រដ្ឋធានីវ៉ាស៊ីនតោន៖ រហូតមកដល់ពេលនេះ ទំនាក់ទំនងការទូត រវាងក្រុងវ៉ាស៊ីនតោន និង ក្រុងប៉េកាំង កាន់តែធ្លាក់ចុះខ្លាំង ក្រោយពេលកងទ័ពសហរដ្ឋអាមេរិក បានប្រើប្រាស់យន្ដហោះចម្បាំងបំបាំងកាយដ៏ទំនើប F-22 បាញ់ទម្លាក់បាឡុងរបស់ចិន ដែលសង័្សយជាយានចារកម្ម។

សារព័ត៌មាន Channel News Asia បានចេញផ្សាយ កាលពីរសៀល ថ្ងៃពុធ ទី១៥ ខែកុម្ភៈ ថា សេតវិមានរបស់ប្រធានាធិបតីសហរដ្ឋអាមេរិក កាលពីថ្ងៃអង្គារ បានស្វែងរកនូវការដកខ្លួន ចេញពីវិបត្តិការទូត ដែលកំពុងកើនឡើង ជាមួយក្រុងប៉េកាំង។ ក្រុងវ៉ាស៊ីនតោន បាននិយាយ ថា ភស្តុតាងបឋម បង្ហាញ ថា វត្ថុពីលើអាកាស មិនស្គាល់អត្តសញ្ញាណ ចំនួន៣ផ្សេងទៀត ត្រូវបានបាញ់ទម្លាក់ ដោយយន្តហោះរបស់អាមេរិក ហើយវាមិនជាប់ពាក់ព័ន្ធ នៅក្នុងកម្មវិធីបាឡុងចារកម្មរបស់ចិន នោះឡើយ។

សហរដ្ឋអាមេរិក ស្ថិតក្នុងស្ថានភាពប្រកាសអាសន្ន ចាប់តាំងពីបាឡុងពណ៌សដ៏ធំរបស់ចិន ត្រូវបានគេប្រទះឃើញ ហោះនៅពីលើទីតាំងអាវុធនុយក្លេអ៊ែរដ៏សម្ងាត់បំផុត ដែលជាចំណុចដ៏រសើបរបស់សហរដ្ឋអាមេរិក មុនពេលវាត្រូវបានបាញ់ទម្លាក់ នៅឆ្នេរសមុទ្រ នាភាគខាងកើត កាលពីថ្ងៃទី៤ ខែកុម្ភៈ។ ក្រោយពេលកើតមានឧបទ្ទវហេតុនោះ យោធាអាមេរិកបានកែសម្រួលនូវការកំណត់រ៉ាដា ដើម្បីស្វែងរកវត្ថុតូចៗ និង បានរកឃើញភ្លាមៗនូវយានមិនស្គាល់អត្តសញ្ញាណចំនួន៣គ្រឿងទៀត ដែលលោកប្រធានាធិបតី ចូ បៃដិន (Joe Biden) បានបញ្ជាឱ្យបាញ់ទម្លាក់ ដោយមួយនៅអាឡាស្កា សហរដ្ឋអាមេរិក, វត្ថុទី២ នៅកាណាដា និង ទី៣នៅលើបឹង Huron នៃរដ្ឋមីឈីហ្គេន (Michigan)។

លោក ចន ឃើរប៊ី (John Kirby) អ្នកនាំពាក្យ ក្រុមប្រឹក្សាសន្ដិសុខជាតិ បានបញ្ជាក់ ថា «អាជ្ញាធរ សហរដ្ឋអាមេរិក មិនបានឃើញនូវការចង្អុលបង្ហាញ ឬ អ្វីដែលបានចង្អុលបង្ហាញយ៉ាងពិសេស ចំពោះគំនិតដែលលើកថា វត្ថុទាំង៣នេះ ជាផ្នែក នៃកម្មវិធីបាឡុងចារកម្មរបស់ចិន ឬថា វត្ថុទាំងនោះ ពិតជាជាប់ពាក់ព័ន្ធ នៅក្នុងការស៊ើបការណ៍សម្ងាត់ មកពីខាងក្រៅនោះឡើយ»។

អ្នកនាំពាក្យ ក្រុមប្រឹក្សាសន្ដិសុខជាតិ រូបនេះ បានបន្ថែម ថា វត្ថុទាំងនោះ អាចជាបាឡុង ត្រូវបានភ្ជាប់យ៉ាងសាមញ្ញ ទៅនឹងអង្គភាពពាណិជ្ជកម្ម ឬ ស្រាវជ្រាវ។

លោកស្រី ការីន ហ្សង់ព្យា (Karine Jean-Pierre) អ្នកនាំពាក្យ សេតវិមាន បានទទួលស្គាល់ ថា «វត្ថុទាំង៣នេះ នៅតែមិនទាន់ស្គាល់ប្រភពដើម ប៉ុន្តែយើងចង់ធ្វើឱ្យប្រាកដ ថា ប្រជាជនអាមេរិក យល់ថា មិនចាំបាច់ភ័យស្លន់ស្លោនោះឡើយ»។

ដោយឡែក ក្រុងប៉េកាំង បានបដិសេធ ថា ចិន មិនបានប្រើប្រាស់បាឡុងចារកម្មនោះឡើយ ហើយថា យានអវកាសដ៏ធំ ដែលត្រូវបានបាញ់ទម្លាក់ ដោយកងទ័ពសហរដ្ឋអាមេរិក កាលពីថ្ងៃទី៤ ខែកុម្ភៈ នោះ គឺប្រើប្រាស់សម្រាប់ការស្រាវជ្រាវអាកាសធាតុតែប៉ុណ្ណោះ។ ជាមួយគ្នានេះ ចិន ក៏បានចោទប្រកាន់ ដល់ក្រុងវ៉ាស៊ីនតោន អំពីការបញ្ជូនបាឡុងចារកម្មរបស់ខ្លួន ទៅលើដែនដីរបស់ខ្លួន ប៉ុន្ដែបញ្ហានេះ ត្រូវបានក្រុមមន្រ្ដីសហរដ្ឋអាមេរិក ច្រានចោល។

ជម្លោះនេះ បានធ្វើឱ្យខូចខាតផ្នែកការទូតរួចមកហើយ រវាងប្រទេសមហាអំណាចជាគូប្រជែងនឹងគ្នាទាំង២នេះ ក្រោយពេលរដ្ឋមន្ត្រី ក្រសួងការបរទេសសហរដ្ឋអាមេរិក លោក អេនតូនី ប៊ីលនខេន (Antony Blinken) បានលុបចោលដំណើរទស្សនកិច្ចដ៏កម្ររបស់គាត់ ទៅកាន់ទីក្រុងប៉េកាំង ភ្លាមៗ បន្ទាប់ពីមានឧបទ្ទវហេតុនេះ៕

ប្រទេសចិន ៖ សាលាមត្តេយ្យឯកជននៅចិនបានបិទទ្វារជាបន្តបន្ទាប់ ខណៈកុមារមកចុះឈ្មោះចូលរៀនបានធ្លាក់ចុះអស់២ឆ្នាំមកហើយ ស្របនឹងអត្រាកំណើតថ្មីធ្លាក់ចុះខ្លាំងជាប្រវត្តិសាស្ត្រ បើទោះជារដ្ឋាភិបាលមានគោលនយោបាយជំរុញឱ្យមានកូន ក៏មិនបានជួយអ្វីដែរ ព្រោះការរៀបអាពាហ៍ពិពាហ៍មិនមែនជារឿងចាំបាច់សម្រាប់យុវវ័យទៀតទេ ។

South China Morning Post រាយការណ៍ថា បច្ចុប្បន្ន សាលាមត្តេយ្យឯកជនចាប់ផ្តើមរងផលប៉ះពាល់ដោយសារកុមារមកចុះឈ្មោះចូលរៀនធ្លាក់ចុះ ។ មូលហេតុចម្បង គឺដោយសារអត្រាកំណើតធ្លាក់ចុះ ខណៈការបង់សាលាមានតម្លៃខ្ពស់ បើធៀបនឹងសាលារដ្ឋ ធ្វើឱ្យប្រាក់ចំណូលរបស់សាលាឯកជនជាច្រើនធ្លាក់ចុះ ហើយខ្លះទៀតខាតទុនតែម្តង ។

Liu Dewei ម្ចាស់សាលាមត្តេយ្យ Beilei ថ្លែងថា នៅក្នុងតំបន់នេះមានពលរដ្ឋចំនួន៦៥ម៉ឺន៦ពាន់នាក់ ប៉ុន្តែមានកុមារមកចុះឈ្មោះចូលរៀនត្រឹម១៤០នាក់ប៉ុណ្ណោះ ហើយនៅឆ្នាំ២០២០ បានចាប់ផ្តើមធ្លាក់ចុះសល់តែ៣០នាក់ ។ មុនដំបូងគិតថា មកពីជំងឺកូវីដរាតត្បាត ប៉ុន្តែបន្ទាប់ពីក្រុងប៉េកាំងលុបចោលវិធានការរឹតបន្តឹងកូវីដ ស្ថានការណ៍ក៏មិនប្រសើរឡើង ហើយចាប់ផ្តើមប៉ះពាល់ផ្នែកហិរញ្ញវត្ថុ ដូច្នេះ ត្រូវពិចារណាបិទសាលា ។ លោកថា ៖ «សាលាបានគ្រប់គ្រងការចំណាយ និងមិនទិញឧបករណ៍សម្រាប់ការបង្រៀន និងរៀនទេ បើស្ថានការណ៍មិនល្អទៀត អាចនឹងបិទទ្វារនៅឆ្នាំ២០២៣» ។

តាមទិន្នន័យរបស់រដ្ឋបង្ហាញថា ចំនួនទារកកើតថ្មីនៅចិនបានធ្លាក់ចុះខ្លាំងបើធៀបនឹងឆ្នាំ២០១៦ ដែលមានអត្រាកំណើត១៨,៨លាននាក់ ខណៈឆ្នាំ២០២២ មានអត្រាកំណើតត្រឹម៩,៥លាននាក់ប៉ុណ្ណោះ គឺទាបបំផុតក្នុងប្រវត្តិសាស្ត្រ ។

Yuan Xin អ្នកឯកទេសប្រជាសាស្ត្រនៃមហាវិទ្យាល័យ Nankai ប្រាប់ថា បើទោះជារយៈពេល៣ឆ្នាំមកនេះ ប្រធានាធិបតី លោក ស៊ី ជិនពីង មានគោលនយោបាយជំរុញឱ្យពលរដ្ឋមានកូន៣នាក់ក្នុងមួយគ្រួសារ ដោយឧបត្ថម្ភជាប្រាក់លំហែមាតុភាព និងការថែទាំកូនក្តី ប៉ុន្តែវាមិនងាយទេ ដែលតម្រូវឱ្យយុវវ័យមានកូន ព្រោះការថែទាំកូនម្នាក់ត្រូវចំណាយប្រាក់ច្រើនណាស់ ។

ចិនបានជួបនឹងវិបត្តិពលរដ្ឋធ្លាក់ចុះ ព្រោះអត្រាកំណើតធ្លាក់ចុះទាបជាង១០លាននាក់ ។ តាមរបាយការណ៍ស្ថិតិឆ្នាំ២០២២ ថា ចំនួនអ្នករៀបអាពាហិពិពាហ៍ដំបូងបានធ្លាក់ចុះមកត្រឹម១១,៦លាននាក់ ខណៈឆ្នាំ២០១៣ ស្មើ២៣,៩លាននាក់ ។

Xiong Bingqi នាយកវិទ្យាស្ថានស្រាវជ្រាវអប់រំដាស់តឿនថា ចំនួនពលរដ្ឋនៅតែធ្លាក់ចុះអាចធ្វើឱ្យសាលាមត្តេយ្យធំៗត្រូវបិទទ្វារ បើរដ្ឋាភិបាលមិនជួយគាំទ្រសាលាមត្តេយ្យទូទាំងប្រទេសទេនោះ សាលាមត្តេយ្យឯកជនប្រមាណ៣០%-៥០% នឹងបិទទ្វារនៅឆ្នាំ២០៣០ ៕

ប្រភព ៖ thestandardwealth

ប្រទេសប្រេស៊ីល ៖ តាមទិន្នន័យពីផ្កាយរណបចុងក្រោយរបស់មន្ត្រីប្រេស៊ីលបង្ហាញថា ការកាប់បំផ្លាញព្រៃឈើនៅតំបន់អាម៉ាហ្សូនបានធ្លាក់ចុះជាខ្លាំងនៅខែមករា បន្ទាប់ពីផ្លាស់ប្តូរមេដឹកនាំរដ្ឋាភិបាលប្រេស៊ីលថ្មីបានត្រឹម១ខែ ។ លោក Lula da Silva អតីតប្រធានាធិបតីប្រេស៊ីល កាន់តំណែងពីឆ្នាំ២០០៣-២០១០ បានមកកាន់តំណែងជាមេដឹកនាំប្រទេសម្តងទៀតនៅដើមឆ្នាំ២០២៣ នេះ ។

តាមទិន្នន័យផ្កាយរណបរបស់ភ្នាក់ងារស្រាវជ្រាវអវកាសប្រេស៊ីល Inpe បញ្ជាក់ថា នៅខែមករា ឆ្នាំ២០២៣ ព្រៃឈើក្នុងតំបន់អាម៉ាហ្សូនដែលត្រូវគេកាប់បំផ្លាញអស់ជាច្រើន បានធ្លាក់ចុះដល់៦១% បើធៀបនឹងរយៈពេលដូចគ្នាឆ្នាំ២០២២ ខណៈប្រេស៊ីលស្ថិតក្រោមការដឹកនាំរបស់អតីតប្រធានាធិបតី លោក Jair Bolsonaro ។

កាលពីពាក់កណ្តាលខែមករា មន្ត្រីបរិស្ថានប្រេស៊ីលបានប្រឆាំងនឹងការកាប់បំផ្លាញព្រៃឈើ ក្រោមការគាំទ្ររបស់ប្រធានាធិបតី លោក Lula da Silva ព្រោះចង់រក្សាទុកព្រៃឈើអាម៉ាហ្សូនឱ្យសម្បូរបែប បន្ទាប់ពីព្រៃឈើនៅទីនេះជួយទប់ស្កាត់ការបម្រែបម្រួលអាកាសធាតុ និងស្រូបយកកាបូនអុកស៊ីតក្នុងបរិយាកាសផែនដី ។

Daniel Silva អ្នកអភិរក្សនៃមូលនិធិសត្វព្រៃពិភពលោក (WWF) នៅប្រេស៊ីលបញ្ជាក់ថា វាគួរឱ្យរីករាយដែលយើងឃើញការកាប់បំផ្លាញព្រៃឈើធ្លាក់ចុះនៅខែមករា ប៉ុន្តែទោះយ៉ាងណា វាឆាប់រហ័សពេកសម្រាប់ការផ្លាស់ប្តូរឥរិយាបថនៅប្រទេសនេះ ។ព័ត៌មានការកាប់បំផ្លាញព្រៃឈើធ្លាក់ចុះ បន្ទាប់ពីរដ្ឋាភិបាលអាមេរិកពិចារណាគាំទ្រមូលនិធិពហុភាគី ដែលមានគោលដៅប្រឆាំងការកាប់បំផ្លាញព្រៃឈើនៅតំបន់អាម៉ាហ្សូន ហើយវាជារបៀបវារៈសំខាន់ក្នុងកិច្ចពិភាក្សារវាងប្រធានាធិបតីប្រស៊ីល លោក Lula da Silva និងប្រធានាធិបតីអាមេរិក លោក ចូ បៃដិន កាលពីថ្ងៃទី១០ ខែកុម្ភៈ កន្លងមក ។

បើទោះនៅដើមឆ្នាំ២០២៣ ប្រេស៊ីលចាប់ផ្តើមបង្ហាញចំណុចល្អរបស់ខ្លួនក្តី ប៉ុន្តែអ្នកជំនាញ និងមន្ត្រីបរិស្ថានបញ្ជាក់ទៅកាន់លោក Lula da Silva ថា ប្រេស៊ីលអាចប្រើពេលយូរទៀតដើម្បីសម្រេចគោលដៅអភិរក្សបរិស្ថាន បន្ទាប់ពីអតីតប្រធានាធិបតី លោក Jair Bolsonaro បានកាត់បន្ថយប្រាក់ភ្នាក់ងារបរិស្ថានសំខាន់ៗអស់ជាច្រើនឆ្នាំ ៕ ប្រភព ៖ thestandard

រដ្ឋធានីកៀវ៖ ស្របពេលសហរដ្ឋអាមេរិក សហភាពអឺរ៉ុប និង អង្គការសន្ធិសញ្ញាអាត្លង់ទិកខាងជើង (ហៅកាត់ ណាតូ ឬ អូតង់) បាន និង កំពុងតែសន្យា បន្ដផ្ដល់កិច្ចគាំទ្រយ៉ាងខ្លាំងនោះ ជួយដល់អ៊ុយក្រែន នោះ រដ្ឋាភិបាលរបស់លោកប្រធានាធិបតី វ៉ូឡូឌីមៀរ ហ្សេឡែនស្គី ក៏កំពុងតែព្រួយបារម្ភយ៉ាងខ្លាំង អំពីអំពើពុករលួយ នៅក្នុងប្រទេស ខណៈកំពុងតែទប់ទល់នឹងសង្គ្រាមលុកលុយ ពីរុស្ស៊ី។

សារព័ត៌មាន Aljazeera បានចេញផ្សាយ កាលពីថ្ងៃអង្គារ ទី១៤ ខែកុម្ភៈ ឆ្នាំ២០២៣ ថា ការលុកលុយរបស់កម្លាំងទាហានរបស់រុស្ស៊ី នៅក្នុងប្រទេសអ៊ុយក្រែន ស្ទើរអស់រយៈពេលមួយឆ្នាំមកនេះ បានធ្វើឲ្យមនុស្ស រាប់ម៉ឺននាក់ បាត់បង់ជីវិត ហើយប្រជាជនអ៊ុយក្រែន ជិត១៧,៦លាននាក់ កំពុងតែត្រូវការជំនួយមនុស្សធម៌ជាបន្ទាន់។ ចំណែករដ្ឋាភិបាលក្រុងកៀវ នៅតែប្រកាន់ខ្ជាប់ នៅក្នុងការប្រយុទ្ធ ប្រឆាំងនឹងកងទ័ពរុស្ស៊ី ខណៈអ៊ុយក្រែន កំពុងតែប្រឈមមុខនឹងសត្រូវមួយផ្សេងទៀត ដែលបានវាយលុក នៅក្នុងប្រទេស អស់រយៈពេលជាច្រើនឆ្នាំមកហើយនោះ គឺការលុបបំបាត់អំពើពុករលួយ។

អាជ្ញាធរអ៊ុយក្រែន កាលពីប៉ុន្មានសប្ដាហ៍កន្លងមកនេះ បានឆ្មក់ចូលផ្ទះរបស់អតីតរដ្ឋមន្ត្រីក្រសួងមហាផ្ទៃរបស់ប្រទេសនេះ ហើយបានបណ្តេញមន្ត្រីជាន់ខ្ពស់របស់រដ្ឋាភិបាលជាច្រើននាក់ ចេញពីតំណែង ដោយសារតែពួកគេត្រូវបានចោទប្រកាន់ អំពីបទស៊ីសំណូក។ រីឯលោក អូឡែកស៊ី រេស្នីកូវ (Oleksii Reznikov) រដ្ឋមន្ត្រី ក្រសួងការពារជាតិអ៊ុយក្រែន ក៏នឹងត្រូវមានអ្នកថ្មី ចូលមកជំនួសតំណែងរបស់គាត់ ក្រោយពេលអ្នកកាសែត និង ក្រុមសកម្មជន បានរកឃើញ ថា ក្រសួងការពារជាតិ បានទិញអាហារ សម្រាប់ទាហាន នៅក្នុងតម្លៃដ៏ច្រើនសន្ធឹកសន្ធាប់ ដែលសង័្សយ ពីការបង្កប់អំពីពុករលួយ។

ស្របពេលសហរដ្ឋអាមេរិក សហភាពអឺរ៉ុប និង អង្គការណាតូ បានសន្យាបន្ដផ្ដល់ជំនួយ ដល់ប្រទេសអ៊ុយក្រែន នោះ ក៏មានក្រុមអ្នកនយោបាយ និង មន្រ្ដីយោធារបស់លោកខាងលិចមួយចំនួន បានគូសបញ្ជាក់ អំពីអំពើពុករលួយ នៅក្នុងប្រទេសដែលកំពុងតែហែកហួរ ដោយសារសង្គ្រាម។ ចំណែកបញ្ហាជាច្រើន បានលើកឡើងជាសំណួរ ថាតើអ៊ុយក្រែន ជាអ្នកប្រើប្រាស់ជំនួយបានល្អដែរទេ ខណៈប្រទេសនេះកំពុងតែទទួលជំនួយ ពីសម្ពន្ធមិត្ត។

លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានយល់ដឹងខ្ពស់ អំពីការរិះគន់របស់លោកខាងលិច និង សារៈសំខាន់ នៃការថែរក្សាលំហូរជំនួយ តាមរយៈការលុបបំបាត់អំពើពុករលួយ។

លោក វ៉ូឡូឌីមៀរ ឌូបូវីក (Volodymyr Dubovyk) សាស្រ្តាចារ្យផ្នែកទំនាក់ទំនងអន្តរជាតិ នៃសាកលវិទ្យាល័យជាតិមេឆ្នីកូវ (Mechnikov) ស្ថិតក្នុងទីក្រុងអូដេសា (Odesa) ប្រទេសអ៊ុយក្រែន បានប្រាប់ Al Jazeera ថា «វាពិតជាមានទំនាក់ទំនងគ្នា រវាងចលនាប្រឆាំងនឹងអំពើពុករលួយ និង បំណងប្រាថ្នារបស់លោកប្រធានាធិបតី ហ្សេឡែនស្គី នៅក្នុងការថែរក្សាជំនួយផ្នែកយោធារបស់លោកខាងលិច។ ប្រធានាធិបតីអ៊ុយក្រែន បានយល់ឃើញ ថា គាត់គួរតែដោះស្រាយបញ្ហានេះឱ្យបានលឿន និង ម៉ឺងម៉ាត់ ដោយមិនបង្អង់យូរ ហើយគាត់យល់ ថា មានមនុស្ស នៅសហរដ្ឋអាមេរិក និង លោកខាងលិច បានហៅអ៊ុយក្រែន ថា ពុករលួយខ្លាំងពេក»។

លោកសាស្រ្ដាចារ្យ បានសង្កត់ធ្ងន់ ថា «ការព្រួយបារម្ភដ៏ខ្លាំងរបស់អ៊ុយក្រែន ត្រង់ថា សហរដ្ឋអាមេរិក និង លោកខាងលិច នឹងបោះបង់ពួកគេចោល ហើយលំហូរជំនួយគ្រឿងសព្វាវុធ ក៏នឹងត្រូវបញ្ចប់ផងដែរ»៕

សហរដ្ឋអាមេរិក ៖ IBM ជាក្រុមហ៊ុនផ្នែកបច្ចេកវិទ្យាធំមួយ បានដាក់ពាក្យប្តឹងអ្នកនាង ប៉ាត់ថៈម៉ា ចន្ទរ៉ាក់ អតីតប្រធានគ្រប់គ្រងជាន់ខ្ពស់របស់ក្រុមហ៊ុនប្រចាំសាខាប្រទេសថៃ និងទាមទារប្រាក់ Bonus ពីអ្នកនាងមកវិញ ក្នុងចំនួន៤៧ម៉ឺនដុល្លារអាមេរិក (ស្មើប្រមាណ១៥,៩លានបាត) ។

នៅក្នុងពាក្យបណ្តឹងកាលពីថ្ងៃទី១៣ ខែកុម្ភៈ កន្លងមក នៅតុលាការកណ្តាលក្នុងក្រុងញូវយ៉ក ក្រុមហ៊ុន IBM បានចោទប្រកាន់ថា អ្នកនាង ប៉ាត់ថៈម៉ា ជាអតីតប្រធានគ្រប់គ្រងទូទៅប្រចាំសាខាប្រទេសថៃ បានរំលោភកិច្ចសន្យា និងចូលកាន់តំណែងជាមន្ត្រីជាន់ខ្ពស់របស់ក្រុមហ៊ុន Accenture (ជាក្រុមហ៊ុនជំនាញផ្នែកសេវាកម្មព័ត៌មានវិទ្យា និងប្រឹក្សាយោបល់ ដែលមានការិយាល័យកណ្តាលនៅប្រទេសអៀរឡង់ និងមានសាខានៅប្រទេសថៃ) និងជាគូប្រជែងធំបំផុតរបស់ក្រុមហ៊ុន IBM ក្នុងតំបន់អាស៊ីប៉ាស៊ីហ្វិក ។

អ្នកនាង ប៉ាត់ថៈម៉ា បានធ្វើការនៅក្នុងក្រុមហ៊ុន IBM កាលពីឆ្នាំ២០១៨ ហើយបានលាឈប់ពីការងារនៅឆ្នាំ២០២២ បន្ទាប់មក នាងបានធ្វើការនៅក្រុមហ៊ុន Accenture ក្នុងតួនាទីជានាយកគ្រប់គ្រងប្រចាំប្រទេសថៃ នៅខែមេសា ឆ្នាំ២០២២ ឬ១ខែក្រោយពីនាងបានលាឈប់ពីក្រុមហ៊ុន IBM ។

ក្រុមហ៊ុនអះអាងថា ក្រុមហ៊ុនបានផ្តល់ប្រាក់ Bonus ទៅឱ្យនាងក្នុងចំនួន៤៧ម៉ឺនដុល្លារអាមេរិក ដើម្បីជាថ្នូរឱ្យនាងត្រូវតែការពារព័ត៌មានសម្ងាត់របស់ក្រុមហ៊ុន ហើយមិនធ្វើការជាមួយក្រុមហ៊ុនគូប្រជែងក្នុងរយៈពេលបានកំណត់ ។

គួរបញ្ជាក់ថា នាង ប៉ាត់ថៈម៉ា បានផ្លាស់ទៅធ្វើការនៅក្រុមហ៊ុន Accenture យ៉ាងឆាប់រហ័ស ហើយក្រុមហ៊ុន IBM លើកឡើងថា ពួកគេមានសិទ្ធិលុបចោល ហើយនាងត្រូវប្រគល់ប្រាក់ Bonus មកឱ្យក្រុមហ៊ុនវិញ ៕ ប្រភព ៖ PPTVHD36

ប្រទេសឥណ្ឌា ៖ មេដឹកនាំប្រទេសឥណ្ឌាបានប្រកាសថា នឹងបង្កើនការនាំចេញអាវុធបន្ថែមទៀតទៅកាន់ពិភពលោក គឺលើសមុន៣ដង ក្នុងទឹកប្រាក់ស្មើ៥.០០០លានដុល្លារអាមេរិកក្នុងរយៈពេល២ឆ្នាំខាងមុខនេះ ។

កាលពីថ្ងៃទី១៣ ខែកុម្ភៈ កន្លងមក នាយករដ្ឋមន្ត្រីប្រទេសឥណ្ឌា លោក ណារិនដ្រា ម៉ូឌី បានប្រកាសពីគោលដៅនាំចេញអាវុធក្នុងពិធីបង្ហាញយន្តហោះរបស់ខ្លួននៅទីក្រុងបេងហ្គារូលូ ជាពិធីបង្ហាញយន្តហោះធំបំផុត ដែលរៀបចំឡើងរៀងរាល់២ឆ្នាំម្តង និងមានកំណត់រយៈពេល៥ថ្ងៃ ។

លោកនាយករដ្ឋមន្ត្រីថ្លែងថា ឥណ្ឌាមានគោលដៅបន្ថែមតម្លៃការនាំចេញអាវុធចាប់ពី១.៥០០លានដុល្លារ/១ឆ្នាំ ទៅ៥.០០០លានដុល្លារ/១ឆ្នាំ គិតចាប់ពីឆ្នាំ២០២៤ ដល់ឆ្នាំ២០២៥ ។ លោកបានថ្លែងទៀតថា ឥណ្ឌាមិនគ្រាន់តែជាទីផ្សារប៉ុណ្ណោះទេ ប៉ុន្តែឥណ្ឌាមានសក្តានុពលជាដៃគូផលិតអាវុធផងដែរ ហើយឥណ្ឌាកំពុងក្លាយជាប្រទេសមួយក្នុងចំណោមប្រទេសនាំចេញអាវុធលំដាប់កំពូលក្នុងពិភពលោក ។ បច្ចុប្បន្ន ឥណ្ឌាបាននាំចេញអាវុធទៅកាន់៧៥ប្រទេស លើសពីនេះ រដ្ឋាភិបាលបានណែនាំផ្នែកឯកជនឱ្យចូលរួមវិនិយោគក្នុងឧស្សាហកម្មការពារជាតិកាន់តែច្រើនឡើង ។

សារព័ត៌មានក្នុងប្រទេសរាយការណ៍ថា ឥណ្ឌាអាចធ្វើកិច្ចព្រមព្រៀងទិញ-លក់ក្នុងពិធីបង្ហាញយន្តហោះលើកនេះ ក្នុងទំហំទឹកប្រាក់៩.០០០លានដុល្លារអាមេរិក ។

គួរបញ្ជាក់ថា ឥណ្ឌា គឺជាប្រទេសមួយក្នុងចំណោមប្រទេសនាំចេញអាវុធធំបំផុតរបស់ពិភពលោក អស់រយៈពេលជាច្រើនឆ្នាំមកហើយ ប៉ុន្តែឥណ្ឌាមិនបានស្ថិតនៅជួរមុខក្នុងទីផ្សារនាំចេញអាវុធនោះទេ ហើយឥណ្ឌាបានព្យាយាមប្រើប្រាស់ព័ត៌មានការនាំចូលអាវុធ ដើម្បីទាក់ទាញការវិនិយោគពីបរទេសមកក្នុងឧស្សាហកម្មរបស់ខ្លួន ៕ ប្រភព ៖ NationWorldNews