ប្រទេសថៃ៖ យោងតាមការត្រួតពិនិត្យគុណភាពខ្យល់នាពេលថ្មីៗនេះ អាជ្ញាធរថៃបានចេញសេចក្ដីប្រកាសព័ត៌មានថា ទីក្រុងបាងកក និងខេត្តចំនួន ១៦ ដែលនៅក្បែរៗនោះ នឹងជួបប្រទះជាមួយការកើនឡើងនៃកម្រិតធូលីនៅក្នុងខ្យល់ ដែលអាចធ្វើឲ្យប៉ះពាល់ដល់សុខភាព។ ការកើនឡើងនៃកម្រិតខ្យល់ពុលនេះ កើតមានចំពេញដែលខេត្តជាច្រើននៅក្នុងប្រទេសថៃកំពុងរងទុក្ខធ្ងន់ធ្ងរដោយសារទឹកជំនន់។

បើតាមការចុះផ្សាយរបស់កាសែត បាងកកប៉ុស្តិ៍ នាយប់ថ្ងៃទី២៦ ខែវិច្ឆិកា ឆ្នាំ២០២៥ បានឲ្យដឹងថា កម្រិតធូលីនៅក្នុងខ្យល់PM ២.៥ បានឈានដល់៤២.២មីក្រូក្រាមក្នុងមួយម៉ែត្រគូបនៃខ្យល់ លើកម្រិតសុវត្ថិភាពកំណត់ដោយរដ្ឋាភិបាលដែលដាក់ត្រឹម ៣៧.៥មីក្រូក្រាមក្នុងមួយម៉ែត្រគូបនៃខ្យល់។ ស្ថានភាពនេះបានជំរុញឱ្យមានការព្រមា.នភ្លាមៗសម្រាប់អ្នកស្រុក ជាពិសេសក្រុមងាយរងគ្រោះដូចជាកុមារ មនុស្សចាស់ និងអ្នកដែលមានបញ្ហាផ្លូវដង្ហើម។

បច្ចុប្បន្នមន្ត្រីសុខាភិបាលថៃ កំពុងណែនាំសាធារណជនឱ្យកំណត់សកម្មភាពក្រៅផ្ទះ និងពាក់ម៉ាស់ការពារនៅពេលចេញទៅខាងក្រៅ។ បន្ថែមលើនេះ មន្ទីរពេទ្យជាច្រើនបានចេញសេចក្ដីក្រើនរំលឹកដល់អ្នកដែលមានជំងឺហឺត បញ្ហាបេះដូង និងជំងឺពាក់ព័ន្ធនឹងផ្លូវដង្ហើម ឱ្យមានការប្រុងប្រយ័ត្នបន្ថែម ព្រោះភាគល្អិត PM2.5 នៅក្នុងខ្សល់នេះអាចជ្រាបចូលទៅក្នុងសួត និងចរន្តឈាមបានយ៉ាងជ្រៅដោយងាយ។

គួរជម្រាបថា ស្ថានភាពគ្រោះធម្មជាតិនៅក្នុងប្រទេសថៃបច្ចុប្បន្ននេះកំពុងតែវឹកវរខ្លាំង ដោយខេត្តភាគខាងត្បូងត្រូវបានវា.យប្រហារដោយទឹកជំនន់យ៉ាងកា.ចសាហា.វមិនធ្លាប់មានក្នុងរយៈពេលជាង ៣០០ឆ្នាំ។ ក្នុងនោះ តំបន់មួយចំនួនត្រូវបានគេរាយការថាកំពុងរងការបំផ្លិ.ចបំផ្លាញយ៉ាងតំណម ខណៈប្រជាជនជិត ២លាននាក់ កំពុងស្រែកដង្ហើយរកជំនួយទាំងអស់សង្ឃឹម។

បើយោងតាមរបាយការណ៍គិតត្រឹមថ្ងៃទី២៦ ខែវិច្ឆិកា ចំនួនអ្នកស្លា.ប់ដោយសារគ្រោះធម្មជាតិដ៏ខ្លាំងក្លានេះបានកើនឡើងដល់ ៣៣នាក់ហើយ។ ចំណែកឯការខាតបង់ផ្នែកសេដ្ឋកិច្ចត្រូវបានគេប៉ាន់ប្រមាណថាមានទំហំប្រហែល ១ទៅ១.៥ពាន់លានបាតក្នុងមួយថ្ងៃ។ មិនតែប៉ុណ្ណោះ ផ្ទះរាប់ម៉ឺនខ្នងបានរងការខូចខាត, អគាររដ្ឋាភិបាលនិងហាងនានាត្រូវបិទទ្វារ ស្របពេលផ្លូវថ្នល់និងស្ពានត្រូវកាត់ផ្តាច់ ហើយសូម្បីសេវារថភ្លើងនិងយន្តហោះ ក៏ជាប់គាំងផងដែរ៕

ប្រទេសចិន ៖ រដ្ឋាភិបាលចិនបានកំណត់ឱ្យក្រុមហ៊ុនអាកាសចរណ៍នានានៅប្រទេសចិនកាត់បន្ថយជើងហោះហើរទៅជប៉ុនរហូតដល់ខែមីនា ឆ្នាំ២០២៦ ស្របពេលទំនាក់ទំនងការទូតរវាងប្រទេសទាំងពីរកាន់តែតានតឹងក្រោយពីនាយករដ្ឋមន្ត្រីថ្មីជប៉ុន លោកស្រី Sanae Takaichi បង្ហាញគោលជំហរគាំទ្រតៃវ៉ាន់ បើរងការវាយប្រ.ហារពីចិន ។ ចិនចាត់ទុកពាក្យសម្តីនេះជាកំហុសដ៏ធ្ងន់ធ្ងរ និងបានចាត់វិធានការឆ្លើយតបវិញជាបន្តបន្ទាប់ បើទោះជាជប៉ុនបញ្ជូនមន្ត្រីជាន់ខ្ពស់ទៅចរចាបញ្ចប់ភាពតានតឹងក្តី ។

សារព័ត៌មានបរទេសរាយការណ៍នៅថ្ងៃទី២៧ ខែវិច្ឆិកា ឆ្នាំ២០២៥ ថា ក្រុមហ៊ុនអាកាសចរណ៍ចិននានាត្រូវបានណែនាំឱ្យផ្លាស់ប្តូរពេលវេលាហោះហើរ និងអនុវត្តតាមគោលការណ៍នៃទំនាក់ទំនងទ្វេភាគីរវាងចិន-ជប៉ុនដែលកំពុងធ្លាក់ចុះ ប៉ុន្តែគ្មានសេចក្តីរាយការណ៍លម្អិតពីការផ្លាស់ប្តូរពេលវេលាហោះហើររបស់ក្រុមហ៊ុនអាកាសចរណ៍ចិនទេ ។ ក្រុមហ៊ុនអាកាសចរណ៍ចិនជាច្រើនដែលមានជើងហោះហើរទៅជប៉ុន បានចាប់ផ្តើមកាត់បន្ថយការហោះហើរក្រោយពីទទួលបានការណែនាំពីរដ្ឋាភិបាលចិន ។

អ្នកនាំពាក្យក្រសួងការបរទេសចិន លោក Lin Jian ចាត់ទុកពាក្យសម្តីរបស់នាយករដ្ឋមន្ត្រីជប៉ុនខ្វះការទទួលខុសត្រូវ និងបង្កគ្រោះថ្នាក់យ៉ាងខ្លាំង បើជប៉ុនមិនសិក្សាពីប្រវត្តិសាស្ត្រ និងបញ្ជូនកងទ័ពមកជ្រៀតជ្រែតបញ្ហាតៃវ៉ាន់ ជប៉ុននឹងបរាជ័យមិនខាន ។ ចិនចាត់ទុកការបញ្ជូនកងទ័ពជប៉ុនមកចូលរួមក្នុងជម្លោះតៃវ៉ាន់ជាការឈ្លានពាន និងបង្កើនជម្លោះការទូត ហើយចិននឹងការពារអធិបតេយ្យនៅក្រោមច្បាប់អន្តរជាតិ ដោយប្រឆាំងដាច់ខាតចំពោះពាក្យសម្តីនេះ ។ បញ្ហាតៃវ៉ាន់ គឺជាកិច្ចការផ្ទៃក្នុងរបស់ចិន ជប៉ុនមិនគួរជ្រៀតជ្រែកនាំឱ្យទំនាក់ទំនងការទូតជាមួយចិនធ្លាក់ចុះ ។

នាយករដ្ឋមន្ត្រីជប៉ុន លោកស្រី Sanae Takaichi បាននិយាយក្នុងរដ្ឋសភានាពេលកន្លងមកថា ជប៉ុនអាចនឹងបញ្ជូនកងទ័ពទៅការពារតៃវ៉ាន់ ប្រសិនបើរងការវាយប្រហារពីចិន ពីព្រោះចិនចាត់ទុកតៃវ៉ាន់ជាទឹកដីរបស់ខ្លួន ជប៉ុននឹងប្រើប្រាស់សិទ្ធិការពារខ្លួន ។ បន្ទាប់ពីនាយករដ្ឋមន្ត្រីជប៉ុននិយាយបែបនេះ មន្ត្រីរដ្ឋាភិបាលចិនបានកោះហៅមន្ត្រីស្ថានទូតជប៉ុនមកបកស្រាយជាបន្ទាន់ និងបង្ហាញក្តីបារម្ភចំពោះគោលជំហររបស់លោកស្រី Sanae Takaichi ។

ទំនាក់ទំនងការទូតរវាងប្រទេសទាំងពីរធ្លាក់ចុះកាន់តែខ្លាំង ទើបជប៉ុនបញ្ជូនលោក ខាណាអិ ម៉ាសាអាគិ ប្រធានការិយាល័យកិច្ចការអាស៊ីនៃក្រសួងការបរទេសទៅជួបលោក Liu Jinsong ប្រធានការិយាល័យកិច្ចការអាស៊ីក្រសួងការបរទេសចិននៅទីក្រុងប៉េកាំង ដើម្បីបញ្ជាក់ពីគោលជំហររដ្ឋាភិបាលជប៉ុនចំពោះតៃវ៉ាន់ ប៉ុន្តែចិននៅតែមិនព្រម និងទាមទារឱ្យនាយករដ្ឋមន្ត្រីជប៉ុនដកពាក្យសម្តីវិញ បើមិនដូច្នោះទេ ជប៉ុននឹងទទួលលទ្ធផលតបស្នង ។

លើសពីនេះ ចិនបានចាត់វិធានការជាច្រើនដើម្បីឱ្យសេដ្ឋកិច្ចជប៉ុនធ្លាក់ចុះ ដូចជា ៖ ហាមភ្ញៀវទេសចរចិនទៅជប៉ុន ផ្អាកនាំចូលអាហារសមុទ្រជប៉ុន និងពហិការភាពយន្តជប៉ុន ។ ចិនថែមទាំងមិនចូលរួមកម្មវិធីវប្បធម៌ជាច្រើន និងលុបចោលជំនួបរវាងនាយករដ្ឋមន្ត្រីចិន លោក Li Qiang ជាមួយរដ្ឋមន្ត្រីជប៉ុន នៅក្រៅកិច្ចប្រជុំមេដឹកនាំប្រទេស G20 នៅអាហ្រ្វិកខាងត្បូងនាសប្តាហ៍ទី៣ ខែវិច្ឆិកា ។

គួរបញ្ជាក់ថា ចិននិងជប៉ុនធ្លាប់មានជម្លោះការទូតជាមួយគ្នាកាលពីឆ្នាំ២០១២ ពាក់ព័ន្ធនឹងការគ្រប់គ្រងប្រជុំកោះ ដែលពេលនោះ នៅប្រទេសចិនបានធ្វើបាតុកម្មប្រឆាំងជប៉ុន ដែលធ្វើឱ្យមេដឹកនាំប្រទេសទាំងពីរមិនជជែកគ្នាអស់រយៈពេលជាង២ឆ្នាំ ៕

ប្រទេសថៃ ៖ បន្ទាប់ពីទឹកជំនន់បង្កការខូចខាត និងសម្លា.ប់ជីវិតពលរដ្ឋថៃយ៉ាងច្រើននៅភាគខាងត្បូង នៅថ្ងៃទី២៦ ខែវិច្ឆិកា ឆ្នាំ២០២៥ គណបក្សប្រជាជនដែលជាគណបក្សប្រឆាំងបានណែនាំរដ្ឋាភិបាលថៃអំពាវនាវឱ្យបរទេសជួយដោះស្រាយបញ្ហាទឹកជំនន់នៅខេត្តសុងក្លាជាបន្ទាន់ ពីព្រោះស្ថានការណ៍ពេលនេះធ្ងន់ធ្ងរខ្លាំងពេក ទើបរដ្ឋាភិបាលថៃមិនអាចដោះស្រាយបាន ។ គណបក្សនេះបញ្ជាក់ថា ដល់ពេលវេលាសុំជំនួយពីបរទេសហើយ មុនពេលប្រទេសថៃកាន់តែខាតបង់ធ្ងន់ធ្ងរជាងនេះ ។

នៅថ្ងៃទី២៦ ខែវិច្ឆិកា លោក Parit Wacharasindhu អ្នកនាំពាក្យគណបក្សប្រជាជនបានសំណូមពរឱ្យរដ្ឋាភិបាលថៃជួយសង្គ្រោះជីវិតពលរដ្ឋនៅខេត្តសុងក្លា និងខេត្តផ្សេងទៀតនៅភាគខាងត្បូង ដោយលោកនិយាយថា ស្ថានការណ៍ទឹកជំនន់ខេត្តសុងក្លា ជាពិសេស ស្រុកហាតយៃ គឺធ្ងន់ធ្ងរបំផុត ហើយរដ្ឋាភិបាលមានតួនាទីសំខាន់ជួយការពារពលរដ្ឋថៃកុំឱ្យស្លាប់ច្រើនជាងនេះ ។ មនុស្សជាប់ក្នុងអគាររាប់ម៉ឺននាក់ ប៉ុន្តែក្រុមសង្គ្រោះបានជួយជម្លៀសអ្នកជាប់ក្នុងអគារមកកន្លែងសុវត្ថិភាពបានតែខ្ទង់ពាន់នាក់ប៉ុណ្ណោះ ហេតុនេះ លោកគិតថា គ្រប់វិនាទីសំខាន់ណាស់ រដ្ឋាភិបាលត្រូវតែការពារពលរដ្ឋឱ្យឆាប់បំផុត ។

គណបក្សប្រជាជនសូមសំណូមពរទៅកាន់រដ្ឋាភិបាលត្រូវតែសហការជាមួយភ្នាក់ងារពាក់ព័ន្ធឱ្យបាន ដោយរៀបចំប្រព័ន្ធទិន្នន័យទីតាំងជនរងគ្រោះ និងប្រញាប់អនុវត្តឱ្យលឿនបំផុត ពីព្រោះបើគ្មានទិន្នន័យទេនោះ រដ្ឋាភិបាលនឹងពិបាកដោះស្រាយបញ្ហា ហើយនៅថ្ងៃទី២៦ ខែវិច្ឆិកានេះ លោកនាយករដ្ឋមន្ត្រី Anutin Charnvirakul ត្រូវតែសម្រេចចិត្តថា គួរធ្វើបែបណាបន្តទៀត ។ រដ្ឋាភិបាលត្រូវតែជម្លៀសពលរដ្ឋឱ្យលឿន ដោយប្រមូលទូកឱ្យបានច្រើនគ្រឿងសម្រាប់ដឹកជញ្ជូនជនរងគ្រោះ ។

ការសំណូមពរមួយទៀតរបស់គណបក្សប្រជាជន គឺបើទោះជាការជម្លៀសជនរងគ្រោះបានឆាប់រហ័ស និងច្រើនបំផុតក្តី ក៏រដ្ឋាភិបាលមិនអាចជម្លៀសជនរងគ្រោះបានគ្រប់គ្នាដែរ ។ អ្វីចាំបាច់បំផុតសម្រាប់ពេលនេះ ត្រូវចែកអាហារឱ្យដល់ដៃជនរងគ្រោះគ្រប់រូប បើទូកមិនអាចចូលទៅដល់ទីតាំងគ្រោះថ្នាក់ទេ ត្រូវប្រើប្រាស់ឧទ្ធម្ភាគចក្របញ្ជូនអាហារឱ្យជនរងគ្រោះ ។

ចុងក្រោយ រដ្ឋាភិបាលថៃត្រូវរូតរះអំពាវនាវឱ្យបរទេសជួយដោះស្រាយទឹកជំនន់នៅខេត្តសុងក្លា ពីព្រោះស្ថានការណ៍ទឹកជំនន់នៅខេត្តសុងក្លាធ្ងន់ធ្ងរខ្លាំងហួសពីសមត្ថភាពរបស់រដ្ឋាភិបាលថៃក្នុងការដោះស្រាយ ។ ក្រសួងការបរទេសថៃគួរប្រញាប់ទូរស័ព្ទទៅប្រទេសនានាឱ្យជួយពលរដ្ឋថៃ ដោយទូរស័ព្ទទៅម៉ាឡេស៊ី និងសិង្ហបុរី ពីព្រោះប្រទេសទាំងពីរអាចមានពលរដ្ឋរងគ្រោះដោយទឹកជំនន់នៅថៃ ព្រមទាំងទាក់ទងទៅក្រុមហ៊ុនអាមេរិកដើម្បីប្រើប្រាស់ Starlink ជាសេវាអ៊ីនធើរណេតល្បឿនលឿនតាមផ្កាយរណបជួយផ្តល់សេវាអ៊ីនធើរណេតនៅថៃ ដោយផ្តល់ភាពងាយស្រួលដល់ក្រុមសង្គ្រោះដឹងទីតាំងជនរងគ្រោះ ។

គួរបញ្ជាក់ថា លោកនាយករដ្ឋមន្ត្រី Anutin បានប្រកាសថា មិនត្រឡប់ទៅទីក្រុងបាងកកវិញទេ លោកនឹងនៅជួយពលរដ្ឋភាគខាងត្បូងរហូតដល់ស្ថានការណ៍ទឹកជំនន់ធូរស្រាលឡើងវិញ ប៉ុន្តែពលរដ្ឋមើលឃើញថា ការជួយរបស់រដ្ឋាភិបាលយឺតយ៉ាវខ្លាំង មិនទាន់ពេលវេលា មិនថាការជម្លៀស ឬចែកអាហារ ជាហេតុធ្វើឱ្យពលរដ្ឋស្លាប់ជាបន្តបន្ទាប់ ៕

មនុស្សចំនួន៤៤នាក់បានស្លាប់ ខណៈ២៧៩នាក់ទៀតបាត់ខ្លួន នៅក្នុងហេតុការណ៍ឆេះអគារដ៏សាហាវនៅហុងកុង ប្រទេសចិន។

សោកនាដកម្មនេះកើតឡើង កាលពីថ្ងៃពុធទី២៦ខែវិច្ឆិកាឆ្នាំ២០២៥ នៅឯតំបន់ Wang Fuk Court ដែលមានមនុស្សស្នាក់នៅប្រមាណជា ៤ ៨០០នាក់។

មនុស្សជាង៩០០នាក់ ត្រូវបានជម្លៀសទៅកាន់ទីសុវត្ថិភាព ខណៈក្រុមពន្លត់រហូតដល់ទៅ៨០០នាក់ត្រូវបានដាក់ពង្រាយ ដើម្បីអន្តរាគមន៍ទប់ទល់ ស្របពេលអាជ្ញាធរអះអាងថា តួលេខមនុស្សស្លាប់នឹងកើនឡើងបន្ថែមទៀត។

ចំពោះមូលហេតុនៃអគ្គិភ័យវិញ មិនទាន់មានការបញ្ជាក់ច្បាស់លាស់នៅឡើយនោះទេ។

តែយ៉ាងណាមិញក្នុងហេតុការណ៍នេះមនុស្ស៣នាក់ ត្រូវបានឃាត់ខ្លួន ដោយចោទប្រកាន់ពីបទ ធ្វេសប្រហែសបណ្តាលឱ្យមានអគ្គិភ័យយ៉ាងធ្ងន់ធ្ងរ និងបទមនុស្សឃាត៕