បរទេស៖ យន្តហោះដែលមានល្បឿនលឿនជាងសំឡេង “Concorde” បានក្លាយជាទីចាប់អារម្មណ៍ និងមានភាពទាក់ទាញជាខ្លាំង កាលពីអតីតកាល ប៉ុន្តែគួរឱ្យស្ដាយដែលយន្តហោះនេះត្រូវបានគេឈប់ផលិតដោយសារតែហេតុផលមួយចំនួន។

យន្តហោះ “Concorde” ត្រូវបានគេដឹងថា​ បានហោះហើរជាលើកដំបូងរបស់ខ្លួននៅថ្ងៃទី ២១ ខែមករា ឆ្នាំ ១៩៧៦ ឬរយៈពេល ៤៧ ឆ្នាំមុន ដោយក្រុមហ៊ុន British Airways ដែលបានបង្កើតឱ្យមានការភ្ញាក់ផ្អើលនៅក្នុងពិភពអាកាសចរណ៍នាសម័យនោះ។

ដោយយន្តហោះនេះបានបើកផ្លូវសេវាកម្មដំបូងពី ទីក្រុងឡុងដ៍ ទៅ បារ៉ែន និងក្រុមហ៊ុនអាកាសចរណ៍ Air France ដោយមានជើងហោះហើរ ពីប៉ារីស ទៅ Rio de Janeiro។

ពិតណាស់ Concorde ត្រូវបានគេស្គាល់ថាជា Queen of the sky ដោយសារតែល្បឿន Supersonic ដែលបានបង្ហាញពីកំពូលល្បឿន ២,១៧៩ គីឡូម៉ែត្រក្នុងមួយម៉ោង និងភាពប្រណិតដ៏ទាក់ទាញជាងយន្តហោះប្រភេទផ្សេងទៀត ដោយយន្តហោះនេះមានពណ៌ស រាងស្លីម ស្លាបរាងត្រីកោណ ក្បាលរាងស្រួចឡើងបន្តិច ហើយក្បាលម៉ាស៊ីនត្រូវបានគេដាក់តម្រូវទៅមុំទាប ដូច្នេះអ្នកបើកយន្តហោះអាចមើលឃើញស្ថានភាពអាកាសយានដ្ឋានបានយ៉ាងច្បាស់។

ប៉ុន្តែគួរឱ្យស្ដាយដែលយន្តហោះប្រភេទនេះត្រូវបានបាត់វត្តមានបន្ទាប់ពីរយៈពេល២០ឆ្នាំជាងមកនេះ។

តោះទៅមើលថាហេតុអ្វីបានជាយន្តហោះដែលមានបច្ចេកវិទ្យាទំនើបបំផុតនៅពេលនោះត្រូវបញ្ឈប់ការផលិត។

ពិតណាស់បន្ទាប់ពីប្រតិបត្តិការរយៈពេល ៤៧ ឆ្នាំ ក្រុមហ៊ុនអាកាសចរណ៍ទាំងពីរបានសម្រេចចិត្តបញ្ឈប់ផលិត Concorde ក្នុងឆ្នាំ ២០០៣ ដោយសារតែហេតុផលផ្សេងៗ រួមទាំងថ្លៃថែទាំខ្ពស់ ការកំណត់សមត្ថភាពផ្ទុកអ្នកដំណើរមានត្រឹមតែ ១២៨ កៅអី ប៉ុណ្ណោះ ដែលធ្វើឱ្យមានការលក់សំបុត្រថ្លៃកាន់តែថ្លៃសម្រាប់យន្តហោះនេះ។

លើសពីនេះនៅថ្ងៃទី ១១ ខែកញ្ញា ឆ្នាំ ២០០១ មានការវាយប្រហារដោយភេរវកម្មលើយន្តហោះប្រភេទ Concorde ដែលវាបានប៉ះពាល់យ៉ាងធ្ងន់ធ្ងរដល់ឧស្សាហកម្មអាកាសចរណ៍យ៉ាងខ្លាំងក្នុងឆ្នាំនោះ៕ ប្រភព៖ pptvhd36

បច្ចុប្បន្ននេះ មិនថាយើងទិញទំនិញ ឬប្រើប្រាស់សេវាកម្មអ្វីក៏ដោយ សំណួរ១ក្នុងចំណោមសំណួរដែលតែងបានឮជាញឹកញាប់ពីបុគ្គលិកមុនពេលទូទាត់ប្រាក់គឺ ៖ «តើមានកាតសមាជិកឬនៅ ? តើមានកាតសន្សំពិន្ទុឬអត់?» បើយើងឆ្លើយថា «គ្មានទេ» យើងនឹងត្រូវបានគេបបួលឱ្យចុះឈ្មោះជាសមាជិក ដោយការចុះឈ្មោះជាសមាជិកគ្មានការចំណាយបន្ថែមឡើយ ។

យើងធ្លាប់សង្ស័យទេថា ហេតុអ្វីហាងលក់ទំនិញជាច្រើនចង់ឱ្យយើងចុះឈ្មោះជាសមាជិក ? ហើយហាងទំនិញទាំងនេះទទួលបានអ្វីពីយើង ?
នៅក្នុងអាជីវកម្ម «កាតសមាជិក និងកាតសន្សំពិន្ទុ » គឺជាផ្នែកមួយក្នុងយុទ្ធសាស្ត្រទាក់ទាញអតិថិជន ។ អតិថិជនមានកាតសមាជិក ក្រៅពីទាក់ទាញឱ្យអតិថិជនទិញទំនិញក្នុងថ្ងៃអនាគតនោះ សំខាន់នៅពេលយើងចូលមកជាសមាជិក ហាងទំនិញនឹងអាចប្រមូលទិន្នន័យផ្សេងៗដូចជា ទំនិញអ្វីដែលឈ្មោះ A ចូលចិត្តទិញជាប្រចាំ និងពេលវេលាណាដែលឈ្មោះ A ចូលមកប្រើប្រាស់សេវាកម្មក្នុងហាង ។ នៅពេលពួកគេទទួលបានទិន្នន័យអតិថជននៅក្នុងដៃហើយ ហាងយកទិន្នន័យទាំងនេះមកវិភាគដើម្បីជាប្រយោជន៍អាជីវកម្មបន្តនាថ្ងៃអនាគត ។

យើងសង្កេតឃើញថា ហាងទំនិញ និងអាជីវកម្មជាច្រើនព្យាយាមបបួលអតិថិជនឱ្យចុះឈ្មោះចូលជាសមាជិក រហូតដល់ពេលខ្លះឃើញប្រូម៉ូសិនបញ្ចុះតម្លៃ ចែករបស់ ឬទទួលបានសិទ្ធិពិសេសអ្វីម្យ៉ាង នៅពេលចុះឈ្មោះជាសមាជិកលើកដំបូង ។ តើអាជីវកម្ម និងហាងទំនិញផ្សេងៗយកទិន្នន័យបានពីអតិថិជនទៅវិភាគ និងបង្កើនការលក់បានច្រើនតិចប៉ុនណា ?

១-ធ្វើទីផ្សារ ឬបង្កើនការផ្សព្វផ្សាយចំអតិថិជនគោលដៅ ៖
ការបញ្ជាទិញរបស់អតិថិជនធ្វើឱ្យក្រុមហ៊ុនដឹងថា អតិថិជនចូលចិត្តទំនិញអ្វី ហើយទំនិញអ្វីលក់ដាច់នៅពេលណា ។ ហេតុនេះ ការមានទិន្នន័យគ្រប់គ្រាន់នឹងជួយឱ្យក្រុមហ៊ុនអាចធ្វើទីផ្សារចំអតិថិជនគោលដៅ ។ បណ្តាហាងអាចយកទិន្នន័យនេះមកវិភាគដើម្បីយកទំនិញថ្មីៗជាតម្រូវការរបស់អតិថិជនផងដែរ ។ ឧទាហរណ៍ ក្រុមហ៊ុន Amazon បានប្រមូលទិន្នន័យពីអតិថិជនថា ពួកគេចាប់អារម្មណ៍ទំនិញប្រភេទណា បន្ទាប់មក ក្រុមហ៊ុនយកទិន្នន័យមកវិភាគថា អតិថិជនដែលចូលចិត្តទំនិញប្រភេទនេះ តើពួកគេទំនងចាប់អារម្មណ៍ទំនិញប្រភេទណាទៀត ដើម្បីក្រុមហ៊ុនអាចណែនាំទំនិញថ្មីដល់ពួកគេ ។

២-បង្កើតភាពស្មោះត្រង់ជាមួយម៉ាកទំនិញ ៖
ជាទូទៅ អ្នកកាន់កាតសមាជិក ឬកាតសន្សំពិន្ទុ ពួកគេតែងទទួលបានសិទ្ធិពិសេសដូចជា សិទ្ធិទទួលបានប្រូម៉ូសិនទិញទឹក២កែវ ថែមជូន១កែវ ឬទទួលទានគ្នា៤នាក់ គិតប្រាក់តែ៣នាក់ ជាដើម ។ ប្រូម៉ូសិន និងសិទ្ធិពិសេសនេះ ធ្វើឱ្យពួកគេមានអារម្មណ៍ថា ជាតម្លៃល្អឬចំណេញ និងចង់ត្រឡប់មកទិញ ឬប្រើសេវាកម្មម្តងទៀតជាមួយហាងទំនិញនេះ ច្រើនជាងហាងផ្សេងដែលពួកគេមិនមែនជាសមាជិក ។ យុទ្ធសាស្ត្រនេះចាត់ទុកថា បង្កើតភាពស្មោះត្រង់ជាមួយម៉ាកទំនិញ ។

៣-បន្ថែមបណ្តាញទៅកាន់អតិថិជន ៖
ទិន្នន័យផ្សេងៗរបស់អតិថិជនដែលក្រុមហ៊ុនប្រមូលបានពីការចុះឈ្មោះជាសមាជិកមាន អាសយដ្ឋាន លេខទូរស័ព្ទ អ៊ីម៉ែល ឬ LINE ចាត់ទុកជាទិន្នន័យសំខាន់ដែលក្រុមហ៊ុនប្រើសម្រាប់ដាស់តឿន ឬជូនដំណឹងប្រូម៉ូសិនផ្សេងៗដល់អតិថិជនម្នាក់ៗដោយផ្ទាល់ ដូចជា ផ្ញើប្រូម៉ូសិនពិសេសរបស់សាខាទៅកាន់អតិថិជនតាម sms ។ ការបង្កើតបណ្តាញទៅកាន់អតិថិជនដោយផ្ទាល់បែបនេះ ជាវិធីមួយជំរុញការទិញទំនិញដូចគ្នា ។ ទោះយ៉ាងណា ប្រូម៉ូសិនទៅកាន់អតិថិជនដោយផ្ទាល់ញឹកញាប់ពេក ក៏អាចធ្វើឱ្យរំខានផងដែរ ។

៤-បន្ថែមឱកាសក្នុងការទិញម្តងទៀត ៖
ដូចយើងឃើញស្រាប់ ករណីហាងកាហ្វេ ឬស្ថានីយប្រេងឥន្ធនៈចូលចិត្តប្រើប្រាស់កាតសន្សំពិន្ទុ ដូចជា សន្សំបាន១០០ពិន្ទុ គេអាចទៅប្តូរយកទំនិញ សេវាកម្ម ឬទទួលបានការបញ្ចុះតម្លៃផ្សេងៗបាន ។ យុទ្ធសាស្ត្រនេះហើយជួយឱ្យអតិថិជនត្រឡប់មកទិញទំនិញ ឬប្រើសេវាកម្មម្តងទៀត ។ ដូច្នេះហើយទើបយើងឃើញអាជីវកម្មសម័យនេះ មិនថាតូចឬធំ ចូលចិត្តឱ្យយើងចុះឈ្មោះជាសមាជិករបស់ពួកគេ ៕

ប្រភព ៖ BrandCase

បរទេស៖ សកម្មជនបរិស្ថានបានបញ្ចេញវីដេអូ Drone នៃកាកសំណល់ប្លាស្ទិកដែលហូរពេញទន្លេនៃប្រទេសបូស្នៀ និងហឺហ្សេហ្គោវីណា ហើយអាជ្ញាធរក្នុងតំបន់កំពុងត្រៀមខ្លួនដើម្បីទាមទារដំណោះស្រាយជាបន្ទាន់ផងដែរ។

កាលពីថ្ងៃទី ២២ ខែមករា ឆ្នាំ២០២៣ មានការបង្ហោះវីដេអូពី ដ្រូន (Drone) របស់សកម្មជនបរិស្ថាន ដោយវាបានបង្ហាញពីចំនួនដ៏ធំសម្បើមនៃកាកសំណល់ប្លាស្ទិកដែលបានប្រមូលផ្តុំនៅពីក្រោយរបាំងនៅបឹង Visegrad  នៅលើទន្លេ Drina នៃប្រទេសបូស្នៀ និងហឺហ្សេហ្គោវីណា។

កាកសំណល់ប្លាស្ទិកនេះ បានអណ្តែតក្នុងទន្លេយ៉ាងច្រើនសន្ធឹកសន្ធាប់ រួមជាមួយនឹងសំណល់ឈើនៅកណ្តាលទន្លេជាច្រើនផងដែរ។

លោក Dejan Furtula ដែលជាសកម្មជនបរិស្ថានក្នុងតំបន់បាននិយាយថា វាជាបញ្ហាកើតឡើងដដែលៗ ដោយមិនទាន់ត្រូវបានដោះស្រាយនៅឡើយ ដោយបញ្ហាសំរាមប្លាស្ទិកនៅបឹង Visegrad នេះវាបានបន្តអស់រយៈពេល ២០ ឆ្នាំមកហើយ ជាលទ្ធិផលវាបានបណ្តាលឱ្យមានគ្រោះមហន្តរាយបរិស្ថានយ៉ាងខ្លាំង ដោយកម្រិតទឹកនៃទន្លេ Drina បានកើនឡើងហើយកាកសំណល់ប្លាស្ទិកជាច្រើនបានហៀរចូល តំបន់នោះ។

លើសពីនេះវាបានបង្កឱ្យមានភ្លៀងធ្លាក់យ៉ាងខ្លាំងដោយបានវាយប្រហារប្រទេសម៉ុងតេណេហ្គ្រោ បូស្នៀ និងហឺហ្សេហ្គោវីណា ក្នុងរយៈពេលប៉ុន្មានថ្ងៃកន្លងមកនេះ។

យ៉ាងណាមិញសកម្មជនបរិស្ថានរូបនេះក៏បានលើកឡើងពីការលំបាកក្នុងការចោលកាកសំណល់ប្លាស្ទិកដ៏ច្រើនសន្ធឹកសន្ធាប់ ក៏ដូចជាកំទេចកំទីដើមឈើអណ្តែតទឹកទន្លេ ដោយបានសង្កត់ធ្ងន់ថា ភាពធ្ងន់ធ្ងរនៃបញ្ហាមិនត្រឹមតែប៉ះពាល់ដល់សុខភាព និងបរិស្ថានតែប៉ុណ្ណោះ ប៉ុន្តែវាក៏បំផ្លាញកេរ្តិ៍ឈ្មោះ របស់តំបន់នេះដូចគ្នា។ ដោយសារតែបញ្ហានេះបឹង Visegrad វាត្រូវបានគេចាត់ទុកថាជាតំបន់ក្លាយជាកន្លែងចាក់សំរាមពិតប្រាកដសម្រាប់ជនអតិមួយចំនួនក្នុងតំបន់៕ ប្រភព៖ pptvhd36

ប្រទេសអាល្លឺម៉ង់ ៖ បើយើងនិយាយពីម៉ាករបស់អាល្លឺម៉ង់ ភាគច្រើនយើងនឹកឃើញដល់ម៉ាករថយន្តដូចជា Mercedes-Benz, BMW, Volkswagen ឬស្បែកជើង Adidas ជាដើម ។ តើដឹងទេថា ម៉ាកទាំងនេះមានការិយាល័យធំ និងលូតលាស់ចេញពីទីក្រុងនានារបស់អាល្លឺម៉ង់ ខណៈអាល្លឺម៉ង់បានពង្រីកការរីកចម្រើនទៅកាន់ទីក្រុងទាំងនេះ ហើយមិនប្រមូលផ្តុំតែនៅក្នុងទីក្រុងប៊ែរឡាំង ។ និយាយរួម ផលិតផលដែលផលិតចេញពីទីក្រុងទាំងនេះបានល្បីល្បាញទៅកាន់ពិភពលោកដូចគ្នា ។

សម្រាប់ប្រទេសថៃ ឬកម្ពុជា ឱកាសចាប់ផ្តើមប្រកបអាជីវកម្មល្អបំផុត ក៏គេចមិនផុតពីក្រុងបាងកក ឬរាជធានីភ្នំពេញទេ ព្រោះមានពលរដ្ឋរស់នៅប្រមូលផ្តុំច្រើន ។ ជាមួយគ្នានេះ ទីក្រុងធ្វើឱ្យយើងងាយស្រួលប្រកបអាជីវកម្ម ដូច្នេះ មិនប្លែកទេដែលក្រុមហ៊ុនធំៗ និងក្រុមហ៊ុនបរទេសបង្កើតការិយាល័យធំនៅក្នុងទីក្រុងធំ ។ ប៉ុន្តែបើយើងមើលប្រទេសអាល្លឺម៉ង់វិញឃើញថា ម៉ាកយីហោជាច្រើនដែលមានការិយាល័យធំនៅក្រៅក្រុងប៊ែរឡាំង រួមមាន ៖
-Mercedes-Benz, Porsche
-BMW, Siemens, Allianz
-Volkswagen
-Adidas, Puma
-Nivea

ម៉ាកខាងលើនេះ បើទោះជាមកពីទីក្រុងនានា មិនមែនទីក្រុងប៊ែរឡាំងក្តី ប៉ុន្តែវាជាម៉ាកដ៏ធំដែលមានអតិថិជនទទួលស្គាល់ទូទាំងពិភពលោក ។ តើអាល្លឺម៉ង់ធ្វើដូចម្តេចដើម្បីឱ្យវិនិយោគិនចាប់ផ្តើមអាជីវកម្មនៅតាមទីក្រុងនានា ហើយមិនមកប្រមូលផ្តុំក្នុងទីក្រុងប៊ែរឡាំង ?

* ការដឹកជញ្ជូនមានភាពទូលំទូលាយ និងប្រសិទ្ធភាព ៖
អាល្លឺម៉ង់មានទីតាំងស្ថិតនៅចំណុចកណ្តាលអឺរ៉ុប តភ្ជាប់រវាងអឺរ៉ុបខាងកើត ខាងជើង និងខាងត្បូង ។ អាល្លឺម៉ង់បានដឹកជញ្ជូនទំនិញតាមផ្លូវជាតិធំ និងរឹងមាំ «autobahn» មានប្រវែងជាង១ម៉ឺន៣ពាន់គីឡូម៉ែត្រ ។

លើសពីនេះ មានរថភ្លើងប្រវែង៤០.៦២៥គីឡូម៉ែត្រ ដែលតភ្ជាប់ទីក្រុងតូចធំទូទាំងប្រទេស និងទៅកាន់ប្រទេសជិតខាងទូទាំងអឺរ៉ុបទៀតផង ។ អាល្លឺម៉ង់មានក្រុមហ៊ុនដឹកជញ្ជូនលំដាប់ពិភពលោក DHL ដែលមានសេវាកម្មដឹកជញ្ជូនផ្លូវគោក ផ្លូវទឹក និងផ្លូវអាកាស ។ ហេតុនេះ មិនថាក្រុមហ៊ុនស្ថិតនៅតំបន់ណានៃប្រទេស ក៏អាចដឹកជញ្ជូនទំនិញទៅដល់ដៃអតិថិជនយ៉ាងមានសុវត្ថិភាព និងងាយស្រួល ។

* ការគាំទ្រពីរដ្ឋាភិបាលក្នុងតំបន់ ៖
រដ្ឋធម្មនុញ្ញថ្មីរបស់អាល្លឺម៉ង់ប្រកាសមកដោយកាត់បន្ថយអំណាចរបស់រដ្ឋាភិបាលកណ្តាល និងពង្រីកអំណាចទៅកាន់រដ្ឋាភិបាលក្នុងតំបន់ ។ រដ្ឋាភិបាលក្នុងតំបន់នៃរដ្ឋនីមួយៗអាចគ្រប់គ្រងថវិកា និងមានសិទ្ធិសម្រេចចិត្តរឿងសំខាន់ៗ ដោយមិនចាំបាច់រង់ចាំការអនុម័តពីរដ្ឋាភិបាលកណ្តាលដូចពេលមុន ។ ស្ថាប័នសំខាន់ជាច្រើនក៏ត្រូវផ្លាស់ទៅនៅរដ្ឋាភិបាលតំបន់ ធ្វើឱ្យអាជីវកម្មផ្សេងៗអាចប្រកបការងារតំបន់បាន ដោយមិនពាក់ព័ន្ធជាមួយក្រុងប៊ែរឡាំង ។

ច្បាប់ថ្មីកំណត់ឱ្យរដ្ឋាភិបាលតំបន់មាននយោបាយលើកកម្ពស់សេដ្ឋកិច្ច “Standortpolitik” ឬសេវាកម្មយុទ្ធសាស្ត្រក្នុងស្រុក ។ នយោបាយនេះធ្វើឱ្យផ្នែកឯកជន និងសហជីពការងារអាចកំណត់យុទ្ធសាស្ត្រអភិវឌ្ឍន៍សេដ្ឋកិច្ចរួមគ្នាក្នុងតំបន់ ។ សេដ្ឋកិច្ចអាល្លឺម៉ង់បានរីកចម្រើនយ៉ាងឆាប់រហ័ស ហើយក្លាយជាប្រទេសឧស្សាហកម្ម និងកែច្នៃ ខណៈកាលពីមុនសេដ្ឋកិច្ចអាល្លឺម៉ង់ធ្លាក់ចុះដោយសារចាញ់សង្គ្រាម ។ អាល្លឺម៉ង់បានធ្វើជាប្រទេសគំរូមួយ ដោយបានប្រគល់អំណាចឱ្យរដ្ឋាភិបាលតំបន់ចាត់ការបញ្ហាផ្សេងៗដោយខ្លួនឯង ខណៈមានការគាំទ្រពីរដ្ឋាភិបាលកណ្តាលដូចជា ការកសាងផ្លូវជាតិ ផ្លូវរថភ្លើង និងហេដ្ឋារចនាសម្ព័ន្ធផ្សេងទៀត ។

ហេតុនេះ ក្រុមហ៊ុន ឬរោងចក្រធំៗនៅប្រទេសអាល្លឺម៉ង់ មិនចាំបាច់ត្រូវស្ថិតនៅក្នុងទីក្រុងប៊ែរឡាំង ឬទីក្រុងមូនិកទេ ពីព្រោះការពង្រីករោងចក្រ ឬអាជីវកម្មធំៗទៅតាមជនបទ ក៏អាចទទួលជោគជ័យ និងល្បីល្បាញទៅកាន់ពិភពលោកដូចគ្នា ៕

ប្រភព ៖ Longtunman