ភាពយន្តបែបវិទ្យាសាស្ត្រឌីជីថល Sci-Fi ដែលមានចំណងជើងថា “ជាតិក្រោយ” គឺជារឿងដំបូងគេបង្អស់នៅកម្ពុជាដែលឆ្លុះបញ្ចាំងពីភាពរីកចម្រើននាពេលអនាគតដោយប្រើបច្ចេកវិទ្យាបែប AR នឹងចាក់បញ្ចាំងឱ្យទស្សនានៅក្នុងប្រទេសកម្ពុជានៅថ្ងៃទី ១៧ កុម្ភៈ ២០២៣ នេះ។
ភាពយន្តមួយនេះផលិតដោយផលិតករកុនអាមេរិក Jake Wachtel នៅពេលដែលលោកបានធ្វើដំណើរមកប្រទេសកម្ពុជា និងបានចាប់អារម្មណ៍ពីជំនឿដ៏មុតមាំក្នុងព្រះពុទ្ធសាសនារបស់ប្រជាជនខ្មែរ និងបានសហការផលិតជាមួយផលិតករ សុខ វិសាល ដែលជាស្ថាបនិកនៃ 802 Films ។
ខ្សែភាពយន្តបែប Sci-Fi ដំបូងរបស់កម្ពុជាមួយនេះ បាននិទានឱ្យដឹងពីសាច់រឿងនៃសុបិននិមិត្តរបស់កុមារ ហេង ឡេង ដែលមានវ័យ ១៣ឆ្នាំ រស់នៅក្នុងសហគមន៍ក្រីក្រត្រឡោកបែកជាមួយបងស្រី និងម្ដាយ។ កុមាររូបនេះ តែងតែសុបិនឃើញជាតិមុនរបស់ខ្លួនឯង ប៉ុន្តែមានរូបភាពខ្លះក៏ស្ថិតនៅក្នុងការចងចាំ និងរូបភាពខ្លះទៀតរលុបបាត់។ ក្មេងប្រុសរូបនេះតែងតែគូរពីរូបភាពជាតិមុនរបស់ខ្លួន ឱ្យមិត្តភ័ក្ដិ និងគ្រួសារបានឃើញ តែហាក់ដូចគ្មានអ្នកចាប់អារម្មណ៍ចង់ដឹងច្បាស់ពីការចាំជាតិរបស់ក្មេងប្រុសនេះឡើយ។
តើសាច់រឿងវានឹងទៅជាយ៉ាងណាជាបន្តទៀត? កុំភ្លេចតាមដានទាំងអស់គ្នា! ដើម្បីកុំឱ្យខកខានទស្សនាភាពយន្តដ៏អស្ចារ្យប្រកបជាមួយនឹងឈុតឆាកដែលមានបច្ចេកវិទ្យាទំនើបៗ AR គឺមានបញ្ចាំងនៅថ្ងៃទី ១៧ ខែកុម្ភៈ នេះគ្រប់រោងភាពយន្តនៅកម្ពុជា៕
