ប្រទេសចិន ៖ ពលរដ្ឋចិនបាននាំគ្នាទៅឆេងម៉េងនៅក្នុងព្រៃដែលមានដើមឈើផ្តល់ម្លប់ត្រជាក់ ពីព្រោះពួកគេបានបញ្ចុះសពនៅក្រោមដើមឈើទាំងនេះ ។ បើគេធ្វើដំណើរទៅកាន់ជាយក្រុង Liaoyuan ខេត្ត Jilin ភាគឦសានប្រទេសចិន គេនឹងបានឃើញមនុស្សម្នាជាច្រើននាក់ធ្វើដំណើរមកសំពះបុព្វបុរសដែលបានចែកឋានទៅ ដោយសារគេបានយកសពមកកប់នៅក្រោមដើមឈើ ។

ក្នុងរយៈពេលប៉ុន្មានឆ្នាំកន្លងមក តំបន់ជាច្រើនរបស់ប្រទេសចិនបានបង្កើតគំនិតបញ្ចុះសពបែបថ្មីមួយគឺ «ជីវិតត្រឡប់ទៅរកផែនដីវិញ ហើយឆ្អឹងមនុស្សនឹងត្រឡប់ទៅធម្មជាតិវិញ» ។ ដូច្នេះ មានវិធីជាច្រើនដែលពលរដ្ឋចិនអាចជ្រើសរើសដើម្បីបញ្ចុះសព រួមទាំងការបញ្ចុះសពនៅក្រោមដើមឈើផងដែរ ដែលពលរដ្ឋចិនជាច្រើននាក់នាំគ្នាធ្វើ ។

នាយករងការិយាល័យរៀបចំពិធីបុណ្យសពនៅទីក្រុង Liaoyuan លើកឡើងថា បច្ចុប្បន្ន ពលរដ្ឋចិនជាច្រើននាក់មានបំណងប្រាថ្នាឱ្យកប់សពរបស់ខ្លួនតាមធម្មជាតិ នៅពេលពួកគេស្លាប់ទៅ ។ ហេតុនេះហើយ ទើបទីក្រុង Liaoyuan បានរៀបចំកន្លែងបញ្ចុះសពនៅក្រោមដើមឈើ ហើយស្របនឹងគំនិតការពារប្រព័ន្ធអេកូឡូស៊ី និងការអភិរក្សធនធានធម្មជាតិ ។

ការបញ្ចុះសពនៅក្រោមដើមឈើ គេបានប្រើប្រាស់កោដ្ឋដែលអាចរលាយបាន ហើយសាច់ញាតិអ្នកស្លាប់អាចជ្រើសរើសដើមឈើណាដែលពួកគេពេញចិត្ត ដើម្បីយកកោដ្ឋទៅកប់ក្រោមដើមឈើនោះ និងបណ្តោយឱ្យកោដ្ឋរលាយក្នុងដីតាមធម្មជាតិ ។ ហេតុនេះ ដើមឈើនីមួយៗនឹងក្លាយជាផ្នូរសព ។

តាមសេចក្តីរាយការណ៍បញ្ជាក់ថា ប្រទេសចិនមានផ្ទៃដីបញ្ចុះសពនៅក្រោមដើមឈើប្រមាណ១២,៤ហិកតា និងមានដើមឈើចំនួន២៤.០០០ដើម ។ ចាប់តាំងពីឆ្នាំ២០១៦ រហូតមកដល់បច្ចុប្បន្ន គេបានបញ្ចុះសពចំនួន១.១២៦សពនៅក្រោមដើមឈើទាំងនេះ ៕ ប្រភព ៖ environman

ប្រទេសថៃ ៖ កាលពីថ្ងៃទី៦ ខែមេសា កន្លងមក លោក Nirat Pongsitthaworn អភិបាលខេត្តឈៀងម៉ៃ បានចេញសេចក្តីប្រកាសមួយសុំកិច្ចសហការពីរដ្ឋាភិបាល និងផ្នែកឯកជនឱ្យបុគ្គលិកទាំងអស់ធ្វើការពីផ្ទះរបស់ខ្លួន (work from home) ដើម្បីកាត់បន្ថយផលប៉ះពាល់សុខភាព ខណៈខេត្តឈៀងម៉ៃមានបរិយាកាសកខ្វក់កាន់តែធ្ងន់ធ្ងរ ។ លើសពីនេះ លោកអភិបាលខេត្តក៏បានសំណូមពរទៅកាន់ពលរដ្ឋទាំងអស់ត្រូវពាក់ម៉ាស់ការពារធូលីផងដែរ នៅពេលចេញទៅក្រៅ ។

នៅក្នុងសេចក្តីប្រកាសនេះ លោក Nirat Pongsitthaworn បានថ្លែងថា ៖ «សូមមន្ត្រីរដ្ឋាភិបាលគ្រប់ស្ថាប័នទាំងអស់រៀបចំប្រព័ន្ធការងារធ្វើការពីផ្ទះ សម្រាប់ការងារណាមិនទាក់ទងនឹងការផ្តល់សេវាកម្មសាធារណៈ ហើយបើរៀបចំការប្រជុំ គឺត្រូវតែប្រជុំតាមប្រព័ន្ធអេឡិចត្រូនិក» ។

លោកអភិបាលខេត្តបន្តថា ៖ «សូមកិច្ចសហការជាមួយក្រុមហ៊ុន ហាង និងគ្រឹះស្ថាននានា ពិចារណាអនុញ្ញាតឱ្យបុគ្គលិករបស់ខ្លួនធ្វើការនៅផ្ទះ ឬធ្វើការតាមបណ្តាញអនឡាញសម្រាប់ផ្នែកមិនប៉ះពាល់ដល់អាជីវកម្មរបស់ក្រុមហ៊ុន ដើម្បីកាត់បន្ថយការចេញក្រៅផ្ទះ» ។

ក្នុងសេចក្តីប្រកាសនេះ ក៏មានវិធានការផ្សេងៗផងដែរ គឺការណែនាំឱ្យពលរដ្ឋពាក់ម៉ាស់ដើម្បីការពារធូលីកខ្វក់ និងស្នើឱ្យពលរដ្ឋងាយឆ្លងរោគ (មានមនុស្សចាស់ និងកុមារ) ត្រូវកាត់បន្ថយ ឬមិនចេញក្រៅផ្ទះ ។ ការស្នើសុំហាមចេញពីផ្ទះនេះមានរយៈពេល១ថ្ងៃ គឺថ្ងៃទី៧ ខែមេសា ហើយសេចក្តីប្រកាសនេះបញ្ជាក់ថា បើបរិយាកាសនៅតែកខ្វក់មិនធូរស្រាលទេ ខេត្តឈៀងម៉ៃនឹងចេញសេចក្តីប្រកាសបន្ថែមទៀត ។

នៅតាមបណ្តាខេត្តភាគខាងជើងប្រទេសថៃបានប្រឈមនឹងបរិយាកាសកខ្វក់អស់ជាច្រើនខែមកហើយ ហើយកាលពីពេលថ្មីៗនេះ បរិយាកាសកាន់តែអាក្រក់លើសដើមទៀត ។ បញ្ហាធូលីកខ្វក់បានធ្វើឱ្យពលរដ្ឋរស់នៅក្នុងខេត្តនេះប្រឈមនឹងការប៉ះពាល់សុខភាពជាខ្លាំង រីឯភ្ញៀវទេសចរបរទេស ក៏មិនចង់មកកម្សាន្តនៅខេត្តនេះដែរ ដោយពួកគេទៅកម្សាន្តនៅតំបន់មាត់សមុទ្រវិញ ៕ ប្រភព ៖ sanook

ដើមឈើជាង ១,៣០០ ដើមនៅលើផ្លូវ Mai Chi Tho ជិតព្រលានយន្តហោះ Tan Son Nhat ត្រូវបានកាប់បំផ្លាញ និងផ្លាស់ប្តូរទីតាំង ដើម្បីការងារសំខាន់ៗចំនួនពីរ។ 

កាលពីថ្ងៃទី៥ ខែមេសា តំណាងក្រុមហ៊ុន Ho Chi Minh City Green Park Company Limited បាននិយាយថា មានដើមឈើដួលរលំត្រូវកាប់ចោល និងត្រូវផ្លាស់ប្តូរទីតាំងជាង១ពាន់ដើមនៅកណ្តាលផ្លូវ និងចិញ្ចើមផ្លូវ Mai Chi Tho  ហើយត្រូវបានគេរំពឹងថានឹងបញ្ចប់នៅចុងខែមេសា។

ដើមឈើដែលដួលរលំត្រូវកាប់ចោល និងផ្លាស់ប្តូរទីតាំងជាង១ពាន់ដើមនោះមាន១៤ ប្រភេទ ដែលមានអាយុកាល ១៣ឆ្នាំ ដល់ជាង ២០ឆ្នាំ ។ ដើមឈើដែលអាចប្រើការបាន ត្រូវបានកាត់មែក និងកាត់ឬស ដើម្បីយកទៅបណ្តុះកូន មើលថែទាំមុនពេលដាំនៅកន្លែងផ្សេង ចំណែកដើមឈើមានសភាពទ្រុឌទ្រោមជាង២០០ដើមត្រូវកាប់ចោល។

ការរុះរើ និងកាប់ចោលដើមឈើ នៅលើបណ្តោយផ្លូវ Mai Chi Tho គឺធ្វើឡើងដើម្បីបើកការដ្ឋានសាងសង់ផ្លូវប្រសព្វ An Phu កម្ពស់បីជាន់នៅច្រកទ្វារខាងកើតនៃទីក្រុងហូជីមិញ ជាមួយនឹងទុនវិនិយោគសរុបចំនួន ៣,៤០០ ពាន់លានដុង។ ការសាងសង់នេះរួមមានផ្លូវរូងក្រោមដី២ និងស្ពានអាកាសចំនួន២៕ ប្រភព៖ vnexpress