ប្រទេសថៃ ៖ ទឹកជំនន់បានលិចយ៉ាងខ្លាំងនៅខេត្តសុងក្លា ប្រទេសថៃ ជាពិសេស ស្រុកហាតយៃ មានពលរដ្ឋស្លា.ប់រហូតដល់ជិត១០០នាក់ និងបង្កផលប៉ះពាល់ជាច្រើន ដូចជា ៖ ខូចខាតស្ពាន ផ្លូវ អគារ លំនៅឋាន សាលារៀន មន្ទីរពេទ្យ និងតំបន់ពាណិជ្ជកម្ម ខណៈរដ្ឋាភិបាលចាត់វិធានការដោះស្រាយបញ្ហាទឹកជំនន់យឺតយ៉ាវ ភ្នាក់ងារសង្គ្រោះមិនគ្រប់គ្រាន់ ខ្វះខាតឧបករណ៍ និងអាហារចែកឱ្យពលរដ្ឋ ប្រព័ន្ធទំនាក់ទំនងត្រូវកាត់ផ្តាច់ បែរជារដ្ឋាភិបាលថៃមិនព្រមទទួលស្គាល់ការពិត និងថា ការជួយសង្គ្រោះពលរដ្ឋមិនយឺតយ៉ាវទេ នាយករដ្ឋមន្ត្រីថៃចុះពិនិត្យមើលទឹកជំនន់ដោយផ្ទាល់ដើម្បីសម្រាលទុក្ខលំបាកពលរដ្ឋ ។

កាលពីថ្ងៃទី២៧ ខែវិច្ឆិកា ឆ្នាំ២០២៥ សមាជិកសភាគណបក្សប្រជាជន អ្នកស្រី ផាកាម៉ុន ណុនអាណាន់ និយាយថា ស្ថានការណ៍ទឹកជំនន់នៅស្រុកហាតយៃ ខេត្តសុងក្លា មិនទាន់ត្រឡប់មករកសភាពដើមវិញទេ បើទោះជាទឹកជំនន់ស្រកចុះក្តី ប៉ុន្តែរដ្ឋាភិបាលថៃមិនព្រមទទួលស្គាល់ការពិតពីខេត្តសុងក្លារងផលប៉ះពាល់យ៉ាងធ្ងន់ធ្ងរដោយសារទឹកជំនន់ ។ រដ្ឋាភិបាលត្រូវចាត់វិធានការឱ្យតំបន់រងផលប៉ះពាល់ដោយទឹកជំនន់ត្រឡប់មកដូចដើមវិញ ពីព្រោះស្រុកហាតយៃ រងផលប៉ះពាល់ធ្ងន់ធ្ងរជាងគេ ។

ទោះជាថ្ងៃទី២៧ ខែវិច្ឆិកា កម្ពស់ទឹកជំនន់នៅស្រុកហាតយៃស្រុកចុះក៏ដោយ ប៉ុន្តែតំបន់ជាច្រើននៅតែលិចទឹក គ្មានការជួយសង្គ្រោះ គ្មានការអាហារ និងទឹក ។ ពេលទឹកស្រុកវិញ ស្រុកហាតយៃ ខូចខាតយ៉ាងច្រើនមហាសាល ដូច្នេះ រដ្ឋាភិបាលត្រូវចំណាយពេលរៀបចំស្រុកហាតយៃឡើងវិញ យ៉ាងហោចណាស់មិនក្រោមរយៈពេល៦ខែ ទើបពលរដ្ឋអាចរស់នៅធម្មតា ។

សមាជិកសភាគណបក្សប្រជាជន អ្នកស្រី ផាកាម៉ុន សុំឱ្យរដ្ឋាភិបាល និងរដ្ឋមន្ត្រីពាក់ព័ន្ធមកស្នាក់នៅស្រុកហាតយៃចាប់ពី២ថ្ងៃឡើង ដោយជជែកជាមួយពលរដ្ឋរងគ្រោះដោយទឹកជំនន់ដើម្បីឱ្យដឹងពីសភាពស្រុកហាតយៃពេលនេះអាក្រក់ខ្លាំងប៉ុនណា និងកុំឱ្យរដ្ឋាភិបាលចេះតែនិយាយថា ទឹកស្រកហើយ ស្ថានការណ៍ជិតវិលមកធម្មតាវិញ ។ រដ្ឋាភិបាលគួរទទួលស្គាល់ការពិត ពីព្រោះប៉ាន់ស្មានស្ថានការណ៍ខុស ពុំអាចដោះស្រាយបញ្ហាទឹកជំនន់ បើព្រមទទួលស្គាល់ការពិត រដ្ឋាភិបាលនឹងអាចជួយរៀបចំស្រុកហាតយៃឱ្យវិលមកធម្មតាឆាប់ៗ ។

អ្នកស្រីខកបំណងខ្លាំងណាស់ដែលរដ្ឋមន្ត្រីម្នាក់គេចពីអ្នកសារព័ត៌មានក្នុងអំឡុងពេលថ្លែងការណ៍ព័ត៌មានពីស្ថានការណ៍ទឹកជំនន់ ដោយមិនព្រមឆ្លើយសំណួររបស់អ្នកសារព័ត៌មានដែលសួរថា តើរដ្ឋាភិបាលថៃបានដោះស្រាយបញ្ហាទឹកជំនន់នៅភាគខាងត្បូងបែបណាខ្លះ? ការមិនទទួលខុសត្រូវរបស់រដ្ឋាភិបាល តើឱ្យពលរដ្ឋរំពឹងអ្នកណាចាប់ពីថ្ងៃនេះ និងរស់នៅដូចម្តេចក្រោយទឹកស្រក?

ក្រុមមន្ត្រីគណបក្សប្រជាជន និងភ្នាក់ងារស្ម័គ្រចិត្តបានជួយសង្គ្រោះពលរដ្ឋភាគខាងត្បូងនៅតំបន់ដែលគ្មានភ្នាក់ងារសង្គ្រោះចូលដល់ និងស្វែងរកលំនៅឋានដែលសមាជិកគ្រួសារស្លាប់ ដើម្បីយកសាកសពចេញ ។ ក្រៅពីនេះ ក៏ដើរពិនិត្យមើលស្រុកហាតយៃ ឃើញថា មានគំនរសំរាមពាសពេញ ត្រូវចំណាយពេលរៀបចំឡើងវិញប្រមាណ១ខែ ។ នេះជាទុក្ខលំបាករបស់ពលរដ្ឋពេលទឹកស្រក ពលរដ្ឋទើបរួចផុតពីការស្លាប់ក្រោយទឹកជំនន់ជាច្រើនថ្ងៃ ពលរដ្ឋស្រេកឃ្លានខ្លាំង សុខភាពរាងកាយទ្រុឌទ្រោម សុខភាពផ្លូវចិត្តមិនល្អ ទ្រព្យសម្បត្តិខូចខ្ទេចខ្ទី ថែមទាំងបាត់បង់សមាជិកគ្រួសារ ។

ប៉ុន្តែរដ្ឋាភិបាលថៃមិនព្រមទទួលស្គាល់ការពិតពីផលប៉ះពាល់ដោយសារទឹកជំនន់ មិនហ៊ានប្រឈមមុខ និងមិនហ៊ានឆ្លើយសំណួរចាក់ដោតរបស់អ្នកសារព័ត៌មាន ដែលសួរមន្ត្រីរដ្ឋាភិបាលជំនួសពលរដ្ឋ ។ ការមិនទទួលស្គាល់ការពិតបង្កឱ្យមានផលប៉ះពាល់មហាសាល ពីព្រោះភាគខាងត្បូងមិនទាន់ត្រឡប់មកសភាពដើមវិញទេ ។ រដ្ឋាភិបាល និងស្ថាប័នពាក់ព័ន្ធ គួរផ្តល់ប្រាក់សំណងដល់ពលរដ្ឋបាត់បង់ផ្ទះ និងទ្រព្យសម្បត្តិជាបន្ទាន់ ។ បញ្ហាប្រឈមពេលនេះ គឺសំរាមគរដូចភ្នំបណ្តាលឱ្យស្ទះចរាចរណ៍ បរិស្ថានកខ្វក់ចម្លងមេរោគ ប្រសិនបើរដ្ឋាភិបាល និងអាជ្ញាធរមិនដោះស្រាយបញ្ហាភ្លាមៗ ។ នេះបើតាមការលើកឡើងរបស់សមាជិកសភាគណបក្សប្រជាជន ៕

ខេត្តសុងក្លា៖ បន្ទាប់ពីគ្រោះទឹកជំនន់ដ៏កា.ចសា.ហាវបានវា.យប្រហារអស់ជិតមួយសប្ដាហ៍មកនេះ អគ្គស្នងការនគរបាលជាតិរបស់ថៃបានធ្វើការសរុបទិន្នន័យត្រួសៗនៃមនុស្សដែលស្លា.ប់ ថាមានចំនួនជាង ១០០នាក់ហើយ គិតត្រឹមថ្ងៃទី២៧ ខែវិច្ឆិកា ឆ្នាំ២០២៥ ខណៈក្នុងនោះមាន ២០នាក់ នៅមិនទាន់អាចកំណត់អត្តសញ្ញាណបាន។ នេះបើយោងតាមការចុះផ្សាយរបស់សារព័ត៌មាន The Nation។

បើតាមសេចក្តីថ្លែងការណ៍ជាសាធារណៈមន្ទីរពេទ្យ Nakarin គឺសា.កស.ពមួយចំនួនធំ បានស្លា.ប់ដោយសារតែទឹកជំនន់ដ៏ធំនៅហាតយ៉ៃ (Hat Yai) ខេត្តសុងក្លា( Songkhla)ភាគខាងត្បូងប្រទេសថៃ។ យ៉ាងណាខាងមន្ទីរពេទ្យបញ្ជាក់ថា ខ្លួនមិនទាន់អាចប្រគល់សាកសពទៅឱ្យក្រុមគ្រួសារវិញបានភ្លាមៗទេ ព្រោះត្រូវការផ្ទៀងផ្ទាត់អត្តសញ្ញាណឱ្យបានច្បាស់លាស់ ដើម្បីធានាបាននូវភាពត្រឹមត្រូវ និងជៀសវាងកំហុសឆ្គងណាមួយក្នុងការប្រគល់សា.កសព។

ខណៈស្ថានភាពទឹកជំនន់បានស្រកថមថយទៅវិញនៅតំបន់ជុំវិញនៃខេត្តសុងក្លា លោកឧត្តមសេនីយ៍ឯក Trairong Phiewphan អគ្គស្នងការរងនគរបាលជាតិថៃ បានបង្ហាញថា ជនរងគ្រោះដែលបានស្លា.ប់ហើយត្រូវបានរកឃើញមានចំនួនសរុប ១០៤ នាក់ហើយ ប៉ុន្តែនៅសល់ចំនួន ២០នាក់ដែលមិនទាន់អាចកំណត់អត្តសញ្ញាណ និងស្វែងរកសាច់ញាតិបាននៅឡើយ។

ជាមួយគ្នានេះ លោក Siripong Angkasakulkiat អ្នកនាំពាក្យមជ្ឈមណ្ឌលប្រតិបត្តិការស្ថានភាពទឹកជំនន់បន្ទាន់ជួរមុខ បានប្រកាសថា រដ្ឋាភិបាលថៃសម្រេចថានឹងផ្ដល់សំណងជូនទៅកាន់ជនរងគ្រោះដែលស្លា.ប់ទាំងអស់ចំនួន ២លានបាត (៦ មុឺនដុល្លារអាមេរិក) ក្នុងម្នាក់។

តែទោះជាយ៉ាងណា រដ្ឋាភិបាលទីក្រុងបាងកកដែលដឹកនាំដោយនាយករដ្ឋមន្រ្តីអនុទី នៅតែត្រូវទទួលរងសម្ពាធយ៉ាងខ្លាំងពីប្រជាជន និងគណបក្សប្រឆាំងដដែល ដោយពួកគេបានស្ដីបន្ទោសថា រដ្ឋាភិបាលរបស់លោកគ្មានសមត្ថភាពទប់ស្កាត់គ្រោះមហន្តរាយ និងបរាជ័យក្នុងការដោះស្រាយបញ្ហា។

គួរបញ្ជាក់ថា ក្រៅពីមានមនុស្សស្លា.ប់ច្រើនបែបនេះ គ្រោះទឹកជំនន់នៅភាគខាងត្បូងរបស់ថៃក៏បានបំផ្លិចបំផ្លា.ញទ្រព្យសម្បត្តិទាំងរដ្ឋ និងឯកជនអស់រាប់រាប់ពាន់លានបាតផងដែរ។ បើយោងតាមរបាយការណ៍របស់ក្រសួងមហាផ្ទៃ ទឹកជំនន់នេះបានបំផ្លិចបំផ្លាញផ្ទះសម្បែងជាង៩៨០.០០០ខ្នង និងបានប៉ះពាល់ដល់មនុស្ស២,៧ លាននាក់ក្នុងប្រទេសថៃ ដែលខណៈនេះកំពុងត្រូវការជម្រក ស្បៀងអាហារ និងសម្ភារៈប្រើប្រាស់យ៉ាងខ្លាំង បើទោះជាទឹកបានស្រកទៅវិញអស់ខ្លះហើយក៏ដោយ៕

ប្រធានាធិបតីអាមេរិក លោក Donald Trump បានដាស់តឿននាយករដ្ឋមន្ត្រីថ្មីជប៉ុន លោកស្រី Sanae Takaichi ឈប់និយាយប៉ះពាល់ចិនពាក់ព័ន្ធនឹងឯករាជ្យតៃវ៉ាន់ ក្រោយកើតស្ថានការណ៍តានតឹងរវាងចិននិងជប៉ុន ដោយសារតែពាក្យសម្តីរបស់នាយករដ្ឋមន្ត្រីជប៉ុនថា អាចនឹងបញ្ជូនកងទ័ពទៅជួយការពារតៃវ៉ាន់ ប្រសិនបើរងការវាយប្រ.ហារពីចិន ។ ការលើកឡើងបែបនេះធ្វើឱ្យរដ្ឋាភិបាលចិនមិនពេញចិត្តយ៉ាងខ្លាំង រហូតដល់ចាត់វិធានការឆ្លើយតបវិញជាច្រើនដើម្បីទម្លាក់សេដ្ឋកិច្ចជប៉ុន ។ នេះបើតាមការចុះផ្សាយរបស់សារព័ត៌មានបរទេសនៅថ្ងៃទី២៧ ខែវិច្ឆិកា ឆ្នាំ២០២៥ ។

រដ្ឋាភិបាលចិនចាត់ទុកពាក្យសម្តីរបស់នាយករដ្ឋមន្ត្រីជប៉ុន គឺជាកំហុសដ៏ធ្ងន់ធ្ងរ និងធ្វើឱ្យទំនាក់ទំនងការទូតរវាងចិន-ជប៉ុនធ្លាក់ចុះ ដោយចិនអំពាវនាវឱ្យនាយករដ្ឋមន្ត្រីជប៉ុនដកពាក្យសម្តីរបស់ខ្លួនជាបន្ទាន់ បើមិនដូច្នោះទេ ជប៉ុននឹងទទួលលទ្ធផលតបស្នងមិនខាន ។ លើសពីនេះ ចិនថែមទាំងចាត់វិធានការជាច្រើនដើម្បីឱ្យសេដ្ឋកិច្ចជប៉ុនធ្លាក់ចុះ ដូចជា ៖ ហាមពលរដ្ឋចិនធ្វើដំណើរទៅជប៉ុន ផ្អាកនាំចូលគ្រឿងសមុទ្រជប៉ុន ពហិការភាពយន្តជប៉ុន រហូតដល់កំណត់ឱ្យក្រុមហ៊ុនអាកាសចរណ៍នានាកាត់បន្ថយការហោះហើរទៅជប៉ុន រហូតដល់ខែមីនា ឆ្នាំ២០២៦ ។

បើទោះជារងការរិះគន់ពីរដ្ឋាភិបាលចិនយ៉ាងណាក៏ដោយ ក៏នាយករដ្ឋមន្ត្រីជប៉ុន លោកស្រី Sanae Takaichi នៅតែមិនព្រមដកពាក្យសម្តីវិញ ដោយលោកស្រីថា ជប៉ុននឹងប្រើប្រាស់សិទ្ធិការពារខ្លួន និងការពារតៃវ៉ាន់ពីការវាយប្រហារ ។ ពាក្យសម្តីរបស់លោកស្រីបង្កឱ្យមានជម្លោះការទូតជាមួយចិនយ៉ាងខ្លាំងក្លា ខណៈរដ្ឋាភិបាលជប៉ុនបញ្ជាក់ថា ពាក្យសម្តីនេះ គឺជាគោលជំហរដ៏យូរអង្វែងរបស់ជប៉ុន ។

កាលពីថ្ងៃទី២៥ ខែវិច្ឆិកា លោកប្រធានាធិបតី Trump បានជជែកតាមទូរស័ព្ទជាមួយប្រធានាធិបតីចិន លោក Xi Jinping ហើយលោក Xi បញ្ជាក់ថា តៃវ៉ាន់ត្រូវតែបង្រួបបង្រួមទឹកដីជាមួយចិនវិញ ។ បន្ទាប់មក លោកប្រធានាធិបតី Trump ក៏ទូរស័ព្ទទៅកាន់នាយករដ្ឋមន្ត្រីជប៉ុន លោកស្រី Sanae Takaichi និងដាស់តឿនកុំឱ្យលោកស្រីនិយាយប៉ះពាល់ ឬបង្កហេតុជាមួយចិនពាក់ព័ន្ធនឹងឯករាជ្យតៃវ៉ាន់ ដែលនាំឱ្យស្ថានការណ៍ជម្លោះកាន់តែអាក្រក់ខ្លាំងឡើង ។ នេះជាការអះអាងរបស់មន្ត្រីជប៉ុន និងអាមេរិក ។

ទោះយ៉ាងណា លោកប្រធានាធិបតី Trump បានដាស់តឿននាយករដ្ឋមន្ត្រីជប៉ុនជាលក្ខណៈមិត្តភាព និងមិនបានដាក់សម្ពាធឱ្យនាយករដ្ឋមន្ត្រីជប៉ុនដកពាក្យសម្តីវិញទេ ប៉ុន្តែលោកប្រធានាធិបតី Trump មិនចង់ឱ្យជប៉ុនដែលជាមិត្តជិតស្និទ្ធជាមួយអាមេរិក មានជម្លោះជាមួយចិន ។ លោក Trump ព្យាយាមឱ្យទំនាក់ទំនងចិន-ជប៉ុនត្រឡប់មកដូចមុនវិញ ខណៈអាមេរិកកំពុងចរចាបញ្ចប់ជម្លោះពាណិជ្ជកម្មជាមួយចិន ។ កាសែតបក្សកុម្មុយនិស្តចិនចុះផ្សាយនៅថ្ងៃទី២៧ ខែវិច្ឆិកា ថា ចិនអំពាវនាវឱ្យអាមេរិកទប់ស្កាត់ជប៉ុន កុំឱ្យបញ្ជូនកងទ័ពមកជួយតៃវ៉ាន់ ដែលជាទឹកដីមួយផ្នែករបស់ចិន ។

សារព័ត៌មាន AFP បានទាក់ទងទៅរដ្ឋាភិបាលជប៉ុនដើម្បីសាកសួរព័ត៌មានពីការជជែកតាមទូរស័ព្ទរវាងលោកស្រី Sanae Takaichi នាយករដ្ឋមន្ត្រីជប៉ុន ជាមួយលោកប្រធានាធិបតី Trump ប៉ុន្តែត្រូវបានអ្នកនាំពាក្យរដ្ឋាភិបាលជប៉ុនបដិសេធមិននិយាយអ្វីពាក់ព័ន្ធនឹងរឿងនេះ ៕

ប្រព័ន្ធផ្សព្វផ្សាយ Chosun បានរាយការណ៍នៅថ្ងៃទី២៧ ខែវិច្ឆិកា នេះថាបន្ទាប់ពីអគ្គីភ័យដ៏ធំមួយបានឆាបឆេះអគារផ្ទះល្វែងមួយក្នុងទីក្រុងហុងកុងកម្មវិធីប្រគល់ពានរង្វាន់ MAMA 2025 ដែលជាព្រឹត្តិការណ៍តន្ត្រី K-Pop នឹងប្រព្រឹត្តទៅតាមការគ្រោងទុក។ យ៉ាងណាមិញ ពិធីនេះនឹងត្រូវបានប្រារព្ធឡើងក្នុងបរិយាកាសស្ងប់ស្ងាត់ជាងការគ្រោងទុកពីមុន។

យោងតាមនាយកដ្ឋានពន្លត់អគ្គីភ័យហុងកុងនៅថ្ងៃទី ២៧ ខែវិច្ឆិកា អគ្គីភ័យបានរលត់ទៅវិញនៅវេលាម៉ោង ២:៥២ រសៀល រហូតមកដល់ពេលនេះមនុស្សយ៉ាងតិច ៤៤ នាក់បានស្លាប់ និង ២៧៩ នាក់កំពុងបាត់ខ្លួន ហើយចំនួនអ្នកស្លាប់ និងរបួសត្រូវបានគេរំពឹងថានឹងបន្តកើនឡើង។ អគារផ្ទះល្វែងដែលអគ្គីភ័យបានឆាបឆេះនៅតំបន់ Tai Po មានចម្ងាយប្រហែល ២០ គីឡូម៉ែត្រពីកីឡដ្ឋាន Kai Tak ដែលជាកន្លែង «ពានរង្វាន់ MAMA ឆ្នាំ ២០២៥» គ្រោងនឹងប្រារព្ធឡើងនៅថ្ងៃទី ២៨-២៩ ខែវិច្ឆិកា ស្មើនឹងប្រហែល ២០ នាទីធ្វើដំណើរដោយរថយន្ត។

ចំពេលបរិយាកាសកាន់ទុក្ខ អ្នកគាំទ្រ K-pop ជាច្រើនបានសម្តែងការព្រួយបារម្ភ និងបាននិយាយថា ពិធីប្រគល់ពានរង្វាន់អាចត្រូវបានលុបចោល ឬពន្យារពេល។ CJ ENM អ្នករៀបចំកម្មវិធី MAMA Awards បច្ចុប្បន្នស្ថិតក្នុងស្ថានភាពលំបាកព្រោះក្រុមជាច្រើនដូចជា Stray Kids, IVE, (G)I-DLE, ENHYPEN, TXT, NCT WISH… បានចេញដំណើរទៅកាន់ទីក្រុងហុងកុងដើម្បីចូលរួមពិធីប្រគល់រង្វាន់នៅឆ្នាំនេះ។
អ្នករៀបចំកម្មវិធីក៏ត្រូវបានគេនិយាយថាកំពុងពិចារណាលើការចូលរួមរបស់តារាដែលត្រូវបានគេរំពឹងថានឹងបង្ហាញពានរង្វាន់ដូចជា Chow Yun Fat និង Michelle Yeoh ។

ទោះបីជាពិធីប្រគល់ពានរង្វាន់ត្រូវបានបង្ខំឱ្យដំណើរការដូចការគ្រោងទុកក៏ដោយ ស្គ្រីប និងឆាកនឹងត្រូវកែសម្រួលយ៉ាងខ្លាំង ដែលនាំឱ្យមានការរំខានជាច្រើន។ ជាពិសេស អ្នករៀបចំកំពុងពិនិត្យយ៉ាងយកចិត្តទុកដាក់ ដើម្បីលុបបំបាត់ព័ត៌មានលម្អិតនៃដំណាក់កាលដែលទាក់ទងនឹង «ភ្លើង»៕

ប្រទេសថៃ៖ ក្រោយមេបញ្ជាការទាំងទ័ពជើងគោក ជើងទឹក និងអាកាសថៃ ទើបប្រកាសក្ដែងៗថា ខ្លួនបានត្រៀមនាវា យន្តហោះចម្បាំង និងកម្លាំងទាហាន ដើម្បីត្រៀមខ្លួនប្រយុទ្ធរួចស្រេចនោះ ពេលនេះស្រាប់តែត្រូវបង្ខំចិត្តដកកម្លាំងទាំងនោះទៅទប់ទល់នឹងបញ្ហាទឹកជំនន់ដើម្បីជួយសង្គ្រោះប្រជាជនវិញ។

យោងតាមទីភ្នាក់ងារសារព័ត៌មានក្នុងស្រុករបស់ថៃ នៅថ្ងៃទី២៧ ខែវិច្ឆិកា ឆ្នាំ២០២៥នេះ បានឲ្យដឹងថា កងទ័ពភូមិន្ទថៃ បានបញ្ជាឲ្យបញ្ជូនកងទ័ពនៅតាមព្រំដែនជាច្រើនទៅកាន់ចូលរួមប្រតិបត្តិការនៅតាមតំបន់ដែលរង់គ្រោះដោយសារទឹកជំនន់ និងធ្វើការជម្លៀសប្រជាជន។

តាមរបាយការណ៍ដែលបានបង្ហាញ អង្គភាពយោធាដែលមកពីទូទាំងប្រទេស នឹងត្រូវបានដាក់ពង្រាយដើម្បីសកម្មភាពជម្លៀស ការចែកចាយសម្ភារៈសង្គ្រោះបន្ទាន់ និងគាំទ្រដល់កិច្ចខិតខំប្រឹងប្រែងគ្រប់គ្រងទឹកជំនន់។ ជាមួយគ្នានេះ ឡានដឹកទំនិញធំៗ ទូក និងឧទ្ធម្ភាគចក្រជាច្រើនគ្រឿងក៏កំពុងត្រូវបានប្រើប្រាស់ដើម្បីទៅដល់សហគមន៍ដាច់ស្រយាល ដើម្បីដឹកជញ្ជូនអ្នកជំងឺ ទារកទើបនឹងកើត និងអ្នកស្រុកងាយរងគ្រោះផ្សេងទៀតទៅកាន់ទីតាំងដែលមានសុវត្ថិភាព។ កងកម្លាំងប្រដាប់អាវុធក៏បានបង្កើតមជ្ឈមណ្ឌលបញ្ជាការជួរមុខដើម្បីសម្របសម្រួលប្រតិបត្តិការជួយសង្គ្រោះ 24 ម៉ោងផងដែរ។

បន្ថែមលើនោះ កងទ័ពជើងទឹករបស់ថៃ បានប្រកាសថានឹងប្រើប្រាស់នាវាចម្បាំង និងឧទ្ធម្ភាគចក្រសម្រាប់ចល័តកងកម្លាំង ដើម្បីជួយសង្គ្រោះប្រជាជន ដែលកំពុងជាប់គាំងដោយសារទឹកជំនន់ដ៏សាហាវនៅបណ្តាខេត្តភាគខាងត្បូងប្រទេសថៃ ក្រោយផ្ទះរបស់ពួកគេរងការជន់លិចយ៉ាងអាណោចអាធ័ម។

បើតាមការបញ្ជាក់របស់ឧត្តមនាវីឯក Parat Rattanachaiphan អ្នកនាំពាក្យកងទ័ពជើងទឹកថៃ បានបញ្ជាក់នៅថ្ងៃទី២៥ ខែវិច្ឆិកាថា កងទ័ពជើងទឹកបានដាក់ពង្រាយនាវាចម្បាំងដ៏ធំមួយគ្រឿង ឧទ្ធម្ភាគចក្រចំនួន២គ្រឿង និងអង្គភាពប្រតិបត្តិការពិសេស ដើម្បីផ្តល់ជំនួយដល់ពលរដ្ឋនៅតំបន់ភាគខាងត្បូង ដែលរងផលប៉ះពាល់ខ្លាំងដោយសារទឹកជំនន់។

ទន្ទឹមនឹងនេះ កងទ័ពជើងទឹកថៃ ក៏បានរៀបចំដាក់ពង្រាយនាវាចម្បាំង HTMS Chang និង HTMS Ang Thong និងបានបញ្ជូនអង្គភាពប្រតិបត្តិការពិសេសមួយរួមជាមួយទូកកៅស៊ូចំនួន១៤គ្រឿង និងបុគ្គលិកមកពីបញ្ជាការដ្ឋានសង្គ្រាមពិសេសកងទ័ពជើងទឹក ដើម្បីជួយប្រជាជនដែលជាប់គាំងនៅក្នុងតំបន់ ដែលមានចរន្តទឹកហូរខ្លាំងផងដែរ។

គួរជម្រាបថា ស្ថានភាពទឹកជំនន់នៅតំបន់ភាគខាងត្បូងរបស់ថៃ ជាពិសេសក្នុងស្រុកហាតយៃ ខេត្តសុងក្លា គិតត្រឹមថ្ងៃទី២៧ ខែវិច្ឆិកានេះ គឺកម្ពស់ទឹកបានស្រកចុះក្នុងតំបន់មួយចំនួន ប៉ុន្តែនៅមានតំបន់ជាច្រើនទៀត ដែលនៅតែរងជន់លិចដដែល ហើយនៅក្នុងនោះក៏នៅសល់ប្រជាជនជាច្រើននាក់កំពុងរង់ចាំការជួយសង្គ្រោះ៕