ប្រទេសជប៉ុន ៖ រដ្ឋមន្ត្រីក្រសួងឧស្សាហកម្មជប៉ុន លោក Yasutoshi Nishimura បានបង្ហាញក្នុងកិច្ចប្រជុំរដ្ឋមន្ត្រីរបស់ Asia Zero Emission Community (AZEC) ថា រដ្ឋាភិបាលជប៉ុនបានសន្យាផ្តល់ជំនួយហិរញ្ញវត្ថុ និងបច្ចេកវិទ្យាជួយក្រុមប្រទេសអាស៊ីអាគ្នេយ៍ ដើម្បីព្យាយាមធ្វើឱ្យតំបន់នេះបញ្ឈប់ការបំភាយឧស្ម័នផ្ទះកញ្ចក់ ហើយតស៊ូនឹងបម្រែបម្រួលអាកាសធាតុ ។

ជប៉ុនបានប្រើប្រាស់ថាមពលហ្វូស៊ីល និងដាក់គោលដៅជាប្រទេសនាំមុខគេផ្នែកសេដ្ឋកិច្ចអ៊ីដ្រូសែននៅលើពិភពលោក ដើម្បីកាត់បន្ថយការពឹងផ្អែកលើប្រេងឥន្ធនៈហ្វូស៊ីលមានជាតិពុលដូចជា ធ្យូងថ្ម និងប្រេង ។

ក្នុងកិច្ចប្រជុំក្រុមប្រទេសឧស្សាហកម្មនាំមុខលើពិភពលោក (G7) ក្នុងឆ្នាំ២០២៣នេះ ជប៉ុននឹងរៀបចំកិច្ចប្រជុំថ្នាក់រដ្ឋមន្ត្រី ស្តីពីអាកាសធាតុ ថាមពល និងបរិស្ថាន នៅទីក្រុងសាប៉ូរ៉ូ នៅថ្ងៃទី១៥-១៦ ខែមេសា ឆ្នាំ២០២៣ ។ បន្ទាប់មក នឹងមានកិច្ចប្រជុំកំពូលប្រទេស G7 នៅក្រុងហ៊ីរ៉ូស៊ីម៉ា នៅថ្ងៃទី១៩-២១ ខែឧសភា ដើម្បីលើកកម្ពស់ថាមពលស្អាតផងដែរ ។

ទោះយ៉ាងណា រដ្ឋមន្ត្រីក្រសួងឧស្សាហកម្មបញ្ជាក់ថា ជប៉ុននឹងជាប្រទេសនាំមុខលើការគាំទ្រផ្នែកហិរញ្ញវត្ថុ បច្ចេកវិទ្យា និងធនធានមនុស្ស ដើម្បីជួយអាស៊ីអាគ្នេយ៍ឱ្យក្លាយជាតំបន់គ្មានកាបូន ។ កាលពីឆ្នាំ២០២២ កន្លងមក នាយករដ្ឋមន្ត្រីជប៉ុន លោក Fumio Kishida បានស្នើសុំក្នុងកិច្ចប្រជុំ AZEC ពីការធ្វើឱ្យអាស៊ីអាគ្នេយ៍ក្លាយជាតំបន់គ្មានកាបូន និងសហការគ្នាជំរុញការផ្លាស់ប្តូរថាមពល ។

បន្ទាប់ពីកិច្ចប្រជុំលើកដំបូងរបស់ AZEC នៅទីក្រុងតូក្យូ បណ្តារដ្ឋមន្ត្រីប្រទេសនានាជាសមាជិកអាស៊ាន និងអូស្ត្រាលីដែលបានរួមប្រជុំ បានជំរុញកិច្ចសហប្រតិបត្តិលើវិស័យផ្សេងៗ រួមទាំងថាមពលកកើតឡើងវិញ ឧស្ម័នធម្មជាតិ អ៊ីដ្រូសែន និង ammonia ។

តាមប្រភពព័ត៌មានគួរឱ្យទុកចិត្តមួយថា ជប៉ុននឹងផ្តល់ភាពសំខាន់លើការវិនិយោគឧស្ម័ន, ឧស្ម័នធម្មជាតិរាវ និងអ៊ីដ្រូសែន រហូតដល់ ammonia ក្នុងកិច្ចប្រជុំប្រទេស G7 នៅចុងឆ្នាំ២០២៣ នេះ ៕ ប្រភព ៖ TNN World

រដ្ឋធានីប៊ែរឡាំង៖ អាល្លឺម៉ង់ ជាប្រទេសមានសេដ្ឋកិច្ចរីកចម្រើនខ្លាំងជាងគេបំផុត នៅតំបន់អឺរ៉ុប ហើយឥឡូវនេះ រដ្ឋាភិបាលក្រុងប៊ែរឡាំង ក្រោមការដឹកនាំរបស់លោកអធិការបតី អូឡាហ្វ សូលស៍ (Olaf Scholz) បានព្រមានធ្ងន់ ដល់រដ្ឋាភិបាលចិន ជុំវិញការលូកដៃចូលទៅជួយរុស្ស៊ី។

ទីភ្នាក់ងារសារព័ត៌មាន AFP បានចេញផ្សាយ កាលពីព្រឹក ថ្ងៃចន្ទ ទី៦ ខែមីនា ថា លោក អូឡាហ្វ សូលស៍ (Olaf Scholz) អធិការបតីអាល្លឺម៉ង់ បានព្រមានធ្ងន់ៗ អំពីផលវិបាកនានា ប្រសិនបើក្រុងប៉េកាំង សម្រេចចិត្តបញ្ជូនគ្រឿងសព្វាវុធ ទៅឲ្យរុស្ស៊ី។ ប៉ុន្ដែទោះជាយ៉ាងណាក៏ដោយ លោកអធិការបតី នៅតែមានសុទិដ្ឋិនិយម ថា ចិន នឹងមិនធ្វើដូច្នេះឡើយ។

លោកអធិការបតីអាល្លឺម៉ង់ បានថ្លែង នៅក្នុងបទសម្ភាសន៍មួយជាមួយបណ្ដាញទូរទស្សន៍របស់សហរដ្ឋអាមរិក CNN ហើយត្រូវបានចាក់ផ្សាយ កាលពីថ្ងៃអាទិត្យ (វេលានៅរដ្ឋធានីវ៉ាស៊ីនតោន) ក្រោយពេលគាត់ បានជួបពិភាក្សា ជាមួយប្រធានាធិបតីសហរដ្ឋអាមេរិក លោក ចូ បៃដិន នៅក្នុងរដ្ឋធានីវ៉ាស៊ីនតោន។

លោក ហ្វារីដ ហ្សាការៀ (Fareed Zakaria) អ្នកកាសែត និង ជាអ្នកធ្វើអត្ថាធិប្បាយនយោបាយរបស់ទូរទស្សន៍ CNN បានសាកសួរ ទៅកាន់លោកអធិការបតី នៅក្នុងបទសម្ភាន៍នោះ ថា តើអាល្លឺម៉ង់ អាចនឹងដាក់ទណ្ឌកម្មប្រឆាំងនឹងចិន ដែរឬទេ ក្នុងករណីក្រុងប៉េកាំងបញ្ជូនអាវុធឱ្យក្រុងមូស្គូ? លោកអធិការបតីអាល្លឺម៉ង់ រូបនេះ បានបញ្ជាក់ ថា «ខ្ញុំគិតថា វានឹងមានផលវិបាក។ ប៉ុន្តែបច្ចុប្បន្ន យើងកំពុងស្ថិតក្នុងដំណាក់កាលមួយ ដូចអ្វីដែលយើងបានបញ្ជាក់យ៉ាងច្បាស់រួចមកហើយ ថា រឿងបែបនេះមិនគួរឲ្យកើតឡើងនោះទេ»។

ទោះជាយ៉ាងណា លោក អូឡាហ្វ សូលស៍ (Olaf Scholz) អធិការបតីអាល្លឺម៉ង់ មិនបានលម្អិត អំពីផលវិបាក តាមអ្វីដែលគាត់បានបានលើកឡើង នោះឡើយ។ អាល្លឺម៉ង់ ជាប្រទេសមានសេដ្ឋកិច្ចធំជាងគេបំផុត នៅតំបន់អឺរ៉ុប និង ជាប្រទេសមហាអំណាចសេដ្ឋកិច្ចលេខ៤ នៅលើពិភពលោក ហើយក្រុងប៊ែរឡាំង ក៏ជាដៃគូពាណិជ្ជកម្មធំជាងគេបំផុត ជាមួយចិន បើធៀបទៅនឹងបណ្ដាប្រទេសអឺរ៉ុប។

ការព្រមានរបស់លោក អូឡាហ្វ សូលស៍ (Olaf Scholz) អធិការបតីអាល្លឺម៉ង់ បានកើតឡើង ក្រោយពេលក្រុមមន្ត្រីអាមេរិក បានព្រមានជាបន្តបន្ទាប់ដល់ប្រទេសចិន កាលពីប៉ុន្មានសប្ដាហ៍មុននេះ ថា ក្រុងប៉េកាំង កំពុងតែពិចារណាបញ្ជូនគ្រឿងសឹកទំនើបៗរបស់ខ្លួន ទៅកាន់ប្រទេសរុស្ស៊ី ដោយរាប់បញ្ចូលទាំងគ្រាប់រំសេវផងដែរ។ ទោះជាយ៉ាងណា ការលើកឡើងរបស់សហរដ្ឋអាមេរិក បានធ្វើឲ្យក្រុងប៉េកាំង ផ្ទុះកំហឹងយ៉ាងខ្លាំង ហើយចាត់ទុកការចោទប្រកាន់ដោយឥតភស្ដុតាង និង កំពុងតែបង្ខូចកេរ្តិ៍ឈ្មោះរបស់ចិន នៅលើឆាកអន្តរជាតិ។

លោក អូឡាហ្វ សូលស៍ (Olaf Scholz) អធិការបតីអាល្លឺង់ បានសង្កត់ធ្ងន់ ថា ក្រុងប៊ែរឡាំង នឹងបន្ដជួយដល់អ៊ុយក្រែន តាមអ្វីដែលពួកគេត្រូវការ។ រហូតមកដល់ពេលនេះ អាល្លឺម៉ង់ បានប្រកាសផ្ដល់រថក្រោះខ្លារខិន ជំនាន់ទី១ រាប់សិបគ្រឿង បញ្ជូនទៅកាន់ប្រទេសអ៊ុយក្រែន នៅចុងឆ្នាំ២០២៣នេះ៕

ប្រទេសថៃ ៖ លោក អនុឆា ប៊ូរ៉ាផាឆៃស្រ៊ី អគ្គលេខាធិការរងនាយករដ្ឋមន្ត្រី ទទួលបន្ទុកកិច្ចការនយោបាយ និងជាអ្នកនាំពាក្យការិយាល័យនាយករដ្ឋមន្ត្រី បានថ្លែងថា លោក ប្រាយុទ្ធ ចាន់អូចា នាយករដ្ឋមន្ត្រី និងរដ្ឋមន្ត្រីក្រសួងការពារជាតិ រីករាយណាស់ដែលប្រទេសថៃមានកេរ្តិ៍ឈ្មោះល្បីល្បាញផ្នែកទេសចរណ៍ ហើយបានជាប់ចំណាត់ថ្នាក់ជាបន្តបន្ទាប់ ។

Kiplinger ជាទស្សនាវដ្តីវិភាគអាជីវកម្មរបស់អាមេរិកបានចាត់ចំណាត់ថ្នាក់ប្រទេសនៅលើពិភពលោក ដែលមានការចាយវាយតិចបំផុតសម្រាប់ភ្ញៀវទេសចរ ក្នុងនោះប្រទេសថៃស្ថិតនៅចំណាត់ថ្នាក់ទី៤ ដែលមានការចំណាយជាមធ្យមប្រមាណ៥២ដុល្លារអាមេរិកក្នុង១ថ្ងៃ, កន្លែងស្នាក់នៅជាមធ្យម២១ដុល្លារអាមេរិកក្នុង១ថ្ងៃ និងថ្លៃម្ហូបអាហារជាមធ្យម១៤ដុល្លារអាមេរិកក្នុង១ថ្ងៃ ។ ចំណែកប្រទេសជាប់ចំណាត់ថ្នាក់មានការចំណាយតិចបំផុតពីលេខ១-៣ រួមមាន ឡាវ តួកគី និងឥណ្ឌូណេស៊ី ។

ការចាត់ចំណាត់ថ្នាក់បានបញ្ជាក់ថា បើទោះជាបច្ចុប្បន្ន តម្លៃសំបុត្រយន្តហោះមកកាន់ប្រទេសនៅអាស៊ីមានតម្លៃខ្ពស់ ប៉ុន្តែវាអាចជំនួសវិញនូវការចាយវាយផ្សេងៗ ខណៈថៃមានកន្លែងល្បីល្បាញជាច្រើនដូចជា ឆ្នេរខ្សាច់ វត្តអារ៉ាម ព្រះពុទ្ធរូប ម្ហូបអាហារឆ្ងាញ់ៗនៅតាមផ្លូវនៅក្រុងបាងកក ។ ដូច្នេះ មិនចម្លែកទេ ដែលថៃជាប្រទេសមានភ្ញៀវទេសចរមកកម្សាន្តច្រើនបំផុតនៅតំបន់អាស៊ីអាគ្នេយ៍ ។

សម្រាប់ចំណាត់ថ្នាក់ គឺផ្អែកលើការចំណាយជាមធ្យមប្រចាំថ្ងៃនៅប្រទេសថៃ រួមទាំងកន្លែងស្នាក់នៅ ម្ហូបអាហារ និងការចំណាយលើការរស់នៅប្រចាំថ្ងៃ ប៉ុន្តែមិនផ្តោតលើសំបុត្រយន្តហោះទេ ខណៈតម្លៃសំបុត្រយន្តហោះខុសៗគ្នាអាស្រ័យលើពេលវេលានៃការធ្វើដំណើរ ប្រទេសចេញដំណើរ និងប្រទេសគោលដៅ ។

អ្នកនាំពាក្យការិយាល័យនាយករដ្ឋមន្ត្រីបង្ហាញទៀតថា លើសពីនេះ ថៃត្រូវបានគេជ្រើសរើសជាប្រទេសគោលដៅទេសចរណ៍ដ៏អស្ចារ្យពី Grand Travel Award 2023 គូជាមួយប្រទេសអ៊ីតាលី ខណៈ Grand Travel Award រៀបចំពិធីប្រគល់ពានរង្វាន់ដ៏ធំសម្រាប់វិស័យទេសចរណ៍នៅប្រទេសស៊ុយអែត និងបានរៀបចំឡើងជារៀងរាល់ឆ្នាំ គឺតាំងពីឆ្នាំ១៩៩៣ មក ហើយប្រទេសឈ្នះ គឺមានការជ្រើសរើសពីក្រុមអ្នកធ្វើដំណើរជនជាតិស៊ុយអែត និងភ្នាក់ងារទេសចរណ៍ទូទាំងប្រទេស ។

ការចាត់ចំណាត់ថ្នាក់នេះ លោកនាយករដ្ឋមន្ត្រីរីករាយណាស់ដែលវិស័យទេសចរណ៍ថៃបានជាប់ចំណាត់ថ្នាក់ជាបន្តបន្ទាប់នាពេលកន្លងមក ។ ដូច្នេះ រដ្ឋាភិបាលនឹងផ្តល់ភាពសំខាន់ដល់វិស័យទេសចរណ៍ទាំងការអភិវឌ្ឍគុណភាព និងទាក់ទាញភាពសម្បូរបែបផ្នែកទេសចរណ៍ អភិវឌ្ឍន៍និងស្តារធនធានធម្មជាតិ ការការពារបរិស្ថានសម្រាប់ការលូតលាស់យូរអង្វែង ពន្លឿនការសាងសង់ហេដ្ឋារចនាសម្ព័ន្ធដឹកជញ្ជូន ដើម្បីផ្តល់ភាពងាយស្រួលដល់ភ្ញៀវទេសចរថៃ និងបរទេស ។ លើសពីនេះ ថៃត្រូវផ្តោតលើការគ្រប់គ្រងផលិតផល សេវាកម្ម និងសំបុត្រធ្វើដំណើរមិនឱ្យថ្លៃ បើធៀបជាមួយប្រទេសផ្សេងៗ ។ ម្យ៉ាងទៀត ជនជាតិថៃអាចធ្វើដំណើរកម្សាន្តនៅថៃក្នុងតម្លៃទាបផងដែរតាមរយៈគម្រោង «យើងដើរកម្សាន្តទាំងអស់គ្នា» ដែលរដ្ឋាភិបាលបានគាំទ្រកន្លងមក៕

ប្រភព ៖ topnews

បុរាណវិទូមួយចំនួនបានអះអាងថា រូបចម្លាក់នៅលើប្រាសាទតាព្រហ្ម គឺជាពពួកសត្វដាយណូស៊រមួយប្រភេទ មានឈ្មោះថា វស្តេហ្គូស័រូស (Stegosaurus)។ ពួកគេជឿជាក់ថារូបចម្លាក់នេះ អាចប្រើជាភស្តុតាងមួយបញ្ជាក់ឱ្យដឹងថា ជនជាតិខ្មែរសម័យនោះ ពិតជាបានរស់នៅជាមួយនឹងពពួកសត្វដាយណូស័រ។

បុរាណវិទូបានសន្មតថា អាកាសធាតុនិងព្រៃឈើកាលពីសម័យនោះ បានផ្ដល់ជាជម្រកដ៏ល្អប្រសើរមួយសម្រាប់ការរស់នៅរបស់ពពួកសត្វដាយណូស័រ ហើយវាអាចមានជីវិតរស់នៅរហូតដល់ទៅ២០០ឆ្នាំ ឬ៣០០ឆ្នាំមុនយ៉ាងតិច។

ផ្ទុយមកវិញ បុរាណវិទូមួយចំនួនទៀតយល់ថា រូបចម្លាក់នេះគឺជាសត្វរមាស ឬជាសត្វជ្រូកព្រៃជាមួយនឹងដើមដូងនៅខាងក្រោយ ចំណែកឯអ្នកខ្លះទៀតគិតថា រូបចម្លាក់់នេះត្រូវបានបង្កើតឡើងតាមរយៈការឆ្នៃប្រតិដ្ឋប៉ុណ្ណោះ។

គួរបញ្ជាក់ផងដែរថា ប្រាសាទតាព្រហ្មមានទីតាំងស្ថិតក្នុងតំបន់អង្គរ ខេត្តសៀមរាប ប្រទេសកម្ពុជា សាងសង់ឡើងដោយព្រះបាទជ័យវរ្ម័នទី៧ នៅចុងឆ្នាំ១១០០។ ប្រាសាទនេះត្រូវបានបញ្ចូលទៅក្នុងបញ្ជីសម្បត្តិបេតិកភណ្ឌពិភពលោករបស់អង្គការយូណេស្កូ នៅក្នុងឆ្នាំ១៩៩២ និងជាប្រាសាទមួយក្នុងចំណោមប្រាសាទដ៏ល្បីល្បាញជាច្រើនទៀតនៅតំបន់អង្គរ។ ចំនួនភ្ញៀវទេសចរណ៍ក៏មានការកើនឡើងផងដែរ បន្ទាប់ពីភាពយន្តរឿងថូមរ៉ៃឌឺ (Tomb Raider) បានប្រើប្រាស់ប្រាសាទនេះជាទីតាំងសម្រាប់ថត៕

ភ្នំពេញ៖ ដើម្បីងាយស្រួលដល់អាជ្ញាធរអាចជួយអន្តរាគមន៍បានទាន់ពេលវេលាក្នុងករណីមានអគ្គិភ័យកើតឡើងណាមួយ ប្រជាពលរដ្ឋនៅក្រុងព្រះសីហនុបានសហការជាមួយអាជ្ញាធរស្ម័គ្រចិត្តវាយកម្ទេចផ្ទះរបស់ខ្លួន ដើម្បីបើកផ្លូវឱ្យបានទូលំទូលាយងាយស្រួលធ្វើដំណើរ។

បើតាមលោកអភិបាលក្រុងព្រះសីហនុ បានបញ្ជាក់ថា ប្រជាពលរដ្ឋរស់នៅតាមបណ្តោយផ្លូវគឺម្តុំក្រោយសាលាសង្កាត់លេខ៤ ដែលស្ថិតនៅភូមិ៥ សង្កាត់លេខ៤ បានចូលរួមសហការ និងផ្តល់ភាពងាយស្រួលដល់អាជ្ញាធរក្រុងព្រះសីហនុ ដើម្បីបើកផ្លូវតាមប្លង់ជាលក្ខណៈប្រព័ន្ធ សម្រួលដល់ការធ្វើដំណើរ ទៅមក និងសង្គ្រោះបន្ទាន់ករណីមានអគ្គិភ័យ ឬឧបទ្ទវហេតុផ្សេងៗក្នុងតំបន់នោះ។

លោកបន្តថា ពលរដ្ឋព្រមវាយកម្ទេចផ្ទះមួយចំណែក ក្រោយពួកគេបានឈ្វេងយល់គ្រប់ៗគ្នាពីសារៈសំខាន់នៃការបើកផ្លូវដើម្បីធ្វើការអភិវឌ្ឍក្រុង បន្ទាប់ពីមានការសម្របសម្រួលពន្យល់ពីរដ្ឋបាលក្រុង រហូតធ្វើឲ្យពួកគាត់យល់ព្រមបើកផ្លូវថ្មីមួយខ្សែនេះទាំងអស់គ្នា។

លោកបានឱ្យដឹងទៀតថា ចំពោះផ្លូវថ្មីមួយខ្សែខាងលើនេះ មានប្រវែង ១៤០ម៉ែត្រ និងទទឹង ៦ម៉ែត្រ ហើយរដ្ឋបាលក្រុងនឹងធ្វើការចាក់បេតុងជូនពួកគេឲ្យបានល្អស្អាត៕

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានណែនាំដល់អភិបាលរាជធានីភ្នំពេញ ក្នុងការរៀបចំរថយន្តក្រុងដឹកអ្នកដំណើរ ជាពិសេសដឹកបងប្អូនប្រជាពលរដ្ឋទៅលេងតាមបណ្ដាខេត្តសំខាន់ៗក្នុងឱកាសបុណ្យចូលឆ្នាំខ្មែរ ដូចជាទៅលេងខេត្តសៀមរាបអង្គរជាដើម ដែលត្រូវរៀបចំព្រឹត្តិការណ៍អង្គរសង្ក្រាន្តនៅទីនោះ។

ការប្រកាសរបស់សម្ដេចបានធ្វើឡើង ក្នុងពិធីប្រគល់វិញ្ញាបនបត្រ និងសញ្ញាបត្រជូនដល់សិក្ខាកាម និងនិស្សិតវិទ្យាស្ថានខ្មែរជំនាន់ថ្មីជិត ២ពាន់នាក់ នាថ្ងៃទី៦ មីនានេះ។

ជាមួយគ្នានោះសម្តេចតេជោ ក៏បានអំពាវនាវដល់បងប្អនប្រជាពលរដ្ឋខ្មែរ រស់នៅក្រៅប្រទេស ទោះធ្លាប់ជេរប្រមាថ រិះគន់ គណបក្សប្រជាជនកម្ពុជា, រាជរដ្ឋាភិបាល និងសម្តេចក៏ដោយ សូមអញ្ជើញមកលេងស្រុកកំណើតរបស់ខ្លួនដោយមិនមានការចាប់ចង ឬធ្វើទុក្ខបុកម្នេញ ដូចការបំផុសព័ត៌មានបំពុលរបស់ក្រុមអគតិមួយចំនួននោះទេ៕