៅ ត្រូវបានរកឃើញនៅក្នុងកសិដ្ឋានចិញ្ចឹមសត្វយ៉ាងហោចណាស់សរុប ៥៦ កន្លែង ក្នុងខេត្តចំនួន ២៣ ទូទាំងប្រទេស។ ដោយកាលពីកន្លងទៅ នៅក្នុងខេត្ត Ibaraki នៅភាគឦសាននៃទីក្រុងតូក្យូ អាជ្ញាធរក៏ធ្លាប់បានចាប់ផ្តើមសម្លាប់មាន់ប្រហែល ៩៣០.០០០ ក្បាលនៅក្នុងកសិដ្ឋានផងដែរ។

ទោះជាយ៉ាងណាក្រសួងកសិកម្ម និងសុខភាពរបស់ប្រទេសជប៉ុនបានសង្កត់ធ្ងន់ទៅកាន់សាធារណជនថា សាច់បសុបក្សី និងពងមាន់គ្រប់ប្រភេទនៅតែអាចទទួលទានបានជាធម្មតា ប៉ុន្តែវាត្រូវតែមានការចម្អិនឱ្យបានត្រឹមត្រូវមុនទទួលទាន៕ ប្រភព៖ dailynews