ប្រទេសប៉ូឡូញ ៖ រដ្ឋមន្ត្រីក្រសួងកីឡាប៉ូឡូញបង្ហាញថា អាចមានប្រទេសចំនួន៤០ ធ្វើពហិការមិនចូលរួមប្រកួតកីឡាអូឡាំពិកឆ្នាំ២០២៤ នៅទីក្រុងប៉ារីស ប្រទេសបារាំង ដើម្បីប្រឆាំងនឹងផែនការរបស់គណៈកម្មាធិការអូឡាំពិកអន្តរជាតិ International Olympic Committee (IOC) ដែលអនុញ្ញាតឱ្យកីឡាកររុស្ស៊ី និងបេឡារុសចូលរួមប្រកួត ។

រដ្ឋមន្ត្រីក្រសួងកីឡា និងទេសចរណ៍ប៉ូឡូញ លោក Kamil Bortnissuk បានផ្តល់សម្ភាសន៍កាលពីថ្ងៃទី២ ខែកុម្ភៈថា លោកជឿថា ប្រទេសទាំង៤០ អាចបង្កើតសម្ព័ន្ធភាពរួមគ្នាជាមួយអង់គ្លេស អាមេរិក និងកាណាដា ដើម្បីសម្តែងការប្រឆាំងនឹងផែនការរបស់គណៈកម្មាធិការអូឡាំពិកអន្តរជាតិ ដែលអនុញ្ញាតឱ្យកីឡាកររុស្ស៊ី និងបេឡារុសចូលរួមប្រកួតកីឡាអូឡាំពិកឆ្នាំ២០២៤ នៅទីក្រុងប៉ារីស មុនពេលគណៈកម្មាធិការនេះនឹងប្រជុំនៅថ្ងៃទី១០ ខែកុម្ភៈ ។ បើប្រទេសទាំងអស់រួមគ្នាប្រឆាំងនោះ ការប្រកួតកីឡានេះគ្មានអត្ថន័យទេ ។

កាលពីសប្តាហ៍មុន IOC បង្ហាញថា កំពុងរកវិធីអនុញ្ញាតឱ្យកីឡាកររុស្ស៊ី និងបេឡារុសចូលរួមប្រកួតកីឡាអូឡាំពិកនៅក្រុងប៉ារីសក្នុងនាមអព្យាក្រឹត ហើយមិនគួរមានកីឡាករណាម្នាក់ត្រូវហាមចូលរួមប្រកួត ដោយគ្រាន់តែពួកគេជាជនជាតិរុស្ស៊ី និងបេឡារុសទេ ។

ប៉ុន្តែរដ្ឋមន្ត្រីក្រសួងកីឡាប៉ូឡូញបានប្រកាសប្រឆាំងនឹងផែនការអនុញ្ញាតឱ្យកីឡាកររុស្ស៊ី និងបេឡារុសចូលរួមប្រកួត បើទោះក្នុងឋានៈជាអ្នកអព្យាក្រឹតក្តី ។ លើសពីនេះ រដ្ឋមន្ត្រីក្រសួងកីឡាអ៊ុយក្រែន និងប្រធានាធិបតីអ៊ុយក្រែន លោក Volodymy Zelensky ក៏បានព្យាយាមបញ្ចុះបញ្ចូលតាំងពីខែមករាដែរ ដើម្បីឱ្យប្រទេសនានារួមគ្នាហាមឃាត់រុស្ស៊ីចូលរួមកីឡាអូឡាំពិកឆ្នាំ២០២៤ ។

ជាមួយគ្នានេះ អាមេរិកក៏បានគាំទ្រឱ្យអង្គការកីឡាអន្តរជាតិព្យួរសមាជិកភាពស្ថាប័នកីឡារបស់រុស្ស៊ី និងបេឡារុស ហើយបញ្ចុះបញ្ចូលឱ្យអង្គការនានាបញ្ឈប់ការផ្សាយព្រឹត្តិការណ៍កីឡាផ្សេងៗរបស់ប្រទេសទាំងពីរ ។

គណៈកម្មាធិការអូឡាំពិកអន្តរជាតិបានចេញសេចក្តីថ្លែងការណ៍ថា ការធ្វើពហិការនេះ ជាការរំលោភច្បាប់កីឡាអូឡាំពិក ដែលតម្រូវឱ្យគណៈកម្មការអូឡាំពិកជាតិនៃប្រទេសសមាជិកនីមួយៗត្រូវបញ្ជូនកីឡាករមកចូលរួមប្រកួត ហើយការធ្វើពហិការកន្លងមក មិនទទួលបានលទ្ធផលនយោបាយទេ និងក្លាយជាការដាក់ទោសកីឡាករទៅវិញ៕

ប្រភព ៖ Nation World News

ប្រទេសអ៊ុយក្រែន ៖ កាលពីថ្ងៃទី៣ ខែកុម្ភៈ មេដឹកនាំសហភាពអឺរ៉ុប (EU) បានជួបជាមួយប្រធានាធិបតីអ៊ុយក្រែន លោក Volodymy Zelensky
នៅទីក្រុងគៀវ ដោយបានសន្យាថា នឹងប្រឆាំងជាមួយរុស្ស៊ីជាថ្មី ប៉ុន្តែមេដឹកនាំសហភាពអឺរ៉ុបនិយាយថា មិនទាន់ទទួលអ៊ុយក្រែនជាសមាជិករបស់ EU ទេ ដោយសារអ៊ុយក្រែនមានសង្គ្រាម ។ ការបដិសេធនេះបានបំផ្លាញក្តីសុបិនរបស់អ៊ុយក្រែន ដែលចង់ចូលជាសមាជិក EU នាពេលឆាប់រហ័សនេះ ។

កាលពីថ្ងៃទី២ ខែកុម្ភៈ កន្លងមក លោកស្រី Ursula vonder Leyen នាយកប្រតិបត្តិសហភាពអឺរ៉ុប EU បានធ្វើដំណើរទៅកាន់ទីក្រុងគៀវតាមរថភ្លើង ។ វាជាការធ្វើដំណើរវែងឆ្ងាយមួយដើម្បីបង្ហាញការគាំទ្រប្រទេសអ៊ុយក្រែន ខណៈជិតដល់គម្រប់ខួប១ឆ្នាំនៃជម្លោះរវាងរុស្ស៊ី-អ៊ុយក្រែន ដែលចាប់ផ្តើមតាំងពីថ្ងៃទី២៤ ខែកុម្ភៈ ឆ្នាំ២០២២ ។

លោក Volodymy Zelensky បានអំពាវនាវឱ្យ EU ដាក់ទោសរុស្ស៊ីបន្ថែមទៀត ប៉ុន្តែវិធានការដាក់ទណ្ឌកម្មថ្មីដែល EU កំពុងត្រៀមប្រើក្នុងពេលគម្រប់ខួប១ឆ្នាំនៃសង្គ្រាម បែរជាមិនដូចនឹងការអំពាវនាវរបស់រដ្ឋាភិបាលអ៊ុយក្រែន ។ ខណៈ EU គាំទ្រអ៊ុយក្រែន និងគាំទ្រការកែទម្រង់លទ្ធិប្រជាធិបតេយ្យ និងសេដ្ឋកិច្ច ប៉ុន្តែ EU បានបដិសេធមិនទទួលអ៊ុយក្រែនជាសមាជិកទេ ដោយសារអ៊ុយក្រែនមានសង្គ្រាម ។

ក្រៅពីនេះ EU បានអំពាវនាវឱ្យអ៊ុយក្រែនចាត់វិធានការប្រឆាំងនឹងអំពើពុករលួយបន្ថែមទៀត ខណៈគេមើលឃើញថា រដ្ឋាភិបាលអ៊ុយក្រែនបានក្លែងបន្លំ ហើយអ៊ុយក្រែនត្រូវតែបង្កើតលទ្ធផលការងារគួរឱ្យជឿជាក់ ។

គួរបញ្ជាក់ថា ក្រូអាតជាប្រទេសចុងក្រោយដែលបានចូលជាសមាជិក EU នៅឆ្នាំ២០១៣ គឺមានរយៈពេលជាង១០ឆ្នាំ បន្ទាប់ពីប្រទេសនេះបានស្ម័គ្រជាសមាជិកជាផ្លូវការ ប៉ុន្តែអ៊ុយក្រែនទើបតែស្ម័គ្រចូលជាសមាជិក EU ហើយនៅខែមិថុនា ឆ្នាំ២០២២ អ៊ុយក្រែនបានទទួលឋានៈត្រឹមតែជាអ្នកស្ម័គ្រចូលសមាជិក EU ជាផ្លូវការប៉ុណ្ណោះ ។ ចំណែកកិច្ចប្រជុំកំពូលរវាង EU និងអ៊ុយក្រែនកើតឡើងស្របពេលមានសម្ពាធរបស់រុស្ស៊ីលើកងទ័ពអ៊ុយក្រែនក្នុងសមរភូមិភាគខាងកើត ឦសាន និងខាងត្បូង ៕

ប្រភព ៖ TNN World

ប្រទេសថៃ ៖ អ្នកនាង រ៉ាឆាដា ថៈណាឌិរេក អ្នកនាំពាក្យទីស្តីការនាយករដ្ឋមន្ត្រី បានបង្ហាញថា តាមទិន្នន័យពីការិយាល័យអន្តោប្រវេសន៍របស់កូរ៉េខាងត្បូងឃើញថា បច្ចុប្បន្ន មានពលករថៃជាង១សែននាក់បានលួចចូលទៅធ្វើការខុសច្បាប់នៅប្រទេសកូរ៉េខាងត្បូង ។

អ្នកនាង រ៉ាឆាដា បានដាស់តឿនពលករថៃទាំងអស់ដែលចង់ទៅធ្វើការនៅកូរ៉េខាងត្បូង សូមទៅធ្វើការឱ្យស្របច្បាប់តាមរយៈនាយកដ្ឋានការងារ ហើយកុំជឿលើការបបួលទៅធ្វើការខុសច្បាប់នៅកូរ៉េខាងត្បូង ព្រោះនឹងធ្វើឱ្យពួកគេពិបាកទទួលបានសិទ្ធិផ្សេងៗ គ្មានការធានារ៉ាប់រងសុខភាព ត្រូវគេយកប្រៀបរឿងប្រាក់ឈ្នួល និងត្រូវរស់នៅបែបលួចលាក់ ។

នាយកដ្ឋានកិច្ចការកុងស៊ុលក្រសួងការបរទេសបានជូនដំណឹងដល់ពលករថៃនៅកូរ៉េខាងត្បូង ដែលលួចទៅធ្វើការខុសច្បាប់ ឱ្យពួកគេទៅបង្ហាញខ្លួនត្រឡប់មកប្រទេសថៃវិញ រហូតដល់ថ្ងៃទី២៨ ខែកុម្ភៈនេះ បន្ទាប់ពីកូរ៉េខាងត្បូងអនុញ្ញាតឱ្យពលករថៃទៅបង្ហាញខ្លួន តាំងពីថ្ងៃទី៧ ខែវិច្ឆិកា ឆ្នាំ២០២២ ។ ពលករថៃអាចទៅបង្ហាញខ្លួននៅការិយាល័យអន្តោប្រវេសន៍កូរ៉េខាងត្បូង ព្រមទាំងមានឯកសារជាប់ខ្លួនដូចជា លិខិតឆ្លងដែន លិខិតបញ្ជាក់ការធ្វើដំណើរ និងសំបុត្រយន្តហោះជាដើម ។

បើពលករថៃទៅបង្ហាញខ្លួនតាមពេលវេលាកំណត់ ពួកគេនឹងទទួលបានការលើកលែងពិន័យជាប្រាក់ចំនួន៣០លានវ៉ុន ហើយអាចធ្វើដំណើរត្រឡប់មកកូរ៉េខាងត្បូងវិញបាន ប៉ុន្តែបើមិនទៅបង្ហាញខ្លួនតាមពេលកំណត់ទេនោះ ពួកគេនឹងត្រូវបានគេពិន័យ ហើយមានការរឹតបន្តឹងបន្ថែមពេលធ្វើដំណើរមកកាន់កូរ៉េខាងត្បូង ៕

ប្រភព ៖ Today

សហរដ្ឋអាមេរិក ៖ សារព័ត៌មាន Yonhap របស់កូរ៉េខាងត្បូងរាយការណ៍ថា សភាតំណាងរាស្ត្រអាមេរិកបានបោះឆ្នោតកាលពីថ្ងៃទី២ ខែកុម្ភៈ ដោយថ្កោលទោសលោក គីម ជុងអ៊ុន មេដឹកនាំប្រទេសកូរ៉េខាងជើង រួមទាំងមេដឹកនាំសង្គមនិយមបច្ចុប្បន្ន និងអតីតមេដឹកនាំប្រទេសមួយចំនួន ។ ការបោះឆ្នោតមានសំឡេង៣២៨ ទល់នឹង៨៦ ចោទប្រកាន់មេដឹកនាំកូរ៉េខាងជើង និងមេដឹកនាំសង្គមនិយមថា ប្រកាន់របបផ្តាច់ការ ហើយមានពលរដ្ឋកូរ៉េខាងជើងចំនួន៣.៥០០.០០០នាក់រស់ក្រោមការអត់ឃ្លាន ។

មតិក្នុងការបោះឆ្នោតនេះក៏បានថ្កោលទោសផងដែរថា កូរ៉េខាងជើងធ្វើឱ្យមានអ្នកស្លាប់ទូទាំងពិភពលោក ហើយបញ្ជាក់ថា រដ្ឋសភាអាមេរិកប្រឆាំងនឹងការដាក់ចេញនូវគោលនយោបាយសង្គមនិយមនៅអាមេរិក ។ មតិនេះក៏បានថ្កោលទោសមេដឹកនាំសង្គមនិយមបច្ចុប្បន្ន និងអតីតមេដឹកនាំមួយចំនួនដូចជា លោក Nicolas Maduro មេដឹកនាំប្រទេសវ៉េណេស៊ុយអេឡាបច្ចុប្បន្ន និងលោក គីម ជុងអ៊ីល អតីតមេដឹកនាំកូរ៉េខាងជើង (បានស្លាប់ហើយ) ជាឪពុករបស់លោក គីម ជុងអ៊ុន មេដឹកនាំកូរ៉េខាងជើងបច្ចុប្បន្ន រួមទាំងអតីតមេដឹកនាំសង្គមនិយមរបស់រុស្ស៊ី ចិន និងវ៉េណេស៊ុយអេឡា ។

ជាមួយគ្នានេះ លោក Ned Price អ្នកនាំពាក្យក្រសួងការបរទេសអាមេរិក បានថ្លែងកាលពីថ្ងៃទី២ ខែកុម្ភៈថា អាមេរិកនៅតែត្រៀមខ្លួនចូលរួមជាមួយកូរ៉េខាងជើងផ្នែកការទូត និងការចរចា ដោយមានគោលដៅចម្បង គឺការរំសាយអាវុធនុយក្លេអ៊ែរនៅឧបទ្វីបកូរ៉េ ប៉ុន្តែកូរ៉េខាងជើងមិនចាប់អារម្មណ៍ការចរចា ។ ទោះយ៉ាងណា លោក Ned Price បញ្ជាក់ថា បើទោះជាអាមេរិកត្រៀមការទូតជាមួយកូរ៉េខាងជើង ប៉ុន្តែសំខាន់ ត្រូវធ្វើឱ្យកូរ៉េខាងជើងទទួលខុសត្រូវសកម្មភាពបង្កហេតុកន្លងមក ។

ការលើកឡើងរបស់លោក Ned Price គឺក្រោយពីកូរ៉េខាងជើងបញ្ជាក់ថា មិនចាប់អារម្មណ៍ទំនាក់ទំនង ឬចរចាជាមួយអាមេរិក ដរាបណាអាមេរិកនៅតែប្រើនយោបាយប្រឆាំងនឹងកូរ៉េខាងជើង ៕

ប្រភព ៖ TNN World

ប្រទេសចិនគ្រោង នឹងអភិវឌ្ឍកន្លែងអវកាសរបស់ខ្លួននៅអង់តាក់ទិក ដែលជាផ្នែកមួយនៃគោលដៅមហិច្ឆតារបស់ប្រទេសនេះ ដើម្បីក្លាយជាមហាអំណាចអវកាសនាំមុខគេនៅលើលោក។

កាលពីឆ្នាំ២០២០ ក្រុមហ៊ុនអវកាសរបស់ប្រទេសស៊ុយអែត ធ្លាប់បានផ្គត់ផ្គង់ស្ថានីយទាក់ទងបណ្តាញផ្ដាយរណបពីភពផែនដីដែលអាចជួយគាំទ្រដល់យានអវកាសរបស់ចិន ដូចជាការជួយសម្រួលដល់ការ បញ្ជូន ទិន្នន័យជាដើម។ ប៉ុន្តែក្រោយមក ក្រុមហ៊ុននេះបានបដិសេធមិនបន្តកិច្ចសន្យាជាមួយប្រទេសចិន ឬទទួលបានសំណើអាជីវកម្មថ្មីៗពីប្រទេស ចិនទៀតនោះទេ ដោយសារតែមូលហេតុនៃការផ្លាស់ប្តូរស្ថានភាពភូមិសាស្ត្រ នយោបាយ។

ប្រធានាធិបតីចិនលោក Xí Jìnpíng បានអំពាវនាវឱ្យផ្លាស់ប្តូរប្រទេសទៅជា “មហាអំណាចអវកាស” ហើយដោយក្រោមហេតុផលថា “ឧស្សាហកម្មអវកាសគឺជាកត្តាសំខាន់នៃយុទ្ធសាស្ត្រជាតិទាំងមូល”៕

ប្រភព៖ The China Project

ភ្នំពេញ៖ ក្នុងឆ្នាំ២០២២ អគ្គនាយកដ្ឋានគយ និងរដ្ឋាករកម្ពុជា ចំណូលប្រមូលបានចំនួន ១០ ៩៩៨.៩ ប៊ីលានរៀល (ស្មើនឹងប្រមាណ ២ ៦៩០.៥ លានដុល្លារអាមេរិក) កើនឡើង ១៨.៣% ធៀបនឹងចំណូលប្រមូលបានក្នុងឆ្នាំ២០២១។

លោកបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានឲ្យដឹងថា លទ្ធផលនេះ គឺសម្រេចបាន ១០៤.៩% នៃផែនការដែលកំណត់ដោយច្បាប់ ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២២។

នៅក្នុងកិច្ចប្រជុំបូកសរុបលទ្ធផលការងារគយ និងរដ្ឋាករប្រចាំឆ្នាំ២០២២ នៅសណ្ឋាគារសង្គហមិត្ត ខេត្តកែប ក្រោមអធិបតីភាពអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោកគុណ ញឹម បាបញ្ជាក់ថា បើគិតតាមប្រភេទពន្ធ និងអាករ ឃើញថា អាករលើតម្លៃបន្ថែមមានចំនួន ៤ ១៦៩.៨ ប៊ីលានរៀល (ត្រូវជា ៣៧.៩%នៃចំណូលសរុប), អាករពិសេសមានចំនួន ៤ ១៥១.៦ ប៊ីលានរៀល (ត្រូវជា ៣៧.៧% នៃចំណូលសរុប), ពន្ធគយមានចំនួន ២ ០៨៧ ប៊ីលានរៀល (ត្រូវជា ១៩% នៃចំណូលសរុប), អាករបន្ថែមលើផលិតផលប្រេងឥន្ធនៈមានចំនួន ៣៦៧.២ ប៊ីលានរៀល (ត្រូវជា ៣.៣% នៃចំណូលសរុប), និងអាករនាំចេញនិងកម្រៃផ្សេងៗមានចំនួន ២២៣.៤ ប៊ីលានរៀល (ត្រូវជា ២.១% នៃចំណូលសរុប)។

ចំពោះចំណូលតាមក្រុមទំនិញឃើញថា យានយន្ត និងគ្រឿងចក្រមានចំនួន ៥ ០៧៨.៧ ប៊ីលានរៀល (ត្រូវជា ៤៦.២% នៃចំណូលសរុប), ទំនិញចម្រុះមានចំនួន ៣ ០៣២.៦ ប៊ីលានរៀល (ត្រូវជា ២៧.៦% នៃចំណូលសរុប), ផលិតផលតេលសិលាមានចំនួន ២ ២៣៨ ប៊ីលានរៀល (ត្រូវជា ២០.៣% នៃចំណូលសរុប), និងសម្ភារសំណង់និងកម្រៃផ្សេងៗមានចំនួន ៦៤៩.៥ ប៊ីលានរៀល (ត្រូវជា ៥.៩% នៃចំណូលសរុប)។

ដោយឡែក ទំហំពាណិជ្ជកម្មនាំចូលមានចំនួន ២៥ ៤៦០.៤ លានដុល្លារអាមេរិក កើនឡើងប្រមាណ ១១.៩% ធៀបនឹងឆ្នាំ២០២១ ដែលក្នុងនោះទំនិញនាំចូលសំខាន់ៗមានជាអាទិ៍ យានយន្តនិងគ្រឿងចក្រ, ផលិតផលតេលសិលា, វត្ថុធាតុដើម និងគ្រឿងម៉ាស៊ីន បម្រើដល់គម្រោងវិនិយោគ, គ្រឿងសំណង់, គ្រឿងឧបភោគ-បរិភោគ និងទំនិញចម្រុះផ្សេងទៀត។

ទំហំពាណិជ្ជកម្មនាំចេញមានចំនួន ២២ ៤៤៧.២លានដុល្លារអាមេរិក កើនឡើង១៦.៧% ធៀបនឹងឆ្នាំ២០២១ ដែលក្នុងនោះ ផលិតផលកាត់ដេរមានកំណើន ១៤.១%, ផលិតផលវិនិយោគមិនមែនកាត់ដេរ (ដូចជា គ្រឿងបំណែកអេឡិចត្រូនិក បង្គុំខ្សែភ្លើង កង់ ផលិតផលពីឈើ ផលិតផលប្លាស្ទិច គ្រឿងបន្លាស់រថយន្ត និងផលិតផលឧស្សាហកម្មផ្សេងៗទៀត) មានកំណើន ២៦.២%, និងកសិផលមានកំណើន ៦.៦%៕

ប្រទេសហ្វីលីពីន ៖ ករណីហ្វីលីពីនបើកផ្លូវឱ្យអាមេរិកតាំងមូលដ្ឋានទ័ពបន្ថែម៤កន្លែងទៀតក្នុងប្រទេសរបស់ខ្លួន ទីបំផុត ប្រទេសចិនបានចេញមកដាស់តឿនហ្វីលីពីនថា កុំឱ្យអាមេរិកយកប្រៀប និងទាញចូលក្នុងជម្លោះក្នុងតំបន់ ។

សេចក្តីថ្លែងការណ៍ពីស្ថានទូតចិនប្រចាំក្រុងម៉ានីល កាលពីថ្ងៃទី២ ខែកុម្ភៈថា ហ្វីលីពីន និងអាមេរិក ត្រូវទទួលខុសត្រូវសកម្មភាពរបស់ខ្លួន ។ ចិនប្រកាន់ជំហរថា ការសហការផ្នែកកងទ័ព និងស្ថេរភាពជាមួយប្រទេសផ្សេងៗ គួរតែមានការរួមចំណែកពីសន្តិភាព និងស្ថេរភាពក្នុងតំបន់ មិនមែនប្រឆាំងនឹងប្រទេសទី៣ ឬការបំផ្លាញផលប្រយោជន៍ផ្សេងៗរបស់ប្រទេសទី៣ ទេ ។ ការបង្កើនកម្លាំងទ័ពក្នុងតំបន់ដោយសារផលប្រយោជន៍របស់ខ្លួន វានឹងធ្វើឱ្យតំបន់កាន់តែតានតឹងខ្លាំង ។ ហ្វីលីពីនត្រូវប្រយ័ត្ន និងទប់ទល់ការកេងប្រវ័ញ្ច ដោយសារការអូសហ្វីលីពីនចូលពាក់ព័ន្ធនឹងជម្លោះដែនទឹក ។

កិច្ចព្រមព្រៀងតាំងមូលដ្ឋានទ័ពនៅហ្វីលីពីន គឺក្រោយពីរដ្ឋមន្ត្រីក្រសួងការពារជាតិអាមេរិក លោក Lloyd Austin ធ្វើដំណើរទៅកាន់ប្រទេសហ្វីលីពីន ជាផ្នែកមួយនៃការធ្វើទេសចរតំបន់អាស៊ី ក្នុងគោលដៅទប់ទល់ឥទ្ធិពលកើនឡើងខ្លាំងក្នុងតំបន់របស់ចិន ។

សេចក្តីថ្លែងការណ៍រួមរវាងហ្វីលីពីន និងអាមេរិកបញ្ជាក់ថា ប្រទេសទាំងពីរដាក់ផែនការជំរុញកិច្ចសហការផ្នែកការពារប្រទេស ដោយអនុញ្ញាតឱ្យអាមេរិកដាក់មូលដ្ឋានទ័ព៤កន្លែងទៀតនៅហ្វីលីពីន ខណៈកាលពីមុន មានមូលដ្ឋានទ័ព៥កន្លែងរួចហើយ ។

លោក Lloyd Austin ថ្លែងថា លោកបានពិភាក្សាជាមួយរដ្ឋមន្ត្រីការពារជាតិហ្វីលីពីន លោក Carlito Galvez ហើយបានលទ្ធផលថា នឹងចាត់វិធានការជាក់ស្តែងលើបញ្ហាអសន្តិសុខក្នុងដែនទឹក ដែលហ្វីលីពីន និងអាមេរិកសន្យាថា នឹងបង្កើនកម្លាំងទប់ទល់នឹងការវាយប្រហារដោយអាវុធណាមួយ ។

ទោះយ៉ាងណា នៅតែមានការប្រជែងគ្នារវាងចិន និងអាមេរិកក្នុងតំបន់ឥណ្ឌូប៉ាស៊ីហ្វិក ស្របពេលគេការបារម្ភពីចិនបង្កើនសមត្ថភាពកងទ័ព និងធ្វើសមយុទ្ធជាញឹកញាប់ទាំងក្នុងសមុទ្រចិនខាងកើត និងខាងត្បូង ។

ជម្លោះរវាងចិន និងប្រទេសជាច្រើនក្នុងតំបន់លើបញ្ហាអធិបតេយ្យភាពដែនទឹក ធ្វើឱ្យប្រទេសជាច្រើនត្រូវជ្រើសរើសប្រទេសមហាអំណាចណាមួយ ។ កន្លងមក មន្ត្រីអាមេរិកបញ្ជាក់ថា អាមេរិកនឹងជួយប្រទេសសម្ព័ន្ធមិត្តក្នុងតំបន់ឱ្យក្រោកឡើងប្រឈមជាមួយចិន ប៉ុន្តែចិនចោទអាមេរិកថា ធ្វើឱ្យមានភាពតានតឹងដោយការបញ្ជូនយន្តហោះចម្បាំង និងនាវាចម្បាំងជាបន្តបន្ទាប់ចូលក្នុងតំបន់ ហើយគំនិតផ្តួចផ្តើមសន្តិសុខរបស់អាមេរិកកំពុងបំផ្លាញសន្តិភាពផងដែរ ៕

ប្រភព ៖ TNN World