ប្រទេសជប៉ុន ៖ នាយករដ្ឋមន្ត្រីប្រទេសជប៉ុន លោក Fumio Kishida បានថ្លែងកាលពីថ្ងៃទី២៧ ខែមករា កន្លងមកថា រដ្ឋាភិបាលជប៉ុននឹងលុបចោលបម្រាមពាក់ម៉ាស់នៅក្នុងម្លប់ ព្រមទាំងកាត់បន្ថយកម្រិតចំណាត់ថ្នាក់វេជ្ជសាស្ត្រសម្រាប់អ្នកជំងឺកូវីដ-១៩ ឱ្យក្លាយជាអ្នកជំងឺធម្មតាផងដែរ ។

ការលុបចោលបម្រាមពាក់ម៉ាស់នេះ នឹងអនុវត្តចាប់ពីខែឧសភា ឆ្នាំ២០២៣ តទៅ ។ អ្នកជំងឺកូវីដ-១៩ នឹងត្រូវបានចាត់ទុកជាអ្នកជំងឺប្រភេទដូចគ្នានឹងជំងឺគ្រុនផ្តាសាយដែរ ខណៈកាលពីមុន គេចាត់ទុកអ្នកជំងឺកូវីតស្ថិតក្នុងប្រភេទជំងឺរបេង និងជំងឺ SARS ។

លោកនាយករដ្ឋមន្ត្រីជប៉ុនបានថ្លែងតាមទូរស័ព្ទថា ៖ «ការពាក់ម៉ាស់ មិនថានៅក្នុងម្លប់ ឬកណ្តាលថ្ងៃ គឺអាស្រ័យលើការសម្រេចចិត្តរបស់មនុស្សម្នាក់ៗ ។ យើងនឹងឈានទៅដំណាក់កាលមួយទៀតក្នុងការប្រើជីវិតជាមួយជំងឺកូវីដ និងរួមគ្នាកសាងសង្គម ដើម្បីឱ្យប្រទេសជប៉ុនត្រឡប់មកសភាពធម្មតាវិញយ៉ាងរហ័ស ទាំងក្នុងលំនៅឋាន សាលារៀន ការិយាល័យធ្វើការ និងគ្រប់ផ្នែកនៃជីវិត» ។

ទោះយ៉ាងណា មន្ត្រីជប៉ុនបានណែនាំឱ្យពលរដ្ឋពាក់ម៉ាស់នៅកន្លែងមានហានិភ័យខ្ពស់ដូចជា ផ្ទះថែទាំមនុស្សចាស់ ខណៈអ្នកជំនាញមួយចំនួនបារម្ភថា ការលុបចោលបម្រាមនេះអាចធ្វើឱ្យជំងឺកូវីដរាតត្បាតជាថ្មីទៀត ។

តាមការស្ទង់មតិរបស់សារព័ត៌មានផ្សេងៗបញ្ជាក់ថា ប្រជាពលរដ្ឋភាគច្រើននឹងនៅតែពាក់ម៉ាស់បន្តទៀតដើម្បីថែទាំសុខភាពពួកគេ បើទោះជារដ្ឋាភិបាលប្រកាសលុបចោលបម្រាមពាក់ម៉ាស់ក្តី ៕

ប្រភព ៖ beartai BRIEF

រដ្ឋធានីអង់ការ៉ា(Ankara)៖ សង្គ្រាមរបស់រុស្ស៊ី នៅក្នុងប្រទេសអ៊ុយក្រែន បានធ្វើឲ្យប្រទេសស៊ុយក្រែន និង ហ្វាំងឡង់ដ៍ បោះបង់ចោលនូវគោលនយោបាយអព្យាក្រឹតរបស់ខ្លួន ដែលបានប្រកាន់ខ្ជាប់ អស់រយៈពេលជាច្រើនទសវត្សរ៍នោះចោល ហើយងាកទៅដាក់ពាក្យចូល ជាសមាជិករបស់អង្គការណាតូ ប៉ុន្ដែតួកគី និង ហុងគ្រី នៅតែរារាំងដល់ប្រទេសអឺរ៉ុបខាងជើងទាំង២នេះ ចូលរួម នៅក្នុងអង្គការសម្ពន្ធមិត្តយោធាដ៏ខ្លាំងក្លារបស់ពិភពលោកមួយនេះ។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃចន្ទ ទី៣០ ខែមករា ថា ប្រធានាធិបតីតួកគី លោក រេសេប តាយយីប អេដូហ្គេន (Recep Tayyip Erdogan) បានបង្ហាញសញ្ញា ថា រដ្ឋាភិបាលក្រុងអង់ការ៉ារបស់គាត់ អាចនឹងទទួលយកហ្វាំងឡង់ដ៍ ឲ្យចូលទៅក្នុងអង្គការណាតូ មុនពេលមានវិធានការណាមួយ ទៅលើប្រទេសអឺរ៉ុបខាងជើង ដែលមានព្រំដែនជាប់គ្នាជាមួយនឹងស៊ុយអែត។

លោក អេដូហ្គេន បានថ្លែង ត្រឹមតែប៉ុន្មានថ្ងៃ ក្រោយពេលក្រុងអង់ការ៉ា បានផ្អាកនូវកិច្ចពិភាក្សា ស្តីអំពីការចូលជាសមាជិករបស់អង្គការណាតូ ជាមួយប្រទេសទាំងពីរ បន្ទាប់ពីមានការតវ៉ា នៅទីក្រុងស្ដុកខម (Stockholm) ដែលក្នុងនោះមានអ្នកនយោបាយស្តាំនិយមម្នាក់ បានដុតគម្ពីរគូរ៉ាន់ (Quran) ថតចម្លងរបស់សាសនាអ៊ិស្លាម។

ប្រធានាធិបតីតួកគី បានបញ្ជាក់ នៅសុន្ទរកថា ចាក់ផ្សាយ តាមទូរទស្សន៍ កាលពីថ្ងៃអាទិត្យ ថា «យើងអាចផ្តល់សារផ្សេង ទៅកាន់ហ្វាំងឡង់ដ៍ នៅលើកម្មវិធីអង្គការណាតូរបស់ពួកគេ ហើយស៊ុយអែត នឹងភ្ញាក់ផ្អើល ខណៈក្រុងស្ដុកខម ឃើញសាររបស់យើង។ ប៉ុន្តែហ្វាំងឡង់ដ៍ មិនគួរធ្វើឲ្យមានកំហុសដូចគ្នានឹងស៊ុយអែត បានធ្វើនោះឡើយ»។

ប្រទេសស៊ុយអែត និង ហ្វាំងឡង់ដ៍ កាលពីឆ្នាំមុន បានដាក់ពាក្យ ចូលរួមជាមួយអង្គការណាតូ ក្រោយការលុកលុយរបស់រុស្ស៊ី ទៅលើអ៊ុយក្រែន ដោយបានបោះបង់ចោលនូវការគោលនយោបាយ មិនចូលបក្សសម្ព័ន្ធយោធា អស់រយៈពេលជាយូរអង្វែងរបស់ពួកគេ។

ការចូលរួមជាមួយនឹងអង្គការណាតូ ត្រូវមានការយល់ព្រម ពីសមាជិកទាំង៣០របស់អង្គការសម្ពន្ធមិត្តយោធាមួយនេះ។ ចំណែកតួកគី និង ហុងគ្រី ជាអ្នកជំទាស់ ហើយសភាហុងគ្រី ត្រូវគេរំពឹង ថា នឹងអនុញ្ញតដល់ប្រទេសស៊ុយអែត និង ហ្វាំងឡង់ដ៍ ចូលរួម នៅក្នុងខែកុម្ភៈ។

ការប្រឆាំងជំទាស់របស់ប្រធានាធិបតីតួកគី ក្រោយមានការបដិសេធពីប្រទេសស៊ុយអែត នៅក្នុងការធ្វើបត្យាប័នមនុស្សរាប់សិបនាក់ ដោយសារក្រុងអង់ការ៉ា បានភ្ជាប់ជាមួយគណបក្សពលករឃឺដ (PKK) ដែលបានហាមឃាត់ និង ការប៉ុនប៉ងធ្វើរដ្ឋប្រហារបរាជ័យ នៅក្នុងប្រទេសតួកគី កាលពីឆ្នាំ២០១៦៕

ប្រទេសឥណ្ឌា ៖ នៅខែមករានេះ ប្រទេសឥណ្ឌាបាននាំចេញពងមាន់ច្រើនបំផុតទៅកាន់ម៉ាឡេស៊ី ចំនួន៥០លានគ្រាប់ ខណៈម៉ាឡេស៊ីកំពុងជួបបញ្ហាខ្វះខាតពងមាន់យ៉ាងខ្លាំង ។ អាហារសត្វនៅម៉ាឡេស៊ីបានឡើងថ្លៃខ្ពស់ប៉ះពាល់ដល់កសិដ្ឋានចិញ្ចឹមមាន់ ដោយសារសង្គ្រាមនៅអ៊ុយក្រែនធ្វើឱ្យកសិករកាត់បន្ថយការចិញ្ចឹម ។

ប្រទេសផ្សេងទៀតដូចជា អូម៉ង់ និងកាតា ជាអ្នកទិញពងមាន់ពីឥណ្ឌា ប៉ុន្តែក្នុងរយៈពេលប៉ុន្មានខែមកនេះ កសិដ្ឋានចិញ្ចឹមមាន់នៅឥណ្ឌាបានទទួលការបញ្ជាទិញជាច្រើន ដោយសារទិន្នផលផលិតរបស់ប្រទេសនាំមុខមួយចំនួនធ្លាក់ចុះ ។ ការបញ្ជាទិញច្រើនបំផុត គឺមកពីម៉ាឡេស៊ី កន្លងមក ប្រទេសនេះធ្លាប់នាំចេញពងមាន់ទៅកាន់ប្រទេសសិង្ហបុរី និងប្រទេសផ្សេងៗនៅអាស៊ី ហើយដើម្បីរក្សាការផ្គត់ផ្គង់ក្នុងស្រុកដោយសារតម្លៃខ្ពស់ លោក Mohamad Sabu រដ្ឋមន្ត្រីក្រសួងកសិកម្ម និងអាហាររបស់ម៉ាឡេស៊ី បានធ្វើដំណើរទៅកាន់ខេត្តណាម៉ាកកាល រដ្ឋតាមីលណាឌូ ភាគខាងត្បូងប្រទេសឥណ្ឌា ជាខេត្តមានកសិដ្ឋានចិញ្ចឹមមាន់ច្រើនបំផុត ។

ការនាំចូលពងមាន់ពីឥណ្ឌានឹងជួយធ្វើឱ្យតម្លៃពងមាន់ធ្លាក់ចុះនៅម៉ាឡេស៊ី បន្ទាប់ពីបានឡើងថ្លៃខ្ពស់នៅខែធ្នូ កន្លងមក ។ នៅខែវិច្ឆិកាឆ្នាំមុន ចំនួនពងមាន់របស់ម៉ាឡេស៊ីធ្លាក់ចុះដល់១៥៧លានគ្រាប់ ហើយនៅសល់ត្រឹម១លានគ្រាប់ប៉ុណ្ណោះនៅខែធ្នូ ឆ្នាំមុន ។ ទោះយ៉ាងណា ការផលិតពងមាន់របស់ម៉ាឡេស៊ីអាចនឹងធម្មតាវិញនៅប៉ុន្មានខែខាងមុខទៀត ដោយសាររដ្ឋាភិបាលបង្កើនប្រាក់ឧបត្ថម្ភ ។

ជាមួយគ្នានេះ តម្លៃពងមាន់របស់ឥណ្ឌាក៏បានឡើងថ្លៃផងដែរ ដែលអាចធ្វើឱ្យចំណូលពីការនាំចេញធ្លាក់ចុះ ប៉ុន្តែបច្ចុប្បន្ន តម្រូវការពងមាន់មិនបង្ហាញសញ្ញាធ្លាក់ចុះទេ ហើយនៅប៉ុន្មានខែខាងមុខ ប្រទេសសិង្ហបុរី និងស្រីលង្ការ នឹងនាំចូលពងមាន់ពីឥណ្ឌា ៕

ប្រភព ៖ AEC Connect

ប្រទេសវៀតណាម ៖ អត្ថបទមួយចុះផ្សាយដោយសារព័ត៌មាន Stat Trade times របស់ឥណ្ឌាបញ្ជាក់ថា ប្រទេសវៀតណាមបានក្លាយជាមជ្ឈមណ្ឌលឧស្សាហកម្មកណ្តាលរបស់អាស៊ាន ដែលកំពុងលូតលាស់យ៉ាងខ្លាំង ជាពិសេស ផ្នែកបច្ចេកវិទ្យា និងគ្រឿងតុបតែងខ្លួន ។

អត្ថបទនេះបញ្ជាក់ទៀតថា ខណៈប្រទេសមួយចំនួននៅអាស៊ានកំពុងងើបឡើងវិញពីការឆ្លងរាលដាលនៃជំងឺកូវីដ-១៩ សេដ្ឋកិច្ចវៀតណាមបានរីកចម្រើនគួរឱ្យចាប់អារម្មណ៍ ស្មើ៨,០២% ក្នុងត្រីមាសទី៤ ឆ្នាំ២០២២ ។ គេចាត់ទុកថា វៀតណាមបានរីកចម្រើនខ្លាំងជាងប្រទេសធំៗនៅអាស៊ាន ។ ក្រៅពីនេះ ប្រាក់ចំណូលពីការនាំចេញស្មើ៣៧២លានដុល្លារអាមេរិក ឬកើនឡើង១០% បើធៀបពីមួយឆ្នាំទៅមួយឆ្នាំ ។

មូលហេតុនៃការរីកចម្រើននេះ មួយផ្នែកមកពីខ្សែសង្វាក់ផ្គត់ផ្គង់បានផ្អាកក្នុងប្រទេសចិន ដែលជាមជ្ឈមណ្ឌលផលិតកម្មធំបំផុតនៅអាស៊ាន ដោយក្នុងពេលជំងឺកូវីត-១៩ ឆ្លងរាលដាលកន្លងមក ធ្វើឱ្យរោងចក្រជាច្រើនកន្លែងបិទទ្វារ ។ ដូច្នេះ ក្រុមហ៊ុនផ្សេងៗស្វែងរកទីតាំងផលិតថ្មីៗ និងចៀសវាងការប្រឈម ។

ក្រៅពីនេះ វៀតណាមនៅមានកម្លាំងពលកម្មច្រើនអាចប្រជែងក្នុងឧស្សាហកម្មផលិតកម្ម និងមានដើមទុនផលិតទាប ដោយសារពលរដ្ឋវៀតណាមកំពុងកើនឡើង ហើយ៧០% មានអាយុក្រោម៣៥ឆ្នាំ នៃចំនួនពលរដ្ឋសរុប៩៧លាននាក់ ។

លើសពីនេះ វៀតណាមមានឆ្នេរសមុទ្រប្រវែង៣.២០០គីឡូម៉ែត្រ ដែលជាទីតាំងអំណោយផលសម្រាប់ការដឹកជញ្ជូនទំនិញចេញ-ចូល ជាពិសេស នៅបរិវេណភាគខាងជើងប្រទេស ។ ក្រៅពីនេះ មានក្រុមហ៊ុនធំៗជាច្រើនដូចជា Nike Adidas Samsung បានផ្លាស់ប្តូរទីតាំងមកកាន់វៀតណាម ខណៈក្រុមហ៊ុនស្មាតហ្វូន Google Pixel ជំនាន់ចុងក្រោយផលិតនៅវៀតណាម ហើយក្រុមហ៊ុន Microsoft ក៏បាននាំចេញ Xbox ពីទីក្រុងហូជីមិញនៅឆ្នាំ២០២២ ផងដែរ ៕

ប្រភព ៖ AEC Connect

ប្រទេសកូរ៉េខាងជើង ៖ ប្រទេសកូរ៉េខាងជើងបានបដិសេធពាក្យចោទប្រកាន់ថា រដ្ឋាភិបាលកូរ៉េខាងជើងបានបញ្ជូនអាវុធឱ្យរដ្ឋាភិបាលរុស្ស៊ី បន្ទាប់ពីអាមេរិកនិយាយថា កូរ៉េខាងជើងស្វែងរកកាំជ្រួច និងមីស៊ីលឱ្យក្រុម Wagner ជាក្រុមហ៊ុនយោធាឯកជនរបស់រុស្ស៊ី ហើយអាមេរិកនឹងដាក់ទោសក្រុមនេះ ។

សារព័ត៌មានកណ្តាលកូរ៉េរាយការណ៍ថា យោងតាមសេចក្តីថ្លែងការណ៍របស់លោក Kwon Jung-gun អគ្គនាយការិយាល័យកិច្ចការអាមេរិករបស់កូរ៉េខាងជើង បានបដិសេធការចោទប្រកាន់រឿងកិច្ចព្រមព្រៀងទិញ-លក់អាវុធជាមួយរុស្ស៊ី ព្រមទាំងដាស់តឿនថា អាមេរិកនឹងត្រូវប្រឈមជាមួយលទ្ធផលមិនល្អ បើនៅតែផ្សាយព័ត៌មានមិនពិតបែបនេះ ។លោកអគ្គនាយរូបនេះបន្តថា ការព្យាយាមលាបពណ៌កូរ៉េខាងជើងដោយការប្រឌិតរឿង គឺជាការបង្កហេតុធ្ងន់ធ្ងរដែលមិនគួរកើតឡើង និងត្រូវមានការតបតវិញ ។ លោកបញ្ជាក់ថា ជាការព្យាយាមបែបឆោតល្ងង់ ដើម្បីរកហេតុផលគាំទ្រការបញ្ជូនអាវុធឱ្យអ៊ុយក្រែន ។ លោកបញ្ជាក់បែបនេះ គឺសំដៅដល់លោកប្រធានាធិបតីអាមេរិក ចូ បៃដិន សន្យាមុននេះថា នឹងបញ្ជូនរថក្រោះ Abrams ចំនួន៣១គ្រឿងឱ្យអ៊ុយក្រែនតស៊ូជាមួយរុស្ស៊ី ។ កាលពីថ្ងៃទី២៧ ខែមករា អ្នកនាង គីម យ៉ូជុង ប្អូនស្រីរបស់មេដឹកនាំកំពូលកូរ៉េខាងជើង លោក គីម ជុងអ៊ុន ក៏បានចេញមកចោទអាមេរិកដែរថា ដើររំលងបន្ទាត់ក្រហម ។

គួរបញ្ជាក់ថា មុននេះ លោក John Kirby អ្នកសម្របសម្រួលទំនាក់ទំនងក្រុមប្រឹក្សាសន្តិសុខជាតិអាមេរិកបង្ហាញថា កូរ៉េខាងជើងកំពុងស្វែងរកគ្រាប់រំសេវឱ្យរុស្ស៊ី ដើម្បីគាំទ្ររុស្ស៊ីធ្វើសង្គ្រាមនៅអ៊ុយក្រែន ដោយការធ្វើកិច្ចព្រមព្រៀងអាវុធជាមួយក្រុមហ៊ុនយោធាឯកជនរបស់រុស្ស៊ី Wagner ដែលចាត់ទុកថា ជាការល្មើសសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ។ លោក Kirby សូមថ្កោលទោសសកម្មភាពរបស់កូរ៉េខាងជើង និងសូមឱ្យកូរ៉េខាងជើងឈប់បញ្ជូនអាវុធឱ្យក្រុម Wagner ជាបន្ទាន់ ។

ចំណែកក្រុម Wagner អាមេរិកនឹងចុះបញ្ជីលើគណនី Wagner Group ថា ជាក្រុមឧក្រិដ្ឋកម្មឆ្លងជាតិ ព្រមទាំងដាក់ទោសក្រុមនេះ និងបណ្តាញគាំទ្រនៅទ្វីបជាច្រើននៅសប្តាហ៍ខាងមុខ ៕

ប្រភព ៖ TNN World

ក្រុមហ៊ុនផលិតឧបករណ៍ទូរគមនាគមន៍ហ្វាំងឡង់ Nokia  បានរាយការណ៍ពីកំណើនដ៏ខ្ពស់ក្នុងឆ្នាំ ២០២២ ជាមួយនឹងប្រាក់ចំណេញប្រតិបត្តិការប្រចាំត្រីមាសរបស់ខ្លួន លើសពីការរំពឹងទុករបស់ទីផ្សារ។

យោងតាមរបាយការណ៍ហិរញ្ញវត្ថុរបស់ Nokia សម្រាប់ត្រីមាសទី៤ និងពេញមួយឆ្នាំ ២០២២ បានឱ្យដឹងថា ប្រាក់ចំណេញប្រតិបត្តិការរបស់ក្រុមហ៊ុនក្នុងឆ្នាំ ២០២២ បានកើនឡើង ១២ភាគរយ ដល់ទឹកប្រាក់ ៣.១ពាន់លានអឺរ៉ូ បើធៀបនឹងឆ្នាំ ២០២១ មានទឹកប្រាក់ ២.៨ពាន់លានអឺរ៉ូ។

កំណើនគួរឱ្យកត់សម្គាល់របស់ក្រុមហ៊ុន Nokia នៅក្នុងត្រីមាសទី៤ ត្រូវបានគេជឿជាក់ថា ត្រូវបានជំរុញជាចម្បងដោយតម្រូវការទីផ្សារដ៏រឹងមាំសម្រាប់បណ្តាញទូរស័ព្ទចល័ត និងហេដ្ឋារចនាសម្ព័ន្ធបណ្តាញទូរគនាគមន៍។សម្រាប់រយៈពេលពេញមួយឆ្នាំ ជាមួយនឹងកំណើន ៤៩ភាគរយនៅក្នុងត្រីមាសទី៤៕

ប្រភព៖ English News