កន្លងមក ការអភិវឌ្ឍមួយក្នុងចំណោមការផ្លាស់ប្តូរផ្នែកបច្ចេកវិទ្យានៅលើពិភពលោកនេះ គឺការកើនឡើងនៃបញ្ញាសិប្បនិម្មិត Artificial intelligence (AI) ដែលវាកាន់តែមានភាពវៃឆ្លាត ហើយពេលខ្លះ វាអាចឆ្លាតហួសរហូតធ្វើឱ្យគេបារម្ភផងដែរ ជាក់ស្តែង កម្មវិធី ChatGPT អាចធ្វើឱ្យមនុស្សជាច្រើននាក់ត្រូវបាត់បង់ការងារ ។ ការបារម្ភពីបច្ចេកវិទ្យានេះ គឺជាអ្វីដែលលោក Elon Musk បិតាបច្ចេកវិទ្យាកំពុងបារម្ភដូចគ្នា ។

លោក Elon Musk ជាស្ថាបនិកក្រុមហ៊ុន Tesla និងជា CEO របស់ Twitter បានលើកឡើងក្នុងអំឡុងពេលលោកជួបជាមួយបណ្តាវិនិយោគិនរបស់ Tesla ក្នុងពិធី Investor Day ប្រចាំឆ្នាំ២០២៣ ដោយលោកទទួលស្គាល់ត្រង់ៗថា AI បានអភិវឌ្ឍន៍ខ្លួនយ៉ាងខ្លាំងក្លាជារឿងដែលធ្វើឱ្យលោកតានតឹងជាខ្លាំង ។

លោក Elon Musk ថ្លែងថា ៖ «ខ្ញុំបារម្ភពីបញ្ញាសិប្បនិម្មិត (AI) កំពុងតែរីកលូតលាស់យ៉ាងខ្លាំង ហើយគេចាត់ទុកថា វាជាបច្ចេកវិទ្យាមួយមានគ្រោះថ្នាក់ ហើយខ្ញុំខ្លាចថា ពួកយើងកំពុងអភិវឌ្ឍន៍វាខ្លាំងពេក តែទោះយ៉ាងណា ក្រុមហ៊ុន Tesla ក៏បានប្រើប្រយោជន៍ពីវាដែរ ដូចជា ការប្រើប្រព័ន្ធបើកបរដោយខ្លួនឯង ។ ដូច្នេះ ខ្ញុំជឿថា AI មិនទាន់គ្រប់គ្រងពិភពលោកនៅពេលនេះទេ ហើយវាក៏មិនទាន់អាចបង្កើតរថយន្តដោយខ្លួនឯងបានដែរ តែនៅថ្ងៃអនាគត ពេលវាបានអភិវឌ្ឍន៍កាន់តែខ្លាំងក្លាជាងនេះ ពួកយើងជាមនុស្សនឹងគ្មានប្រយោជន៍ទៀតទេ» ។

ក្រៅពីនេះ លោក Elon Musk ក៏បានបបួលវិនិយោគិនជជែករឿងកម្មវិធី ChatGPT ផងដែរ ដោយលោកសម្លឹងឃើញថា បច្ចុប្បន្ននេះ ការបង្កើត Chatbots ផ្ទាល់ខ្លួនកំពុងរីកចម្រើនរាល់ថ្ងៃ ហើយពេលខ្លះ គេបានផ្តោតលើការរកប្រាក់ចំណេញតែម្យ៉ាងប៉ុណ្ណោះ ។ ចំណែករូបលោកផ្ទាល់ មុននេះ ក៏ទើបបានប្រកាសថា កំពុងស្វែងរកក្រុមការងារធ្វើ Chatbots ដូចគ្នា ហើយការបង្កើតកម្មវិធីនេះឡើង គឹដើម្បីប្រកួតប្រជែងជាមួយ ChatGPT ។ ដូច្នេះ គេនឹងរង់ចាំមើលថា តើលោក Elon Musk នឹងធ្វើបែបណាបន្តទៀត ៕

ប្រភព ៖ beartaiBRIEF

ប្រទេសចិន ៖ ចិនបានដាក់គោលដៅការរីកលូតលាស់នៃសេដ្ឋកិច្ចប្រចាំឆ្នាំ២០២៣ ស្មើ៥% ធ្លាក់ចុះតិចតួចពីឆ្នាំ២០២២ ដែលស្មើ៥,៥% ។ លោកនាយករដ្ឋមន្ត្រី Li Keqiang បានផ្សព្វផ្សាយរបាយការណ៍ស្តីពីការងាររបស់រដ្ឋាភិបាល ក្នុងកិច្ចប្រជុំសភាតំណាងរាស្ត្រថ្នាក់ជាតិ (NPC) របស់ចិន ។

របាយការណ៍ការងាររបស់រដ្ឋាភិបាលបានផ្សព្វផ្សាយកាលពីថ្ងៃទី៥ ខែមីនា ជាថ្ងៃបើកកិច្ចប្រជុំសភាតំណាងរាស្ត្រថ្នាក់ជាតិនៅសាលប្រជុំក្នុងក្រុងប៉េកាំង ។ របាយការណ៍បញ្ជាក់ថា សេដ្ឋកិច្ចបានងើបឡើងវិញបន្ទាប់ពីចិនប្រើវិធានការទប់ស្កាត់ជំងឺកូវីដ-១៩ អស់រយៈពេល៣ឆ្នាំ ហើយរដ្ឋាភិបាលបានកំណត់គោលដៅឱនភាពថវិកាឆ្នាំ២០២៣ ស្មើ៣% និងកំណត់គោលដៅសន្ទស្សន៍តម្លៃអ្នកប្រើប្រាស់ស្មើ៣% ខណៈស្ថានភាពសេដ្ឋកិច្ចកាលពីឆ្នាំ២០២២ កើនឡើង៣% ខុសពីគោលដៅដែលបានកំណត់ទុកស្មើ៥,៥% ហើយគេចាត់ទុកជាការពង្រីកសេដ្ឋកិច្ចក្នុងអត្រាទាបបំផុតសម្រាប់រយៈពេលជិតពាក់កណ្តាលសតវត្សរ៍ ។

ការប្រជុំសភាតំណាងរាស្ត្រថ្នាក់ជាតិលើកទី១៤ ថ្ងៃដំបូង ប្រធានាធិបតី លោក ស៊ី ជិនពីង ដែលបានកាន់តំណែងសំខាន់ពីរទៀត គឺអគ្គលេខាធិការបក្សកុម្មុយនិស្តចិន និងគណៈកម្មាធិការកណ្តាល ព្រមទាំងជាប្រធានគណៈកម្មការយោធាមជ្ឈិម ព្រមទាំងបណ្តាមេដឹកនាំផ្សេងទៀតរបស់ចិនបានចូលរួមការប្រជុំ ដូចគ្នានឹងសមាជិក NPC មកពីផ្នែកជាច្រើនទៀតចំនួន២.៩៤៨នាក់ ។

លោកនាយករដ្ឋមន្ត្រី Li Keqiang ជាអ្នករាយការណ៍ពីសកម្មភាពការងាររបស់រដ្ឋាភិបាលថា សេដ្ឋកិច្ចចិនកំពុងងើបឡើងវិញយ៉ាងរឹងមាំ និងបង្ហាញឱ្យឃើញពីសក្តានុពលរីកចម្រើនទៅមុខ បើទោះជាបរិយាកាសខាងក្រៅមានភាពមិនច្បាស់លាស់ក្តី ដូចជា អតិផរណាពិភពលោកស្ថិតក្នុងអត្រាខ្ពស់ រួមទាំងការព្យាយាមដាក់សម្ពាធមកលើចិន ។

លោកបន្តថា ក្នុងភាពជាមេដឹកនាំរឹងមាំរបស់គណៈកម្មាធិការមជ្ឈិមបក្សកុម្មុយនិស្ត រដ្ឋាភិបាលបានទប់ស្កាត់នឹងការរីករាលដាលនៃជំងឺកូវីដ ដោយជំរុញការអភិវឌ្ឍសេដ្ឋកិច្ច និងសង្គមក្នុងទិសដៅមានប្រសិទ្ធភាព និងទំនាក់ទំនងគ្នាយ៉ាងល្អ ។ លើសពីនេះ ការយកឈ្នះលើបញ្ហាប្រឈមដ៏ធំធ្វើឱ្យចិនទទួលបានជោគជ័យក្នុងការអភិវឌ្ឍសេដ្ឋកិច្ចឱ្យរីកលូតលាស់យ៉ាងមានស្ថេរភាព ។

ការប្រជុំសភាតំណាងរាស្ត្រថ្នាក់ជាតិលើកទី១៤ រៀបចំឡើងចាប់ពីថ្ងៃទី៥-១៣ ខែមីនា មានរបៀបវារៈជាច្រើន រួមទាំងពិចារណាពីលទ្ធផលការងាររបស់រដ្ឋាភិបាល, ការអនុវត្តរបស់តុលាការកំពូលប្រជាជន ការជ្រើសរើស និងតែងតាំងមុខតំណែងនយោបាយសំខាន់ៗ ៕

ប្រភព ៖ TNN World

អាហ្សង់ទីន៖ កាលពីថ្ងៃទី ២៥ ខែធ្នូ Messi បានបង្ហោះនៅលើទំព័រផ្ទាល់ខ្លួនរបស់គាត់នូវវីដេអូដែលប្រពន្ធរបស់គាត់រាំតាមតន្ត្រីក្នុងអំឡុងពេលជប់លៀងបុណ្យណូអែលជាមួយគ្រួសាររបស់គាត់នៅប្រទេសអាហ្សង់ទីន។

វីដេអូនេះត្រូវបានចែករំលែកដោយមនុស្សជាច្រើន អ្នកគាំទ្រជាច្រើនបានបញ្ចេញមតិថា AntonellaដែលជាភរិយាMessi ថាមានរាងស្អាតជាងតារាបង្ហាញម៉ូតទៅទៀត។ ម្ដាយកូនបីនាក់ត្រូវបានគេសរសើរចំពោះការជ្រើសរើសសម្លៀកបំពាក់និងការហាត់ប្រាណជាប្រចាំរបស់នាងដែលធ្វើអោយនាងមាន សុខភាពល្អ និងសកម្ម។
យោងតាម Harpers Bazaar សម្រាប់គោលបំណងនៃការហ្វឹកហ្វឺនសុខភាព និងកាយសម្បទា Antonella បានដំឡើងកន្លែងហាត់ប្រាណនៅផ្ទះ ហើយកីឡាដែលនាងចូលចិត្តបំផុតគឺការជិះកង់និងការរាំ។ពេលនៅកន្លែងហាត់ប្រាណ Antonella ចូលចិត្តបើកតន្ត្រីខ្លាំងដើម្បីបង្កើនភាពរំភើប និងអារម្មណ៍រីករាយ។ ដោយក្នុង១សប្តាហ៍នាងហាត់ប្រាណចំនួន៥ដង។ នាងមិនប្រកាន់ជ្រុលពេកទេ នាងធ្លាប់បាននិយាយថា ការអនុវត្តរបបអាហារដ៏តឹងរ៉ឹងគឺជាការ “រងទុក្ខ” សម្រាប់នាង ដូច្នេះហើយនាងមិនអាចតស៊ូបានឡើយ។ នាងប្រើអាហារសម្បូរបែបដើម្បីធ្វើឱ្យមានតុល្យភាពសារធាតុចិញ្ចឹម ជួនកាលអនុញ្ញាតឱ្យខ្លួននាង “ញ៉ាំច្រើន” តាមដែលនាងចូលចិត្ត៕

ប្រភព៖vn express

ទិវានារីអន្តរជាតិ ៨មីនា គឺជាទិវាមួយដែលនារីជុំវិញពិភពលោកប្រារព្ធពិធីដើម្បីរំលឹកអប អរសាទរ។ជាឱកាសមួយ ត្រូវអបអរ ដោយ​មាន​ពិធី​បុណ្យ​រំលឹកខួបប្រារព្ធធ្វើដោយនារីជុំវិញ ពិភពលោក។ អង្គការសហប្រជាជាតិ ក៏ប្រារព្ធពិធីអបអរសាទរទិវានេះ និងប្រទេសជាច្រើន បាន​កំណត់​ទិវានេះ ថាជាថ្ងៃបុណ្យជាតិរបស់ខ្លួនផងដែរ។

ត្រឡប់ទៅឆ្នាំ១៩០០ ជា​សម័យកាល​ដែលមាន​ការផ្ទុះ​ឡើង និង​មាន​ភាព​ច្របូក ច្របល់​ច្រើន​នូវ​សកល​ឧស្សាហូបនីយកម្ម និង​ជា​ពេលដែល​មនោគមវិជ្ជា​រ៉ាឌីកាល់​បាន​រីក រាលដាល នាំឱ្យមាន​ការតវ៉ា និង ចលនា​ជាច្រើន​ដើម្បី​ទាមទារ​សិទ្ធិ​ផ្សេងៗ​របស់​ស្ត្រី រួមទាំង​តម្លៃ​ពលកម្ម និង លក្ខន្តិកៈ​ការងារ​ប្រសើរ​ជាង​មុន។

លុះដល់ឆ្នាំ១៩០៩ ទិវាសិទ្ធនារីជាតិលើកទីមួយត្រូវបានបង្កើតឡើងនៅក្នុងសហរដ្ឋអាមេរិកនៅថ្ងៃទី២៨ ខែ​កុម្ភៈ។ គណបក្សសង្គមនិយមរបស់អាមេរិកដែលបានកំណត់នៅថ្ងៃនេះដើម្បីលើកទឹកចិត្ត​ទៅដ​ល់​កម្មករកាត់ដេរដែលបានធ្វើការតវ៉ាប្រឆាំងនឹងលក្ខខណ្ឌការងារ នៅក្នុងទីក្រុង New York។

ក្រោមកទៀតឆ្នាំ១៩១០ សង្គមវិទូអន្តរជាតិ ដែលបានជួបប្រជុំគ្នានៅទីក្រុង Copenhagen បានបង្កើតជា​ទិវា​សិទ្ធ​នារី​មួយ​ដែលមានលក្ខណៈជាអន្តរជាតិដើម្បីជំរុញចលនាសិទ្ធិនារី និងដើម្បីធ្វើការគាំទ្រ លើក​តម្កើន​សំឡេង​របស់ស្ត្រីនៅលើឆាកអន្តរជាតិ។ សំណើនេះ​ត្រូវបានទទួល​បានការសាទរ និងទទួលយកជា​ឯកច្ឆន្ទ​ដោយសន្និសីទមួយដែលមានស្រ្តីជាង១០០នាក់មកពី១៧ប្រទេស។ ក្នុងនោះក៏មាន​វត្តមាន​ស្ត្រីទាំង​៣នាក់ដែលជាសមាជិកសភាហ្វាំងឡង់។

ជាលទ្ធផលនៃការផ្ដួចផ្ដើមគំនិតពីសន្និសីទក្រុង Copenhagen ប្រទេសអូទ្រីស ប្រទេស​ដាណឺ​ម៉ាក ប្រទេសអាល្លឺម៉ង់ និងប្រទេសស្វីសបានយកថ្ងៃទី១៩ ខែមីនាដើម្បីបា្ររព្ធពិធីនេះ។ ប្រជាជន​ច្រើន​​ជាងមួយលាននាក់នៅតាមបណ្ដាប្រទេសទាំងនេះបានទាមទារសិទ្ធអោយស្ត្រីដូចជាសិទ្ធ​ក្នុង​ការ​បោះឆ្នោត សិទ្ធក្នុងការធ្វើការនៅក្នុងការរិយាល័យសាធារណៈ សិទ្ធក្នុងការទទួលបានការបង្ហាត់​ជំ​នាញ​វគ្គខ្លី និងទទូចអោយ​បញ្ចប់​ការរើសអើងស្រ្តីភេទ។

បន្ទាប់មកចន្លោះឆ្នាំ១៩១៣-១៩១៤ ទិវាសិទ្ទនារីអន្តរជាតិបានក្លាយជាកម្លាំងចលករក្នុងការប្រឆាំងនឹងសង្គ្រាមលោក​លើក​ទី១។ ការបរិច្ឆេទថ្ងៃក្នុងការប្រារព្ធទិវាសិទ្ទនារីអន្តរជាតិ គឺមានភាពខុសពីគ្នា។ ប្រទេសរុស្សីប្រារព្ធ​រាង​រាល់ថ្ងៃអាទិត្យចុងក្រោយនៃខែកុម្ភៈ ខណៈពេលដែលប្រទេសខ្លះនៅប៉ែតអឺរ៉ុបយកថ្ងៃទី៨ (ឬមុន ឬក្រោយថ្ងៃ៨បន្តិច) ដើម្បីប្រារព្ធពិធីមួយនេះ។

ឈានដល់មកដល់ឆ្នាំ១៩៩៥ សេចក្ដីថ្លែងការណ៍ក្រុង Bejing និងវិទិការសម្រាប់សកម្មភាព  គឺជាផែនទីបង្ហាញផ្លូវជាប្រវត្តិសាស្រ្ត ដែលបានចុះហត្ថលេខាដោយ១៨៩ប្រទេស ​ផ្តោត​លើបញ្ហាសំខាន់ៗចំនួន១២  និងចង់បង្កើតចក្ខុវិស័យដែលឃើញពិភពលោកមួយដែល​ស្ត្រីនិង​ក្មេង​ស្រីអាចជ្រើសរើសជម្រើសរបស់នាងបានដោយខ្លួនឯង ដូចជាការចូលរួមក្នុងឆាកនយោបាយ ទទួល​បានការអប់រំមួយ ប្រាក់ចំណូលមួយ និងរស់នៅក្នុងសង្គមមួយដែលគ្មានអំពើហឹង្សា និងការ​រើស​អើង៕

ប្រភព៖ Wikipedia

ប្រទេសអ៊ុយក្រែន ៖ ក្រសួងការពារជាតិអ៊ុយក្រែនបង្ហាញថា រដ្ឋមន្ត្រីការពារជាតិរុស្ស៊ី លោក Sergei Shoigu បានធ្វើដំណើរមកសួរសុខទុក្ខកងទ័ពរុស្ស៊ីដែលប្រចាំការនៅអ៊ុយក្រែន ហើយការមកសួរសុខទុក្ខមិនបានកើតឡើងញឹកញាប់ទេសម្រាប់រដ្ឋមន្ត្រីការពារជាតិរុស្ស៊ីរូបនេះ ។

លោក Shoigu បានមកសួរសុខទុក្ខកងទ័ពនៅតំបន់ភាគខាងត្បូងនៃ Donetsk និងផ្តល់រង្វាន់ដល់កងទ័ពរុស្ស៊ីផងដែរ បន្ទាប់មក លោកបានទៅពិនិត្យមើលការខូចខាតនៅក្នុងទីក្រុង ជាមួយលោកឧត្តមសេនីយ៍ឯក Rustam Muradov មេបញ្ជាការតំបន់យោធាភាគខាងកើត ។

រដ្ឋមន្ត្រីការពារជាតិរុស្ស៊ី លោក Shoigu បានមកសួរសុខទុក្ខកងទ័ពជួរមុខនៅអ៊ុយក្រែនចំនួនពីរទៅបីដងប៉ុណ្ណោះ តាំងពីរុស្ស៊ីបញ្ជូនកងទ័ពមកវាយប្រហារអ៊ុយក្រែន អស់រយៈពេលជាង១ឆ្នាំ ។ លោកបានកាន់តំណែងជារដ្ឋមន្ត្រីការពារជាតិតាំងពីឆ្នាំ២០១២ មកម៉្លេះ ហើយមានការរិះគន់យ៉ាងខ្លាំងពីក្រុមដែលគាំទ្រឱ្យរុស្ស៊ីវាយប្រហារអ៊ុយក្រែន រួមទាំងលោក Yevgeny Prigozin មេដឹកនាំក្រុមកងទ័ពស៊ីឈ្នួល Wagner ក៏ធ្លាប់រិះគន់លោក Shoigu យ៉ាងខ្លាំងក្លាផងដែរកាលពីខែកុម្ភៈ ។

ចំណែកស្ថានការណ៍ចុងក្រោយនៅអ៊ុយក្រែន លោក Prigozin មេដឹកនាំក្រុមកងទ័ពស៊ីឈ្នួល Wagner លើកឡើងថា ទីក្រុង Baghmut របស់អ៊ុយក្រែន ត្រូវបានកងទ័ពស៊ីឈ្នួលហ៊ុព័ទ្ធអស់ហើយ ដែលធ្វើឱ្យកងទ័ពអ៊ុយក្រែនមានផ្លូវចេញតែមួយប៉ុណ្ណោះ ។ ក្រុមទាហានស៊ីឈ្នួលរបស់លោក Prigozin បានដឹកនាំការវាយប្រហារលើទីក្រុងភាគខាងកើតរបស់អ៊ុយក្រែន ខណៈរុស្ស៊ីសម្លឹងឃើញថា ទីក្រុង Baghmut ជាជំហានដ៏សំខាន់មួយឆ្ពោះទៅដណ្តើមយកទីក្រុង Kramatorsk និងក្រុង Slovensk ។

មិនត្រឹមតែប៉ុណ្ណោះ លោក Prigozin បានអំពាវនាវឱ្យប្រធានាធិបតីអ៊ុយក្រែន លោក Volodymyr Zelensky ដកទ័ពអ៊ុយក្រែនចេញពីក្រុងតូចនេះ ព្រមទាំងបង្ហោះវីដេអូបង្ហាញពីកងទ័ពស៊ីឈ្នួលចូលទៅដល់ក្រុង Baghmut ។ រីឯសារព័ត៌មានរ៉យទ័រចេញផ្សាយថា កងទ័ពស៊ីឈ្នួលរុស្ស៊ីស្ថិតនៅទិសខាងកើតប្រមាណជា២គីឡូម៉ែត្រឆ្ងាយពីក្រុង ៕ ប្រភព ៖ TNN World

រដ្ឋធានីវ៉ាស៊ីនតោន៖ ស្របពេលមានភាពតានតឹងជាមួយនឹងសហរដ្ឋអាមេរិក កាន់តែខ្លាំងឡើង ហើយសិក្សា អំពីមេរៀន នៃសង្គ្រាម នៅក្នុងប្រទេសអ៊ុយក្រែន ផងនោះ ចិន គ្រោងនឹងបង្កើននូវការចំណាយលើវិស័យយោធារបស់ខ្លួន កើនឡើង ជាង៧ភាគរយ នៅក្នុងឆ្នាំ២០២៣នេះ។

សារព័ត៌មានរបស់ចក្រភពអង់គ្លេស BBC បានចេញផ្សាយ កាលពីព្រឹក ថ្ងៃចន្ទ ទី៦ ខែមីនា ថា ក្រុងប៉េកាំង បានបង្កើនថវិកាលើវិស័យយោធា កើនឡើង រហូតដល់២២៥ពាន់លានដុល្លារអាមេរិក។ ចំនួននេះនៅតែតិចជាងការចំណាយលើវិស័យយោធារបស់សហរដ្ឋអាមេរិក ជិត៤ដង។

លោក លី ខេឈាង (Li Keqiang) នាយករដ្ឋមន្រ្ដីចិន ដែលនឹងជិតផុតអាណត្ដិ បានប្រាប់ដល់សមាជជាតិរបស់ប្រជាជន (NPC) ថា «ការប៉ុនប៉ងមកពីខាងក្រៅ ដើម្បីបង្ក្រាប និងទប់ស្កាត់ចិន កំពុងតែកើនឡើង។ កងទ័ពរបស់ចិន គួរតែបង្កើននូវការហ្វឹកហ្វឺនឲ្យបានខ្លាំង និង ត្រៀមខ្លួនរៀបចំទុកជាមុន»។

ការបង្កើននូវការចំណាយលើវិស័យយោធា បានកើតឡើង ខណៈប្រធានាធិបតីចិន លោក ស៊ី ជិនពីង កំពុងតែមានទំនាក់ទំនងកាន់តែអាក្រក់ឡើង ជាមួយសហរដ្ឋអាមេរិក ជុំវិញសង្គ្រាមអ៊ុយក្រែន និង រឿងអាស្រូវបាឡុងចារកម្ម កាលពីពេលថ្មីៗនេះ ដោយគាត់នៅតែបន្ដឱបក្រសោបមេដឹកនាំរុស្ស៊ី លោក វ៉្លាឌីមៀ ពូទីន (Vladimir Putin) យ៉ាងជិតស្និទ្ធ។

ដោយឡែក ក្រុមមន្ត្រីសហរដ្ឋអាមេរិក ក៏បានព្រមានម្តងហើយម្តងទៀត ថា ចិនអាចនឹងឈ្លានពានតៃវ៉ាន់ នៅក្នុងប៉ុន្មានឆ្នាំខាងមុខនេះ។ ចិន បានបង្ហាញកម្លាំងយោធាកាន់តែខ្លាំងក្លា ទាំងនៅលើដែនអាកាស និង ដែនទឹក ដោយរួមទាំងការបាញ់មីស៊ីលបាល្លិស្ទិក ជាច្រើនគ្រាប់ផងដែរ។

លោកស្រី គ្រីស្ទីន វ័រមូត (Christine Wormuth) រដ្ឋលេខាធិការកងទ័ពជើងគោករបស់សហរដ្ឋអាមេរិក បានដាក់ចេញនូវយុទ្ធសាស្រ្ដដ៏សំខាន់ជាច្រើន នៅក្នុងសង្គ្រាមដ៏ខ្លាំង នាពេលអនាគត ជាមួយនឹងប្រទេសចិន។ លោកស្រី មិនបានគិត អំពីសង្គ្រាមវាយលុក ឡើងលើគោក នៅកោះតៃវ៉ាន់ អាចនឹងកើតឡើងនោះឡើយ។ ប៉ុន្ដែក្រុងប៉េកាំង តែងតែអះអាង អស់រយៈពេលជាយូរណាស់មកហើយ ថា តៃវ៉ាន់ ជាផ្នែកមួយ នៃទឹកដីរបស់ចិន ហើយថា ចិន នឹងប្រើប្រាស់កម្លាំងយោធា បង្រួបបង្រួមទឹកដីឡើងវិញ ប្រសិនបើមានការចាំបាច់។

លោកស្រី គ្រីស្ទីន វ័រមូត (Christine Wormuth) បានសង្កត់ធ្ងន់ ថា សហរដ្ឋអាមេរិក ត្រូវតែរៀបចំប្រយុទ្ធ ហើយយកជ័យជម្នះ ប្រសិនបើមានការឈ្លានពានរបស់ចិន កើតឡើងមែន។ លោកស្រី បានសង្កត់ធ្ងន់ អំពីសារៈសំខាន់ នៃការបង្កើតកម្លាំងចម្រុះ ជាមួយនឹងសម្ពន្ធមិត្តអន្តរជាតិ ដើម្បីធ្វើឲ្យមានភាពស្មុគស្មាញ ដល់ការសម្រេចចិត្តរបស់ប្រធានាធិបតីចិន លោក ស៊ី ជិនពីង (Xi Jinping)។ បន្ថែមពីលើសនេះ កងទ័ពសហរដ្ឋអាមេរិក ត្រូវតែបង្កើតមជ្ឈមណ្ឌលចែកចាយដ៏ចាំបាច់ នៅក្នុងតំបន់អាស៊ីប៉ាស៊ីហ្វិក ដើម្បីស្តុកទុកគ្រឿងផ្គត់ផ្គង់ និង ប្រេងឥន្ធនៈ ដែលត្រូវការ សម្រាប់រថពាសដែក និង នាវាចម្បាំងរបស់ខ្លួន។ នៅក្នុងចំណោមតំបន់យុទ្ធសាស្រ្ដទាំងនោះ រួមមាន ប្រទេសអូស្រ្ដាលី ជប៉ុន សិង្ហបុរី និង ហ្វីលីពី។

លោកស្រី គ្រីស្ទីន វ័រមូត (Christine Wormuth) បានបន្ថែម ថា ធាតុដ៏សំខាន់បំផុតមួយ នៅក្នុងចំណោមចំណុចសំខាន់ៗទាំងអស់នោះ គឺការដាក់ពង្រាយកងទ័ពបន្ថែមទៀត នៅក្នុងទ្វីបអាស៊ី និង បំពាក់សម្ភារសឹកទំនើបៗ ដើម្បីទប់ស្កាត់នូវការឈ្លានពានរបស់ចិន។ ចំណែកកងកម្លាំងប្រយុទ្ធ ដែលអាចជឿទុកចិត្តបាន គួរតែត្រូវបានដាក់ពង្រាយ នៅក្នុងតំបន់ឥណ្ឌូ-ប៉ាស៊ីហ្វិក យ៉ាងហោចណាស់ មានរយៈពេល៨ខែ នៅក្នុង១ឆ្នាំ។ បន្ថែមពីលើសនេះ កងនាវាវាយលុក បុកឡើងលើគោក និង គ្រឿងសព្វាវុធមានល្បឿនលឿនជាងសំឡេង ត្រូវតែដាក់ពង្រាយជាមុន ដើម្បីដើរតួជាខ្សែការពារដំបូងរបស់ប្រទេសជាសម្ពន្ធមិត្ត។

លោកស្រី រដ្ឋលេខាធិការកងទ័ពជើងគោករបស់សហរដ្ឋអាមេរិក រូបនេះ បានពន្យល់ ថា « គោលបំណងរបស់យើង គឺបញ្ចៀសនូវការប្រយុទ្ធនឹងសង្គ្រាម នៅទ្វីបអាស៊ី។ ខ្ញុំគិត ថា វិធីសាស្រ្ដដ៏ល្អបំផុត ដើម្បីបញ្ចៀសនូវការប្រយុទ្ធគ្នា នៅក្នុងសង្រ្គាមនេះ គឺការបង្ហាញដល់ប្រទេសចិន និង ប្រទេសផ្សេងៗ នៅក្នុងតំបន់នេះឲ្យដឹង ថា យើងពិតជាអាចឈ្នះសង្រ្គាមនោះបាន»។

លោកស្រី Wormuth បានសង្កត់ធ្ងន់ទៀត ថា ប្រសិនបើសហរដ្ឋអាមេរិក មិនអាចរារាំងដល់ប្រទេសចិន បាន ដោយជោគជ័យនោះទេ កងទ័ពរបស់សហរដ្ឋអាមេរិក មានការងារស្នូលជាច្រើនរបស់ពួកគេ ត្រូវតែអនុវត្ដ វាយលុកតែម្ដង។ បញ្ហាដំបូង ត្រូវតែការពារដល់មូលដ្ឋានកងទ័ពជើងទឹក ជាមួយនឹងជំនួយសមត្ថភាពប្រព័ន្ធការពារដែនអាកាស និង ប្រព័ន្ធការពារមីស៊ីលចម្រុះ។

លោកស្រី រដ្ឋលេខាធិការកងទ័ពជើងគោករបស់សហរដ្ឋអាមេរិក បានបន្ថែម ថា «ទីភ្នាក់ងារសេវាកម្ម ក៏ត្រូវតែទ្រទ្រង់ ជួយដល់កម្លាំងចម្រុះ ដោយការបង្កើតឃ្លាំងស្តុកគ្រាប់រំសេវ និង បញ្ជូនបន្ត ដល់ចំណុចចាក់ប្រេង នៅលើអាកាស។ ចំណែកកិច្ចការដ៏សំខាន់មួយទៀត គឺត្រូវតែធ្វើនូវបច្ចុប្បន្នភាព លើឃ្លាំងអាវុធរបស់កងទ័ពសហរដ្ឋអាមេរិក និង អភិវឌ្ឍសមត្ថភាពផ្សេងៗទៀត ដែលជាធម្មតា មិនមានទំនាក់ទំនង ជាមួយកងកម្លាំង ដែលមានមូលដ្ឋាន នៅលើដី។ យើងត្រូវតែធ្វើឲ្យប្រាកដ ថា ជំហានដំបូងរបស់យើង ត្រូវតែទទួលបាននូវអាវុធ មានល្បឿនលឿនជាងសំឡេង បាញ់រយៈចម្ងាយឆ្ងាយ»៕

ប្រទេសកូរ៉េខាងជើង ៖ កាលពីថ្ងៃទី៥ ខែមីនា ក្រសួងការបរទេសកូរ៉េខាងជើងបានចេញសេចក្តីថ្លែងការណ៍ថា អង្គការសហប្រជាជាតិ (UN) គួរតែអំពាវនាវឱ្យបញ្ឈប់ការធ្វើសមយុទ្ធរួមគ្នាផ្នែកកងទ័ពរវាងកូរ៉េខាងត្បូង និងអាមេរិកជាបន្ទាន់ ដោយកូរ៉េខាងជើងផ្តល់ហេតុផលថា ប្រទេសទាំងពីរកំពុងធ្វើឱ្យស្ថានភាពកាន់តែតានតឹងលើសពីការគ្រប់គ្រង ។

អនុរដ្ឋមន្ត្រីក្រសួងការបរទេស Kim Sun Kyung បានបញ្ជាក់ក្នុងសេចក្តីថ្លែងការណ៍ចេញផ្សាយដោយសារព័ត៌មានកណ្តាលកូរ៉េ (KCNA) ថា ៖ «ការធ្វើសមយុទ្ធរវាងសម្ព័ន្ធមិត្តទាំងពីរ (កូរ៉េខាងត្បូង និងអាមេរិក) កំពុងបង្កើនការប្រឈមមុខដោយគ្មានការទទួលខុសត្រូវ ហើយអង្គការសហប្រជាជាតិ និងសហគមន៍អន្តរជាតិ គួរតែទាមទារឱ្យកូរ៉េខាងត្បូង និងអាមេរិកឈប់និយាយបង្កជម្លោះ និងឈប់ធ្វើសមយុទ្ធកងទ័ពរួមគ្នាជាបន្ទាន់ ។ វាជារឿងគួរឱ្យសោកស្តាយណាស់ដែល UN នៅស្ងៀមស្ងាត់ចំពោះការធ្វើសមយុទ្ធមានលក្ខណៈឈ្លានពានយ៉ាងច្បាស់នេះ» ។

នៅខែមីនា កូរ៉េខាងត្បូង និងអាមេរិកមានគម្រោងធ្វើសមយុទ្ធកងទ័ពរួមគ្នាដ៏ធំមួយរយៈពេលជាង១០ថ្ងៃ ហើយកាលពីថ្ងៃទី៣ ខែមីនា កន្លងមក កងទ័ពប្រទេសទាំងពីរបានធ្វើសមយុទ្ធផ្លូវអាកាស ដោយមានយន្តហោះទម្លាក់គ្រាប់បែកក្នុងចម្ងាយឆ្ងាយរបស់អាមេរិក និងយន្តហោះចម្បាំងរបស់កូរ៉េខាងត្បូងចូលរួមផងដែរ ។ កូរ៉េខាងត្បូង និងអាមេរិកបញ្ជាក់ថា ការធ្វើសមយុទ្ធរួមគ្នានេះដើម្បីការពារខ្លួនឯង និងចាំបាច់ ដើម្បីទប់ទល់នឹងការគំរាមកំហែងកំពុងកើនឡើងដោយសារគម្រោងមីស៊ីល និងអាវុធនុយក្លេអ៊ែររបស់កូរ៉េខាងជើង ដែលក្រុមប្រឹក្សាសន្តិសុខអង្គការសហប្រជាជាតិបានហាមឃាត់ ។

ទោះយ៉ាងណា កាលពីថ្ងៃទី៤ ខែមីនា រដ្ឋាភិបាលកូរ៉េខាងជើងបានថ្កោលទោសអាមេរិកថា គឺជាដើមហេតុនៃការដួលរលំប្រព័ន្ធគ្រប់គ្រងអាវុធអន្តរជាតិ ហើយថា អាវុធនុយក្លេអ៊ែររបស់ក្រុងព្យុងយ៉ាង គឺជាការឆ្លើយតបដោយយុត្តិធម៌ដើម្បីធានាតុល្យភាពអំណាចក្នុងតំបន់ ។

កាលពីខែកុម្ភៈ ឆ្នាំ២០២៣ ក្រសួងការបរទេសកូរ៉េខាងជើងបានចេញសេចក្តីថ្លែងការណ៍ថា អគ្គលេខាធិការអង្គការសហប្រជាជាតិ Antonio Guterres អយុត្តិធម៌ និងគ្មានតុល្យភាពចំពោះការសាកល្បងមីស៊ីលរបស់កូរ៉េខាងជើង ៕ ប្រភព ៖ The standard