Yahoo ជាក្រុមហ៊ុនផ្តល់សេវាកម្មអ៊ិនធើរណេតធំមួយរបស់អាមេរិក បាននិយាយកាលពីថ្ងៃទី៩ ខែកុម្ភៈ ថា ក្រុមហ៊ុនដាក់ផែនការកាត់បន្ថយបុគ្គលិកជាង២០% នៃចំនួនបុគ្គលិកទាំងអស់ ឬស្មើប្រមាណ១.៦០០នាក់ ជាផ្នែកមួយនៃការរៀបចំរចនាសម្ព័ន្ធសំខាន់ខាងបច្ចេកវិទ្យាផ្សាយពាណិជ្ជកម្ម ។

តាមរបាយការណ៍បញ្ជាក់ថា ការកាត់បន្ថយបុគ្គលិកនឹងធ្វើឱ្យប៉ះពាល់៥០% នៃបុគ្គលិកធ្វើការផ្នែកបច្ចេកវិទ្យាផ្សាយពាណិជ្ជកម្មនៅចុងឆ្នាំ២០២៣ រួមទាំងបុគ្គលិកប្រមាណ១.០០០នាក់ក្នុងសប្តាហ៍នេះ ។ បច្ចុប្បន្ន Yahoo ស្ថិតក្រោមការគ្រប់គ្រងរបស់ក្រុមហ៊ុន Apollo Global Management ដែលក្រុមហ៊ុននេះបានទិញយក Yahoo តាំងពីឆ្នាំ២០២០ ក្នុងទឹកប្រាក់៥.០០០លានដុល្លារអាមេរិក ។

Yahoo បញ្ជាក់ថា ផែនការកាត់បន្ថយចំនួនបុគ្គលិកលើកនេះ នឹងធ្វើឱ្យក្រុមហ៊ុនអាចផ្តោតទៅលើការវិនិយោគអាជីវកម្មផ្សាយពាណិជ្ជកម្ម ឬហៅថា DSP (Demand-Side Platform) កាន់តែច្រើន ដើម្បីប្រកួតប្រជែងការផ្សាយពាណិជ្ជកម្ម ស្របពេលក្រុមហ៊ុនផ្សាយពាណិជ្ជកម្មជាច្រើនបានកាត់បន្ថយការផ្សាយរបស់ខ្លួន ដើម្បីទប់ទល់នឹងអតិផរណាខ្ពស់ជាប្រវត្តិសាស្ត្រ និងភាពមិនប្រាកដប្រជាជាបន្តបន្ទាប់ដោយសារវិបត្តិសេដ្ឋកិច្ច ។

ពេលនេះ ក្រុមហ៊ុនផ្តោតលើ Yahoo Advertising Group ដោយនឹងកាត់បន្ថយបុគ្គលិកផ្នែក Yahoo for Business ចំនួន៥០% នៅត្រឹមចុងឆ្នាំ២០២៣ ។ លើសពីនេះ Yahoo នឹងផ្តោតលើអាជីវកម្ម (Taboola) ក្រុមហ៊ុនផ្នែកផ្សាយពាណិជ្ជកម្មឌីជីថល ដែលជាដៃគូយូរមកហើយរយៈពេល៣០ឆ្នាំ ដើម្បីអភិវឌ្ឍន៍សេវាកម្មផ្សាយពាណិជ្ជកម្មឱ្យកាន់តែល្អប្រសើរ ។

គួរបញ្ជាក់ថា ក្រុមហ៊ុនបច្ចេកវិទ្យាធំៗរបស់អាមេរិក ដូចជា Goldman Sachs និង Alphabet, Inc. ក៏បានកាត់បន្ថយបុគ្គលិករាប់ពាន់នាក់ផងដែរ ដើម្បីទប់ទល់នឹងឧបសគ្គដែលបណ្តាលមកពីអតិផរណាខ្ពស់ និងអត្រាការប្រាក់កើនឡើង ៕

ប្រភព ៖ The Better

ប្រទេសថៃ ៖ កាលពីថ្ងៃទី៩ ខែកុម្ភៈ អ្នកនាង រ៉ាជឆៈដា ថាណាឌីរិច អ្នកនាំពាក្យទីស្តីការនាយករដ្ឋមន្ត្រី បង្ហាញថា ផ្លែឈើរបស់ថៃបានបង្កើតប្រាក់ចំណូលខ្ពស់សម្រាប់ប្រទេស ខណៈថៃបាននាំចេញផ្លែឈើមានគុណភាពល្អ និងមានស្តង់ដារទៅក្រៅប្រទេស ជាពិសេស គេចាត់ទុកថា ទុរេនជាស្តេចផ្លែឈើ ដែលថៃបានទទួលចំណូលរាប់លានបាតក្នុង១ឆ្នាំពីការនាំចេញ ។ គេមានគម្រោងដឹកជញ្ជូនទិន្នផលមកកាន់ទីផ្សារជាបន្តបន្ទាប់ ចាប់ពីពាក់កណ្តាលខែកុម្ភៈ រហូតដល់ខែសីហា ឆ្នាំ២០២៣ ។

ក្រសួងពាណិជ្ជកម្ម និងនាយកដ្ឋានកម្មសិទ្ធិបញ្ញាបានចុះបញ្ជីទុរេននៅខេត្តយ៉ាឡា គឺជាផលិតផលសម្គាល់ភូមិសាស្ត្រ (GI) សម្រាប់ខេត្តយ៉ាឡា ។ បច្ចុប្បន្ន ទុរេនក្នុងខេត្តយ៉ាឡាមានតម្លៃខ្ពស់ គឺ១៩០បាត/១គីឡូក្រាម និងបង្កើតប្រាក់ចំណូលដល់ពលរដ្ឋយ៉ាឡាចំនួន២.៨០០លានបាត/១ឆ្នាំ ។

អ្នកនាង រ៉ាជឆៈដា បន្តថា ក្រសួងកសិកម្មបានត្រៀមផែនការដោះស្រាយបញ្ហាទុរេនជាប្រព័ន្ធ ចាប់ពីដំណាក់កាលថែទាំក្នុងពេលដាំដុះ រហូតដល់ការប្រមូលផលទុរេនលក់ ។ កន្លងមក ប្រទេសថៃតែងជួបបញ្ហាមានអ្នកលួចលក់ទុរេនខ្ចី ហេតុនេះ ដើម្បីដោះស្រាយបញ្ហាយូរអង្វែង លោក ឆ្លឺមឆៃ ស្រីអន រដ្ឋមន្ត្រីក្រសួងកសិកម្ម បានបញ្ជាឱ្យរៀបចំប្រព័ន្ធការងារសកម្ម តាមរយៈក្រុមការងារដោះស្រាយបញ្ហាទុរេនខូចគុណភាព និងសិទ្ធិទទួលបានវិញ្ញាបនបត្រការអនុវត្តកសិកម្មល្អរបស់កសិករសម្រាប់នាំចេញទុរេន ហើយក្រុមការងារនឹងរៀបចំផែនការទប់ទល់នឹងការប្រកួតប្រជែងនាំចេញទុរេនរបស់ប្រទេសជិតខាងផងដែរ ។

អ្នកនាង រ៉ាជឆៈដា បន្ថែមថា លោក ឆ្លឺមឆៃ ក៏បានចាត់ឱ្យនាយកដ្ឋានផ្សព្វផ្សាយកសិកម្ម និងភ្នាក់ងារ បង្កើតទីកន្លែងពិនិត្យមើលគុណភាពទុរេនចំនួន៥ខេត្តដូចជា ចន្ទបុរី ត្រាត រ៉ក់យ៉ង ឈុមផន និងនគររាជសីមា ។ នាយកដ្ឋានកសិកម្មមានតួនាទីពិនិត្យមើលការវេចខ្ចប់ ដោយត្រូវមានវិញ្ញាបនបត្របញ្ជាក់ពីទម្ងន់សាច់ទុរេន ។ ការពិនិត្យទាំងអស់នេះហើយធ្វើឱ្យទុរេនថៃមានគុណភាពល្អជាងប្រទេសដទៃ ។

លើសពីនេះ អ្នកនាង រ៉ាជឆៈដា បានសំណូមពរថា សុំតែម្យ៉ាងទៅកាន់កសិករ កុំបេះទុរេនខ្ចីលក់ ។ នាយកដ្ឋានបានកំណត់កាលបរិច្ឆេទប្រមូលផលទុរេនដូចជា ទុរេនពូជក្រាឌុម និងភួងម៉ានី ប្រមូលផលនៅថ្ងៃទី១០ ខែមីនា, ពូជឆៈនី ប្រមូលផលថ្ងៃទី២០ ខែមីនា និងពូជមន់ថង ប្រមូលផលថ្ងៃទី១៥ ខែមេសា ឆ្នាំ២០២៣ ។ អ្នកនាងថ្លែងថា ៖ «សូមការសហការពីកសិករទាំងអស់ បើប្រមូលផលមុនថ្ងៃប្រកាស ចូរយកទុរេនខ្ចីបំផុតមកបង្ហាញមន្ត្រីកសិកម្មនៅការិយាល័យកសិកម្មស្រុកពិនិត្យសិន ដើម្បីចេញវិញ្ញាបនបត្រភ្ជាប់ជាមួយឡានដឹកជញ្ជូនទុរេន និងយកទៅលក់តាមរោងចក្រវេចខ្ចប់» ៕

ប្រភព ៖ newpapertoday

ភ្នំពេញ៖ កម្លាំងអាវុធហត្ថខេត្តតាកែវ នៅវេលាម៉ោង១២:៥០នាទី ថ្ងៃទី៩ ខែកុម្ភៈ ឆ្នាំ២០២៣ បានចុះធ្វើការឃាត់ខ្លួនជនសង្ស័យម្នាក់នៅចំណុចភូមិពានមាស ឃុំលំពង់ ស្រុកបាទី ខេត្តតាកែវ ពីបទក្លែងឯកសណ្ឋានកងរាជអាវុធហត្ថ។

ជនសង្ស័យមានឈ្មោះ យក់ សុជាតិ ភេទប្រុសអាយុ៤៨ឆ្នាំ មុខរបរ គ្រូបង្ហាត់នៅក្នុងសមាគមន៍ជួយ ជនរងគ្រោះដោយសារគ្រឿងញៀន រស់នៅភូមិត្រពាំងព្រីង ឃុំលាយបូរ ស្រុកត្រាំកក់ ខេត្តតាកែវ។

លុះនៅវេលាម៉ោង១៥:០០នាទី ថ្ងៃខែឆ្នាំដដែល កម្លាំងអាវុធហត្ថខេត្ត បានចុះនៅចំណុចសមាគមន៍ ជួយជនរងគ្រោះដោយសារគ្រឿងញៀន ស្ថិតនៅភូមិត្រពាំងព្រីង ឃុំលាយបូរ ស្រុកត្រាំកក់ បានធ្វើការឃាត់ខ្លួនជនសង្ស័យបានចំនួន ៥នាក់បន្ថែមទៀត ពីបទក្លែងឯកសណ្ឋាន។

ជនសង្ស័យទាំង៥នាក់មានឈ្មោះរួមមាន៖
១- ឈ្មោះ ប៉ា ឧត្តម ភេទប្រុស អាយុ៣០ឆ្នាំ មុខរបរសន្តិសុខ រស់នៅភូមិត្រាំ សង្កាត់រកាក្រៅ ក្រុងដូនកែវ
២- ឈ្មោះ អឿន អាន ភេទប្រុសអាយុ២៥ឆ្នាំមុខរបរសន្តិសុខ រស់នៅភូមិថ្មសរ ឃុំលំពង់ ស្រុកបាទី
៣- ឈ្មោះ ទេព ឡៃសេង ភេទប្រុស អាយុ២៩ឆ្នាំ មុខរបរសន្តិសុខ រស់នៅភូមិថ្នល់បែកកើត ឃុំស្វាយទាប ស្រុកចំការលើ ខេត្តកំពង់ចាម
៤- ឈ្មោះ ទេព មុនី ភេទប្រុស អាយុ២៨ឆ្នាំ មុខរបរសន្តិសុខ រស់នៅភូមិតាម៉ូវ ឃុំជើងគួន ស្រុកសំរោង
៥- ឈ្មោះ ញឹក យីឡាយ ភេទប្រុស អាយុ៥៦ឆ្នាំ មុខរបរប្រធានសមាគមន៍ជួយជនរងគ្រោះដោយសារគ្រឿងញៀន រស់នៅភូមិត្រពាំងព្រីង ឃុំលាយបូរ ស្រុកត្រាំកក់ ។

វត្ថុតាងដែលចាប់យករួមមាន៖ ឯកសណ្ឋានកងរាជអាវុធហត្ថខោចំនួន ១២ខោ អាវយឺតចំនួន០៧អាវ មួក០៩ ស្បែកជើងកវែងចំនួន០៧គូ, ឯកសណ្ឋានយោធា ខោចំនួន០៣ខោ អាវយឺតចំនួន០១, ឯកសណ្ឋាននគរបាល អាវ ចំនួន០៤ ខោចំនួន០២, ឯកសណ្ឋានអង្គរក្ស អាវយឺតចំនួន០៤ មួកចំនួន០៤ , រថយន្តចំនួន០២គ្រឿង(ម៉ាកLEXUS 470 ពណ៌កាំម៉ៃ ពាក់ស្លាកលេខភ្នំពេញ២AL-4513 និងLEXUS 400h ពណ៌ត្រេអ៊ី ពាក់ស្លាកលេខខេមរភូមិន្ទ០២ ២-៨៩៨៥)។

បច្ចុប្បន្នជនសង្ស័យរួមនិងវត្ថុតាងត្រូវបានមន្ត្រីជំនាញកំពុងអនុវត្តនីតិវិធីច្បាប់៕

សហរដ្ឋអាមេរិក ៖ ក្រសួងការបរទេសអាមេរិកបានបញ្ជាក់ថា បាឡុងចិនដែលត្រូវអាមេរិកប្រើយន្តហោះបាញ់ធ្លាក់នៅលើដែនសមុទ្ររបស់អាមេរិកនោះ គឺជាបាឡុងប្រើសម្រាប់ធ្វើចារកម្មយ៉ាងពិតប្រាកដ វាមិនមែនជាបាឡុងពិនិត្យមើលអាកាសធាតុតាមចិនប្រាប់នោះទេ ។

មន្ត្រីក្រសួងការបរទេសអាមេរិកបានប្រកាសព័ត៌មានលើការពិនិត្យរូបថតពីយន្តហោះ U2 ជាយន្តហោះស៊ើបការណ៍របស់អាមេរិក ដែលអាចហោះហើរបានក្នុងកម្ពស់ជាង២១.០០០ម៉ែត្រឃើញថា បាឡុងរបស់ចិនដែលត្រូវយន្តហោះចម្បាំងអាមេរិកបាញ់ធ្លាក់នៅលើមហាសមុទ្រអាត្លង់ទិក កាលពីថ្ងៃទី៤ ខែកុម្ភៈ កន្លងមកនោះ គឺជាបាឡុងដែលប្រើសម្រាប់ស៊ើបការណ៍យ៉ាងពិតប្រាកដ មិនមែនជាបាឡុងប្រមូលព័ត៌មានពីអាកាសធាតុតាមរដ្ឋាភិបាលចិនអះអាងទេ ។

រូបភាពពីយន្តហោះ U2 បង្ហាញឱ្យឃើញថា បាឡុងនេះមានដាក់អង់ទែនជាច្រើនកន្លែងសម្រាប់ទំនាក់ទំនងគ្នាឆ្លងទ្វីប ។ លើសពីនេះ វាមានផ្ទាំងសូឡាទំហំធំមួយសម្រាប់ស្រូបពន្លឺព្រះអាទិត្យ ជាមួយនឹងប្រព័ន្ធប្រមូលទិន្នន័យជាច្រើនទៀតនៅផ្នែកខាងក្នុង ។ អាមេរិកជឿជាក់ថា វាជាបាឡុងមួយក្នុងចំណោមបាឡុងជាច្រើនទៀតរបស់កងទ័ពចិន ដែលបានបញ្ជូនទៅស៊ើបការណ៍នៅតាមប្រទេសចំនួន៤០ និង៥ទ្វីប ។

ទោះយ៉ាងណា ភ្នាក់ងារស៊ើបអង្កេតកណ្តាលរបស់អាមេរិកដែលបំពេញតួនាទីពិនិត្យកម្ទេចបាឡុងបង្ហាញថា ពេលនេះ គេរកឃើញកម្ទេចកម្ទីបាឡុងតែបន្តិចប៉ុណ្ណោះ និងយកមកពិនិត្យ ។ ចំណែកកម្ទេចបាឡុងផ្នែកសំខាន់នោះ នៅតែស្ថិតក្រោមសមុទ្រមានជម្រៅប្រមាណ១៤ម៉ែត្រ ហើយដោយសារអាកាសធាតុមិនអំណោយផល ធ្វើឱ្យពួកគេប្រមូលកម្ទេចបាឡុងយ៉ាងពិបាក ៕ ប្រភព ៖ NationWorldNews

រដ្ឋធានីវ៉ាស៊ីនតោន៖ ក្រោយពេលក្រុមមន្រ្ដីមន្ទីរបញ្ចកោណ បានអះអាង អំពីផែនការរបស់ចិន វាយលុក ទៅលើកោះតៃវ៉ាន់ នៅក្នុងឆ្នាំ២០២៧ខាងមុខ ក៏ជំរុញឲ្យសភារបស់សហរដ្ឋអាមេរិក កាលពីឆ្នាំ២០២២ បានអនុម័តនូវកញ្ចប់ថវិកា សម្រាប់ផ្ដល់ជំនួយយោធា មានទំហំទឹកប្រាក់ ១០ពាន់លានដុល្លារ បន្ថែមពីលើការទិញគ្រឿងយុទ្ធោករណ៍របស់ក្រុងតៃប៉ិ ប៉ុន្ដែឥឡូវនេះ ឧបការីរដ្ឋមន្រ្ដីក្រសួងការពារជាតិ ទទួលបន្ទុកកិច្ចការសន្ដិសុខ ប្រចាំនៅតំបន់ឥណ្ឌូ-ប៉ាស៊ីហ្វិក បានអះអាង ថា ក្រុងប៉េកាំង នឹងមិនវាយប្រហារ ទៅលើកោះតៃវ៉ាន់ នៅក្នុងពេលឆាប់ៗខាងមុខនេះឡើយ។

សារព័ត៌មាន Taiwan News បានចេញផ្សាយ កាលពីព្រឹក ថ្ងៃសុក្រ ទី១០ ខែកុម្ភៈ ថា លោក អេលី រ៉ាតណឺរ (Ely Ratner) ឧបការី រដ្ឋមន្រ្ដី ក្រសួងការពារជាតិ សហរដ្ឋអាមេរិក ទទួលបន្ទុកកិច្ចការសន្ដិសុខ ប្រចាំនៅតំបន់ឥណ្ឌូ-ប៉ាស៊ីហ្វិក បានព្យាករ ថា ការប៉ះទង្គិចគ្នា នៅច្រកសមុទ្រតៃវ៉ាន់ នឹងមិនអាចកើនឡើង នៅមុនឆ្នាំ២០៣០នេះទេ។ ការលើកឡើងរបស់លោកឧបការី បានកើតឡើង នៅក្នុងអំឡុងពេលសវនាការរបស់គណៈកម្មាធិការទំនាក់ទំនងការបរទេស នៃព្រឹទ្ធសភា ស្តីអំពីគោលនយោបាយរបស់សហរដ្ឋអាមេរិក និង ចិន កាលពីថ្ងៃព្រហស្បតិ៍។

ឆ្លើយតបនឹងសំណួររបស់សមាជិកព្រឹទ្ធសភា លោក ម៉ាកូ រូប៊ីយ៉ូ (Marco Rubio) ថាតើចិន នឹងវាយប្រហារ ទៅលើកោះតៃវ៉ាន់ នៅក្នុងទសវត្សរ៍នេះឬយ៉ាងណានោះ លោកជំនួយការ រដ្ឋមន្រ្ដីក្រសួងការពារជាតិសហរដ្ឋអាមេរិក បានបញ្ជាក់ ថា «ខ្ញុំគិត ថា យើងនឹងអាចដឹង រហូតនៅចុងទសវត្សរ៍នេះ ហើយក្រុងប៉េកាំង នឹងឈ្លានពាន ប្រឆាំងនឹងតៃវ៉ាន់ នាពេលនេះឡើយ»។

លោក គ្រីស ម័រហ្វី (Chris Murphy) សមាជិក ព្រឹទ្ធសហរដ្ឋអាមេរិក បានចោទសួរទៅលោកឧបការី Ratner ថាតើគាត់គិត ថា ជម្លោះនៅច្រកសមុទ្រតៃវ៉ាន់ នឹងមិនអាចជៀសផុតបានទេ? លោកជំនួយការ រដ្ឋមន្ត្រី បានបញ្ជាក់ទៀត ថា លោក ឡយ អូស្ទីន (Lloyd Austin) រដ្ឋមន្ត្រីក្រសួងការពារជាតិអាមេរិក និង ក្រសួងការពារជាតិ មិនជឿ ថា ការឈ្លានពាន ទៅលើតៃវ៉ាន់ នឹងជិតមកដល់ ឬ ចៀសមិនរួចនោះឡើយ ហើយការវាយតម្លៃរបស់យើង នឹងធ្វើបន្តទៀត។

លោក អេលី រ៉ាតណឺរ (Ely Ratner) ឧបការី រដ្ឋមន្រ្ដី បានបន្ថែម ថា ក្រសួងការពារជាតិសហរដ្ឋអាមេរិក កំពុងតែផ្ដោត ទៅលើការទប់ស្កាត់ អស់រយៈពេលជាយូរមកហើយ រហូតទៅថ្ងៃអនាគត។ សហរដ្ឋអាមេរិក នឹងបន្តនូវកិច្ចសហប្រតិបត្តិការជាមួយសម្ពន្ធមិត្ត នៅក្នុងតំបន់ និងប្រទេសជាដៃគូ ដើម្បីថែរក្សាតំបន់ឥណ្ឌូ-ប៉ាស៊ីហ្វិក ប្រកបដោយសេរី និង បើកចំហ។

ឧបការី រដ្ឋមន្រ្ដី ក្រសួងការពារជាតិ សហរដ្ឋអាមេរិក បានថ្លែងជាដដែល ថា «សហរដ្ឋអាមេរិក បានបង្កើននូវការយល់ដឹង និង ការប្រាស្រ័យទាក់ទងជាមួយតៃវ៉ាន់ អំពីតម្រូវការការពាររបស់ក្រុងតៃប៉ិ សម្រាប់ការរារាំងជម្លោះ។ ជាមួយគ្នានេះ ក្រុងវ៉ាស៊ីនតោន បានប្តេជ្ញាចិត្ត ចំពោះការសន្យារបស់ខ្លួន ដែលបានចុះហត្ថលេខា នៅក្នុងច្បាប់ទំនាក់ទំនងតៃវ៉ាន់ (ហៅកាត់ TRA) រួមទាំងការផ្តល់ឱ្យគ្រឿងយុទ្ធោបករណ៍ ជួយដល់តៃវ៉ាន់ ដើម្បីបង្កើននូវសមត្ថភាពស្វ័យការពារ និង ការរក្សាសមត្ថភាពផ្ទាល់ខ្លួនរបស់យើង នៅក្នុងការទប់ទល់នឹងការប្រើប្រាស់កម្លាំងយោធាណាមួយ បង្កឲ្យគ្រោះថ្នាក់ ដល់សន្តិសុខរបស់ប្រជាជនតៃវ៉ាន់»។

លោក ចន ឃើរប៊ី (John Kirby) អ្នកសម្របសម្រួល ក្រុមប្រឹក្សាសន្ដិសុខជាតិ សម្រាប់ទំនាក់ទំនងយុទ្ធសាស្រ្ដរបស់សហរដ្ឋអាមេរិក បានថ្លែងទៅកាន់សន្និសីទសារព័ត៌មាន កាលពីថ្ងៃពុធ ថា សហរដ្ឋអាមេរិក ទទួលខុសត្រូវយ៉ាងធ្ងន់ធ្ងរ សម្រាប់ជួយដល់តៃវ៉ាន់ ឲ្យមានសមត្ថភាពការពារខ្លួន។ ទន្ទឹមគ្នានេះ ក្រសួងការពារជាតិតៃវ៉ាន់ ក៏បានប្រកាស នៅថ្ងៃដដែលនោះ ថា តៃវ៉ាន់ បានចុះហត្ថលេខា លើកិច្ចព្រមព្រៀងចំនួន២ ជាមួយនឹងសហរដ្ឋអាមេរិក មានតម្លៃ៨៥,៣២លានដុល្លារសហរដ្ឋអាមេរិក ដើម្បីធានាដល់ការជួសជុសយន្ដហោះចម្បាំង ប្រភេទ F-16 ជាច្រើនគ្រឿងរបស់ខ្លួន។

សារព័ត៌មាន Defense News បានរាយការណ៍ ថា សភា និង ព្រឹទ្ធសភារបស់សហរដ្ឋអាមេរិក កាលពីខែធ្នូ បានអនុម័ត លើការចំណាយមួយ ដោយរាប់បញ្ចូលទាំងប្រាក់កម្ចី សម្រាប់ទិញគ្រឿងសព្វាវុធ មានទំហំទឹកប្រាក់២ពាន់លានដុល្លារ សម្រាប់តៃវ៉ាន់។ ដោយឡែក កញ្ចប់ថវិកា មានទំហំ ១,៧លានលានដុល្លារ សម្រាប់ការចំណាយរបស់រដ្ឋាភិបាលអាមេរិក នាឆ្នាំ២០២៣ ហើយត្រូវបានចុះហត្ថលេខា ដោយលោក ចូ បៃដិន ប្រធានាធិបតីសហរដ្ឋអាមេរិក កាលពីថ្ងៃ២៩ ខែធ្នូ ឆ្នាំ២០២២នោះ ក៏មានចំណែកចំនួន១០ពាន់លានដុល្លារសហរដ្ឋអាមេរិក សម្រាប់ជំនួយសន្ដិសុខ ជួយដល់កោះតៃវ៉ាន់ រយៈពេល៥ឆ្នាំផងដែរ។

ដោយឡែក ការគំរាមកំហែងរបស់ចិន ទៅលើកោះតៃវ៉ាន់ បានជំរុញឲ្យក្រុងតៃប៉ិ បង្កើននូវកញ្ចប់ថវិកាការពារជាតិរបស់ខ្លួន រាប់ពាន់លានដុល្លារអាមេរិក សម្រាប់ទិញគ្រឿងយុទ្ធោករណ៍ ពីលោកខាងលិច ជាពិសេស សហរដ្ឋអាមេរិក ដើម្បីយកមកត្រៀមទប់ទល់ ប្រឆាំងនឹងការវាយលុករបស់ក្រុងប៉េកាំង។ ក្រៅពីនេះ តៃវ៉ាន់ ក៏បានបង្កើន និង បាញ់សាកល្បងមីស៊ីលរបស់ខ្លួន ហើយវាមានសមត្ថភាព វាយប្រហារដល់តំបន់ភាគកណ្ដាល ប្រទេសចិន ថែមទៀតផង។ បច្ចុប្បន្ន ក្រុងតៃប៉ិ កំពុងតែផ្ដោតយ៉ាងសំខាន់ ទៅលើការបង្កើតដ្រូន សម្រាប់ឈ្លបយកការណ៍ និង វាយប្រហារ ជាច្រើនប្រភេទ ដើម្បីប្រើប្រាស់ នៅក្នុងវិស័យយោធារបស់ខ្លួន៕

ប្រទេសថៃ ៖ កាលពីថ្ងៃទី៩ ខែកុម្ភៈ លោក ណាខន តាកវីរ៉ាផាត អាជ្ញាធរជ័រកៅស៊ូប្រទេសថៃ បានបង្ហាញថា សមាគមផលិតជ័រកៅស៊ូធម្មជាតិបានប្រកាសពីការធ្លាក់ចុះនៃផលិតកម្មជ័រកៅស៊ូទូទាំងពិភពលោក ដោយសារដើមកៅស៊ូមានជំងឺជ្រុះស្លឹកពេញមួយឆ្នាំ អាចធ្វើឱ្យពិភពលោកផលិតជ័រកៅស៊ូបានត្រឹមតែ១៤,៣១លានតោនប៉ុណ្ណោះ ។ ទិន្នផលនេះតិចជាងតម្រូវការប្រើប្រាស់ក្នុងពិភពលោក ដែលបានកើនឡើងប្រមាណ៩% ឬមានតម្រូវការប្រើប្រាស់ជ័រកៅស៊ូប្រមាណ១៥.៥៦៣លានតោន ដែលធ្វើឱ្យតម្លៃជ័រកៅស៊ូកើនឡើងខ្ពស់ ខណៈនៅឆ្នាំ២០២២ តម្លៃជ័រកៅស៊ូស្រស់ស្មើ៥៤.៧៩បាត/១គីឡូក្រាម រីឯជ័រកៅស៊ូបន្ទះស្មើ៥៨.៥១បាត/១គីឡូក្រាម ។

លោក ណាខន បន្តថា ផលប៉ះពាល់ដោយសារជំងឺជ្រុះស្លឹក ធ្វើឱ្យការផលិតជ័រកៅស៊ូនៅឆ្នាំ២០២៣ ធ្លាក់ចុះយ៉ាងខ្លាំង ដូចជា ប្រទេសហ្វីលីពីន ការផលិតធ្លាក់ចុះ៩០% ធ្វើឱ្យកសិករហ្វីលីពីនងាកទៅដាំទុរេនជំនួសវិញ រីឯឥណ្ឌូណេស៊ី ការផលិតធ្លាក់ចុះ៣-៥សែនតោន ចំណែកប្រទេសថៃ ការផលិតធ្លាក់ចុះប្រមាណ១,៩% នៃការផលិតនៅឆ្នាំ២០២២ ឬធ្លាក់ចុះប្រមាណ២សែនតោន ។ លើសពីនេះ កសិករដាំកៅស៊ូក៏បានប្រឈមនឹងអាកាសធាតុមិនល្អផងដែរ ។ គេឃើញថា ទិន្នផលកៅស៊ូមិនច្បាស់លាស់ ហើយជួបបញ្ហាខ្វះខាតកម្លាំងពលកម្មក្នុងចម្ការកៅស៊ូផងដែរ ។

គេរំពឹងថា ការនាំចេញជ័រកៅស៊ូរបស់ថៃនៅឆ្នាំ២០២៣ នឹងធ្លាក់ចុះស្មើត្រឹម៤,៤លានតោនប៉ុណ្ណោះ បើធៀបនឹងឆ្នាំ២០២២ ដែលការនាំចេញជ័រកៅស៊ូ និងផលិតផលពីកៅស៊ូស្មើ៦,៥សែនលានបាត ក្នុងនោះកៅស៊ូបន្ទះស្មើ២,៨សែនលានបាត ហើយនៅសល់ គឺផលិតផលពីកៅស៊ូ ។ គេសង្ឃឹមថា ជ័រកៅស៊ូនឹងឡើងថ្លៃ ដោយសារផលិតកម្មធ្លាក់ចុះ ហើយតម្រូវការខ្ពស់ជាងទិន្នផល ដោយនៅខែមករា ឆ្នាំ២០២៣ ផលិតកម្មកៅស៊ូថៃបានថយចុះ២៦% ដោយសារអាកាសធាតុប្រែប្រួល ដូចជា ភ្លៀងធ្លាក់ច្រើនបណ្តាលឱ្យខូចជ័រកៅស៊ូ ។

លោក ណាខន បន្ថែមថា នៅឆ្នាំ២០២៣ គឺជាឱកាសរបស់ជ័រកៅស៊ូក្នុងទីផ្សារពិភពលោក ខណៈសេដ្ឋកិច្ចពិភពលោកមានសញ្ញាកើនឡើង ដោយសារចិនប្រកាសបើកប្រទេស និងលុបចោលវិធានការកូវីដស្មើសូន្យ (Zero-covid) ដែលបង្កលក្ខណៈល្អប្រសើរដល់សេដ្ឋកិច្ច ជំរុញតម្រូវការសម្បកកង់ និងជ័រកៅស៊ូធម្មជាតិ ។ ទោះយ៉ាងណា កៅស៊ូនៅតែមានបញ្ហាប្រឈម ដោយសារសង្គ្រាមរុស្ស៊ី-អ៊ុយក្រែនអាចអូសបន្លាយប៉ះពាល់ដល់តម្លៃថាមពល និងអតិផរណានៅអឺរ៉ុប រួមទាំងរបាំងពាណិជ្ជកម្មរបស់ប្រទេសទិញជ័រកៅស៊ូ ៕

ប្រភព ៖ khaosod