ហុងកុង ៖ ហុងកុងបានជំរុញវិស័យទេសចរណ៍របស់ខ្លួន ដោយមានប្រូម៉ូសិនផ្សេងៗ រួមទាំងចែកសំបុត្រយន្តហោះឥតគិតថ្លៃចំនួន៥០ម៉ឺនសំបុត្រដល់ភ្ញៀវទេសចរ អ្នកប្រកបអាជីវកម្ម និងវិនិយោគិននៅទូទាំងពិភពលោក បន្ទាប់ពីបិទព្រំដែនអស់រយៈពេលជាង៣ឆ្នាំ ដោយសារការរាតត្បាតនៃជំងឺកូវីដ-១៩ ។

លោក ចន លី មេដឹកនាំហុងកុង បានបើកយុទ្ធនាការ «Hello Hong Kong» នៅមជ្ឈមណ្ឌលសន្និបាតជិត Victoria Harbor កាលពីថ្ងៃទី២ ខែកុម្ភៈ ដើម្បីបង្ហាញឱ្យឃើញថា ហុងកុងបើកប្រទេសទទួលភ្ញៀវទេសចរ ជំរុញអាជីវកម្ម និងការវិនិយោគ ខណៈផ្ទាំងខាងក្រោយនៃវេទិកាបានបង្ហាញជាភាសាផ្សេងៗ ។

លោក ចន លី ប្រកាសថា នៅពេលនេះ ហុងកុងអាចតភ្ជាប់ជាមួយប្រទេសចិន និងប្រទេសទូទាំងពិភពលោក ដោយគ្មានការឃុំខ្លួន និងលក្ខខណ្ឌផ្សេងៗទេ ។ ការបង្ហាញលើវេទិកានេះ នឹងមានការផ្តល់ជូនសំបុត្រយន្តហោះឥតគិតថ្លៃចំនួន៥០ម៉ឺនសំបុត្រ ។ សំបុត្រភាគច្រើនបានផ្តល់ជូនពីក្រុមហ៊ុនអាកាសចរណ៍ចំនួន៣ របស់ហុងកុង ហើយនឹងចែកជូនក្នុងកម្មវិធីផ្សេងៗដូចជា ការចាប់ឆ្នោត ប្រូម៉ូសិនទិញសំបុត្រយន្តហោះ១ ថែម១ និងលេងហ្គេមផ្សេងៗ ដែលគម្រោងនេះនឹងចាប់ផ្តើមនៅខែមីនា ហើយមានរយៈពេល៦ខែ ។

ក្រុមហ៊ុនអាកាសចរណ៍នឹងចែកសំបុត្រយន្តហោះជាដំណាក់កាល ដោយដំណាក់កាលដំបូងចែកក្នុងទីផ្សារអាស៊ីអាគ្នេយ៍ និងចែកបន្ថែមចំនួន៨ម៉ឺនសំបុត្រដល់ពលរដ្ឋហុងកុងក្នុងរដូវក្តៅ និងចែកជាដំណាក់កាលបន្តបន្ទាប់ ។ ក្រៅពីនេះ អ្នកដំណើរនឹងទទួលបានសិទ្ធិពិសេសផ្សេងៗទៀត ។

គួរបញ្ជាក់ថា ហុងកុងធ្លាប់ទទួលបានអ្នកដំណើរជាង៥៦លាននាក់នៅឆ្នាំ២០១៩ មុនពេលជំងឺកូវីដរាតត្បាត ប៉ុន្តែការបិទព្រំដែន និងវិធានការទប់ស្កាត់ជំងឺកូវីដ បានធ្វើឱ្យវិស័យទេសចរណ៍ និងសេដ្ឋកិច្ចទទួលរងផលប៉ះពាល់យ៉ាងខ្លាំង ។ ប៉ុន្តែក្នុងរយៈពេលប៉ុន្មានខែចុងក្រោយនេះ ហុងកុងបានលុបចោលវិធានការឃុំខ្លួននៅសណ្ឋាគារ និងការពិនិត្យកូវីដបែប PCR មុនពេលធ្វើដំណើរ ធ្វើឱ្យហុងកុងចាប់ផ្តើមមានអ្នកដំណើរកើនឡើងបន្តិច ដោយចំនួនអ្នកដំណើរក្នុងឆ្នាំ២០២២ មានត្រឹមតែ១% ប៉ុណ្ណោះ ។ នៅឆ្នាំ២០២២ ផលិតផលក្នុងស្រុកសរុប (GDP) របស់ហុងកុងបានថយចុះ៣,៥% ពីឆ្នាំ២០២១ ៕ ប្រភព ៖ Nation World News

ប្រទេសហ្វីលីពីន ៖ ហ្វីលីពីនបានបើកភ្លើងខៀវឱ្យអាមេរិកចូលមកតាំងមូលដ្ឋានទ័ពក្នុងប្រទេសរបស់ខ្លួន៤កន្លែងទៀតក្បែរតំបន់ជម្លោះជាមួយចិន ស្របពេលសកម្មជនប្រឆាំងសម្លឹងឃើញថា នឹងធ្វើឱ្យស្ថានការណ៍សន្តិសុខក្នុងភូមិភាគកាន់តែតានតឹង ។

ក្រសួងការពារជាតិអាមេរិក និងហ្វីលីពីន បានចេញសេចក្តីថ្លែងការណ៍រួមគ្នាមួយស្តីពី ហ្វីលីពីនបើកភ្លើងខៀវឱ្យកងទ័ពអាមេរិកអាចចូលមកតាំងមូលដ្ឋានទ័ពនៅហ្វីលីពីន៤កន្លែងទៀត ក្នុងកិច្ចព្រមព្រៀងសហការផ្នែកការពារជាតិ Enhanced Defense Cooperation Agreement (EDCA) ដែលបានចុះហត្ថលេខានៅឆ្នាំ២០១៤ ស្របពេលមានក្តីបារម្ភពីការពង្រីកឥទ្ធិពលរបស់ចិននៅសមុទ្រចិនខាងត្បូង ។ សេចក្តីថ្លែងការណ៍នេះធ្វើឡើងក្នុងអំឡុងពេលលោក Lloyd Austin រដ្ឋមន្ត្រីការពារជាតិអាមេរិក ធ្វើដំណើរទៅកាន់ប្រទេសហ្វីលីពីន ។

កិច្ចព្រមព្រៀងសហការផ្នែកការពារជាតិ (EDCA) នឹងអនុញ្ញាតឱ្យអាមេរិកអាចចូលមកតាំងមូលដ្ឋានទ័ពនៅប្រទេសហ្វីលីពីន ដើម្បីជាប្រយោជន៍ក្នុងការធ្វើសមយុទ្ធរួមគ្នា ការកំណត់ទីតាំងដំឡើងអាវុធជាមុន និងការបង្កលក្ខណៈងាយស្រួលផ្នែកយោធាផ្សេងទៀត ដូចជា ឃ្លាំងប្រេង និងកន្លែងស្នាក់នៅរបស់កងទ័ព ប៉ុន្តែមិនបានតាំងមូលដ្ឋានទ័ពរហូតនោះទេ ។

បណ្តាសកម្មជនហ្វីលីពីនបានប្រឆាំងនឹងរឿងនេះ ដោយសម្លឹងឃើញថា នឹងបង្កើនភាពតានតឹងក្នុងភូមិភាគ ហើយពួកគេបានចេញមកប្រមូលផ្តុំគ្នានៅបរិវេណខាងមុខបន្ទាយទាហានក្នុងទីក្រុងម៉ានីល នាថ្ងៃទី២ ខែកុម្ភៈ ដើម្បីធ្វើបាតុកម្មប្រឆាំងនឹងការសហការគ្នានេះ ។ សកម្មជនមួយចំនួនបានយកទង់ជាតិអាមេរិកមកដុត ព្រមទាំងចោទប្រកាន់ថា អាមេរិកជាដើមហេតុធ្វើឱ្យមានអសន្តិសុខក្នុងភូមិភាគកាន់តែខ្លាំងឡើង ៕ ប្រភព ៖ TNN World

នាយកដ្ឋានឧតុនិយមថៃ (TMD) បានព្យាករណ៍ថា កម្រិត PM2.5 នឹងកើនឡើងពាសពេញប្រទេសថៃនៅថ្ងៃទី 2-3 ខែកុម្ភៈ ដោយសារការបំពុលធូលីដីកកកុញនៅក្នុងខ្យល់។

អ្នកនាំពាក្យរដ្ឋាភិបាលលោក Anucha Burapachaisri បាននិយាយថា “នាយករដ្ឋមន្ត្រី Prayut Chan-o-cha មានការព្រួយបារម្ភអំពីសុខភាពរបស់ប្រជាជន ដោយបានណែនាំពួកគេឱ្យពាក់ម៉ាស់ នៅពេលចាកចេញពីផ្ទះ។” ។

មិនតែប៉ុណ្ណោះ លោក ប្រាយុទ្ធ ក៏បានជំរុញឱ្យភ្នាក់ងាររដ្ឋាភិបាល និងអាជីវកម្មនានា ពិចារណាពីវិធីសាស្រ្តធ្វើការពីផ្ទះ ដើម្បីកាត់បន្ថយការបំពុលខ្យល់ពីចរាចរណ៍។

គួរបញ្ជាក់ផងដែរថា ខ្យល់កង្វក់ PM2.5 ត្រូវបានផ្សារភ្ជាប់ជាមួយនឹងជំងឺបេះដូង និងសួត ក៏ដូចជាជំងឺមហារីក៕

ប្រភព៖ National Thailand

តាមការស្រាវជ្រាវចុងក្រោយរបស់ Research and Markets អំពីវិស័យដឹកជញ្ជូនក្នុងភូមិភាគអាស៊ីអាគ្នេយ៍បញ្ជាក់ថា ឧស្សាហកម្មដឹកជញ្ជូនក្នុងភូមិភាគនេះនឹងរីកចម្រើនជាបន្តបន្ទាប់ចាប់ពីឆ្នាំ២០២៣ ដល់ឆ្នាំ២០៣២ ។ ភូមិភាគនេះមានប្រជាពលរដ្ឋសរុបជាង៦០០លាននាក់នៅចុងឆ្នាំ២០២១ ដែលធ្វើឱ្យមានអត្រាការលូតលាស់សេដ្ឋកិច្ចទូទៅខ្ពស់ជាងមធ្យមភាគទូទាំងពិភពលោក ។ របាយការណ៍នេះគ្របដណ្តប់ការសិក្សាលើប្រទេសកម្ពុជា សិង្ហបុរី ថៃ ហ្វីលីពីន ម៉ាឡេស៊ី ឥណ្ឌូណេស៊ី វៀតណាម មីយ៉ាន់ម៉ា ព្រុយណេ និងឡាវ ។

តាមការស្រាវជ្រាវបង្ហាញថា កម្រិតសេដ្ឋកិច្ចនៃប្រទេសទាំង១០ ក្នុងអាស៊ានខុសប្លែកគ្នាយ៉ាងខ្លាំង ប៉ុន្តែសិង្ហបុរីជាប្រទេសអភិវឌ្ឍន៍រួចហើយ ដែលមានផលិតផលក្នុងស្រុកសរុប (GDP) ក្នុងម្នាក់ប្រមាណ៧៣.០០០ដុល្លារអាមេរិកនៅឆ្នាំ២០២១ ខណៈឆ្នាំ២០២១នេះ កម្ពុជា និងមីយ៉ាន់ម៉ា មាន GDP ក្នុងម្នាក់តិចជាង២.០០០ដុល្លារអាមេរិក ។

ជារួម ឧស្សាហកម្មដឹកជញ្ជូនក្នុងប្រទេសអាស៊ានបានអភិវឌ្ឍន៍នាប៉ុន្មានឆ្នាំកន្លងមក ជាពិសេស ទីផ្សារកើតថ្មីៗកើនឡើងដូចជា វៀតណាម និងថៃ ដោយសេដ្ឋកិច្ចប្រទេសទាំងពីរបានលូតលាស់យ៉ាងឆាប់រហ័ស ដែលជួយជំរុញដល់ការអភិវឌ្ឍឧស្សាហកម្មដឹកជញ្ជូន ។ ចំណែកសិង្ហបុរីជាប្រទេសអភិវឌ្ឍន៍ខ្លាំងបំផុតក្នុងភូមិភាគអាស៊ានលើផ្នែកដឹកជញ្ជូនផ្លូវទឹក ដោយនៅឆ្នាំ២០២០ កំពង់ផែសិង្ហបុរីមានបរិមាណដឹកជញ្ជូនរវាងប្រទេសដល់៥៩០លានតោន ។

ឥណ្ឌូណេស៊ីបានជាប់ចំណាត់ថ្នាក់ដំបូងនៃប្រទេសក្នុងតំបន់អាស៊ាន ទាក់ទងនឹងបរិមាណអ្នកដំណើរក្នុងស្រុក និងការដឹកជញ្ជូនទំនិញ ។ ប្រទេសនេះមានអាកាសយានដ្ឋានជាង២០០កន្លែងផ្តល់សេវាកម្មក្នុងប្រទេស ប៉ុន្តែសម្រាប់សេវាកម្មហោះហើរជាអន្តរជាតិ ថៃបានជាប់លំដាប់លេខ១ ក្នុងភូមិភាគនេះ ដោយថៃមានការហោះហើរជាអន្តរជាតិជាង៨០លាននាក់នៅឆ្នាំ២០១៩ ខណៈព្រុយណេ និងឡាវ មានតែ២លាននាក់ប៉ុណ្ណោះ ។ ក្រៅពីនេះ វិនិយោគិនអន្តរជាតិជាច្រើនបានផ្លាស់ប្តូរទីតាំងផលិតរបស់ខ្លួនមកកាន់ភូមិភាគអាស៊ាន ហើយទំហំពាណិជ្ជកម្មបរទេសបានពង្រីក ដែលជួយជំរុញការអភិវឌ្ឍឧស្សាហកម្មដឹកជញ្ជូនក្នុងភូមិភាគផងដែរ ។

ជាមួយគ្នានេះ រាជរដ្ឋាភិបាលកម្ពុជាក៏បានកែលម្អការអភិវឌ្ឍហេដ្ឋារចនាសម្ព័ន្ធក្នុងស្រុក ហើយក្នុងចំណោមនោះ គឺគម្រោងពង្រីក និងកែលម្អផ្លូវជាតិលេខ៧ ក្នុងខេត្តកំពង់ចាម ដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីប្រទេសកម្ពុជា ថ្លែងថា ការពង្រីក និងកែលម្អផ្លូវមានសារសំខាន់យ៉ាងខ្លាំងដល់ការកាត់បន្ថយការកកស្ទះចរាចរណ៍ ផ្តល់ភាពងាយស្រួលដល់ការធ្វើដំណើរ រួមទាំងដឹកជញ្ជូនកសិផល និងកសិឧស្សាហកម្មផងដែរ ៕

ប្រភព ៖ AEC Connect

បច្ចុប្បន្នដំណើរកម្សាន្តក្នុងព្រៃ ឬបោះតង់កំពុងក្លាយជាទម្លាប់មួយដ៏ចាបអារម្មណ៍មួយរបស់យុវជនសម័យថ្មី ដែលទំនេរពីការសិក្សា ចង់ចូលព្រៃសម្រាកកម្សាន្ត និងដើម្បីសាកថ្មជីវិតផងដែរ។

បើទោះជាបច្ចុប្បន្ននេះ ជាសម័យថ្មី យើងកំពុងតែឈានពីការប្រើរថយន្តចាក់ប្រេង ទៅប្រើរថយន្តអគ្គិសនី ដើម្បីកាន់តែមានភាពជិតស្និទ្ធនឹងបរិស្ថានខ្លាំងក្តី ប៉ុន្តែយើងមិនបានគិតពីសម្បកកង់រថយន្ត ដែលនៅតែជាធាតុផ្សំសំខាន់ទេ ។

តើដឹងឬទេថា សម្បកកង់រថយន្តដែលយើងប្រើប្រាស់មកដល់សព្វថ្ងៃនេះ មិនអាចរលាយដោយខ្លួនវាតាមធម្មជាតិបានទេ បើទោះជាឈ្មោះរបស់វាប្រាប់ថា ផលិតពីកៅស៊ូ ប៉ុន្តែការពិត ធាតុផ្សំរបស់ជ័រកៅស៊ូមានមិនលើសពី៣០% ។ ធាតុផ្សំភាគច្រើនមកពីសារធាតុគីមី ហើយវិធីកម្ចាត់មានតែការដុតចោល ហេតុនេះ វាមិនបានផ្តល់លទ្ធផលល្អដល់បរិយាកាសទេ ។

ក្នុងគោលបំណងកាត់បន្ថយការប៉ះពាល់បរិស្ថាន អ្នកផលិតសម្បកកង់រថយន្តខ្នាតធំ គឺ Goodyear មានគោលដៅសាកល្បងផលិតសម្បកកង់រថយន្តពីវត្ថុធាតុដើមប្រកបដោយនិរន្តរភាព១០០% នៅក្នុងឆ្នាំ២០៣០ ។ គោលដៅនេះកំពុងតែដំណើរការទៅល្អ ពីព្រោះក្នុងព្រឹត្តិការណ៍ Consumer Electronics Show (CES) ឆ្នាំ២០២៣នេះ ក្រុមហ៊ុន Goodyear បានបង្ហាញសម្បកកង់គំរូផលិតពីវត្ថុធាតុដើមមាននិរន្តរភាព៩០% ខណៈឆ្នាំ២០២២ ក៏មានព្រឹត្តិការណ៍បង្ហាញសម្បកកង់ប្រភេទនេះដូចគ្នាដែរ ។

ពិតណាស់ មុនទទួលបានគំរូសម្បកកង់រថយន្តនេះ ត្រូវឆ្លងកាត់ការសាកល្បងជាច្រើន ដោយ Goodyear បានសាកល្បងវាជាមួយក្រុមដឹកជញ្ជូនរួចហើយ និងទទួលបានការគាំទ្រផងដែរ មានន័យថា សម្បកកង់នេះត្រូវបានគេអនុន័តឱ្យប្រើប្រាស់នៅលើផ្លូវថ្នល់ ហើយអ្វីត្រូវធ្វើពេលនេះ គឺត្រូវរកវត្ថុធាតុដើមឱ្យបានគ្រប់គ្រាន់ដើម្បីផលិតសម្បកកង់រថយន្តសម្រាប់បើកបរនៅលើផ្លូវនានាយ៉ាងមានសេរីភាព ។

ចំពោះវត្ថុធាតុដើមមាននិរន្តរភាពនេះ គឺបានមកពីប្រេងសណ្តែកសៀង ។ ចំពោះគុណសម្បត្តិរបស់សម្បកកង់រថយន្តនេះ Goodyear និយាយថា វាអាចធន់នឹងការរំកិតផ្សេងៗ គឺវាអាចប្រើប្រាស់បានយូរអង្វែង ព្រមទាំងកាត់បន្ថយការបញ្ចេញកាបូនផងដែរ ។

បើទោះជាវាអាចរត់នៅលើផ្លូវបានដូចគ្នានឹងសម្បកកង់ផ្សេងទៀត ប៉ុន្តែកុំភ្លេចថា សម្បកកង់នៅលើលោកនេះមានគុណសម្បត្តិខុសៗគ្នា ហើយយើងត្រូវជ្រើសរើសសម្បកកង់ណាល្អ មានសុវត្ថិភាពក្នុងពេលបើកបរ បើទោះជាសម្បកកង់របស់ Goodyear មានការទទួលស្គាល់ពីខាងដឹកជញ្ជូនក្តី ក៏ត្រូវការពិសោធន៍បន្តទៀតថា តើវាអាចប្រើធន់ជាមួយផ្លូវបានល្អដូចការលើកឡើងឬទេ ៕

ប្រភព ៖ Spring News

ប្រទេសកូរ៉េខាងជើង ៖ ប្រទេសកូរ៉េខាងជើងសម្លឹងឃើញថា សកម្មភាពរបស់អាមេរិកជាការគំរាមកំហែងដល់ឧបទ្វីបកូរ៉េ និងជំរុញឱ្យស្ថានការណ៍ចូលក្នុងបន្ទាត់ក្រហម បន្ទាប់ពីអាមេរិក និងកូរ៉េខាងត្បូងបានធ្វើសមយុទ្ធផ្លូវអាកាសរួមគ្នានៅថ្ងៃទី១ ខែកុម្ភៈ ដើម្បីបង្ហាញពីសក្តានុពលរបស់អាមេរិក និងការពារការគំរាមពីនុយក្លេអ៊ែរ ។

ក្រសួងការពារជាតិកូរ៉េខាងត្បូងបានបង្ហាញរូបភាពការធ្វើសមយុទ្ធផ្លូវអាកាសរួមគ្នាជាមួយអាមេរិក កាលពីថ្ងៃទី១ ខែកុម្ភៈ រួមមាន យន្តហោះចម្បាំងរបស់កងទ័ពអាមេរិក និងកូរ៉េខាងត្បូង គ្រាប់បែកធុនធ្ងន់ B-1B, យន្តហោះចម្បាំង Stealth F-22 និងយន្តហោះចម្បាំង F-35A និង F-35 B របស់អាមេរិកហោះហើរនៅលើមេឃ ប៉ុន្តែមិនបានបញ្ជាក់ថា មានចំនួនប៉ុន្មានទេ ។ ក្រសួងការពារជាតិកូរ៉េខាងត្បូងបញ្ជាក់ថា ការធ្វើសមយុទ្ធផ្លូវអាកាសរួមគ្នានេះ ដើម្បីបង្ហាញពីសក្តានុពលដ៏ខ្លាំងក្លារបស់អាមេរិក និងទប់ស្កាត់ការគំរាមពីនុយក្លេអ៊ែរ និងមីស៊ីលរបស់កូរ៉េខាងជើង ។

KCNA របស់កូរ៉េខាងជើងរាយការណ៍ថា តាមសេចក្តីប្រកាសរបស់ក្រសួងការបរទេសកូរ៉េខាងជើងកាលពីថ្ងៃទី២ ខែកុម្ភៈ ថា ការធ្វើសមយុទ្ធរួមគ្នារបស់ប្រទេសទាំងពីរនេះ បានជំរុញឱ្យស្ថានការណ៍ចូលក្នុងបន្ទាត់ក្រហម និងគំរាមកំហែងមហាសមុទ្រកូរ៉េ ធ្វើឱ្យមហាសមុទ្រនេះក្លាយជាកន្លែងសង្គ្រាមដ៏ធំ និងកាន់តែធ្ងន់ធ្ងរ ។

អ្នកនាំពាក្យក្រសួងការបរទេសកូរ៉េខាងជើងថា ស្ថានភាពយោធា និងនយោបាយនៅមហាសមុទ្រកូរ៉េនេះបានចូលដល់បន្ទាត់ក្រហមហើយ ដោយសារការធ្វើសមយុទ្ធយោធាប្រឈមមុខដាក់គ្នាខ្វះការពិចារណារបស់អាមេរិក ។ ប្រទេសកូរ៉េខាងជើងមិនចាប់អារម្មណ៍ការចរចាគ្នាទេ ដរាបណាអាមេរិកនៅតែប្រើនយោបាយបែបនេះ ។

គួរបញ្ជាក់ថា កងទ័ពអាមេរិកចំនួន២.៨៥០០នាក់បានប្រចាំការនៅកូរ៉េខាងត្បូង តាំងពីសង្គ្រាមកូរ៉េខាងបញ្ចប់នៅឆ្នាំ១៩៥០-១៩៥៣ សង្គ្រាមកូរ៉េបានបញ្ចប់ដោយកិច្ចព្រមព្រៀងឈប់បាញ់គ្នា ។ កាលពីឆ្នាំ២០២២ កូរ៉េខាងជើងបានសាកល្បងបាញ់មីស៊ីលផ្លោងជាច្រើនដែលមិនធ្លាប់មានពីមុនមក និងសាកល្បងអាវុធនុយក្លេអ៊ែរ បន្ទាប់ពីខកខានតាំងពីឆ្នាំ២០១៧ ។

មុននេះ ទីស្នាក់ការអង្គការសហប្រជាជាតិ (United Nation Command) បានចេញសេចក្តីថ្លែងការណ៍ថា ប្រទេសកូរ៉េខាងពីររំលោភលើកិច្ចព្រមព្រៀងឈប់បាញ់គ្នាក្នុងបរិវេណព្រំដែន ដោយបានបញ្ជូនដ្រូនរំលោភលើដែនអាកាសរបស់ភាគីម្ខាងទៀតកាលពីខែធ្នូ ឆ្នាំ២០២២ ។ ប៉ុន្តែករណីកូរ៉េខាងត្បូងបាញ់ដ្រូនរបស់កូរ៉េខាងជើងដែលហោះចូលដែនអាកាសកូរ៉េខាងត្បូងនោះ មិនចាត់ទុកថា រំលោភកិច្ចព្រមព្រៀងទេ ៕

ប្រភព ៖ TNN Online