រាជធានីឡុងដ៍៖ ស្របពេលបណ្ដាប្រទេសបស្ចិមលោកមួយចំនួន កំពុងតែត្រៀមខ្លួន បញ្ជូនរថក្រោះរបស់អាល្លឺម៉ង់ ទៅជួយដល់អ៊ុយក្រែន នោះ រដ្ឋមន្រ្ដីក្រសួងការពារជាតិចក្រភពអង់គ្លេស ក៏បានបង្ហាញនូវការរិះគន់យ៉ាងខ្លាំង ដល់ប្រទេសមហាសេដ្ឋកិច្ចកំពូលរបស់អឺរ៉ុបមួយនេះ ជុំវិញភាពស្ទាក់ស្ទើររបស់ក្រុងប៊ែរឡាំង នៅក្នុងការបញ្ជូនរថក្រោះដ៏ទំនើប ទៅជួយដល់ក្រុងកៀវ។

សារព័ត៌មាន Telegraph របស់ចក្រភពអង់គ្លេស បានចេញផ្សាយ កាលពីថ្ងៃចន្ទ ទី១៦ ខែមករា ថា លោក បែន វ៉ាលឡេស (Ben Wallace) រដ្ឋមន្រ្ដី ក្រសួងការពារជាតិចក្រភពអង់គ្លេស បានចូលរួមអំពាវនាវដល់ក្រុងប៊ែរឡាំង សុំឲ្យបញ្ជូនរថក្រោះដ៏ទំនើប Leopard II (ឡេអូផាដ ២) ផលិតនៅក្នុងប្រទេសអាល្លឺម៉ង់ បញ្ជូនទៅកាន់អ៊ុយក្រែន។ ការអំពាវនាវរបស់លោករដ្ឋមន្រ្ដី បានកើតឡើង ស្របពេលចក្រភពអង់គ្លេស បានប្រកាសផ្ដល់ជំនួយយោធាថ្មី ជួយដល់ក្រុងកៀវ។

លោករដ្ឋមន្រ្ដីក្រសួងការពារជាតិចក្រភពអង់គ្លេស បានចូលរួមចុះបញ្ជីឈ្មោះ សម្រាប់ការអំពាវនាវ ដល់ប្រទេសអាល្លឺម៉ង់ ដើម្បីអនុញ្ញាត ដល់បណ្ដាប្រទេសផ្សេងៗទៀត បញ្ជូនរថក្រោះ Leopard II ទៅកាន់ប្រទេសអ៊ុយក្រែន។ ជាមួយនឹងការអំពាវនាវនោះ លោក Ben Wallace ថែមទាំងបានជំរុញឲ្យក្រុងប៊ែរឡាំង បើកភ្លើងខៀវ អនុញ្ញាតដល់រថក្រោះ Leopard II ត្រូវបរិច្ចាគ ជួយដល់អ៊ុយក្រែន។

ស្របគ្នានេះដែរ ប្រមុខការពារជាតិចក្រភពអង់គ្លេស បានបញ្ជាក់ ថា ក្រុងឡុងដ៍ បានសន្យាផ្ដល់រថក្រោះ ប្រភេទ Challenger 2 ចំនួន១៤គ្រឿង និង ប្រព័ន្ធកាំភ្លើងធំបាញ់ ចម្ងាយឆ្ងាយ ជួយដល់អ៊ុយក្រែន។ ជំនួយយោធារបស់បស្ចិមលោក នឹងជួយដល់ក្រុងកៀវ ឲ្យឆាប់ទទួលបានជ័យជម្នះ។

ទន្ទឹមនឹងការផ្ដល់រថក្រោះ និង កាំភ្លើងធំ AS-90 នោះ លោក Wallace បានសន្យា ថា គ្រាប់រ៉ុក្កែតណែនាំផ្លូវជាក់លាក់ រាប់រយគ្រាប់ និង គ្រាប់សម្រាប់ប្រព័ន្ធការពារដែនអាកាស នឹងត្រូវបានបញ្ជូន ក៏ដូចជា ការចំណាយលុយ ចំនួន២០លានផោន (លុយអង់គ្លេស) ឬស្មើនឹងប្រហែលជាង២៤,៣លានដុល្លារសហរដ្ឋអាមេរិក សម្រាប់ទិញយន្តហោះគ្មានមនុស្សបើក ឬដ្រូន នាំទៅផ្គត់ផ្គង់ ដល់កងទ័ពការពារទឹកដីអ៊ុយក្រែន។

លោករដ្ឋមន្រ្ដីក្រសួងពារជាតិ បានសង្កត់ធ្ងន់ ថា កញ្ចប់ជំនួយយោធាទាំងនេះ ត្រូវគេរំពឹង ថានឹងត្រូវពង្រឹង ដោយគ្រឿងបរិក្ខារ មកពីប្រទេសផ្សេងៗទៀត។ នេះមានន័យ ថា អ៊ុយក្រែន អាចវាយបក និង ទប់ទល់ រហូតឈានដល់ការបណ្តេញកម្លាំងទាហានរុស្ស៊ី ចេញអស់ពីប្រទេស»។

ថ្លែងទៅកាន់រដ្ឋសភា លោករដ្ឋមន្រ្ដី បានទទួលស្គាល់ អំពីការវាយប្រយុទ្ធគ្នាយ៉ាងខ្លាំង នៅក្នុងរយៈពេល៤សប្ដាហ៍កន្លងមកនេះ។ ចំណែកទាហានរុស្ស៊ី នៅតែបន្ដវាយប្រហារ ប្រឆាំងនឹងហេដ្ឋារចនាសម្ព័ន្ធស៊ីវិល នៅក្នុងប្រទេសអ៊ុយក្រែន។

ជាមួយនឹងការអំពាវនាវនេះ លោករដ្ឋមន្រ្ដីក្រសួងការពារជាតិចក្រភពអង់គ្លេស ក៏បានរិះគន់ដល់ភាពស្ទាក់ស្ទើររបស់អាល្លឺម៉ង់ នៅក្នុងការបញ្ជូនរថក្រោះ ផលិតនៅក្នុងប្រទេសមួយនេះ សម្រាប់ជួយដល់ប្រទេសអ៊ុយក្រែន។ លោករដ្ឋមន្រ្ដី បានជំរុញដល់ក្រុងប៊ែរឡាំង ជាអ្នកផលិតរថក្រោះ ត្រូវផ្ដល់ការអនុញ្ញាតដ៏ចាំបាច់ សម្រាប់ធ្វើឲ្យប្រទេសចំនួន១៤ផ្សេងទៀត ដែលប្រើប្រាស់រថក្រោះ Leopard II អាចបញ្ជូនទៅឲ្យក្រុងកៀវ វាយបណ្ដេញទាហានរុស្ស៊ី ឲ្យចេញពីប្រទេសរបស់ពួកគេ៕

បរទេស៖ ក្រោយពីមានករណីនៃការធ្លាក់យន្តហោះ Yeti Airlines ដែលបានសម្លាប់មនុស្សចំនួន៧០នាក់នៅក្នុងប្រទេសនេប៉ាល់ កាលពីថ្ងៃទី ១៥ ខែមករា ឆ្នាំ២០២៣កន្លងទៅនេះបានធ្វើឱ្យពិភពលោកមានការភ្ញាក់ផ្អើលជាខ្លាំងជាមួយនិងឧបទ្ទវហេតុដ៏រន្ធត់នេះ។

ទោះជាយ៉ាងណាបញ្ហានៃគ្រោះថ្នាក់នេះមិនមែនជាលើកទីមួយសម្រាប់ប្រទេសមួយនេះ ដោយសារតែហានិភ័យនៃគ្រោះថ្នាក់យន្តហោះហាក់ដូចជាខ្ពស់ជាងគេសម្រាប់ប្រទេសនេប៉ាល់ ដែលត្រូវបានគេទទួលស្គាល់ថាជា “ប្រទេសគ្រោះថ្នាក់បំផុតរបស់ពិភពលោកដែលមានហានិភ័យធ្លាក់យន្តហោះខ្លាំង បំផុតក្នុងពិភពលោក។

ពិតណាស់ឧស្សាហកម្មអាកាសចរណ៍របស់នេប៉ាល់បានរីកចម្រើនក្នុងប៉ុន្មានឆ្នាំចុងក្រោយនេះ ប៉ុន្តែក្ដី បារម្ភពីសុវត្ថិភាពដោយសារតែខ្វះការហ្វឹកហ្វឺន និង ក្រុមហ៊ុនអាកាសចរណ៍នេប៉ាល់ភាគច្រើនខ្វះសមត្ថភាពថែទាំយន្តហោះហើយជារឿយៗតែងប្រើម៉ាស៊ីនដែលមានអាយុកាលសេវាកម្មយូរ បង្កើនហានិភ័យបំផុត។

លើសពីនេះអ្នកជំនាញបញ្ជាក់ថា កត្តាដែលរួមចំណែកញឹកញាប់ក្នុងការធ្លាក់យន្តហោះនៅប្រទេសនេប៉ាល់ គឺអាកាសធាតុមិនល្អ បណ្ដាលឱ្យការមើលឃើញទាប និងភាគច្រើនប្រទេសនេះជាតំបន់ភ្នំ ដោយនៅលើពិភពលោកមានភ្នំខ្ពស់បំផុតចំនួន ១៤ ដែលក្នុងនោះមាន ៨ ភ្នំទៅហើយដែលមានទីតាំងនៅប្រទេសនេប៉ាល់ ក្នុងនោះរួមទាំងភ្នំ Everest ដោយភ្នំទាំងនេះធ្វើឲ្យអាកាសយានិកពិបាកក្នុងការធ្វើដំណើរ ជាពិសេសក្នុងអំឡុងពេលអាកាសធាតុអាក្រក់ រហូតបណ្ដាលឱ្យយ៉ាងហោចណាស់នឹងមានការធ្លាក់យន្តហោះមួយ ស្ទើរតែរៀងរាល់ឆ្នាំនៅក្នុងប្រទេសមួយនេះ។

បញ្ហានេះបានធ្វើឱ្យសហភាពអឺរ៉ុបហាមឃាត់ក្រុមហ៊ុនអាកាសចរណ៍របស់នេប៉ាល់ទាំងអស់មិនឱ្យហោះហើរចូលទៅក្នុងដែនអាកាសរបស់ខ្លួនដោយសារតែការព្រួយបារម្ភអំពីសុវត្ថិភាព។

ទាក់ទងនិងនឹងហានីភ័យខាងលើ របាយការពិភពលោកបានបង្ហាញឱ្យដឹងថា បើរាប់ចាប់តាំងពីឆ្នាំ ២០០០ មកមានការធ្លាក់យន្តហោះនៅនេប៉ាល់ចំនួន ១៨ ដង ដែលមានអ្នកស្លាប់សរុបជាង ៣៤០ នា

ក់។

ដោយការធ្លាក់យន្តហោះចំនួន ១៨ ដងនោះរួមមានៈ

ថ្ងៃទី ២៧ ខែកក្កដា ឆ្នាំ ២០០០ – យន្តហោះ Royal Nepal Airlines បានធ្លាក់នៅភាគខាងលិចប្រទេសនេប៉ាល់ អ្នកស្លាប់ ២៥ នាក់។

ថ្ងៃទី ១៧ ខែកក្កដាឆ្នាំ ២០០២ – ធ្លាក់យន្តហោះនៅភាគខាងលិចប្រទេសនេប៉ាល់សម្លាប់មនុស្ស ៤ នាក់។

ថ្ងៃទី ២២ ខែសីហា ឆ្នាំ ២០០២ – យន្តហោះ Shangri La Air បានធ្លាក់នៅលើភ្នំ ស្លាប់១៨នាក់។

ថ្ងៃទី ២៥ ខែឧសភាឆ្នាំ ២០០៤ – យន្តហោះដឹកទំនិញរបស់ក្រុមហ៊ុនអាកាសចរណ៍ Yeti សមាជិកនាវិក ៣ នាក់ត្រូវបានសម្លាប់

ថ្ងៃទី ២១ ខែមិថុនា ឆ្នាំ ២០០៦ – យន្តហោះ Yeti Airlines បានធ្លាក់មុនពេលចុះចត ស្លាប់៩នាក់។

ថ្ងៃទី ៤ ខែមីនា ឆ្នាំ ២០០៨ – ការធ្លាក់ឧទ្ធម្ភាគចក្របានសម្លាប់មនុស្ស ១០ នាក់ក្នុងនោះ ៤ នាក់ជាបុគ្គលិកអង្គការសហប្រជាជាតិ។

ថ្ងៃទី ៨ ខែតុលា ឆ្នាំ ២០០៨ដូចគ្នា – យន្តហោះតូចមួយបានធ្លាក់នៅភាគឦសានប្រទេសនេប៉ាល់  យ៉ាងហោចណាស់មនុស្ស ១៨ នាក់បានស្លាប់។

ថ្ងៃទី ២៤ ខែសីហាឆ្នាំ ២០១០ – យន្តហោះធុនតូច Agni Air បានធ្លាក់ដោយសម្លាប់មនុស្ស ១៤ នាក់។

ថ្ងៃទី ១៦ ខែធ្នូឆ្នាំ ២០១០ – យន្តហោះតូចមួយបានធ្លាក់ចូលទៅក្នុងជើងភ្នំហិម៉ាឡៃយ៉ា អ្នកស្លាប់ចំនួន២២នាក់។

ថ្ងៃទី ២៥ ខែកញ្ញាឆ្នាំ ២០១១ – យន្តហោះតូចមួយបានធ្លាក់នៅជិតរដ្ឋធានីនៃប្រទេសនេប៉ាល់ មនុស្ស ១៩ នាក់បានស្លាប់។

ថ្ងៃទី ២៨ ខែកញ្ញាឆ្នាំ ២០១២ – យន្តហោះ propeller បានធ្លាក់ សម្លាប់មនុស្ស ១៩នាក់។

ថ្ងៃទី ១៦ ខែកុម្ភៈឆ្នាំ ២០១៤ – យន្តហោះតូចមួយរបស់ក្រុមហ៊ុនអាកាសចរណ៍នេប៉ាល់បានធ្លាក់ ស្លាប់១៨នាក់។

ថ្ងៃទី ២៤ ខែកុម្ភៈ ឆ្នាំ ២០១៦ – យន្តហោះធុនតូច Tara Air បានធ្លាក់ អ្នកស្លាប់ចំនួន២៣នាក់។

ថ្ងៃទី ២៦ ខែកុម្ភៈ ឆ្នាំ ២០១៦ – យន្តហោះធុនតូចមួយគ្រឿងដែលដំណើរការដោយក្រុមហ៊ុនអាកាសចរណ៍ Kathmandu Airlines បានធ្លាក់សម្លាប់មនុស្សពីរនាក់។

ថ្ងៃទី ១២ ខែមីនាឆ្នាំ ១០១៨ – យន្តហោះរបស់ក្រុមហ៊ុនអាកាសចរណ៍ US-Bangla បានធ្លាក់មុនពេលចុះចតដោយសម្លាប់មនុស្ស ៥១នាក់ និង 20 នាក់នៅរស់រានមានជីវិត។

ថ្ងៃទី ២៧ ខែកុម្ភៈ ឆ្នាំ ២០១៩ – ឧទ្ធម្ភាគចក្រធ្លាក់នៅភាគខាងកើតប្រទេសនេប៉ាល់ មនុស្ស ៧ នាក់បានស្លាប់រួមទាំងរដ្ឋមន្ត្រីទេសចរណ៍នេប៉ាល់ម្នាក់ផងដែរ។

ថ្ងៃទី ២៩ ខែឧសភា ឆ្នាំ ២០២២ – យន្តហោះ Tara Air បានធ្លាក់បន្ទាប់ពីហោះចេញពី Pokhara  អ្នកដំណើរ ២២ នាក់បានស្លាប់

ថ្ងៃទី ១៥ ខែមករាឆ្នាំ ២០២៣ថ្មីនេះ ដោយយន្តហោះ Yeti Airlines បានធ្លាក់សម្លាប់មនុស្ស ៧០ នាក់ និង២ នាក់កំពុងបាត់ខ្លួន៕ ប្រភព៖ pptvhd36

សហរដ្ឋអាមេរិក ៖ គណៈកម្មការអឺរ៉ុបបានបង្ហាញរបាយការណ៍មួយថា អាមេរិកបាននាំចេញឧស្ម័នធម្មជាតិរាវ (LNG) ទៅកាន់សហភាពអឺរ៉ុប (EU) កើនឡើងទ្វេដងក្នុងរយៈពេល១១ខែដំបូងឆ្នាំ២០២២ (ចាប់ពីខែមករា ដល់ខែវិច្ឆិកា) បើធៀបនឹងឆ្នាំ២០២១ ។

ជាមួយគ្នានេះ សហភាពអឺរ៉ុបបាននាំចូលឧស្ម័នធម្មជាតិរាវចំនួន៥២.០០០លានម៉ែត្រគូបពីអាមេរិកតាំងពីខែមករា ដល់ខែវិច្ឆិកា ឆ្នាំ២០២២ បើធៀបនឹងឆ្នាំ២០២១ សហភាពអឺរ៉ុបនាំចូលឧស្ម័នធម្មជាតិ LNG ចំនួន២២.០០០លានម៉ែត្រគូប ។

សហភាពអឺរ៉ុបបានធ្វើកិច្ចព្រមព្រៀងជាមួយអាមេរិកកាលពីឆ្នាំមុន ដើម្បីបង្កើនការនាំចូលឧស្ម័នធម្មជាតិ LNG បន្ទាប់ពីសហភាពអឺរ៉ុបសម្រេចចិត្តកាត់បន្ថយការទិញឧស្ម័នធម្មជាតិពីប្រទេសរុស្ស៊ី ។ ក្រៅពីនេះ កាលពីខែធ្នូឆ្នាំមុន អាល្លឺម៉ង់ជាអ្នកប្រើប្រាស់ឧស្ម័នធម្មជាតិច្រើននៅសហភាពអឺរ៉ុប បានបើកឱ្យប្រើប្រាស់ស្ថានីយទទួលឧស្ម័នធម្មជាតិអណ្តែតទឹកដំបូងគេ ហើយកាលពីដើមខែមករាឆ្នាំនេះ ស្ថានីយខាងលើរបស់អាល្លឺម៉ង់បានទទួលនាវាផ្ទុកហ្គាស LNG ពីអាមេរិក ។

សារព័ត៌មាន Bloomberg រាយការណ៍ថា តម្រូវការប្រើប្រាស់ថាមពលបានកើនឡើងនៅអឺរ៉ុប ដែលធ្វើឱ្យអាមេរិកនាំចេញឧស្ម័នធម្មជាតិ LNG កើនឡើងនៅឆ្នាំ២០២២ ហើយអាមេរិកបានក្លាយជាអ្នកនាំចេញឧស្ម័នធម្មជាតិ LNG ដ៏ធំក្នុងពិភពលោក ។

ទីភ្នាក់ងារព័ត៌មានថាមពលសហរដ្ឋអាមេរិកថា ក្នុងរយៈពេល៩ខែដំបូងឆ្នាំ២០២២ អាមេរិកបាននាំចេញឧស្ម័នធម្មជាតិរាវ និងបង្កើតប្រាក់ចំណូលចំនួន៣៥.០០០លានដុល្លារអាមេរិក បើធៀបនឹងរយៈពេលដូចគ្នាឆ្នាំ២០២១ ទទួលបានប្រាក់ចំណូល៨៣០០លានដុល្លារអាមេរិក ។

អ្នកវិភាគរបស់ Kpler ជាក្រុមហ៊ុនវិភាគទិន្នន័យរបស់សហភាពអឺរ៉ុបប៉ាន់ស្មានថា ការនាំចេញឧស្ម័នធម្មជាតិ LNG របស់អាមេរិកនឹងលូតលាស់ជាបន្តបន្ទាប់នៅឆ្នាំ២០២៣នេះ ស្របតាមតម្រូវការរបស់អឺរ៉ុបដើម្បីមានថាមពលប្រើប្រាស់គ្រប់គ្រាន់ក្នុងរដូវត្រជាក់ ៕

ប្រភព ៖ TNN World

ភ្នំពេញ៖ ក្រសួងសុខាភិបាលពិនិត្យឃើញមានគណនីបណ្តាញសង្គមហ្វេសប៊ុកឈ្មោះ MaLy HG ធ្វើការផ្សព្វផ្សាយ ចែកចាយ និងលក់ ឱសថ Yasmin®គ្មានលេខបញ្ញិកាពីក្រសួងសុខាភិបាល ស្រដៀងនឹងឱសថឈ្មោះ Yasmin® មានលេខបច្ឆិកា CAM R 4496IP-4()7 ដែលចែកចាយដោយក្រុមហ៊ុន DKSH (Cambodia) Ltd។

អនុលោមតាមច្បាប់ ស្តីពីការគ្រប់គ្រងឱសថ និងច្បាប់ស្តីពីវិសោធនកម្មច្បាប់ ស្តីពីការគ្រប់គ្រងឱសថតម្រូវឱ្យ រាល់ការចរាចរឱសថ និងផលិតផលដែលមានគុណភាពក្នុងការបង្ការ ឬព្យាបាលជំងឺគ្រប់ប្រភេទក្នុងព្រះរាជាណាចក្រកម្ពុជា ត្រូវមានលេខបញ្ញិកាពីក្រសួងសុខាភិបាល។ ដូច្នេះសូមប្រជាពលរដ្ឋមុននឹងទិញឱសថគ្រប់ប្រភេទ សូមពិនិត្យមើលលតាបត បញ្ញិកាដែលមានបិទលើសំបកវេចខ្ចប់ ហើយលតាបត្រដែលត្រឹមត្រូវ គឺមានពីរផ្នែក ១-ផ្នែកខាងលើមានឈ្មោះ ក្រុមហ៊ុន ២-ផ្នែកខាងក្រោមមានលេខបញ្ញិកា ដូចមានគំភ្ជាប់មកជាមួយ។

ក្រសួងសុខាភិបាល សូមជូនព័ត៌មានដល់បងប្អូនប្រជាពលរដ្ឋទាំងអស់មិនត្រូវទិញ និងប្រើប្រាស់ឱសថដែល គា្មនលេខបញ្ញិកាខាងលើ ជាបន្តទៀត ព្រោះឱសថនេះមិនអាចធានាបាននូវ គុណភាព សុវត្ថិភាព និងប្រសិទ្ធភាពបានឡើយ ហើយអាចជាឱសថក្លែងក្លាយ បណ្តាលឱ្យប៉ះពាល់សុខភាព ឬមានគ្រោះថ្នាក់ដល់អាយុជីវិតរបស់អ្នកប្រើប្រាស់ទៀតផង។ ក្រសួងសុខាភិបាលតម្រូវឱ្យបុគ្គលដែលចែកចាយ ឬលក់ឱសថគ្មានលេខបញ្ញិកាខាងលើ រួមទាំងជនពាក់ព័ន្ធ ដទៃទៀតត្រូវបញ្ឈប់ការនាំចូល ចែកចាយ ឬលក់ឱសថខាងលើនេះជាបន្ទាន់។

ក្រសួងសុខាភិបាលនឹងមានវិធានការតឹងរ៉ឹង ទៅតាមផ្លូវច្បាប់ចំពោះជនណាចែកចាយ ឬលក់ឱសថគ្មានលេខបញ្ញិកា ឱសថក្លែងក្លាយ និងជនពាក់ព័ន្ធដទៃទៀតទៅ តាមច្បាប់ស្តីពីវិសោធនកម្មច្បាប់ស្ដីពីការគ្រប់គ្រងឱសថជាធរមាន។

ក្នុងករណីបងប្អូនប្រជាពលរដ្ឋបានជួបប្រទះឃើញជនណាកំពុងចែកចាយ ឬលក់ឱសថដែលគ្មានលេខបញ្ជីកា សូមបងប្អូនប្រញាប់ផ្តល់ព័ត៌មាន និងត្រូវការព័ត៌មានបន្ថែមពីនាយកដ្ឋានឱសថ ចំណីអាហារ បរិក្ខារពេទ្យ និងគ្រឿង សំអាង សូមទំនាក់ទំនងតាមរយៈលេខទូរស័ព្ទ៖ ០១២ ៣៥៥ ១៦១, ០១២ ៩០៤ ៣៨៥, ០១២ ៩៨៣៣៣៤, ០១៧ ៦០៦ ៦៧០, ០១២ ៥៦២ ៤៤៦,០១៧ ៨៦៦ ៧៦០៕

ប្រទេសថៃ ៖ នាយកដ្ឋានអភិវឌ្ឍន៍អាជីវកម្មបាននិយាយថា ជនបរទេសមកប្រកបរបរលក់ម្ហូបអាហារ និងភេសជ្ជៈនៅប្រទេសថៃ ត្រូវតែទទួលបានការអនុញ្ញាតជាមុនសិន បើរំលោភច្បាប់ គឺត្រូវជាប់គុកមិនលើសពី៣ឆ្នាំ និងពិន័យជាប្រាក់ចាប់ពី១០ម៉ឺនបាត ទៅ១លានបាត ឬទាំងជាប់គុក ទាំងពិន័យប្រាក់ ។

គេសង្កេតឃើញថា មានជនជាតិចិនបើកហាងលក់ម្ហូបអាហារនៅផ្លូវយ៉ាវរ៉ាត់ ទីក្រុងបាងកក ពួកគេកាន់ទិដ្ឋាការភ្ញៀវទេសចរប៉ុណ្ណោះ ប៉ុន្តែពួកគេបានមកប្រកបអាជីវកម្មច្រើនយ៉ាងនៅប្រទេសថៃ ហើយផលប៉ះពាល់ គឺប្រាក់បាតនឹងចែកចាយទៅក្នុងប្រទេសថៃកាន់តែតិច ។

លើសពីនេះ ជនជាតិថៃដែលប្រកបអាជីវកម្មនានានឹងជួបបញ្ហារយៈពេលយូរ ខណៈអ្នកលក់ដូរចិនទាំងនេះចាយវាយប្រាក់បាតជាមួយជនជាតិចិនគ្នាឯង ហើយពួកគេអាចបើកបញ្ជីធនាគារបាន ប៉ុន្តែមិនដឹងថា ពួកគេផ្ញើប្រាក់ទៅប្រទេសចិនឬយ៉ាងណា តែពួកគេមិនបានបង់ពន្ធដូចអ្នកប្រកបរបរក្នុងប្រទេសទេ ។

កាលពីថ្ងៃទី១៥ ខែមករា លោក ថាក់សុផុល ថងសុបុត អគ្គនាយកដ្ឋានអភិវឌ្ឍន៍អាជីវកម្មនៃក្រសួងពាណិជ្ជកម្ម ថ្លែងថា យោងតាមច្បាប់ការប្រកបអាជីវកម្មរបស់ជនបរទេស ឆ្នាំ១៩៩៩ គឺជនបរទេសដែលប្រកបមុខរបរលក់អាហារ និងភេសជ្ជៈ ត្រូវទទួលការអនុញ្ញាតពីអគ្គនាយកដ្ឋានអភិវឌ្ឍន៍អាជីវកម្មសិន ។

កន្លងមក អគ្គនាយកដ្ឋានអភិវឌ្ឍន៍អាជីវកម្មបានសហការគ្នាជាមួយក្រសួងការងារ ចុះពិនិត្យមើលអ្នកប្រកបមុខរបរនេះតាមទីកន្លែងនានា ហើយបើរកឃើញថា មានជនបរទេសមករកស៊ីគ្មានការអនុញ្ញាតនោះ គឺពួកគេនឹងខុសច្បាប់របស់ក្រសួងការងារ និងក្រសួងពាណិជ្ជកម្ម ហើយក្នុងករណីជនជាតិថៃចុះឈ្មោះនៅក្រសួងពាណិជ្ជកម្មជំនួសជនបរទេស ក៏ខុសច្បាប់ដូចគ្នា ។ ទោះយ៉ាងណា អគ្គនាយកដ្ឋានអភិវឌ្ឍន៍អាជីវកម្មនឹងសហការគ្នាជាមួយស្ថាប័នពាក់ព័ន្ធចុះពិនិត្យមើលការរកស៊ីរបស់ជនបរទេស និងបង្ខំពួកគេអនុវត្តច្បាប់ឱ្យបានហ្មត់ចត់ ។

ជនជាតិថៃដែលយកឈ្មោះរបស់ខ្លួន ឬគាំទ្រការប្រកបអាជីវកម្មរបស់ជនបរទេស ដោយបង្ហាញថា ជាអាជីវកម្មរបស់ជនជាតិថៃ ដើម្បីឱ្យជនបរទេសប្រកបរបររកស៊ីខុសច្បាប់ គឺត្រូវជាប់គុកមិនលើសពី៣ឆ្នាំ ឬពិន័យជាប្រាក់ពី១០ម៉ឺនបាត ដល់១លានបាត ឬទាំងជាប់គុក និងពិន័យជាប្រាក់ ។ លើសពីនេះ នៅមានទោសពិន័យគិតតាមចំនួនថ្ងៃទៀត គឺ១ថ្ងៃពិន័យពី១ម៉ឺនបាត ដល់៥ម៉ឺនបាត ៕

ប្រភព ៖ thairath

បរទេស៖ មេដឹកនាំតួរគីបានផ្តល់ឱសានវាទ ដល់ស៊ុយអែត និងហ្វាំងឡង់ត្រូវតែឆ្លើយតបនឹងរដ្ឋាភិបាលទីក្រុងអង់ការ៉ា ក្នុងលក្ខខណ្ឌទាំងអស់ សម្រាប់សមាជិកភាពអង្គការណាតូ។

ទីភ្នាក់ងារសារព័ត៌មានបរទេសបានរាយការណ៍ពីទីក្រុងអ៊ីស្តង់ប៊ុល ប្រទេសតួរគី នាថ្ងៃទី ១៧ ខែមករា ឆ្នាំ២០២៣នេះថា ប្រធានាធិបតីលោក Recep Tayyip Erdogan បាននិយាយអំពីជំហរបច្ចុប្បន្នរបស់ប្រទេសទួរគី នៃការប្រឆាំងនឹងស៊ុយអែត ព្រមទាំងប្រទេសហ្វាំងឡង់ ដែលចង់ក្លាយជាសមាជិកនៃអង្គការសន្ធិសញ្ញាអាត្លង់ទិកខាងជើង ឬNATO ។

ជាមួយគ្នានោះមេដឹកនាំតួរគីបានសង្កត់ធ្ងន់លើលក្ខខណ្ឌសំខាន់ៗមួយចំនួន ហើយអង្គការនៅតែតាមដានយ៉ាងជិតស្និទ្ធ ថាតើប្រទេសទាំងពីរអាច “រក្សាកិច្ចសន្យា” និង “អនុវត្តលក្ខខណ្ឌ” ដែលបានព្រមព្រៀងគ្នាដែរឬទេ?

ការតាមដាននេះធ្វើឡើង ខណៈពេលដែលប្រទេសទាំងពីរ បានបំពាន ការបញ្ជា និងការស្នើសុំឱ្យប្រទេសទាំងពីរត្រូវតែធ្វើមាតុភូមិនិវត្តន៍ “ភេរវករ” ដែលសំដៅលើសមាជិកប្រហែល ១៣០ នាក់នៃគណបក្សពលករឃឺដ (PKK) និងកងកម្លាំងស្វ័យការពារជនជាតិឃឺដ ទៅកាន់រដ្ឋាភិបាលទីក្រុងអង់ការ៉ា។ ហើយដរាបណារឿងនេះមិនទាន់កើតឡើង សភារបស់ប្រទេសទួរគីនឹងមិនទាន់ផ្តល់សច្ចាប័នលើច្បាប់នេះនៅឡើយទេ។

ទោះជាយ៉ាងណាទាក់ទងនឹងបញ្ហាខាងលើ ប្រទេសតួរគីបានលុបចោលការគ្រោងធ្វើដំណើរទៅកាន់ ទីក្រុងអង់ការ៉ា តាមការស្នើសុំ ខណៈស៊ុយអែតបានធ្វើសកម្មភាពស្របតាមកិច្ចព្រមព្រៀង ជាមួយរដ្ឋាភិបាលទីក្រុងអង់ការ៉ា។

គួរបញ្ជាក់ថាកាលពីខែមិថុនាឆ្នាំមុន អង្គការណាតូ  បានយល់ព្រមឱ្យស៊ុយអែត និងហ្វាំងឡង់បានចុះហត្ថលេខាលើកិច្ចព្រមព្រៀង “យល់ព្រមជាគោលការណ៍” ដោយបើកផ្លូវឱ្យហ្វាំងឡង់ និងស៊ុយអែតក្លាយជាសមាជិកណាតូ នៅក្រោមលក្ខខណ្ឌមួយចំនួនដែលបានប្រកាស និងត្រូវបានលាតត្រដាង ក្នុងនោះ ស៊ុយអែត និងហ្វាំងឡង់ ក៏បានបញ្ចប់ការបិទផ្លូវដោយប្រដាប់អាវុធប្រឆាំងនឹងរដ្ឋាភិបាលទីក្រុងអង់ការ៉ាកាលឆ្នាំ ២០១៩ ក្នុងការតវ៉ាចំពោះការចូលរួមរបស់យោធាតួកគីនៅក្នុងប្រទេសស៊ីរី៕ ប្រភព៖ Dailynews