ឆ្នាំ ១៨៤០​ មាន​នាវា​អាមេរិក​ដឹកនាំ​ដោយ​លោក Charles Wilkes បាន​រក​ឃើញ​នូវ​ទ្វីប​មួយ​ថ្មី​ទៀត​ដែល​មាន​លក្ខណៈ​ជា​ទឹកកក​។ ទ្វីប​នោះ​មាន​ឈ្មោះ​ថា​ ទ្វីប​អង់តាកទិច។

លោក​បាន​ចេញ​ដំណើរ​ពី​សហរដ្ឋអាមេរិក​នៅ​ឆ្នាំ ១៨៣៨ ដោយ​ចុះ​តាម​មហាសមុទ្រ​ប៉ាស៊ីហ្វិក​ឆ្ពោះ​ទៅ​អាមេរិក​ខាង​ត្បូង​ ឆ្លង​កាត់​កោះ​ Polynesia ហើយ​បន្ត​ទៅ​ដែនដី​អូស្ត្រាលី។ ក្រោយមក​ដល់ភាគ​ត្បូង​ទីក្រុង​ស៊ីដនី​ ប្រទេសអូស្ត្រាលី លោក Charles Wilkes បានប្រទះឃើញជញ្ជាំង​ទឹកកក​នៅ​ជ្រោយ​សមុទ្រ និង​តាម​ភ្នំ​នៃ​ទ្វីប​ដែល​មិន​ធ្លាប់​ស្គាល់​ពី​មុន​មក។

ក្រោយចំណាយពេល២ឆ្នាំ ដោយដំណើរ​ចម្ងាយ​ ២,៤១៤​គីឡូម៉ែត្រ​ តាម​បណ្ដោយ​ឆ្នេរ​សមុទ្រ​នៃ​ទ្វីប​ថ្មី​នោះ លោកក៏បានសម្រេចគោលដៅតែម្តង។

ទីកន្លែងដែលលោក Charles Wilke ទៅដល់នោះ មានទីតាំងស្ថិតនៅ ភាគ​ពាយព្យ​នៃ​ទ្វីប​អង់តាកទិច​ ក្រោយមកក៏ដាក់ឈ្មោះថា Wilkes’ Land ដែលដូចទៅនឹងឈ្មោះរបស់លោក៕

ប្រភព: National Geography

សហរដ្ឋអាមេរិក៖ ផែនដីជាទីឋានដល់ល្អបំផុតរបស់ពិភពលោក ប៉ុន្តែជាអកុសលវាមិនអាចរស់នៅជាមួយយើងបានរហូតនោះទេព្រោះតែកំណើនប្រជាជន ជំងឺមហារីកផ្សេងៗ ការធ្លាយស្រទាប់អូហ្សូនជាដើម ដែលបណ្តាលអោយផែនដីយើងមានការខូចខាតធ្ងន់ធ្ងរ។ ហេតុនេះហើយទើបអ្នកវិទ្យាសាស្រ្តបានចំណាយពេលយ៉ាងច្រើន ហើយរកឃើញថាមានភពទាំង៥ដែលអាចអោយមនុស្សរស់នៅបាននាពេលអនាគត ភពទាំង៥នោះមានដូចជា៖
១.ភពព្រះច័ន្ទ៖ គឺជាភពដែលនៅជិតភពផែនដីជាងគេបំផុត ភពនេះបានស្រូបយកបរិយាកាសពីភពផែនដីយ៉ាងច្រើន ដូច្នេះហើយអ្នកវិទ្យាសាស្រ្តគិតថាភពនេះអាចបញ្ជូនមនុស្សទៅរស់នៅបាននាពេលអនាគត។២.ភពអង្គារ៖ ដូចយើងគ្រប់គ្នាបានដឹងហើយថា អង្គការណាសាត្រៀមបញ្ជូនមនុស្សទៅរស់នៅភពអង្គារក្នុងឆ្នាំ២០៣០ ព្រោះតែភពនេះមានធាតុផ្សំនឹងរូបរាងដូចទៅនឹងផែនដីយើងណាស់។៣.Ceres៖ គឺជាភពដែលស្ថិតនៅចន្លោះកណ្ដាលនៃភពអង្គារនឹងភពព្រហស្បតិ៍ ដូចច្នេះហើយភពនេះគឺមានកន្លែងស្អាតដែលអាចក្លាយជាជំរករបស់មនុស្សបាន ព្រោះភពនេះផ្ទុកទៅដោយទឹក២៥%ដែលវាផ្ទុកទឹកស្អាតច្រើនជាងផែនដីយើងទៅទៀត។៤.Yuropa៖ គឺជាភពដែលត្រជាក់ខ្លាំងហើយសម្បូរទៅដោយទឹករាវ ប៉ុន្តែភពនេះមានសារធាតុគីមីច្រើនណាស់។៥.Titan៖ គឺជាភពដែលមានអុកស៊ីសែនច្រើនរហូតទៅដល់៩០% ហើយភពនេះមានបរិយាកាសល្អជាងផែនដីយើង១.៥ ដងដែលវាសាកសមសម្រាប់មនុស្សយើងរស់នៅជាទីបំផុត៕

ប្រភព៖ Share knowledge

នៅពេលត្រូវជិះយន្តហោះធ្វើដំណើរទៅក្រៅប្រទេស មនុស្សភាគច្រើនអាចមានបញ្ហាក្នុងអំឡុងពេលនៅលើយន្តហោះ គឺអង្គុយហើយគ្មានក្តីសុខ ឬមិនស្រួលខ្លួន ជាពិសេស ការធ្វើដំណើរអាចត្រូវប្រើពេលវេលាយូរប្រមាណ១០ម៉ោងនៅលើយន្តហោះ ហើយ៦វិធីនេះសម្រាប់ការជិះយន្តហោះយ៉ាងមានក្តីសុខ រួមមាន ៖

១-ជ្រើសរើសយន្តហោះ ៖
ក្រៅពីរឿងពេលវេលា និងតម្លៃសំបុត្រយន្តហោះហើយ រឿងមួយដែលយើងគួរចាប់អារម្មណ៍ដូចគ្នា គឺយន្តហោះត្រូវជិះនោះបែបណា ។ បើអាចទៅរួច គួរជ្រើសរើសជិះយន្តហោះប្រភេទ Boeing 787 Dreamliner ឬ Airbus A350 ព្រោះសម្ពាធខ្យល់ក្នុងយន្តហោះទាំងនេះអាចប្រៀបធៀបនឹងសម្ពាធក្នុងរយៈកម្ពស់៦.០០០ហ្វុត ជំនួសឱ្យ៨.០០០ហ្វុត ។ ដូច្នេះ វាអាចកាត់បន្ថយអាការៈឈឺក្បាល ហត់នឿយ និងមិនស្រួលខ្លួន។

២-ជ្រើសរើសកៅអីអង្គុយលើស្លាបយន្តហោះ ៖
បើអ្នកជាមនុស្សមានបញ្ហាពុលយន្តហោះ គួរតែជ្រើសរើសកៅអីនៅលើស្លាបយន្តហោះផ្នែកខាងមុខរបស់យន្តហោះ វានឹងអាចកាត់បន្ថយអាការៈទាំងនេះ ព្រោះប្រៀបដូចជាយើងបានអង្គុយនៅចំណុចកណ្តាលនៃយន្តហោះ ។ ដូច្នេះ ធ្វើឱ្យយើងមិនវិលមុខខ្លាំងពេក ។

៣-ញ៉ុកត្រចៀក ៖
ការញ៉ុកត្រចៀក ឬប្រើ ear plug មិនត្រឹមតែធ្វើឱ្យយើងសម្រាកលក់ស្រួលប៉ុណ្ណោះទេ ប៉ុន្តែវាជួយកាត់បន្ថយសំឡេងខ្លាំងពីគ្រឿងម៉ាស៊ីនផងដែរ ដែលសំឡេងទាំងនេះមានកម្រិតប្រមាណ៨៥ដេស៊ីបែល ហើយអាចលឺខ្លាំងរហូតដល់១២០ដេស៊ីបែលនៅពេលយន្តហោះកំពុងហោះឡើង និងចុះចត ។ ការពាក់ ear plug គឺជាការល្អសម្រាប់សុខភាពត្រចៀកផងដែរ ។

៤-ប្រើក្រណាត់បិទភ្នែកពេលត្រូវការសម្រាក ៖
បើចង់សម្រាកនៅលើយន្តហោះ ហើយមិនត្រូវការមានពន្លឺរំខានការគេងដូចជា កញ្ចក់ទូរទស្សន៍របស់អ្នកដំណើរនៅក្បែរខាង, ពន្លឺក្នុងយន្តហោះ រួមទាំងពន្លឺថ្ងៃចាំងចូលមក ក្រណាត់បិទភ្នែកចាត់ទុកជាវត្ថុសំខាន់មិនអាចខ្វះបានដាច់ខាត ជាពិសេស នៅពេលធ្វើដំណើរពេលថ្ងៃ ។

៥-ចៀសវាងផឹកភេសជ្ជៈមានជាតិអាល់កុល ៖
បើមិនចង់ឱ្យភាពរីករាយក្នុងការធ្វើដំណើររសាត់បាត់អស់ គួរតែចៀសវាងការផឹកភេសជ្ជៈមានជាតិអាល់កុល ព្រោះនៅពេលយើងធ្វើដំណើរតាមយន្តហោះ វានឹងធ្វើឱ្យរាងកាយខ្វះខាតទឹកស្រាប់ទៅហើយ ហើយជាតិអាល់កុលនឹងជំរុញឱ្យរាងកាយកាន់តែយ៉ាប់លើសដើម ។

៦-ចៀសវាងបើកអេក្រង់ទូរទស្សន៍ ៖
ការបើកអេក្រង់ទូរទស្សន៍ទុកចោលនឹងធ្វើឱ្យពន្លឺពណ៌ខៀវរំខានដល់ការសម្រាករបស់យើង គឺមិនខុសគ្នាពីការទូរស័ព្ទដៃទេ ។ ដូច្នេះ បើយើងចង់សម្រាកឱ្យលក់នៅលើយន្តហោះ គួរតែកុំបើកទូរទស្សន៍មុនពេលសម្រាក ៕

ប្រភព ៖ sanook

ប្រទេសថៃ៖ប្រទេសថៃគឺជាប្រទេសជឿនលឿនជាងគេផងដែរនៅក្នុងតំបន់អាស៊ាន ប៉ុន្តែ
ទោះជាណាក៏ដោយជនជាតិថៃនៅតែប្រកាន់ភ្ជាប់នៅជំនឿមន្តអាគមផ្សំនិយមផ្សេងៗដែលគេជឿថាមានពិតនៅលើលោក។ ខ្មោចទាំង៩ប្រភេទហើយនេះដែលជនជាតិថៃធ្លាប់ប្រទះឃើញនឹងជឿថាមានពិតមែន ខ្មោចទាំង៩ប្រភេទនោះមានដូចជា៖
១.អាប៖ អាបគឺជាប្រភេទព្រាយអមនុស្សដែលពេលព្រឹកជាមនុស្សធម្មតានឹងពេលយប់ប្រែខ្លួនទៅជាអាបដកកនិងពោះវៀនហោះ ស៊ីគ្រឿងក្នុងគោក្របីនិងកូនង៉ែតទើបតែកើតជាដើម។
២.ខ្មោចកង្កែប៖ គឺជាប្រភេទខ្មោចអមនុស្សដែលពេលព្រឹកជាមនុស្សធម្មតានឹងពេលយប់វាចូលចិត្តលួចស៊ីកង្កែបរស់ ប៉ុន្តែខ្មោចនេះមិនមានគ្រោះថ្នាក់ដល់មនុស្សឡើយ។
៣.ខ្មោចចេកតានី៖ គឺជាប្រភេទខ្មោចដែលស្រស់ស្អាតស្លៀកឈុតពណ៌បៃតងលាបក្រែមក្រហម ខ្មោចនេះចេញអោយឃើញតែពេលយប់ទេ ខ្មោចនេះចូលចិត្តបបួលប្រុសៗមករួមរ័ក្ស រួចហើយសម្លាប់ចោលតែម្តង។
៤.ខ្មោចនាងអាំ៖ គឺជាប្រភេទខ្មោចវិញ្ញាណខ្មៅដែលមានរូបរាងអាក្រក់ តែងតែអង្គុយសង្កត់លើបុរសៗរហូតដល់ដាច់ខ្យល់ស្លាប់។៥.ខ្មោចតៃហោង៖ គឺជាប្រភេទខ្មោចដែលស្លាប់មុនអាយុដោយគ្រោះថ្នាក់ទាន់ហន់ ឬអំពើអាក្រក់ណាមួយកើតឡើង ខ្មោចនេះមានវិញ្ញាណពីរចូលសណ្ឋិត ខ្មោចនេះកាចសាហាវណាស់គឺស្លាប់កន្លែងណា លងកន្លែងនឹងមិនថាព្រឹកឬថ្ងៃឡើយ។
៦.ខ្មោចរមាស់ខ្នង៖ គឺជាប្រភេទខ្មោចដែលចូលចិត្តហែលទឹកនៅពេលយប់ជ្រៅ នឹងចូលចិត្តលងមនុស្សដែលមានគ្នាច្រើន។
៧.ខ្មោចកុមារមាស៖ ជាប្រភេទខ្មោចដែលចូលចិត្តស៊ីស្ករគ្រាប់ ឬគេហៅថាខ្មោចម្រេញគង្វាល។
៨.ប្រែត៖ ជាប្រភេទខ្មោចដែលចូលចិត្តស៊ីរបស់ស្មោកគ្រោកមានក្លិនស្អុយ។
៩.ព្រាយ៖ ជាប្រភេទខ្មោចជើងកប វារស់នៅតែក្នុងទឹកទេ វាចូលចិត្តអូសទាញមនុស្សអោយចូលលេងទឹក រួចហើយទាញជើងពួកគេអោយលង់ស្លាប់តែម្តង៕

ប្រទេសចិន ៖ កាលពីពេលថ្មីៗនេះ មានសេចក្តីរាយការណ៍ពីសារព័ត៌មានបរទេសជាច្រើនថា ក្រសួងថាមពលអាមេរិកវាយតម្លៃថា ជំងឺកូវីដ-១៩ ធ្លាយចេញពីបន្ទប់ពិសោធន៍នៅទីក្រុងវូហាន ប្រទេសចិន ។ គំនិតនេះស្របគ្នានឹង Christopher Wray ប្រធានការិយាល័យស៊ើបអង្កេតរបស់អាមេរិក បានផ្តល់សម្ភាសន៍ជាមួយសារព័ត៌មានថា ការិយាល័យស៊ើបអង្កេតបានវាយតម្លៃពីប្រភពនៃការរាតត្បាតជំងឺកូវីដមកយូរហើយ និងមានភាគរយខ្ពស់ថា ជំងឺនេះចេញពីបន្ទប់ពិសោធន៍របស់ចិន ។

ទោះយ៉ាងណា សេចក្តីរាយការណ៍របស់ក្រសួងថាមពលអាមេរិកមិនអាចបញ្ជាក់ការពិតបានទេ ហើយការជឿតាមព័ត៌មានផ្សាយចេញនេះក៏ស្ថិតក្នុងកម្រិតទាបដែរ ប៉ុន្តែរឿងនេះធ្វើឱ្យមានការបែងចែករវាងសមាជិកគណបក្សប្រជាធិបតេយ្យ និងគណបក្សសាធារណរដ្ឋ រួមទាំងបានស្វែងរកប្រភពនៃជំងឺកូវីដម្តងទៀត ។ លើសពីនេះ វាបានក្លាយជារឿងប្រកែកគ្នាក្នុងបណ្តាញសង្គម Twitter ហើយធ្វើឱ្យនាយកប្រតិបត្តិ Twitter លោក Elon Musk ចូលរួមជជែកវែកញែកផងដែរ កាលពីថ្ងៃទី២៧ ខែកុម្ភៈ កន្លងមក ។

អ្នកកាសែតឯករាជ្យម្នាក់មានឈ្មោះក្នុង Twitter ថា @KanekoaTheGreat បានបង្ហោះអត្ថបទថា ៖ «លោក Anthony Fauci កំពុងផ្តល់មូលនិធិសម្រាប់ការស្រាវជ្រាវ Gain of Function នៅបន្ទប់ពិសោធន៍ក្រុងវូហាន ហើយកុហកសភាអំពីរឿងនេះ ។ បច្ចុប្បន្ន ទាំង FBI និងក្រសួងថាមពលមានមតិដូចគ្នាថា ជំងឺកូវីដបានធ្លាយចេញពីបន្ទប់ពិសោធន៍របស់ចិន ហើយតើលោក Anthony Fauci បានផ្តល់ប្រាក់គាំទ្រការបង្កើតជំងឺកូវីដឬអត់ ?» ហើយលោក Elon Musk បានឆ្លើយតបទៅវិញថា ៖ «លោក Anthony Fauci បានធ្វើវាតាមរយៈបណ្តាញ EcoHealth» ។

ការឆ្លើយតបរបស់លោក Elon Musk បានធ្វើឱ្យប្រទេសចិនក្តៅក្រហាយជាខ្លាំង ក្នុងនោះ Eunice Yoon អ្នកយកព័ត៌មាន CNBC ប្រចាំក្រុងប៉េកាំងលើកឡើងថា កាសែត Global Times ដែលជាប្រព័ន្ធផ្សព្វផ្សាយមួយស្ថិតក្រោមការគ្រប់គ្រងរបស់រដ្ឋាភិបាលចិន បានដាស់តឿនលោក Elon Musk ថា កុំធ្វើអ្វីដើម្បីបំបែកឆ្នាំងបាយខ្លួនឯងឱ្យសោះ ។ ប្រតិកម្មពីប្រទេសចិននេះ បានសំដៅលើរោងចក្រផលិតរថយន្តអគ្គិសនីដ៏ធំរបស់ក្រុមហ៊ុន Tesla ស្ថិតនៅសៀងហៃ ប្រទេសចិន ។ ជាមួយគ្នានេះ ពលរដ្ឋចិនត្រូវបានគេចាត់ទុកថា ជាអតិថិជនដ៏ធំបំផុតក្នុងលំដាប់ទី២ របស់ Tesla ។ ដូច្នេះ បើមានបញ្ហាជាមួយចិននោះ នឹងធ្វើឱ្យប៉ះពាល់ដល់អាជីវកម្មរបស់ Tesla យ៉ាងពិតប្រាកដ ។

ទោះយ៉ាងណា ប្រទេសចិនបានបដិសេធរហូតថា ជំងឺកូរ៉ូណាជាប្រភពនៃជំងឺកូវីដ-១៩ មិនបានធ្លាយចេញពីបន្ទប់ពិសោធន៍នៅក្រុងវូហានទេ ហើយវាក៏មិនបានធ្លាយពីបន្ទប់ពិសោធន៍ផ្សេងៗក្នុងប្រទេសចិនដែរ ។ ចិនបញ្ជាក់ថា ការនិយាយបែបនេះជាការព្យាយាមរបស់អាមេរិក ដោយចង់ទម្លាក់កំហុសលើចិន ៕

ប្រភព ៖ beartaiBRIEF

ប្រទេសអូស្ត្រាលី ៖ បណ្តាសិស្ស-និស្សិតអូស្ត្រាលីរាប់រយនាក់បានសម្រេចចិត្តផ្អាករៀន ហើយមកចូលរួមសកម្មភាពដើរជាក្បួននៅតាមផ្លូវក្នុងទីក្រុងស៊ីដនី ដើម្បីអំពាវនាវឱ្យរដ្ឋាភិបាលដោះស្រាយបញ្ហាបម្រែបម្រួលអាកាសធាតុ ដោយមានសហជីពការងារ និងអ្នកគាំទ្រផ្សេងៗចូលរួមផងដែរ ។ ពួកគេបានដាក់សំណើទៅកាន់រដ្ឋាភិបាលឱ្យលុបចោលការអនុម័តគម្រោងធ្យូងថ្ម ប្រេងឥន្ធនៈ និងឧស្ម័នធម្មជាតិបន្ថែមទៀតនាថ្ងៃអនាគត ។

និស្សិតម្នាក់ក្នុងចំណោមនិស្សិតទាំងអស់ដែលបានមកដើរក្បួននេះ បានផ្តល់សម្ភាសន៍ទៅកាន់សារព័ត៌មានថា គេដឹងច្បាស់ថា យុវជនទូទាំងពិភពលោកបារម្ភអំពីអនាគតរបស់ខ្លួនប៉ុនណា ខណៈមានបាតុភូតផ្សេងៗកើតឡើងជាបន្តបន្ទាប់នៅទូទាំងពិភពលោក មិនថាភ្លើងឆេះព្រៃសន្ធោសន្ធៅ គ្រោះរាំងស្ងួតហួតហែង ឬទឹកជំនន់ខ្លាំងក្លា គឺសុទ្ធតែបណ្តាលមកពីឥទ្ធិពលរបស់អាកាសធាតុប្រែប្រួលទាំងអស់ ។ ដូច្នេះ ពួកគេបានចេញមកប្រមូលផ្តុំគ្នានេះ គឺដើម្បីអំពាវនាវឱ្យមានការផ្លាស់ប្តូរកើតឡើងនៅប្រទេសអូស្ត្រាលី ។

អូស្ត្រាលីចាត់ទុកជាប្រទេសមួយមិនព្យាយាមដោះស្រាយបញ្ហាអាកាសធាតុប្រែប្រួល ប៉ុន្តែបន្ទាប់ពីរដ្ឋាភិបាលបច្ចុប្បន្នចូលមកគ្រប់គ្រងប្រទេស កាលពីខែឧសភា ឆ្នាំ២០២២ កន្លងមក គេសង្កេតឃើញថា រដ្ឋាភិបាលបានបង្កើនគោលដៅកាត់បន្ថយការបំភាយឧស្ម័នផ្ទះកញ្ចក់ឱ្យបាន៤៣% នៅត្រឹមឆ្នាំ២០៣០ ពីគោលដៅដំបូងដែលបានកំណត់ស្មើ២៨% នៅឆ្នាំ២០៣០ ៕

ប្រភព ៖ TNNWorld

ប្រទេសឡាវ ៖ ការសាងសង់រោងចក្រថាមពលវារីអគ្គិសនីទំហំ១.៤៦០មេហ្គាវ៉ាត់ ស្ថិតនៅកណ្តាលទន្លេមេគង្គក្នុងតំបន់ហ្លួងព្រះបាងភាគខាងជើងប្រទេសឡាវ បានចាប់ផ្តើមដំណើរតាំងពីឆ្នាំ២០២០ មក ។ គេរំពឹងថា គម្រោងសាងសង់នេះនឹងបញ្ចប់ ហើយអាចផលិតអគ្គិសនីបាននៅឆ្នាំ២០៣០ ។

ស្ថានីយទូរទស្សន៍ជាតិឡាវរាយការណ៍ថា រោងចក្រថាមពលវារីអគ្គិសនីនេះនឹងដំណើរការតាមរយៈប្រព័ន្ធទឹកហូរ (Run-of-River) ដែលមានកម្ពស់៧៩ម៉ែត្រ ហើយទឹកនឹងហូរចុះក្រោមក្នុងកម្ពស់២៩,៦ម៉ែត្រ ។ ក្រៅពីនេះ វានឹងមានកម្លាំងផលិតអគ្គិសនីចំនួន១.៤០០មេហ្គាវ៉ាត់ ព្រមទាំងមានកម្លាំងផលិត៣បន្ថែមទៀតអាចផលិតអគ្គិសនីចំនួន៦០មេហ្គាវ៉ាត់ ដែលធ្វើឱ្យកម្លាំងថាមពលទាំងអស់អាចផលិតក្នុង១ឆ្នាំៗ ស្មើប្រមាណ៦.៨៥៤ជីហ្គាវ៉ាត់/១ម៉ោង ។

ការផលិតថាមពលអគ្គិសនី និងឧស្សាហកម្មរ៉ែនៅឡាវបានលូតលាស់យ៉ាងឆាប់រហ័ស ហើយមានតួនាទីសំខាន់សម្រាប់ការលូតលាស់សេដ្ឋកិច្ចរបស់ប្រទេសយ៉ាងខ្លាំង ។ ឡាវបានសាងសង់រោងចក្រវារីអគ្គិសនីជាច្រើនកន្លែង ជាផ្នែកមួយនៃផែនការយុទ្ធសាស្ត្ររបស់រដ្ឋាភិបាល ដែលចង់ផ្លាស់ប្តូរប្រទេសឱ្យក្លាយជាប្រភពថាមពលអគ្គិសនីនៅអាស៊ាន ។ ក្រៅពីនេះ ឧស្សាហកម្មទាំងពីរបានបង្កើតប្រយោជន៍ជាច្រើនទាក់ទងនឹងការបង្កើតការងារ និងការកសាងផ្លូវ សាលារៀន មន្ទីរពេទ្យ ផ្សារ រហូតដល់ប្រភពទឹកស្អាតផងដែរ ។

បច្ចុប្បន្ន ប្រទេសឡាវមានរោងចក្រថាមពលអគ្គិសនីចំនួន៩៤កន្លែង ដែលអាចផលិតអគ្គិសនីសរុបចំនួន១១.៦៦១មេហ្គាវ៉ាត់/១ឆ្នាំ ស្មើ៩៥% សម្រាប់ការប្រើប្រាស់អគ្គិសនីក្នុងលំនៅឋានទាំងអស់ទូទាំងប្រទេស ។ ក្រៅពីនេះ ការផ្គត់ផ្គង់អគ្គិសនីទៅកាន់បណ្តាប្រទេសជិតខាង និងប្រាក់ចំណេញបានមកពីការជីកយករ៉ែ នឹងជួយបង្កើតប្រាក់ចំណូលជារូបិយប័ណ្ណបរទេសជាច្រើនដល់ឡាវ ហើយប្រាក់ចំណូលនេះនឹងកើនឡើងជាបន្តបន្ទាប់ ៕ ប្រភព ៖ AECconnect

ប្រទេសថៃ ៖ នាយកដ្ឋានជំរុញពាណិជ្ជកម្មអន្តរជាតិ (DITP) បង្ហាញថា នៅឆ្នាំ២០២៣ ថៃបានដាក់គោលដៅចុះហត្ថលេខាលើកិច្ចព្រមព្រៀងពាណិជ្ជកម្មសេរី (FTA) ទាំងអស់៧ច្បាប់ ក្នុងនោះ២ច្បាប់ជាមួយចិន និង៥ច្បាប់ទៀតជាមួយឥណ្ឌា ។ កិច្ចព្រមព្រៀងនេះនឹងធ្វើឱ្យផលិតផលថៃអាចចូលទៅកាន់ទីផ្សារដែលមានពលរដ្ឋចំនួន៣៦៥លាននាក់ ។

លោក Phusit Rattanakul អគ្គនាយកនៃអគ្គនាយកដ្ឋានជំរុញពាណិជ្ជកម្មអន្តរជាតិលើកឡើងថា កាលពីថ្ងៃទី១ ខែមីនា កន្លងមក ថៃបានចុះហត្ថលេខាលើកិច្ចព្រមព្រៀងពាណិជ្ជកម្មសេរីច្បាប់ដំបូងជាមួយក្រុង Shenzhen របស់ចិន ខណៈទីក្រុងនេះមានពលរដ្ឋចំនួន១២,៥លាននាក់ ។ វានឹងជួយត្រួសត្រាយផ្លូវសម្រាប់ទំនិញ និងសេវាកម្មផ្សេងៗរបស់ថៃអាចចូលដល់ទីក្រុងផ្សេងទៀតបាន ។

ក្រៅពីនេះ នាយកដ្ឋានជំរុញពាណិជ្ជកម្មអន្តរជាតិសង្ឃឹមថា ថៃនឹងអាចចុះហត្ថលេខាលើកិច្ចព្រមព្រៀងពាណិជ្ជកម្មសេរីជាមួយខេត្តយូណានដែលមានពលរដ្ឋចំនួន៤៧,២១លាននាក់ ថែមទាំងមានព្រំដែនជាប់ប្រទេសមីយ៉ាន់ម៉ា វៀតណាម និងឡាវ ។ ដូច្នេះ វានឹងជួយឱ្យទំនិញរបស់ថៃអាចចូលទៅកាន់ទីផ្សារធំទូលាយជាងមុនក្នុងភូមិភាគ តាមរយៈប្រព័ន្ធដឹកជញ្ជូនរថភ្លើងឡាវ-ចិន ។

ចំណែកការចុះហត្ថលេខាលើកិច្ចព្រមព្រៀងពាណិជ្ជកម្មសេរី៥ច្បាប់ជាមួយរដ្ឋនានារបស់ឥណ្ឌា ដែលរដ្ឋទាំងនេះមានពលរដ្ឋសរុបចំនួន៣០៥លាននាក់កំពុងស្ថិតក្រោមដំណើរការ ហើយសង្ឃឹមថា នឹងអាចបញ្ចប់មុនដំណាច់ឆ្នាំនេះ ។ លើសពីនេះ ថៃនឹងផ្តោតលើគម្រោងបណ្តាក់ទុនរួមគ្នាផ្សេងៗពាក់ព័ន្ធនឹងអាហារ និងភេសជ្ជៈហាឡាល់ គ្រឿងសម្អាង ឌីជីថល បច្ចេកវិទ្យា ដូងប្រេង គ្រឿងសង្ហារិម និងឧស្សាហកម្មសេវាកម្មវេជ្ជសាស្ត្រ ។

ក្រៅពីនេះ នាយកដ្ឋានជំរុញពាណិជ្ជកម្មអន្តរជាតិបានសិក្សាពីភាពអាចទៅរួចក្នុងការធ្វើកិច្ចព្រមព្រៀងពាណិជ្ជកម្មសេរីជាមួយទីផ្សារថ្មីៗតាមការស្នើសុំរបស់ផ្នែកឯកជន ដូចជា ជាមួយប្រទេសប៉ាគីស្ថាន ឈូងសមុទ្រអារ៉ាប់ និងអាហ្វ្រិក ។ ការសិក្សាលម្អិតពីគម្រោងនេះជារឿងសំខាន់ ខណៈប្រទេសខ្លះកំពុងជួបបញ្ហាអត្រាប្តូរប្រាក់ប្រែប្រួល ដែលជះឥទ្ធិពលដល់ការទូទាត់ប្រាក់ក្នុងការធ្វើពាណិជ្ជកម្មសេរី ។

ថៃបានចុះហត្ថលេខាលើកិច្ចព្រមព្រៀងពាណិជ្ជកម្មសេរីរួចហើយចំនួន៦ច្បាប់នៅឆ្នាំ២០២១ និងឆ្នាំ២០២២ ជាមួយប្រទេសនិងក្រុងផ្សេងៗ ហើយបន្តទៅនេះ ថៃគ្រោងនឹងចុះកិច្ចព្រមពៀងជាមួយខេត្ត Hainan និង Gansu របស់ចិន, ក្រុងកូហ្វូ របស់ជប៉ុន, រដ្ឋ Telangana របស់ឥណ្ឌា ក្រុងប៊ូសាន និងខេត្តហ្យុងហ្គី របស់កូរ៉េខាងត្បូង ។

នាយកដ្ឋានជំរុញពាណិជ្ជកម្មអន្តរជាតិរំពឹងថា កិច្ចព្រមព្រៀងពាណិជ្ជកម្មសេរីនឹងជួយបង្កើនបរិមាណការនាំចេញរបស់ថៃទៅកាន់ប្រទេសទាំងនេះ បានយ៉ាងតិច៤,២២សែនលានបាតក្នុងរយៈពេល៣ឆ្នាំ ៕

ប្រភព ៖ AEC connect