នៅព្រឹកថ្ងៃទី២២ ខែមេសា ឆ្នាំ២០២៣ ប្រជាពលរដ្ឋរាប់នាក់ដែលរងគ្រោះដោយសារឧកញ៉ា ជា សារ៉ន បានចូលរួមដោះស្រាយវិវាទសម្របសម្រួលក្រៅប្រព័ន្ធតុលាការ ជាមួយ ឯកឧត្តម ម៉ៅ ធនិន អភិបាលនៃគណៈភិបាលខេត្តកំពតហើយ ក្នុងនោះឧកញ៉ា ជា សារ៉នក៏មានវត្តមាននៃការដោះស្រាយលើកនេះផងដែរ។

ប្រជាពលរដ្ឋជាច្រើនគ្រួសារបានអំពាវនាវស្វែងរកយុត្តិធម៌ពីថ្នាក់ដឹកនាំក្រោយពីឧកញ៉ាជា សារ៉ន មិនព្រមផ្តល់អត្ថប្រយោជន៍ដល់ពួកគាត់ជាច្រើនខែ ដែលបានខ្ចីលុយធនាគារមកវិនិយោគជាមួយឧកញ៉ារូបនេះដោយក្នុងមួយគ្រួសារតិចបំផុតចំនួន១ម៉ឺនដុល្លារ និងច្រើនបំផុត១០ម៉ឺនដុល្លារ។ ប៉ុន្តែក្រុមហ៊ុន ជា សារ៉ន ដែលល្បីរឿងវិនិយោគដីឡូត៍ចំណេញប្រាក់ខ្ពស់នេះ បាន រំលោភលើសេចក្តីទុកចិត្តលើកិច្ចសន្យាជាមួយពលរដ្ឋ១០០០គ្រួសារនៅខេត្តកំពត។ ក្នុងនោះជនរងគ្រោះជាច្រើនគ្រួសារស្នើឱ្យថ្នាក់ដឹកនាំជួយដោះស្រាយ ហើយស្នើឱ្យឧកញ៉ា ជា សារ៉ន ចូលខ្លួនដោះស្រាយលើបញ្ហានេះ ព្រោះពួកគាត់ត្រូវយកលុយទៅបង់ធនាគារ។

យ៉ាងណានៅព្រឹកថ្ងៃទី២២ ខែមេសា ស្ថិតនៅទីតាំងបរិវេណវត្តអង្គឈូក ភូមិឈើទាល ឃុំឈូក ស្រុកឈូក ខេត្តកំពតមាន ប្រជាពលរដ្ឋរាប់ពាន់នាក់បានចូលខ្លួនមកដោះស្រាយបញ្ហាខាងលើនេះជាមួយអភិបាលខេត្តកំពត ឯកឧត្តម ម៉ៅ ធនិន រួមជាមួយឧកញ៉ា ជា សារ៉ន និងក្រុមការងារលោកក៏បានចូលខ្លួនមកដោះស្រាយជាមួយប្រជាពលរដ្ឋផងដែរ។ បន្ថែមពីលើនេះអ្នកលេងបណ្តាញសង្គមជាច្រើនសង្ឃឹមថា អភិបាលខេត្តកំពតនឹងរកដំណោះស្រាយដ៏ល្អមួយដល់គ្រួសារជនរងគ្រោះដែលចាញ់បោកក្រោមស្នាដៃរបស់ឧកញ៉ារូបនេះ៕

ប្រិយមិត្តជ្រាបមកហើយថា វណ្ណដា បានសម្តែងនៅលើឆាកដ៏អស្ចារ្យ rolling Loud នៅប្រទេសថៃកាលពីថ្ងៃមុនទទួលបានការគាំទ្រយ៉ាងខ្លាំងពីសំណាក់អ្នកគាំទ្រទាំងក្នុងនិងក្រៅប្រទេស ដែលការប្រគំតន្រ្តីនេះគឺជាព្រឹត្តិការណ៍ដ៏ធំមួយរៀបចំតាមបែបអន្តរជាតិដែលសម្បូរទៅដោយជនបរទេសច្រើនជាងជនជាតិអាស៊ីចូលរួម ហើយអ្នកចូលរួមអាចស្លៀកពាក់ស៊ិចស៊ីខ្លាំងក៏បាន។

យ៉ាងណាមិញ ទន្ទឹមនឹងមោទកភាពដែលអ្នកគាំទ្រមានចំពោះតារាចម្រៀង វណ្ណដា បានសាងភាពល្បីល្បាញឈរដល់ចំណុចមួយមានការទទួលស្គាល់រហូតតារាចម្រៀងប្រទេសកម្ពុជាអាចសម្តែងនៅលើឆាកអន្តរជាតិ rolling Loud ថ្មីៗនេះតម្លៃខ្លួនរបស់ វណ្ណដា បានបែកធ្លាយនៅលើបណ្តាញសង្គមដែលទទួលបានតម្លៃខ្ពស់មិនធម្មតា។

តម្លៃខ្លួនរបស់ វណ្ណដា ដែលសម្តែងនៅលើឆាក rolling Loud នៅប្រទេសថៃ ម៉ាដាមដា ដែលជាអ្នកជំនួញអនឡាញល្បីឈ្មោះមួយរូបបានបង្ហើបថា តារារ៉េបដែលមានការទទួលស្គាល់អន្តរជាតិរូបនេះទទួលបានជិតខ្ទង់លានដុល្លារនៅខ្វះតែបន្តិចទៀតប៉ុណ្ណោះដែលធ្វើឱ្យអ្នកគាំទ្ររបស់ វណ្ណដា រំភើបនិងភ្ញាក់ផ្អើលយ៉ាងខ្លាំង។ ក្នុងនោះអ្នកជំនួញរូបនេះបន្ថែមទៀតថា បើសិនជា វណ្ណដា មិនមានលក្ខណៈសម្បត្តិគ្រប់គ្រាន់ ក៏មិនអាចមានវត្តមាននៅលើឆាកលំដាប់អន្តរជាតិនេះដូចគ្នា ទោះបីជាមានអ្នកណែនាំខ្លាំងយ៉ាងណាក៏ដោយ។

គួរបញ្ជាក់ផងដែរថា ការប្រគំតន្រ្តី rolling Loud វណ្ណដា ក៏បានសម្តែងបទ «Time To Rise » ផងដែរ រួមជាមួយបទចម្រៀងល្បីៗផ្សេងទៀតដូចជា «កំលោះស្រុកខ្មែរ» «Hot Boy» និងបទ «Bong» ជាដើម។ មិនត្រឹមតែប៉ុណ្ណោះ វណ្ណដា ក៏អាចខាបចិត្តតារាថៃល្បីមួយចំនួនដែលចូលរួមនៅលើឆាកនេះមក រាំបទលោក និង add Story នៅលើគណនី IG របស់ពួកគេផងដែរ។ ជាពិសេស ពេលវិលមកមាតុភូមិវិញ វណ្ណដា បានជិះយន្តហោះលក្ខណៈឯកជន ដែលជាការរៀបចំឡើងដោយក្រុមហ៊ុនស្រាបៀរដែលតារាចម្រៀងរូបនេះទូតសុឆន្ទៈទៀតផង៕

ប្រទេសថៃ ៖ នាពេលឆាប់ៗនេះ ពលរដ្ឋថៃនឹងបានទស្សនា និងរួមគ្នាគាំទ្រកីឡាកររបស់ខ្លួនមកប្រកួតកីឡាស៊ីហ្គេម ឆ្នាំ២០២៣ នៅប្រទេសកម្ពុជា ។ ដូច្នេះ ថៃបានត្រៀមកីឡាជាច្រើនប្រភេទដើម្បីចូលរួមប្រកួត ប៉ុន្តែសម្រាប់ក្រុមបាល់ទះនារីជម្រើសជាតិរបស់ថៃវិញ គ្រូបង្វឹកលើកឡើងថា កំពុងតែប្រឈមនឹងបញ្ហាកីឡាការិនីម្នាក់រងរបួស ប៉ុន្តែមិនបានបញ្ជាក់ថា រងរបួសដោយសារអ្វីទេ ។

លោក Danai Sriwatcharamethakul ជាគ្រូបង្វឹកក្រុមបាល់ទះនារីជម្រើសជាតិថៃ បាននិយាយអំពីរបួសស្នាមរបស់កីឡាការិនី Chompoo Pornphan Kerdprat ថា បើតាមកីឡាការិនីរូបនេះប្រាប់ និងតាមលទ្ធផលត្រួតពិនិត្យឃើញថា អាចត្រូវរង់ចាំឱ្យនាងត្រឡប់មកវិញសិន ហើយលោកដឹងថា នាងមិនរងរបួសធ្ងន់ធ្ងរទេ ។

លោក Danai បន្តថា ៖ «បើកីឡាការិនី Chompoo ជាសះស្បើយមិនទាន់ ឬនាងមិនអាចចូលរួមប្រកួតបានទេ យើងបានត្រៀមអ្នកផ្សេងជំនួសហើយ គឺយើងបានត្រៀមអ្នកផ្សេងសម្រាប់ជំនួសគ្រប់តំណែងទាំងអស់ ហើយខ្ញុំគិតថា គ្មានបញ្ហាអ្វីទេ ។ រីឯគោលដៅរបស់យើង គឺត្រូវរក្សាតំណែងជើងឯកឱ្យបានដើម្បីរក្សាស្តង់ដារប្រទេសថៃ» ។

លោក Danai បន្ថែមថា បច្ចុប្បន្ននេះ យើងបានត្រៀមក្រុមហ្វឹកហាត់រួចរាល់ហើយ ប៉ុន្តែសំខាន់យើងត្រូវផ្តោតលើសុវត្ថិភាពរបស់កីឡាករពេលទៅប្រកួតនៅក្រៅប្រទេស ពីព្រោះការប្រកួតមានភាពខុសប្លែកគ្នា ។ ដូច្នេះ ត្រូវការពេលវេលាហ្វឹកហាត់ដើម្បីអាចប្រកួតជាមួយគ្នាយ៉ាងពេញលេញ ។

គ្រូបង្វឹកក្រុមបាល់ទះនារីជម្រើសជាតិរូបនេះបារម្ភថា ៖ «ពេលនេះ ខ្ញុំបារម្ភតែម្យ៉ាងទេ គឺរឿងទីលានសម្រាប់ប្រកួត ព្រោះគេរាយការណ៍មកថា ទីលានប្រកួតនេះធ្វើមិនទាន់រួចរាល់ទេ ។ ដូច្នេះ វានឹងធ្វើឱ្យប៉ះពាល់ដល់កីឡាករ-កីឡាការិនី គឺពួកគេអាចនឹងរងរបួស ។ ហេតុនេះ ពេលប្រកួតយើងត្រូវមើលថែកីឡាករមិនឱ្យពួកគេរងរបួសដាច់ខាត» ។គ្រូបង្វឹកបញ្ជាក់ថា ក្រុមបាល់ទះនារីជម្រើសជាតិថៃនឹងត្រូវប្រកួតនៅខ្សែ A ជាមួយប្រទេសម៉ាឡេស៊ី, ឥណ្ឌូណេស៊ី និងមីយ៉ាន់ម៉ា ហើយក្រុមរបស់យើងនឹងធ្វើដំណើរទៅប្រទេសកម្ពុជា នៅថ្ងៃទី៧ ខែឧសភា តាមជើងយន្តហោះ WE586 ដើម្បីត្រៀមប្រកួតជាមួយក្រុមម៉ាឡេស៊ី នៅថ្ងៃទី៩ ខែឧសភា ៕ ប្រភព ៖ Thainews

ស្ពាន​ឆ្លងកាត់​ទន្លេមេគង្គ​ និងផ្លូវតភ្ជាប់​ក្នុងខេត្ត​ក្រចេះ ត្រូវបានបើកការដ្ឋាន​សាងសង់​កាលពីដើមខែមករា ឆ្នាំ​២០២៣​កន្លងទៅ​ ក្រោម​អធិបតីភាព​សម្តេចតេជោ ហ៊ុន សែន។

ស្ពានឆ្លងកាត់ទន្លេមេគង្គខេត្តក្រចេះនេះ គឺ មានប្រវែង ១៧៦១ម៉ែត្រ ត្រើយខាងកើត ស្ថិតនៅត្រង់ភូមិតាលុស ឃុំបុសលាវ ស្រុកចិត្របុរី និងត្រើយខាងលិច ស្ថិតនៅត្រងមិថ្មរាប ឃុំព្រែកប្រសព្វ ស្រុកព្រែកប្រសព្វ។ ស្ពាននេះ នឹងត្រូវស្ថាបនាឡើងដោយមានមុខកាត់ទទឹង ១៣,៥ម៉ែត្រ មានគន្លងផ្លូវសម្រាប់រថយន្តចរាចរណ៍ចំនួន ២គន្លងទៅមក ប្រវែង ៣,៥ម៉ែត្រ គន្លងផ្លូវសម្រាប់ទោចក្រយានចំនួន ២គន្លងទៅមក ប្រវែង ១,៧៥ម៉ែត្រ ផ្លូវថ្មើរជើងចំនួន ២គន្លងទៅមក ប្រវែង ១ម៉ែត្រ និងបង្កាន់ដៃស្ពានសងខាង ប្រវែង០,៥ម៉ែត្រ។

ចំណែកឯផ្លូវតភ្ជាប់មានប្រវែង ៣១,៦៩គីឡូម៉ែត្រ រួមមាន៖ ផ្លូវតភ្ជាប់ពីក្បាលស្ពានមានប្រវែង ១៥,៤៩គីឡូម៉ែត្រ និងផ្លូវខ្នែងចំនួន ៤ខ្សែ នៅក្នុងក្រុងក្រចេះ មានប្រវែង ១៦,២០៨គីឡូម៉ែត្រ។ ខ្សែផ្លូវទាំងនេះ នឹងត្រូវសាងសង់ពង្រីក និងលើកកម្រិតគុណភាពដោយក្រាលបេតុងកៅស៊ូ(AC) កម្រាស់ ៧សង់ទីម៉ែត្រដូចគ្នា ដោយក្នុងនោះ កំណាត់ផ្លូវ ៤ខ្សែ ប្រវែង ២៦,៦៧គីឡូម៉ែត្រ នឹងត្រូវស្ថាបនាពង្រីកទទឹងចាប់ពី ៩ម៉ែត្រ រហូតដល់ ១៣ម៉ែត្រ លើតួផ្លូវចាប់ពី ១១ម៉ែត្រ រហូតដល់ ១៩,៥ម៉ែត្រ និងកំណាត់ផ្លូវ១ខ្សែ ប្រវែង ៥,០២៥គីឡូម៉ែត្រ នឹងត្រូវពង្រីកទទឹង ១៩ម៉ែត្រ លើតួផ្លូវ ៣០ម៉ែត្រ ដែលមានគន្លងផ្លូវសម្រាប់រថយន្តធ្វើចរាចរណ៍ ចំនួន ៤គន្លង(២ទៅ ២មក) គន្លងផ្លូវសម្រាប់ទោចក្រយានចំនួន ២គន្លង(១ទៅ ១មក) និងមានសួនពុះទ្រូងផ្លូវនៅចំកណ្តាល ប្រវែង ៤ម៉ែត្រ ផងដែរ។ គម្រោងនេះនឹងបញ្ចូលនូវការសាងសង់ស្ពានមធ្យមចំនួន ៤កន្លែង ប្រវែងសរុប ៣៨៤ម៉ែត្រ ដាក់លូគ្រប់ប្រភេទចំនួន ២៦កន្លែង និងបំពាក់ស្លាកសញ្ញាចរាចរណ៍ គំនូសចរាចរណ៍ បង្គោលគីឡូម៉ែត្រ បង្គោលសុវត្ថិភាពទៅតាមបទដ្ឋានបច្ចេកទេសផ្លូវថ្នល់។
គម្រោងនេះ នឹងត្រូវអនុវត្ដការសាងសង់ដោយក្រុមហ៊ុនសំណង់សៀងហៃ(SCG) និងត្រួតពិនិត្យបច្ចេកទេសដោយក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន ប្រើប្រាស់រយៈពេលសាងសង់ចំនួន ៤២ខែ នឹងគ្រោង​បញ្ចប់នៅក្នុងខែមិថុនា ឆ្នាំ២០២៦ គ្រោងចំណាយថវិកាសរុបប្រមាណជាង ១១៤លានដុល្លារអាមេរិក ដែលជាឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ ការបោសសម្អាតគ្រាប់មីន យុទ្ធភ័ណ្ឌមិនទាន់ផ្ទុះ និងពន្ធអាករផ្សេងៗ៕

ព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ខេត្តកំពតត្រូវបានជ្រើសរើសជាតាំងសម្រាប់ការប្រកួតកីឡា ប្រណាំងទូក ប្រពៃណីខ្នាតអន្តរជាតិ (ទូកនាគ) និងទូកផ្កាចារ ចាប់ពីថ្ងៃទី១០ ដល់ថ្ងៃទី១៦ ខែឧសភា ឆ្នាំ២០២៣។ នេះបើតាមការឱ្យដឹងពីរដ្ឋបាលខេត្តកំពតនៅថ្ងៃទី២១ ខែមេសា ឆ្នាំ២០២៣។

បន្ថែមលើនោះរដ្ឋបាលខេត្តមានការរៀបចំស្ដង់ដាក់តាំងបង្ហាញកសិផលផ្លែឈើដូចជា(ទុរេន សាវម៉ៅ ចេកអំបូងលឿង មង្ឃុត ដូង ស្វាយ …) និងការរៀបចំប្រគំ តន្ត្រីបុរាណ សម័យ ការសម្តែងរបាំប្រពៃណី នៅតាមបណ្ដោយមាត់ព្រែកខាងមុខសាលាខេត្តដែលអាចឱ្យប្រជាពលរដ្ឋចូលរួមទស្សនាក្នុងព្រឹត្តការណ៍ប្រកួតដោយផ្ទាល់ដើម្បីជួយគាំទ្រដល់កីឡាករជាតិ និងអន្តរជាតិ ។

ជាមួយគ្នានេះដែរ រដ្ឋបាលខេត្តកំពតអំពាវនាវឱ្យប្រជាពលរដ្ឋចូលរួមថែរក្សាអនាម័យ បរិស្ថានស្អាតទាំងអស់គ្នាដើម្បីលើកកម្ពស់កិត្តិនាមរបស់ព្រះរាជាណាចក្រកម្ពុជាអច្ឆរិយៈ ក៏ដូចជាមុខមាត់ខេត្តកំពត៕

ក្រសួងពាណិជ្ជកម្មបានប្រកាសនៅល្ងាចថ្ងៃទី២១ ខែមេសា ឆ្នាំ២០២៣ ទៅដល់ក្រុមហ៊ុន សហគ្រាសជាតិ និងអន្តរជាតិនានា ដែលមានផលិតផលគុណភាពខ្ពស់អាចដាក់តាំងផ្សព្វផ្សាយ និងលក់ផលិតផល ក្នុងអំឡុងព្រឹត្តិការណ៍ស៊ីហ្គេមដោយតម្រូវឱ្យទាក់ទងបំពេញបែបបទជាមុនសិន។

ការរៀបចំព្រឹត្តិការណ៍ខាងលើនេះមានឈ្មោះថា “ផ្សារណាត់ផលិតផលមានគុណភាព (Top Brand Fair)” ដែលនឹងប្រព្រឹត្តទៅចាប់ពីថ្ងៃទី៥-២១ ខែឧសភា ឆ្នាំ២០២៣(ចំនួន១៧ថ្ងៃ) នៅវិមានអាហារ ទីក្រុងរណបជ្រោយចង្វា ផ្លូវ OCIC (ផ្លូវទៅកាន់ពហុកីឡដ្ឋានមរតតេជោ) រាជធានីភ្នំពេញ ក្រោមកិច្ចសហការក្រុមហ៊ុន ភីធីជី ជាមួយ ក្រុមហ៊ុន OCIC

«ផ្សារណាត់ផលិតផលគុណភាពខ្ពស់» នេះធ្វើឡើងដើម្បីចូលរួមអបអរសាទរ ព្រឹត្តិការណ៍ជាប្រវត្តិសាស្រ្តដែលព្រះរាជាណាចក្រកម្ពុជា ធ្វើជាម្ចាស់ផ្ទះលើកដំបូងក្នុងការរៀបចំព្រឹត្តិការណ៍កីឡាដ៏ធំជាងគេនៅក្នុងតំបន់អាស៊ានគឺ កីឡាស៊ីហ្គេមលើកទី៣២ ដែលផ្តល់ឱកាសជូនដល់ក្រុមហ៊ុន សហគ្រាសជាតិ និងអន្តរជាតិនានា ដែលមានផលិតផលគុណភាពខ្ពស់អាចដាក់តាំងផ្សព្វផ្សាយ និងលក់ផលិតផល ក្នុងអំឡុងព្រឹត្តិការណ៍ស៊ីហ្គេមនេះ ដោយតម្រូវឱ្យម្ចាស់ផលិតផលទាក់ទង និងបំពេញបែបបទ ចាប់ពីថ្ងៃជូនដំណឹង រហូតដល់ថ្ងៃទី៣០ ខែមេសា ឆ្នាំ២០២៣៕