ប្រទេសចិន ៖ ភ្នាក់ងារឧតុនិយមប្រទេសចិនបានដាស់តឿនទៅកាន់ពលរដ្ឋ ឱ្យត្រៀមខ្លួនទប់ទល់នឹងសីតុណ្ហភាពកើនឡើងជាបន្តបន្ទាប់ ។ វានឹងធ្វើឱ្យមានគ្រោះរាំងស្ងួតធ្ងន់ធ្ងរក្នុងឆ្នាំ២០២៣ ចំណែកពលរដ្ឋរស់នៅខេត្តភាគខាងជើង ក៏ត្រូវត្រៀមខ្លួនទប់ទល់នឹងទឹកជំនន់ខ្លាំងអាចកើតឡើងក្នុងឆ្នាំនេះផងដែរ ដោយសារការឡើងកំដៅផែនដី ។

កាលពីឆ្នាំ២០២១ សីតុណ្ហភាពជាមធ្យមនៅទូទាំងប្រទេសចិនបានឡើងដល់១០,៥អង្សារសេ ដែលខ្ពស់ជាងមធ្យមភាគធម្មតា ០,៦២អង្សារសេ ។ សីតុណ្ហភាពក្នុងរដូវផ្ការីក រដូវក្តៅ និងរដូវស្លឹកឈើជ្រុះ ស្ថិតក្នុងកម្រិតខ្ពស់គ្រប់ពេលវេលា ខណៈបរិមាណទឹកភ្លៀងជាមធ្យមរបស់ចិនក្នុងឆ្នាំ២០២២ កន្លងមក ទាបជាងកម្រិតធម្មតា៥% ។

គួរបញ្ជាក់ថា កាលពីខែមិថុនា ឆ្នាំ២០២២ ប្រទេសចិនបានប្រឈមនឹងអាកាសធាតុក្តៅខ្លាំងក្នុងរយៈពេលជាង៧០ថ្ងៃ ដែលធ្វើឱ្យដំណាំជាច្រើនមុខខូចខាតអស់ ។ លើសពីនេះ អាងស្តុកទឹកជាច្រើនកន្លែងបានរីងស្ងួត ហើយមានភ្លើងឆេះព្រៃជាច្រើនកន្លែងទៀត ។ ភ្នាក់ងារឧតុនិយមចិនបានរកឃើញតំបន់ចំនួន២៦៧ មានសីតុណ្ហភាពកើនឡើងខ្លាំងបំផុតនៅក្នុងប្រវត្តិសាស្ត្រ ៕

ប្រភព ៖ Mono News

ប្រទេសវៀតណាម ៖ សមាគមបន្លែ និងផ្លែឈើវៀតណាមបង្ហាញថា ទុរេនរបស់វៀតណាមមានប្រៀបជាងទុរេនថៃ និងហ្វីលីពីន ក្នុងការនាំចេញទៅកាន់ប្រទេសចិន ។ ប្រទេសទាំងពីរអាចនាំចេញទុរេនបានតាមរដូវកាលប៉ុណ្ណោះ ចំណែកវៀតណាមវិញអាចនាំចេញពេញមួយឆ្នាំ ហើយប្រើពេលដឹកជញ្ជូនទុរេនទៅកាន់ចិន ត្រឹមតែ១ថ្ងៃកន្លះប៉ុណ្ណោះ ។ ការចំណាយពេលខ្លីក្នុងការដឹកជញ្ជូនបញ្ជាក់ថា ទុរេនវៀតណាមនៅស្រស់ៗ ខណៈថ្លៃដឹកជញ្ជូនក៏ថោកជាងប្រទេសទាំងពីរផងដែរ ។

នាពេលថ្មីៗនេះ តម្លៃទុរេនវៀតណាមបានកើនឡើងពី៦.៤០ដុល្លារ ដល់៨.១០ដុល្លារអាមេរិក/១គីឡូក្រាម ដោយសារតម្រូវខ្ពស់ពីចិន ។ កាលពីឆ្នាំ២០២២ តម្លៃការនាំចេញទុរេនវៀតណាមស្មើប្រមាណ៤០០លានដុល្លារអាមេរិក ក្នុងនោះការនាំចេញទៅចិនស្មើ៣០០លានដុល្លារអាមេរិក ។

លោក Khang អាជីវករលក់ទុរេននៅ ក្រុង Can Tho និយាយថា លោកមិនអាចរកទិញទុរេនគ្រប់គ្រាន់មកលក់ឱ្យអតិថិជនទេ ដោយសារទុរេនឡើងថ្លៃ គឺ១គីឡូក្រាមតម្លៃ១៥ម៉ឺនដុងវៀតណាម តម្លៃនេះខ្ពស់ខុសពីធម្មតា ហើយមានចំនួនតិចទៀត ។ ចំណែកកសិករក្នុងស្រុកនិយាយថា តម្លៃទុរេននៅខេត្ត Tien Giang បានកើនឡើង៣ដងឯណោះ បើធៀបនឹងរយៈពេលដូចគ្នានៅឆ្នាំ២០២២ ។

លើសពីនេះ អាជីវករវៀតណាមបានលក់ឱ្យចិនក្នុងតម្លៃខ្ពស់ជាងនេះទៀត ដោយសារតម្រូវការទុរេនពីចិនបានកើនឡើងជាបន្តបន្ទាប់បើធៀបនឹងឆ្នាំ២០២២ ។ ហេតុនេះ អាជីវករចាំបាច់ត្រូវប្រមូលទុរេនរាប់រយតោនក្នុង១ថ្ងៃដើម្បីនាំចេញទៅចិន ប៉ុន្តែអាចបំពេញតម្រូវការរបស់ចិនបានត្រឹមពី៣០% ដល់៥០% ប៉ុណ្ណោះ ។

កាលពីខែកញ្ញា ឆ្នាំ២០២២ វៀតណាមបាននាំចេញទុរេនស្រស់ដំបូងទៅចិនជាផ្លូវការ ក្រោយពីវៀតណាម និងចិនបានចុះកិច្ចព្រមព្រៀងអនុញ្ញាតឱ្យកសិករវៀតណាមដាំទុរេនក្រោមស្តង់ដារចិន និងសម្រាប់ការនាំចេញប៉ុណ្ណោះ ។ ទុរេនស្រស់អាចដាំនៅលើផ្ទៃដីដែលចិនអនុញ្ញាត និងត្រូវឆ្លងកាត់ការវិនិច្ឆ័យយ៉ាងច្រើនទាំងការវេចខ្ចប់ និងគុណភាព ហើយមានទុរេនតែបន្តិចប៉ុណ្ណោះដែលត្រូវតាមស្តង់ដារការនាំចេញ ដូច្នេះ ធ្វើឱ្យតម្លៃកើនឡើង ។

បច្ចុប្បន្ន ខេត្ត Tien Sang មានផ្ទៃដីដាំដុះទុរេនប្រមាណ២ម៉ឺនហិកតា ហើយអាចផ្តល់ទិន្នផលបានប្រមាណ៣០ម៉ឺនតោន ។ ទោះយ៉ាងណា ខេត្ត Tien Sang មានផ្ទៃដីដាំដុះតិចតួចប៉ុណ្ណោះដែលចិនអនុញ្ញាត ដូច្នេះ ខេត្តបានស្នើចិនផ្តល់សិទ្ធិដាំដុះទុរេនលើផ្ទៃដី១.០០០ហិកតាបន្ថែមទៀតដើម្បីនាំចេញ ហើយសង្ឃឹមថា ចិននឹងអនុញ្ញាតឱ្យដាំនៅលើផ្ទៃដីប្រមាណ៥០% ៕

ប្រភព ៖ AEC Connect

ប្រទេសជប៉ុន ៖ ប្រធានាធិបតីប្រទេសហ្វីលីពីន លោក ម៉ាកូស ជូនៀ (Marcos Junior) បានធ្វើដំណើរទៅកាន់ប្រទេសជប៉ុនជាលើកដំបូង ក្នុងឋានៈលោកជាមេដឹកនាំហ្វីលីពីន ។ គេរំពឹងថា ការមកកាន់ប្រទេសជប៉ុនលើកនេះ នឹងជួយហ្វីលីពីនអាចត្រួសត្រាយផ្លូវសម្រាប់ទំនាក់ទំនងសន្តិសុខកាន់តែជិតស្និទ្ធជាមួយជប៉ុន ក្រោយពីហ្វីលីពីនមានគោលនយោបាយការបរទេសជាមួយអាមេរិកកាន់តែច្រើនឡើង ។

ប្រធានាធិបតីហ្វីលីពីន លោក ម៉ាកូស ជូនៀ ជាមួយនាយករដ្ឋមន្ត្រីជប៉ុន លោក ហ្វូមីអូ គីស៊ីដា នឹងសហការគ្នាបន្ថែមទៀតក្នុងការសង្គ្រោះគ្រោះមហន្តរាយ រួមទាំងលទ្ធភាពនៃកិច្ចសហប្រតិបត្តិការដើម្បីឱ្យកងកម្លាំងជប៉ុនចូលមកប្រទេសហ្វីលីពីនកាន់តែងាយស្រួលផងដែរ ។ ការធ្វើទស្សនកិច្ចមកកាន់ជប៉ុនលើកនេះ ក្រោយពីលោក ម៉ាកូស ជូនៀ បានចុះកិច្ចព្រមព្រៀងកាលពីសប្តាហ៍មុន ដែលអនុញ្ញាតឱ្យអាមេរិកបង្កើតមូលដ្ឋានទ័ពនៅប្រទេសហ្វីលីពីនបន្ថែមទៀត ។

គួរបញ្ជាក់ថា កាលពីខែមករាកន្លងមក លោក ម៉ាកូស ជូនៀ បានធ្វើដំណើរទៅកាន់ប្រទេសចិន និងថ្លែងទៅកាន់ប្រធានាធិបតីចិន លោក ស៊ី ជិនពីង ថា ប្រទេសហ្វីលីពីននឹងមានគោលនយោបាយការបរទេសឯករាជ្យ ។ ទោះយ៉ាងណា ការដាក់ពង្រាយកងទ័ពជប៉ុននៅប្រទេសហ្វីលីពីន នឹងជួយឱ្យលោក ម៉ាកូស ជូនៀ អាចដោះស្រាយឥទ្ធិពលរបស់ចិននៅសមុទ្រចិនខាងត្បូង ។

ចំណែកអ្នកជំនាញនៅវិទ្យាស្ថានជាតិក្នុងទីក្រុងតូក្យូ ប្រទេសជប៉ុន លោក Narushige Michizita និយាយថា ប្រទេសហ្វីលីពីនគឺជាដៃគូសន្តិសុខដ៏សំខាន់សម្រាប់ជប៉ុន ហើយជម្លោះផ្សេងៗនៅច្រកសមុទ្រតៃវ៉ាន់ នឹងធ្វើឱ្យសមុទ្រជប៉ុនមានសារសំខាន់ជាយុទ្ធសាស្ត្រ ៕

ប្រភព ៖ TNN World

រដ្ឋធានីប៉ារីស៖ នៅក្នុងដំណើរទៅកាន់ប្រទេសមហាអំណាចលោកខាងលិច ខណៈក្រុងកៀវកំពុងតែធ្វើសង្គ្រាម ទប់ទល់នឹងការលុកលុយរបស់ក្រុងមូស្គូ នោះ ប្រធានាធិបតីអ៊ុយក្រែន បានស្នើសុំជាដដែលៗ ទៅដល់មេដឹកនាំបារាំង និង អាល្លឺម៉ង់ ត្រូវតែផ្ដល់គ្រឿងសព្វាវុធធុនធ្ងន់ទំនើបៗ សម្រាប់ផ្លាស់ប្ដូរស្ថានការណ៍សង្គ្រាម នៅក្នុងប្រទេសរបស់គាត់។

សារព័ត៌មាន Channel News Asia បានចេញផ្សាយ កាលពីព្រឹក ថ្ងៃព្រហស្បតិ៍ ទី៩ ខែកុម្ភៈ ថា លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានបញ្ជាក់ នៅក្នុងអំឡុងដំណើរបំពេញទស្សនកិច្ច នៅក្នុងរដ្ឋធានីប៉ារីស កាលពីថ្ងៃពុធ ថា បារាំង និង អាល្លឺម៉ង់ មានឱកាស ក្លាយជាអ្នកផ្លាស់ប្ដូរល្បែងសង្គ្រាម ប្រឆាំងនឹងរុស្ស៊ី ដោយមិនត្រូវមានការស្ទាក់ស្ទើរ ចំពោះការផ្ដល់គ្រឿងយុទ្ធោបករណ៍ធុនធ្ងន់ និង យន្ដហោះចម្បាំងទំនើបៗរបស់លោកខាងលិច ជួយដល់ប្រទេសអ៊ុយក្រែន នោះឡើយ។

លោក ហ្សេឡែនស្គី បានទៅដល់រដ្ឋធានីប៉ារីស ប្រទេសបារាំង ដើម្បីទទួលទានអាហារពេលល្ងាច ជាមួយនឹងប្រធានាធិបតីបារាំង លោក អែមម៉ាញ៉ែល ម៉ាក្រុង (Emmanuel Macron) និង លោក អូឡាហ្វ សូលហ្ស៍ (Olaf Scholz) អធិការបតីអាល្លឺម៉ង់។ ជំនួបមេដឹកនាំទាំងនេះ បានកើតឡើង ក្រោយពេលប្រធានាធិបតីអ៊ុយក្រែន បានជួបចរចាជាមួយនឹងលោក រីស៊ី ស៊ូណាក់ (Rishi Sunak) នាយករដ្ឋមន្រ្ដីចក្រភពអង់គ្លេស កាលពីព្រឹក ថ្ងៃពុធ ជាកន្លែងដែលគាត់បានជំរុញដល់សម្ពន្ធមិត្តលោកខាងលិច ត្រូវផ្ដល់យន្ដហោះជាច្រើនគ្រឿង ជួយដល់អ៊ុយក្រែន ដើម្បីការពារសេរីភាព ប្រឆាំងនឹងការឈ្លានពានរបស់រុស្ស៊ី។ បើតាមគម្រោងនេះ លោកប្រធានាធិបតី ហ្សេឡែនស្គី នឹងត្រូវធ្វើដំណើរ បន្ដទៅកាន់ទីក្រុងប៊្រុចសែល ប្រទេសប៊ែលហ្ស៊ិក នៅថ្ងៃព្រហស្បតិ៍ ជាទីដែលគាត់នឹងចូលរួម នៅក្នុងកិច្ចប្រជុំកំពូលរបស់មេដឹកនាំអឺរ៉ុប។

លោកប្រធានាធិបតីអ៊ុយក្រែន បានបញ្ជាក់ ថា «យើងមានពេលវេលាតិចតូចណាស់ ហើយឥឡូវខ្ញុំកំពុងតែចរចា អំពីគ្រឿងសព្វាវុធ ដែលមានតម្រូវការចាំបាច់ សម្រាប់ការនាំមកនូវសន្ដិភាព សេរីភាព និង ការបញ្ចប់សង្គ្រាម បង្កឡើង ដោយរុស្ស៊ី។ បារាំង និង អាល្លឺម៉ង់ មានអានុភាពខ្លាំង ក្លាយជាអ្នកផ្លាស់ប្ដូរល្បែងសង្គ្រាមនេះ ហើយនោះជារបៀប ដែលខ្ញុំមើលឃើញ នៅក្នុងការពិភាក្សារបស់យើង នៅថ្ងៃនេះ។ បើយើងទទួលបានអាវុធ បាញ់រយៈចម្ងាយឆ្ងាយ ហើយកងទ័ពអាកាសរបស់យើង ទទួលបានយន្តហោះទំនើបៗ កាន់តែឆាប់ … ការឈ្លានពានរបស់រុស្ស៊ី នឹងកាន់តែឆាប់បញ្ចប់»។

បណ្តាប្រទេសលោកខាងលិច បានបង្កើននូវការសន្យាផ្តល់ជំនួយយោធា សម្រាប់អ៊ុយក្រែននៅឆ្នាំនេះ ជាមួយនឹងការប្ដេជ្ញា ផ្ដល់រថក្រោះ និង រថពាសដែក រាប់រយគ្រឿង ព្រមទាំងគ្រឿងសព្វាវុធទំនើបៗ បាញ់រយៈចម្ងាយឆ្ងាយ។ ប៉ុន្តែរហូតមកដល់ពេលនេះ សហរដ្ឋអាមេរិក និង សម្ពន្ធមិត្តបស្ចិមលោកមួយចំនួន នៅតែបដិសេធ ផ្តល់យន្តហោះចម្បាំង ផលិតដោយលោកខាងលិច។

លោក អែមម៉ាញ៉ែល ម៉ាក្រុង (Emmanuel Macron) ប្រធានាធិបតីបារាំង បានបញ្ជាក់ ថា បញ្ហាប្រតិបត្តិការ នឹងត្រូវពិភាក្សា នៅក្នុងអំឡុងអាហារពេលល្ងាច។ លោកប្រធានាធិបតី ម៉ាក្រុង បានរំឭកឡើងវិញ ថា រុស្ស៊ី នឹងមិនអាចអនុញ្ញាត ឲ្យឈ្នះសង្រ្គាមនៅអ៊ុយក្រែន នោះឡើយ ហើយថា ក្រុងប៉ារីស ក៏ដូចជា ក្រុងប៊ែរឡាំង នឹងបន្តគាំទ្រដរាបណា ជំនួយយោធាដ៏ចាំបាច់ ដែលអ៊ុយក្រែន អាចធានា អំពីអនាគតរបស់ខ្លួនបាន។

នៅមុនពេលកិច្ចប្រជុំកំពូល នាថ្ងៃព្រហស្បតិ៍ នៅក្នុងប្រទេសប៊ែលហ្ស៊ិក នោះ លោក អូឡាហ្វ សូលហ្ស៍ អធិការបតីអាល្លឺម៉ង់ បានព្យាយាមសង្កត់ធ្ងន់ ទៅលើគោលជំហររបស់ក្រុងកៀវ នៅក្នុងសហភាពអឺរ៉ុប។ លោកអធិការបតី បានសង្កត់ធ្ងន់ ថា «ខ្ញុំកំពុងតែផ្ញើសារយ៉ាងច្បាស់ ទៅកាន់ទីក្រុងប៊្រុចសែល ថា អ៊ុយក្រែន ជាសមាជិកគ្រួសាររបស់សហភាពអឺរ៉ុប»៕

រាជធានីឡុងដ៍៖ ស្របពេលប្រធានាធិបតីអ៊ុយក្រែន បានធ្វើដំណើរទៅបំពេញទស្សនកិច្ចដ៏គួរឲ្យភ្ញាក់ផ្អើល ជាលើកដំបូង នៅចក្រភពអង់គ្លេស ចាប់តាំងពីរុស្ស៊ី បានចូលុកលុយ កាលពីថ្ងៃទី២៤ ខែកុម្ភៈ ឆ្នាំ២០២២នោះមក ក្រុងឡុងដ៍ បានសម្រេចផ្ដល់ការបណ្ដុះបណ្ដាល ដល់កងទ័ពអាកាសរបស់ក្រុងកៀវ ឲ្យចេះប្រើប្រាស់យន្ដហោះចម្បាំង តាមមាត្រដ្ឋាន ឬ ស្ដង់ដាររបស់អង្គការណាតូ។

សារព័ត៌មាន Breaking Defense បានចេញផ្សាយ កាលពីថ្ងៃពុធ ទី៨ ខែកុម្ភៈ ថា លោក រីស៊ី ស៊ូណាក់ (Rishi Sunak) នាយករដ្ឋមន្ត្រីចក្រភពអង់គ្លេស បានស្នើសុំជាផ្លូវការ ដល់រដ្ឋមន្ត្រីការពារជាតិ លោក បែន វ៉ាលឡេស (Ben Wallace) ឲ្យពិនិត្យមើល ថាតើយន្តហោះចម្បាំងរបស់កងទ័ពអាកាសភូមិន្ទចក្រភព (RAF) អាចនឹងត្រូវបានផ្គត់ផ្គង់ ទៅជួយដល់កងទ័ពអាកាសអ៊ុយក្រែន ដែរឬយ៉ាងណា ក្រោយពេលមានការប្រកាស ថា ក្រុងឡុងដ៍ នឹងផ្តល់ការបណ្តុះបណ្តាល ដល់អ្នកបើកយន្តហោះចម្បាំងចម្បាំងរបស់ក្រុងកៀវ ជាលើកដំបូង។

ទោះជាយ៉ាងណា សកម្មភាពផ្ទេរយន្ដហោះចម្បាំងនេះ នៅមិនទាន់មកដល់នៅឡើយ ខណៈនាយករដ្ឋមន្រ្ដីចក្រភពអង់គ្លេស លោក រីស៊ី ស៊ូណាក់ បានអះអាង ថា ក្រុងឡុងដ៍ ចង់មានដំណោះស្រាយ រយៈពេលវែង ជាជាងសមត្ថភាព រយៈពេលខ្លី។ ប៉ុន្តែចក្រភពអង់គ្លេស អាចកត់សម្គាល់ អំពីពេលវេលាដ៏សំខាន់មួយ នៅក្នុងការប្រយុទ្ធ ប្រឆាំងនឹងរុស្ស៊ី ដោយការចាប់ផ្តើមផ្គត់ផ្គង់យន្តហោះ មានសមត្ថភាពខ្ពស់ ផលិតដោយលោកខាងលិច។

ការិយាល័យរបស់លោកនាយករដ្ឋមន្រ្ដីចក្រភពអង់គ្លេស បានចេញសេចក្ដីថ្លែងការណ៍មួយ នៅមុនដំណើរបំពេញទស្សនកិច្ចរបស់លោក វ៉ូឡូឌីមៀរ ហ្សេឡែនស្គី (Volodymyr Zelenskyy) កាលពីថ្ងៃពុធ ថា ក្រុងឡុងដ៍ បានបញ្ជាក់ជាផ្នែកមួយ នៃកិច្ចពិភាក្សា រវាងមេដឹកនាំទាំងពីរ។លោក Sunak នឹងជំរុញដល់ការបណ្តុះបណ្តាលរបស់ចក្រភពអង់គ្លេស សម្រាប់កងទ័ពអាកាសរបស់អ៊ុយក្រែន រួមទាំងការពង្រីកសមត្ថភាព ជួយដល់អ្នកបើកយន្តហោះចម្បាំង ដើម្បីធានា ថា អ៊ុយក្រែន អាចការពារដែនអាកាសរបស់ខ្លួនបានយ៉ាងល្អ ទៅថ្ងៃអនាគត។

រហូតមកដល់ពេលនេះ កងទ័ពអាកាសរបស់អ៊ុយក្រែន កំពុងតែប្រតិបត្ដិការ នៅលើយន្ដហោះចម្បាំង សន្សល់ទុកតាំងតែពីសម័យសហភាពសូវៀត រួមមាន Su-24 (ស៊ូ-២៤) Su-25 និង MiG-29 (មីគ-២៩)។ ប៉ុន្ដែប្រធានាធិបតីអ៊ុយក្រែន លោក ហ្សេឡែនស្គី បានអំពាវនាវ អស់រយៈពេលជាយូរមកហើយ ដល់ដៃគូ និង សម្ពន្ធមិត្ត សុំឲ្យជួយផ្គត់ផ្គង់យន្តហោះចម្បាំង ផលិតដោយសហរដ្ឋអាមេរិក ប្រភេទ F-16 ជួយដល់ក្រុងកៀវ។ យន្ដហោះប្រភេទនេះ ត្រូវបានកងទ័ពអាកាសភូមិន្ទចក្រភព លែងប្រតិបត្ដិការ ហើយសហរដ្ឋអាមេរិក តែងតែបដិសេធនូវការផ្គត់ផ្គង់ ដល់ប្រទេសអ៊ុយក្រែន រហូតមក។

ការិយាល័យរបស់លោកនាយករដ្ឋមន្រ្ដី ស៊ូណាក់ បានសង្កត់ធ្ងន់ ថា «ការបណ្ដុះបណ្ដាលជំនាញបើកបរយន្ដហោះ ត្រូវតែធ្វើឲ្យប្រាកដ ថា អាកាសយានិកទាំងនោះ មានសមត្ថភាពហោះហើរយន្ដហោះប្រយុទ្ធ តាមស្ដង់ដារដ៏សាំញ៉ាំរបស់អង្គការណាតូ»។

បច្ចុប្បន្ន កងយន្ដហោះចម្បាំងរបស់កងទ័ពអាកាសភូមិន្ទចក្រភព ប្រតិបត្ដិការ លើយន្ដហោះ Eurofighter Typhoon (អឺរ៉ូហ្វាយធ័រ ថៃហ្វូន) និង យន្ដហោះចម្បាំងបំបាំងកាយដ៏ទំនើប F-35 ផលិតដោយអាមេរិក។ វាជាការពិតណាស់ មានតែយន្ដហោះ Eurofighter Typhoon ប៉ុណ្ណោះ ទំនងជាផ្នែកមួយ នៃការពិចារណាលើការហ្វឹកហ្វឺន ដល់កងទ័ពអាកាសរបស់អ៊ុយក្រែន ខណៈយន្ដហោះចម្បាំងមួយចំនួន កំពុងស្ថិតក្នុងការកំណត់ សម្រាប់ការចូលនិវត្តន៍ ស្របពេលកងយន្តហោះ F-35 របស់ចក្រភពអង់គ្លេស កំពុងតែប្រតិបត្ដិការ។ យន្តហោះ F-35 ផលិត ដោយក្រុមហ៊ុន Lockheed Martin មានតម្លៃថ្លៃបំផុត ហើយត្រូវបានប្រើ ដោយសម្ពន្ធមិត្តមួយចំនួនរបស់សហរដ្ឋអាមេរិក។ ប៉ុន្តែយន្ដហោះប្រភេទនេះ នៅតែមិនទាន់ជាផ្នែក សម្រាប់ការពិភាក្សាណាមួយ សម្រាប់អ៊ុយក្រែន នៅឡើយ៕

ប្រទេសអង់គ្លេស ៖ សារព័ត៌មាន CNN រាយការណ៍ថា ប្រធានាធិបតីប្រទេសអ៊ុយក្រែន លោក Volodymy Zelensky បានធ្វើដំណើរទៅដល់ទីក្រុងឡុងដ៍ ប្រទេសអង់គ្លេសកាលពីថ្ងៃទី៨ ខែកុម្ភៈ ។ ប្រធានាធិបតីអ៊ុយក្រែនបានអំពាវនាវឱ្យប្រទេសលោកខាងលិចបញ្ជូនអាវុធបន្ថែមទៀតដើម្បីទប់ទល់ជាមួយកងទ័ពរុស្ស៊ី ។

មន្ត្រីអង់គ្លេសបង្ហាញថា លោក Zelensky បានជួបជាមួយនាយករដ្ឋមន្ត្រីអង់គ្លេស លោក Richie Sunak ហើយនឹងថ្លែងសុន្ទរកថានៅក្នុងសភា ។ ជាមួយគ្នានេះ សារព័ត៌មាន BBC រាយការណ៍ថា ព្រះរាជវាំង Buckingham បានជូនដំណឹងថា លោក Zelensky នឹងចូលគាល់ព្រះមហាក្សត្រអង់គ្លេស Charles ទី៣ ផងដែរ ។

កាលពីថ្ងៃទី៨ ខែកុម្ភៈ ប្រទេសអង់គ្លេសបានប្រកាសតាមសេចក្តីថ្លែងការណ៍ថា នឹងបញ្ជូនអាវុធឱ្យអ៊ុយក្រែនបន្ថែមទៀតដើម្បីទប់ទល់នឹងការវាយលុកពីកងទ័ពរុស្ស៊ី ។ នាយករដ្ឋមន្ត្រីអង់គ្លេស លោក Sunak ថ្លែងថា អង់គ្លេសនឹងបណ្តុះបណ្តាលអ្នកបើកយន្តហោះ និងកងម៉ារីនអ៊ុយក្រែន ព្រមទាំងបញ្ជាក់ថា ពាក្យសន្យារបស់អង់គ្លេសជាមួយអ៊ុយក្រែន គឺជាពាក្យសន្យារយៈពេលវែង ។ លើសពីនេះ អង់គ្លេសនឹងស្វែងរកកាំជ្រួចបាញ់បានឆ្ងាយជាងមុនឱ្យអ៊ុយក្រែន ប៉ុន្តែអង់គ្លេសមិនបាននិយាយលម្អិតទាក់ទងនឹងការបញ្ជូនយន្តហោះចម្បាំងតាមការស្នើសុំរបស់អ៊ុយក្រែនទេ ។

ការធ្វើទស្សនកិច្ចមកកាន់អង់គ្លេសរបស់លោក Zelensky លើកនេះចាត់ទុកថា ជាការធ្វើដំណើរចេញក្រៅប្រទេសលើកទី២ តាំងពីរុស្ស៊ីវាយលុកអ៊ុយក្រែនកាលពីថ្ងៃទី២៤ ខែកុម្ភៈ ឆ្នាំ២០២២ ។ កាលពីខែធ្នូ ឆ្នាំ២០២២ លោក Zelensky បានធ្វើដំណើរទៅកាន់អាមេរិក ដើម្បីសុំជំនួយផ្នែកកងទ័ពពីប្រទេសលោកខាងលិច ដោយអ៊ុយក្រែននិយាយថា រុស្ស៊ីកំពុងតែត្រៀមខ្លួនវាយលុកអ៊ុយក្រែនក្នុងរដូវនិទាឃរដូវខាងមុខ ។

សេចក្តីថ្លែងការណ៍បញ្ជាក់ដែរថា អង់គ្លេសនឹងដាក់ទណ្ឌកម្មរុស្ស៊ីបន្ថែមទៀត ដើម្បីឆ្លើយតបនឹងរុស្ស៊ីបានទម្លាក់គ្រាប់បែកជាបន្តបន្ទាប់មកលើអ៊ុយក្រែន រួមទាំងកំណត់គោលដៅបុគ្គលដែលជួយលោក ពូទីន ក៏ដូចជាក្រុមហ៊ុននានាទទួលប្រយោជន៍ពីសង្គ្រាម ។

គួរបញ្ជាក់ថា អង់គ្លេសជាប្រទេសដំបូងបានប្រកាសកាលពីពាក់កណ្តាលខែមករាថា នឹងបញ្ជូនរថក្រោះ Challenger 2 ឱ្យអ៊ុយក្រែន បន្ទាប់ពីនេះមានប្រទេសអាល្លឺម៉ង់ និងអាមេរិកប្រកាសថា នឹងបញ្ជូនរថក្រោះ Leopard 2 និង M1 Abrams ឱ្យអ៊ុយក្រែនដែរ ក្រោយពីរងការដាក់សម្ពាធពីប្រទេសនានាឱ្យបញ្ជូនរថក្រោះជួយអ៊ុយក្រែន ៕

ប្រភព ៖ TNN World