ប្រទេសមីយ៉ាន់ម៉ា ៖ ស្ថានីយទូរទស្សន៍ជាតិមីយ៉ាន់ម៉ា (MRTV) បានរាយការណ៍ថា ចិនជាប្រទេសទិញជ័រកៅស៊ូធំមួយពីមីយ៉ាន់ម៉ា ស្មើនឹង៧៥% របស់ការនាំចេញជ័រកៅស៊ូទាំងអស់របស់ប្រទេសមីយ៉ាន់ម៉ា ។

មីយ៉ាន់ម៉ាបាននាំចេញជ័រកៅស៊ូជាង២០ម៉ឺនតោនទៅកាន់ប្រទេសនានាលើពិភពលោកដូចជា ចិន កូរ៉េខាងត្បូង ឥណ្ឌា ម៉ាឡេស៊ី ឥណ្ឌូណេស៊ី សិង្ហបុរី និងជប៉ុន តាំងពីថ្ងៃទី១ ខែមេសា ឆ្នាំ២០២២ រហូតដល់ដើមខែកុម្ភៈ ឆ្នាំ២០២៣ កន្លងមក ។ នៅឆ្នាំ២០២៣នេះ មីយ៉ាន់ម៉ាមានគោលដៅនាំចេញជ័រកៅស៊ូរបស់ខ្លួនឱ្យស្មើគោលដៅដែលបានកំណត់ គឺ៣០ម៉ឺនតោន ។ តាមទិន្នន័យរបស់មជ្ឈមណ្ឌលទំនិញបញ្ជាក់ថា កាលពីដើមខែមករា ឆ្នាំ២០២៣ តម្លៃជ័រកៅស៊ូបន្ទះស្ងួតស្មើប្រមាណ១.១៩០kyat ក្នុង១ដុំ ។

មន្ត្រីសមាគមអ្នកដាំដុះ និងផលិតជ័រកៅស៊ូមីយ៉ាន់ម៉ានិយាយថា បច្ចុប្បន្ន តម្លៃជ័រកៅស៊ូក្នុងទីផ្សារក្រៅប្រទេស គឺស្មើប្រមាណ១.៧០០ដុល្លារអាមេរិកក្នុង១តោន ។ ទោះយ៉ាងណា តម្លៃជ័រកៅស៊ូបច្ចុប្បន្នមិនបានបំផ្លាញស្ថិតិតម្លៃខ្ពស់បំផុត១.៦០០ kyat ក្នុង១ដុំ ក្នុងរដូវចៀរកៅស៊ូនៅសប្តាហ៍ទី៣ របស់ខែកញ្ញា ឆ្នាំ២០២២ ទេ ។

គួរបញ្ជាក់ថា មីយ៉ាន់ម៉ាមានផ្ទៃដីដាំដុះកៅស៊ូទូទាំងប្រទេសប្រមាណ១,៦៤លានហិកតា ហើយកន្លែងផលិតជ័រកៅស៊ូភាគច្រើនស្ថិតនៅក្នុងរដ្ឋម៉ន តំបន់តាណាវស្រ៊ី និងរដ្ឋការៀង រួមទាំងនៅតំបន់ថេបបាហ្គោ អិរ៉ាវ៉ាឌី ទីក្រុងយ៉ាំងហ្គន រដ្ឋសាន និងរដ្ឋខាឆិន ។ ប្រទេសមីយ៉ាន់ម៉ារំពឹងថា នឹងអាចផលិតជ័រកៅស៊ូបានប្រមាណ៤០ម៉ឺនតោននៅឆ្នាំ២០២៣នេះ ខណៈការផលិតជ័រកៅស៊ូជារៀងរាល់ឆ្នាំ មីយ៉ាន់ម៉ាអាចរកប្រាក់ចំណេញបានច្រើនពីក្រៅប្រទេស ។

ក្រៅពីនេះ តម្រូវការ និងការផ្គត់ផ្គង់ក្នុងទីផ្សារពិភពលោក រួមទាំងការផលិតជ័រកៅស៊ូក្នុងតំបន់អាស៊ាន គឺមានទំនាក់ទំនងគ្នាខ្លាំងជាមួយតម្លៃជ័រកៅស៊ូរបស់មីយ៉ាន់ម៉ាផងដែរ ៕ ប្រភព ៖ AEC connect

ប្រទេសកូរ៉េខាងជើង ៖ តាមសារព័ត៌មានកូរ៉េខាងជើងផ្សព្វផ្សាយថា កូរ៉េខាងជើងបានសម្រេចចិត្តប្រើប្រាស់វិធានការដើម្បីទប់ស្កាត់សង្គ្រាម ដោយរៀបចំសកម្មភាពប្រតិបត្តិការយ៉ាងសំខាន់ ។ ការប្រកាសនេះ គឺមុនពេលកូរ៉េខាងត្បូង និងអាមេរិកនឹងចាប់ផ្តើមធ្វើសមយុទ្ធរួមគ្នាដ៏ធំមួយក្នុងរយៈពេល៥ឆ្នាំ ។

សារព័ត៌មានកណ្តាលរបស់កូរ៉េខាងជើង KCNA បានរាយការណ៍ថា ក្នុងកិច្ចប្រជុំគណៈកម្មាធិការយោធានៃគណបក្សពលករ ដែលមានលោក គឹម ជុងអ៊ុន មេដឹកនាំកំពូលនៃប្រទេសកូរ៉េខាងជើងធ្វើជាប្រធាននៃកិច្ចប្រជុំដើម្បីពិភាក្សា និងសម្រេចចិត្តប្រើប្រាស់វិធានការគ្រប់គ្រងសកម្មភាពសំខាន់ៗដើម្បីទប់ស្កាត់សង្គ្រាមប្រកបដោយប្រសិទ្ធភាព និងពង្រឹងកងកម្លាំងឱ្យកាន់តែខ្លាំងក្លាជាមុន ។ ការប្រកាសចាត់វិធានការរបស់កូរ៉េខាងជើងនេះ គឺក្នុងគោលបំណងទប់ស្កាត់ស្ថានការណ៍បច្ចុប្បន្ន ខណៈកូរ៉េខាងជើងអះអាងថា កូរ៉េខាងត្បូង និងអាមេរិកកំពុងតែបង្កសង្គ្រាម ។

កាលពីមុន កូរ៉េខាងត្បូង និងអាមេរិកបានប្រកាសថា ប្រទេសទាំងពីរនឹងធ្វើសមយុទ្ធរួមគ្នាមួយក្រោមឈ្មោះថា Freedom Shield នាពេលឆាប់ៗនេះ ។ ការធ្វើសមយុទ្ធរួមគ្នារវាងប្រទេសទាំងពីរ គឺផ្តោតទៅលើស្ថានភាពសន្តិសុខដែលកំពុងផ្លាស់ប្តូរ ព្រោះកូរ៉េខាងជើងបានបង្កើនការឈ្លានពានរបស់ខ្លួនរហូតដល់២ដង ។

កាលពីថ្ងៃទី១០ ខែមីនា កន្លងមក សារព័ត៌មានកណ្តាលរបស់កូរ៉េខាងជើង KCNA រាយការណ៍ថា មេដឹកនាំកំពូលកូរ៉េខាងជើងបានបញ្ជាឱ្យកងទ័ពរបស់ខ្លួនបង្កើនការហ្វឹកហាត់សម្រាប់ត្រៀមខ្លួនធ្វើសង្គ្រាមពិតប្រាកដ ។ លោក គឹម ជុងអ៊ុន បានថ្លែងក្នុងអំឡុងពេលត្រួតពិនិត្យការហ្វឹកហាត់ការបាញ់ប្រហាររបស់កងទ័ពថា កងទ័ពត្រូវត្រៀមខ្លួនសម្រាប់ភារកិច្ចផ្នែកយុទ្ធសាស្ត្រ២យ៉ាង គឺការទប់សង្កាត់សង្គ្រាម និងចាប់ផ្តើមធ្វើសង្គ្រាម ។

ទោះយ៉ាងណា អ្នកវិភាគមើលឃើញថា កូរ៉េខាងជើងនឹងយកការធ្វើសមយុទ្ធរួមគ្នារវាងកូរ៉េខាងត្បូង និងអាមេរិក ធ្វើជាលេសដើម្បីធ្វើសកម្មភាពអាក្រក់ថែមទៀត ដូចជា សាកល្បងបាញ់មីស៊ីល ឬសាកល្បងអាវុធនុយក្លេអ៊ែរ ជាដើម ៕

ប្រភព ៖ TNN World

នៅយប់ថ្ងៃទី១២ ខែមីនា ឆ្នាំ២០២៣ នេះ សម្តេចតេជោ ហ៊ុន សែន បានផ្ញើសារ​ ក្រើនរម្លឹកដល់​ប្រជាពលរដ្ឋ ឱ្យ​បងប្អូនប្រជាពលរដ្ឋមានការប្រុងប្រយ័ត្នការឆបោក តាមតេឡេក្រាម។ នេះក៏ដោយសារ​តែសម្តេច បានទទួល​សារ​តាមតេឡេក្រាម ពីអ្នកដាក់ឈ្មោះ និងរូបថតអ្នកឧកញ៉ា ឃុន សៀ ហើយ​ឱ្យ​សម្តេច ផ្ទេរប្រាក់ឱ្យតាម Account ធនាគារ ABA។

សម្តេចតេជោ ហ៊ុន សែន បានប្រកាសតាមសារ​ជាសំឡេងថា៖ “លេខអ្នកផ្ញើសារចូល​តេឡេក្រាមសម្តេចនោះ ជាលេខនៅឡាវ។ តែតាមការស្រាវជ្រាវ គឺអ្នកផ្ញើចេញពីតៃវ៉ាន់​។ គេបានផ្ញើសារជាភាសាអង់គ្លេស មកសម្តេច ឱ្យវេរលុយ តាម ABA”។

ដូច្នេះ​ករណី​ឆបោកប្រាក់នេះ សម្តេចតេជោ បានប្រកាសអំពាវនាវដល់​បងប្អូន​ជនរួមជាតិ សូម​ប្រុងប្រយ័ត្ន​ កុំ​ចាញ់បោក​គេ ក្នុងករណីណាមួយ៕

ចូលស្តាប់ប្រសាសន៍សម្តេចពេញ៖ https://t.me/spmhunsen

ប្រទេសវៀតណាម ៖ សមាគមអាជីវកម្ម logistics របស់វៀតណាមបានបង្ហាញថា កំពង់ផែវៀតណាមបានគិតថ្លៃសេវាកម្មដឹកជញ្ជូនទំនិញទាបជាងគេ បើធៀបនឹងប្រទេសផ្សេងទៀតក្នុងតំបន់អាស៊ាន ។

ក្រុមហ៊ុនដឹកជញ្ជូនទំនិញតាមផ្លូវទឹកអន្តរជាតិរបស់វៀតណាម បានគិតថ្លៃសេវាកម្មកំពង់ផែ (Terminal handling charges: THC) ប្រមាណជា១៤០ដុល្លារអាមេរិកសម្រាប់ទូរកុងទឺន័រដែលមានទំហំ២០ហ្វុត ប៉ុន្តែបង់ប្រាក់ទៅឱ្យអ្នកប្រចាំការនៅកំពង់ផែវៀតណាម ដែលដឹកទំនិញឡើងចុះត្រឹមតែ៥២ដុល្លារអាមេរិកប៉ុណ្ណោះ ។ គេចាត់ទុកថា កំពង់ផែវៀតណាមបានគិតថ្លៃសេវាកម្មថោកជាងគេនៅអាស៊ាន ខណៈកំពង់ផែនៅប្រទេសសិង្ហបុរីត្រូវបង់ប្រាក់ចំនួន១១៥ដុល្លារអាមេរិក ។

យោងតាមទិន្នន័យខាងលើនេះចាត់ទុកថា វាជាគុណវិបត្តិរបស់កំពង់ផែវៀតណាម ព្រោះប្រទេសនេះបានចំណាយប្រាក់លើការវិនិយោគកំពង់ផែរាប់លានដុល្លារអាមេរិក ហើយរដ្ឋាភិបាលវៀតណាម ក៏កំពុងពិចារណាដំឡើងថ្លៃសេវាកម្មកំពង់ផែផងដែរ ។ លើសពីនេះ ការពិនិត្យទំនិញរបស់គយវៀតណាមត្រូវប្រើពេលយូរ ដែលវាបានបង្កការលំបាកផ្សេងៗដល់បណ្តាក្រុមហ៊ុនអាជីវកម្ម logistics របស់វៀតណាម ។

គួរបញ្ជាក់ថា កាលពីឆ្នាំ២០២២ កន្លងមក វៀតណាមកែលម្អកំពង់ផែធំបំផុតរបស់ខ្លួនឈ្មោះ Cai Mep – Thi Vai ស្ថិតនៅខេត្ត Ba Xie-Vung Tau ភាគខាងត្បូងប្រទេស ។ រដ្ឋាភិបាលបានចំណាយប្រាក់ប្រមាណ៦២.១៧លានដុល្លារអាមេរិកដើម្បីកែលម្អកំពង់ផែនេះ ដោយពង្រីកទទឹងពី៣១០ម៉ែត្រ ទៅ៣៥០ម៉ែត្រ និងបន្ថែមជម្រៅពី១៤ម៉ែត្រ ទៅ១៥,៥ម៉ែត្រ ដើម្បីអាចទទួលនាវាធំៗចូលចតបាន ។

កំពង់ផែ Cai Mep – Thi Vai គឺជាកំពង់ផែដំបូងរបស់វៀតណាមដែលអាចទទួលនាវាធំៗចំណុះ២១ម៉ឺន៤ពាន់តោនចូលចត ហើយរដ្ឋាភិបាលវៀតណាមបានអភិវឌ្ឍន៍កំពង់ផែនេះឱ្យក្លាយជាមជ្ឈមណ្ឌលកណ្តាលសម្រាប់ដឹកជញ្ជូនទំនិញរវាងប្រទេស ៕ ប្រភព ៖ AEC connect