ប្រទេសហូឡង់ ៖ ទីក្រុងអាំស្ទែរដាំ ប្រទេសហូឡង់ បានចេញច្បាប់ហាមឃាត់ការជក់កញ្ឆានៅតាមផ្លូវក្នុងតំបន់ Red Light ព្រមទាំងចេញច្បាប់ផ្សេងៗដើម្បីកែលម្អគុណភាពរស់នៅរបស់ពលរដ្ឋនៅទីក្រុងអាំស្ទែរដាំផងដែរ ដោយនឹងអនុវត្តចាប់ពីខែឧសភា ឆ្នាំ២០២៣ តទៅ ។

មន្ត្រីនៅក្រុងអាំស្ទែរដាំបានប្រកាសកាលពីថ្ងៃទី១០ ខែកុម្ភៈ ថា បានចេញច្បាប់ហាមជក់កញ្ឆានៅតាមផ្លូវក្នុងតំបន់ Red Light (តំបន់ប្រកបរបរផ្លូវភេទ) ព្រមទាំងច្បាប់ផ្សេងៗដូចជា ភោជនីយដ្ឋាន និងបារ ត្រូវបិទនៅម៉ោង២រសៀល សម្រាប់ថ្ងៃសុក្រ និងថ្ងៃសៅរ៍ ។ លើសពីនេះ គេមិនអនុញ្ញាតឱ្យភ្ញៀវទេសចរថ្មីចូលទៅកាន់ទីក្រុង នៅក្រោយម៉ោង១រសៀលទេ ហើយនារីបម្រើផ្លូវភេទត្រូវបិទហាងរបស់ខ្លួននៅម៉ោង៣រសៀលផងដែរ ។

ច្បាប់នេះមានគោលដៅដើម្បីកែលម្អគុណភាពរស់នៅរបស់ពលរដ្ឋក្នុងតំបន់ ដែលពួកគេរអ៊ូថា ភ្ញៀវទេសចររំខានការរស់នៅរបស់ពួកគេ ។ សារព័ត៌មានក្នុងប្រទេសរាយការណ៍ថា សមាជិកសភាភាគច្រើនបានគាំទ្រការចេញច្បាប់ថ្មីនេះ ដើម្បីកាត់បន្ថយការរំខានដល់ពលរដ្ឋនៅទីនេះ ។

បច្ចុប្បន្ន ការលក់ស្រា និងកាហ្វេនៅតាមហាងនានាក្នុងតំបន់ Red Light គឺខុសច្បាប់ចាប់ពីថ្ងៃព្រហស្បតិ៍ ដល់ថ្ងៃអាទិត្យ វេលាម៉ោង៤ល្ងាច ។ សភានឹងស្នើឱ្យអ្នកលក់ទាំងនេះយកស្រារបស់ខ្លួនចេញពីមុខហាង ឬលាក់មិនឱ្យគេឃើញក្នុងពេលវេលាកំណត់ខាងលើ ខណៈការផឹកស្រានៅទីសាធារណៈ គឺជាការខុសច្បាប់នៅទីក្រុងអាំស្ទែរដាំ ។

អាំស្ទែរដាំ ជាទីក្រុងល្បីល្បាញមួយក្នុងការលក់កាហ្វេកញ្ឆា ខណៈទីក្រុងនេះអាចទាក់ទាញភ្ញៀវទេសចរជាច្រើនលាននាក់ក្នុង១ឆ្នាំៗ ប៉ុន្តែពលរដ្ឋក្នុងតំបន់និយាយថា វាទាក់ទាញឱ្យមានអ្នកជួញដូរគ្រឿងញៀន ការសេពគ្រឿងញៀន និងផឹកស្រានៅតាមផ្លូវ ដែលធ្វើឱ្យទីក្រុងមានឧក្រិដ្ឋកម្មកាន់តែច្រើន ។

ស្ថិតនៅក្រោមច្បាប់បច្ចុប្បន្ន គេចាត់ទុកថា ជាបទល្មើសព្រហ្មទណ្ឌសម្រាប់ការគ្រប់គ្រង ការផលិត ឬចែកចាយគ្រឿងញៀន ។ ប៉ុន្តែគេនៅតែអនុញ្ញាតឱ្យហាងនានា ឬហៅថា «coffee shop» អាចលក់កញ្ឆាបាននៅក្រោមលក្ខខណ្ឌតឹងតែង ហើយលក្ខខណ្ឌ១ក្នុងចំណោមលក្ខខណ្ឌទាំងអស់ គឺមិនបង្កការរំខានដល់អ្នកដទៃ ។ រដ្ឋាភិបាលហូឡង់បានបញ្ជាទៅកាន់ហាងទាំងនេះ ហាមអញ្ជើញអ្នកញៀនថ្នាំមកពីបរទេស ៕ ប្រភព ៖ TNN World

ប្រទេសថៃ ៖ លោក តារ៉េត កាសាន់ណៃ រ៉ាវីវង្ស អគ្គនាយកនៃនាយកដ្ឋានត្រួតពិនិត្យជំងឺ ថ្លែងថា ការលង់ទឹក គឺជាបញ្ហាសុខភាពសាធារណៈសំខាន់សម្រាប់ប្រទេសថៃ និងពិភពលោក ។ សម្រាប់ពិភពលោក អង្គការសហប្រជាជាតិបានផ្តល់ភាពសំខាន់លើវិធីការពារការលង់ទឹក រហូតដល់មានការឯកភាពគ្នាក្នុងការពារការលង់ទឹក កាលពីថ្ងៃទី២៨ ខែមេសា ឆ្នាំ២០២១ ។

តាមរបាយការណ៍របស់អង្គការសុខភាពពិភពលោកបង្ហាញថា ការលង់ទឹក គឺជាបញ្ហាសុខភាពសាធារណៈទូទាំងពិភពលោក ជាពិសេស នៅក្នុងក្រុមកុមារអាយុក្រោម១៥ឆ្នាំ គឺជាមូលហេតុនៃការស្លាប់លំដាប់ទី២ បន្ទាប់ពីជំងឺរលាកស្រោមខួរ ។ នៅក្នុងមួយឆ្នាំៗ ប្រទេសទូទាំងពិភពលោកមានអ្នកលង់ទឹកស្លាប់ចំនួន៣៧ម៉ឺន២ពាន់នាក់ ក្នុងនោះកុមារអាយុក្រោម១៥ឆ្នាំ មានចំនួន១៤ម៉ឺន៦ពាន់នាក់ ។

ចំណែកប្រទេសថៃ តាមទិន្នន័យពីសំបុត្រមរណភាពក្នុងរយៈពេល១០ឆ្នាំកន្លងមក (ឆ្នាំ២០១២ ដល់ឆ្នាំ២០២១) មានអ្នកស្លាប់ដោយសារលង់ទឹកចំនួន៣៥.៩១៥នាក់ ក្នុងនោះមានកុមារអាយុក្រោម១៥ឆ្នាំ ចំនួន៧.៣៧៤នាក់ ឬអាចនិយាយបានថា ក្នុងមួយថ្ងៃៗ ប្រទេសថៃមានអ្នកស្លាប់ដោយសារលង់ទឹកចំនួន១០នាក់ ។ កន្លងមក គេបានយកចិត្តទុកដាក់បង្ការការលង់ទឹកសម្រាប់កុមារអាយុក្រោម១៥ឆ្នាំ ដោយសារវាជាមូលហេតុនៃការស្លាប់លំដាប់ទី១ ។

ប្រទេសថៃបានដាក់គោលដៅកាត់បន្ថយការស្លាប់ដោយសារលង់ទឹក នៅក្នុងផែនការយុទ្ធសាស្ត្រជាតិរយៈពេល២០ឆ្នាំ ។ នៅឆ្នាំ២០៣៧ ខាងមុខ ត្រូវកាត់បន្ថយអត្រាការស្លាប់ដោយសារលង់ទឹករបស់កុមារអាយុក្រោម១៥ឆ្នាំ មិនឱ្យលើសពី ២៩០នាក់ក្នុងកុមារចំនួន១សែននាក់ ខណៈបច្ចុប្បន្ន អត្រាការស្លាប់របស់កុមារស្មើ៦,៣% ឬ៦៦៧នាក់ ។ លើសពីនេះ ត្រូវកាត់បន្ថយអត្រាការស្លាប់ដោយសារលង់ទឹករបស់កុមារឱ្យធ្លាក់ចុះពីឆ្នាំ២០១៧ យ៉ាងតិច៥០% ឬមិនលើសពី១.៩៤០នាក់ ។ បច្ចុប្បន្ន មានកុមារស្លាប់ដោយសារលង់ទឹកចំនួន៣.៩៩០នាក់ ហេតុនេះ បញ្ហាប្រឈម គឺការធ្វើឱ្យពលរដ្ឋថៃស្លាប់ដោយសារលង់ទឹកថយចុះតាមគោលដៅកំណត់ ។

ទោះយ៉ាងណា ក្នុងរយៈពេល៣ឆ្នាំកន្លងមកនេះ ប្រទេសទូទាំងពិភពលោកបានប្រឈមនឹងការឆ្លងរាលដាលនៃជំងឺកូវីដ-១៩ ដែលធ្វើឱ្យមនុស្សស្លាប់ដោយសារលង់ទឹកកើនឡើងខ្លាំងក្នុងប្រទេសជាច្រើន រួមទាំងថៃផងដែរបានកើនឡើងជិត១០% ៕ ប្រភព ៖ TNNHealth

នៅក្នុងតំបន់អាស៊ានយើងនេះ​​ ប្រទេសវៀតណាមគឺជាប្រទេសដែលមាននាវាមុជទឹកច្រើនជាងគេ​រហូតដល់៦គ្រឿងឯណោះ។

ក្នុងឆ្នាំ ២០០៩ រដ្ឋាភិបាលវៀទនាម បានបញ្ជាទិញនាវាមុជទឹកប្រភេទ Kilo-class ចំនួន៦គ្រឿងពីប្រទេសរុស្ស៊ី ក្នុងតម្លៃសរុប៤.៣ ពាន់លានដុល្លារ។ ការបញ្ជាទិញនេះ ក៏រួមបញ្ចូលទាំងការបណ្តុះបណ្តាលនាវិកវៀតណាម និងការសាងសង់មជ្ឈមណ្ឌលបណ្តុះបណ្តាលនាវិកនាវាមុជទឹកស្តង់ដារថ្នាក់អន្តរជាតិ នៅឈូងសមុទ្រ Cam Ranhផងដែរ។

លុះដល់ថ្ងៃទី២៩ ខែឧសភា ឆ្នាំ២០១៣ វៀតណាម បានបង្កើតជាផ្លូវការនូវកងកម្លាំងនាវាមុជទឹក និងការបង្កើតកងពលតូចនាវាមុជទឹកទី១៨៩ នៅឈូងសមុទ្រ Cam Ranh។

បច្ចុប្បន្ននាវាទាំង៦នេះត្រូវបានដាក់បញ្ឈរជើងនៅឈូងសមុទ្រ Cam Ranh ទាំងអស់។ ភាគច្រើននៅនាវានេះ​ បានបំពាក់នូវបច្ចេកវិទ្យាបំបាំងកាយកម្រិតខ្ពស់សម្រាប់ធ្វើប្រតិបត្តិការ  និងសមត្ថភាពវាយប្រហារលើដី ផ្ទៃទឹក និងគោលដៅក្រោមទឹក បានយ៉ាងមានប្រសិទ្ធភាព។

នាវាទាំងនេះ​ អាចមុជទឹកជម្រៅ៣០០ម៉ែត្រ និងបំពាក់មកជាមួយ Torpedo មីន និងកាំជ្រួច Cruise Kalibr 3M-54 ដែលអាចវាយប្រហារទៅលើនាវាចម្បាំងក្នុងតំបន់បានក្នុងល្បឿនលឿន។

ក្រៅពីវៀតណាមដែលមាន ៦គ្រឿង ក្នុងនោះឥណ្ឌូនេសុីក៏មាននាវាមុជទឹក ៤គ្រឿង ម៉ាឡេសុីមាន២គ្រឿង និងភូមាមាន១គ្រឿងផងដែរ៕

ប្រភព៖ VN express

សហរដ្ឋអាមេរិក ៖ វាក្លាយជារឿងដែលពលរដ្ឋអាមេរិក និងសភាភ្ញាក់ផ្អើលយ៉ាងខ្លាំង នៅពេលប្រធានាធិបតីអាមេរិក លោក ចូ បៃដិន ផ្តល់បទសម្ភាសន៍ទៅកាន់កម្មវិធី Noticias Telemundo របស់ស្ថានីយទូរទស្សន៍ Telemundo ថា លោកមិនគិតថា បាឡុងរបស់ចិនដែលហោះនៅលើដែនអាកាសរបស់អាមេរិកនោះ ជាការគំរាមកំហែងដល់សន្តិសុខជាតិធ្ងន់ធ្ងរទេ ។

លោកប្រធានាធិបតី ចូ បៃដិន បានបញ្ជាក់ទៀតថា លោកគ្មានអារម្មណ៍សោកស្តាយទេ ដែលអាមេរិកមិនបានបាញ់ទម្លាក់បាឡុងឱ្យលឿនជាងនេះ ។ អ្នកវិភាគអន្តរជាតិគិតថា អាកប្បកិរិយារបស់មេដឹកនាំអាមេរិកនៅពេលនេះ គឺដើម្បីរក្សាសម្ព័ន្ធភាពរវាងអាមេរិក និងចិន មិនឱ្យមានស្ថានភាពតានតឹងកាន់តែខ្លាំងជាងនេះ ។

លោក ចូ បៃដិន ថ្លែងថា ៖ «បាឡុងនេះមិនបានគំរាមកំហែងដល់សន្តិសុខជាតិរបស់យើងធ្ងន់ធ្ងរអ្វីទេ ប៉ុន្តែទោះយ៉ាងណា វាពិតជាបានរំលោភលើច្បាប់អន្តរជាតិ ព្រោះវាហោះចូលមកក្នុងដែនអាកាសរបស់អាមេរិក ហើយយើងមានសិទ្ធិធ្វើអ្វីក៏បានដែរទៅលើវា» ។

បើទោះជាការបំផ្លាញបាឡុងនេះបានធ្វើឡើងដោយរលូន ប៉ុន្តែបណ្តាសមាជិកសភាអាមេរិកយល់ឃើញថា លោកប្រធានាធិបតី ចូ បៃដិន បានសម្រេចចិត្តយឺតយ៉ាវខ្លាំងពេក ក្នុងការចេញបញ្ជាបាញ់បំផ្លាញបាឡុងនេះ ។

ទោះយ៉ាងណា លោក ចូ បៃដិន ឆ្លើយតបទៅវិញថា លោកដឹងច្បាស់ណាស់ពីការបារម្ភរឿងបាឡុងនេះ ប៉ុន្តែការបំផ្លាញបាឡុងអាចធ្វើឱ្យប៉ះពាល់ដល់លំនៅឋានរបស់ពលរដ្ឋអាមេរិកដែលនៅក្បែរនោះ ។ ដូច្នេះ អាជ្ញាធរចាំបាច់ត្រូវរង់ចាំពេលវេលាសមស្របសិនក្នុងការបាញ់កម្ទេចបាឡុង ។

លោក ចូ បៃដិន បន្ថែមថា ៖ «បាឡុងនេះមានទំហំធំណាស់ យើងមិនដឹងទេថា អ្វីនឹងកើតឡើងទេ បើវាធ្លាក់ចុះមកចំសាលារៀន ឬផ្ទះសម្បែងពលរដ្ឋនោះ ដូច្នេះ ខ្ញុំបានបញ្ជាឱ្យបាញ់វាតាមអ្វីដែលអាចធ្វើទៅបាន មានន័យថា ពួកគេត្រូវសម្រេចចិត្តយ៉ាងឆ្លាតវៃ ដោយត្រូវបាញ់ទម្លាក់វាឱ្យធ្លាក់ក្នុងទឹកមហាសមុទ្រ ។ បច្ចុប្បន្ននេះ ពួកគេកំពុងប្រមូលកម្ទេចកម្ទីបាឡុងឡើងមក ហើយគ្រប់យ៉ាងកំពុងដំណើរការបានល្អ» ៕

ប្រភព ៖ beartaiBRIEF

ការទម្លាក់គ្រាប់បែកបរមាណូនៅហ៊ីរ៉ូស៊ីម៉ា(Hiroshima) និងណាហ្គាសាគី (Nagasaki) គឺជាការបំផ្ទុះគ្រាប់បែកបរមាណូចំនួនពីរលើកនៅថ្ងៃទី៦និង៩ ខែសីហា ឆ្នាំ១៩៤៥ ដោយសហរដ្ឋអាមេរិក។

ការទម្លាក់គ្រាប់បែកទាំងពីរលើកនេះបានសម្លាប់មនុស្សចន្លោះពី ១២៩​ ០០០ទៅ ២២៦ ០០០ នាក់ ដែលភាគច្រើនជាជនស៊ីវិល ហើយវាក៏ជាសង្គ្រាមតែមួយគត់នៅលើលោកដែលឈានដល់ការប្រើប្រាស់អាវុធនុយក្លេអ៊ែរ។

ក្រោយពីត្រូវគ្រាប់បែកបរមាណូ ជប៉ុនក៏បានសម្រេចចិត្តចុះចាញ់សង្គ្រាម។ លុះដល់ថ្ងៃទី១៧ខែកញ្ញាឆ្នាំ១៩៤៥ ទីក្រុងហ៊ីរ៉ូស៊ីម៉ាត្រូវបានវាយប្រហារដោយព្យុះទីហ្វុង Makurazaki (Typhoon Ida) ដែលបានសម្លាប់ និងរបួសមនុស្សជាង ៣០០០នាក់។  ស្ពានជាងពាក់កណ្តាលនៅក្នុងទីក្រុងត្រូវបានបំផ្លាញ រួមជាមួយនឹងការខូចខាតយ៉ាងធ្ងន់ធ្ងរដល់ផ្លូវថ្នល់ និងផ្លូវដែក ដែលធ្វើឱ្យទីក្រុងកាន់តែបំផ្លិចបំផ្លាញ។

លុះដល់ឆ្នាំ ១៩៤៩ ទីកន្លែងដែលត្រូវគ្រាប់បរមាណូនោះ បានក្លាយជាឧទ្យានជាតិ ដ៏ល្បីលើពិភពលោក ដែលមានឈ្មោះថា Atomic Dome។ នៅឆ្នាំដដែល ទីក្រុងហ៊ីរ៉ូស៊ីម៉ាត្រូវបានប្រកាសថាជាទីក្រុងសន្តិភាពដោយសភាជប៉ុន។

ចាប់តាំងពីក្លាយជាទីក្រុងសន្តិភាពមក រដ្ឋាភិបាលជប៉ុនបានអភិវឌ្ឍន៍ទីក្រុងនេះ ឱ្យល្អប្រសើឡើងវិញ ដោយបានក្លាយជាទីក្រុងទំនើប និងសុីវិល័យជាងគេទី៤ នៅក្នុងប្រទេសជប៉ុន។

នៅថ្ងៃទី២៧ខែឧសភា ឆ្នាំ២០១៦ បារ៉ាក់ អូបាម៉ា បានក្លាយជាប្រធានាធិបតីសហរដ្ឋអាមេរិកដំបូងគេដែលបានទៅទស្សនាទីក្រុងហ៊ីរ៉ូស៊ីម៉ា ចាប់តាំងពីការទម្លាក់គ្រាប់បែកបរមាណូ៕

ប្រទេសកូរ៉េខាងជើង ៖ កាលពីថ្ងៃទី៨ ខែកុម្ភៈ កន្លងមក លោក គីម ជុងអ៊ុន មេដឹកនាំកំពូលរបស់កូរ៉េខាងជើង ព្រមទាំងភរិយា (រីសូលជូ) និងកូនស្រី (គីម ជូអេ) បានចូលរួមទស្សនាការដង្ហែរក្បួនកាំជ្រួច និងអាវុធថ្មីៗ ដើម្បីបង្ហាញពីសក្តានុពលកងទ័ពក្នុងឱកាសគម្រប់ខួប៧៥ឆ្នាំនៃការបង្កើតកងទ័ពកូរ៉េខាងជើង នៅទីលានគីម អ៊ីលស៊ុង ទីក្រុងព្យុងយ៉ាង ។

អ្នកវិភាគផ្នែកសន្តិសុខជឿថា កាំជ្រួច១ក្នុងចំណោមកាំជ្រួចទាំងអស់ដែលបានបង្ហាញនេះ គឺជាកាំជ្រួចបាញ់ឆ្លងទ្វីប ដែលប្រើប្រាស់ប្រេងឥន្ធនៈប្រភេទថ្មីរបស់កងទ័ពកូរ៉េខាងជើង ។ ទីភ្នាក់ងារព័ត៌មានកណ្តាលកូរ៉េ KCNA និយាយថា ក្បួនដង្ហែរអាវុធលើកនេះ នឹងធ្វើឱ្យទូទាំងពិភពលោកមើលឃើញពីសមត្ថភាពរបស់កូរ៉េខាងជើងក្នុងការទប់ទល់ជាមួយសត្រូវ ករណីមានការប្រឈមមុខគ្នាកើតឡើង ព្រមទាំងការអភិវឌ្ឍឈានទៅមុខមិនឈប់ឈរដើម្បីរក្សាឋានៈជាប្រទេសនុយក្លេអ៊ែរបន្តទៀត ។

ក្រៅពីនេះ សារព័ត៌មានដែលតាមដានពីសភាពការណ៍នៅកូរ៉េខាងជើង គឺ NK News បញ្ជាក់ថា ក្រៅពីកាំជ្រួចឆ្លងទ្វីបដែលប្រើប្រាស់ប្រេងឥន្ធនៈប្រភេទថ្មីហើយនោះ កូរ៉េខាងជើងនៅមានកាំជ្រួចឆ្លងទ្វីបប្រភេទ Hwasong-17 យ៉ាងតិចចំនួន១១ទៀត ដែលបានបង្ហាញក្នុងក្បួនដង្ហែរនេះ ហើយមានតែកាំជ្រួច៤ប៉ុណ្ណោះដែលធ្លាប់បង្ហាញរួចមកហើយកាលពីឆ្នាំ២០២០ ។ វាឆ្លុះបញ្ចាំងឱ្យឃើញថា ការផលិតកាំជ្រួច និងឧបករណ៍បាញ់គ្រាប់រ៉ុក្កែតទំហំធំរបស់កូរ៉េខាងជើងកំពុងតែដំណើរការយ៉ាងដោយរលូន ។

ពិធីដង្ហែរក្បួនរបស់កងទ័ពកូរ៉េខាងជើង គឺជាទីចាប់អារម្មណ៍ពីបណ្តាប្រទេសផ្សេងៗក្នុងពិភពលោក រួមទាំងសារព័ត៌មានបរទេសផងដែរ ។ តើអាចទៅរួចទេដែលថា កូរ៉េខាងជើងនឹងយកអាវុធថ្មីៗទាំងនេះទៅសាកល្បង ឬប្រើប្រាស់ពិតប្រាកដនាពេលអនាគត ព្រោះវានឹងបំផ្លាញសន្តិសុខពិភពលោក ជាពិសេស នៅតំបន់ឧបទ្វីបកូរ៉េ ៕

ប្រភព ៖ thestandard