បរទេស៖ ជាងកាត់សក់នៅជុំវិញប្រទេសបែលហ្សិកបានចាត់វិធានការក្នុងការបោស និងប្រមូលសក់ពីការកាត់សក់របស់អតិថិជន រួចបញ្ជូនវាទៅអង្គការឯករាជ្យ (NGO) ដែលនឹងកែច្នៃសក់ឡើងវិញដើម្បីជាគោលដៅក្នុងការការពារបរិស្ថាន។

កាលពីថ្ងៃទី២៩ ខែធ្នូ ឆ្នាំ២០២២ សារព័ត៌មានរ៉យទ័រ បានរាយការណ៍ពីទីក្រុងព្រុចសែល នៃប្រទេសបែលហ្ស៊ិក អំពីគម្រោងកែឆ្នៃសក់គឺដាក់បណ្តុំសក់ ឬសរសៃសក់ ចូលទៅក្នុងម៉ាស៊ីនដើម្បីបម្លែងទៅជាវត្ថុប្រើប្រាស់បានឡើងវិញ ដោយការបង្វែរវាទៅជាព្រំរាងការ៉េ ដែលអាចត្រូវបានប្រើប្រាស់ដើម្បីស្រូបយកប្រេង និងអ៊ីដ្រូកាបូនផ្សេងទៀត ដែលបំពុលបរិស្ថាន ឬ អាចប្រើសម្រាប់ផលិតថង់សម្ភារជីវចម្រុះផងដែរ។

ជាមួយគ្នានោះលោក Patrick Janssen សហស្ថាបនិកនៃគម្រោងកែច្នៃសក់នេះ បានពន្យល់ថាសក់ក្នុងមួយគីឡូក្រាមអាចស្រូបយកប្រេង និងអ៊ីដ្រូកាបូនចន្លោះពី ៧ ទៅ ៨ លីត្រ ហើយកំរាលព្រំរាងការរ៉េនេះអាចដាក់ក្នុងបំពង់បង្ហូរ ដើម្បីស្រូបយកជាតិពុលនៅក្នុងទឹក មុនពេលវាហូរចូលទៅក្នុងទន្លេផងដែរ។

បន្ថែមពីនោះគេហទំព័ររបស់គម្រោងនេះបញ្ជាក់បន្ថែមថា  សក់មានលក្ខណៈសម្បត្តិដ៏មានឥទ្ធិពលដោយសារតែកំរាលព្រំ១ អាចផ្ទុកទម្ងន់បានច្រើនជាង ១០ លានដង រួមទាំងអាចស្រូបយកជាតិខ្លាញ់ និងអ៊ីដ្រូកាបូនបានយ៉ាងល្អ  ហើយវាក៏រលាយក្នុងទឹកផងដែរ និងមានភាពបត់បែនខ្ពស់ដោយសារតែសរសៃនៃ keratin ។

យ៉ាងណាមិញម្ចាស់ហាងកែសម្ផស្សជាច្រើននៅទូទាំងទីក្រុងព្រុចសែល ដែលជាជាងកាត់សក់ បាននិយាយថានេះគឺជារឿងល្អក្នុងការប្រមូលសក់ក្នុងហាងរបស់ពួកគេជាមួយនឹងការបង់ថ្លៃតិចតួចដល់គម្រោងដែលប្រមូលសក់។ ព្រោះថាការពិតវាគឺគួរឱ្យសោកស្ដាយសក់ ប្រសិនបើត្រូវបានបោះចោលក្នុងធុងសំរាម ជាមួយនឹងអត្ថប្រយោជន៍ដ៏មហាសាលរបស់វា៕ ប្រភព៖ dailynews

រដ្ឋធានីកៀវ៖ ស្របពេលសង្គ្រាម វាយប្រយុទ្ធគ្នា រវាងកងទ័ពការពារទឹកដីអ៊ុយក្រែន និង កម្លាំងទាហានរុស្ស៊ី កំពុងតែបន្ដ ហើយភាគីជម្លោះទាំង២ ហាក់បីដូចជាមិនសញ្ញាណាមួយ អាចងាកទៅរកតុចរចាគ្នានោះឡើយ ព្រោះពួកគេសុទ្ធតែដាក់តម្លៃខុសៗគ្នា គឺអ៊ុយក្រែន ចង់អូសក.រុស្ស៊ីទៅកាត់ទោស ខណៈក្រុងមូស្គូ ចង់ឲ្យអ៊ុយក្រែន រំសាយទ័ពទាំងអស់របស់ខ្លួនចោល និង ព្រមទទួលស្គាល់ដែនដី ដែលទាហានរបស់ខ្លួន រឹបអូសយកបាន ជាទឹកដីរបស់រុស្ស៊ី។

ទីភ្នាក់ងារសារព័ត៌មាន AP បានផ្សាយ កាលពីថ្ងៃព្រហស្បតិ៍ ទី២៩ ខែធ្នូ ថា លោក ស៊ើហ្គេ ឡាវរ៉ូវ (Sergey Lavrov) រដ្ឋមន្រ្ដីការបរទេសរុស្ស៊ី កាលពីថ្ងៃអង្គារ បានព្រមានដល់ប្រទេសអ៊ុយក្រែនជាថ្មី ថា ក្រុងកៀវ ត្រូវតែគ្មានយោធា និង បោះបង់ចោលរាល់ការគំរាមកំហែង ដោយសកម្មភាពយោធាបន្ថែមទៀត ប្រឆាំងនឹងរុស្ស៊ី។ ជាមួយគ្នានេះ លោករដ្ឋមន្រ្ដី បានចោទប្រកាន់អ៊ុយក្រែន និង លោកខាងលិច អំពីការបញ្ឆេះសង្គ្រាម ទើបជំរុញឲ្យក្រុងមូស្គូ ប្រើប្រាស់កម្លាំងទ័ព ចូលលុកលុយ។

លោករដ្ឋមន្រ្ដីក្រសួងការបរទេសរុស្ស៊ី បានសង្កត់ធ្ងន់ ថា ប្រសិនបើអ៊ុយក្រែន មិនព្រមបញ្ឈប់សកម្មភាពយោធាគំរាមកំហែងដល់រុស្ស៊ី។ កងទ័ពរុស្ស៊ី នឹងដោះស្រាយបញ្ហាទាំងនេះ។

ការអត្ថាធិប្បាយរបស់ប្រមុខការទូតរូបនេះ ក៏បានឆ្លុះបញ្ជាំង អំពីការអះអាង ដោយគ្មានមូលដ្ឋានច្បាស់លាស់ ខណៈវិមានក្រឹមឡាំង បានអះអាងថា អ៊ុយក្រែន និង សម្ពន្ធមិត្តលោកខាងលិច ត្រូវតែទទួលខុសត្រូវ ចំពោះសង្គ្រាម អស់រយៈពេល១០ខែមកនេះ ដោយបានសម្លាប់មនុស្សរាប់ម៉ឺននាក់ និង រាប់លាននាក់បានរត់ចោលផ្ទះសម្បែង។ ជាមួយគ្នានេះ ប្រមុខការទូតរុស្ស៊ី បានទាត់ចោលនូវរូបមន្ដសន្ដិភាពចំនួន១០ចំណុចរបស់អ៊ុយក្រែន ដើម្បីឈានទៅរកតុចរចា។

លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែ បានប្រកាសអំពីរូបមន្ដសន្ដិភាពទាំង១០ចំណុចរបស់ខ្លួន ជាលើកដំបូង ទៅកាន់មេដឹកនាំ នៃបណ្ដាប្រទេសមានសេដ្ឋកិច្ចជឿនលឿនបំផុតទាំង២០ (ឬG20) សម្រាប់ការបញ្ចប់សង្គ្រាម នៅលើប្រទេសរបស់គាត់។

រូបមន្ដទាំង១០ចំណុចរបស់ប្រធានាធិបតីអ៊ុយក្រែន នោះ រួមមាន៖

១-ត្រូវរក្សាសុវត្ថិភាពវិទ្យុសកម្ម និង នុយក្លេអ៊ែរ ដោយផ្តោតលើការស្ដារសន្តិសុខ នៅជុំវិញរោងចក្រថាមពលនុយក្លេអ៊ែរដ៏ធំបំផុតរបស់អឺរ៉ុប ឈ្មោះ ហ្សាប៉ូរីសហ្សា (Zaporizhzhia) នៅក្នុងប្រទេសអ៊ុយក្រែន ដែលឥឡូវនេះ ត្រូវបានកាន់កាប់ដោយរុស្ស៊ី។

២-ត្រូវរក្សាសន្តិសុខស្បៀង រួមទាំងការការពារ និង ធានាដល់ការនាំចេញគ្រាប់ធញ្ញជាតិរបស់អ៊ុយក្រែន ទៅកាន់ប្រទេសក្រីក្របំផុតរបស់ពិភពលោក។

៣-រក្សាសន្តិសុខថាមពល ដោយផ្តោតលើការរឹតបន្តឹង លើតម្លៃធនធានថាមពលរបស់រុស្ស៊ី ក៏ដូចជា ជួយដល់អ៊ុយក្រែន នៅក្នុងការស្ដារឡើងវិញនូវហេដ្ឋារចនាសម្ព័ន្ធថាមពលរបស់ក្រុងកៀវ ដែលចំនួនពាក់កណ្តាល ត្រូវបានបំផ្លិចបំផ្លាញ ដោយការវាយប្រហារពីរុស្ស៊ី

៤-ត្រូវដោះលែងអ្នកទោស និង អ្នកនិរទេសទាំងអស់ រួមទាំង អ្នកទោសសង្រ្គាម និង កុមារដែលត្រូវបាននិរទេសទៅកាន់ប្រទេសរុស្ស៊ី ឲ្យវិលត្រឡប់មកកាន់ប្រទេសកំណើតរបស់ពួកគេវិញ។

៥-ស្ដារឡើងវិញនូវបូរណភាពទឹកដីរបស់អ៊ុយក្រែន ហើយរុស្ស៊ី ត្រូវបញ្ជាក់សាជាថ្មី យោងទៅតាមធម្មនុញ្ញរបស់អង្គការសហប្រជាជាតិ តាមអ្វីដែលលោក Zelenskyy បាននិយាយ ថា «មិនអាស្រ័យលើការចរចានោះឡើយ»។

៦-ត្រូវដកទ័ពរុស្ស៊ី និង បញ្ឈប់អរិភាព ស្ដារឡើងវិញនូវព្រំដែនរបស់រដ្ឋអ៊ុយក្រែន ជាមួយរុស្ស៊ី។

៧-ត្រូវផ្ដល់យុត្តិធម៌ រួមទាំងការបង្កើតតុលាការពិសេសមួយ សម្រាប់កាត់ទោសឧក្រិដ្ឋកម្មសង្គ្រាមរុស្ស៊ី។

៨-ការពារអេកូស៊ីត និងការពារបរិស្ថាន ដោយផ្តោតលើការដោះមីន និង ការស្ដារឡើងវិញនូវកន្លែងប្រព្រឹត្តិកម្មទឹក។

៩-ទប់ស្កាត់ការកើនឡើងនៃជម្លោះ និង កសាងស្ថាបត្យកម្មសន្តិសុខ នៅក្នុងលំហអាកាស Euro-Atlantic រួមទាំង ការធានា សម្រាប់អ៊ុយក្រែន។

១០-បញ្ជាក់អំពីការបញ្ចប់សង្រ្គាម រួមទាំងឯកសារដែលចុះហត្ថលេខា ដោយភាគីពាក់ព័ន្ធ។

រូបមន្ដទាំង១០ចំណុចរបស់អ៊ុយក្រែន និង ការចង់បានរបស់រុស្ស៊ី ទៅលើតំបន់ចំនួន៤ ដែលក្រុងមូស្គូ បានដាក់បញ្ចូលជាទឹកដីរបស់ខ្លួននោះ គឺមិនអាចធ្វើឲ្យភាគីជម្លោះទាំង២នេះ ឈានដល់តុចរចាសន្ដិភាពបាននោះឡើយ។ បើតាមការអះអាងរៀងៗខ្លួនបែបនេះ សង្គ្រាមនឹងបន្ដអូសបន្លាយទៅមុខបន្ថែមទៀត៕

បរទេស៖ ពិតជាគួរឱ្យប្រុងប្រយ័ត្ន ក្រោយករណីកុមារចំនួន១៨នាក់ក្នុងប្រទេសអ៊ូសបេគីស្ថានត្រូវបានស្លាប់ក្រោយ ផឹកទឹកស៊ីរ៉ូក្អកផលិតដោយ ក្រុមហ៊ុនឥណ្ឌា។

នាថ្ងៃទី ៣០ ខែធ្នូ ឆ្នាំ២០២២ទីភ្នាក់ងារសារព័ត៌មានបរទេសបានរាយការណ៍ ពីក្រសួងសុខាភិបាលនៃប្រទេសអ៊ូសបេគីស្ថានបាននិយាយកាលពីថ្ងៃព្រហស្បតិ៍កន្លងទៅថា កុមារចំនួន១៨នាក់បានស្លាប់បន្ទាប់ពីបានផឹកស៊ី រ៉ូក្អក ប្រភេទ ដែលផលិតដោយក្រុមហ៊ុនផលិតឱសថ Marion Biotechរបស់ឥណ្ឌា។

ជាមួយគ្នានោះសេចក្តីថ្លែងការណ៍របស់ក្រសួងសុខាភិបាលនៃប្រទេសអ៊ូសបេគីស្ថានបានរៀបរាប់លម្អិតថា កុមារដែលបានស្លាប់ពួកគេបានផឹកថ្នាំស៊ីរ៉ូក្អកប្រភេទ Dok-១ Max ដែលលក់ក្នុងប្រទេសតាំងពីឆ្នាំ ២០១២ មកម្លេះ ដោយគ្មានវេជ្ជបញ្ជាពីគ្រូពេទ្យ និងប្រើប្រាស់ជាបន្តបន្ទាប់។

ដោយការប្រើប្រាស់ថ្នាំនេះតម្រូវឱ្យអ្នកជំងឺផឹករយៈពេល ២ទៅ ៧ ថ្ងៃ និង៣ ទៅ៤ ដងក្នុងមួយថ្ងៃជាមួយនឹងចំណុះ ២.៥ ទៅ ៥ មីលីលីត្ររាល់ពេល ដែលវាបានលើសពីបទដ្ឋានដែលកុមារគួរទទួលបាន។ លទ្ធិផលបន្ទាប់ពីការស្រាវជ្រាវគេបានរកឃើញថ្នាំនេះមានផ្ទុកសារធាតុអេទីឡែន Glycol ដែលជាសារធាតុពុល ជាមួយនឹងផលប៉ះពាល់យ៉ាងធ្ងន់ធ្ងរដែលបានតម្រូវឱ្យផឹកច្រើនជាងកម្រិតស្តង់ដារ។

យ៉ាងណាមិញក្រសួងសុខាភិបាលឥណ្ឌាបានចេញសេចក្តីថ្លែងការណ៍បញ្ជាក់ថាមន្ត្រីរបស់ពួកគេបាន ទាក់ទងជាប្រចាំជាមួយអាជ្ញាធរត្រួតពិនិត្យគ្រឿងញៀន និងសាធាតុខុសច្បាប់ជាតិរបស់ប្រទេស អ៊ូសបេគីស្ថាន អំពីបញ្ហានេះចាប់តាំងពីថ្ងៃទី ២៧ ខែធ្នូ កន្លងមក។ ហើយពួកគេកំពុងធ្វើការត្រួតពិនិត្យរោងចក្ររបស់ Marion Biotech ដែលមានទីតាំងនៅ Noida រដ្ឋ Uttar Pradeshប្រទេសឥណ្ឌា ខណៈ នាយក ប្រតិបត្តិនៃក្រុមហ៊ុន Marion Biotech បាននិយាយថា ក្រុមហ៊ុនរបស់ខ្លួនបានផ្អាកជាបណ្ដោះអាសន្ន ក្នុងការផលិតទឹកស៊ីរ៉ូ ក្អកបែបនេះ  ហើយក្រុមហ៊ុននឹងជួយក្នុងការត្រួតពិនិត្យរបស់រដ្ឋាភិបាលបន្ថែម។

ទោះជាយ៉ាណាសូមបងប្អូនដែលជាពលរដ្ឋខ្មែរគួរមានការប្រុងប្រយ័ត្នឱ្យបានខ្ពស់ចំពោះការជីវថ្នាំសម្រាប់ព្យាបាលដល់កូនៗដែលមិនដឹងប្រភព និងវេជ្ជបញ្ជាច្បាស់លាស់៕ ប្រភព៖ Thairath

អន្តរជាំតិ៖ យន្តហោះ​យោធា​ចិន​មួយ​គ្រឿង​ បាន​ហោះ​ចូល​មក​កៀក​យន្តហោះ​អា​មេ​រិ​ក​ចំងាយ​ត្រឹម ៣​ម៉ែត្រ​ប៉ុណ្ណោះ​នៅ​ក្នុង​ដែនអាកាស​នៃ​សមុទ្រ​ចិន​ខាងត្បូង​កាលពី​ស​ប្តា​ហ៍​មុន បណ្តាល​ឱ្យ​យន្តហោះ​អា​មេ​រិ​ក​ត្រូវ​បង្ខំចិត្ត​គេច ដើម្បី​កុំឱ្យ​ប៉ះទង្គិច​គ្នា​នៅ​ដែនអាកាស​អន្តរជាតិ​។ នេះ​បើ​យោង​តាម​ការ​បញ្ជាក់​របស់​អា​មេ​រិ​ក​កាលពី​ថ្ងៃ​ព្រ​ហ​ស្ប​តិ៍័ ទី ២៩ ធ្នូ​ម្សិលមិញ​នេះ​។ ណេះបើយោងតាមប្រភពព័ត៌មាន Reuters ។

ការ​ហោះ​ចូល​មក​កៀក​គ្នា​ជា​អ្វី​ដែល​អា​មេ​រិ​កបាន​ហៅ​ថា​ ជា​ទំនោរ​ថ្មី​នៃ​អាកប្បកិរិយា​ប្រកបដោយ​គ្រោះថ្នាក់​ពី​សំណាក់​យន្តហោះ​ចិន​។ ខណៈយោធា​អា​មេ​រិ​ក​និយាយ​ក្នុង​សេចក្តី​ប្រកាស​ថា ឧ​បទ្ទ​ហេតុ​ដែល​កើតឡើង​រវាង​យន្តហោះ​ចម្បាំង​ចិន Navy J-11 និង​យន្តហោះ​អា​មេ​រិ​ក RC-135 កើតឡើង​នៅ​ថ្ងៃ​ទី ២១ ខែធ្នូ​កន្លង​ទៅ​នេះ​។

សេចក្តី​ប្រកាស​បន្ថែម​ថា «​យើង​រំពឹង​ថា ប្រទេស​ទាំងអស់​ក្នុង​តំបន់​ឥណ្ឌូ​ប៉ា​ស៊ី​ហ្វិ​ក​នឹង​ប្រើប្រាស់​ដែនអាកាស​អន្តរជាតិ​ដោយ​សុវត្ថិភាព និង​ស្រប​តាម​ច្បាប់​អន្តរជាតិ​»​។

អ្នកនាំពាក្យ​យោធា​អា​មេ​រិ​កបាន​និយាយ​ថា យន្តហោះ​ចម្បាំង​ចិន​បាន​ហោះ​មក​កៀក​ចំងាយ ៣​ម៉ែត្រ​ពី​ស្លាប ប៉ុន្តែ​៦​ម៉ែត្រ​ពី​ច្រមុះ​របស់​យន្តហោះ​អា​មេ​រិ​ក ដែល​ធ្វើ​ឱ្យ​យន្តហោះ​អា​មេ​រិ​ក​ត្រូវ​គេចខ្លួន​។

អា​មេ​រិ​កបាន​លើក​ឡើង​ពី​បញ្ហា​នេះ​ជាមួយនឹង​រដ្ឋាភិបាល​ចិន​។ ស្ថានទូត​ចិន​ក្នុង​ទីក្រុង​វ៉ា​ស៊ី​ន​តោន​មិន​ទាន់​ធ្វើការ​បកស្រាយ​នៅឡើយ​នោះ​ទេ​​ ​៕