សហរដ្ឋអាមេរិក ៖ កាលពីថ្ងៃទី៤ ខែមីនា អតីតប្រធានាធិបតីអាមេរិក លោក ដូណាល់ ត្រាំ បានប្រកាសក្នុងកិច្ចប្រជុំក្រុមអ្នកគាំទ្រអភិរក្សនិយមថា សង្គ្រាមលោកលើកទី៣ នឹងមិនកើតឡើងទេ បើលោកបានធ្វើជាមេដឹកនាំអាមេរិកម្តងទៀតនៅឆ្នាំ២០២៤ ព្រមទាំងនិយាយថា លោកនឹងអាចបញ្ចប់សង្គ្រាមនៅប្រទេសអ៊ុយក្រែនត្រឹមតែ១ថ្ងៃប៉ុណ្ណោះ ។

លោក ដូណាល់ ត្រាំ មានអាយុ៧៦ឆ្នាំ បានសន្យាថា លោក និងក្រុមអ្នកគាំទ្រអភិរក្សនិយម នឹងមិនបណ្តោយឱ្យគណបក្សសាធារណរដ្ឋត្រូវគ្រប់គ្រងដោយពួកឆ្កួត ហើយល្ងង់ ដែលដឹកនាំអាមេរិកចូលទៅពាក់ព័ន្ធក្នុងសង្គ្រាមនៅក្រៅប្រទេស ដែលមិនដឹងចប់ថ្ងៃណា ។

អតីតមេដឹកនាំអាមេរិករូបនេះលើកឡើងថា ទីក្រុងវ៉ាស៊ីនតោនគួរតែឈប់ចំណាយប្រាក់រាប់លានដុល្លារដើម្បីការពារប្រទេសអ៊ុយក្រែនទៀតទៅ ហើយបើលោកត្រូវបានគេជ្រើសរើសជាប្រធានាធិបតីអាមេរិក លោកនឹងធ្វើឱ្យសង្គ្រាមនៅអ៊ុយក្រែនបញ្ចប់ត្រឹមរយៈពេល១ថ្ងៃ និងអំពាវនាវឱ្យប្រទេសជាមិត្តក្នុងអង្គការសន្ធិសញ្ញាអាត្លង់ទិកខាងជើង (NATO) បង្កើនការចំណាយប្រាក់ក្នុងសង្គ្រាមផងដែរ ។

លោក ត្រាំ និយាយថា ៖ «អ្នកមិនអាចចំណាយប្រាក់រាប់លានដុល្លារអាមេរិកដើម្បីការពារក្រុមមនុស្សដែលមិនសូវចូលចិត្តអាមេរិកទេ ។ បើគិតពីផ្នែកអាជីវកម្មវិញ បើអ្នកយល់ព្រមចំណាយប្រាក់ដ៏ច្រើនបែបនេះ អ្នកត្រូវប្រាប់ពួកគេថា បើពួកគេឈ្នះសង្គ្រាម គឺត្រូវបែងចែកប្រទេសពួកគេពាក់កណ្តាលឱ្យអាមេរិក» ។

លោក ត្រាំ បន្តថា ៖ «មុននឹងខ្ញុំត្រឡប់ទៅធ្វើការនៅសេតវិមាន ខ្ញុំនឹងធ្វើឱ្យសង្គ្រាមរវាងរុស្ស៊ី និងអ៊ុយក្រែនឈានដល់ទីបញ្ចប់ ហើយវានឹងបញ្ចប់យ៉ាងឆាប់រហ័សផងដែរ ហើយខ្ញុំនឹងដោះស្រាយបញ្ហានេះដោយខ្លួនឯង គឺប្រើពេលមិនលើសពី១ថ្ងៃទេ» ។

អតីតមេដឹកនាំអាមេរិកក៏បានចោទប្រកាន់លោកប្រធានាធិបតី ចូ បៃដិន ផងដែរថា ជាឧក្រិដ្ឋជន ព្រមទាំងសួរថា ហេតុអ្វីបានជាណាតូមិនជួយចំណាយប្រាក់ក្នុងសង្គ្រាមនៅអ៊ុយក្រែន ឱ្យស្មើនឹងការចំណាយរបស់អាមេរិក ? លោក ត្រាំ ថា ៖ «យើងនឹងមិនត្រឡប់ទៅរកគណបក្សនយោបាយដែលចំណាយប្រាក់គ្មានដែនកំណត់ដើម្បីធ្វើសង្គ្រាមនៅក្រៅប្រទេសទេ ព្រោះវាជាសង្គ្រាមគ្មានថ្ងៃបញ្ចប់» ។

ទោះយ៉ាងណា នៅពេលលោក ត្រាំ បាននិយាយក្នុងកិច្ចប្រជុំ Conservative Political Action Conference គឺលោកមិនបានអះអាងថា លោកត្រូវបានគេលួចយកជ័យជម្នះក្នុងការបោះឆ្នោតកាលពីឆ្នាំ២០២០ ទៀតទេ ៕

ប្រភព ៖ The states times

រក្សាសិទ្ធដោយ KBN News

ប្រទេសកូរ៉េខាងត្បូង ៖ លោក Park Jin រដ្ឋមន្ត្រីក្រសួងការបរទេសកូរ៉េខាងត្បូង បានប្រកាសពីផែនការថ្មី ក្នុងការផ្តល់ប្រាក់សំណងដល់ជនរងគ្រោះដោយសារគេបង្ខំឱ្យប្រើប្រាស់កម្លាំងពលកម្ម និងធ្វើជាស្ត្រីបម្រើក្នុងអំឡុងពេលប្រទេសជប៉ុនកាន់កាប់អំណាចនៅកូរ៉េខាងត្បូងពីឆ្នាំ១៩១០ ដល់ឆ្នាំ១៩៤៥ ។

ការស្នើផ្តល់ប្រាក់សំណងនេះ នឹងមិនពាក់ព័ន្ធជាមួយក្រុមហ៊ុនរបស់ជប៉ុនទេ ពីព្រោះជាការស្នើសុំប្រាក់សំណងពីរដ្ឋាភិបាលកូរ៉េខាងត្បូងតែប៉ុណ្ណោះ ហេតុដូច្នេះហើយធ្វើឱ្យពលរដ្ឋកូរ៉េខាងត្បូងមួយចំនួនមិនពេញចិត្ត និងបានប្រមូលផ្តុំគ្នាតវ៉ាប្រឆាំងនៅមុខក្រសួងការបរទេស ។ ពួកគេនិយាយថា ការដែលរដ្ឋាភិបាលកូរ៉េខាងត្បូងមិនស្នើសុំឱ្យជប៉ុនចូលរួមផ្តល់សំណងនេះ គឺធ្វើឱ្យជប៉ុនទទួលបានជ័យជម្នះរួចទៅហើយ ។ បើទោះជារដ្ឋមន្ត្រីការបរទេសកូរ៉េខាងត្បូងបង្ហាញក្តីសង្ឃឹមថា ក្រុមហ៊ុនឯកជនជប៉ុននឹងស្ម័គ្រចិត្តចូលរួមផ្តល់ប្រាក់សំណងដែរ ។

ទោះយ៉ាងណា ផែនការផ្តល់ប្រាក់សំណងនេះបានទទួលការឆ្លើយតបជាវិជ្ជមាន ក្រោយពីរដ្ឋមន្ត្រីការបរទេសជប៉ុនបង្ហាញក្តីរីករាយជាមួយផែនការរបស់ខាងត្បូង ក្នុងការផ្តល់ប្រាក់សំណងលើការខូចខាតដល់ជនរងគ្រោះ ដែលជប៉ុនបានបង្ខំឱ្យប្រើប្រាស់កម្លាំងពលកម្មក្នុងពេលសង្គ្រាម ។ រដ្ឋមន្ត្រីការបរទេសជប៉ុនបញ្ជាក់ថា ការផ្តល់ប្រាក់សំណងលើកនេះនឹងជួយស្តារទំនាក់ទំនងឡើងវិញរវាងជប៉ុន និងកូរ៉េខាងត្បូង ក្រោយពីប្រទេសទាំងពីរមានភាពតានតឹងជាមួយគ្នាអស់រយៈពេលជាច្រើនឆ្នាំ ។

កាលពីឆ្នាំ២០១៥ កន្លងមក រដ្ឋាភិបាលជប៉ុនក្នុងសម័យគ្រប់គ្រងដោយលោក Shinzo Abe ដែលបានស្លាប់ទៅហើយនោះ បានសម្តែងការសូមទោសដោយស្មោះ ព្រមទាំងបង្ហាញការទទួលខុសត្រូវ ដោយផ្តល់ប្រាក់សំណងដល់ជនរងគ្រោះកូរ៉េខាងត្បូងក្នុងសង្គ្រាម ។ ក្រោយមក រដ្ឋាភិបាលកូរ៉េខាងត្បូងបញ្ជាក់ថា កិច្ចព្រមព្រៀងគ្នានេះចាត់ទុកថាបញ្ចប់ហើយ ហើយកូរ៉េខាងត្បូងនឹងមិននិយាយរឿងនេះទៀតទេនាពេលបច្ចុប្បន្ន ៕ ប្រភព ៖ Mono News

ប្រទេសចិន ៖ ក្រសួងហិរញ្ញវត្ថុចិនបានផ្សព្វផ្សាយពីរបាយការណ៍ក្នុងថ្ងៃដំបូងនៃកិច្ចប្រជុំសភាតំណាងរាស្ត្រថ្នាក់ជាតិប្រចាំឆ្នាំ (NPC) កាលពីថ្ងៃទី៥ ខែមីនាថា នឹងចំណាយប្រាក់លើផ្នែកការពារជាតិនៅឆ្នាំ២០២៣ ចំនួន២២ម៉ឺន៥ពាន់លានដុល្លារអាមេរិក កើនឡើង៧,២% ។

ថវិកាផ្នែកការពារជាតិរបស់ចិនចាត់ទុកថា គឺជាចំនួនច្រើនបំផុតស្ថិតក្នុងលំដាប់ទី២លើពិភពលោក បន្ទាប់ពីអាមេរិក ។ កាលពីឆ្នាំ២០២២ ថវិកាផ្នែកការពារជាតិរបស់ចិនស្មើប្រមាណតែ២១ម៉ឺនលានដុល្លារអាមេរិកប៉ុណ្ណោះ ។

អ្នកវិភាគអន្តរជាតិជាច្រើននាក់លើកឡើងថា ចិនបានចំណាយថវិកាផ្នែកការពារជាតិលើសពីចំនួនតួលេខដែលបានប្រកាសជាផ្លូវការ ។ ទោះយ៉ាងណា ថវិកាការពារជាតិនេះចាត់ទុកថា ជាចំនួនតិចបំផុតបើប្រៀបធៀបជាមួយអាមេរិក ដែលអាមេរិកបានកំណត់ថវិកាការពារជាតិនៅឆ្នាំ២០២៣នេះ ស្មើរហូតដល់៨០ម៉ឺនលានដុល្លារអាមេរិក ។

ទាក់ទងនឹងគោលនយោបាយផ្នែកការពារជាតិ លោកនាយករដ្ឋមន្ត្រី Li Keqiang ដែលកំពុងជិតចូលនិវត្តន៍បានថ្លែងក្នុងកិច្ចប្រជុំ NPC ថា ការព្យាយាមដាក់សម្ពាធពីខាងក្រៅ និងការគ្រប់គ្រងចិន កំពុងតែកើនឡើងជាបន្តបន្ទាប់ ។ លោកថ្លែងថា ៖ «កងទ័ពចិនគួរតែបង្កើនការហ្វឹកហាត់ និងត្រៀមខ្លួនឱ្យបានខ្លាំងក្លាជាងមុនដើម្បីតស៊ូក្នុងស្ថានការណ៍ប្រយុទ្ធគ្នា និងបង្កើនការងារផ្នែកកងទ័ពនៅគ្រប់ទិសទី» ។

លោកប្រធានាធិបតីចិន ស៊ី ជិនពីង ជាប្រធានក្នុងពិធីបើកកិច្ចប្រជុំសភាទាំងពីរ ដែលបានចាប់ផ្តើមការប្រជុំក្រុមប្រឹក្សានយោបាយនៃសាធារណរដ្ឋប្រជាមានិតចិន CPPCC នៅថ្ងៃទី៤ ខែមីនា បន្ទាប់មក បើកកិច្ចប្រជុំប្រចាំឆ្នាំរបស់សភាតំណាងរាស្ត្រ NPC នៅថ្ងៃទី៥ ខែកុម្ភៈ ក្នុងសាលប្រជុំនៅទីក្រុងប៉េកាំង ៕

ប្រភព ៖ TNN World

ក្មេងស្រីជនជាតិសិង្ហបុរីមួយរូប បានប្រឈមមុខនឹងការសើចចំអកតាមប្រព័ន្ធអ៊ីនធឺណិត ក្រោយពីរូបគេបង្ហោះវីដេអូទៅទិញកាបូបមួយម៉ាក Charles & Keith ដោយនាងចាត់ទុកថា Charles & Keith ជាម៉ាកប្រណីត។

ក្មេងស្រីនោះមានឈ្មោះថា Zoe Gabriel អាយុ១៧ឆ្នាំ បានបង្ហោះវីដេអូ TikTok ដែលខ្លួននាងទទួលបានកាបូប Charles & Keith ជាអំណោយពីឪពុករបស់នាង។ ដោយដាក់ចំណងជើងវីដេអូថា “កាបូបប្រណិតដំបូងរបស់ខ្ញុំ”។

វីដេអូនេះបានផ្សព្វផ្សាយពេញបណ្តាញសង្គម ដោយនាងទទួលបានការរិះគន់យ៉ាងខ្លាំង ពីសំណាកអ្នកលេងអុីតធើណេត ដោយគេចោទសួរថា “Charles & Keith ជាយីហោម៉ាកល្បី?” និងអ្នកខ្លះទៀតថា “គ្រាន់តែ Charles & Keith ថតបង្ហោះដែរ”។

ក្រោយពីរងការិះគណ់មិនបានយូរប៉ុន្មាន អគ្គនាយកក្រុមហ៊ុន Charles & Keith បានអញ្ជើញនាង និងឪពុករបស់គេ ទៅចូលរួមទទួលទានអាហារជាមួយគ្នា និងទៅទស្សនាទីស្នាក់ការកណ្តាលរបស់ក្រុមហ៊ុននៅប្រទេសសិង្ហបុរីថែមទៀត។

លើសពីនេះទៅទៀត អគ្គនាយកក្រុមហ៊ុន Charles & Keith ក៏បានផ្តល់ជាកិត្តិយសនៃទិវាសិទ្ធិនារីអន្តរជាតិជូនដល់ Gabriel ដោយឱ្យនាងក្លាយជាទូតសុឆន្ទៈ៕រក្សាសិទ្ធដោយ KBN News

ប្រទេសថៃ ៖ នៅថ្ងៃទី៦ ខែមីនា លោក អនុឆា ប៊ូរ៉ាផាឆៃស្រ៊ី អគ្គលេខាធិការរងនាយករដ្ឋមន្ត្រី ទទួលបន្ទុកកិច្ចការនយោបាយ និងជាអ្នកនាំពាក្យការិយាល័យនាយករដ្ឋមន្ត្រី បានថ្លែងថា Muay Thai គឺជាក្បាច់គុន និងការការពារខ្លួនដែលបង្ហាញពីអត្តសញ្ញាណតែមួយគត់របស់ថៃ ត្រូវបានដាក់បញ្ចូលជាកីឡាសម្រាប់ការប្រកួត European Games 2023 ដែលនឹងរៀបចំឡើងនៅប្រទេសប៉ូឡូញ នៅថ្ងៃទី២១ ខែមិថុនា រហូតដល់ថ្ងៃទី២ ខែកក្កដា ឆ្នាំ២០២៣ ។ ការដាក់បញ្ចូលនេះបង្ហាញឱ្យឃើញពីការពេញនិយមរបស់កីឡា Muay Thai នៅលើពិភពលោក និងជាជំហានទៅមុខដ៏សំខាន់ដើម្បីជំរុញឱ្យ Muay Thai ក្លាយជា Soft Power តាមគោលនយោបាយផ្សព្វផ្សាយ Soft Power 5 ប្រភេទ (5F) របស់រដ្ឋាភិបាលដើម្បីបន្ថែមតម្លៃសេដ្ឋកិច្ចដល់ប្រទេស ។

អ្នកនាំពាក្យការិយាល័យនាយករដ្ឋមន្ត្រីបន្តថា គណៈកម្មាធិការអូឡាំពិកអឺរ៉ុប (The European Olympic Committees: EOC) បានប្រកាសដាក់បញ្ចូលកីឡា Muay Thai សម្រាប់ការប្រកួត European Games 2023 ជាផ្លូវការ ព្រោះមើលឃើញថា Muay Thai ជាកីឡាមួយក្នុងចំណោមកីឡាតស៊ូដែលរីកលូតលាស់លឿនបំផុតលើពិភពលោក ទាំងអត្តពលិក និងអ្នកទស្សនា ។ លើសពីនេះ Muay Thai ក៏ជាកីឡាទទួលបានការពេញនិយមនៅលើពិភពលោក ជាពិសេស នៅអឺរ៉ុប រហូតដល់មានការដាក់បញ្ចូល Muay Thai សម្រាប់ការប្រកួតកីឡាជាផ្លូវការ ដោយនឹងមានការប្រកួតផ្នែកបុរស និងស្ត្រី និងក្រុមចម្រុះ ហើយមុនពេលប្រកួតនឹងមានការរាំថ្វាយគ្រូតាមប្រពៃណី Muay Thai ផងដែរ ។

លោក អនុឆា ប៊ូរ៉ាផាឆៃស្រ៊ី បន្ថែមថា ក្រៅពីនេះ Muay Thai គឺជាបេតិកភណ្ឌវប្បធម៌អរូបីមានតម្លៃរបស់ថៃ ព្រមទាំងមានការទទួលស្គាល់ពីស្ថាប័នកីឡាល្បីៗដូចជា គណៈកម្មាធិការអូឡាំពិកអន្តរជាតិ (International Olympic Committee: IOC) និងគណៈកម្មាធិការអូឡាំពិក និងប៉ារ៉ាឡាំពិកអាមេរិក (The United States Olympic & Paralympic Committee: USOPC) បានទទួលស្គាល់ Muay Thai ជាប្រភេទកីឡាថ្មី នៅថ្ងៃទី១០ ខែមករា ឆ្នាំ២០២៣ ។

លោកនាយករដ្ឋមន្ត្រីថៃរីករាយណាស់ដែលកីឡា Muay Thai ទទួលបានការចាប់អារម្មណ៍ និងការសរសើរពីប្រទេសនានា ដើម្បីការប្រកួតប្រជែងនៅលើឆាកអន្តរជាតិ និងជាសកម្មភាពសេដ្ឋកិច្ចមួយទៀតដែលទទួលបានការចាប់អារម្មណ៍ និងចូលចិត្តពីភ្ញៀវទេសចរបរទេស ។ លោកនាយករដ្ឋមន្ត្រីមានមោទនភាពដែល Muay Thai បានដាក់បញ្ចូលជាកីឡាមួយក្នុងការប្រកួតប្រជែងលើឆាកអន្តរជាតិជាបន្តបន្ទាប់ ដែលឆ្លុះបញ្ចាំងឱ្យឃើញពីភាពជោគជ័យតាមនយោបាយរបស់រដ្ឋាភិបាល ដែលបានរួមសហការជាមួយភ្នាក់ងារពាក់ព័ន្ធនានា ។

លោក អនុឆា ប៊ូរ៉ាផាឆៃស្រ៊ី លើកឡើងថា ៖ «ប្រទេសថៃត្រូវរួមគ្នាផ្សព្វផ្សាយ និងជំរុញ Muay Thai ឱ្យពិភពលោកបានស្គាល់ ព្រមទាំងអភិវឌ្ឍន៍កីឡានេះឱ្យក្លាយជា Soft Power មានសក្តានុពលរបស់ថៃ ព្រោះ Muay Thai បានបង្កើតកេរ្តិ៍ឈ្មោះ ប្រាក់ចំណូលដល់ប្រទេស រួមទាំងគាំទ្រការអភិវឌ្ឍសេដ្ឋកិច្ចយូរអង្វែងផងដែរ» ៕

ប្រភព ៖ topnews

រក្សាសិទ្ធដោយ KBN News

តាមសេចក្តីរាយការណ៍ពីវិទ្យាស្ថានផ្នែកខួរក្បាលរបស់អូស្ត្រាលីបង្ហាញថា អាមេរិក និងបណ្តាប្រទេសលោកខាងលិចបានចុះចាញ់ចិនក្នុងការប្រកួតប្រជែងលើការអភិវឌ្ឍវិទ្យាសាស្ត្រ និងបច្ចេកវិទ្យា ។ ចិន គឺជាប្រទេសនាំមុខគេនៅលើពិភពលោកផ្នែកបច្ចេកវិទ្យាសំខាន់ៗ ហើយលើសពីនេះ ចិនក៏មានសក្តានុពលនាំមុខលើផ្នែកជាច្រើនទៀត ។

វិទ្យាស្ថានគោលនយោបាយយុទ្ធសាស្ត្រអូស្ត្រាលី (Australian Strategic Policy Institute: ASPI) បានបញ្ជាក់ក្នុងរបាយការណ៍ Critical Technology Tracker ដែលបានតាមដានពីការលូតលាស់ផ្នែកបច្ចេកវិទ្យាអស់រយៈពេល១ឆ្នាំ និងផ្សព្វផ្សាយក្នុងកិច្ចប្រជុំ Raisina Dialogue នៅក្រុងញូវដែលី ប្រទេសឥណ្ឌា នៅថ្ងៃទី២ ខែមីនាថា ចិននឹងក្លាយជាប្រទេសមហាអំណាចផ្នែកបច្ចេកវិទ្យាលំដាប់ទី១ លើពិភពលោក ខណៈបច្ចុប្បន្ន ចិនបាននាំមុខជាច្រើនផ្នែកដូចជា ការការពារប្រទេស, អវកាស, មនុស្សយន្ត, ថាមពល, បរិស្ថាន, បញ្ញាសិប្បនិម្មិត (AI) ជាដើម ។

របាយការណ៍នេះបញ្ជាក់ដែរថា ដ្រូន, ថ្មអគ្គិសនី, ថាមពលនុយក្លេអ៊ែរ, ថាមពលព្រះអាទិត្យ, ការទាញយកសារធាតុរ៉ែសំខាន់ៗ, ការទំនាក់ទំនងសេវាកម្រិតខ្ពស់ដូចជា 5G និង 6G សុទ្ធតែជាឧស្សាហកម្មសំខាន់ៗដែលចិនជាម្ចាស់ទីផ្សារក្នុងពេលបច្ចុប្បន្ន ។ ហេតុនេះ ចិនបានកសាងគ្រឹះដើម្បីក្លាយជាប្រទេសមហាអំណាចផ្នែកវិទ្យាសាស្ត្រ និងបច្ចេកវិទ្យានាំមុខគេនៅលើពិភពលោក ។ រីឯអាមេរិកវិញបាននាំមុខផ្នែកបច្ចេកវិទ្យាមួយចំនួនដូចជា វ៉ាក់សាំង, កុំព្យូទ័រ និងប្រព័ន្ធបង្ហោះលើអវកាស ។

វិទ្យាស្ថានគោលនយោបាយយុទ្ធសាស្ត្រអូស្ត្រាលីបញ្ជាក់ថា ការឈានមុខរបស់ចិនផ្នែកបច្ចេកវិទ្យានេះ ដោយសាររដ្ឋាភិបាលចិន ក៏ដូចជាបណ្តាមេដឹកនាំចិនជាច្រើនសម័យកាលបានដាក់ផែនការរយៈពេលវែង ហើយការនាំមុខរបស់ចិន គឺជាសញ្ញាដាស់តឿនទៅកាន់ប្រទេសប្រជាធិបតេយ្យឱ្យភ្ញាក់ឡើងផងដែរ ។

ក្រៅពីនេះ វិទ្យាស្ថានផ្នែកខួរក្បាលរបស់អូស្ត្រាលីបញ្ជាក់ដែរថា ការឈានមុខរបស់ចិន មិនត្រឹមតែការអភិវឌ្ឍផ្នែកបច្ចេកវិទ្យានាពេលបច្ចុប្បន្នប៉ុណ្ណោះទេ ប៉ុន្តែក៏រួមទាំងបច្ចេកវិទ្យាក្នុងថ្ងៃអនាគតផងដែរ ។ ជាមួយគ្នានេះ វិទ្យាស្ថានក៏បានផ្តល់ការណែនាំទៅកាន់បណ្តាប្រទេសលោកខាងលិច រួមមាន ការបង្កើតមូលនិធិជាតិសម្រាប់ការស្រាវជ្រាវ និងអភិវឌ្ឍន៍, ការសម្របសម្រួលផ្នែកទិដ្ឋាការបច្ចេកវិទ្យា, ជម្រើសអាជីវកម្ម ឬវិនិយោគ ជាពិសេស ជាមួយប្រទេសជាមិត្ត និងការស្វែងរកកិច្ចសហការថ្មីៗរវាងរដ្ឋាភិបាល និងផ្នែកឯកជនជាដើម ៕ ប្រភព ៖ The standard