ប្រទេសថៃ ៖ តម្លៃប្រេងឥន្ធនៈក្នុងប្រទេសថៃនឹងធ្លាក់ចុះ បន្ទាប់ពីគណៈកម្មការគ្រប់គ្រងនយោបាយថាមពលត្រៀមកាត់បន្ថយថ្លៃដើមទីផ្សារប្រេងឥន្ធនៈ ហើយសង្ឃឹមថា នឹងអាចបញ្ចុះតម្លៃប្រេងសម្រាប់ការលក់រាយជួយដល់ពលរដ្ឋរបស់ខ្លួន ។

កាលពីថ្ងៃទី១៤ ខែកុម្ភៈ ក្នុងកិច្ចប្រជុំរបស់គណៈកម្មការគ្រប់គ្រងនយោបាយថាមពល ដែលមានលោក សុផាត់ថាណាផុង ផាន់មីឆាវ ឧបនាយករដ្ឋមន្ត្រី និងរដ្ឋមន្ត្រីក្រសួងថាមពល ធ្វើជាប្រធានកិច្ចប្រជុំ បានថ្លែងថា ស្ថានការណ៍តម្លៃប្រេងម៉ាស៊ូតក្នុងពិភពលោកមាននិន្នាការធ្លាក់ចុះនាពេលកន្លងមក ហើយគណៈរដ្ឋមន្ត្រីបានចាត់វិធានការកាត់បន្ថយពន្ធលើប្រេងម៉ាស៊ូត ដោយរក្សាតម្លៃបង់ពន្ធត្រឹម១,៣៤បាត/១លីត្រ រហូតដល់ថ្ងៃទី២០ ខែឧសភា ឆ្នាំ២០២៣ ។

ក្នុងកិច្ចប្រជុំនេះ គណៈកម្មការគ្រប់គ្រងនយោបាយថាមពលបានសម្រេចគ្នាដោះស្រាយអនុម័តតម្លៃប្រេងឥន្ធនៈសមស្របមួយ ដោយកែតម្រូវតម្លៃប្រេងឥន្ធនៈក្នុងទីផ្សារមកសភាពធម្មតាវិញដូចឆ្នាំ២០២០ ក្នុងនោះមាន ប្រេងម៉ាស៊ូត និងប្រេងសាំង ។ ជាលទ្ធផល ប្រាក់ចំណូលរបស់មូលនិធិប្រេងពីប្រេងម៉ាស៊ូត ត្រូវបានកាត់បន្ថយប្រមាណ៣៧,២៣លានបាត/១ថ្ងៃ (ឬប្រមាណ១១១៧លានបាត/១ខែ) ។ ហេតុនេះ វានឹងធ្វើឱ្យតម្លៃលក់រាយសម្រាប់ប្រេងសាំងធ្លាក់ចុះប្រមាណ០,៩០ ទៅ១,២០បាត/១លីត្រ ដោយអនុវត្តចាប់ពីថ្ងៃទី១៥ ខែកុម្ភៈ ឆ្នាំ២០២៣ តទៅ ។

គណៈកម្មការគ្រប់គ្រងនយោបាយថាមពលបានផ្តល់សិទ្ធិទៅឱ្យលេខាធិការទំនាក់ទំនងជាមួយការិយាល័យមូលនិធិប្រេងឥន្ធនៈ ដើម្បីបង្ហាញជូនក្រុមប្រឹក្សាភិបាលមូលនិធិប្រេងឥន្ធនៈ ក្នុងការគ្រប់គ្រងអត្រាមូលនិធិប្រេង ដើម្បីឱ្យតម្លៃលក់នៅក្នុងទីផ្សារ រួមមាន ប្រេងម៉ាស៊ូត និងប្រេងសាំង ស្របតាមការឯកភាពគ្នាក្នុងកិច្ចប្រជុំរបស់គណៈកម្មការគ្រប់គ្រងនយោបាយថាមពល ៕ ប្រភព ៖ topnews

មន្ត្រីយោធាពីរនាក់បានស្លាប់ បន្ទាប់ពីរថក្រោះធុនស្រាល Scorpion របស់ពួកគេក្រឡាប់ អំឡុងពេលធ្វើសមយុទ្ធនៅឯបន្ទាយកងទ័ពក្នុងទីក្រុង Lopburi កាលពីព្រឹកថ្ងៃអង្គារ។

ហេតុការណ៍នេះ បានកើតឡើងដោយសារតែ រថក្រោះព្យាយាម​គេច​ពី​រថយន្ត​យោធា​នៅ​ផ្លូវ​កោង​ខ្លាំង រួចក៏ទៅបុកពំនូកដី បណ្តាលឱ្យក្រឡាប់តែម្តង។

មន្ត្រី​ពីរ​នាក់​ក្នុង​ចំណោម​មន្ត្រី​ទាំង​បី​នាក់​ដែល​ស្ថិត​ក្នុង​រថក្រោះ ជា​សេនាធិការ​ថ្នាក់​ទី១ និង​នាយទាហាន​ម្នាក់​បាន​ស្លាប់ និងរងរបួស​ធ្ងន់ម្នាក់។ ​

សមយុទ្ធនេះ ត្រូវបានធ្វើឡើងដោយកងពលធំទ័ពសេះទី២ នៃកងអង្គរក្ស ដើម្បីធានាប្រសិទ្ធភាពក្នុងប្រតិបត្តិការបង្ការ និងកាត់បន្ថយគ្រោះមហន្តរាយ៕

ប្រភព៖ National Thailand

សហរដ្ឋអាមេរិក ៖ បន្ទាប់ពីវត្ថុចម្លែកហោះចូលមកដែនអាកាសអាមេរិកខាងជើងជាច្រើនលើកកាលពី២សប្តាហ៍មុន ហើយអាមេរិកក៏តបតវិញជាបន្តបន្ទាប់ គឺបញ្ជាឱ្យយន្តហោះចម្បាំងវាយប្រហារដោយគ្រាប់រ៉ុក្កែត រហូតបណ្តាលឱ្យទូទាំងពិភពលោកភ័យស្លន់ស្លោ និងមានពាក្យចចាមអារ៉ាមផ្សេងៗ ក្រោយពីមន្ត្រីជាន់ខ្ពស់ក្រសួងការពារជាតិអាមេរិកខ្លួនឯងក៏បាននិយាយថា មិនច្បាស់ថា វត្ថុទាំងនេះជាអ្វី ធ្វើឱ្យគេនិយាយថា វាមកពីក្រៅភព ។

អ្នកនាំពាក្យក្រុមប្រឹក្សាសន្តិសុខជាតិអាមេរិក លោក John Kirby បញ្ជាក់ថា ៖ «យើងមិនទាន់អាចប៉ាន់ស្មានច្បាស់លាស់ថា វត្ថុទាំងនេះជាអ្វីឱ្យប្រាកដ ប៉ុន្តែវាមើលទៅមិនដូចធម្មជាតិទេ ខ្ញុំគិតថា ពលរដ្ឋអាមេរិកមិនបាច់បារម្ភពីវាថា ជា Alien ទេ» ។

អ្នកនាំពាក្យសេតវិមាន លោកស្រី Karine Jean-Pierre បានថ្លែងទៅកាន់សារព័ត៌មានថា ៖ «ក្នុងការវាយប្រហារជាច្រើនលើកកន្លងមក នៅមិនទាន់មានអ្វីបញ្ជាក់ថា វត្ថុនេះគឺ Alien ឬមានឥរិយាបថប្លែកដូចធម្មជាតិ» ។

បើទោះជាមន្ត្រីសន្តិសុខជាតិបដិសេធព័ត៌មានក្តី ប៉ុន្តែរហូតមកដល់ពេលនេះ គេក៏នៅតែមិនអាចពិសោធន៍បានថា វត្ថុទាំងនេះជាអ្វីទេ ។ ក្រសួងការពារជាតិអាមេរិកបានផ្តល់ព័ត៌មានបន្ថែមអំពីវត្ថុដែលបានបាញ់ធ្លាក់ដូចជា វាមានទំហំស្មើនឹងរថយន្តតូច ដែលហោះនៅលើអាកាសក្នុងកម្ពស់១.២២០០ម៉ែត្រ មិនអាចផ្លាស់ទីបាន និងគ្មានមនុស្សបញ្ជា ។

អ្នកនាំពាក្យក្រុមប្រឹក្សាសន្តិសុខជាតិ លោក John Kirby ថ្លែងបន្តថា ៖ «វាគ្មានការបញ្ជាណាមួយទេ ហើយក៏គ្មានប្រព័ន្ធផ្លាស់ទីដែរ ។ ការសន្និដ្ឋានពេលនេះ គឺវាបានអណ្តែតទៅមកតាមខ្យល់» ។

ទោះយ៉ាងណា មនុស្សចំនួនថា វត្ថុនេះពាក់ព័ន្ធនឹងបាឡុងស៊ើបការណ៍របស់ចិន ដែលត្រូវអាមេរិកបាញ់ធ្លាក់កាលពីដើមខែកុម្ភៈ ប៉ុន្តែគ្មានប្រទេសណាមួយទទួលស្គាល់វាជារបស់ខ្លួនទេ ខណៈចិនបញ្ជាក់ថា ចិនមិនដឹងរឿងវត្ថុនេះទេ ចិនគ្រាន់តែបានបង្ហោះបាឡុងលើកដំបូងប៉ុណ្ណោះ ហើយបាឡុងនេះគ្រាន់តែជាកម្មសិទ្ធឯកជន ។

មន្ត្រីក្រសួងការពារជាតិមួយរូបមិនបញ្ចេញឈ្មោះនិយាយថា កងទ័ពរកមិនឃើញភស្តុតាងទេ ដូច្នេះបង្ហាញថា វត្ថុខាងលើនេះមនុស្សក្រៅភពបញ្ជូនមក ។ វាមានរាង៨ជ្រុង មានខ្សែ១ព្យួរ និងមិនអាចពិនិត្យទម្ងន់ទេ ៕

ប្រភព ៖ TNN Tech

សហរដ្ឋអាមេរិក ៖ កាលពីថ្ងៃទី១៣ ខែកុម្ភៈ មានអ្នកស្លាប់យ៉ាងតិច៣នាក់ និងរងរបួស៥នាក់ក្នុងហេតុការណ៍បាញ់ប្រហារមួយនៅសាកលវិទ្យាល័យ Michigan សហរដ្ឋអាមេរិក ហើយអ្នករងរបួសទាំង៥នាក់ត្រូវបានគេបញ្ជូនទៅកាន់មន្ទីរពេទ្យហើយ ។

ប៉ូលិសបញ្ជាក់ថា ជនសង្ស័យបានស្លាប់ដោយសារគ្រាប់កាំភ្លើង ដែលគេគិតថា ជាការបាញ់ខ្លួនឯង ហើយនៅមិនទាន់ជ្រាបទេថា ជននោះជាអ្នកណា ។ អ្នកលេង Twitter បានចែកចាយរូបភាពបុរសម្នាក់កំពុងដើរជាមួយនឹងកាបូបស្ពាយនៅពីក្រោយ ដែលអាចជាជនសង្ស័យ និងរូបភាពនិស្សិតរៀននៅសាកលវិទ្យាល័យម្នាក់ពាក់អាវយឺតសរសេរថា «Oxford» ដើម្បីរំលឹកដល់ជនរងគ្រោះដោយសារគ្រាប់កាំភ្លើងក្នុងហេតុការណ៍បាញ់ប្រហារមួយនៅសាលារៀនឈ្មោះ Oxford ក្នុងរដ្ឋ Michigan កាលពីថ្ងៃទី៣០ ខែវិច្ឆិកា ឆ្នាំ២០២១ ។

អ្នកបានឃើញហេតុការណ៍ម្នាក់ប្រាប់ថា ឃើញរថយន្តពេទ្យ និងរថយន្តពន្លត់អគ្គិភ័យ ដំបូងរូបគេគិតថា មានហេតុការណ៍ភ្លើងឆេះ បន្ទាប់មកឃើញរថយន្តប៉ូលិសជាច្រើនគ្រឿង ដែលប៉ូលិសប្រដាប់ដោយអាវុធបានបំបែកគ្នាចូលទៅកាន់កន្លែងនោះ ទើបគេជឿថា មានហេតុការណ៍បាញ់គ្នាកើតឡើង ។

ខាងសាកលវិទ្យាល័យបានផ្ញើសាដាស់តឿនទៅកាន់និស្សិតរបស់ខ្លួនថា មានហេតុការណ៍បាញ់គ្នា ធ្វើឱ្យនិស្សិតប្រញាប់បិទទ្វារ និងបង្អួច ខណៈរថយន្តប៉ូលិសបើកចូលមកជាបន្តបន្ទាប់ប្រមាណជា៣០គ្រឿង ។ យោងតាមវែបសាយរបស់សាកលវិទ្យាល័យបង្ហាញថា មាននិស្សិតកំពុងសិក្សានៅសាកលវិទ្យាល័យនេះចំនួន៥ម៉ឺននាក់៕

ប្រភព ៖ NationWorldNews

ប្រទេសឥណ្ឌា ៖ ប្រទេសឥណ្ឌាបានបង្ហាញពីគម្រោងផ្លូវល្បឿនលឿនមាន៨គន្លង មានប្រវែងសរុប១.៣៨៦គីឡូម៉ែត្រ ដែលតភ្ជាប់ពីក្រុងញូវដែលីទៅកាន់ក្រុងបុមបៃ ។ នៅពេលកសាងរួចរាល់ វានឹងជួយកាត់បន្ថយរយៈពេលធ្វើដំណើររវាងទីក្រុងទាំងពីរនៅសល់ត្រឹមតែ១២ម៉ោងប៉ុណ្ណោះ ខណៈការធ្វើដំណើរពីមុនត្រូវចំណាយពេលរហូតដល់២៤ម៉ោង ។

កាលពីថ្ងៃទី១២ ខែកុម្ភៈ កន្លងមក លោកនាយករដ្ឋមន្ត្រីប្រទេសឥណ្ឌា ណារិនដ្រា ម៉ូឌី បានធ្វើជាប្រធានក្នុងពិធីសម្ពោធផ្លូវល្បឿនលឿនដំណាក់កាលដំបូង ដែលមានចម្ងាយ២៤៦គីឡូម៉ែត្រតភ្ជាប់ពីក្រុងញូវដែលីទៅកាន់ក្រុងជ័យប៊ូរ៉ាក់ រដ្ឋរ៉ាហ្សាស្ថាន ជាទីក្រុងទេសចរណ៍ដ៏ពេញនិយម ។

គម្រោងនេះ គឺជាផ្នែកមួយនៃការព្យាយាមរបស់ប្រទេសឥណ្ឌាក្នុងការអភិវឌ្ឍហេដ្ឋារចនាសម្ព័ន្ធរបស់ខ្លួនឱ្យស្មើគ្នាជាមួយគូប្រជែងដូចជា ចិន ។ ឥណ្ឌាជាប្រទេសធំមួយ ហើយមានសេដ្ឋកិច្ចលូតលាស់យ៉ាងឆាប់រហ័ស ប៉ុន្តែប្រព័ន្ធហេដ្ឋារចនាសម្ព័ន្ធក្នុងប្រទេសនេះនៅពីក្រោយចិន ។ ហេតុនេះ ឥណ្ឌាបានជំរុញដំណើរការគម្រោងសំខាន់ៗជាច្រើន ដោយរដ្ឋាភិបាលបានប្រកាសបន្ថែមប្រាក់ដើម្បីគាំទ្រការអភិវឌ្ឍគម្រោងហេដ្ឋារចនាសម្ព័ន្ធ៣៣%ទៀត ដែលជាតួលេខខ្ពស់មិនធ្លាប់មានពីមុនមក ។

ក្រៅពីនេះ គេសង្ឃឹមថា មេដឹកនាំឥណ្ឌានឹងបើកគម្រោងផ្លូវដែកធំៗ ផ្លូវជាតិ និងផ្លូវទឹក យ៉ាងតិច១២គម្រោងបន្ថែមទៀតក្នុងរយៈពេលឆាប់ៗនេះ ៕

ប្រភព ៖ PPTVHD36

រដ្ឋធានីកៀវ៖ សង្គ្រាមឈ្លានពានរបស់ប្រធានាធិបតីរុស្ស៊ី លោក វ៉្លាឌីមៀ ពូទីន បានអូសបន្លាយ អស់រយៈពេល៣៥៦ថ្ងៃមកហើយ គិតត្រឹម ថ្ងៃទី១៤ ខែកុម្ភៈ ឆ្នាំ២០២៣ ខណៈការវាយប្រយុទ្ធគ្នាកំពុងតែបន្ដ ហើយសង្គ្រាមនេះ បាន និង កំពុងតែបង្កនូវមហាវិនាសកម្មយ៉ាងធ្ងន់ធ្ងរ នៅក្នុងប្រទេសអ៊ុយក្រែន ប៉ុន្ដែគេនៅតែមិនទាន់ដឹង ថា ជម្លោះដ៏ធំ រវាងប្រទេសជិតខាងទាំង២នេះ នឹងត្រូវបញ្ចប់ នៅពេលណានោះដែរ។

សារព័ត៌មាន Defense News បានចេញផ្សាយ កាលពីថ្ងៃអង្គារ ទី១៤ ខែកុម្ភៈ ថា នៅដើមឆ្នាំ២០២៣នេះ អាល្លឺម៉ង់ បានសន្យាផ្ដល់រថក្រោះ Leopard ជាច្រើនគ្រឿង ជួយដល់ប្រទេសអ៊ុយក្រែន។ ការសម្រេចចិត្តរបស់ក្រុងប៊ែរឡាំង ក៏ជាការបើកផ្លូវ ដល់សម្ពន្ធមិត្តដទៃទៀត មានសិទ្ធិផ្ដល់រថក្រោះ ផលិតដោយអាល្លឺម៉ង់ សម្រាប់បញ្ជូនទៅកាន់ប្រទេសអ៊ុយក្រែន។

ជាការពិតណាស់ ក្រោយពេលរុស្ស៊ី បានចូលឈ្លានពាន ទៅលើទឹកដីរបស់អ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ សម្ពន្ធមិត្តរបស់ក្រុងកៀវ បានទប់ទល់នឹងការអង្វរ សម្រាប់ជំនួយរថក្រោះប្រយុទ្ធធុនធ្ងន់។ លោកខាងលិច បានធ្វើតាម ត្រឹមតែក្នុងន័យតូចចង្អៀត សម្រាប់ការផ្ដល់ឧបករណ៍ការពារ ជួយដល់ក្រុងកៀវ។ កាលពីដំបូងឡើយ មេដឹកនាំក្រុងប៊ែរឡាំង បានគេច ចេញពីជំនួយមិនសមនឹងនិយមន័យរបស់អាល្លឺម៉ង់ សម្រាប់កិច្ចការពារ ជួយដល់ប្រទេសអ៊ុយក្រែន។

ជាមួយគ្នានេះ សម្ពន្ធមិត្តលោកខាងលិច បានរិះគន់ផង និង អំពាវនាវផង ដល់អាល្លឺម៉ង់ ដើម្បីបញ្ចេញរថក្រោះប្រយុទ្ធធុនធ្ងន់ Leopard 2 ទៅជួយដល់អ៊ុយក្រែន។ ប៉ុន្ដែរហូតដល់ដំណាក់ កាលចុងក្រោយបង្អស់ ទើបលោក អូឡាហ្វ សូលហ្ស៍ (Olaf Scholz) អធិការបតីអាល្លឺម៉ង់ បានសម្រេច ផ្ដល់រថក្រោះប្រយុទ្ធរបស់ខ្លួន ទៅជួយដល់ក្រុងកៀវ ដើម្បីវាយបណ្ដេញកម្លាំងទាហានរុស្ស៊ី ចេញពីទឹកដីរបស់អ៊ុយក្រែន។

ឥឡូវនេះ ការប្រមូលផ្ដុំរថចម្បាំង ជាប្រភេទរថក្រោះរបស់លោកខាងលិច គ្រោងនឹងទៅដល់សមរភូមិ នៅនិទាឃរដូវនេះ។ ជាមួយគ្នានេះ បណ្ដាប្រទេសជាម្ចាស់ជំនួយគ្រឿងយុទ្ធោបករណ៍ទាំងនោះ កំពុងតែបណ្តុះបណ្តាល អំពីរៀបប្រើប្រាស់ និង ការថែទាំរថក្រោះរបស់ពួកគេ ដល់កងទ័ពរបស់អ៊ុយក្រែន។ គ្រឿងចម្បាំងទាំងនោះ នឹងផ្ដល់ក្ដីសង្ឃឹមបន្ថែមទៀត សម្រាប់កងទ័ពការពារទឹកដីរបស់ក្រុងកៀវ នៅលើសមរភូមិ ប្រយុទ្ធជាមួយនឹងកម្លាំងទាហានរុស្ស៊ី ដើម្បីឈានដល់ការបញ្ចប់សង្រ្គាម ប្រសិនបើអាវុធទំនើបៗទាំងនោះ មកដល់ទាន់ពេលវេលា។

លោក អូឡាហ្វ សូលហ្ស៍ អធិការបតីអាល្លឺម៉ង់ បានប្រាប់ដល់កាសែតតាហ្គេសស្ពៀហ្គែល ( Tagesspiegel) ថា គាត់ចង់ឲ្យប្រធានាធិបតីរុស្ស៊ី លោក វ៉្លាឌីមៀ ពូទីន ឆ្លើយនូវសំណួរមួយ ថាតើពិភពលោកអាចចាកចេញ ពីស្ថានភាពដ៏អាក្រក់បែបនេះ ដោយរបៀបណា?

ស្របគ្នានេះ សារព័ត៌មាន Defense News បាននិយាយជាមួយនឹងក្រុមអ្នកវិភាគសន្ដិសុខ តំណាងរាស្រ្ដ និង ក្រុមមន្រ្ដីចូលនិវត្ដន៍ជាច្រើន ដោយសួរពួកគាត់ម្នាក់ៗ អំពីជម្លោះអាចនឹងត្រូវបានបញ្ចប់។ ប៉ុន្ដែចម្លើយរបស់ក្រុមអ្នកជំនាញទាំងនោះ នៅតែស្រពិចស្រពិល ដោយគ្រាន់តែឆ្លើយ ថា សង្រ្គាមនឹងចំណាយអស់ច្រើន ធ្វើឱ្យជីវិតមនុស្សបាត់បង់ជីវិត ហើយទំនងជាមានរយៈពេលយ៉ាងហោចណាស់ពីរទៅបីឆ្នាំ ឬ ក្លាយទៅជាសម័យអន្តរកាល។ សង្គ្រាម នឹងដាក់បន្ទុកទៅលើឧស្សាហកម្មការពារជាតិអាមេរិក និង អឺរ៉ុប ជាពិសេស នៅពេលនិយាយ អំពីគ្រាប់បែក ហើយវាអាចបង្កឱ្យខូចដល់សេដ្ឋកិច្ច នៅក្នុងប្រទេសរុស្ស៊ី។ បញ្ហាទាំងអស់នេះ ក៏នឹងកើតឡើង ស្របពេលមានលទ្ធភាពកើនឡើង នៃការប្រើប្រាស់អាវុធនុយក្លេអ៊ែរ នៅតែមាន។

ក្រុមអ្នកជំនាញ បានបញ្ជាក់ ថា លទ្ធភាព នៃការឈ្នះសង្គ្រាម នឹងពឹងផ្អែកទៅលើសភាទាំងរបស់សហរដ្ឋអាមេរិក ជាមួយការសម្រេចចិត្ត ដើម្បីធ្វើឲ្យប្រាកដនូវនិរន្ដរភាព ជួយកិច្ចគាំទ្រ ដល់អ៊ុយក្រែន។ ប៉ុន្តែបើទោះជាយ៉ាងក៏ដោយ ក្រុមអ្នកជំនាញ បានព្រមាន ថា គំនិតនៃជ័យជម្នះ អាចមានភាពមិនប្រាកដប្រជា។

លោកឧត្តមសេនីយ៍ ម៉ាក មីលឡេ (Mark Milley) នាយអគ្គសេនាធិការចម្រុះ នៃកងទ័ពសហរដ្ឋអាមេរិក បានប្រាប់ដល់ក្រុមអ្នកយកព័ត៌មាន ថា «សម្រាប់ឆ្នាំនេះ វាពិតជាលំបាកខ្លាំងណាស់ នៅក្នុងការបណ្តេញកងកម្លាំងរុស្ស៊ី ចេញពីគ្រប់ទិសទី នៅក្នុងប្រទេសអ៊ុយក្រែន ឬ ទឹកដីរបស់អ៊ុយក្រែន ដែលរុស្ស៊ីបានកាន់កាប់។ ចំណែកដំណើរទស្សនកិច្ចទៅកាន់ប្រទេសអាល្លឺម៉ង់ កាលពីខែមុននោះ មិនមែនមានន័យថា វាមិនអាចកើតឡើងទេ ហើយក៏មិនមែនមានន័យ ថា វានឹងមិនកើតឡើងនោះដែរ ប៉ុន្តែវានឹងពិបាកខ្លាំងណាស់»។

លោកនាយអគ្គសេនាធិការចម្រុះ កងទ័ពសហរដ្ឋអាមេរិក បានសង្កត់ធ្ងន់ ថា សង្រ្គាមទំនងជានឹងបញ្ចប់ នៅតុចរចា ដោយដោះស្រាយ នៅត្រង់ចំណុចណាមួយ។ រីឯក្រុមមន្ត្រី និង អ្នកជំនាញ រំពឹង ថា នឹងមានរដូវបង្ហូរឈាម ខណៈរុស្ស៊ី កំពុងតែបញ្ជូនទាហាន ទើបនឹងកេណ្ឌមកថ្មី នាំទៅកាន់សមរភូមិជួរមុខ ហើយអ៊ុយក្រែន កំពុងតែព្យាយាមវាយលុក ស្របពេលពួកគេកំពុងតែបន្តប្រតិបត្តិការ។

ក្រុមអ្នកវិភាគរបស់សហរដ្ឋអាមេរិក និង អឺរ៉ុប បានព្យាករ ប្រហាក់ប្រហែលគ្នា ថា សង្គ្រាមនេះមិនអាចកំណត់ អំពីពេលវេលា នឹងត្រូវបញ្ចប់បាននោះទេ។ សង្គ្រាមនេះ អាចនឹងអូសបន្លាយ អស់រយៈពេលយូរខែ ឬ ច្រើនឆ្នាំ៕