ប្រទេសចិនគ្រោង នឹងអភិវឌ្ឍកន្លែងអវកាសរបស់ខ្លួននៅអង់តាក់ទិក ដែលជាផ្នែកមួយនៃគោលដៅមហិច្ឆតារបស់ប្រទេសនេះ ដើម្បីក្លាយជាមហាអំណាចអវកាសនាំមុខគេនៅលើលោក។

កាលពីឆ្នាំ២០២០ ក្រុមហ៊ុនអវកាសរបស់ប្រទេសស៊ុយអែត ធ្លាប់បានផ្គត់ផ្គង់ស្ថានីយទាក់ទងបណ្តាញផ្ដាយរណបពីភពផែនដីដែលអាចជួយគាំទ្រដល់យានអវកាសរបស់ចិន ដូចជាការជួយសម្រួលដល់ការ បញ្ជូន ទិន្នន័យជាដើម។ ប៉ុន្តែក្រោយមក ក្រុមហ៊ុននេះបានបដិសេធមិនបន្តកិច្ចសន្យាជាមួយប្រទេសចិន ឬទទួលបានសំណើអាជីវកម្មថ្មីៗពីប្រទេស ចិនទៀតនោះទេ ដោយសារតែមូលហេតុនៃការផ្លាស់ប្តូរស្ថានភាពភូមិសាស្ត្រ នយោបាយ។

ប្រធានាធិបតីចិនលោក Xí Jìnpíng បានអំពាវនាវឱ្យផ្លាស់ប្តូរប្រទេសទៅជា “មហាអំណាចអវកាស” ហើយដោយក្រោមហេតុផលថា “ឧស្សាហកម្មអវកាសគឺជាកត្តាសំខាន់នៃយុទ្ធសាស្ត្រជាតិទាំងមូល”៕

ប្រភព៖ The China Project

ភ្នំពេញ៖ ក្នុងឆ្នាំ២០២២ អគ្គនាយកដ្ឋានគយ និងរដ្ឋាករកម្ពុជា ចំណូលប្រមូលបានចំនួន ១០ ៩៩៨.៩ ប៊ីលានរៀល (ស្មើនឹងប្រមាណ ២ ៦៩០.៥ លានដុល្លារអាមេរិក) កើនឡើង ១៨.៣% ធៀបនឹងចំណូលប្រមូលបានក្នុងឆ្នាំ២០២១។

លោកបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានឲ្យដឹងថា លទ្ធផលនេះ គឺសម្រេចបាន ១០៤.៩% នៃផែនការដែលកំណត់ដោយច្បាប់ ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២២។

នៅក្នុងកិច្ចប្រជុំបូកសរុបលទ្ធផលការងារគយ និងរដ្ឋាករប្រចាំឆ្នាំ២០២២ នៅសណ្ឋាគារសង្គហមិត្ត ខេត្តកែប ក្រោមអធិបតីភាពអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោកគុណ ញឹម បាបញ្ជាក់ថា បើគិតតាមប្រភេទពន្ធ និងអាករ ឃើញថា អាករលើតម្លៃបន្ថែមមានចំនួន ៤ ១៦៩.៨ ប៊ីលានរៀល (ត្រូវជា ៣៧.៩%នៃចំណូលសរុប), អាករពិសេសមានចំនួន ៤ ១៥១.៦ ប៊ីលានរៀល (ត្រូវជា ៣៧.៧% នៃចំណូលសរុប), ពន្ធគយមានចំនួន ២ ០៨៧ ប៊ីលានរៀល (ត្រូវជា ១៩% នៃចំណូលសរុប), អាករបន្ថែមលើផលិតផលប្រេងឥន្ធនៈមានចំនួន ៣៦៧.២ ប៊ីលានរៀល (ត្រូវជា ៣.៣% នៃចំណូលសរុប), និងអាករនាំចេញនិងកម្រៃផ្សេងៗមានចំនួន ២២៣.៤ ប៊ីលានរៀល (ត្រូវជា ២.១% នៃចំណូលសរុប)។

ចំពោះចំណូលតាមក្រុមទំនិញឃើញថា យានយន្ត និងគ្រឿងចក្រមានចំនួន ៥ ០៧៨.៧ ប៊ីលានរៀល (ត្រូវជា ៤៦.២% នៃចំណូលសរុប), ទំនិញចម្រុះមានចំនួន ៣ ០៣២.៦ ប៊ីលានរៀល (ត្រូវជា ២៧.៦% នៃចំណូលសរុប), ផលិតផលតេលសិលាមានចំនួន ២ ២៣៨ ប៊ីលានរៀល (ត្រូវជា ២០.៣% នៃចំណូលសរុប), និងសម្ភារសំណង់និងកម្រៃផ្សេងៗមានចំនួន ៦៤៩.៥ ប៊ីលានរៀល (ត្រូវជា ៥.៩% នៃចំណូលសរុប)។

ដោយឡែក ទំហំពាណិជ្ជកម្មនាំចូលមានចំនួន ២៥ ៤៦០.៤ លានដុល្លារអាមេរិក កើនឡើងប្រមាណ ១១.៩% ធៀបនឹងឆ្នាំ២០២១ ដែលក្នុងនោះទំនិញនាំចូលសំខាន់ៗមានជាអាទិ៍ យានយន្តនិងគ្រឿងចក្រ, ផលិតផលតេលសិលា, វត្ថុធាតុដើម និងគ្រឿងម៉ាស៊ីន បម្រើដល់គម្រោងវិនិយោគ, គ្រឿងសំណង់, គ្រឿងឧបភោគ-បរិភោគ និងទំនិញចម្រុះផ្សេងទៀត។

ទំហំពាណិជ្ជកម្មនាំចេញមានចំនួន ២២ ៤៤៧.២លានដុល្លារអាមេរិក កើនឡើង១៦.៧% ធៀបនឹងឆ្នាំ២០២១ ដែលក្នុងនោះ ផលិតផលកាត់ដេរមានកំណើន ១៤.១%, ផលិតផលវិនិយោគមិនមែនកាត់ដេរ (ដូចជា គ្រឿងបំណែកអេឡិចត្រូនិក បង្គុំខ្សែភ្លើង កង់ ផលិតផលពីឈើ ផលិតផលប្លាស្ទិច គ្រឿងបន្លាស់រថយន្ត និងផលិតផលឧស្សាហកម្មផ្សេងៗទៀត) មានកំណើន ២៦.២%, និងកសិផលមានកំណើន ៦.៦%៕

ប្រទេសហ្វីលីពីន ៖ ករណីហ្វីលីពីនបើកផ្លូវឱ្យអាមេរិកតាំងមូលដ្ឋានទ័ពបន្ថែម៤កន្លែងទៀតក្នុងប្រទេសរបស់ខ្លួន ទីបំផុត ប្រទេសចិនបានចេញមកដាស់តឿនហ្វីលីពីនថា កុំឱ្យអាមេរិកយកប្រៀប និងទាញចូលក្នុងជម្លោះក្នុងតំបន់ ។

សេចក្តីថ្លែងការណ៍ពីស្ថានទូតចិនប្រចាំក្រុងម៉ានីល កាលពីថ្ងៃទី២ ខែកុម្ភៈថា ហ្វីលីពីន និងអាមេរិក ត្រូវទទួលខុសត្រូវសកម្មភាពរបស់ខ្លួន ។ ចិនប្រកាន់ជំហរថា ការសហការផ្នែកកងទ័ព និងស្ថេរភាពជាមួយប្រទេសផ្សេងៗ គួរតែមានការរួមចំណែកពីសន្តិភាព និងស្ថេរភាពក្នុងតំបន់ មិនមែនប្រឆាំងនឹងប្រទេសទី៣ ឬការបំផ្លាញផលប្រយោជន៍ផ្សេងៗរបស់ប្រទេសទី៣ ទេ ។ ការបង្កើនកម្លាំងទ័ពក្នុងតំបន់ដោយសារផលប្រយោជន៍របស់ខ្លួន វានឹងធ្វើឱ្យតំបន់កាន់តែតានតឹងខ្លាំង ។ ហ្វីលីពីនត្រូវប្រយ័ត្ន និងទប់ទល់ការកេងប្រវ័ញ្ច ដោយសារការអូសហ្វីលីពីនចូលពាក់ព័ន្ធនឹងជម្លោះដែនទឹក ។

កិច្ចព្រមព្រៀងតាំងមូលដ្ឋានទ័ពនៅហ្វីលីពីន គឺក្រោយពីរដ្ឋមន្ត្រីក្រសួងការពារជាតិអាមេរិក លោក Lloyd Austin ធ្វើដំណើរទៅកាន់ប្រទេសហ្វីលីពីន ជាផ្នែកមួយនៃការធ្វើទេសចរតំបន់អាស៊ី ក្នុងគោលដៅទប់ទល់ឥទ្ធិពលកើនឡើងខ្លាំងក្នុងតំបន់របស់ចិន ។

សេចក្តីថ្លែងការណ៍រួមរវាងហ្វីលីពីន និងអាមេរិកបញ្ជាក់ថា ប្រទេសទាំងពីរដាក់ផែនការជំរុញកិច្ចសហការផ្នែកការពារប្រទេស ដោយអនុញ្ញាតឱ្យអាមេរិកដាក់មូលដ្ឋានទ័ព៤កន្លែងទៀតនៅហ្វីលីពីន ខណៈកាលពីមុន មានមូលដ្ឋានទ័ព៥កន្លែងរួចហើយ ។

លោក Lloyd Austin ថ្លែងថា លោកបានពិភាក្សាជាមួយរដ្ឋមន្ត្រីការពារជាតិហ្វីលីពីន លោក Carlito Galvez ហើយបានលទ្ធផលថា នឹងចាត់វិធានការជាក់ស្តែងលើបញ្ហាអសន្តិសុខក្នុងដែនទឹក ដែលហ្វីលីពីន និងអាមេរិកសន្យាថា នឹងបង្កើនកម្លាំងទប់ទល់នឹងការវាយប្រហារដោយអាវុធណាមួយ ។

ទោះយ៉ាងណា នៅតែមានការប្រជែងគ្នារវាងចិន និងអាមេរិកក្នុងតំបន់ឥណ្ឌូប៉ាស៊ីហ្វិក ស្របពេលគេការបារម្ភពីចិនបង្កើនសមត្ថភាពកងទ័ព និងធ្វើសមយុទ្ធជាញឹកញាប់ទាំងក្នុងសមុទ្រចិនខាងកើត និងខាងត្បូង ។

ជម្លោះរវាងចិន និងប្រទេសជាច្រើនក្នុងតំបន់លើបញ្ហាអធិបតេយ្យភាពដែនទឹក ធ្វើឱ្យប្រទេសជាច្រើនត្រូវជ្រើសរើសប្រទេសមហាអំណាចណាមួយ ។ កន្លងមក មន្ត្រីអាមេរិកបញ្ជាក់ថា អាមេរិកនឹងជួយប្រទេសសម្ព័ន្ធមិត្តក្នុងតំបន់ឱ្យក្រោកឡើងប្រឈមជាមួយចិន ប៉ុន្តែចិនចោទអាមេរិកថា ធ្វើឱ្យមានភាពតានតឹងដោយការបញ្ជូនយន្តហោះចម្បាំង និងនាវាចម្បាំងជាបន្តបន្ទាប់ចូលក្នុងតំបន់ ហើយគំនិតផ្តួចផ្តើមសន្តិសុខរបស់អាមេរិកកំពុងបំផ្លាញសន្តិភាពផងដែរ ៕

ប្រភព ៖ TNN World

ប្រទេសរុស្ស៊ី ៖ អ្នកស៊ើបការណ៍កំពូលម្នាក់របស់ប្រទេសរុស្ស៊ីទស្សន៍ទាយថា អង្គការសន្ធិសញ្ញាអាត្លង់ទិកខាងជើង (NATO) នឹងទទួលបរាជ័យ ហើយចុះចាញ់រុស្ស៊ី បើទោះជា ណាតូប្រគល់អាវុធផ្សេងៗឱ្យអ៊ុយក្រែនក្នុងទឹកប្រាក់ជាច្រើនលានដុល្លារអាមេរិកក្តី ។

លោក Sergei Narichkin នាយកផ្នែកស៊ើបការណ៍បរទេសរបស់រុស្ស៊ី និងជាបុគ្គលម្នាក់ស្និទ្ធជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន បានចោទប្រកាន់ថា ណាតូជាអ្នកមានចំណែកច្រើនក្នុងជម្លោះនេះ ដោយការបញ្ជូនអាវុធទំនើបឱ្យអ៊ុយក្រែន ព្រោះណាតូសុបិនថា នឹងយកឈ្នះរុស្ស៊ី ប៉ុន្តែក្តីសុបិននេះគ្មានផ្លូវកើតឡើងទេ ។

ក្រៅពីនេះ លោក Narichkin បានរិះគន់អាមេរិកដែលសន្យាជួយអ៊ុយក្រែនជាបន្តបន្ទាប់ ហើយថា អាមេរិក និងប្រទេសជាមិត្តប្តេជ្ញាធ្វើសង្គ្រាមជាមួយរុស្ស៊ី ។ ពាក្យរិះគន់របស់លោក Narichkin បន្ទាប់ពីអាមេរិកសន្យាជួយផ្នែកកងទ័ពដល់អ៊ុយក្រែនក្នុងទឹកប្រាក់២.០០០លានដុល្លារអាមេរិក ក្នុងនោះមានអាវុធ និងរ៉ុក្កែតបាញ់បានចម្ងាយឆ្ងាយ១៥០គីឡូម៉ែត្រផងដែរ ។

មុននេះ អាមេរិកស្ទាក់ស្ទើរក្នុងការបញ្ជូនរ៉ុក្កែតបាញ់បានចម្ងាយឆ្ងាយឱ្យអ៊ុយក្រែន ព្រោះខ្លាចថា អ៊ុយក្រែននឹងប្រើប្រាស់គ្រាប់រ៉ុក្កែតនេះទម្លាក់លើទឹកដីរុស្ស៊ី ដែលអាចធ្វើឱ្យរុស្ស៊ី និងណាតូប្រឈមមុខគ្នាដោយផ្ទាល់ ។

ទោះយ៉ាងណា ក្រោយពីអាមេរិកសន្យាផ្តល់អាវុធបន្ថែមឱ្យអ៊ុយក្រែននោះ អាល្លឺម៉ង់ និងប្រទេសជាច្រើននៅអឺរ៉ុបបានសម្រេចចិត្តបញ្ជូនរថក្រោះជាច្រើនគ្រឿងឱ្យអ៊ុយក្រែនផងដែរ បណ្តាលឱ្យមន្ត្រីរុស្ស៊ីជាច្រើនរូប រួមទាំងលោក Sergei Lavrov រដ្ឋមន្ត្រីក្រសួងការបរទេសរុស្ស៊ី និងអ្នកនាំពាក្យវិមានក្រឹមឡាំង លោក Dmitry Peskov ចោទប្រកាន់ថា ប្រទេសជាសមាជិកណាតូធ្វើឱ្យសង្គ្រាមកាន់តែក្តៅឡើង ។ ផ្ទុយពីនេះ អ៊ុយក្រែន និងប្រទេសលោកខាងលិចបញ្ជាក់ថា ការបញ្ជូនអាវុធគឺជារឿងសំខាន់ ព្រោះអាចជួយអ៊ុយក្រែនអាចទប់ទល់នឹងការឈ្លានពានរបស់រុស្ស៊ីបានយ៉ាងល្អ ៕

ប្រភព ៖ TNN World

ប្រទេសថៃ ៖ យើងមកស្គាល់ពី Zero Waste Piccolo ជាកែវកាហ្វេអាចទទួលទានបាន ដោយវាជួយកាត់បន្ថយសំរាម និងជាកែវកាហ្វេស្រឡាញ់ពិភពលោក និងធម្មជាតិ ។ វាជាគំនិតច្នៃប្រឌិតរបស់លោក Tanawut Ritchuay ម្ចាស់ហាងកាហ្វេ The 5th Element ស្ថិតក្នុងខេត្តភូកេត ។

គំនិតស្រឡាញ់ពិភពលោកកំពុងតែមានការចាប់អារម្មណ៍ច្រើន ដោយសារទទួលរងផលប៉ះពាល់ពីគ្រោះធម្មជាតិ ធ្វើឱ្យមនុស្សភាគច្រើនចាប់ផ្តើមភ័យខ្លាច និងងាកមកយកចិត្តទុកដាក់លើបរិស្ថានកាន់តែច្រើន ។ លោក Tanawut Ritchuay ក៏ជាមនុស្សម្នាក់ក្នុងចំណោមអ្នកផ្តល់ភាពសំខាន់លើបរិស្ថាន ហើយលោកចង់ក្លាយជាចំណែកមួយជួយដល់ធម្មជាតិ និងពិភពលោកឱ្យកាន់តែចង់រស់នៅ ។

ហេតុនេះ លោកបានបង្កើតគំនិតច្នៃប្រឌិតមួយដោយការបញ្ចេញកែវកាហ្វេមិនដូចកែវទូទៅ ខណៈអតិថិជនអាចទទួលទានឆ្អែត និងឆ្ងាញ់ជាមួយរសជាតិប្លែកហើយនោះ ពួកគេក៏បានចូលរួមថែរក្សាបរិស្ថានផងដែរ ។

កែវកាហ្វេនេះផលិតមកពីគ្រាប់ធញ្ញជាតិផ្សំជាមួយសូកូឡា អតិថិជនអាចផឹកកាហ្វេ និងទទួលទានកែវនេះបាន ដែលវាជួយបន្ថែមរសជាតិពិសេសដល់កាហ្វេស្របតាមចំណូលចិត្តរបស់អតិថិជន ។ វាជាបទពិសោធន៍ថ្មី ប្លែក មិនដូចហាងផ្សេងៗ ព្រមទាំងជួយកាត់បន្ថយសំរាមផងដែរ ។

លោក Tanawut Ritchuay និយាយថា វាជាភេសជ្ជៈល្អសម្រាប់ពិភពលោក មិនចាំបាច់ប្រើកែវផ្លាស្ទិក គ្មានសំរាមក្រោយទទួលទាន និងល្អសម្រាប់សុខភាព ។ ក្រៅពីនេះ ហាងរបស់លោកនឹងយកប្រាក់ចំណូលមួយផ្នែកទៅបរិច្ចាគដល់អង្គការថែរក្សាកាកសំណល់ក្នុងសមុទ្រ ខេត្តភូកេត ៕

ប្រភព ៖ Top News

ប្រទេសជប៉ុន ៖ ចំនួនអ្នកស្លាប់ដោយសារជំងឺកូវីដនៅជប៉ុនបានកើនឡើងជាបន្តបន្ទាប់តាំងពីចុងឆ្នាំ២០២២ ។ គ្រូពេទ្យជប៉ុននិយាយថា អ្នកស្លាប់ដោយសារកូវីដលើកចុងក្រោយនេះ ភាគច្រើនជាមនុស្សចាស់ ដោយសាររាងកាយចុះខ្សោយ ព្រមទាំងមានជំងឺប្រចាំកាយ ហើយមនុស្សចាស់ងាយឆ្លងអូមីក្រុង ។

មុននេះ ជប៉ុនស្ថិតក្នុងចំណោមប្រទេសដែលមានអត្រាអ្នកស្លាប់ដោយសារកូវីដតិចបំផុតក្នុងពិភពលោក ប៉ុន្តែចាប់ពីចុងឆ្នាំ២០២២មក ចំនួនអ្នកស្លាប់ក៏បានកើនឡើងជាបន្តបន្ទាប់ ហើយថ្ងៃដែលមានអ្នកស្លាប់ច្រើនបំផុតក្នុងប្រវត្តិសាស្ត្រ គឺថ្ងៃទី២០ ខែមករា ឆ្នាំ២០២៣ លើសចំនួនអ្នកស្លាប់នៅអង់គ្លេស អាមេរិក និងកូរ៉េខាងត្បូង ។

តាំងពីឆ្នាំ២០២០ ជប៉ុនបានបិទប្រទេសហាមភ្ញៀវទេសចរទាំងអស់មកប្រទេសរបស់ខ្លួន រហូតដល់ពាក់កណ្តាលខែមិថុនា ឆ្នាំ២០២២ ។ ជប៉ុនមានផែនការបើកប្រទេសបន្តិចម្តងៗ ហើយនៅពេលបើកប្រទេសដំបូង ភ្ញៀវទេសចរត្រូវតែធ្វើដំណើរជាមួយក្រុមហ៊ុនអាកាសចរណ៍ប៉ុណ្ណោះ រួមទាំងមានធានារ៉ាប់រងសុខភាព និងពាក់ម៉ាស់នៅទីសាធារណៈគ្រប់ពេល ខណៈនៅតាមសាលារៀន ក្មេងៗត្រូវញ៉ាំបាយដោយស្ងាត់ស្ងៀមអស់រយៈពេល២ឆ្នាំ ដោយមិនឱ្យកូនសិស្សជជែកគ្នាក្នុងពេលញ៉ាំអាហារថ្ងៃត្រង់ ។

អ្នកជំនាញសុខាភិបាលជប៉ុនប្រាប់សារព័ត៌មាន BBC ថា ដោយសារលក្ខខណ្ឌផ្សេងៗនៃជំងឺកូវីដត្រូវបានបន្ធូរបន្ថយ ទើបធ្វើឱ្យមានអ្នកឆ្លងកូវីដខ្ពស់ ។ អ្នកស្លាប់ដោយសារជំងឺកូវីដពូជថ្មីនេះ ភាគច្រើនជាមនុស្សចាស់មានជំងឺប្រចាំកាយ ខុសគ្នាពីចំនួនអ្នកស្លាប់នៅពេលដំបូង គឺពួកគេស្លាប់ដោយសាររលាកសួត និងត្រូវព្យាបាលនៅបន្ទប់សង្គ្រោះបន្ទាន់ ។

លោក Hitoshi Oshitani អ្នកវិទ្យាសាស្ត្រមានកេរ្តិ៍ឈ្មោះល្បីម្នាក់និយាយថា គេពិបាកការពារការស្លាប់ដោយសារជំងឺកូវីដរបស់មនុស្សចាស់ណាស់ ដោយសារកូវីដពូជថ្មីអាចគេចពីភាពស៊ាំបានល្អជាងមុន ហើយបន្ទាប់ពីមានការរាតត្បាតរបស់អូមីក្រុង មានចំនួនអ្នកស្លាប់នៅទូទាំងប្រទេស ។

ទោះយ៉ាងណា អ្នកជំនាញណែនាំថា បើមនុស្សចាស់ទទួលបានការព្យាបាលយ៉ាងឆាប់រហ័ស នឹងអាចជួយការពារមិនឱ្យស្លាប់បាន ។ អ្នកជំនាញបានអំពាវនាវឱ្យរដ្ឋាភិបាលបន្ថយចំណាត់ថ្នាក់កូវីដពី «កម្រិត២ ៖ ជំងឺមានគ្រោះថ្នាក់ខ្លាំង» ចុះមកកម្រិតទាបវិញ ដើម្បីបើកឱកាសឱ្យគ្លីនិក ឬមន្ទីរពេទ្យឯកជនអាចព្យាបាលអ្នកជំងឺបាន ខណៈកាលពីមុន គេចាត់ចំណាត់ថ្នាក់កូវីតស្ថិតក្នុង «កម្រិត២» កំណត់ឱ្យអ្នកជំងឺត្រូវចូលព្យាបាលនៅមន្ទីរពេទ្យរដ្ឋតែប៉ុណ្ណោះ ។

នាយករដ្ឋមន្ត្រីជប៉ុន លោក ហ្វូមីអូ គីស៊ីដា បានប្រកាសកាលពីដើមខែកុម្ភៈថា នឹងបន្ថយចំណាត់ថ្នាក់ជំងឺកូវីដតាមការស្នើសុំ ប៉ុន្តែនឹងអនុវត្តនៅថ្ងៃទី៨ ខែឧសភា ឬ៣ខែទៀត ៕

ប្រភព ៖ The Standard

ប្រទេសជប៉ុន ៖ ក្រុមហ៊ុនលក់ទំនិញដ៏ធំមួយរបស់ប្រទេសជប៉ុន អ៊ីអន (Aeon) បានប្រកាសដំឡើងប្រាក់ខែបុគ្គលិកក្រៅម៉ោង៧% ដើម្បីដោះស្រាយលើការចាយវាយប្រចាំថ្ងៃកើនឡើងខ្ពស់ ។

អ៊ីអនបានប្រកាសត្រៀមដំឡើងប្រាក់ខែ៧% បន្ថែមទៀតដល់បុគ្គលិកធ្វើការក្រៅម៉ោងជាង៤០ម៉ឺននាក់នៅតាមហាងចំនួន១៤៧ ទូទាំងប្រទេសជប៉ុន ។ គេសង្ឃឹមថា នឹងដំឡើងចាប់ពីខែមីនា តទៅ ដើម្បីទប់ទល់នឹងស្ថានការណ៍អតិផរណា និងការចាយវាយប្រចាំថ្ងៃកើនឡើងខ្ពស់ ។

អ៊ីអនមានបុគ្គលិកបម្រើការក្រៅម៉ោងច្រើនបំផុតក្នុងប្រទេសជប៉ុន ក្នុងនោះបុគ្គលិកជាង៨០%របស់ក្រុមហ៊ុន គឺជាបុគ្គលិកក្រៅម៉ោង ។ គេសង្ឃឹមថា ការដំឡើងប្រាក់ខែនៅពេលនេះ នឹងធ្វើឱ្យការចំណាយរបស់អ៊ីអនកើនឡើងក្នុង១ឆ្នាំ ចំនួន៣ម៉ឺនលានយេន ។

ក្នុងគោលបំណងកាត់បន្ថយផលប៉ះពាល់នៃការដំឡើងប្រាក់ខែនេះ អ៊ីអនបានបន្ថែមការលក់ផលិតផលទទួលបានប្រាក់ចំណេញខ្ពស់ ស្របពេលមានការប្រកួតប្រជែងកើនឡើងសម្រាប់កម្លាំងពលកម្មរបស់ជប៉ុនផងដែរ ។ បច្ចុប្បន្ន អ៊ីអនបានចំណាយប្រាក់លើបុគ្គលិកក្រៅម៉ោងជាមធ្យមប្រមាណ១.០០០យេន/១ម៉ោង ។

ក្រុមហ៊ុននានាក៏បានចាប់ផ្តើមដំឡើងប្រាក់ខែដូចគ្នា ដូចជា Tokyo Disney Resort នឹងដំឡើងប្រាក់ខែបុគ្គលិកក្រៅម៉ោងនៅខែមេសាខាងមុខ ចាប់ពី១.១៤០យេន ទៅ១.៥៣០យេន/១ម៉ោង ។

ក្រសួងការងារជប៉ុនបញ្ជាក់ថា បុគ្គលិកក្រៅម៉ោងនៅជប៉ុនជាទូទៅទទួលបានប្រាក់ចំណូលប្រមាណ៦០% របស់ប្រាក់ខែបុគ្គលិកពេញម៉ោង ។ ដូច្នេះ ការដំឡើងប្រាក់ខែដល់ពួកគេសង្ឃឹមថា នឹងជាប្រយោជន៍សម្រាប់គ្រួសារមានប្រាក់ចំណូលតិច ដែលរងផលប៉ះពាល់ពីការចាយវាយប្រចាំថ្ងៃខ្ពស់ជាងបុគ្គលិកពេញម៉ោង ៕ ប្រភព ៖ pptvhd36