ប្រទេសថៃ៖ គ្រូទាយម្នាក់នៅប៉ាតាយ៉ាត្រូវបានចាប់ខ្លួនបន្ទាប់ពីត្រូវបានចោ.ទប្រកាន់ថា បានលួចទូរស័ព្ទដៃពីនារីវ័យក្មេងម្នាក់ភ្លាមៗបន្ទាប់ពីគេបានទស្សន៍ទាយឲ្យនាងថា នឹងបាត់បង់របស់អ្វីម្យ៉ាងដែលមានតម្លៃ នៅក្នុងថ្ងៃចូលឆ្នាំថ្មី។ នេះបើតាមការចុះផ្សាយរបស់សារព័ត៌មាន Khaosod។

កាលពីព្រឹក ថ្ងៃទី 1 ខែមករា ឆ្នាំ 2026 នៅទល់មុខវត្តជ័យមង្គល នៅប៉ាតាយ៉ាភាគខាងត្បូង ខេត្តឈុនបុរី ប៉ូលីបានធ្វើចាប់ឃាត់ខ្លួនជនសង្ស័យម្នាក់ពាក់ព័ន្ធនឹងការលួ.ចទូរស័ព្ទដៃ iPhone 13 Pro ដែលមានតម្លៃប្រហែល 20,000 បាត (580 ដុល្លារ) ពីនារីម្នាក់។

តាមរបាយការណ៍របស់ប៉ូលីស បុរសជនសង្ស័យខាងលើនេះមានឈ្មោះថា Udomsap Mueangkaew អាយុ 38 ឆ្នាំ និងត្រូវបានគេស្គាល់ថាជាគ្រូទាយម្នាក់នៅក្នុងតំបន់។ តាមសម្ដីរបស់នារីជាជនរងគ្រោះឈ្មោះ Pim អាយុ 19ឆ្នាំ បានឲ្យដឹងថា ដំបូងនាងបានជួបបុរសជនសង្ស័យរូបនេះនៅតាមផ្លូវ ដែលគេបានតែងខ្លួននិងនិយាយដូចជាមនុស្សចាស់ (ក្នុងទម្រង់ជាគ្រួទាយ) អង្គុយលើកន្ទេលនៅតាមចិញ្ចើមផ្លូវទល់មុខវត្ត រួចស្រែកហៅអ្នកដែលដើរកាត់ឲ្យចូលទស្សន៍ទាយនៅកន្លែងរបស់ខ្លួន។

ដោយមើលទៅគួរឲ្យអាណិត និងចង់ធ្វើរឿងល្អនៅថ្ងៃឆ្លងចូលឆ្នាំថ្មី នាងក៏យល់ព្រមចូលទៅឲ្យបុរសនោះទស្សន៍ទាយតាមរយៈសន្លឹកបៀ។ ក្នុងអំឡុងពេលទាយឲ្យនាង បុរសគ្រូទាយនោះបានប្រាប់នាងថា នាងនឹងជួបប្រទះនឹងសំណាងអាក្រ.ក់ឆាប់ៗនេះ ហើយនឹងបាត់បង់ទ្រព្យសម្បត្តិដ៏មានតម្លៃមួយ រួចក៏បានណែនាំឱ្យនាងចំណាយប្រាក់បន្ថែមលើគេដើម្បីទប់ស្កាត់រឿងអាក្រ.ក់នេះ ប៉ុន្តែត្រូវបាននាងបដិសេធ ព្រោះជឿថាវាមិនចាំបាច់ និងដើរចាកចេញពីទីនោះក្រោយបញ្ចប់ការទស្សន៍ទាយ។

ក្រោយមក នៅពេលមកដល់កន្លែងស្នាក់នៅវិញ នារីរងគ្រោះស្រាប់តែប្រទះឃើញថា ទូរស័ព្ទដៃរបស់នាងត្រូវបានបាត់ បន្ទាប់ពីពេលចុងក្រោយបង្អស់ដែលនាងចងចាំ គឺនាងបានទុកទូរស័ព្ទនៅក្បែរខ្លួនក្នុងអំឡុងពេលអង្គុយនៅកន្លែងគ្រូទាយនោះ។ ដោយមានការសង្ស័យ នាងក៏បានត្រឡប់ទៅទីតាំងនោះវិញស្រែកហៅឲ្យគេជួយ និងប្ដឹ.ងប៉ូលីស ហើយគេពិតជាបានរកឃើញទូរស័ព្ទរបស់នាងនៅក្នុងថង់យាមរបស់បុរសគ្រូទាយនោះមែន។

នៅចំពោះមុខប៉ូលីស ជនសង្ស័យខាងលើបានសារភាពថា រូបគេពិតជាបានប្រព្រឹត្តសកម្មភាពលួ.ចទូរស័ព្ទដៃរបស់នារីរងគ្រោះមែន ប៉ុន្តែអះអាងថា នេះទើបតែជាបទល្មើសលើកទី១របស់ខ្លួនប៉ុណ្ណោះ ដែលធ្វើឡើងដោយសារតែគេត្រូវការលុយសម្រាប់ដើរលេងឆ្លងឆ្នាំ។ តែទោះជាយ៉ាងណា ចំពោះករណីនេះបូលីសនៅតែចាប់ឃាត់ខ្លួនបុរសខាងលើដដែល ដើម្បីចាត់ការកាត់ទោ.សតាមផ្លូវច្បាប់៕

អ្នកតាមដានវិស័យភាពយន្តច្បាស់ជាធ្លាប់បានទស្សនារួចមកហើយនូវរឿងភាគដ៏ល្បីរបស់លោក James Cameron គឺ “Avatar” ដែលវគ្គ ៣ បានចាក់បញ្ចាំងនៅតាមរោងកុនកាលពីខែមុន។ រឿងនេះត្រូវបានបំផុសគំនិតយ៉ាងខ្លាំងពីទីតាំងធម្មជាតិដ៏អស្ចារ្យជាច្រើននៅលើភពផែនដីយើងនេះ ដើម្បីបង្កើតជាពិភព “Pandora”។

ខាងក្រោមនេះគឺជាទីកន្លែងពិតៗមួយចំនួនដែលអ្នកទស្សនារឿង “Avatar” អាចទៅកម្សាន្តបាននៅក្នុងជីវិតពិត៖

១. ភ្នំអណ្ដែត (Floating Mountains) នៅឧទ្យានជាតិ Zhangjiajie ប្រទេសចិន៖ នេះគឺជាទីតាំងដែលល្បីល្បាញបំផុត។ ភ្នំថ្មភក់ដែលមានរាងដូចសសរខ្ពស់ៗនៅក្នុងឧទ្យានជាតិ Zhangjiajie National Forest Park (ខេត្ត Hunan) បានក្លាយជាគំរូសម្រាប់ “ភ្នំ Hallelujah” ក្នុងរឿង Avatar។ នៅពេលមានអ័ព្ទបាំងផ្នែកខាងក្រោម ភ្នំទាំងនោះមើលទៅហាក់ដូចជាកំពុងអណ្ដែតលើអាកាសពិតៗ។ បច្ចុប្បន្ន ភ្នំមួយក្នុងចំណោមនោះត្រូវបានគេប្តូរឈ្មោះជា “Avatar Hallelujah Mountain” ទៀតផង។

២. រុក្ខជាតិ និងពន្លឺចាំង (Bioluminescence) នៅ រូងភ្នំ Waitomo Glowworm ប្រទេសនូវែលសេឡង់៖ ប្រសិនបើអ្នកចាំឈុតឆាកដែលព្រៃឈើនៅភព Pandora បញ្ចេញពន្លឺនៅពេលយប់ នោះគឺវាមានលក្ខណៈស្រដៀងនឹង រូងភ្នំ Waitomo ណាស់។ នៅក្នុងរូងភ្នំនេះមានសត្វល្អិតម្យ៉ាង (Glowworms) ដែលបញ្ចេញពន្លឺពណ៌ខៀវស្រងាត់នៅលើជញ្ជាំងរូងភ្នំ ដែលមើលទៅដូចជាមេឃដែលមានផ្កាយរាប់ពាន់ ឬដូចជាព្រៃមន្តអាគមក្នុងរឿងអញ្ចឹងដែរ។

៣. ទឹកធ្លាក់ដ៏ខ្ពស់ នៅទឹកធ្លាក់ Angel Falls ប្រទេសវេណេស៊ុយអេឡា៖ ទឹកធ្លាក់ដ៏ធំដែល Jake និង Neytiri ហោះកាត់ ត្រូវបានបំផុសគំនិតដោយ Angel Falls ដែលជាទឹកធ្លាក់ខ្ពស់ជាងគេបំផុតនៅលើពិភពលោក មានកម្ពស់ ៩៧៩ ម៉ែត្រ។ រូបរាងភ្នំដែលមានផ្ទៃខាងលើរាបស្មើ (Tepuis) នៅតំបន់នោះ ក៏ជាផ្នែកមួយនៃទេសភាពដ៏អស្ចារ្យក្នុងរឿងនេះដែរ។

៤. ដើមឈើវិញ្ញាណ (Tree of Souls) ដើម Wisteria នៅសួនច្បារ Ashikaga ប្រទេសជប៉ុន៖ “ដើមឈើវិញ្ញាណ” ដែលមានមែកធ្លាក់ចុះមកក្រោម និងមានពន្លឺពណ៌ស្វាយ ត្រូវបានគេជឿថាបានដកស្រង់គំរូតាមដើម Wisteria ដ៏ធំនៅក្នុងប្រទេសជប៉ុន។ នៅពេលវាផ្កា មែករបស់វាធ្លាក់ចុះមកក្រោមបង្កើតបានជាទស្សនីយភាពដ៏ស្រស់ស្អាតដូចក្នុងសុបិន។

៥. ព្រៃទឹកភ្លៀង នៅកោះ Kauai រដ្ឋហាវ៉ៃ សហរដ្ឋអាមេរិក៖ សម្រាប់ព្រៃដ៏ក្រាស់ឃ្មឹក និងមានជីវចម្រុះជាច្រើននៅភព Pandora ក្រុមការងារថតរឿងបានយកគំរូតាមព្រៃនៅ កោះ Kauai ។ លោក James Cameron ថែមទាំងបាននាំតួសម្តែងទៅរស់នៅក្នុងព្រៃនោះ ប៉ុន្មានថ្ងៃទៀតផង ដើម្បីឱ្យពួកគេយល់ពីអារម្មណ៍នៃការរស់នៅក្នុងព្រៃមែនទែន៕

តៃវ៉ាន់ ៖ កាលពីចុងខែធ្នូ ឆ្នាំ២០២៥ ចិនបានធ្វើសមយុទ្ធយោធាទ្រង់ទ្រាយធំ ដោយការបា.ញ់មីស៊ីល ដាក់ពង្រាយនាវាចម្បាំង និងយន្តហោះចម្បាំងរាប់សិបគ្រឿងឡោមព័ទ្ធកោះតៃវ៉ាន់ ក្នុងគោលបំណងបង្ហាញសមត្ថភាពរបស់ចិនក្នុងការគ្រប់គ្រងតៃវ៉ាន់ទាំងស្រុង និងជាការព្រមានដល់ប្រទេសនានាដែលចង់ជួយឯករាជ្យតៃវ៉ាន់ ប៉ុន្តែត្រូវបានមេដឹកនាំតៃវ៉ាន់រិះគ.ន់ការធ្វើសមយុទ្ធនេះយ៉ាងខ្លាំង ដោយចាត់ទុកជាការបង្កហេតុ និងប្តេជ្ញាចិត្តការពារអធិបតេយ្យរបស់ខ្លួន ។

ចិនបានបញ្ចប់សមយុទ្ធយោធារយៈពេល២ថ្ងៃ ចាប់ពីថ្ងៃទី២៩ ដល់ថ្ងៃទី៣០ ខែធ្នូ ឆ្នាំ២០២៥ ដោយជោគជ័យ ដែលជាការធ្វើសមយុទ្ធទ្រង់ទ្រាយធំ និងបាញ់គ្រាប់ពិតក្នុងគោលបំណងបិទច្រកសំខាន់ៗ ដែលប្រធានាធិបតីចិន លោក Xi Jinping បានថ្លែងក្នុងសារឆ្នាំថ្មីថា គឺជាការបង្រួបបង្រួមជាតិ និងហៅការធ្វើសមយុទ្ធនេះថា ជានិន្នាការប្រវត្តិសាស្ត្រមិនអាចបញ្ឈប់បាន ។ ភាពតានតឹងកាន់តែខ្លាំងរវាងចិន និងតៃវ៉ាន់ បន្ទាប់ពីអាមេរិកអនុម័តលក់អាវុធយ៉ាងច្រើនឱ្យតៃវ៉ាន់ ដែលរដ្ឋាភិបាលទីក្រុងប៉េកាំងចាត់ទុកជាការរំលោភអធិបតេយ្យ ។

កាលពីថ្ងៃទី១ ខែមករា ប្រធានាធិបតីតៃវ៉ាន់ លោក Lai Ching-te និយាយថា តៃវ៉ាន់ប្តេជ្ញាចិត្តការពារអធិបតេយ្យ និងពង្រឹងសមត្ថភាពការពារខ្លួន ដើម្បីប្រឈមមុខជាមួយការពង្រីកឥទ្ធិពលរបស់ចិន បន្ទាប់ពីរដ្ឋាភិបាលក្រុងប៉េកាំងបញ្ជាឱ្យធ្វើសមយុទ្ធយោធាទ្រង់ទ្រាយធំដោយការបាញ់គ្រាប់ពិតឡោមព័ទ្ធកោះតៃវ៉ាន់ ។ មេដឹកនាំតៃវ៉ាន់និយាយបែបនេះក្នុងអំឡុងពេលថ្លែងសុន្ទរកថាឆ្នាំថ្មី ដែលផ្សាយបន្តផ្ទាល់ពីវិមានប្រធានាធិបតីនៅទីក្រុងតៃប៉ិ ដោយលោកបន្ថែមថា សហគមន៍អន្តរជាតិកំពុងតាមដាន តើពលរដ្ឋតៃវ៉ាន់នឹងប្តេជ្ញាចិត្តការពារខ្លួនឬអត់ ។

ក្នុងនាមជាប្រធានាធិបតីតៃវ៉ាន់ លោក Lai បានបង្ហាញគោលជំហរច្បាស់លាស់ក្នុងការការពារអធិបតេយ្យជាតិយ៉ាងម៉ឺងម៉ាត់ ពង្រឹងការការពារប្រទេស និងថា ការធ្វើសមយុទ្ធយោធាចិនជុំវិញកោះតៃវ៉ាន់ គឺតៃវ៉ាន់ចាំបាច់ត្រូវទិញអាវុធបន្ថែម ។ ក្រៅពីនេះ លោកបានអំពាវនាវឱ្យគណបក្សប្រឆាំងគាំទ្រផែនការបង្កើនថវិកាផ្នែកការពារជាតិបន្ថែម ចំនួន៤ម៉ឺនលានដុល្លារ ដែលបច្ចុប្បន្ន ផែនការនេះជាប់គាំងដោយសារបញ្ហាផ្សេងៗ ដូចជា ៖ ជាប់គាំងនយោបាយព្រោះគណបក្សប្រឆាំងមានសំឡេងភាគច្រើនក្នុងរដ្ឋសភា ។

ឆ្នាំ២០២៦ គឺជាឆ្នាំដ៏សំខាន់បំផុតសម្រាប់តៃវ៉ាន់ ហើយតៃវ៉ាន់ត្រូវរៀបចំផែនការដោះស្រាយស្ថានការណ៍អាក្រក់បំផុត ទន្ទឹមនឹងនេះ យើងក៏មានសង្ឃឹមសម្រាប់រឿងល្អផងដែរ ។ យើងរីករាយចូលរួមផ្លាស់ប្តូរ និងសហការជាមួយចិន ដោយឈរលើមូលដ្ឋានសមភាពនិងកិត្តិយស ដើម្បីលើកកម្ពស់សន្តិភាពនៅច្រកសមុទ្រតៃវ៉ាន់ លុះត្រាតែចិនទទួលស្គាល់ឯករាជ្យតៃវ៉ាន់ និងគោរពឆន្ទៈរបស់ពលរដ្ឋតៃវ៉ាន់ ដែលចង់រស់នៅបែបប្រជាធិបតេយ្យ និងសេរីភាព ។ នេះបើតាមការលើកឡើងរបស់លោក Lai ។

ចិនបញ្ជាក់រហូតមកថា តៃវ៉ាន់ជាទឹកដីមួយផ្នែករបស់ខ្លួន និងមិនច្រាលចោលលទ្ធភាពការប្រើប្រាស់កម្លាំងទ័ពដើម្បីនាំតៃវ៉ាន់មកស្ថិតក្រោមការគ្រប់គ្រង ខណៈតៃវ៉ាន់បដិសេធការអះអាងនេះ ។ ការបង្ហាញកម្លាំងយោធាលើកចុងក្រោយនេះ គឺជាការធ្វើសមយុទ្ធយោធាធំលើកទី៦របស់ចិនចាប់តាំងពីឆ្នាំ២០២២មក ដែលជាការប្រឈមមុខគ្នាញឹកញាប់នៅច្រកសមុទ្រតៃវ៉ាន់ ៕

ប្រទេសចិន ៖ ក្រុមហ៊ុនផលិតរថយន្តអគ្គិសនីដ៏ល្បីល្បាញរបស់ចិន BYD បានលក់រថយន្តអគ្គិសនីច្រើនបំផុតលើពិភពលោកកាលពីឆ្នាំ២០២៥ និងអាចវ៉ាដាច់ Tesla ជាក្រុមហ៊ុនផលិតរថយន្តអគ្គិសនីអាមេរិករបស់លោក Elon Musk ដែលចំនួនការលក់ធ្លាក់ចុះដោយសារនាយកក្រុមហ៊ុនប្រឡូកក្នុងនយោបាយ ។ កាលពីថ្ងៃទី១ ខែមករា ឆ្នាំ២០២៦ BYD ប្រកាសថា ការលក់រថយន្តអគ្គិសនីក្នុងឆ្នាំ២០២៥ បានកើនឡើងជិត២៨% ឬស្មើជាង២លាន ២សែន ៥ម៉ឺនគ្រឿង ។

ចំណែកក្រុមហ៊ុន Tesla របស់លោក Elon Musk កំណត់ការបង្ហាញចំនួនលក់រថយន្តអគ្គិសនីសរុបនៅឆ្នាំ២០២៥ នៅថ្ងៃទី២ ខែមករា ឆ្នាំ២០២៦ ។ កាលពីចុងឆ្នាំ២០២៥ អ្នកវិភាគបានប៉ាន់ស្មានពីចំនួនលក់រថយន្តអគ្គិសនីរបស់ Tesla ថា អាចនឹងលក់រថយន្តបានប្រមាណតែ១លាន ៦សែន ៥ម៉ឺនគ្រឿងប៉ុណ្ណោះ តិចជាងការលក់រថយន្តអគ្គិសនីរបស់ BYD ។

Tesla គឺជាក្រុមហ៊ុនរថយន្តអគ្គិសនីអាមេរិកដែលធ្លាប់លក់រថយន្តបានច្រើនលំដាប់ទី១លើពិភពលោក បានជួបនឹងឧបសគ្គជាច្រើន ទាំងការបញ្ចេញមតិរបស់អតិថិជនពាក់ព័ន្ធនឹងម៉ាករថយន្តថ្មី, ការបារម្ភពីនិន្នាការនយោបាយរបស់លោក Elon Musk ដែលធ្លាប់មានទំនាក់ទំនងជិតស្និទ្ធជាមួយប្រធានាធិបតីអាមេរិក លោក Donald Trump និងប្រកួតប្រជែងយ៉ាងខ្លាំងជាមួយ BYD ជាក្រុមហ៊ុនចិន ។

កាលពីខែតុលា ឆ្នាំ២០២៥ Tesla បានបង្ហាញរថយន្ត២ប្រភេទមានតម្លៃសមរម្យដែលលក់ដាច់បំផុតនៅអាមេរិកដើម្បីជំរុញការលក់រថយន្តរបស់ខ្លួន ខណៈមុននេះ Tesla រងការរិះគន់ថា យឺតយ៉ាវក្នុងការបង្ហាញរថយន្តតម្លៃសមរម្យដើម្បីរក្សាភាពប្រកួតប្រជែង ។ ការលក់រថយន្ត Tesla បានធ្លាក់ចុះយ៉ាងខ្លាំងក្នុងរយៈពេល៣ខែ (ចាប់ពីខែមករា ដល់ខែមីនា ឆ្នាំ២០២៥) បន្ទាប់ពីអតិថិជនកាន់តែច្រើនប្រឆាំងនឹងលោក Elon Musk មានតួនាទីសំខាន់ក្នុងរដ្ឋាភិបាលអាមេរិកក្រោមការដឹកនាំរបស់លោកប្រធានាធិបតី Trump ប៉ុន្តែក្រោយមក Elon Musk បានដើរចេញពីនយោបាយ ។

នេះជាជោគជ័យមួយបង្ហាញពីការរីកចម្រើនយ៉ាងឆាប់រហ័សរបស់ BYD ដែលត្រូវប្រកួតប្រជែងការលក់រថយន្តអគ្គិសនីក្នុងទីផ្សារពិភពលោកនាពេលបច្ចុប្បន្ន ព្រមទាំងបង្ហាញពីភាពរឹងមាំនៃម៉ាករថយន្ត និងយុទ្ធសាស្ត្រទីផ្សារឆ្លើយតបនឹងតម្រូវការរបស់អតិថិជន ។ ភាពជោគជ័យរបស់ BYD ក៏បណ្តាលមកពីក្រុមហ៊ុនបានផលិតរថយន្តជាច្រើនម៉ាក តាំងពីរថយន្តអគ្គិសនីកម្រិតទាប មធ្យម រហូតដល់ទំនើបបំផុត រួមទាំងគ្រប់គ្រងការចំណាយមានប្រសិទ្ធភាព ដែលខុសគ្នាពី Tesla ផ្តោតតែលើការផ្សព្វផ្សាយថយន្តទំនើបក្នុងដំណាក់កាលដំបូង ៕

លោក Pravit Rojanaphruk អតីតអ្នកកាសែតដ៏ឆ្នើម្នាក់របស់ថៃបានលើកឡើងពីការព្រមានរបស់លោកកន្លងមកថា ប្រទេសថៃអាចយកឈ្នះកម្ពុជាក្នុងផ្លូវសង្រ្គា.ម ប៉ុន្តែនឹងចា.ញ់នៅក្នុងក្រសែភ្នែករបស់សហគមន៍អន្តរជាតិថាជាជនអាក្រ.ក់ឈ្លានពានទឹកដីគេ បន្ទាប់ពីមានការរាយការណ៍ពីទីភ្នាក់ងារសារព័ត៌មានធំៗជាបន្តបន្ទាប់ អំពីសកម្មភាពយកបន្លាលួសនិងទូរកង់តេនឺមកបាំងខណ្ឌលើទីតាំងដីដែលមានជម្លោះ។

យោងតាមការបង្ហោះនៅលើបណ្ដាញសង្គមហ្វេសប៊ុក កាលពីថ្ងៃទី១ ខែមករា ឆ្នាំ២០២៦ លោក Pravit បានបង្ហាញពីការកត់សម្គាល់របស់លោកថា ប្រទេសថៃនឹងត្រូវបានគេមើលឃើញថាជាអ្នកឈ្លានពាន ជាជនអាក្រក់ តាមរយៈសេចក្ដីរាយការណ៍ចុងក្រោយបង្អស់ ពីទីភ្នាក់ងារព័ត៌មាន Al Jazeera ដែលជាបណ្តាញទូរទស្សន៍ភាសាអង់គ្លេសឈានមុខគេមួយក្នុងចំណោមបណ្តាញទូរទស្សន៍ឈានមុខគេទាំងបីរបស់ពិភពលោក ។

ក្នុងការរាយការណ៍ព័ត៌មាននោះ អ្នកយកព័ត៌មានរបស់ Al Jazeera បាននិយាយថា៖ ប្រទេសថៃបានប្រើកម្លាំងយោធាដើម្បី «ដណ្តើមយកទឹកដី» នៅកម្ពុជា ដោយមិនបានលើកឡើងពីទឹកដីដែលមានជម្លោះនោះទេ។ ការអះអាងនេះនឹងធ្វើឱ្យអ្នកទស្សនាមានអារម្មណ៍ថា ប្រទេសថៃសព្វថ្ងៃនេះស្រដៀងនឹងប្រទេសមួយនៅមជ្ឈិមបូព៌ាដែលតែងតែប្រយុទ្ធគ្នាដណ្តើមទឹកដី។

បន្ថែមលើអ្វីដែលខ្លួនបានលើកឡើង លោក Pravit បានចោ.ទជាសំណួរថា ហេតុអ្វីបានជាអ្នកយកព័ត៌មានរាយការណ៍ពីរឿងនេះ? តើវាដោយសារតែក្រសួងការបរទេសថៃបរាជ័យក្នុងការធ្វើទំនាក់ទំនង? ឬក៏អន្តរជាតិបានឃើញសភាពការណ៍ជាក់ស្ដែងហើយអស់ជំនឿលើប្រទេសថៃ?
ប៉ុន្តែសព្វថ្ងៃនេះ សង្គមថៃមិនខ្វល់ទេ ពួកគេហាក់កំពុងជាប់គាំងនៅក្នុងអណ្ដូង ពោលគឺជាប់នៅក្នុងសង្គមរបស់មនុស្សញៀនសង្គ្រាម ខ្វះការយល់ដឹង និងមិនខ្វល់ពីរបៀបដែលសហគមន៍អន្តរជាតិគិត ឬមើលឃើញលើប្រទេសថៃឡើយ។ អតីតអ្នកកាសែតឆ្នើមរូបនេះបានសង្កត់ធ្ងន់ថា វាពិតជាមិនសមទាល់តែសោះ ចំពោះការយកកេរ្តិ៍ឈ្មោះប្រទេសមកបំផ្លាញបែបនេះ។

បន្ថែមលើនោះ បើតាមការកត់ចំណាំរបស់លោក Pravit ជនជាតិថៃមួយចំនួន ដែលនៅតែមានវិចារណញាណ អាចបែងចែករវាងអ្វីខុស អ្វីត្រូវ បានសម្ងំពួននៅស្ងៀមស្ងាត់និងធ្វើពុតជាមិនដឹងខ្លួន មិនព្រមហាមាត់និយាយអ្វីឡើយ ប៉ុន្តែពួកគេមិនដឹងទេថា ការធ្វើបែបនេះ គឺពួកគេកំពុងអនុញ្ញាតឱ្យកេរ្តិ៍ឈ្មោះរបស់ប្រទេសថៃដួលរលំនៅចំពោះមុខហើយ ដូច្នេះអ្នកទាំងអស់គ្នាមិនគួរនៅស្ងៀមទៀតទេ។

ទាំងអស់នេះ គឺជាការលើកឡើងរបស់ លោក Pravit Rojanaphruk ដែលធ្វើឡើងក្នុងគោលបំណងដាស់សតិដល់រដ្ឋាភិបាល និងប្រជាជនជ្រុលនិយមរបស់ថៃឲ្យភ្ញាក់ដឹងខ្លួនឡើងវិញ ដ្បិតឥឡូវនេះប្រទេសថៃទាំងមូលកំពុងតែត្រូវបានគ្រប់គ្រងដោយក្រុមមនុស្សដែល«ស្រវឹងសង្រ្គាម» ធ្វើអ្វីៗតាមតែមហិច្ចតាលោ.ភលន់របស់ខ្លួន លែងដឹង លែងខ្វល់ពីកេរ្តិ៍ឈ្មោះប្រទេសនិងសន្តិភាពទៀតហើយ៕

ប្រទេសថៃ ៖ ពលរដ្ឋថៃមានជំនឿមួយប្លែកបំផុត គឺចូលដេកក្នុងមឈូ.សសម្រាប់ដាក់សាកស.ព ដើម្បីបណ្តេញគ្រោះចង្រៃ នាំមកនូវសិរីសួស្តី សំណាងល្អ ជាពិសេស ការដេកក្នុងមឈូ.សក្នុងថ្ងៃចូលឆ្នាំសកល ។ ជាក់ស្តែង កាលពីថ្ងៃទី១ ខែមករា ឆ្នាំ២០២៦ ពលរដ្ឋខេត្តណុនថាក់បុរី បានដង្ហែគ្នាចូលដេកក្នុងមឈូ.សនៅវត្តមួយដើម្បីឱ្យជ្រះចង្រៃ ដែលអ្នកចូលរួមពិធីប្រាប់ថា ការធ្វើបែបនេះមានអារម្មណ៍ថា ស្លា.ប់ហើយកើតឡើងវិញក្លាយជាមនុស្សថ្មី បញ្ចៀសភាពស៊យ និងហេតុការណ៍អាក្រក់ ។

នៅថ្ងៃចូលឆ្នាំសកលនេះ ពលរដ្ឋថៃរាប់ពាន់នាក់ទាំងមនុស្សចាស់ទាំងក្មេងបានធ្វើដំណើរមកកាន់វត្តតាខៀន ខេត្តណុនថាក់បុរី ដើម្បីចូលរួមពិធីដេកក្នុងមឈូស ដែលពិធីនេះរៀបចំដោយព្រះសង្ឃក្នុងគោលបំណងបណ្តេញសំណាងអាក្រក់នៅឆ្នាំថ្មី ។ លើសពីនេះ អ្នកចូលរួនមានជំនឿថា ការដេកក្នុងមឈូសអាចបណ្តេញបណ្តាសា, មានអាយុវែង ហើយជីវិតនឹងជួបតែភាពរុងរឿងពេញមួយឆ្នាំ២០២៦ ។

បរិយាកាសនៅព្រឹកថ្ងៃទី១ ខែមករា នៅវត្តតាខៀន ក្នុងឃុំបាងឃូវៀង ស្រុកបាងក្រួយ ខេត្តណុនថាក់បុរី មានសភាពអ៊ូអរដោយមានមនុស្សម្នារាប់ពាន់នាក់មកពីគ្រប់ទិសទីរង់ចាំចូលរួមពិធីដេកក្នុងមឈូសឱ្យជ្រះចង្រៃ នាំមកនូវលាភសំណាងតាមជំនឿបុរាណ ។ ការដេកក្នុងមឈូស គឺធ្វើពុធជាស្លាប់ដើម្បីឱ្យឆ្លងផុតហេតុការណ៍អាក្រក់ និងបាបកម្មនៅឆ្នាំចាស់ជាមួយរាងកាយបន្លំធ្វើស្លាប់ និងរស់ឡើងវិញពោរពេញដោយភាពស្រស់ថ្លា លាភសំណាងហូរចូល សុខភាពរឹងមាំ ក្នុងឋានៈជាមនុស្សថ្មី ។

ចំណែកការរៀបចំពិធី គឺវត្តតាខៀន បានត្រៀមមឈូសសម្រាប់ពលរដ្ឋមកចូលរួម ដោយមានព្រះសង្ឃសូត្រធម៌ឱ្យអ្នកចូលរួមដេកក្នុងមឈូសជាការរំដោះគ្រោះចង្រៃ បណ្តេញរឿងអពមង្គល ។ បន្ទាប់មក ព្រះសង្ឃក៏សូត្រធម៌ហៅព្រលឹង និងឱ្យពរជ័យ គឺដូចគ្នានឹងមនុស្សទាំងនេះរស់ឡើងវិញមានជីវិតថ្មី ។

គួរបញ្ជាក់ថា មិនមែនមានតែពលរដ្ឋខេត្តណុនថាក់បុរីទេដែលមានជំនឿបែបនេះ ពលរដ្ឋនៅទីក្រុងបាងកក ក៏មានជំនឿដូចគ្នាដែរ ដូចជា កាលពីឆ្នាំ២០២១ ជាពេលជំងឺកូវីដ-១៩ ឆ្លងរាតត្បាត ពលរដ្ឋនៅជាយក្រុងបាងកក បានកាន់បាច់ផ្កាហើយដេកក្នុងមឈូសនៅវត្តមួយកន្លែង ដោយមានកម្រាលពណ៌សគ្របពីលើពេលព្រះសង្ឃសូត្រធម៌ ដើម្បីមានសំណាងល្អ ឬផ្តល់មកនូវការចាប់ផ្តើមជីវិតថ្មី ។ អ្នកចូលរួមត្រូវធ្វើតាមការណែនាំរបស់ព្រះសង្ឃ ដោយដាក់ក្បាលទៅទិសខាងលិចដូចសាកសពត្រូវបញ្ចុះ និងដាក់ក្បាលទៅទិសខាងកើតតំណាងឱ្យកើតជាថ្មី ។

តាមការលើកឡើងរបស់អ្នកចូលរួម ការដែលបានដេកក្នុងមឈូសដូចសាកសព គឺជួយឱ្យមានអារម្មណ៍ស្រស់ថ្លា ឈប់ភ័យខ្លាចនឹងហេតុការណ៍អាក្រក់ផ្សេងៗ ពីព្រោះពេលធ្វើបែបនេះ ប្រៀបបាននឹងការស្លាប់ ហើយពេលក្រោកឡើងមានអារម្មណ៍រស់ឡើងវិញ ក្លាយជាមនុស្សម្នាក់ថ្មី ។ ម្យ៉ាងទៀត បើមានអារម្មណ៍តានតឹង ឬគិតថា ជីវិតកំពុងស្ថិតក្នុងគ្រោះថ្នាក់ ក៏អាចដេកក្នុងមឈូសបានដែរ ដើម្បីឱ្យអារម្មណ៍ធូរស្បើយ ៕