តៃវ៉ាន់ ៖ ប្រធានមន្ទីរទេសចរណ៍តៃវ៉ាន់ Zhang Xichang បានប្រកាសពីផែនការថ្មីរបស់តៃវ៉ាន់ដើម្បីទាក់ទាញភ្ញៀវទេសចរបរទេសមកកម្សាន្តឱ្យបានច្រើន ដោយតៃវ៉ាន់អនុម័តថវិកាប្រមាណ៥.៣០០លានដុល្លារតៃវ៉ាន់សម្រាប់គម្រោងរយៈពេល៣ឆ្នាំ ។

គម្រោងផ្តល់ថវិកាដល់ភ្ញៀវទេសចរបរទេសនេះ នឹងស្នើថវិកាចំនួន៥.០០០ដុល្លារតៃវ៉ាន់សម្រាប់ផ្តល់ឱ្យភ្ញៀវទេសចរចំនួន៥០ម៉ឺននាក់ និងថវិកា២ម៉ឺនដុល្លារតៃវ៉ាន់ទៀតនឹងផ្តល់ឱ្យក្រុមហ៊ុនទេសចរណ៍បរទេសនានាចំនួន៩ម៉ឺនក្រុម ។

ប្រាក់ទាំងនេះនឹងចែកចាយតាមរយៈការរៀបចំព្រឹត្តិការណ៍ផ្សព្វផ្សាយទេសចរណ៍ក្នុងឆ្នាំ២០២៣ ប៉ុន្តែភ្ញៀវទេសចរដែលនឹងទទួលប្រាក់ ពួកគេត្រូវធ្វើដំណើរទៅតៃវ៉ាន់ជាមុនសិន ទើបអាចទទួលបានប្រាក់ទាំងនេះតាមរយៈការចែកប័ណ្ណ ហើយពួកគេអាចចាយវាយលើថ្លៃអាហារ កន្លែងស្នាក់នៅ និងថ្លៃធ្វើដំណើរក្នុងអំឡុងពេលមកកម្សាន្តនៅតៃវ៉ាន់ ។ ក្រៅពីនេះ តៃវ៉ាន់នឹងផ្តល់ប្រាក់ទៅឱ្យក្រុមហ៊ុនទេសចរណ៍ទាំងក្នុងប្រទេស និងក្រៅប្រទេសដូចគ្នាផងដែរ ។

គួរបញ្ជាក់ថា ការប្រកាសផ្តល់ប្រាក់ដល់ភ្ញៀវទេសចរបរទេសនេះ គឺក្រោយពីចំនួនភ្ញៀវទេសចរនៅតៃវ៉ាន់បានធ្លាក់ចុះជាបន្តបន្ទាប់ ហើយមានភ្ញៀវទេសចរមិនដល់៩០ម៉ឺននាក់ផងកាលពីឆ្នាំ២០២២ កន្លងមក ។ តៃវ៉ាន់សង្ឃឹមថា ផែនការថ្មីនេះនឹងអាចទាក់ទាញភ្ញៀវទេសចរបរទេសមកកម្សាន្តនៅតៃវ៉ាន់យ៉ាងតិចចំនួន៦លាននាក់នៅឆ្នាំ២០២៣ និងចំនួន១០លាននាក់នៅឆ្នាំ២០២៥ ៕ ប្រភព ៖ TNN World

ប្រទេសកូរ៉េខាងត្បូង ៖ ប្រធានាធិបតីកូរ៉េខាងត្បូង លោក Yun Seok-Yeol បានលើកឡើងថា កិច្ចសហការត្រីភាគីរវាងប្រទេសកូរ៉េខាងត្បូង អាមេរិក និងជប៉ុន គឺជារឿងមានសារសំខាន់យ៉ាងខ្លាំងដើម្បីយកឈ្នះការគំរាមកំហែងពីអាវុធនុយក្លេអ៊ែរ និងមីស៊ីលរបស់កូរ៉េខាងជើង ។

លោកប្រធានាធិបតីកូរ៉េខាងត្បូងបានលើកឡើងបែបនេះ ក្នុងថ្ងៃទិវាឯករាជ្យជាតិកូរ៉េខាងត្បូង ត្រូវនឹងថ្ងៃទី១ ខែមីនា (March First Movement) គឺកូរ៉េខាងត្បូងបានប្រារព្ធឡើងជារៀងរាល់ឆ្នាំដើម្បីប្រឆាំងនឹងការត្រួតត្រារបស់ជប៉ុន ដែលបានគ្រប់គ្រងលើកូរ៉េខាងត្បូងក្នុងរវាងពីឆ្នាំ១៩១០ ដល់ឆ្នាំ១៩៤៥ ។

ការិយាល័យប្រធានាធិបតីកូរ៉េខាងត្បូងបានថ្លែងកាលពីថ្ងៃទី២៨ ខែកុម្ភៈ កន្លងមកថា មន្ត្រីរបស់កូរ៉េខាងត្បូង អាមេរិក និងជប៉ុន បានបើកកិច្ចប្រជុំរួមគ្នាមួយស្តីពីសន្តិសុខសេដ្ឋកិច្ចជាលើកដំបូង ស្របពេលកិច្ចខិតខំប្រឹងប្រែងធ្វើឱ្យខ្សែសង្វាក់ផ្គត់ផ្គង់មានភាពធន់ និងការអភិវឌ្ឍបច្ចេកវិទ្យា ។

បើទោះជាជប៉ុន និងកូរ៉េខាងត្បូងជាប្រទេសជិតខាងដែលមានគំនិតខុសគ្នាក្តី ប៉ុន្តែប្រទេសទាំងពីរក៏នៅតែរួមសហការជាមួយអាមេរិកក្នុងផ្នែកជាច្រើន ដើម្បីប្រឈមនឹងស្ថានការណ៍តានតឹងក្នុងពិភពលោកបច្ចុប្បន្ន ក៏ដូចជាប្រឆាំងនឹងឥទ្ធិពលរបស់ចិន និងកូរ៉េខាងជើង ដែលគេមិនអាចទស្សន៍ទាយទុកមុនបានថាអ្វីនឹងកើតឡើង ៕

ប្រភព ៖ TNN World

សហរដ្ឋអាមេរិក៖ ជំងឺផ្លូវចិត្តគឺជាជំងឺដែលកាចសាហាវ ដែលអាចអោយមនុស្សធ្វើអត្តឃាតសម្លាប់ខ្លួនឯងទាំងគ្មានភាពខ្លាចរអាឡើយ។ ជំងឺផ្លូវចិត្តអាចអោយមនុស្សផ្លាស់ប្តូរខ្លួនឯងគ្រប់យ៉ាង ទាំងការរស់នៅ ទាំងទំនាក់ទំនងជាមួយមនុស្សជុំវិញខ្លួននៅក្នុងសង្គម។ ជំងឺផ្លូវចិត្តមានអាការះដូចជា៖-ពិបាកក្នុងការគិតនិងផ្ដោតអារម្មណ៍
-មានអារម្មណ៍ភ័យស្លន់ស្លោ នឹងមិនសប្បាយចិត្តជាមួយមនុស្សជុំវិញខ្លួន
-ការងារ ការសិក្សាចុះខ្សោយភ្លាមៗ
-ចំណាយពេលនៅជាមួយខ្លួនឯងខុសធម្មតា កង្វះការថែទាំខ្លួនឯងគ្មានអានាម័យ
-ពិបាកក្នុងការទំនាក់ទំនង
-ឆាប់ខឹង នឹងពិបាកក្នុងការគេង
វិធីដោះស្រាយ៖
១.ត្រូវស្រឡាញ់ខ្លួនឯងអោយបានច្រើន:
ការស្រឡាញ់ខ្លួនឯងអោយបានច្រើនគឺជារឿងដែលល្អបំផុត
សម្រាប់ជួយជំងឺផ្លូវចិត្ត ស្រឡាញ់ខ្លួនឯងអោយបានច្រើន មានគោលដៅច្បាស់លាស់ មានជំនឿចិត្តលើខ្លួនឯង កុំអោយមជ្ឈដ្ឋានមិនល្អជុំវិញខ្លួនអ្នក មកពង្វក់ស្មារតីអ្នកបានងាយៗអោយសោះ។២.ត្រូវស្វែងរកជំនួយ៖
នៅពេលអ្នកមានជំងឺផ្លូវចិត្ត កុំសង្ងំនៅម្នាក់ឯងត្រូវរកអ្នកដែលអាចពឹងពាក់បាន ចែករំលែក ផ្តល់យោបល់ ដោះស្រាយបញ្ហារួម នឹងត្រូវទទួលការព្យាបាលអោយបានត្រឹមត្រួវទៀងទាត់ពេលវេលា។
៣.កុំប្រៀបធៀបខ្លួនឯងជាមួរអ្នកដទៃ៖
ត្រូវចាំថាមនុស្សម្នាក់មានតម្លៃរៀងៗខ្លួន តម្លៃមនុស្សមិនមែនវាស់វែងលើទ្រពសម្បត្តិមាសប្រាក់លុយឡាននឹងផ្ទះវីឡានោះទេ គឺវាស់លើភាពស្មោះត្រង់ត្រឹមត្រូវ។
៤.ចាប់ផ្តើមថ្ងៃថ្មីជាមួយភាពវិជ្ជមានរាល់ថ្ងៃ
ការបង្កើតទម្លាប់ចាប់ផ្តើមថ្មីជាមួយផ្នត់គំនិតវិជ្ជមាន អាយធ្វើអោយអារម្មណ៍អ្នកស្រស់ស្រាយ រីករាយ ពេញដោយក្តីសង្ឃឹម ហើយបែបនេះយូៗទៅវាជួយអោយអ្នកមានអារម្មណ៍ថាធូរស្បើយនឹងអស់ទុកកង្វល់ទាំងឡាយ។
៥.សមាធិ
ការធ្វើសមាធិរាល់ថ្ងៃជួយអោយអ្នកបង្កើតអារម្មណ៍ល្អ ស្ងប់ផ្លូវចិត្ត បង្កើនការយកចិត្តទុកដាក់ នឹងមានថាមពល អាចកាត់បន្ថយស្តេ្រសនឹងភាពតានតឹងអារម្មណ៍៕

សហរដ្ឋអាមេរិក ៖ កាលពីថ្ងៃទី២៧ ខែកុម្ភៈ កន្លងមក សេតវិមានអាមេរិកបានចេញបញ្ជាទៅកាន់មន្ត្រីរាជការទាំងអស់ឱ្យលុបកម្មវិធី TikTok ចេញពីឧបករណ៍ទំនាក់ទំនងរបស់រដ្ឋាភិបាលក្នុងរយៈពេលត្រឹម៣០ថ្ងៃ ដោយសារបារម្ភពីសុវត្ថិភាព ។ ការហាមឃាត់នេះស្របតាមសហភាពអឺរ៉ុប និងប្រទេសកាណាដា ដែលទើបបានហាមឃាត់ដូចគ្នានេះកាលពីសប្តាហ៍កន្លងទៅ ។

ក្រោយពីអាមេរិកហាមឃាត់មន្ត្រីរាជការប្រើ TikTok កាលពីថ្ងៃទី២៨ ខែកុម្ភៈ អ្នកនាំពាក្យក្រសួងការបរទេសចិន លោកស្រី Mao Ning បានថ្លែងទៅកាន់សារព័ត៌មានក្នុងស្រុកថា សេតវិមានកំពុងបំពានអំណាចរដ្ឋដើម្បីកៀបសង្កត់ក្រុមហ៊ុនបរទេស ហើយចិនសូមប្រឆាំងជាដាច់ខាតចំពោះបម្រាមនេះ ។ លោកស្រីបន្ថែមថា រដ្ឋាភិបាលអាមេរិកគួរតែគោរពគោលការណ៍សេដ្ឋកិច្ច និងការប្រកួតប្រជែងផ្នែកពាណិជ្ជកម្មដោយយុត្តិធម៌ ហើយអាមេរិកគួរតែឈប់ប្រព្រឹត្តបែបនេះចំពោះក្រុមហ៊ុនបរទេសក្នុងប្រទេសរបស់ខ្លួន ។

លោកស្រី Mao Ning ថ្លែងថា ៖ «អ្នកនឹងក្លាយជាប្រទេសមហាអំណាចពិភពលោកបានយ៉ាងដូចម្តេច ខណៈអ្នកគ្មានទំនុកចិត្តលើខ្លួនឯង ហើយខ្លាចកម្មវិធីតូចៗដែលយុវវ័យនិយមប្រើប្រាស់» ។

TikTok ជាកម្មវិធីមួយរបស់ក្រុមហ៊ុនបច្ចេកវិទ្យាធំមួយរបស់ចិន ByteDance កំពុងត្រូវបានប្រទេសលោកខាងលិចចោទថា មានហានិភ័យចំពោះអ្នកប្រើប្រាស់ ដោយសារវាអាចប្រមូលព័ត៌មាន រួចបញ្ជូនព័ត៌មានរបស់អ្នកប្រើប្រាស់ទៅឱ្យប្រទេសចិន ។ ទោះយ៉ាងណា អ្នកតំណាងរបស់ក្រុមហ៊ុន ByteDance និង TikTok បានបញ្ជាក់រហូតមកថា ពួកគេមិនបានធ្វើបែបនេះទេ ហើយការបារម្ភនេះជារឿងយល់ខុស ។

ក្រោយការបញ្ជាឱ្យលុបកម្មវិធី TikTok ចេញពីឧបករណ៍ទំនាក់ទំនងរបស់រដ្ឋាភិបាលអាមេរិក សេតវិមានក៏មានគម្រោងផ្សព្វផ្សាយការហាមឃាត់នេះទៅកាន់ប្រទេសនានាលើពិភពលោកផងដែរ ដោយសារបារម្ភពីសុវត្ថិភាពរបស់អ្នកប្រើប្រាស់ ។ ប៉ុន្តែមន្ត្រីអាមេរិកបញ្ជាក់ថា ពួកគេកំពុងរកដំណោះស្រាយបញ្ហាខាងលើ ខណៈបម្រាមនេះអាចផ្ទុយនឹងសិទ្ធិបញ្ចេញមតិរបស់ពលរដ្ឋ ៕

ប្រភព ៖ beartaiBRIEF

រដ្ឋធានីញូវដេលី៖ នៅក្នុងអំឡុងពេលឥណ្ឌូណេស៊ី បានធ្វើជាប្រធានកិច្ចប្រជុំកំពូល G20 កាលពីរដូវស្លឹកឈើជ្រុះកន្លងទៅនេះ មានការបង្ហាញ អំពីការខ្វែងគំនិតគ្នាយ៉ាងខ្លាំង ដោយចិន ឥណ្ឌា និង រុស្ស៊ី ជុំវិញការឈ្លានពានរបស់ក្រុងមូស្គូ ប៉ុន្ដែនៅឆ្នាំ២០២៣នេះ ខណៈឋានៈជាប្រធាន G20 ធ្លាក់មកលើប្រទេសឥណ្ឌា នោះ ក្រុងញូវដេលី សង្ឃឹម ថា នឹងផ្តល់នូវការពឹងផ្អែក ភាគច្រើន លើកត្តាសំខាន់មួយ គឺការដោះស្រាយបញ្ហាសង្គ្រាម នៅអ៊ុយក្រែន។

សារព័ត៌មាន BBC បានចេញផ្សាយ កាលពីថ្ងៃពុធ ទី១ ខែមីនា ថា ប្រទេសអ្នកមានសេដ្ឋកិច្ចរីកចម្រើនបំផុតចំនួន១៩ នៅលើពិភពលោក បូករួមទាំងសហភាពអឺរ៉ុប ផង មានទំហំសេដ្ឋកិច្ចស្មើនឹង៨៥ភាគរយ នៃសេដ្ឋកិច្ចរបស់ពិភពលោក និង មានចំនួនប្រជាជន ស្មើនឹង២ភាគ៣។ ចំណែកក្រុមរដ្ឋមន្រ្ដី ការបរទេសរបស់ប្រទេស G20 នឹងទៅជួបប្រជុំ នៅក្នុងរដ្ឋធានីញូវដេលី ហើយកិច្ចព្រមព្រៀងដ៏ទូលំទូលាយណាមួយ ដែលឥណ្ឌា សង្ឃឹម ថា នឹងផ្ដល់នោះ នឹងពឹងផ្អែកយ៉ាងខ្លាំងបំផុត ទៅលើកត្តាសំខាន់មួយ គឺសង្គ្រាមនៅអ៊ុយក្រែន។

នៅពេលមេដឹកនាំក្រុមប្រទេស G20 បានប្រមូលផ្តុំគ្នា នៅក្នុងរដូវស្លឹកឈើជ្រុះ កាលពីពេលកន្លងទៅ នៅកោះបាលី ក្រោមអធិបតីភាពរបស់ឥណ្ឌូណេស៊ី នោះ មីស៊ីលរបស់រុស្ស៊ី បានវាយប្រហារ ទៅលើគោលដៅហេដ្ឋារចនាសម្ព័ន្ធសំខាន់ៗរបស់អ៊ុយក្រែន ខណៈមេដឹកនាំពិភពលោក កំពុងតែអង្គុយ ទទួលទានអាហារពេលល្ងាច។ ចំណែកសេចក្តីថ្លែងការណ៍រួម បានបង្ហាញយ៉ាងច្បាស់ អំពីការខ្វែងគំនិតគ្នា ដោយឥណ្ឌា ចិន និង រុស្ស៊ី ហើយសេចក្តីរាយការណ៍មិនយល់ស្រប ចំពោះការរិះគន់មិនច្បាស់លាស់ ជុំវិញការលុកលុយរបស់ក្រុងមូស្គូ ទៅលើប្រទេសអ៊ុយក្រែន នោះឡើយ។

ចាប់តាំងពីពេលនោះមក ស្ថានការណ៍ នៅក្នុងប្រទេសអ៊ុយក្រែន មិនមានការផ្លាស់ប្ដូរអ្វីច្រើននោះដែរ ហើយសង្គ្រាមនៅតែកំពុងបន្ដ ដោយមិនមានសញ្ញាចរចាសន្ដិភាព។ ប្រសិនបើមិនមានការកែប្រែទៀតទេ ពិភពលោក នៅតែបែកបាក់គ្នា ហើយសេដ្ឋកិច្ចរបស់បណ្ដាប្រទេសមហាអំណាចធំៗជាច្រើន នៅតែស្ថិតក្នុងភាពមិនច្បាស់លាស់។

កិច្ចប្រជុំនេះ ត្រូវទុកឱ្យឥណ្ឌា ចេញផ្សាយសេចក្ដីសង្ខេបមួយ នៅក្នុងឋានៈជាប្រធាន G20 ដោយបានកត់សម្គាល់ឃើញ ថា «ការវាយតម្លៃផ្សេងគ្នា ចំពោះស្ថានការណ៍នៅអ៊ុយក្រែន នៅក្នុងក្រុម G20 ។ ចំណែកកិច្ចពិភាក្សារបស់ក្រុមរដ្ឋមន្ត្រីការបរទេស នៅថ្ងៃពុធ និង ថ្ងៃព្រហស្បតិ៍ ទំនងជាប្រឈមមុខនឹងឧបសគ្គស្រដៀងគ្នានេះដែរ»។

លោក មីឆែល កូហ្គេលម៉ែន (Michael Kugelman) នាយករង មជ្ឈមណ្ឌល Wilson បានបញ្ជាក់ ថា «ឥណ្ឌាកំពុងតែទទួលយកតំណែងប្រធាន G20 ទាំងលំបាកបំផុត។ ដូច្នេះ ឥណ្ឌាកំពុងតែព្យាយាម ធ្វើឱ្យកិច្ចប្រជុំនេះ ទទួលបានជោគជ័យ ហើយវានឹងមានការរីកចម្រើនជានិមិត្តរូបជាច្រើន។ ទាក់ទងនឹងខ្លឹមសារ បញ្ហាអ៊ុយក្រែន នឹងលេចចេញជារូបរាងឡើង លើអ្វីៗទាំងអស់។

ឥណ្ឌា ចង់ផ្តោតលើបញ្ហាជាច្រើន ដោយសារតែក្រុងញូវដេលី មើលឃើញ ថា វាជារឿងបន្ទាន់សម្រាប់ប្រទេសកំពុងអភិវឌ្ឍ។ កិច្ចប្រជុំនេះ ក៏នឹងលើកយកបញ្ហាបម្រែបម្រួលអាកាសធាតុ ការកើនឡើងបន្ទុកបំណុល មកលើប្រទេសកំពុងអភិវឌ្ឍ ការផ្លាស់ប្តូរឌីជីថល ការកើនឡើងអតិផរណា សន្តិសុខស្បៀងអាហារ និង ថាមពល មកក្នុងរបៀបវារៈទាំងនេះ។

រហូតមកដល់ពេលនេះ សេដ្ឋកិច្ចរបស់បណ្ដាប្រទេសជាច្រើន កំពុងតែតស៊ូស្ដារឡើងវិញ ងើប ចេញពីវិបត្ដិរោគរាតត្បាត និង ការកើនឡើងតម្លៃ នៅក្នុងអំឡុងសង្គ្រាមនេះ ព្រោះវាបានធ្វើស្ថានការណ៍ កាន់តែអាក្រក់ខ្លាំងឡើង។ ជាមួយគ្នានេះ ក្រុមអ្នកជំនាញ បានអះអាង ថា ក្រុងញូវដេលី នឹងត្រូវការការទូតយ៉ាងខ្ជាប់ខ្ជួន ដើម្បីធ្វើឲ្យក្រុម G20 មើលរំលង ពីបញ្ហារបស់អ៊ុយក្រែន។ ប៉ុន្តែកិច្ចព្រមព្រៀងលើបញ្ហាជាច្រើន ដែលគេមើលឃើញ គឺមានផ្លែផ្កាតិចតូច អាចនឹងសម្រេចបាន។

ឥណ្ឌា មិនបានរិះគន់ដល់រុស្ស៊ី ដោយផ្ទាល់នោះទេ ប៉ុន្ដែក្រុងញូវដេលី បាននិយាយ អំពីសារៈសំខាន់ នៃធម្មនុញ្ញរបស់អង្គការសហប្រជាជាតិ ច្បាប់អន្ដរជាតិ និង ការគោរពដល់ដែនអធិបតេយ្យភាព និង បូរណភាពទឹកដីរបស់ប្រទេសនានា។

លោក ណារ៉ែនដ្រា មូឌី (Narendra Modi) នាយករដ្ឋមន្រ្ដីឥណ្ឌា បានបញ្ជាក់ នៅក្នុងសេចក្ដីថ្លែងការណ៍របស់ខ្លួន នៅក្រៅកិច្ចប្រជុំកំពូលអង្គការសហប្រតិបត្ដិការសៀងហៃ កាលពីរដូវស្លឹកឈើជ្រុះកន្លងទៅ ដោយមិនបានរិះគន់ដោយផ្ទាល់ដល់ប្រទេសរុស្ស៊ី នោះទេ ។ ប៉ុន្ដែលោកនាយករដ្ឋមន្រ្ដី បានបង្ហាញ អំពីទស្សនៈជាចំហ នៅក្នុងកិច្ចប្រជុំ នៅអ៊ុយប៊ែគីស្ថាន ចំពេលមានវត្ដមានរបស់ប្រធានាធិបតីរុស្ស៊ី លោក វ៉្លាឌីមៀ ពូទីន ថា «យុគសម័យបច្ចុប្បន្ន គឺមិនមែន ធ្វើសង្គ្រាមនោះឡើយ»៕

រដ្ឋធានីមូស្គូ៖ នៅក្នុងរយៈពេលប៉ុន្មានថ្ងៃកន្លងទៅថ្មីៗនេះ វត្ថុហោះហើរនៅលើអាកាស ដែលមិនអាចកំណត់អត្ដសញ្ញាណបាន (UFO) បានធ្លាក់នៅក្នុងប្រទេសរុស្ស៊ី បង្ហាញអំពីគ្រោះថ្នាក់មួយចំនួន ចូលខិតជិតដល់រដ្ឋធានីមូស្គូ និង ជាទឹកដីកំណើតរបស់ប្រធានាធិបតី លោក វ៉្លាឌីមៀ ពូទីន ហើយសកម្មភាពបែបនេះ កំពុងតែធ្វើឲ្យប្រទេសមហាអំណាចយោធាមួយនេះ មានការព្រួយបារម្ភយ៉ាងខ្លាំង។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃព្រហស្បតិ៍ ទី២ ខែមីនា ថា ក្រុមមន្ត្រីរុស្ស៊ី និង បណ្ដាញផ្សព្វផ្សាយ កំពុងតែប្រើពាក្យ ថា វត្ថុបរទេសមិនស្គាល់អត្ដសញ្ញាណ មើលទៅហាក់បីដូចជាមិនគួរឲ្យខ្លាច ហើយកំពុងតែចោទប្រកាន់ដល់អ៊ុយក្រែន អំពីការវាយប្រហារ ដោយយន្តហោះគ្មានមនុស្សបើក ឬ ដ្រូន។ ដោយឡែក អ៊ុយក្រែន វិញ កាលពីថ្ងៃពុធ បានច្រានចោល ចំពោះការកំណត់គោលដៅទៅលើរុស្ស៊ី។

លោក មីខៃឡូ ប៉ូដូលយ៉ាក (Mykhailo Podolyak) ទីប្រឹក្សា ប្រធានាធិបតីអ៊ុយក្រែន បានសរសេរនៅលើបណ្ដាញសង្គម Twitter ថា «អារម្មណ៍ភ័យស្លន់ស្លោ និង បរាជ័យ កំពុងកើនឡើង នៅរុស្ស៊ី។ សកម្មភាពបែបនេះ បានបង្ហាញអំពីការបង្កើននូវការវាយប្រហារ នៅក្នុងប្រទេសដោយវត្ថុហោះហើរមិនស្គាល់អត្តសញ្ញាណ ប្រឆាំងនឹងទីតាំងហេដ្ឋារចនាសម្ព័ន្ធ»។

ទោះជាយ៉ាងណាក៏ដោយ នៅក្នុងសង្គ្រាម អស់រយៈពេលជាងមួយឆ្នាំកន្លងមកនេះ មេដឹកនាំអ៊ុយក្រែន តែងតែបដិសេធនូវការទទួលខុសត្រូវ ចំពោះការវាយប្រហារជារឿយៗ នៅលើទឹកដីរបស់រុស្ស៊ី។ បន្ថែមពីលើនេះ ក្រុមមន្រ្ដីរបស់ក្រុងកៀវ តែងតែសើចចំអកឲ្យក្រុងមូស្គូ អំពីអសមត្ថភាពរបស់កម្លាំងទាហានរុស្ស៊ី។

ដោយឡែក លោកឧត្ដមសេនីយ៍ អ៊ីហ័រ រ៉ូម៉ាណែនកូ (Ihor Romanenko) អតីតនាយរងអគ្គសេនាធិការកងទ័ពអ៊ុយក្រែន បានបញ្ជាក់ ថា ថ្វីបើក្រុងកៀវ មានសមត្ថភាពអាច និង គួរតែវាយប្រហារ ទៅលើទឹកដីរបស់រុស្ស៊ី យ៉ាងណាក៏ដោយ ក៏អ៊ុយក្រែន មិនចង់បង្ហាញព័ត៌មានលម្អិត អំពីប្រតិបត្ដិការរបស់ខ្លួននោះដែរ។ បើតាមគោលការណ៍ យើងទទួលបានបទបញ្ជាឲ្យវាយប្រហារតែទៅលើប្រទេសឈ្លានពាន។ ប៉ុន្តែយើងប្រកាន់ខ្ជាប់នូវច្បាប់ ត្រង់ថា ប្រសិនបើ ការវាយប្រហារកើតឡើង គួរតែកំណត់គោលដៅទៅលើទីតាំងយោធា ជាមុនសិន។

ក្រុមអ្នកវិភាគ បានអះអាង ថា អ៊ុយក្រែន កំពុងតែរៀបចំវាយប្រហារបន្ថែមទៀត ដោយការប្រើប្រាស់ដ្រូន។ សកម្មភាពបែបនេះ កំពុងតែធ្វើឲ្យក្រុមមន្រ្ដីកំពូលៗ គាំទ្រដោយវិមានក្រឹមឡាំង ព្រួយបារម្ភកាន់តែខ្លាំងឡើង។ ចំណែក កាលពីថ្ងៃទី២៦ ខែកុម្ភៈ មានការបំផ្ទុះចំនួនពីរគ្រាប់ បានធ្វើឱ្យកក្រើកអាកាសយានដ្ឋានមួយ នៅក្នុងប្រទេសបេឡារុស គាំទ្រដោយប្រធានាធិបតី លោក វ៉្លាឌីមៀ ពូទីន បណ្ដាលឱ្យខូចខាត ដល់យន្តហោះដ៏ទំនើបមួយគ្រឿង នៅក្នុងចំណោមយន្តហោះ A-50 ចំនួន៩គ្រឿង។ ប៉ុន្ដែក្រោមមក ក្រុមប្រឆាំងបេឡារុស បានចេញមុខ អះអាងទទួលខុសត្រូវ អំពីសកម្មភាពបំផ្ទុះនេះ។ ចំណែក កាលពីរាត្រីថ្ងៃចន្ទ ទី២៧ ខែកុម្ភៈ ក៏មានការដ្រូនយ៉ាងតិចចំនួន៤គ្រឿង បានធ្លាក់ក្បែរស្ថានីយថាមពល នាភាគខាងលិច ទីក្រុងបែលហ្គោរ៉ូដ (Belgorod) ប្រទេសរុស្ស៊ី ដែលមានចម្ងាយ៤០គីឡូម៉ែត្រពីព្រំដែន ខណៈកាលពីថ្ងៃអង្គារ មានវត្ថុហោះហើរមួយ បានស្ថិតនៅលើទីក្រុង St Petersburg ជាទីកន្លែងកំណើតរបស់លោក ពូទីន។

កាលពីដើមខែធ្នូ ឆ្នាំ២០២២ ដ្រូនរបស់អ៊ុយក្រែន បានវាយប្រហារទៅលើមូលដ្ឋានទ័ពអាកាសផ្ទុកយន្ដហោះទម្លាក់គ្រាប់បែកយុទ្ធសាស្រ្ដរបស់រុស្ស៊ី ដែលមានចម្ងាយ៦៥០គីឡូម៉ែត្រ ពីព្រំដែនភាគខាងកើតអ៊ុយក្រែន។ ភាគច្រើន ការវាយប្រហារនេះ ទំនងជាប្រើប្រាស់យន្តហោះគ្មានមនុស្សបើក ឬ ដ្រូន Tu-141 ត្រូវបានរចនាឡើង នៅក្នុងសម័យសូវៀត ហើយត្រូវបានកែច្នៃឡើងវិញ នៅទីក្រុងខាកូវ (Kharkov) នាភាគខាងកើត ប្រទេសអ៊ុយក្រែន។

បណ្ដាញផ្សព្វផ្សាយរបស់រុស្ស៊ី បានអះអាង ថា ការវាយប្រហារផ្សេងៗទៀត ត្រូវបានធ្វើឡើង ដោយដ្រូនផលិត ដោយរុស្ស៊ី ប្រភេទ Granat-4 (ហ្កាណាត-៤) ដ្រូនស៊ីវិលរបស់ចិនបំពាក់គ្រឿងបំផ្ទុះផលិតដោយអង់គ្លេស ឬ ដ្រូន UJ-22 ផលិតដោយអ៊ុយក្រែន។ ដោយឡែក ក្រុមហ៊ុនផលិតដ្រូនរបស់អ៊ុយក្រែន Ukrjet ធ្លាប់អះអាង ថា ដ្រូន UJ-22 របស់ខ្លួន មានសមត្ថភាពហោះហើរ រហូតដល់ចម្ងាយ៨០០គីឡូម៉ែត្រ។ ដូច្នេះដ្រូននេះ អាចហោះហើរ ចេញពីប្រទេសអ៊ុយក្រែន សមល្មមនឹងវាយប្រហារ ដល់តំបន់ជាច្រើនរបស់រុស្ស៊ី។

លោក អេនតុន ហ្គេរ៉ាសចេនកូ (Anton Gerashchenko) ទីប្រឹក្សា ក្រសួងមហាផ្ទៃអ៊ុយក្រែន បានបង្ហោះរូបភាពដ្រូន នៅលើបណ្ដាញសង្គម ថា «ដ្រូនUJ-22 នេះ អាចហោះហើរ នៅក្នុងចម្ងាយ ៥០០គីឡូម៉ែត្រ ចេញពីព្រំដែន រវាងប្រទេសរុស្ស៊ី និង អ៊ុយក្រែន។ ដូច្នេះនៅក្នុងរយៈពេលមិនយូរប៉ុន្មាន លោក វ៉្លាឌីមៀ ពូទីន ប្រធានាធិបតីរុស្ស៊ី អាចនឹងភ័យខ្លាច ហើយក៏លែងហ៊ានបង្ហាញខ្លួនឯង ជាសាធារណៈ ដោយសារតែយន្តហោះគ្មានមនុស្សបើក ឬ ដ្រូននេះ អាចមានសមត្ថភាពហោះហើរ នៅក្នុងរយៈចម្ងាយឆ្ងាយ»។

ដោយឡែក ក្រសួងការពារជាតិរុស្ស៊ី បានចោទប្រកាន់ ដល់រដ្ឋាភិបាលអ៊ុយក្រែន អំពីការប៉ុនប៉ង ប្រើប្រាស់ដ្រូន វាយប្រហារ ប្រឆាំងនឹងហេដ្ឋារចនាសម័្ពន្ធស៊ីវិល នៅក្នុងតំបន់ក្រាស្នូដា (Krasnodar) និង សាធារណរដ្ឋអាឌីហ្គា (Adygea) ប្រទេសរុស្ស៊ី៕

ប្រទេសចិន ៖ អ្នកនាំពាក្យក្រសួងការបរទេសចិន លោកស្រី Mao Ning បានបង្ហាញថា ចិននៅតែមានទំនាក់ទំនងជាមួយភាគីពាក់ព័ន្ធទាំងអស់ក្នុងជម្លោះរវាងរុស្ស៊ីជាមួយអ៊ុយក្រែន មិនថាបណ្តាប្រទេសលោកខាងលិច រុស្ស៊ី ហើយចិនក៏មានទំនាក់ទំនងជាមួយរដ្ឋាភិបាលអ៊ុយក្រែនផងដែរ ។ ការអះអាងនេះ គឺជាការឆ្លើយតបទៅកាន់សំណួររបស់ប្រធានាធិបតីអ៊ុយក្រែន លោក Volodymyr Zelensky ដែលនិយាយថា លោករីករាយក្នុងការពិភាក្សាជាមួយចិន ហើយលោកមានផែនការជជែកជាមួយប្រធានាធិបតីចិន លោក ស៊ី ជិនពីង ។

លោកស្រី Mao Ning ថ្លែងថា គោលជំហររបស់ចិនចំពោះវិបត្តិនៅអ៊ុយក្រែន គឺមានភាពច្បាស់លាស់ណាស់ និងមិនផ្លាស់ប្តូរ ដោយចិនគាំទ្រការចរចាសន្តិភាព និងជំរុញការដោះស្រាយបញ្ហានយោបាយ ។ កាលពីថ្ងៃទី២៤ ខែកុម្ភៈ កន្លងមក លោក Zelensky និយាយថា លោកមានផែនការជជែកជាមួយប្រធានាធិបតីចិន លោក ស៊ី ជិនពីង ប៉ុន្តែលោកមិនបានបញ្ជាក់ថា នឹងជជែកនៅពេលណាទេ ។

ជាមួយគ្នានេះ អ្នកនាំពាក្យក្រសួងការបរទេសចិនថ្លែងថា ការដាក់ទណ្ឌកម្មលើបណ្តាក្រុមហ៊ុនរបស់ចិន ករណីបញ្ជូនអាវុធឱ្យរុស្ស៊ីនោះជារឿងខុសច្បាប់ ចំណែកការប្រព្រឹត្តរបស់អាមេរិកមិនស្របច្បាប់អន្តរជាតិទេ ហើយក៏មិនទទួលការអនុញ្ញាតពីក្រុមប្រឹក្សាសន្តិសុខអង្គការសហប្រជាជាតិដែរ ។ ដូច្នេះ ការប្រព្រឹត្តរបស់អាមេរិកបានបង្កការខូចខាតធ្ងន់ធ្ងរដល់ផលប្រយោជន៍របស់ចិន ហើយចិនមិនពេញចិត្តយ៉ាងខ្លាំង និងប្រឆាំងរឿងនេះ ។ អ្នកនាំពាក្យក្រសួងការបរទេសចិនថ្លែងបែបនេះ ក្រោយពីអាមេរិកដាស់តឿនចិនអំពីផលវិបាកធ្ងន់ធ្ងរ បើចិនបញ្ជូនអាវុធឱ្យកងទ័ពរុស្ស៊ីឈ្លានពានអ៊ុយក្រែន ៕

ប្រភព ៖ TNN World

ប្រទេសជប៉ុន ៖ កាលពីថ្ងៃទី២៤ ខែកុម្ភៈ កន្លងមក ក្រុមហ៊ុនផលិតរថយន្តចិន BYD បានប្រគល់រថយន្តក្រុងអគ្គិសនីសម្រាប់ទីក្រុងគីតាហ៊ីរ៉ូ ស៊ីម៉ា ខេត្តហុកកៃដូ របស់ជប៉ុន ខណៈទីក្រុងនេះបានព្យាយាមបង្កើនការប្រើប្រាស់ថាមពលអគ្គិសនី ។ រថយន្តក្រុងអគ្គិសនីមានចំនួន៥គ្រឿងនឹងដឹកជញ្ជូនអ្នកដំណើររវាងខេត្តហុកកៃដូ និង Ballpark F Village ជាមជ្ឈមណ្ឌលកីឡា និងការកម្សាន្តក្នុងស្រុក ជាមួយស្ថានីយរថភ្លើងគីតាហ៊ីរ៉ូ ស៊ីម៉ា ។ គេចាត់ទុកថា ជាការប្រគល់រថយន្តក្រុងអគ្គិសនីដំបូងគេនៅខេត្តហុកកៃដូ របស់ក្រុមហ៊ុន BYD Japan Co., Ltd ។

រថយន្តក្រុងនេះនឹងចាប់ផ្តើមផ្តល់សេវាកម្មនៅថ្ងៃទី១៤ ខែមីនា ដោយវាសមស្របជាមួយអ្នកដំណើរមានអាយុច្រើន និងអាចដឹកអ្នកដំណើរបាន៨០នាក់ ។ វាត្រូវបានគេតុបតែងឡើងដោយមានផ្ទៃភាគច្រើនពណ៌ខ្មៅ ដើម្បីបង្ហាញពីទីលានកីឡា S.Con Field Hokkaido ។

Harunari Nishimura ប្រធានក្រុមហ៊ុន Hokkaido Bus បង្ហាញថា រថយន្តក្រុងអគ្គិសនីចាប់ផ្តើមដំណើរការប្រើប្រាស់ដំបូងមានអត្ថន័យសំខាន់យ៉ាងខ្លាំង ព្រោះហុកកៃដូស្ទើរតែគ្មានបទពិសោធន៍ផ្នែកនេះ ហើយប្រទេសជប៉ុនមានអត្រាការប្រើប្រាស់រថយន្តអគ្គិសនីទាប ។

Maezawa Ken នាយកប្រតិបត្តិ និងជាអ្នកគ្រប់គ្រងទូទៅផ្នែកប្រតិបត្តិការអាជីវកម្មរបស់ Fighters Sports & Entertainment បញ្ជាក់ថា ការជ្រើសរើសប្រើប្រាស់រថយន្តក្រុងនឹងរួមចំណែកដល់ការលើកកម្ពស់ចំណុចកណ្តាលនៃកាបូនក្នុងតំបន់ និងការជម្លៀសបន្ទាន់ផងដែរ ។

នាយកប្រតិបត្តិរូបនេះបានថ្លែងទៅកាន់សារព័ត៌មានស៊ិនហួរក្នុងពិធីប្រគល់រថយន្តក្រុងថា Fighters Sports អាចនឹងប្រើប្រាស់រថយន្តអគ្គិសនីរបស់ក្រុមហ៊ុន BYD បន្ថែមទៀតដើម្បីលើកកម្ពស់ការការពារបរិស្ថាន និងទទួលដឹកអ្នកដំណើរចិនពេលពួកគេមកលេងហុកកៃដូ ។ ម្យ៉ាងទៀត Hokkaido Ballpark F Village ស្ថិតនៅចន្លោះទីក្រុង Sapporo និងអាកាសយានដ្ឋាន New Chitose ។ រថយន្តនេះអាចដឹកអ្នកដំណើរបានពេញមួយឆ្នាំ ព្រមទាំងផ្តល់ជូននូវសកម្មភាពកម្សាន្តផ្សេងៗដល់ភ្ញៀវទេសចរផងដែរ ៕

ប្រភព ៖ newpapertoday