ប្រព័ន្ធផ្សព្វផ្សាយ Chosun បានរាយការណ៍នៅថ្ងៃទី២៧ ខែវិច្ឆិកា នេះថាបន្ទាប់ពីអគ្គីភ័យដ៏ធំមួយបានឆាបឆេះអគារផ្ទះល្វែងមួយក្នុងទីក្រុងហុងកុងកម្មវិធីប្រគល់ពានរង្វាន់ MAMA 2025 ដែលជាព្រឹត្តិការណ៍តន្ត្រី K-Pop នឹងប្រព្រឹត្តទៅតាមការគ្រោងទុក។ យ៉ាងណាមិញ ពិធីនេះនឹងត្រូវបានប្រារព្ធឡើងក្នុងបរិយាកាសស្ងប់ស្ងាត់ជាងការគ្រោងទុកពីមុន។

យោងតាមនាយកដ្ឋានពន្លត់អគ្គីភ័យហុងកុងនៅថ្ងៃទី ២៧ ខែវិច្ឆិកា អគ្គីភ័យបានរលត់ទៅវិញនៅវេលាម៉ោង ២:៥២ រសៀល រហូតមកដល់ពេលនេះមនុស្សយ៉ាងតិច ៤៤ នាក់បានស្លាប់ និង ២៧៩ នាក់កំពុងបាត់ខ្លួន ហើយចំនួនអ្នកស្លាប់ និងរបួសត្រូវបានគេរំពឹងថានឹងបន្តកើនឡើង។ អគារផ្ទះល្វែងដែលអគ្គីភ័យបានឆាបឆេះនៅតំបន់ Tai Po មានចម្ងាយប្រហែល ២០ គីឡូម៉ែត្រពីកីឡដ្ឋាន Kai Tak ដែលជាកន្លែង «ពានរង្វាន់ MAMA ឆ្នាំ ២០២៥» គ្រោងនឹងប្រារព្ធឡើងនៅថ្ងៃទី ២៨-២៩ ខែវិច្ឆិកា ស្មើនឹងប្រហែល ២០ នាទីធ្វើដំណើរដោយរថយន្ត។

ចំពេលបរិយាកាសកាន់ទុក្ខ អ្នកគាំទ្រ K-pop ជាច្រើនបានសម្តែងការព្រួយបារម្ភ និងបាននិយាយថា ពិធីប្រគល់ពានរង្វាន់អាចត្រូវបានលុបចោល ឬពន្យារពេល។ CJ ENM អ្នករៀបចំកម្មវិធី MAMA Awards បច្ចុប្បន្នស្ថិតក្នុងស្ថានភាពលំបាកព្រោះក្រុមជាច្រើនដូចជា Stray Kids, IVE, (G)I-DLE, ENHYPEN, TXT, NCT WISH… បានចេញដំណើរទៅកាន់ទីក្រុងហុងកុងដើម្បីចូលរួមពិធីប្រគល់រង្វាន់នៅឆ្នាំនេះ។
អ្នករៀបចំកម្មវិធីក៏ត្រូវបានគេនិយាយថាកំពុងពិចារណាលើការចូលរួមរបស់តារាដែលត្រូវបានគេរំពឹងថានឹងបង្ហាញពានរង្វាន់ដូចជា Chow Yun Fat និង Michelle Yeoh ។

ទោះបីជាពិធីប្រគល់ពានរង្វាន់ត្រូវបានបង្ខំឱ្យដំណើរការដូចការគ្រោងទុកក៏ដោយ ស្គ្រីប និងឆាកនឹងត្រូវកែសម្រួលយ៉ាងខ្លាំង ដែលនាំឱ្យមានការរំខានជាច្រើន។ ជាពិសេស អ្នករៀបចំកំពុងពិនិត្យយ៉ាងយកចិត្តទុកដាក់ ដើម្បីលុបបំបាត់ព័ត៌មានលម្អិតនៃដំណាក់កាលដែលទាក់ទងនឹង «ភ្លើង»៕

ប្រទេសថៃ៖ ក្រោយមេបញ្ជាការទាំងទ័ពជើងគោក ជើងទឹក និងអាកាសថៃ ទើបប្រកាសក្ដែងៗថា ខ្លួនបានត្រៀមនាវា យន្តហោះចម្បាំង និងកម្លាំងទាហាន ដើម្បីត្រៀមខ្លួនប្រយុទ្ធរួចស្រេចនោះ ពេលនេះស្រាប់តែត្រូវបង្ខំចិត្តដកកម្លាំងទាំងនោះទៅទប់ទល់នឹងបញ្ហាទឹកជំនន់ដើម្បីជួយសង្គ្រោះប្រជាជនវិញ។

យោងតាមទីភ្នាក់ងារសារព័ត៌មានក្នុងស្រុករបស់ថៃ នៅថ្ងៃទី២៧ ខែវិច្ឆិកា ឆ្នាំ២០២៥នេះ បានឲ្យដឹងថា កងទ័ពភូមិន្ទថៃ បានបញ្ជាឲ្យបញ្ជូនកងទ័ពនៅតាមព្រំដែនជាច្រើនទៅកាន់ចូលរួមប្រតិបត្តិការនៅតាមតំបន់ដែលរង់គ្រោះដោយសារទឹកជំនន់ និងធ្វើការជម្លៀសប្រជាជន។

តាមរបាយការណ៍ដែលបានបង្ហាញ អង្គភាពយោធាដែលមកពីទូទាំងប្រទេស នឹងត្រូវបានដាក់ពង្រាយដើម្បីសកម្មភាពជម្លៀស ការចែកចាយសម្ភារៈសង្គ្រោះបន្ទាន់ និងគាំទ្រដល់កិច្ចខិតខំប្រឹងប្រែងគ្រប់គ្រងទឹកជំនន់។ ជាមួយគ្នានេះ ឡានដឹកទំនិញធំៗ ទូក និងឧទ្ធម្ភាគចក្រជាច្រើនគ្រឿងក៏កំពុងត្រូវបានប្រើប្រាស់ដើម្បីទៅដល់សហគមន៍ដាច់ស្រយាល ដើម្បីដឹកជញ្ជូនអ្នកជំងឺ ទារកទើបនឹងកើត និងអ្នកស្រុកងាយរងគ្រោះផ្សេងទៀតទៅកាន់ទីតាំងដែលមានសុវត្ថិភាព។ កងកម្លាំងប្រដាប់អាវុធក៏បានបង្កើតមជ្ឈមណ្ឌលបញ្ជាការជួរមុខដើម្បីសម្របសម្រួលប្រតិបត្តិការជួយសង្គ្រោះ 24 ម៉ោងផងដែរ។

បន្ថែមលើនោះ កងទ័ពជើងទឹករបស់ថៃ បានប្រកាសថានឹងប្រើប្រាស់នាវាចម្បាំង និងឧទ្ធម្ភាគចក្រសម្រាប់ចល័តកងកម្លាំង ដើម្បីជួយសង្គ្រោះប្រជាជន ដែលកំពុងជាប់គាំងដោយសារទឹកជំនន់ដ៏សាហាវនៅបណ្តាខេត្តភាគខាងត្បូងប្រទេសថៃ ក្រោយផ្ទះរបស់ពួកគេរងការជន់លិចយ៉ាងអាណោចអាធ័ម។

បើតាមការបញ្ជាក់របស់ឧត្តមនាវីឯក Parat Rattanachaiphan អ្នកនាំពាក្យកងទ័ពជើងទឹកថៃ បានបញ្ជាក់នៅថ្ងៃទី២៥ ខែវិច្ឆិកាថា កងទ័ពជើងទឹកបានដាក់ពង្រាយនាវាចម្បាំងដ៏ធំមួយគ្រឿង ឧទ្ធម្ភាគចក្រចំនួន២គ្រឿង និងអង្គភាពប្រតិបត្តិការពិសេស ដើម្បីផ្តល់ជំនួយដល់ពលរដ្ឋនៅតំបន់ភាគខាងត្បូង ដែលរងផលប៉ះពាល់ខ្លាំងដោយសារទឹកជំនន់។

ទន្ទឹមនឹងនេះ កងទ័ពជើងទឹកថៃ ក៏បានរៀបចំដាក់ពង្រាយនាវាចម្បាំង HTMS Chang និង HTMS Ang Thong និងបានបញ្ជូនអង្គភាពប្រតិបត្តិការពិសេសមួយរួមជាមួយទូកកៅស៊ូចំនួន១៤គ្រឿង និងបុគ្គលិកមកពីបញ្ជាការដ្ឋានសង្គ្រាមពិសេសកងទ័ពជើងទឹក ដើម្បីជួយប្រជាជនដែលជាប់គាំងនៅក្នុងតំបន់ ដែលមានចរន្តទឹកហូរខ្លាំងផងដែរ។

គួរជម្រាបថា ស្ថានភាពទឹកជំនន់នៅតំបន់ភាគខាងត្បូងរបស់ថៃ ជាពិសេសក្នុងស្រុកហាតយៃ ខេត្តសុងក្លា គិតត្រឹមថ្ងៃទី២៧ ខែវិច្ឆិកានេះ គឺកម្ពស់ទឹកបានស្រកចុះក្នុងតំបន់មួយចំនួន ប៉ុន្តែនៅមានតំបន់ជាច្រើនទៀត ដែលនៅតែរងជន់លិចដដែល ហើយនៅក្នុងនោះក៏នៅសល់ប្រជាជនជាច្រើននាក់កំពុងរង់ចាំការជួយសង្គ្រោះ៕

ប្រទេសថៃ ៖ ទីក្រុងហ្សាកាតា ប្រទេសឥណ្ឌូណេស៊ី បានជាប់ចំណាត់ថ្នាក់ទី១ គឺជាទីក្រុងមានពលរដ្ឋរស់នៅច្រើនបំផុតលើពិភពលោក គឺចំនួនពលរដ្ឋស្មើរហូតដល់ជិត៤២លាននាក់ និងវ៉ាដាច់ទីក្រុងតូក្យូ ប្រទេសជប៉ុន ដែលធ្លាប់ជាប់ចំណាត់ថ្នាក់ទី១អស់រយៈពេលជាច្រើនឆ្នាំ បានធ្លាក់មកនៅចំណាត់ថ្នាក់ទី៣ ដែលមានពលរដ្ឋ ចំនួន៣៣លាន ៤សែននាក់ ខណៈទីក្រុងថាកា ប្រទេសបង់ក្លាដែស ជាប់ចំណាត់ថ្នាក់ទី២ មានពលរដ្ឋ ចំនួន៣៦លាន ៦សែននាក់ ។ នេះបើតាមការចុះផ្សាយរបស់សារព័ត៌មានបរទេសនៅថ្ងៃទី២៧ ខែវិច្ឆិកា ឆ្នាំ២០២៥ ។

យោងតាមទិន្នន័យពី World Urbanization Prospects 2025 របស់អង្គការសហប្រជាជាតិ (UN) ដែលបង្ហាញពីចំនួនពលរដ្ឋនៅលើពិភពលោក ឱ្យដឹងថា នៅឆ្នាំ២០២៥ ទីក្រុងហ្សាកាតា ប្រទេសឥណ្ឌូណេស៊ី មានពលរដ្ឋរស់នៅជិត៤២លាននាក់ ។ ចំណាត់ថ្នាក់ទី២ បានទៅទីក្រុងថាកា ប្រទេសបង់ក្លាដែស មានពលរដ្ឋ ចំនួន៣៦លាន ៦សែននាក់ ខណៈទីក្រុងតូក្យូ ប្រទេសជប៉ុន ដែលធ្លាប់ជាប់ចំណាត់ទី១អស់រយៈពេលជាច្រើន បានធ្លាក់មកនៅចំណាត់ថ្នាក់ទី៣ ដែលមានពលរដ្ឋ ចំនួន៣៣លាន ៤សែននាក់ ។

ខាងក្រោមនេះជាការចាត់ចំណាត់ថ្នាក់ទីក្រុងមានពលរដ្ឋរស់នៅច្រើនបំផុត ៖

១-ទីក្រុងហ្សាកាតា ប្រទេសឥណ្ឌូណេស៊ី មានពលរដ្ឋ ជិត៤២លាននាក់
២-ទីក្រុងថាកា ប្រទេសបង់ក្លាដែស មានពលរដ្ឋ ៣៦លាន ៦សែននាក់
៣-ទីក្រុងតូក្យូ ប្រទេសជប៉ុន មានពលរដ្ឋ ៣៣លាន ៤សែននាក់
៤-ទីក្រុងញូវដេលី ប្រទេសឥណ្ឌា មានពលរដ្ឋ ៣០លាន ២សែននាក់
៥-ទីក្រុងសៀងហៃ ប្រទេសចិន មានពលរដ្ឋ ២៩លាន ៦សែននាក់
៦-ទីក្រុងក្វាងចូវ ប្រទេសចិន មានពលរដ្ឋ ២៧លាន ៦សែននាក់
៧-ទីក្រុងគែរ ប្រទេសអេហ្ស៊ីប មានពលរដ្ឋ ២៥លាន ៦សែននាក់
៨-ទីក្រុងម៉ានីល ប្រទេសហ្វីលីពីន មានពលរដ្ឋ ២៤លាន ៧សែននាក់
៩-ទីក្រុងកាល់គូតា ប្រទេសឥណ្ឌា មានពលរដ្ឋ ២២លាន ៥សែននាក់ និង
១០-ទីក្រុងសេអ៊ូល ប្រទេសកូរ៉េខាងត្បូង មានពលរដ្ឋ ២២លាន ៥សែននាក់ ។

ចំណែកទីក្រុងផ្សេងៗ ដូចជា ៖ ទីក្រុងអាឌីសអាបាបា ប្រទេសអេត្យូពី, ទីក្រុងដាអេសសាឡាម ប្រទេសតង់ហ្សានី, ទីក្រុងហាជិពុរ៉ាក់ ប្រទេសឥណ្ឌា និងទីក្រុងគូឡាឡាំពួរ ប្រទេសម៉ាឡេស៊ី គឺមានពលរដ្ឋប្រមាណជាង១០លាននាក់ ។

តាមរបាយការណ៍របស់អង្គការសហប្រជាជាតិ គឺទីក្រុងនានាលើពិភពលោកបានរីកចម្រើនយ៉ាងឆាប់រហ័ស ជាពិសេស ទីក្រុងហ្សាកាតា ប្រទេសឥណ្ឌូណេស៊ី មិនត្រឹមតែជាទីក្រុងរីកចម្រើនប៉ុណ្ណោះទេ ប៉ុន្តែចំនួនពលរដ្ឋរស់នៅទីក្រុងនេះក៏កើនឡើងផងដែរ ស្មើរហូតដល់ជិត៤២លាននាក់ ៕

ប្រទេសថៃ ៖ សារព័ត៌មាន Khaosod រាយការណ៍ថា នៅថ្ងៃទី២៧ ខែវិច្ឆិកា ឆ្នាំ២០២៥ ភ្នាក់ងារសង្គ្រោះបានព្យាយាមជួយពលរដ្ឋលិចទឹកនៅភាគខាងត្បូងប្រទេសថៃ បែរជារងការបា.ញ់គំរា.មជាច្រើនគ្រាប់ បណ្តាលឱ្យភ្នាក់ងារសង្គ្រោះម្នាក់លោតចុះពីទូក Jet Ski រកកន្លែងលាក់ខ្លួន ។ ភ្នាក់ងារសង្គ្រោះប្រាប់ថា ខំតាំងចិត្តមកជួយពលរដ្ឋរងគ្រោះដោយទឹកជំនន់នៅខេត្តសុងក្លា ប៉ុន្តែជួបហេតុការណ៍បែបនេះទៅវិញ ។ ការបា.ញ់គំរា.មភ្នាក់ងារសង្គ្រោះបានកើតឡើងម្តងហើយនាពេលថ្មីៗនេះ ដែលធ្វើឱ្យភ្នាក់ងារសង្គ្រោះសម្រេចចិត្តដកថយវិញដើម្បីសុវត្ថិភាព ។

ស្ថានការណ៍ទឹកជំនន់ធ្ងន់ធ្ងរទាំង១៦ស្រុកនៅខេត្តសុងក្លា បានធ្វើឱ្យភ្នាក់ងារសង្គ្រោះមកពីតាមបណ្តាខេត្ត និងច្រើនស្ថាប័នធ្វើដំណើរមកជួយសង្គ្រោះ ជាពិសេស នៅស្រុកហាតយៃ ប៉ុន្តែជួបឧបសគ្គដោយសារទឹកហូរខ្លាំង រហូតដល់ភ្នាក់ងារសង្គ្រោះពុំអាចទៅជួយពលរដ្ឋនៅតំបន់គ្រោះថ្នាក់ ។ លើសពីនេះ ពលរដ្ឋខ្លះបានបាញ់កាំភ្លើងគំរាមថែមទៀត ពេលភ្នាក់ងារសង្គ្រោះជិះទូក Jet Ski ទៅជួយ ហើយការបាញ់នេះភាគច្រើនកើតឡើងនៅតំបន់៨ រហូតធ្វើឱ្យភ្នាក់ងារសង្គ្រោះជាច្រើនក្រុមដកថយកម្លាំង និងបញ្ឈប់ការជួយ ។

នៅថ្ងៃទី២៧ ខែវិច្ឆិកា ហ្វេសប៊ុកឈ្មោះ «Ohm Dynamo» គឺជាភ្នាក់ងារសង្គ្រោះជួយពលរដ្ឋលិចទឹកនៅស្រុកហាតយៃ ខេត្តសុងក្លា បានបង្ហោះវីដេអូពេលខ្លួនជិះទូក Jet Ski ទៅជួយសង្គ្រោះពលរដ្ឋរងផលប៉ះពាល់ដោយសារទឹកជំនន់ ប៉ុន្តែបែរជាត្រូវពលរដ្ឋបាញ់គំរាម ។ ក្នុងវីដេអូ គេបានឮសូរគ្រាប់កាំភ្លើងជាច្រើនគ្រាប់ រហូតដល់ភ្នាក់ងារសង្គ្រោះលោតចុះពីទូកដើម្បីគេចពីគ្រាប់កាំភ្លើង ។ ហ្វេសប៊ុកនេះសរសេរថា ៖ «ខ្ញុំតាំងចិត្តមកជួយពួកអ្នក ប៉ុន្តែបែរជាបាញ់កាំភ្លើងទៅវិញ ខ្ញុំដកថយហើយ អាក្រក់ណាស់បែបនេះ» ។

អ្នកលេងបណ្តាញបានបង្ហាញការអាណិតអាសូរភ្នាក់ងារសង្គ្រោះដែលព្យាយាមមកជួយពលរដ្ឋភាគខាងត្បូង បែរជារងការបាញ់គំរាម ដោយពួកគេថា ការបាញ់បែបនេះ នឹងគ្មានភ្នាក់ងារសង្គ្រោះហ៊ានមកចែកអាហារ និងជម្លៀសអ្នកជំងឺ ។ ការបាញ់កាំភ្លើងមិនត្រឹមតែធ្វើឱ្យភ្នាក់ងារសង្គ្រោះភ័យរត់ទេ វាក៏ធ្វើឱ្យពលរដ្ឋផ្សេងទៀតភ័យស្លន់ស្លោផងដែរ។ អ្នកលេងបណ្តាញសង្គមបានផ្តល់កម្លាំងចិត្តឱ្យភ្នាក់ងារសង្គ្រោះដែលមានឧបសគ្គក្នុងការបំពេញភារកិច្ច ខណៈខ្លះថា ការបាញ់អាចសញ្ញាជូនដំណឹងឱ្យភ្នាក់ងារសង្គ្រោះឆាប់ទៅជួយក៏ថាបាន ។

ដោយឡែក កាលពីថ្ងៃទី២៦ ខែវិច្ឆិកា ក៏មានហេតុការណ៍បាញ់គំរាមដូចគ្នានេះដែរមកលើភ្នាក់ងារសង្គ្រោះនៅផ្លូវបាងហ្វែប-ឃ្លងវ៉ាត ក្នុងភូមិ៧ និងភូមិ១១ ឃុំថាឆាង ស្រុកបាងក្លាំ ខេត្តសុងក្លា ក្នុងអំឡុងពេលភ្នាក់ងារសង្គ្រោះកំពុងប្រមូលសម្ភារៈត្រឡប់ទៅវិញ ។ គ្រាប់កាំភ្លើងបានផ្ទុះឡើងចំនួន៤គ្រាប់ និងក្រោយមក ជនល្មើសបានសូមទោស ប៉ុន្តែហេតុការណ៍នេះធ្វើឱ្យភ្នាក់ងារសង្គ្រោះសម្រេចចិត្តឈប់បំពេញភារកិច្ចនៅផ្លូវបាងហ្វែប-ឃ្លងវ៉ាត ។

តាមការសាកសួរជនល្មើសឱ្យដឹងថា ការបាញ់គំរាមភ្នាក់ងារសង្គ្រោះនេះ គឺមកពីតានតឹងផ្លូវចិត្តដោយសារទឹកជំនន់ខ្លាំងពេក ពីព្រោះមានទូកភ្នាក់ងារសង្គ្រោះឆ្លងកាត់តំបន់ដែលជនល្មើសស្ថិតនៅ ប៉ុន្តែទូកមិនបានជួយជម្លៀសខ្លួនចេញទេ ។

គួរបញ្ជាក់ថា ស្ថានការណ៍ទឹកជំនន់នៅស្រុកហាតយៃ ខេត្តសុងក្លា នៅថ្ងៃទី២៧ ខែវិច្ឆិកានេះ កម្ពស់ទឹកបានស្រកចុះក្នុងតំបន់មួយចំនួន ប៉ុន្តែតំបន់ជាច្រើនទៀតនៅតែជន់លិច និងរង់ចាំការជួយសង្គ្រោះ ៕

ប្រទេសថៃ ៖ កាលពីថ្ងៃទី២៦ ខែវិច្ឆិកា ឆ្នាំ២០២៥ អតីតស្នងការរងនគរបាលជាតិបានទាមទារឱ្យនាយករដ្ឋមន្ត្រីថៃទទួលខុសត្រូវពលរដ្ឋស្លា.ប់ ដោយសារទឹកជំនន់នៅភាគខាងត្បូង ដោយអតីតស្នងការរងនគរបាលជាតិរូបនេះស្តីបន្ទោសនាយករដ្ឋមន្ត្រីបរាជ័យក្នុងការដោះស្រាយបញ្ហាទឺកជំនន់នៅស្រុកហាតយៃ ខេត្តសុងក្លា រហូតដល់ពលរដ្ឋស្លា.ប់ជាបន្តបន្ទាប់ ក្រោយពីទន្ទឹងរង់ចាំការជួយសង្គ្រោះពីរដ្ឋាភិបាលទាំងអស់សង្ឃឹម ។ លោក Anutin Charnvirakul កាន់តំណែងជានាយករដ្ឋមន្ត្រីផង និងរដ្ឋមន្ត្រីក្រសួងមហាផ្ទៃផង បែរជាមិនចេះដោះស្រាយបញ្ហាទឹកជំនន់ បណ្តោយឱ្យមន្ត្រីថ្នាក់ក្រោមធ្វើជំនួស ។

អតីតស្នងការរងនគរបាលជាតិទាមទារឱ្យនាយករដ្ឋន្ត្រីថៃទទួលខុសត្រូវ ក្រោយពីចំនួនពលរដ្ឋស្លា.ប់ដោយសារទឹកជំនន់នៅភាគខាងត្បូងកើនឡើងជាបន្តបន្ទាប់ បើទោះជារដ្ឋាភិបាលព្យាយាមបញ្ជូនក្រុមសង្គ្រោះ ទូក ឧបករណ៍ និងចែកអាហារដល់ពលរដ្ឋរងគ្រោះក្តី ប៉ុន្តែការជម្លៀសពលរដ្ឋចេញពីតំបន់គ្រោះថ្នា.ក់យឺតយ៉ាវ ថែមទាំងចែកអាហារមិនដល់ដៃពលរដ្ឋគ្រប់រូប ទើបធ្វើឱ្យអ្នកទន្ទឹងរង់ចាំជំនួយដាច់បាយ ដាច់ទឹក ស្លាប់ជាបន្តបន្ទាប់ ។ ពលរដ្ឋបានបន្ទោសរដ្ឋាភិបាលពុំជួយជម្លៀសទាន់ពេលវេលា ជាពិសេស មិនបញ្ជូនកងទ័ពជើងទឹក និងកងទ័ពជើងគោកមកជួយដោយទុកឱ្យកងទ័ពប្រចាំការនៅព្រំដែនកម្ពុជា-ថៃ ។

ចំណែកគណបក្សប្រជាជនបានណែនាំឱ្យរដ្ឋាភិបាលរបស់លោកនាយករដ្ឋមន្ត្រី Anutin អំពាវនាវសុំឱ្យប្រទេសនានាជួយសង្គ្រោះទឹកជំនន់នៅភាគខាងត្បូង ពីព្រោះនាយករដ្ឋមន្ត្រីចាត់វិធានការយឺតយ៉ាវ រហូតធ្វើឱ្យពលរដ្ឋស្លាប់ដោយខ្សែភ្លើងឆក់ លង់ទឹក និងគ្មានអាហារបរិភោគជាច្រើនថ្ងៃ ។ គណបក្សនេះសំណូមពរឱ្យលោក Anutin ប្រញាប់ទាក់ទងទៅម៉ាឡេស៊ី និងសិង្ហបុរី ដើម្បីឱ្យប្រទេសទាំងពីរមកជួយពលរដ្ឋភាគខាងត្បូងជាបន្ទាន់ ពីព្រោះទឹកជំនន់ធ្ងន់ធ្ងរពេក ហួសពីសមត្ថភាពដោះស្រាយរបស់នាយករដ្ឋមន្ត្រីថៃ ។

លោក Surachet Hakpal អតីតស្នងការរងនគរបាលជាតិបានផ្តល់សម្ភាសន៍ជាមួយសារព័ត៌មានកាលពីថ្ងៃទី២៦ ខែវិច្ឆិកា ឆ្នាំ២០២៥ អំពីស្ថានការណ៍ទឹកជំនន់នៅស្រុកហាតយៃ ខេត្តសុងក្លា ដោយសួរថា តើលោក Anutin ជួយពលរដ្ឋរងគ្រោះដោយទឹកជំនន់ដូចម្តេច ទលបនៅស្រុកហាតយៃមានពលរដ្ឋស្លាប់ជិត១០០នាក់ នេះបញ្ជាក់ថា នាយករដ្ឋមន្ត្រីថៃមិនចេះដោះស្រាយបញ្ហាទឹកជំនន់ ។ បើលោក Anutin ចង់ជួយពលរដ្ឋមែននោះ ត្រូវបញ្ជាដោយខ្លួនឯង ពីព្រោះកាន់តំណែងជានាយករដ្ឋមន្ត្រីផង និងរដ្ឋមន្ត្រីក្រសួងមហាផ្ទៃផង ប៉ុន្តែបែរជាឱ្យអគ្គមេបញ្ជាការកងទ័ព លោក ឧគ្រីត ប៊ុនតាណុន ទទួលខុសត្រូវជំនួស ។

លោកនាយករដ្ឋមន្ត្រី Anutin កាន់តំណែងចំនួន២ ប៉ុន្តែមិនទទួលខុសត្រូវដោះស្រាយបញ្ហាទឹកជំនន់នៅភាគខាងត្បូង លោកជាមេដឹកនាំប្រទេសត្រូវតែទទួលខុសត្រូវ មិនមែនបោះបង់ការទទួលខុសត្រូវទេ អ្វីដែលលោកកំពុងធ្វើពេលនេះ គឺមិនទទួលស្គាល់កំហុសរបស់ខ្លួន ។ លោក Anutin បានជិះយន្តហោះមកពិនិត្យមើលទឹកជំនន់នៅភាគខាងត្បូង ចង់សួរថា តើចុះមកធ្វើអី នាំតែអស់ប្រេងយន្តហោះ លោកគួរអង្គុយនៅទីក្រុងបាងកកបញ្ជាចាត់ការទឹកជំនន់វិញ ព្រមទាំងបញ្ជូនដ្រូន ទូក ស្វែងរកជម្រកបណ្តោះអាសន្ន និងចែកអាហារឱ្យពលរដ្ឋ ។

លោកអាណិតពលរដ្ឋរងគ្រោះណាស់ បើទោះមានក្រុមកសង្គ្រោះ ប៉ុន្តែគ្មានការសហការគ្នា រីឯខ្លួនលោកនឹងយកទឹកបរិសុទ្ធទៅចែកឱ្យពលរដ្ឋរងគ្រោះ លោកជួយបានតែប៉ុណ្ណឹងទេ ពីព្រោះគ្មានអំណាច ខណៈលោក Anutin មានអំណាចពេញដៃ ប៉ុន្តែជួយពលរដ្ឋបានត្រឹមតែចែកសម្ភារៈ ។ លោក Anutin ចុះពិនិត្យមើលទឹកជំនន់តែមួយតំបន់ប៉ុណ្ណោះ រីឯតំបន់ភាគខាងត្បូងផ្សេងទៀត គ្មានអ្នកមើលការខុសត្រូវទេ ។ នេះបង្ហាញថា លោក Anutin ខ្វះសមត្ថភាពដោះស្រាយបញ្ហា បើទោះលោកកាន់តំណែងត្រឹម៤ខែ ប៉ុន្តែត្រូវទទួលខុសត្រូវពលរដ្ឋស្លាប់ដោយទឹកជំនន់ ទើបអាចបន្តតំណែងអាណត្តិក្រោយរយៈពេល៤ឆ្នាំ ។

លោក Anutin ធ្វើបានតែការគ្រប់គ្រងសំឡេងឆ្នោតក្នុងរដ្ឋសភាប៉ុណ្ណោះ ប៉ុន្តែមិនយល់ពីទុក្ខលំបាករបស់ពលរដ្ឋ ។ ពេលនេះ ពលរដ្ឋរងគ្រោះដោយទឹកជំនន់នៅភាគខាងត្បូងទ្រាំលែងបាននឹងការជួយសង្គ្រោះយឺតយ៉ាវពេក រហូតដល់យកកាំភ្លើងមកបាញ់រះក្រុមសង្គ្រោះ ដោយសារពលរដ្ឋតានតឹងផ្លូវចិត្តខ្លាំង ។ នេះបើតាមការលើកឡើងរបស់អតីតស្នងការរងនគរបាលជាតិ ៕