អន្តរជាតិ៖ ទីភ្នាក់ងារសារព័ត៌មានរុស្ស៉ី បានរាយការណ៍ថា ប្រធានាធិបតីលោក វ្ល៉ាឌីមៀ ពូទីន បានដាក់ចេញបទបញ្ជាពង្រឹងព្រំដែនរបស់ខ្លួន និងបានណែនាំដល់សេវាសន្តិសុខជាតិ ឲ្យបង្កើនការគ្រប់គ្រងសង្គម ដើម្បីកម្ចាត់ជនក្បត់ អ្នកស៊ើបការណ៍ និងអ្នកបះបោរ។ នេះបើយោងតាម ការចុះផ្សាយដោយទីភ្នាក់ងារសារព័ត៌មាន AFP នៅថ្ងៃអង្គារ ទី២០ ខែធ្នូ ឆ្នាំ២០២២។

ថ្លែងនៅក្នុងទិវាសេវាសន្តិសុខ ដែលប្រារព្ធយ៉ាងទូលំទូលាយនៅប្រទេសរុស្ស៊ីនៅថ្ងៃចន្ទសប្តាហ៍នេះ លោក ពូទីន បានណែនាំដល់មន្ត្រីសន្តិសុខ ឲ្យពង្រឹងការការពារព្រំដែន បង្កើនការគ្រប់គ្រងក្នុងសង្គម និងបង្កើនការប្រើប្រាស់សក្តានុពលប្រតិបត្តិការបច្ចេកទេស និងបុគ្គលិករបស់ពួកគេ ដើម្បីការពារហានិភ័យពីការជ្រៀតជ្រែកពីបរទេសលើកិច្ចការផ្ទៃក្នុងរុស្ស៉ី។

លោក ពូទីន បានគូសបញ្ជាក់យ៉ាងដូច្នេះថា​ «ការរក្សានូវភាពស្ងៀមស្ងាត់ និងប្រមូលផ្តុំកម្លាំងនាពេលនេះ ធ្វើឡើងតាមការស្នើសុំពីទីភ្នាក់ងារប្រឆាំង ការស៉ើបការណ៍ រួមទាំងភ្នាក់ងារស៉ើបការណ៍សម្ងាត់យោធា។ វាចាំបាច់ណាស់ដែលត្រូវបង្ក្រាបឲ្យបានខ្លាំងក្លាលើរាល់សកម្មភាពរបស់សេវាកម្ម ពិសេសបរទេស កំណត់ឲ្យបាននូវអត្តសញ្ញាណជនក្បត់ ភ្នាក់ងារស៊ើបការណ៍សម្ងាត់ និងអ្នកបះបោរឲ្យបានឆាប់រហ័ស។ រីឯការការពារព្រំដែនរុស្ស៊ី ក៏ត្រូវតែពង្រឹងថែមទៀត»។

គួរបញ្ជាក់ថា លោក ពូទីន ក៏បានបញ្ជាឱ្យសេវាសន្តិសុខរុស្ស៉ី ធានាសុវត្ថិភាពសម្រាប់ប្រជាជនដែលកំពុងរស់នៅលើទឹកដីអ៊ុយក្រែនដែលរុស្ស៉ី បានកាត់បញ្ចូលជាឧបសម្ព័ន្ធរបស់ខ្លួន និងដែលទីក្រុងកៀវ និងលោកខាងលិចចាត់ជាអំពើខុសច្បាប់ផងដែរ​៕

Update៖ ក្រុមអ្នកជួយសង្គ្រោះ និងអ្នករុករកកងទ័ពដែលបានបាត់ខ្លួនក្នុងឈូងសមុទ្រថៃ ត្រូវបានគេរាយការណ៍ថាបានស្វែងរកឃើញជនរងគ្រោះម្នាក់ក្នុងចំណោមអ្នកបាត់ខ្លួនចំនួន៣១នាក់នៃហេតុការលិចនាវារបស់រាជវង្ស “រាជសុខោទ័យ” បន្ទាប់ពីកងទ័ពទាំងអស់ធ្វើដំណើរទៅកាន់ពិធី គម្រប់ខួបនៃការសោយទិវង្គត់របស់ព្រះអង្គ អាផាកន គៀតវង្ស ក្រុម លួង ឈុម ផន នៅទីសក្ការៈបូជា ក្រុម លួង ឈុម ផន(Krom Luang Chumphon) ខេត្តឈុនបុរី។

កាលពីយប់មិញនេះមានសេចក្ដីរាយការណ៍ ពីកងទ័ពជើងទឹកថៃបានឱ្យដឹងថា ពួកគេបានរកឃើញ និងជួយសង្គ្រោះនាវិកម្នាក់ ដែលបាត់ខ្លួនក្នុងចំណោមកងទ័ព៣១នាក់ បន្ទាប់ពីជួបឧបទ្ទវហេតុនៃការក្រឡាប់លិចនាវារាជវង្ស “រាជសុខោទ័យ” ក្នុងឈូងសមុទ្រថៃ ក្រោយពីមានព្យុះ និងខ្យល់បោកបក់យ៉ាងខ្លាំងបណ្ដាលឱ្យមានទឹកហូរចូលប្រព័ន្ធអគ្គិសនីតាមបំពង់ផ្សែងចូលក្នុងម៉ាស៊ីន រហូតលែងដំណើរការនៅកណ្តាលឈូងសមុទ្រថៃ ក្នុងស្រុកបាងសាផាន ខេត្ត ប្រាជួបគិរីខាន់ ដែលបណ្ដាលឱ្យក្រឡាប់នាវា និងបានពន្លិចកងទ័ពចំនួន១០៦នាក់។

ការរកឃើញជនរងគ្រោះនេះផងដែរត្រូវបានគេដឹងថា លោកគឺជាប្រធានមន្ត្រីតូច ឈ្មោះ ណា ទី ទីមឌី (Natee Timdee) ដែលត្រូវបានក្រុមអ្នកជួយសង្គ្រោះរកឃើញអណ្ដែតក្នុងឈូងសមុទ្រថៃ។

យ៉ាងណាមិញគេបានបន្ថែមថា លោក ណា ទី ទីមឌី (Natee) ស្ថិតក្នុងស្ថានភាពសន្លប់នៅពេលត្រូវបានគេរកឃើញ ប៉ុន្តែបន្ទាប់មកស្ថានភាពរបស់គាត់ឥឡូវនេះចាប់ផ្ដើមមានកាន់តែប្រសើឡើង និងសុវត្ថិភាពល្អ។

ទោះបីជាយ៉ាងណាក៏ដោយ ចាប់តាំងពីពេលនោះមក ក្រុមអ្នកជួយសង្គ្រោះបានបញ្ជាក់ថា នៅមាននាវិកចំនួន ៣០ នាក់ផ្សេងទៀតបានបាត់ខ្លួន និងមិនទាន់មានដំរួយណាមួយឡើយ៕ ប្រភព៖ Thethaiger

អន្តរជាតិ៖ ក្រសួងការពារជាតិរុស្ស៉ីបានឱ្យដឹងនៅថ្ងៃចន្ទនេះថា រុស្ស៉ីនិងចិននឹងធ្វើសមយុទ្ធយោធាជើងទឹករួមគ្នា នៅចន្លោះថ្ងៃទី២១ ដល់ថ្ងៃទី២៧ ខែធ្នូ ដើម្បីពង្រឹងកិច្ចសហប្រតិបត្តិការ រវាងទ័ពជើងទឹករបស់ប្រទេសទាំងពីរ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃចន្ទ ទី១៩ ខែធ្នូ ឆ្នាំ២០២២។

ក្រសួងការពារជាតិរុស្ស៉ីបានប្រកាសថា សមយុទ្ធយោធាខាងលើ ដែលតែងតែបានប្រារព្ធឡើងជារៀងរាល់ឆ្នាំ ចាប់តាំងពី២០១២មក នឹងរួមមានការបាញ់មីស៉ីលនិងគ្រាប់ផ្លោងនៅឯសមុទ្រចិនខាងកើត ហើយគោលបំណងចម្បង គឺដើម្បីពង្រឹងកិច្ចសហប្រតិបត្តិការ​យោធាជើងទឹកឱ្យកាន់តែរឹងមាំថែមទៀតរវាងរុស្ស៉ីនិងចិន ក៏ដូចជារក្សាសុខសន្តិភាពនិងស្ថិរភាពក្នុងតំបន់អាស៉ី-ប៉ាស៉ីហ្វិក។

បើតាមទីក្រុងមូស្គូ នាវាយោធាចំនួន៤គ្រឿងរបស់ខ្លួន នឹងចូលរួមក្នុងសមយុទ្ធនោះ រួមមានទាំងនាវាចម្បាំងបំពាក់មីស៉ីល វ៉ាយ៉ាគ (Varyag) ខណៈខាងចិននឹងបញ្ជូននាវាយោធាចំនួន ៦គ្រឿងឱ្យចូលរួម។ មិនតែប៉ុណ្ណោះ ក៏នឹងមានវត្តមានយន្តហោះនិងឧទ្ធម្ភាគចក្រ​យោធា របស់ប្រទេសទាំងពីរថែមទៀតផង។

គួរបញ្ជាក់ថា ចាប់តាំងពីខ្លួនបើកការឈ្លានពានលើអ៊ុយក្រែន កាលពីខែកុម្ភៈមក ទីក្រុងមូស្គូបានព្យាយាមរឹងបន្តឹងចំណងទាក់ទង ផ្នែកនយោបាយ សន្តិសុខ និងសេដ្ឋកិច្ចជាមួយទីក្រុងប៉េកាំងឱ្យកាន់តែខ្លាំង ហើយមើលឃើញមេដឹកនាំចិន លោក ស៉ី ជិនពីង គឺជា​សម្ពន្ធមិត្តដ៏សំខាន់បំផុតមួយ ដើម្បីចាប់ដៃគ្នាតទល់ជាមួយក្រុមលោកខាងលិច។ យ៉ាងណាមិញ ទីក្រុងប៉េកាំងបានបង្ហាញក្តីបារម្ភរបស់ខ្លួន ជុំវិញសកម្មភាពរបស់រុស្ស៉ីនៅអ៊ុយក្រែន៕

ទីក្រុងព្រុចសែល៖ ក្រុមរដ្ឋមន្រ្ដីក្រសួងថាមពលរបស់បណ្ដាប្រទេសសហភាពអឺរ៉ុប បានព្រមព្រៀងគ្នា លើការកំណត់តម្លៃឧស្ម័ន ក្រោយការចរចាគ្នា អស់រយៈពេលជាច្រើនសប្ដាហ៍មក ជុំវិញវិធានការបន្ទាន់ ដោយបានបំបែកមតិ នៅទូទាំងប្លុកសេរីរបស់លោកខាងលិចមួយនេះ ខណៈកំពុងតែស្វែងរកដំណោះស្រាយ លើវិបត្តិថាមពល។

សារព័ត៌មាន Al Jazeera បានចេញផ្សាយ កាលពីថ្ងៃចន្ទ ទី១៩ ខែធ្នូ ថា ឆែកជាប្រធាន នៃក្រុមប្រឹក្សាអឺរ៉ុប តំណាងឲ្យប្រទេសទាំង២៧ ជាសមាជិក បានបញ្ជាក់ ថា កិច្ចព្រមព្រៀងនេះ បានកើតឡើង កាលពីថ្ងៃចន្ទ នៅក្នុងទីក្រុងព្រុចសែល ប្រទេសប៊ែលហ្ស៊ិក។

ការកំណត់តម្លៃនេះ ក៏ជាការប៉ុនប៉ងចុងក្រោយបង្អស់របស់សហភាពអឺរ៉ុប ដែលមានប្រទេសចំនួន២៧ ដើម្បីកាត់បន្ថយតម្លៃឧស្ម័នកំពុងតែឡើងខ្ពស់ ធ្វើឱ្យការចំណាយលើថាមពលរបស់ពលរដ្ឋកើនឡើង និង ជំរុញឱ្យមានអតិផរណាខ្ពស់បំផុត នៅឆ្នាំនេះ ចាប់តាំងពីរុស្ស៊ី បានកាត់ផ្តាច់នូវការផ្គត់ផ្គង់ឧស្ម័នរបស់ខ្លួន មកកាន់តំបន់អឺរ៉ុប។

បើតាមការអះអាងរបស់ក្រុមមន្ត្រីសហភាពអឺរ៉ុប និង ឯកសារដែលបានឃើញ ដោយទីភ្នាក់ងារសារព័ត៌មាន Reuters បានបង្ហាញថា ក្រុមរដ្ឋមន្ត្រីក្រសួងថាមពល បានព្រមព្រៀងគ្នា នៅក្នុងការកំណត់ ប្រសិនបើតម្លៃលើសពី១៩១ដុល្លារ នៅក្នុងមួយមេហ្គាវ៉ាត់ម៉ោង សម្រាប់រយៈពេល៣ថ្ងៃ នៅលើកិច្ចសន្យា នៃ TTF ដែលប្រើតាមស្តង់ដារអឺរ៉ុប ដោយចាប់ផ្ដើមពីថ្ងៃទី១៥ ខែកុម្ភៈ ឆ្នាំ២០២៣។បើតាមទីភ្នាក់ងារសារព័ត៌មានរបស់រុស្ស៊ី Interfax បានឲ្យដឹង ថា លោក ឌីមីទ្រី ប៉េស្កូវ (Dmitry Peskov) អ្នកនាំពាក្យ វិមានក្រឹមឡាំងរបស់ប្រធានាធិបតីរុស្ស៊ី បានបញ្ជាក់ ក្រោយការប្រកាសពីកិច្ចព្រមព្រៀងរបស់អឺរ៉ុប ថា «ការសម្រេចចិត្តបែបនេះ ជាការវាយប្រហារ ទៅលើតម្លៃទីផ្សារ។ នេះជាការរំលោភបំពាន លើការកំណត់តម្លៃទីផ្សារ ការរំលោភបំពានលើដំណើរការទីផ្សារ ការយោងណាមួយ សម្រាប់តម្លៃ គឺមិនអាចទទួលយកបាននោះឡើយ»។

បណ្តាប្រទេសសហភាពអឺរ៉ុប បានជាប់គាំងជាមួយគ្នា តាមរយៈការដាក់ទណ្ឌកម្មជាបន្ដបន្ទាប់មិនធ្លាប់មានពីមុនមក ប្រឆាំងនឹងប្រទេសរុស្ស៊ី ជុំវិញសង្គ្រាម នៅក្នុងប្រទេសអ៊ុយក្រែន និង វិធានការសន្សំសំចៃថាមពល សម្រាប់បញ្ចៀសនូវការខ្វះខាតប្រេងឥន្ធនៈ ដែលប្រើប្រាស់ សម្រាប់ការផលិតអគ្គិសនី កម្ដៅនៅក្នុងផ្ទះ និង រោងចក្រថាមពល។

ក្រុមមន្ដ្រីអឺរ៉ុប ចំនួន៣រូប បានបញ្ជាក់ ថា ប្រទេសអាល្លឺម៉ង់ បានបោះឆ្នោតគាំទ្រនូវកិច្ចព្រមព្រៀងនេះ បើទោះជាមានការព្រួយបារម្ភ អំពីឥទ្ធិពលគោលនយោបាយ លើសមត្ថភាពរបស់អឺរ៉ុប នៅក្នុងការទាក់ទាញនូវការផ្គត់ផ្គង់ឧស្ម័ន នៅលើទីផ្សារពិភពលោក ដែលមានការប្រកួតប្រជែងតម្លៃ។

លោក រ៉ូប៊ឺត ហាបែក (Robert Habeck) រដ្ឋមន្រ្ដីក្រសួងសេដ្ឋកិច្ចអាល្លឺម៉ង់ បានបញ្ជាក់ កាលពីថ្ងៃចន្ទ នៅមុនកិច្ចប្រជុំ ថា «មិនមានអ្នកណាម្នាក់ នៅក្នុងប្រទេសអាល្លឺម៉ង់ ប្រឆាំងនឹងការបញ្ចុះតម្លៃឧស្ម័ននោះឡើយ ប៉ុន្ដែយើងដឹងហើយ ថា យើងត្រូវតែមានការប្រុងប្រយ័ត្នបំផុត កុំឱ្យធ្វើអ្វីហួសប្រមាណ និង បង្កឱ្យមានអ្វីដែលអាក្រក់បំផុត»៕

អន្តរជាតិ៖ កូរ៉េខាងជើង បានថ្កោលទោស «យុទ្ធសាស្ត្រសន្តិសុខជាតិថ្មី» របស់ជប៉ុនថាជាការគំរាមកំហែងដល់បរិយាកាសសន្តិសុខក្នុងតំបន់ អមជាមួយការព្រមានចាត់វិធានការយោធាឆ្លើយតបយ៉ាងម៉ឺងម៉ាត់។ នេះបើតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃអង្គារ ទី២០ ខែធ្នូ ឆ្នាំ២០២២។

នៅក្នុងសេចក្ដីថ្លែងការណ៍មួយចេញផ្សាយដោយប្រព័ន្ធផ្សព្វផ្សាយរដ្ឋ KCNA នៅថ្ងៃអង្គារនេះ អ្នកនាំពាក្យម្នាក់មកពីក្រសួងការបរទេសកូរ៉េខាងជើង បានគូសបញ្ជាក់ដូច្នេះថា «ជប៉ុនកំពុងបង្កឱ្យមានវិបត្តិសន្តិសុខធ្ងន់ធ្ងរនៅលើតំបន់ឧបទ្វីបកូរ៉េ និងតំបន់អាស៊ីបូព៌ា តាមរយៈការអនុម័តយុទ្ធសាស្ត្រ សន្តិសុខថ្មីមួយ ដែលទទួលស្គាល់ពីសមត្ថភាពវាយប្រហារបង្ការទុកជាមុនប្រឆាំងនឹងប្រទេសដទៃ»។

អ្នកនាំពាក្យរូបនេះបន្តទៀតថា បរិយាកាសសន្តិសុខក្នុងតំបន់មានការប្រែប្រួលយ៉ាងខ្លាំង ដោយសារតែគោលនយោបាយថ្មីរបស់ជប៉ុនដែលជាទង្វើ បំពានលើធម្មនុញ្ញ UN និងជាបញ្ហាប្រឈមធ្ងន់ធ្ងរដល់សន្តិភាពអន្តរជាតិ ហើយថាកូរ៉េខាងជើងមានសិទ្ធិដើម្បីចាត់វិធានការយោធាយ៉ាងម៉ឺងម៉ាត់ សំដៅការពារសិទ្ធិជាមូលដ្ឋានរបស់ខ្លួន ក៏ដូចជាឆ្លើយតបទៅនឹងបរិយាកាសសន្តិសុខស្មុគស្មាញក្នុងតំបន់។

គួរបញ្ជាក់ថា ជប៉ុន កាលពីសប្ដាហ៍មុន បានអនុម័ត «យុទ្ធសាស្ត្រសន្តិសុខជាតិថ្មីមួយ» ជាមួយការបង្កើនកញ្ចប់ថវិកាយោធា និងបញ្ចេញផែនការ អភិវឌ្ឍសមត្ថភាពយោធាធំបំផុតមួយ មិនធ្លាប់មានចាប់តាំងពីសង្រ្គាមលោកលើកទី២មក នៅចំពោះមុខភាពតានតឹងនៅក្នុងតំបន់ និងការភ័យខ្លាំងពី សង្រ្គាមឈ្លានពានរបស់រុស្ស៉ីនៅអ៊ុយក្រែន៕

បរទេស៖ នៅក្នុងរដ្ឋធានីរុស្ស៊ីរងការធ្លាក់ព្រិលខ្លាំងបំផុតក្នុងរយៈពេល ៣៣ ឆ្នាំដោយពន្យារពេលជើងហោះ ហើរ ជាង១០០ ផ្លូវចរាចរណ៍ជាច្រើនត្រូវបានបិទនៅទីក្រុងមូស្គូ និងតំបន់ជុំវិញ។

កាលពីថ្ងៃទី ១៩ ខែធ្នូ ឆ្នាំ ២០២២ គេហទំព័រសារព័ត៌មាន Moscow Times របស់រុស្ស៊ីបានរាយការណ៍ថា តំបន់នានាក្នុងទីក្រុងមូស្គូ និងតំបន់ជុំវិញនោះ ក្នុងប្រទេសរុស្ស៊ី ឥឡូវនេះកំពុងជួបប្រទះនឹងការធ្លាក់ព្រិលយ៉ាងខ្លាំងបំផុតមិនធ្លាប់មានក្នុងរយៈពេល ៣៣ ឆ្នាំកន្លងមកនេះ។

ជាមួយគ្នានេះក្នុងរយៈពេលត្រឹមមួយម៉ោងកន្លងមកនេះ ការធ្លាក់ព្រិលមានចំនួនជាង ៦០ភាគរយជាមួយបរិមាណព្រិលជាមធ្យមដែលបានធ្លាក់ក្នុងខែមុន។

សភាពព្រិលបានធ្លាក់ខ្លាំងដោយបានគ្របដណ្តប់ទីក្រុងមូស្គូតាំងពីដើមខែធ្នូប៉ះពាល់ដល់ចរាចរណ៍ធ្វើឱ្យជើងហោះហើរជាង ១០០ ត្រូវបានពន្យារពេល ខណៈផ្លូវចរាចរណ៍ជាច្រើនត្រូវបានបិត និងជួបជាមួយនឹងការលំបាក។

បន្ថែមពីនោះរបាយការណ៍បញ្ជាក់ថា បច្ចុប្បន្ននេះមានការប្រមូលផ្តុំព្រិលជាច្រើនជាង ២៥ សង់ទីម៉ែត្រ រហូតអភិបាលក្រុងមូស្គូបានបង្គាប់មន្ត្រី និងអ្នកស្ម័គ្រចិត្តជាង ៤០,០០០ នាក់ ត្រូវបានកេណ្ឌដើម្បីជួយបោសសម្អាតគំនរព្រិលដែលបិទផ្លូវដឹកជញ្ជូន។ ក្នុងនោះជាសរុបបុគ្គលិកជាង ១២០,០០០ នាក់កំពុងផ្លាស់ប្តូរភារកិច្ចបោសសម្អាតព្រិលនៅពេលនេះដើម្បីឱ្យមានសភាពល្អប្រសើរជាងមុន។

ទោះជាយ៉ាងណាការិយាល័យឧតុនិយមបានរាយការណ៍ថា រហូតមកដល់ពេលនេះព្រិលជាង ២៥សង់ទីម៉ែត្រនៅក្នុងទីក្រុងមូស្គូ ដែលនេះជាចំនួនកម្រមាន និងជាចំនួនដូចគ្នាដែលបានកត់ត្រានៅពាក់កណ្តាលខែធ្នូ ឆ្នាំ ១,៩៩៣ កាលពី ២៩ ឆ្នាំមុន៕ ប្រភព៖ Thairath