រដ្ឋធានីសេអ៊ូល៖ ជាមួយនឹងការបាញ់មីស៊ីលជាញឹកញាប់ ពីប្រទេសកូរ៉េខាងជើង ដោយបាន និង កំពុងតែបង្កការគំរាមកំហែងដល់សន្ដិសុខ កាន់តែខ្លាំងឡើងនោះ ប្រជាជនកូរ៉េខាងត្បូង ចាប់ផ្ដើមលែងមានទំនុកចិត្តទាំងស្រុង ក្រោមឆត្រនុយក្លេអ៊ែររបស់សហរដ្ឋអាមេរិក ហើយជំរុញឲ្យរដ្ឋាភិបាលក្រុងសេអ៊ូល ត្រូវតែអភិវឌ្ឍនុយក្លេអ៊ែរ ដោយខ្លួនឯង។

គេហទំព័ររបស់បណ្ដាញទូរទស្សន៍ CNN របស់សហរដ្ឋអាមេរិក បានផ្សាយ កាលពីថ្ងៃសៅរ៍ ទី២១ ខែមករា ថា ការគំរាមកំហែងរបស់កុ្រងព្យុងយ៉ាង ធ្វើឲ្យប្រជាជនកូរ៉េខាងត្បូង បានលើកឡើង អំពីទឡ្ហីករណ៍ជាមូលដ្ឋានយ៉ាងសំខាន់ ជំរុញឲ្យប្រទេសរបស់ពួកគេ អភិវឌ្ឍអាវុធនុយក្លេអ៊ែររបស់ខ្លួន។ សកម្មភាពទាំងនេះ ជាតម្រូវការ សម្រាប់ការពារខ្លួន បញ្ចៀសនូវការឈ្លានពាន ពីប្រទេសជិតខាង ព្រោះកូរ៉េខាងជើង បានក្លាយជាប្រទេសនុយក្លេអ៊ែររួចទៅហើយ។ ចំណែកមេដឹកនាំកូរ៉េខាងជើង លោក គីម ជុងអ៊ុន ថែមទាំងប្តេជ្ញាយ៉ាងម៉ឺងម៉ាត់ ថា ក្រុងព្យុងយ៉ាង នឹងបង្កើននូវឃ្លាំងអាវុធរបស់គាត់ បន្ថែមទៀត។

ទឡ្ហីករណ៍ប្រឆាំងនោះ បានរារាំងដល់ក្រុងសេអ៊ូល អស់រយៈពេលជាយូរមកហើយ ពីការស្វែងរកគ្រាប់បែកមហាប្រល័យលោក ដោយផ្អែកលើហេតុផលជាច្រើន។ ចំណែកការអភិវឌ្ឍនុយក្លេអ៊ែរ មិនត្រឹមតែធ្វើឱ្យទំនាក់ទំនង រវាងក្រុងសេអ៊ូល និង សហរដ្ឋអាមេរិក ខកបំណងប៉ុណ្ណោះទេ ប៉ុន្ដែទំនងជានឹងរងនូវទណ្ឌកម្ម ដែលអាចច្របាច់ក ដល់ការប្រើប្រាស់ថាមពលនុយក្លេអ៊ែររបស់ក្រុងសេអ៊ូល ថែមទៀតផង។ ករណីនេះ មិនទាន់និយាយ អំពីអ្វីការត់ប្រណាំងប្រជែងគ្រឿងសព្វាវុធ នៅក្នុងតំបន់ ស្ទើរតែនឹងបង្កហេតុ ដោយការចៀសមិនរួច។

ការស្ទង់មតិ កាលពីពេលថ្មីៗនេះ បង្ហាញ ថា ប្រជាជនកូរ៉េខាងត្បូង ភាគច្រើនគាំទ្រដល់ប្រទេសរបស់ពួកគេ ឲ្យមានកម្មវិធីអាវុធនុយក្លេអ៊ែរ ផ្ទាល់ខ្លួន។ ការសិក្សាដ៏លេចធ្លោនេះ ធ្លាប់បានគេចចេញពីគំនិតទាំងនោះ ហើយសូម្បីតែប្រធានាធិបតីកូរ៉េខាងត្បូង លោក យូន ស៊ូក យូល (Yoon Suk Yeol) ក៏មានគំនិតបែបនេះដែរ។

សម្រាប់អ្នកគាំទ្រវិញ បានលើកឡើង ថា ប្រសិនបើក្រុងសេអ៊ូល បង្កើតនុយក្លេអ៊ែរដោយខ្លួនឯង នៅទីបំផុតនឹងឆ្លើយនូវសំណួរចាស់ ថាតើក្រុងវ៉ាស៊ីនតោន នឹងអនុញ្ញាតឲ្យទីក្រុងសាន់ហ្វ្រាន់ស៊ីស្កូ ប្រថុយប្រថាន សម្រាប់ក្រុងសេអ៊ូល នៅក្នុងព្រឹត្តិការណ៍សង្រ្គាមនុយក្លេអ៊ែរដែរឬទេ?

បច្ចុប្បន្ននេះ ប្រទេសកូរ៉េខាងត្បូង បានដាក់ឲ្យស្ថិតក្រោមយុទ្ធសាស្ត្រពង្រីកនូវការរារាំងរបស់ក្រុងវ៉ាស៊ីនតោន រួមទាំង ឆត្រនុយក្លេអ៊ែរ មានន័យ ថា សហរដ្ឋអាមេរិក មានកាតព្វកិច្ច មកជួយក្រុងសេអ៊ូល នៅក្នុងពេលមានករណីវាយប្រហារ។ សម្រាប់ពេលខ្លះ គឺការធានានោះ នឹងទទួលបានគ្រប់គ្រាន់។ ប៉ុន្តែព័ត៌មានលម្អិត អំពីទម្រង់បែបបទ អំពីអ្វីដែលជាជំនួយ អាចនឹងមិនច្បាស់ទាំងស្រុងនោះដែរ។ ដូចអ្វីដែលជាសំណួរចាស់ បានចង្អុលបង្ហាញ ថា ការប្រឈមមុខនឹងលទ្ធភាព នៃការវាយប្រហារ ដោយនុយក្លេអ៊ែរ សងសឹកទៅលើដីសហរដ្ឋអាមេរិក គឺក្រុងវ៉ាស៊ីនតោន នឹងមានហេតុផល គួរឱ្យទាក់ទាញអារម្មណ៍ នៅក្នុងការកំណត់ការពាក់ព័ន្ធរបស់ខ្លួន។

លោក ឆាំង សុងចាង (Cheong Seong-chang) អ្នកស្រាវជ្រាវជាន់ខ្ពស់ នៃវិទ្យាស្ថានសេជុង (Sejong) បានលើកឡើង ថា «ប្រសិនបើកូរ៉េខាងត្បូង មានអាវុធនុយក្លេអ៊ែរ យើងអាចឆ្លើយតបដោយខ្លួនរបស់យើង ប្រឆាំងនឹងការវាយប្រហាររបស់កូរ៉េខាងជើង បាន។ ដូច្នេះ មិនមានហេតុផលអ្វី សម្រាប់សហរដ្ឋអាមេរិក ចូលមកពាក់ព័ន្ធនោះទេ»។

ជាមួយគ្នានេះ ប្រជាជនកូរ៉េខាងត្បូង ក៏មានហេតុផលផ្សេងៗទៀត សម្រាប់ការចោទសួរ អំពីការកើនឡើង នៃទំនុកចិត្ត មានអាយុកាលរាប់ទសវត្សរ៍របស់ពួកគេ ទៅលើកិច្ចការពាររបស់សហរដ្ឋអាមេរិក។ ការលេចចេញជារូបរាងដ៏ធំ នៅក្នុងចំណោមប្រជាជនកូរ៉េខាងត្បូង នោះ ក្រោយពេលលោក ដូណាល់ ត្រាំ Donald Trump កាលស្ថិតក្នុងតំណែងជាប្រធានាធិបតីសហរដ្ឋអាមេរិក បានលើកឡើង អំពីការចំណាយពាក់ព័ន្ធ មិនបានលាក់បាំង អំពីបំណងចង់ដកទ័ពអាមេរិក ចំនួន ២៨ ៥០០នាក់ ចេញពីកូរ៉េខាងត្បូង។

សំណួរចាស់ដដែលនេះ បានចោទសួរ ថា ហេតុអ្វីបានជាសហរដ្ឋអាមេរិក ត្រូវការពារប្រទេស។ ឥឡូវ លោក Trump បានប្រកាសរួចហើយនូវការឈរឈ្មោះជាបេក្ខភាពប្រធានាធិបតីជាថ្មីរបស់គាត់ សម្រាប់ការបោះឆ្នោត ឆ្នាំ២០២៤។ បញ្ហានេះ នៅតែដក់ជាប់ នៅក្នុងចិត្តរបស់ប្រជាជនកូរ៉េខាងត្បូង។ នៅក្នុងរដ្ឋបាលរបស់លោក ដូណាល់ ត្រាំ បានទាមទារឲ្យក្រុងសេអ៊ូល បង្កើននូវការចូលរួមចំណែកលើវិស័យការពារជាតិ ជួយដល់កងទ័ពរបស់ខ្លួន នៅលើប្រទេសកូរ៉េខាងត្បូង រហូតដល់៥ពាន់លានដុល្លារ ជារៀងរាល់ឆ្នាំ ប៉ុន្ដែការទាមទារនោះ មិនទទួលបានជោគជ័យ។

លោក អេគិត ផេនដា (Ankit Panda) មន្រ្ដីជំនាញសន្ដិសុខអន្ដរជាតិ នៃអង្គការកាណេជី អែនដូមែន សម្រាប់សន្ដិភាព (CEIP) បានថ្លែង ថា ចាប់តាំងពីរដ្ឋបាលរបស់ប្រធានាធិបតី ដូណាល់ ត្រាំ រហូតមក សហរដ្ឋអាមេរិក មិនត្រូវបានគេយល់ ថា អាចទុកចិត្តបាន ដូចពីពេលមុនៗនោះទេ។ បើទោះជារដ្ឋបាលរបស់ប្រធានាធិបតីសហរដ្ឋអាមេរិក លោក ចូ បៃដិន (Joe Biden) កំពុងតែអនុវត្ដតាមប្រពៃណី ដូចរដ្ឋបាលរបស់អាមេរិកមុនៗ ហើយបានផ្តល់សញ្ញាធានាដ៏ត្រឹមត្រូវទាំងអស់ ដល់ប្រទេសកូរ៉េខាងត្បូង… យ៉ាងណាក្ដី។ អ្នកបង្កើតគោលនយោបាយ នឹងត្រូវតែចងចាំ នៅក្នុងចិត្តរបស់ពួកគេ អំពីលទ្ធភាព ដែលសហរដ្ឋអាមេរិក នឹងបោះឆ្នោតម្តងទៀតនូវរដ្ឋបាល ដែលនឹងមានភាពខុសប្លែកគ្នា សម្រាប់កូរ៉េខាងត្បូង។

លោក Yoon Suk Yeol ប្រធានាធិបតីកូរ៉េខាងត្បូង កាលពីពេលថ្មីៗនេះ បានបំផុសគំនិត អំពីអាវុធនុយក្លេអ៊ែរយុទ្ធសាស្ត្ររបស់សហរដ្ឋអាមេរិក ដែលត្រូវដាក់ពង្រាយឡើងវិញ ទៅកាន់ឧបទ្វីប ឬ ប្រទេសកូរ៉េខាងត្បូង ដោយបានជំរុញឲ្យមានសមត្ថភាពនុយក្លេអ៊ែរផ្ទាល់ខ្លួន ប្រសិនបើការគំរាមកំហែង ពីកូរ៉េខាងជើង កាន់តែខ្លាំងឡើង។ ចំណែកការបដិសេធរបស់ក្រុងវ៉ាស៊ីនតោន ចំពោះគំនិតនេះ ក៏មានភាពច្បាស់លាស់ផងដែរ។

លោកប្រធានាធិបតី Yoon បាននិយាយ នៅក្នុងខែនេះ ថា ក្រុងសេអ៊ូល និង វ៉ាស៊ីនតោន កំពុងតែពិភាក្សាគ្នា អំពីការធ្វើសមយុទ្ធនុយក្លេអ៊ែររួមគ្នា ហើយប្រធានាធិបតី Joe Biden ត្រូវបានសាកសួរ នៅថ្ងៃដដែលនោះ ថា តើការពិភាក្សាបែបនេះ ពិតជាកំពុងតែដំណើរការដែរ ឬអត់? ប៉ុន្ដែគាត់ឆ្លើយយ៉ាងសាមញ្ញថា អត់ទេ៕

ប្រទេសថៃ៖ យ៉ាងហោចណាស់មនុស្ស១១នាក់ រួមទាំងអ្នកបើកបរ ត្រូវបានភ្លើងឆាបឆេះយ៉ាងសន្ធោសន្ធៅ បន្ទាប់ពីរថយន្តមួយគ្រឿងបានបើកធ្លាក់ចូលប្រឡាយ កាលពីយប់ថ្ងៃសៅរ៍កន្លងទៅ នៅក្នុងប្រទេសថៃ។

កាលពីថ្ងៃទី ២១ ខែមករា ឆ្នាំ២០២៣ មានសេចក្ដីរាយការណ៍មួយបានឱ្យដឹងថាមានហេតុការណ៍នៃឧបទ្ទវហេតុរថយន្តដឹកអ្នកដំណើរ ដែល រួមទាំងអ្នកបើកបរសរុបចំនួន១២នាក់ ប៉ុន្តែហេតុការណ៍នេះបានបង្កឱ្យមនុស្សក្នុងរថយន្តចំនួន១១នាក់ បានបាត់បង់ជីវិត ដោយសារបុរសម្នាក់អាចវារចេញតាមបង្អួចឡានមកខាងក្រៅបាន។

គ្រោះថ្នាក់នេះបានកើតឡើងនៅវេលាម៉ោង ៩ និង ៣០ នាទី យប់ថ្ងៃទី ២១ នៅលើកំណាត់ផ្លូវជាតិ ទីក្រុងបាងកក ដោយធ្វើដំណើរពី Amnat Charoen ទៅខេត្ត Nakhon Pathom ខណៈនៅចន្លោះគីឡូម៉ែត្រ លេខ ៩៩-១០០ រថយន្ត នេះបានរេចង្កូតទៅបុករបងដែក និងមានសំឡែងផ្ទុះឡើង ព្រមទាំងបង្កឱ្យមានភ្លើងឆាបឆេះឡើងយ៉ាងសន្ធោសន្ធៅ។

ខណៈហេតុការណ៍កំពុងឡើង  លោក Nikom Sae Oun ប្រធានអង្គភាពសង្គ្រោះ Hook 31 នៅ Mo Chabok ស្រុក Si Khiu ក្បែរកន្លែងចំណុចកើតហេតុនោះ បាននិយាយថាបន្ទាប់ពីឮសំឡេងផ្ទុះគាត់បាន ប្រញាប់ទៅកន្លែង កើតហេតុដើម្បីរកមើលយន្តដែលត្រូវភ្លើងឆាបឆេះ។

ជាមួយគ្នានោះលោកក៏បានដឹកនាំក្រុមអ្នកជួយសង្គ្រោះមកពន្លត់ភ្លើងភ្លាមៗ ប៉ុន្តែជាអកុសលមនុស្សចំនួន១១នាក់បានឆាបឆេះស្លាប់ក្នុងរថយន្ត ដែលមិនអាចជួយសង្គ្រោះបានទាន់ពេលវេលា។

ក្រោយពីកើកហេតុ អាជ្ញាធរក្នុងតំបន់ បានចុះត្រួតពិនិត្យ និងស៊ើបអង្កេតរកមូលហេតុនៃគ្រោះថ្នាក់នេះ ៕ ប្រភព៖ Mgronline

ប្រទេសឥណ្ឌូណេស៊ី ៖ កាលពីថ្ងៃទី២២ ខែមករា កន្លងមក ប្រទេសឥណ្ឌូណេស៊ីបានទទួលជើងហោះហើរដំបូងរបស់ភ្ញៀវទេសចរចិនមកកម្សាន្តនៅកោះបាលី បន្ទាប់ពីខកខានអស់រយៈពេល៣ឆ្នាំ ដោយសារការរាតត្បាតនៃជំងឺកូវីដ-១៩ ។ ភ្ញៀវទេសចរចិន២១០នាក់បានធ្វើដំណើរតាមយន្តហោះ Lion Air ដែលហោះហើរពីទីក្រុង Shenzhen ខេត្តក្វាងទុង បន្ទាប់ពីប្រទេសចិនបានលុបចោលវិធានការរឹតបន្តឹតជំងឺកូវីដ កាលពីថ្ងៃទី៨ ខែមករា កន្លងមក ។

វាជាលើកដំបូងហើយដែលភ្ញៀវទេសចរចិនជាច្រើននាក់បានធ្វើដំណើរកម្សាន្តក្រៅប្រទេស ក្នុងរយៈពេល២-៣ឆ្នាំមកនេះ ។ ភ្ញៀវទេសចរចិនម្នាក់និយាយថា មានអារម្មណ៍រំភើបរីករាយខ្លាំងបំផុត ដែលគាត់បានធ្វើដំណើរមកលេងក្រៅប្រទេស ។ គាត់និយាយថា ៖ «រដ្ឋាភិបាលចិនគាំទ្រឱ្យពួកគាត់ធ្វើដំណើរទៅកាន់ក្រុមប្រទេសសមាគមប្រជាជាតិអាស៊ីអាគ្នេយ៍ (អាស៊ាន) ចាប់តាំងពីឆ្នាំ២០២៣ តទៅ» ។

គេសង្កេតឃើញថា ការមកកម្សាន្តរបស់ភ្ញៀវទេសចរចិន គឺជាសញ្ញានៃការងើបឡើងវិញជាថ្មីរបស់ក្រុមហ៊ុនទេសចរណ៍ឥណ្ឌូណេស៊ី រួមទាំងភោជនីយដ្ឋាននានាផងដែរ ដែលបានតុបតែងលម្អសម្រាប់ទាក់ទាញភ្ញៀវចិន ស្វែងរកមុខម្ហូបដែលជនជាតិចិនចូលចិត្ត និងជួលបុគ្គលិកដែលអាចនិយាយភាសាចិនឱ្យត្រឡប់មកបម្រើការងារម្តងទៀត ។

ប្រទេសឥណ្ឌូណេស៊ីរំពឹងថា នឹងមានភ្ញៀវទេសចរចិនចំនួន២៥ម៉ឺន៥ពាន់នាក់ធ្វើដំណើរមកកម្សាន្តឥណ្ឌូណេស៊ីក្នុងឆ្នាំ២០២៣នេះ ដោយកើនឡើងពីចំនួន៩ម៉ឺន៥ពាន់ក្នុងរយៈពេល១០ខែដំបូងឆ្នាំ២០២២ ។ ប៉ុន្តែវានៅតែតិចជាងចំនួន២លាននាក់ក្នុង១ឆ្នាំ បើធៀបនឹងតួលេខមុនពេលការរាតត្បាតនៃជំងឺកូវីដ ។ គេសង្ឃឹមថា ការត្រឡប់មកវិញរបស់ភ្ញៀវទេសចរចិន នឹងជួយបង្កើនប្រាក់ចំណូលក្នុងវិស័យទេសចរណ៍ឥណ្ឌូណេស៊ីផងដែរ ។ កាលពីថ្ងៃទី២០ ខែមករា ក្រសួងទេសចរណ៍ឱ្យដឹងថា ឥណ្ឌូណេស៊ីមានគោលដៅបង្កើនចំនួនភ្ញៀវទេសចរចិនពី៣,៥លាននាក់ ទៅ៧,៤លាននាក់ ។

ឥណ្ឌូណេស៊ីជាប្រទេសមួយក្នុងចំណោមប្រទេសគោលដៅ ដែលភ្ញៀវទេសចរចិនបានស្វែងរកតាមរយៈវែបសាយ ខណៈរដ្ឋាភិបាលក្រុងហ្សាកាតាចាប់ផ្តើមបង្កើនជើងហោះហើរត្រង់ពីទីក្រុងធំៗរបស់ចិន ដូចជា ទីក្រុងប៉េកាំង សៀងហៃ និងក្វាងចូវ មកកាន់ឥណ្ឌូណេស៊ី ៕

ប្រភព ៖ TNN World

បរទេស៖ ពិតជាគួរឱ្យភ្ញាក់ផ្អើល និងមានការចាប់អារម្មណ៍ជាខ្លាំង ក្រោយពីអ្នកលេងអ៊ីនធឺណិតសម្រុកនាំគ្នាចែករំលែកនូវរូបភាពនៃបាតុភូតដុំពពករាងចម្លែកនៅក្នុងប្រទេសទួរគី មើលទៅហាក់ដូចជាយាន “UFO”​របស់មនុស្សក្រៅភព។

កាលពីពេលថ្មីៗនេះទីភ្នាក់ងារសារព័ត៌មានបរទេស បានរបាយការណ៍ពីបាតុភូតពពកចម្លែកមួយនៅទីក្រុង Bursa ប្រទេសទួរគី ដែលអ្នកនិយមលេងអ៊ីនធឺណិតនាំគ្នាបង្ហោះនូវរូបភាព និងចែករំលែកឃ្លីបនៃពពកចម្លែកដែលមិនធ្លាប់ឃើញពីមុនមកនៅលើមេឃ ហើយទទួលបានការចាប់អារម្មណ៍លើសលប់ពីមនុស្សក្នុងបណ្ដាញសង្គម និងបានលើកឡើងថាពពកនេះចម្លែកមើលទៅហាក់ដូចជាយាន “UFO”​របស់មនុស្សក្រៅភព។

ពពកចម្លែកនេះបានលេចឡើងលើមេឃក្នុងទីក្រុង Bursa ប្រទេស តួកគី កាលពីព្រឹកថ្ងៃទី ១៩ ខែមករា ឆ្នាំ២០២៣កន្លងទៅ ខណៈពេលដែលព្រះអាទិត្យកំពុងរះ ហើយផ្ទៃមេឃបានផ្លាស់ប្តូរពណ៌ពីពណ៌ទឹកក្រូចទៅជាក្រហម និងបានបង្កើតពពកនេះឡើងមើលទៅដូចជា “UFO” និងអ្នកខ្លះគិតថាវាដូចជា “កែវភ្នែក” ដែលវិភាគទៅតាមទម្រងរបស់វា។

ទោះបីជាយ៉ាងណាក៏ដោយបន្ទាប់ពីការផ្សព្វផ្សាយពេញទាំងបណ្ដាញសង្គម ទីភ្នាក់ងារឧតុនិយមជាតិរបស់ប្រទេសទួរគីបាននិយាយថា ការបង្កើតពពកដ៏ចម្លែកនេះ  បណ្តាលមកពីការប្រែប្រួលនៃខ្យល់ខ្លាំងដែលបានបក់កាត់តាមភ្នំ និងជ្រលងនានា ហើយពពកចម្លែកនេះនឹងកើតមានឡើងតាមវិធីនៃធម្មជាតិនៃខ្យល់ ហើយវានឹងរលាយបាត់ទៅវិញក្នុងរយៈពេលមួយម៉ោងក្រោយបន្ទាប់៕ ប្រភព៖ Khaosod

ប្រទេសចិន ៖ ក្រសួងវប្បធម៌ និងទេសចរណ៍របស់ចិនឱ្យដឹងថា ចិននឹងចាប់ផ្តើមបើកគម្រោងធ្វើដំណើរជាក្រុមម្តងទៀតទៅកាន់២០ប្រទេស ។ គេសង្ឃឹមថា នៅចុងឆ្នាំ២០២៣នេះ ភ្ញៀវទេសចរចិននឹងធ្វើដំណើរទៅកម្សាន្តនៅក្រៅប្រទេស រហូតដល់១១៥លាននាក់ ។

ក្រសួងវប្បធម៌ និងទេសចរណ៍បានឱ្យដឹងកាលពីថ្ងៃទី២០ ខែមករា កន្លងមកថា ចាប់តាំងពីថ្ងៃទី៦ ខែកុម្ភៈ តទៅ ក្រុមហ៊ុនទេសចរណ៍នានា និងអ្នកផ្តល់សេវាកម្មទេសចរណ៍តាមអនឡាញ នឹងទទួលបានការអនុញ្ញាតឱ្យរៀបចំដំណើរកម្សាន្តជាក្រុមទៅបរទេស ។ ពួកគេអាចទៅកាន់២០ប្រទេសទូទាំងពិភពលោក រួមមាន ប្រទេសថៃ សហព័ន្ធអារ៉ាប់រួម អាហ្វ្រិកខាងត្បូង រុស្ស៊ី និងគុយបា ។ លើសពីនេះ សេវាកម្មកក់សំបុត្រយន្តហោះ និងកក់សណ្ឋាគារ ក៏ទទួលបានការអនុញ្ញាតដូចគ្នា ។

គួរបញ្ជាក់ថា ទីផ្សារទេសចរណ៍ជាក្រុមរបស់ចិនទៅកាន់បរទេស បានផ្អាកតាំងពីដើមឆ្នាំ២០២០មកម៉្លេះ ដោយសារការរាតត្បាតនៃជំងឺកូវីដ-១៩ ។ បច្ចុប្បន្ន ប្រទេសចិនបានលុបចោលវិធានការពិនិត្យកូវីដស្ទើរទាំងអស់ ដូច្នេះ ការដាក់កំហិតលើការធ្វើដំណើរទៅបរទេស ក៏បានលុបចោលផងដែរ ។

ស្ថានីយទូរទស្សន៍ CCTV ឱ្យដឹងថា បន្ទាប់ពីចិនបានផ្លាស់ប្តូរនយោបាយការចូលប្រទេស និងចេញពីប្រទេស ធ្វើឱ្យទីផ្សារទេសចរណ៍ក្រៅប្រទេសត្រឡប់មកអ៊ូអរម្តងទៀតក្នុងឱកាសបុណ្យចូលឆ្នាំចិន ក្នុងនោះការធ្វើដំណើរកម្សាន្តទៅកាន់ប្រទេសថៃ និងម៉ាល់ឌីវ មានចំនួនកើនឡើងយ៉ាងខ្លាំង ។ ក្រុមហ៊ុនទេសចរណ៍ជាច្រើនបានជំរុញការងាររបស់ពួកគេលើដំណើរកម្សាន្តក្រៅប្រទេស ជាពិសេស ក្រុមប្រទេសអាស៊ីអាគ្នេយ៍ដូចជា ថៃ បានក្លាយជាប្រទេសគោលដៅពេញនិយមសម្រាប់ភ្ញៀវទេសចរចិន ខណៈមានការរឹតបន្តឹតតិចតួចក្នុងការចូលប្រទេសមកលើជនជាតិចិន ។

ជាមួយគ្នានេះ អ្នកធ្វើដំណើរកម្សាន្តបានពិចារណាជ្រើសរើសទៅកាន់ប្រទេសណាដែលងាយស្រួលស្នើសុំទិដ្ឋាការផងដែរ ដូចជា ប្រទេសថៃ និងម៉ាល់ឌីវ ដែលពួកគេអាចសម្រាកលំហែរក្នុងថ្ងៃឈប់សម្រាក ៕

ប្រភព ៖ TNN World

អន្តរជាតិ៖ យោងតាមទីភ្នាក់ងារសារព័ត៌មានរដ្ឋ TASS របស់រុស្ស៊ី បានឲ្យដឹងថា នាវាចម្បាំងរុស្ស៊ីមួយគ្រឿង ដែលបំពាក់ដោយអាវុធល្បឿនលឿនជាងសំឡេង នឹងចូលរួមក្នុងសមយុទ្ធជាមួយកងទ័ពជើងទឹកចិន និងអាហ្វ្រិកខាងត្បូងក្នុងខែកុម្ភៈខាងមុខនេះ។ នេះបើយោងតាមការចុះផ្សាយរបស់សារព័ត៌មាន Aljazeera ។

នាវាចម្បាំងនេះត្រូវបានបំពាក់ដោយកាំជ្រួច Zircon ដែលហោះក្នុងល្បឿនសំឡេងប្រាំបួនដង និងមានរយៈចម្ងាយឆ្ងាយជាង ១,០០០គីឡូម៉ែត្រ។ កាំជ្រួច ទាំង នោះបានក្លាយ ជា ចំណុច កណ្តាល នៃ ឃ្លាំង អាវុធ លឿន ជាង សំឡេង របស់ រុស្ស៊ី រួម ជា មួយ នឹង យាន Avangard glide ដែល ចូល កាតព្វកិច្ច ប្រយុទ្ធ ក្នុង ឆ្នាំ ២០១៩។

TASS បាននិយាយនៅក្នុងរបាយការណ៍របស់ខ្លួនដោយដកស្រង់ប្រភពការពារដែលមិនស្គាល់អត្តសញ្ញាណថា “ឧត្តមនាវី Gorshkov” … នឹងទៅកាន់ចំណុចគាំទ្រផ្នែកដឹកជញ្ជូននៅ Tartus របស់ប្រទេសស៊ីរី ហើយបន្ទាប់មកចូលរួមក្នុងសមយុទ្ធកងទ័ពជើងទឹករួមគ្នាជាមួយកងទ័ពជើងទឹកចិន និងអាហ្វ្រិកខាងត្បូង។

កងកម្លាំងការពារជាតិអាហ្រ្វិកខាងត្បូង បាននិយាយថា សមយុទ្ធនេះនឹងដំណើរការចាប់ពីថ្ងៃទី១៧ ដល់ថ្ងៃទី២៦ ខែកុម្ភៈ ឆ្នាំ២០២៣ នៅជិតទីក្រុងកំពង់ផែ Durban និង Richards Bay នៅលើឆ្នេរសមុទ្រភាគខាងកើតនៃប្រទេសអាហ្វ្រិកខាងត្បូង។ដោយការធ្វើសមយុទ្ធរួមនេះមានគោលបំណង “ពង្រឹងទំនាក់ទំនងដែលកំពុងរីកចម្រើនរួចទៅហើយរវាងអាហ្វ្រិកខាងត្បូង រុស្ស៊ី និងចិន” ។

ដោយឡែកកងកម្លាំងការពារជាតិបានបន្ថែមទៀតថា នេះជាសមយុទ្ធធ្វើជាលើកទីពីរហើយ ដែលមានការចូលរួមពីប្រទេសទាំងបីនៅអាហ្វ្រិកខាងត្បូង បន្ទាប់ពីសមយុទ្ធនៅឆ្នាំ២០១៩ ៕