ប្រទេសអាហ្វ្រិកខាងត្បូង ៖ កងកម្លាំងការពារជាតិអាហ្វ្រិកខាងត្បូងបង្ហើបថា អាហ្វ្រិកខាងត្បូងនឹងធ្វើសមយុទ្ធរួមគ្នានៅសមុទ្រជាមួយចិន និងរុស្ស៊ី ដើម្បីពង្រឹង និងពង្រីកទំនាក់ទំនងរវាងប្រទេសទាំងបី ។ ការធ្វើសមយុទ្ធលើកនេះ នឹងធ្វើនៅក្នុងទីក្រុងកំពង់ផែ Durban និង Richards Bay ដោយទាហានអាហ្វ្រិកខាងត្បូងនឹងចូលរួមសមយុទ្ធចំនួន៣៥០នាក់ ។ ការធ្វើសមយុទ្ធមានឈ្មោះថា ប្រតិបត្តិការ Mosi ចាប់ពីថ្ងៃទី១៧-២៦ ខែកុម្ភៈ ខាងមុខនេះ គឺគម្រប់១ឆ្នាំដែលរុស្ស៊ីចូលឈ្លានពានអ៊ុយក្រែន ។

លោក Cobus Marais មកពីសម្ព័ន្ធប្រជាធិបតេយ្យអាហ្វ្រិកខាងត្បូង ផ្នែកប្រឆាំងឱ្យដឹងថា ការធ្វើសមយុទ្ធនេះ នឹងធ្វើឱ្យគេមើលមកប្រទេសអាហ្វ្រិកខាងត្បូងថា មិនមែនជាប្រទេសប្រកាន់ជំហរកណ្តាលទេ ។ លោកបន្តថា អាហ្វ្រិកខាងត្បូងបានលម្អៀងទៅរករុស្ស៊ីនិងចិន ហើយនឹងមានបញ្ហាជាមួយប្រទេសលោកខាងលិចដូចជា សហរដ្ឋអាមេរិក ជប៉ុន អាល្លឺម៉ង់ និងអង់គ្លេស ដែលប្រទេសទាំងនេះគឺជាដៃគូពាណិជ្ជកម្មឈានមុខរបស់អាហ្វ្រិកខាងត្បូង ។

គួរបញ្ជាក់ថា កាលពីចុងឆ្នាំ២០២២ មានការស្ទង់មតិពលរដ្ឋអាហ្វ្រិកខាងត្បូងឃើញថា ៧៤,៣% ជឿថា ការឈ្លានពានអ៊ុយក្រែនរបស់រុស្ស៊ី គឺជាសកម្មភាពឈ្លានពាន ។ តាមសារព័ត៌មាន TASS បានរាយការណ៍ដោយដកស្រង់ប្រភពគួរឱ្យទុកចិត្តថា នាវាចម្បាំងរបស់រុស្ស៊ីដែលបំពាក់មីស៊ីលល្បឿនលឿនជាងសំឡេង នឹងបញ្ជូនទៅធ្វើសមយុទ្ធជាមួយកងទ័ពជើងទឹកចិន និងកងទ័ពជើងទឹកអាហ្វ្រិកខាងត្បូងនៅខែកុម្ភៈផងដែរ ។

វាជាការធ្វើសមយុទ្ធរួមគ្នាលើកដំបូងរបស់នាវាចម្បាំង «Admiral Gorshov» ដែលបំពាក់មីស៊ីលល្បឿនលឿនជាងសំឡេងដល់ទៅ៩ដង ក្នុងចម្ងាយហោះហើរ១.០០០គីឡូម៉ែត្រ ៕

ប្រភព ៖ TNN World

អន្តរជាតិ៖ ប្រទេសចិនបានរាយការណ៍ឱ្យដឹងថា មនុស្សជិត ១៣,០០០នាក់ បានស្លាប់ដោយសារមេរោគរាតត្បាត កូវីដ-១៩ ក្នុងរយៈមួយសប្តាហ៍ ដោយអ្នកជំនាញបានអះអាងថា នេះគឺជារលកនៃការឆ្លងនៅក្នុងប្រទេសដែលបានឈានដល់កម្រិតកំពូល។ នេះបើយោងតាមការចុះផ្សាយរបស់សារព័ត៌មាន VNexpress ។

ក្នុងសន្និសីទសារព័ត៌មានកាលពីថ្ងៃទី២៣ ខែមករា មន្ត្រីសុខាភិបាលចិនបាននិយាយថា ចំនួនអ្នកជំងឺកូវីដ-១៩ ដែលសម្រាកព្យាបាលនៅមន្ទីរពេទ្យបានឆ្លងផុតកម្រិតកំពូលហើយ ដោយតិចជាង ៤០ភាគរយ នៃអ្នកដែលត្រូវបានព្យាបាលក្នុងស្ថានភាពធ្ងន់ធ្ងរកាលពីថ្ងៃទី ១៩ ខែមករា ដល់ថ្ងៃទី២៣ ខែមករា បើប្រៀបធៀបទៅនឹង កំណត់ត្រាខ្ពស់បំផុតនៅថ្ងៃទី ៥ ខែមករា។

ប្រទេសចិន ក្នុងខែធ្នូ បានចាប់ផ្តើមបន្ធូរបន្ថយវិធានការឆ្លើយតបកូវីដ-១៩ ក្នុងស្រុក និងបានលុបចោលតម្រូវការឯកសារសម្រាប់មនុស្សដែលចូលមកពីបរទេសចាប់ពីថ្ងៃទី៨ ខែមករា ដោយបញ្ចប់ការបិទប្រទេសជិតក្នុងរយៈ៣ឆ្នាំ ក្រោមគោលនយោបាយ No Covid ដើម្បីដោះស្រាយជំងឺរាតត្បាត។

ប្រទេសចិន ក៏បានផ្អាករាល់ការបង្ហាញទិន្នន័យនៃចំនួនប្រជាជនឆ្លង ស្លាប់ប្រចាំថ្ងៃផងដែរ បន្ទាប់ពីការបន្ធូរបន្ថយការរឹតបន្តឹង ប៉ុន្តែការកើនឡើងយ៉ាងខ្លាំងនៃចំនួនអ្នកឆ្លងបានធ្វើឱ្យប្រព័ន្ធសុខភាពស្ថិតនៅក្រោមសម្ពាធយ៉ាងខ្លាំង។

លោក Wu Sun You ប្រធានផ្នែករោគរាតត្បាតនៃមជ្ឈមណ្ឌលគ្រប់គ្រង និងបង្ការជំងឺចិនបាននិយាយកាលពីថ្ងៃទី២១ ខែមករាថា វាពិតជាលំបាកណាស់សម្រាប់ប្រទេសចិនក្នុងការបំបែករលកថ្មីនៃកូវីដ-១៩ ក្នុងរយៈពេលប៉ុន្មានខែខាងមុខ ដោយសារតែប្រហែល ៨០ភាគរយ នៃប្រជាជនរបស់ប្រទេសចិនត្រូវបានឆ្លងមេរោគកូវីដ-១៩ ៕

រដ្ឋធានីប៊ែរឡាំង៖ ជាមួយនឹងសម្ពាធរបស់សម្ពន្ធមិត្តលោកខាងលិច កាន់តែទម្លាក់ខ្លាំងឡើង មកលើលោកអធិការបតីអាល្លឺម៉ង់ រហូតធ្វើឲ្យក្រុងប៊ែរឡាំង ផ្លាស់ប្ដូរឥរិយាបថ ប៉ុន្ដែឥឡូវនេះ លោកស្រី រដ្ឋមន្រ្ដីក្រសួងការបរទេស បានអះអាង ថា អាល្លឺម៉ង់ នឹងមិនរារាំង ដល់ការនាំចេញរថក្រោះ Leopard នោះទេ ហើយគេសង្ឃឹម ថា រថក្រោះប្រភេទនេះ ប្រហែលជិត២០គ្រឿង អាចនឹងត្រូវបញ្ជូនទៅកាន់ប្រទេសអ៊ុយក្រែន។

សារព័ត៌មាន BBC បានចេញផ្សាយ កាលពីព្រឹក ថ្ងៃអង្គារ ទី២៤ ខែមករា ថា លោកស្រី អានណា បាអៀប៊ុក (Anna Baerbock) រដ្ឋមន្រ្ដីក្រសួងការបរទេសអាល្លឺម៉ង់ បានបញ្ជាក់ ថា «លោកស្រី នឹងមិនរារាំងដល់ប្រទេសប៉ូឡូញ ប្រសិនបើក្រុងវ៉ាសាវី ត្រូវផ្ដល់រថក្រោះ Leopard 2 ផលិតដោយអាល្លឺម៉ង់ បញ្ជូនទៅកាន់ប្រទេសអ៊ុយក្រែន។

អ៊ុយក្រែន បានអំពាវនាវដល់បណ្ដាប្រទេសបស្ចិមលោក ត្រូវតែផ្ដល់រថក្រោះផលិត ដោយប្រទេសអាល្លឺម៉ង់ ទៅជួយដល់ពួកគេ។ រថក្រោះផលិត Leopard របស់អាល្លឺម៉ង់ នឹងជួយដល់កងទ័ពការពារទឹកដីរបស់អ៊ុយក្រែន ដណ្ដើមជ័យជម្នះ ពីទាហានរុស្ស៊ី។

លោក ឌីមីត្រូ គូឡេបា (Dmytro Kuleba) រដ្ឋមន្រ្ដីក្រសួងការបរទេសអ៊ុយក្រែន បានប្រាប់ដល់បណ្ដាញទូរទស្សន៍របស់ចក្រភពអង់គ្លេស BBC ថា អាល្លឺម៉ង់ មានអំណាច ដើម្បីសង្គ្រោះអាយុជីវិតរបស់ទាហានអ៊ុយក្រែន យ៉ាងច្រើន។ ប៉ុន្ដែក្រុងប៊ែរឡាំង នៅតែមិនទាន់ព្រមព្រៀងនៅឡើយ។

ទោះជាយ៉ាងណា លោកស្រី Baerbock រដ្ឋមន្រ្ដីក្រសួងបរទេសអាល្លឺម៉ង់ បានបញ្ជាក់ កាលពីថ្ងៃអាទិត្យ ថា ប៉ូឡូញ នៅតែមិនទាន់បានស្នើសុំការអនុញ្ញាត នាំចេញរថក្រោះផលិតដោយអាល្លឺម៉ង់ នៅឡើយ។ លោកស្រី រដ្ឋមន្រ្ដី បានប្រាប់ដល់ទូរទស្សន៍បារាំង LCI TV ថា «សម្រាប់ពេលនេះ សំណួរមិនត្រូវបានសួរទេ ប៉ុន្តែប្រសិនបើយើង ត្រូវបានគេសួរ យើងនឹងមិនរារាំងនោះដែរ»។

លោក ម៉ាទូស ម៉ូរ៉ាវីកគី (Mateusz Morawiecki) នាយករដ្ឋមន្រ្ដីប៉ូឡូញ បានថ្លែង កាលពីថ្ងៃចន្ទ ថា រដ្ឋាភិបាលក្រុងវ៉ាសាវី នឹងធ្វើសំណើសុំសិទ្ធិនាំចេញរថក្រោះ Leopard ផលិតដោយអាល្លឺម៉ង់ ទៅកាន់ក្រុងប៊ែរឡាំង។ ប៉ុន្ដែលោកនាយករដ្ឋមន្រ្ដី បានបញ្ជាក់ ថា ប៉ូឡូញ នឹងបញ្ជូន Leopard 2 ជាច្រើនគ្រឿង បញ្ចេញពីឃ្លាំងស្ដុកអាវុធរបស់ខ្លួន នាំទៅជួយដល់ប្រទេសអ៊ុយក្រែន ប្រសិនបើក្រុងប៊ែរឡាំង មិនអនុញ្ញាត។

លោកនាយករដ្ឋមន្រ្ដីប៉ូឡូញ បានសង្កត់ធ្ងន់ ថា «នៅទីបំផុត បើទោះជាយើងមិនទទួលបានការអនុញ្ញាតយ៉ាងណាក៏ដោយ នៅក្នុងក្របខ័ណ្ឌក្រុមចម្រុះតូចមួយ… យើងនឹងនៅតែប្រគល់រថក្រោះរបស់យើង រួមជាមួយនឹងប្រទេសផ្សេងៗទៀត បញ្ជូនទៅកាន់ប្រទេសអ៊ុយក្រែន»។

លោក ចូសេប ប័ររ៉ែល (Josep Borrell) ប្រធានគោលនយោបាយការបរទេសសហភាពអឺរ៉ុប បានបញ្ជាក់ ថា «អាល្លឺម៉ង់ មិនគួរបញ្ឈប់បណ្ដាប្រទេសអឺរ៉ុប នាំចេញរថក្រោះ Leopard 2 ទៅជួយអ៊ុយក្រែន នោះឡើយ។ ចំណែកការពិភាក្សា អំពីកិច្ចគាំទ្រ ជួយដល់អ៊ុយក្រែន នឹងមិនគួរនៅតែវិលវល់ ជុំវិញបញ្ហារថក្រោះទេ»។

អ្នកនាំពាក្យ រដ្ឋាភិបាលអាល្លឺម៉ង់ បានបញ្ជាក់ កាលពីថ្ងៃចន្ទ ថា ក្រុងប៊ែរឡាំង នៅមិនទាន់ទទួលបានសំណើសុំសិទ្ធិនាំចេញរថក្រោះ Leopard 2 ណាមួយនៅឡើយ។

អស់រយៈពេល២ទៅ៣ខែកន្លងមកនេះ ក្រសួងការពារជាតិអាល្លឺម៉ង់ បានចងក្រងបញ្ជីឈ្មោះរថក្រោះ Leopard គ្រប់ម៉ូដែលរបស់ខ្លួន ដែលប្រទេសមហាសេដ្ឋកិច្ចកំពូល នៅអឺរ៉ុបមួយនេះ មាន ដោយរាប់បញ្ជូលទាំង រថក្រោះដែលអាចនឹងត្រូវផ្គត់ផ្គង់ទៅឲ្យអ៊ុយក្រែន ផងដែរ។

សារព័ត៌មានរបស់អាល្លឺម៉ង់ Der Spiegel (ឌឺរ ស្ពៀហ្គែល) បានរាយការណ៍ កាលពីថ្ងៃទី២១ ខែមករា ដោយដកស្រង់ប្រភពនានា ពីរដ្ឋាភិបាលអាល្លឺម៉ង់ ថា ក្រសួងការពារជាតិអាល្លឺម៉ង់ ជឿ ថា រថក្រោះ Leopard 2A5 ចំនួន១៩គ្រឿង សមល្មម នឹងត្រូវបញ្ជូនទៅកាន់ប្រទេសអ៊ុយក្រែន៕

ប្រទេសអ៊ុយក្រែន ៖ អតីតនាយករដ្ឋមន្ត្រីប្រទេសអង់គ្លេសបានធ្វើដំណើរទៅកាន់ទីក្រុងគៀវ ប្រទេសអ៊ុយក្រែន តាមពាក្យអញ្ជើញរបស់ប្រធានាធិបតីអ៊ុយក្រែន ។ ប្រធានាធិបតីអ៊ុយក្រែនបានប្រកាសដោះស្រាយបញ្ហាពុករលួយនានា បន្ទាប់ពីប្រទេសនេះមានមន្ត្រីជាន់ខ្ពស់ពុករលួយ ខណៈអ៊ុយក្រែនកំពុងស្វែងរកអាវុធតស៊ូជាមួយរុស្ស៊ី ។

អតីតនាយករដ្ឋមន្ត្រីអង់គ្លេស លោក បូរីស ចនសុន (Boris Johnson) បានធ្វើដំណើរទៅកាន់ជាយក្រុងគៀវ កាលពីថ្ងៃទី២២ ខែមករា កន្លងមក ។ លោកត្រូវបាន លោកប្រធានាធិបតីអ៊ុយក្រែន Volodymy Zelensky ទទួលស្វាគមន៍នៅទីក្រុងគៀវ ។ បន្ទាប់មក លោកបានទៅកាន់ទីក្រុងប៊ូចា និងក្រុងបូរ៉ូឌៀនកា ស្ថិតនៅទិសពាយ័ព្យទីក្រុងគៀវ ដែលទាហានរុស្ស៊ីបានគ្រប់គ្រងទីក្រុងទាំងនេះកាលពីខែមីនា ឆ្នាំ២០២២ មុននឹងដកថយវិញ ។

លោក ចនសុន ថ្លែងថា ៖ «ជនជាតិអ៊ុយក្រែនបានរងទុក្ខយូរហើយ ផ្លូវតែមួយដែលអាចបញ្ឈប់សង្គ្រាមបាន គឺអ៊ុយក្រែនត្រូវតែជាអ្នកឈ្នះ និងឈ្នះឱ្យបានរហ័សបំផុតតាមដែលអាចធ្វើបាន ។ វាដល់ពេលហើយដែលយើងត្រូវជួយគ្នា និងឱ្យពលរដ្ឋអ៊ុយក្រែនមានអាវុធគ្រប់យ៉ាងដើម្បីយកឈ្នះវិបត្តិ» ។

អ្នកនាំពាក្យរបស់លោក រីស៊ី ស៊ុនណាក់ (Rishi Sunak) នាយករដ្ឋមន្ត្រីអង់គ្លេសបច្ចុប្បន្ន បង្ហាញថា នាយករដ្ឋមន្ត្រីអង់គ្លេសគាំទ្រការធ្វើដំណើរទៅប្រទេសអ៊ុយក្រែនរបស់លោក ចនសុន ដែលវាបង្ហាញឱ្យឃើញថា ប្រទេសអង់គ្លេសគាំទ្រអ៊ុយក្រែន ។ លោក ចនសុន នៅតែជាសមាជិកសភាតំណាងរាស្ត្រគណបក្សអភិរក្ស ដែលជាគណបក្សរបស់រដ្ឋាភិបាលអង់គ្លេស ហើយលោកបានធ្វើដំណើរទៅអ៊ុយក្រែនដោយមិនបានផ្តល់ដំណឹងជាមុនឡើយ ក្នុងអំឡុងពេលមានបញ្ហាហិរញ្ញវត្ថុរបស់លោក ។

ជាមួយគ្នានេះ លោកប្រធានាធិបតីអ៊ុយក្រែន Volodymy Zelensky ឱ្យដឹងថា លោកនឹងដោះស្រាយបញ្ហាពុករលួយនៅក្នុងរដ្ឋាភិបាល ព្រមទាំងមានការសម្រេចចិត្តសមរម្យមួយក្នុងសប្តាហ៍នេះ ។ លោកមិនចង់បង្ហាញទៅកាន់សាធារណៈក្នុងពេលនេះទេ ប៉ុន្តែលោកប្រាប់ថា អ្វីៗនឹងទទួលបានយុត្តិធម៌ ។ លោកបន្តថា លោកបានទទួលលិខិតលាលែងពីតំណែងរបស់អនុរដ្ឋមន្ត្រីរួចហើយ បន្ទាប់ពីមានការស៊ើបអង្កេតរឿងថា អនុរដ្ឋមន្ត្រីរូបនេះទទួលសំណូក ។

លោកប្រធានាធិបតីអ៊ុយក្រែនបានថ្លែងបែបនេះ ក្រោយពីមានការរាយការណ៍ថា លោក វ៉ាស៊ីល ឡូស៊ីនស្គី (Vassil Losinski)
អនុរដ្ឋមន្ត្រីស្តីទី ទទួលបន្ទុកការអភិវឌ្ឍតំបន់របស់អ៊ុយក្រែន ត្រូវបានឃាត់ខ្លួនពីបទទទួលសំណូក ខណៈលោក Olexi Reznikov រដ្ឋមន្ត្រីក្រសួងការពារជាតិ ត្រូវបានគេឃ្លាំមើលរឿងពុករលួយ ។ គេលើកឡើងថា កងទ័ពបានទិញអាហារក្នុងតម្លៃខ្ពស់ ប៉ុន្តែក្រសួងការពារជាតិជូនដំណឹងថា ជាព័ត៌មានមិនពិត និងបានឱ្យគណៈកម្មការក្នុងរដ្ឋសភាស៊ើបអង្កេត ។

ទោះយ៉ាងណា អង្គការតម្លាភាពអន្តរជាតិ (Transparency International) បានចាត់លំដាប់តម្លាភាពរបស់អ៊ុយក្រែននៅក្នុងឆ្នាំ២០២១ ស្ថិតនៅលេខរៀងទី១២២ ក្នុងចំណោម១៨០ប្រទេស គឺមិនខុសគ្នាពីរុស្ស៊ីប៉ុន្មានទេ ។ លើសពីនេះ សហភាពអឺរ៉ុប (EU) បានកំណត់ឱ្យអ៊ុយក្រែនធ្វើកំណែទម្រង់លុបបំបាត់អំពើពុករលួយ ជាលក្ខខណ្ឌមួយក្នុងចំណោមលក្ខខណ្ឌទាំងអស់ក្នុងការទទួលយកអ៊ុយក្រែនជាសមាជិក ៕ ប្រភព ៖ TNN World