សហរដ្ឋអាមេរិក ៖ វាក្លាយជារឿងដែលពលរដ្ឋអាមេរិក និងសភាភ្ញាក់ផ្អើលយ៉ាងខ្លាំង នៅពេលប្រធានាធិបតីអាមេរិក លោក ចូ បៃដិន ផ្តល់បទសម្ភាសន៍ទៅកាន់កម្មវិធី Noticias Telemundo របស់ស្ថានីយទូរទស្សន៍ Telemundo ថា លោកមិនគិតថា បាឡុងរបស់ចិនដែលហោះនៅលើដែនអាកាសរបស់អាមេរិកនោះ ជាការគំរាមកំហែងដល់សន្តិសុខជាតិធ្ងន់ធ្ងរទេ ។

លោកប្រធានាធិបតី ចូ បៃដិន បានបញ្ជាក់ទៀតថា លោកគ្មានអារម្មណ៍សោកស្តាយទេ ដែលអាមេរិកមិនបានបាញ់ទម្លាក់បាឡុងឱ្យលឿនជាងនេះ ។ អ្នកវិភាគអន្តរជាតិគិតថា អាកប្បកិរិយារបស់មេដឹកនាំអាមេរិកនៅពេលនេះ គឺដើម្បីរក្សាសម្ព័ន្ធភាពរវាងអាមេរិក និងចិន មិនឱ្យមានស្ថានភាពតានតឹងកាន់តែខ្លាំងជាងនេះ ។

លោក ចូ បៃដិន ថ្លែងថា ៖ «បាឡុងនេះមិនបានគំរាមកំហែងដល់សន្តិសុខជាតិរបស់យើងធ្ងន់ធ្ងរអ្វីទេ ប៉ុន្តែទោះយ៉ាងណា វាពិតជាបានរំលោភលើច្បាប់អន្តរជាតិ ព្រោះវាហោះចូលមកក្នុងដែនអាកាសរបស់អាមេរិក ហើយយើងមានសិទ្ធិធ្វើអ្វីក៏បានដែរទៅលើវា» ។

បើទោះជាការបំផ្លាញបាឡុងនេះបានធ្វើឡើងដោយរលូន ប៉ុន្តែបណ្តាសមាជិកសភាអាមេរិកយល់ឃើញថា លោកប្រធានាធិបតី ចូ បៃដិន បានសម្រេចចិត្តយឺតយ៉ាវខ្លាំងពេក ក្នុងការចេញបញ្ជាបាញ់បំផ្លាញបាឡុងនេះ ។

ទោះយ៉ាងណា លោក ចូ បៃដិន ឆ្លើយតបទៅវិញថា លោកដឹងច្បាស់ណាស់ពីការបារម្ភរឿងបាឡុងនេះ ប៉ុន្តែការបំផ្លាញបាឡុងអាចធ្វើឱ្យប៉ះពាល់ដល់លំនៅឋានរបស់ពលរដ្ឋអាមេរិកដែលនៅក្បែរនោះ ។ ដូច្នេះ អាជ្ញាធរចាំបាច់ត្រូវរង់ចាំពេលវេលាសមស្របសិនក្នុងការបាញ់កម្ទេចបាឡុង ។

លោក ចូ បៃដិន បន្ថែមថា ៖ «បាឡុងនេះមានទំហំធំណាស់ យើងមិនដឹងទេថា អ្វីនឹងកើតឡើងទេ បើវាធ្លាក់ចុះមកចំសាលារៀន ឬផ្ទះសម្បែងពលរដ្ឋនោះ ដូច្នេះ ខ្ញុំបានបញ្ជាឱ្យបាញ់វាតាមអ្វីដែលអាចធ្វើទៅបាន មានន័យថា ពួកគេត្រូវសម្រេចចិត្តយ៉ាងឆ្លាតវៃ ដោយត្រូវបាញ់ទម្លាក់វាឱ្យធ្លាក់ក្នុងទឹកមហាសមុទ្រ ។ បច្ចុប្បន្ននេះ ពួកគេកំពុងប្រមូលកម្ទេចកម្ទីបាឡុងឡើងមក ហើយគ្រប់យ៉ាងកំពុងដំណើរការបានល្អ» ៕

ប្រភព ៖ beartaiBRIEF

ការទម្លាក់គ្រាប់បែកបរមាណូនៅហ៊ីរ៉ូស៊ីម៉ា(Hiroshima) និងណាហ្គាសាគី (Nagasaki) គឺជាការបំផ្ទុះគ្រាប់បែកបរមាណូចំនួនពីរលើកនៅថ្ងៃទី៦និង៩ ខែសីហា ឆ្នាំ១៩៤៥ ដោយសហរដ្ឋអាមេរិក។

ការទម្លាក់គ្រាប់បែកទាំងពីរលើកនេះបានសម្លាប់មនុស្សចន្លោះពី ១២៩​ ០០០ទៅ ២២៦ ០០០ នាក់ ដែលភាគច្រើនជាជនស៊ីវិល ហើយវាក៏ជាសង្គ្រាមតែមួយគត់នៅលើលោកដែលឈានដល់ការប្រើប្រាស់អាវុធនុយក្លេអ៊ែរ។

ក្រោយពីត្រូវគ្រាប់បែកបរមាណូ ជប៉ុនក៏បានសម្រេចចិត្តចុះចាញ់សង្គ្រាម។ លុះដល់ថ្ងៃទី១៧ខែកញ្ញាឆ្នាំ១៩៤៥ ទីក្រុងហ៊ីរ៉ូស៊ីម៉ាត្រូវបានវាយប្រហារដោយព្យុះទីហ្វុង Makurazaki (Typhoon Ida) ដែលបានសម្លាប់ និងរបួសមនុស្សជាង ៣០០០នាក់។  ស្ពានជាងពាក់កណ្តាលនៅក្នុងទីក្រុងត្រូវបានបំផ្លាញ រួមជាមួយនឹងការខូចខាតយ៉ាងធ្ងន់ធ្ងរដល់ផ្លូវថ្នល់ និងផ្លូវដែក ដែលធ្វើឱ្យទីក្រុងកាន់តែបំផ្លិចបំផ្លាញ។

លុះដល់ឆ្នាំ ១៩៤៩ ទីកន្លែងដែលត្រូវគ្រាប់បរមាណូនោះ បានក្លាយជាឧទ្យានជាតិ ដ៏ល្បីលើពិភពលោក ដែលមានឈ្មោះថា Atomic Dome។ នៅឆ្នាំដដែល ទីក្រុងហ៊ីរ៉ូស៊ីម៉ាត្រូវបានប្រកាសថាជាទីក្រុងសន្តិភាពដោយសភាជប៉ុន។

ចាប់តាំងពីក្លាយជាទីក្រុងសន្តិភាពមក រដ្ឋាភិបាលជប៉ុនបានអភិវឌ្ឍន៍ទីក្រុងនេះ ឱ្យល្អប្រសើឡើងវិញ ដោយបានក្លាយជាទីក្រុងទំនើប និងសុីវិល័យជាងគេទី៤ នៅក្នុងប្រទេសជប៉ុន។

នៅថ្ងៃទី២៧ខែឧសភា ឆ្នាំ២០១៦ បារ៉ាក់ អូបាម៉ា បានក្លាយជាប្រធានាធិបតីសហរដ្ឋអាមេរិកដំបូងគេដែលបានទៅទស្សនាទីក្រុងហ៊ីរ៉ូស៊ីម៉ា ចាប់តាំងពីការទម្លាក់គ្រាប់បែកបរមាណូ៕

ប្រទេសកូរ៉េខាងជើង ៖ កាលពីថ្ងៃទី៨ ខែកុម្ភៈ កន្លងមក លោក គីម ជុងអ៊ុន មេដឹកនាំកំពូលរបស់កូរ៉េខាងជើង ព្រមទាំងភរិយា (រីសូលជូ) និងកូនស្រី (គីម ជូអេ) បានចូលរួមទស្សនាការដង្ហែរក្បួនកាំជ្រួច និងអាវុធថ្មីៗ ដើម្បីបង្ហាញពីសក្តានុពលកងទ័ពក្នុងឱកាសគម្រប់ខួប៧៥ឆ្នាំនៃការបង្កើតកងទ័ពកូរ៉េខាងជើង នៅទីលានគីម អ៊ីលស៊ុង ទីក្រុងព្យុងយ៉ាង ។

អ្នកវិភាគផ្នែកសន្តិសុខជឿថា កាំជ្រួច១ក្នុងចំណោមកាំជ្រួចទាំងអស់ដែលបានបង្ហាញនេះ គឺជាកាំជ្រួចបាញ់ឆ្លងទ្វីប ដែលប្រើប្រាស់ប្រេងឥន្ធនៈប្រភេទថ្មីរបស់កងទ័ពកូរ៉េខាងជើង ។ ទីភ្នាក់ងារព័ត៌មានកណ្តាលកូរ៉េ KCNA និយាយថា ក្បួនដង្ហែរអាវុធលើកនេះ នឹងធ្វើឱ្យទូទាំងពិភពលោកមើលឃើញពីសមត្ថភាពរបស់កូរ៉េខាងជើងក្នុងការទប់ទល់ជាមួយសត្រូវ ករណីមានការប្រឈមមុខគ្នាកើតឡើង ព្រមទាំងការអភិវឌ្ឍឈានទៅមុខមិនឈប់ឈរដើម្បីរក្សាឋានៈជាប្រទេសនុយក្លេអ៊ែរបន្តទៀត ។

ក្រៅពីនេះ សារព័ត៌មានដែលតាមដានពីសភាពការណ៍នៅកូរ៉េខាងជើង គឺ NK News បញ្ជាក់ថា ក្រៅពីកាំជ្រួចឆ្លងទ្វីបដែលប្រើប្រាស់ប្រេងឥន្ធនៈប្រភេទថ្មីហើយនោះ កូរ៉េខាងជើងនៅមានកាំជ្រួចឆ្លងទ្វីបប្រភេទ Hwasong-17 យ៉ាងតិចចំនួន១១ទៀត ដែលបានបង្ហាញក្នុងក្បួនដង្ហែរនេះ ហើយមានតែកាំជ្រួច៤ប៉ុណ្ណោះដែលធ្លាប់បង្ហាញរួចមកហើយកាលពីឆ្នាំ២០២០ ។ វាឆ្លុះបញ្ចាំងឱ្យឃើញថា ការផលិតកាំជ្រួច និងឧបករណ៍បាញ់គ្រាប់រ៉ុក្កែតទំហំធំរបស់កូរ៉េខាងជើងកំពុងតែដំណើរការយ៉ាងដោយរលូន ។

ពិធីដង្ហែរក្បួនរបស់កងទ័ពកូរ៉េខាងជើង គឺជាទីចាប់អារម្មណ៍ពីបណ្តាប្រទេសផ្សេងៗក្នុងពិភពលោក រួមទាំងសារព័ត៌មានបរទេសផងដែរ ។ តើអាចទៅរួចទេដែលថា កូរ៉េខាងជើងនឹងយកអាវុធថ្មីៗទាំងនេះទៅសាកល្បង ឬប្រើប្រាស់ពិតប្រាកដនាពេលអនាគត ព្រោះវានឹងបំផ្លាញសន្តិសុខពិភពលោក ជាពិសេស នៅតំបន់ឧបទ្វីបកូរ៉េ ៕

ប្រភព ៖ thestandard

Yahoo ជាក្រុមហ៊ុនផ្តល់សេវាកម្មអ៊ិនធើរណេតធំមួយរបស់អាមេរិក បាននិយាយកាលពីថ្ងៃទី៩ ខែកុម្ភៈ ថា ក្រុមហ៊ុនដាក់ផែនការកាត់បន្ថយបុគ្គលិកជាង២០% នៃចំនួនបុគ្គលិកទាំងអស់ ឬស្មើប្រមាណ១.៦០០នាក់ ជាផ្នែកមួយនៃការរៀបចំរចនាសម្ព័ន្ធសំខាន់ខាងបច្ចេកវិទ្យាផ្សាយពាណិជ្ជកម្ម ។

តាមរបាយការណ៍បញ្ជាក់ថា ការកាត់បន្ថយបុគ្គលិកនឹងធ្វើឱ្យប៉ះពាល់៥០% នៃបុគ្គលិកធ្វើការផ្នែកបច្ចេកវិទ្យាផ្សាយពាណិជ្ជកម្មនៅចុងឆ្នាំ២០២៣ រួមទាំងបុគ្គលិកប្រមាណ១.០០០នាក់ក្នុងសប្តាហ៍នេះ ។ បច្ចុប្បន្ន Yahoo ស្ថិតក្រោមការគ្រប់គ្រងរបស់ក្រុមហ៊ុន Apollo Global Management ដែលក្រុមហ៊ុននេះបានទិញយក Yahoo តាំងពីឆ្នាំ២០២០ ក្នុងទឹកប្រាក់៥.០០០លានដុល្លារអាមេរិក ។

Yahoo បញ្ជាក់ថា ផែនការកាត់បន្ថយចំនួនបុគ្គលិកលើកនេះ នឹងធ្វើឱ្យក្រុមហ៊ុនអាចផ្តោតទៅលើការវិនិយោគអាជីវកម្មផ្សាយពាណិជ្ជកម្ម ឬហៅថា DSP (Demand-Side Platform) កាន់តែច្រើន ដើម្បីប្រកួតប្រជែងការផ្សាយពាណិជ្ជកម្ម ស្របពេលក្រុមហ៊ុនផ្សាយពាណិជ្ជកម្មជាច្រើនបានកាត់បន្ថយការផ្សាយរបស់ខ្លួន ដើម្បីទប់ទល់នឹងអតិផរណាខ្ពស់ជាប្រវត្តិសាស្ត្រ និងភាពមិនប្រាកដប្រជាជាបន្តបន្ទាប់ដោយសារវិបត្តិសេដ្ឋកិច្ច ។

ពេលនេះ ក្រុមហ៊ុនផ្តោតលើ Yahoo Advertising Group ដោយនឹងកាត់បន្ថយបុគ្គលិកផ្នែក Yahoo for Business ចំនួន៥០% នៅត្រឹមចុងឆ្នាំ២០២៣ ។ លើសពីនេះ Yahoo នឹងផ្តោតលើអាជីវកម្ម (Taboola) ក្រុមហ៊ុនផ្នែកផ្សាយពាណិជ្ជកម្មឌីជីថល ដែលជាដៃគូយូរមកហើយរយៈពេល៣០ឆ្នាំ ដើម្បីអភិវឌ្ឍន៍សេវាកម្មផ្សាយពាណិជ្ជកម្មឱ្យកាន់តែល្អប្រសើរ ។

គួរបញ្ជាក់ថា ក្រុមហ៊ុនបច្ចេកវិទ្យាធំៗរបស់អាមេរិក ដូចជា Goldman Sachs និង Alphabet, Inc. ក៏បានកាត់បន្ថយបុគ្គលិករាប់ពាន់នាក់ផងដែរ ដើម្បីទប់ទល់នឹងឧបសគ្គដែលបណ្តាលមកពីអតិផរណាខ្ពស់ និងអត្រាការប្រាក់កើនឡើង ៕

ប្រភព ៖ The Better

ប្រទេសថៃ ៖ កាលពីថ្ងៃទី៩ ខែកុម្ភៈ អ្នកនាង រ៉ាជឆៈដា ថាណាឌីរិច អ្នកនាំពាក្យទីស្តីការនាយករដ្ឋមន្ត្រី បង្ហាញថា ផ្លែឈើរបស់ថៃបានបង្កើតប្រាក់ចំណូលខ្ពស់សម្រាប់ប្រទេស ខណៈថៃបាននាំចេញផ្លែឈើមានគុណភាពល្អ និងមានស្តង់ដារទៅក្រៅប្រទេស ជាពិសេស គេចាត់ទុកថា ទុរេនជាស្តេចផ្លែឈើ ដែលថៃបានទទួលចំណូលរាប់លានបាតក្នុង១ឆ្នាំពីការនាំចេញ ។ គេមានគម្រោងដឹកជញ្ជូនទិន្នផលមកកាន់ទីផ្សារជាបន្តបន្ទាប់ ចាប់ពីពាក់កណ្តាលខែកុម្ភៈ រហូតដល់ខែសីហា ឆ្នាំ២០២៣ ។

ក្រសួងពាណិជ្ជកម្ម និងនាយកដ្ឋានកម្មសិទ្ធិបញ្ញាបានចុះបញ្ជីទុរេននៅខេត្តយ៉ាឡា គឺជាផលិតផលសម្គាល់ភូមិសាស្ត្រ (GI) សម្រាប់ខេត្តយ៉ាឡា ។ បច្ចុប្បន្ន ទុរេនក្នុងខេត្តយ៉ាឡាមានតម្លៃខ្ពស់ គឺ១៩០បាត/១គីឡូក្រាម និងបង្កើតប្រាក់ចំណូលដល់ពលរដ្ឋយ៉ាឡាចំនួន២.៨០០លានបាត/១ឆ្នាំ ។

អ្នកនាង រ៉ាជឆៈដា បន្តថា ក្រសួងកសិកម្មបានត្រៀមផែនការដោះស្រាយបញ្ហាទុរេនជាប្រព័ន្ធ ចាប់ពីដំណាក់កាលថែទាំក្នុងពេលដាំដុះ រហូតដល់ការប្រមូលផលទុរេនលក់ ។ កន្លងមក ប្រទេសថៃតែងជួបបញ្ហាមានអ្នកលួចលក់ទុរេនខ្ចី ហេតុនេះ ដើម្បីដោះស្រាយបញ្ហាយូរអង្វែង លោក ឆ្លឺមឆៃ ស្រីអន រដ្ឋមន្ត្រីក្រសួងកសិកម្ម បានបញ្ជាឱ្យរៀបចំប្រព័ន្ធការងារសកម្ម តាមរយៈក្រុមការងារដោះស្រាយបញ្ហាទុរេនខូចគុណភាព និងសិទ្ធិទទួលបានវិញ្ញាបនបត្រការអនុវត្តកសិកម្មល្អរបស់កសិករសម្រាប់នាំចេញទុរេន ហើយក្រុមការងារនឹងរៀបចំផែនការទប់ទល់នឹងការប្រកួតប្រជែងនាំចេញទុរេនរបស់ប្រទេសជិតខាងផងដែរ ។

អ្នកនាង រ៉ាជឆៈដា បន្ថែមថា លោក ឆ្លឺមឆៃ ក៏បានចាត់ឱ្យនាយកដ្ឋានផ្សព្វផ្សាយកសិកម្ម និងភ្នាក់ងារ បង្កើតទីកន្លែងពិនិត្យមើលគុណភាពទុរេនចំនួន៥ខេត្តដូចជា ចន្ទបុរី ត្រាត រ៉ក់យ៉ង ឈុមផន និងនគររាជសីមា ។ នាយកដ្ឋានកសិកម្មមានតួនាទីពិនិត្យមើលការវេចខ្ចប់ ដោយត្រូវមានវិញ្ញាបនបត្របញ្ជាក់ពីទម្ងន់សាច់ទុរេន ។ ការពិនិត្យទាំងអស់នេះហើយធ្វើឱ្យទុរេនថៃមានគុណភាពល្អជាងប្រទេសដទៃ ។

លើសពីនេះ អ្នកនាង រ៉ាជឆៈដា បានសំណូមពរថា សុំតែម្យ៉ាងទៅកាន់កសិករ កុំបេះទុរេនខ្ចីលក់ ។ នាយកដ្ឋានបានកំណត់កាលបរិច្ឆេទប្រមូលផលទុរេនដូចជា ទុរេនពូជក្រាឌុម និងភួងម៉ានី ប្រមូលផលនៅថ្ងៃទី១០ ខែមីនា, ពូជឆៈនី ប្រមូលផលថ្ងៃទី២០ ខែមីនា និងពូជមន់ថង ប្រមូលផលថ្ងៃទី១៥ ខែមេសា ឆ្នាំ២០២៣ ។ អ្នកនាងថ្លែងថា ៖ «សូមការសហការពីកសិករទាំងអស់ បើប្រមូលផលមុនថ្ងៃប្រកាស ចូរយកទុរេនខ្ចីបំផុតមកបង្ហាញមន្ត្រីកសិកម្មនៅការិយាល័យកសិកម្មស្រុកពិនិត្យសិន ដើម្បីចេញវិញ្ញាបនបត្រភ្ជាប់ជាមួយឡានដឹកជញ្ជូនទុរេន និងយកទៅលក់តាមរោងចក្រវេចខ្ចប់» ៕

ប្រភព ៖ newpapertoday

ភ្នំពេញ៖ កម្លាំងអាវុធហត្ថខេត្តតាកែវ នៅវេលាម៉ោង១២:៥០នាទី ថ្ងៃទី៩ ខែកុម្ភៈ ឆ្នាំ២០២៣ បានចុះធ្វើការឃាត់ខ្លួនជនសង្ស័យម្នាក់នៅចំណុចភូមិពានមាស ឃុំលំពង់ ស្រុកបាទី ខេត្តតាកែវ ពីបទក្លែងឯកសណ្ឋានកងរាជអាវុធហត្ថ។

ជនសង្ស័យមានឈ្មោះ យក់ សុជាតិ ភេទប្រុសអាយុ៤៨ឆ្នាំ មុខរបរ គ្រូបង្ហាត់នៅក្នុងសមាគមន៍ជួយ ជនរងគ្រោះដោយសារគ្រឿងញៀន រស់នៅភូមិត្រពាំងព្រីង ឃុំលាយបូរ ស្រុកត្រាំកក់ ខេត្តតាកែវ។

លុះនៅវេលាម៉ោង១៥:០០នាទី ថ្ងៃខែឆ្នាំដដែល កម្លាំងអាវុធហត្ថខេត្ត បានចុះនៅចំណុចសមាគមន៍ ជួយជនរងគ្រោះដោយសារគ្រឿងញៀន ស្ថិតនៅភូមិត្រពាំងព្រីង ឃុំលាយបូរ ស្រុកត្រាំកក់ បានធ្វើការឃាត់ខ្លួនជនសង្ស័យបានចំនួន ៥នាក់បន្ថែមទៀត ពីបទក្លែងឯកសណ្ឋាន។

ជនសង្ស័យទាំង៥នាក់មានឈ្មោះរួមមាន៖
១- ឈ្មោះ ប៉ា ឧត្តម ភេទប្រុស អាយុ៣០ឆ្នាំ មុខរបរសន្តិសុខ រស់នៅភូមិត្រាំ សង្កាត់រកាក្រៅ ក្រុងដូនកែវ
២- ឈ្មោះ អឿន អាន ភេទប្រុសអាយុ២៥ឆ្នាំមុខរបរសន្តិសុខ រស់នៅភូមិថ្មសរ ឃុំលំពង់ ស្រុកបាទី
៣- ឈ្មោះ ទេព ឡៃសេង ភេទប្រុស អាយុ២៩ឆ្នាំ មុខរបរសន្តិសុខ រស់នៅភូមិថ្នល់បែកកើត ឃុំស្វាយទាប ស្រុកចំការលើ ខេត្តកំពង់ចាម
៤- ឈ្មោះ ទេព មុនី ភេទប្រុស អាយុ២៨ឆ្នាំ មុខរបរសន្តិសុខ រស់នៅភូមិតាម៉ូវ ឃុំជើងគួន ស្រុកសំរោង
៥- ឈ្មោះ ញឹក យីឡាយ ភេទប្រុស អាយុ៥៦ឆ្នាំ មុខរបរប្រធានសមាគមន៍ជួយជនរងគ្រោះដោយសារគ្រឿងញៀន រស់នៅភូមិត្រពាំងព្រីង ឃុំលាយបូរ ស្រុកត្រាំកក់ ។

វត្ថុតាងដែលចាប់យករួមមាន៖ ឯកសណ្ឋានកងរាជអាវុធហត្ថខោចំនួន ១២ខោ អាវយឺតចំនួន០៧អាវ មួក០៩ ស្បែកជើងកវែងចំនួន០៧គូ, ឯកសណ្ឋានយោធា ខោចំនួន០៣ខោ អាវយឺតចំនួន០១, ឯកសណ្ឋាននគរបាល អាវ ចំនួន០៤ ខោចំនួន០២, ឯកសណ្ឋានអង្គរក្ស អាវយឺតចំនួន០៤ មួកចំនួន០៤ , រថយន្តចំនួន០២គ្រឿង(ម៉ាកLEXUS 470 ពណ៌កាំម៉ៃ ពាក់ស្លាកលេខភ្នំពេញ២AL-4513 និងLEXUS 400h ពណ៌ត្រេអ៊ី ពាក់ស្លាកលេខខេមរភូមិន្ទ០២ ២-៨៩៨៥)។

បច្ចុប្បន្នជនសង្ស័យរួមនិងវត្ថុតាងត្រូវបានមន្ត្រីជំនាញកំពុងអនុវត្តនីតិវិធីច្បាប់៕

សហរដ្ឋអាមេរិក ៖ ក្រសួងការបរទេសអាមេរិកបានបញ្ជាក់ថា បាឡុងចិនដែលត្រូវអាមេរិកប្រើយន្តហោះបាញ់ធ្លាក់នៅលើដែនសមុទ្ររបស់អាមេរិកនោះ គឺជាបាឡុងប្រើសម្រាប់ធ្វើចារកម្មយ៉ាងពិតប្រាកដ វាមិនមែនជាបាឡុងពិនិត្យមើលអាកាសធាតុតាមចិនប្រាប់នោះទេ ។

មន្ត្រីក្រសួងការបរទេសអាមេរិកបានប្រកាសព័ត៌មានលើការពិនិត្យរូបថតពីយន្តហោះ U2 ជាយន្តហោះស៊ើបការណ៍របស់អាមេរិក ដែលអាចហោះហើរបានក្នុងកម្ពស់ជាង២១.០០០ម៉ែត្រឃើញថា បាឡុងរបស់ចិនដែលត្រូវយន្តហោះចម្បាំងអាមេរិកបាញ់ធ្លាក់នៅលើមហាសមុទ្រអាត្លង់ទិក កាលពីថ្ងៃទី៤ ខែកុម្ភៈ កន្លងមកនោះ គឺជាបាឡុងដែលប្រើសម្រាប់ស៊ើបការណ៍យ៉ាងពិតប្រាកដ មិនមែនជាបាឡុងប្រមូលព័ត៌មានពីអាកាសធាតុតាមរដ្ឋាភិបាលចិនអះអាងទេ ។

រូបភាពពីយន្តហោះ U2 បង្ហាញឱ្យឃើញថា បាឡុងនេះមានដាក់អង់ទែនជាច្រើនកន្លែងសម្រាប់ទំនាក់ទំនងគ្នាឆ្លងទ្វីប ។ លើសពីនេះ វាមានផ្ទាំងសូឡាទំហំធំមួយសម្រាប់ស្រូបពន្លឺព្រះអាទិត្យ ជាមួយនឹងប្រព័ន្ធប្រមូលទិន្នន័យជាច្រើនទៀតនៅផ្នែកខាងក្នុង ។ អាមេរិកជឿជាក់ថា វាជាបាឡុងមួយក្នុងចំណោមបាឡុងជាច្រើនទៀតរបស់កងទ័ពចិន ដែលបានបញ្ជូនទៅស៊ើបការណ៍នៅតាមប្រទេសចំនួន៤០ និង៥ទ្វីប ។

ទោះយ៉ាងណា ភ្នាក់ងារស៊ើបអង្កេតកណ្តាលរបស់អាមេរិកដែលបំពេញតួនាទីពិនិត្យកម្ទេចបាឡុងបង្ហាញថា ពេលនេះ គេរកឃើញកម្ទេចកម្ទីបាឡុងតែបន្តិចប៉ុណ្ណោះ និងយកមកពិនិត្យ ។ ចំណែកកម្ទេចបាឡុងផ្នែកសំខាន់នោះ នៅតែស្ថិតក្រោមសមុទ្រមានជម្រៅប្រមាណ១៤ម៉ែត្រ ហើយដោយសារអាកាសធាតុមិនអំណោយផល ធ្វើឱ្យពួកគេប្រមូលកម្ទេចបាឡុងយ៉ាងពិបាក ៕ ប្រភព ៖ NationWorldNews