បរទេស៖ ក្លាយជាប្រវត្តិសាស្ត្រ ក្រោយក្រសួងសន្តិសុខសាធារណៈរបស់ប្រទេសប៉ាណាម៉ា បានចេញសេចក្តីថ្លែងការណ៍មួយ អំពីការរឹបអូសបានគ្រឿងញៀនក្នុងចំនួនជាច្រើន ដែលជាកំណត់ត្រាក្នុងឆ្នាំនេះ។

កាលពីថ្ងៃទី ២៥ ខែធ្នូ ឆ្នាំ ២០២២ កន្លងទៅនេះមានសេចក្ដីរាយការណ៍ពីសារពត៌មានរ៉យទ័រ បានឱ្យដឹងថា ទីក្រុងប៉ាណាម៉ា ប្រទេស ប៉ាណាម៉ា សម្រាប់ឆ្នាំនេះបានបង្ហាញពីឥទ្ធិពលនៃការរឹបអូសនូវគ្រឿងញៀតដ៏ច្រើនជាប្រវត្តសាស្ត្រក្នុងរយៈពេល២ឆ្នាំជាប់ៗគ្នា។

ក្នុងនោះត្រូវបានគេដឹងថាចំនួននៃគ្រឿងញៀនដែលត្រូវបានគេរឹបអូសនេះមា​នចំនួន ១២៦,៥ តោនដែលភាគច្រើនជាកូកាអ៊ីន។ដោយក្នុងចំណោមនោះមានថ្នាំសរុប ២៣ តោនត្រូវបានគេរកឃើញក្នុង កុងតឺន័រមួយនៅឆ្នេរសមុទ្រអាត្លង់ទិកជាមួយនឹងគោលដៅបញ្ជូនទៅកាន់សហរដ្ឋអាមេរិកនិងអឺរ៉ុប។

ការចុះប្រតិបត្តិនៃការរឹចអូសនេះគឺបានដោះស្រាយការរត់ពន្ធគ្រឿងញៀនឆ្លងកាត់ពីទឹកដីប្រទេសទៅកាន់សហរដ្ឋអាមេរិក និងអឺរ៉ុប ហើយប្រទេសប៉ាណាម៉ាគឺជាចំណុចនៃប្រទេសសម្រាប់ការឆ្លងកាត់នូវគ្រឿងញៀនដ៏សកម្ម ហើយអ្វីដែលអាជ្ញាធរបង្ក្រាបគឺជាការចុះប្រតិបត្តិការស្ទាក់ចាប់។

គួររំលឹកផងដែរថាការរឹបអូសគ្រឿងញៀនក្នុងប្រទេសនេះត្រូវបានធ្វើឡើងក្នុងប្រតិបត្តិការប្រឆាំងគ្រឿងញៀនជាង ៤៧១ លើករួចមកហើយ រួមទាំងការចាប់ខ្លួនជនល្មើសសរុបចំនួន ៦១៩ នាក់ ក្នុងនោះមានជនជាតិប៉ាណាម៉ា ៤១៥ នាក់ និង ២០៤ នាក់មកពីប្រទេសផ្សេងៗ៕ ប្រភព៖ Dailynews

ប្រទេសថៃ៖ មានហេតុការណ៍អគ្គិសភ័យឆេះបន្ទប់ភ្លេងរបស់សាលាមួយកន្លែងដែលបណ្ដាលឱ្យឧបករណ៍ភ្លេងជាច្រើន ត្រូវបានឆាបឆេះខ្ទេចគ្មានសល់ទាំងកណ្ដាលយប់ ដោយគិតជាទឹកប្រាក់នៃការខូចខាតអស់ជាង១០ លានបាត។

នៅវេលាម៉ោង ១ និង ៣០ នាទីទៀបភ្លឺឈានចូលថ្ងៃទី ២៦ ខែធ្នូ ឆ្នាំ២០២២ មានសេចក្ដីរាយការណ៍អំពីហេតុការណ៍នៃគ្រោះអគ្គិភ័យឆាបឆេះបន្ទប់ដាក់ភ្លេង ដែលជាអគារស្តុកឧបករណ៍ភ្លេងក្នុងសាលាដ៏ល្បីមួយកន្លែង ស្ថិតក្នុងខេត្ត នគរ ស៊ី ថាមរ៉ាត់ (Nakhon Si Thammarat)នៃប្រទេសថៃ។

ហេតុការណ៍ដ៏អាក្រក់នេះផងដែរ លោកវរសេនីយ៍ទោ រឹង ឆៃ ខារឿង អធិការរងស៊ើបអង្កេត ប៉ុស្តិ៍នគរបាលរដ្ឋបាលក្នុងតំបន់បានលើកឡើងថា បន្ទាប់ពីមានការរាយការណ៍ពីដំណឹងនេះរួចមកលោកក៏បានរៀបចំរថយន្តពន្លត់អគ្គិភ័យចំនួន ៣ គ្រឿងប្រញាប់ប្រញាល់ទៅបាញ់ទឹកពន្លត់ភ្លើងជាបន្ទាន់ដោយប្រើអស់រយៈពេល២ ម៉ោងទើបស្ងប់។

ជាមួយគ្នានោះប្រភពដដែលបានបញ្ជាក់ថាក្នុងឧបទ្ទវហេតុនៃភ្លើងឆេះនេះបានបណ្ដាលឱ្យ ឧបករណ៍ភ្លេងផ្សេងៗជាច្រើន ត្រូវបានភ្លើងឆេះអស់ទាំងស្រុង ហើយការប៉ាន់ស្មានជាបឋមនៃការខូចខាតមិនតិចជាង ១០ លានបាត ឬ ប្រហែល ២៨៧,៩០៦ដុល្លារ។

យ៉ាងណាមិញជាជំហានដំបូងគេបានសន្និដ្ឋានថា ភ្លើងឆាបឆេះអាចបណ្ដាលមកពីមូលហេតុឆ្លងចរន្ត អគ្គិសនី ​ប៉ុន្តែទោះជាយ៉ាងណាសមត្ថកិច្ចកំពុងធ្វើការសម្របសម្រួលជាមួយប៉ូលិសដោយបានចុះមកពិនិត្យ កន្លែងកើតហេតុ ដើម្បីរកភស្តុតាង និងមូលហេតុ នៃការឆេះយ៉ាងលម្អិតម្តងទៀត មុននឹងចាត់វិធានការផ្លូវច្បាប់បន្ត៕ ប្រភព៖ Dailynews

អន្តរជាតិ៖ ក្រុមហ៊ុនសាងសង់នាវាដ៏ធំមួយរបស់រុស្ស៉ី ដែលមានជំនាញខាងសាងសង់នាវាមុជទឹកមិនមែនដើរដោយថាមពលនុយក្លេអ៊ែរ បានប្រកាសថាអគ្គនាយករបស់ខ្លួន បានទទួលមរណភាពភ្លាមៗ នៅអាយុ៦៦ឆ្នាំ កាលពីថ្ងៃសៅរ៍ចុងសប្ដាហ៍នេះ បន្ទាប់បានដឹកនាំក្រុមហ៊ុនរយៈពេលជាង១១ឆ្នាំ ដោយមិនបានបញ្ជាក់ពីមូលហេតុស្លាប់នោះទេ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP​ កាលពីថ្ងៃអាទិត្យ ទី២៥ ខែធ្នូ ឆ្នាំ២០២២។

ក្រុមហ៊ុន អេដមីរលធី ស៊ីបយ៉ាដ (Admiralty Shipyards) ដែលមានមូលដ្ឋានស្ថិតនៅភាគខាងលិចទីក្រុង សាំង ភីតធឺស្បឺគ (St Petersburg) បានប្រកាសពីមរណភាពលោក អាឡិចសាន់ដឺ ប៊ូហ្សាកូវ (Alexander Buzakov) នៅក្នុងសេចក្ដីថ្លែងការណ៍មួយ។ លោក ប៊ូហ្សាកូវ បានកាន់តំណែងជាអគ្គនាយកក្រុមហ៊ុន Admiralty Shipyards ចាប់តាំងពីខែសីហា ឆ្នាំ២០១២មក។

នៅក្នុងសេចក្ដីថ្លែងការណ៍ដដែល ក្រុមហ៊ុនក៏បានរំឮកឡើងវិញផ​ងដែរពីសមិទ្ធផលដែលោក ប៊ូហ្សាកូវ សម្រេចបានដូចជាការរក្សាបាននូវកំពុងនៃការបញ្ជាទិញ នាវាមុជទឹក ទូទៅធម្មតា នាវាចម្បាំង និងយានសម្រាប់ផែទឹកជ្រៅជាដើម ដោយវាគឺជាកន្លែងផលិតកប៉ាល់ចំណាស់ជាងគេ និងធំជាងគេមួយនៅក្នុងប្រទេសរុស្ស៊ី ដែលមានឯកទេសជាចម្បងក្នុងការកសាងនាវាមុជទឹកគ្មាននុយក្លេអ៊ែរសម្រាប់កងទ័ពជើងទឹករុស្ស៊ី។

ដោយឡែក បើតាមទីភ្នាក់ងារសារព័ត៌មានរុស្ស៉ី តាស (TASS)​ ក្រុមហ៊ុន Admiralty Shipyards នេះហើយដែល ទទួលបន្ទុកជួសជុលកែលម្អនាវាមុជទឹក Kilo-class ដើរដោយថាមពលម៉ាស៊ូតមានសមត្ថភាពបាញ់មីស៊ីលគ្រូសកាលីប (Kalibr)។ រុស្ស៉ីកាលពីខែមេសាកន្លងទៅ បានប្រើប្រាស់នាវាមុជទឹកដោយម៉ាស៊ូតមួយគ្រឿង នៅក្នុងតំបន់សមុទ្រខ្មៅ ដើម្បីវាយប្រហារលើគោលដៅយោធា ក្នុងប្រទេសអ៊ុយក្រែន ដោយប្រើមីស៊ីលកាលីប។

គួរបញ្ជាក់ថា លោក អាឡិចសាន់ដឺ ប៊ូហ្សាកូវ បានបញ្ចប់ការសិក្សាក្នុងឆ្នាំ១៩៨០ ហើយលោកមានបទពិសោជន៍ជាង ៤០ឆ្នាំ ខាងសាងសងនាវា រីឯទីក្រុង សាំង ភីតធឺស្បឺគ គឺជាទីកន្លែងកំណើតរបស់ប្រធានាធិបតីរុស្ស៉ី លោក ពូទីន​​៕

បរទេស៖ ក្លាយជារឿងដ៏គួរឱ្យភ្ញាក់ផ្អើលក្រោយពីមានការផ្ទុះដ៏ខ្លាំងក្លាមួយនៅក្នុងរថយន្តដឹកហ្គាសមួយនៅជិតមន្ទីរពេទ្យមួយកន្លែង ក្នុងប្រទេសអាហ្វ្រិកខាងត្បូង ដែលបានបណ្តាលឱ្យមនុស្សចំនួន ១០ នាក់បានស្លាប់ និងរាប់សិបនាក់ផ្សេងទៀតបានរងរបួស។

នាពេលថ្មីៗកន្លងទៅនេះទីភ្នាក់ងារសារព័ត៌មានបរទេសបានរាយការណ៍ពីឧបទ្ទវហេតុនៃរថយន្តដឹក ហ្គាសមួយគ្រឿងដែលបានព្យាយាមបើកកាត់ផ្លូវក្រោមស្ពានមួយ ក្នុងទីក្រុង Boksburg នៃអាហ្វ្រិកខាងត្បូង ស្រាប់តែនៅវេលាម៉ោង៦និង៣៥នាទីព្រឹក ថ្ងៃសៅរ៍ ទី២៤ ខែធ្នូ ឆ្នាំ២០២២ បែរជាជាប់គាំងនៅក្រោមស្ពាន ដោយសារតែកម្ពស់នៃរថយន្តខ្ពស់ពេកមិនអាចទៅមុខរួច។

តែអ្វីដែលគួរឱ្យភ្ញាក់ផ្អើល និងរន្ធត់ជាខ្លាំងនោះគឺស្រាប់តែមានការផ្ទុះយ៉ាងខ្លាំងក្លា មុនពេលមានភ្លើងបានឆាបឆេះយ៉ាងសន្ធោសន្ធៅកើតឡើង។

ជាមួយគ្នានោះផងដែរក្នុងហេតុការនេះ មានមនុស្សយ៉ាងហោចណាស់១០នាក់បានស្លាប់ និងប្រហែល ៤០នាក់ទៀតផ្សេងទៀតបានរងរបួសនៅក្នុងការផ្ទុះនេះ ហើយការផ្ទុះនេះផងដែរស្ថិតនៅចម្ងាយត្រឹមតែ ១០០ម៉ែត្រពីមន្ទីរពេទ្យ Tambo Memorial ដែលបណ្តាលឲ្យពិដានមន្ទីរពេទ្យបានដួលរលំ រហូតដល់បុគ្គលិកត្រូវប្រញាប់ជម្លៀសអ្នកជំងឺចេញពីអាគារជាបន្ទាន់។

ក្នុងនោះក៏មានក្រុមអ្នកជួយពន្លត់អគ្គិភ័យនាំយករថយន្តទឹកមកធ្វើការគ្រប់គ្រងភ្លើងយ៉ាងប្រញាប់ប្រញាល់។

ទោះជាយ៉ាងណាក្រុមមន្ត្រីមានការព្រួយបារម្ភថាចំនួនអ្នកស្លាប់ អាចកើនឡើងបន្ថែមទៀត និងបានបញ្ជាក់ថាមនុស្សចំនួន ១៩ នាក់កំពុងស្ថិតក្នុងស្ថានភាពធ្ងន់ធ្ងរ។

យ៉ាងណាមិញ បើតាមអ្នកនាំពាក្យទីភ្នាក់ងារសេវាសង្គ្រោះបន្ទាន់បានបន្ថែមថា រថយន្តដឹកប្រេង នេះបានឆាបឆេះដោយសារការកកិតនឹងស្ពានរហូតបង្កការផ្ទុះមួយកើតឡើង ហើយការខូចខាតកំពុងស្ថិតក្នុងការស៊ើបអង្កេតបន្ត៕ ប្រភព៖ Thairath

ថៃ៖ កងទ័ពជើងទឹកថៃបានឲ្យដឹងនៅថ្ងៃអាទិត្យ ទី២៥ធ្នូថា សាកសពនាវិក ៣នាក់ទៀតត្រូវបានទាញចេញពីទឹក ក្រោយឧបទ្ទវហេតុលិចនាវាចម្បាំង នៅឯឈូងសមុទ្រថៃ កាលពីមួយសប្តាហ៍មុន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអាទិត្យ ទី២៥ ខែធ្នូ ឆ្នាំ២០២២។

ជាមួយការរកឃើញនេះ នាំឲ្យចំនួនសាកសពដែលបានរកឃើញរហូតមកទល់ពេលនេះ មានចំនួន១៨នាក់ហើយ ខណៈនាវិកចំនួន​១១នាក់ទៀតបន្តបាត់ខ្លួននៅឡើយ។

គួរបញ្ជាក់ថា នាវាចម្បាំងធុនតូច ឈ្មោះ អេកធីអឹមអេស សុខោទ័យ (HTMS Sukhothai)
ដែលមានផ្ទុកនាវិកសរុប១០៥នាក់ បានជួបបញ្ហាគាំងគ្រឿងម៉ាស៉ីនកាលពីថ្ងៃទី ១៨ ខែធ្នូ ហើយលិចនៅចម្ងាយខ្ទង់ ៣៧គីឡូម៉ែត្រពីខេត្តប្រជួបគីរីខន្ធ (Prachuap Khiri Khan) ភាគខាងត្បូងប្រទេសថៃកំលុងពេលមានព្យុះបោកបក់ខ្លាំង។

ជាមួយប្រតិបត្តិការចល័តនាវា យន្តហោះ និងឧទ្ធម្ភាគចក្រ ជាច្រើនគ្រឿង សម្រាប់ប្រតិបត្តិការរុករកនិងជួយសង្រ្គោះ យោធាថៃអាចទាញនាវិក ៧៦នាក់បានរួចរស់ជីវិតពីរលក ៕

រដ្ឋធានីមូស្គូ៖ សភារបស់សហរដ្ឋអាមេរិក បានអនុម័តការចំណាយរបស់រដ្ឋាភិបាល នៃប្រទេសមហាអំណាចកំពូល នៅលើលោក ទាំងសេដ្ឋកិច្ច និង យោធា សម្រាប់ឆ្នាំ២០២៣ កើន១,៧ពាន់ពាន់លានដុល្លារ។

បណ្ដាញទូរទស្សន៍សហរដ្ឋអាមេរិក បានផ្សាយ កាលពីថ្ងៃអាទិត្យ ទី២៥ ខែធ្នូ ឆ្នាំ២០២៣ ថា សភារបស់សហរដ្ឋអាមេរិក កាលពីថ្ងៃសុក្រ បានអនុម័តកញ្ចប់ចំណាយដ៏មហិមា កើនដល់១,៧ពាន់ពាន់លានដុល្លារ (($1.7Trillion= $1 700 000 000 000)។ កញ្ចប់លុយដ៏មហាសាលនេះ អាចអនុញ្ញាតដល់រដ្ឋាភិបាល ផ្ដល់មូលនិធិដល់ទីភ្នាក់ងារសំខាន់ទាំង សម្រាប់ប្រតិបត្ដិការ និង ផ្ដល់ជំនួយបន្ទាន់ សម្រាប់ប្រទេសអ៊ុយក្រែន និង ការដោះស្រាយបញ្ហាគ្រោះមហន្ដរាយ បង្កឡើង ដោយធម្មជាតិផងដែរ។ ការអនុម័តកញ្ចប់ថវិកានេះ នឹងបន្ដបញ្ជូនទៅជូនប្រធានាធិបតីសហរដ្ឋអាមេរិក លោក ចូ បៃដិន (Joe Biden) ដើម្បីចុះហត្ថលេខា ឲ្យក្លាយជាច្បាប់។

ការអនុម័តលើការចំណាយដ៏ធំ សម្រាប់ឆ្នាំសារពើពន្ធ២០២៣ ពីសភាសហរដ្ឋអាមេរិកនោះ រួមមាន ទឹកប្រាក់ទំហំ៧៧២,៥ពាន់លានដុល្លារ សម្រាប់កម្មវិធីចាយវាយ នៅក្នុងប្រទេស ដែលមិនមែនផ្ដោតលើវិស័យការពារជាតិ និង ៨៥៨ពាន់លានដុល្លារ ជាមូលនិធិ សម្រាប់វិស័យការពារជាតិ។ កញ្ចប់ថវិកាទាំងនេះ ក៏រាប់បញ្ចូលទាំងជំនួយសង្គ្រោះបន្ទាន់ ប្រហែល៤៥ពាន់លានដុល្លារ ជួយដល់អ៊ុយក្រែន និង សម្ពន្ធមិត្តណាតូ ហើយប្រហែល៤០ពាន់លានដុល្លារ ដើម្បីឆ្លើយតបទៅនឹងគ្រោះមហន្តរាយធម្មជាតិ មានដូចជា ខ្យល់ព្យុះ ភ្លើងឆេះព្រៃ និង ទឹកជំនន់ …ជាដើម៕