ប្រទេសអាហ្សង់ទីន ៖ អាហ្សង់ទីនកំពុងតែប្រឈមនឹងបញ្ហាបម្រែបម្រួលអាកាសធាតុ ដែលធ្វើឱ្យប្រទេសនេះជួបនឹងអាកាសធាតុក្តៅ និងគ្រោះរាំងស្ងួតដ៏អាក្រក់បំផុតក្នុងរយៈពេល៦០ឆ្នាំកន្លងមក ។ លើសពីនេះ បម្រែបម្រួលអាកាសធាតុបានធ្វើឱ្យទិន្នផលកសិកម្មរបស់កសិករអាហ្សង់ទីនធ្លាក់ចុះយ៉ាងខ្លាំងផងដែរ ។

អាហ្សង់ទីន គឺជាប្រទេសនាំចេញគ្រាប់ធញ្ញជាតិដ៏ធំមួយនៅលើពិភពលោក កំពុងតែប្រឈមនឹងបញ្ហាបម្រែបម្រួលអាកាសធាតុ (Climate Change) ដែលធ្វើឱ្យប្រទេសនេះមានអាកាសធាតុក្តៅខ្លាំង និងមានគ្រោះរាំងស្ងួតខ្លាំងក្លាបំផុតដែលគេមិនដែលធ្លាប់ជួបប្រទះ ហើយធ្វើឱ្យការប្រមូលផលសណ្តែកសៀង និងពោតរបស់កសិករធ្លាក់ចុះយ៉ាងខ្លាំង ។

ប្រធាននាយកដ្ឋានស្រាវជ្រាវសេដ្ឋកិច្ចនៃសភាពាណិជ្ជកម្មទីផ្សារក្រុងរ៉ូសារីអូ លើកឡើងថា កសិករអាហ្សង់ទីនបានខាតបង់ប្រាក់ប្រមាណជាង១៤.០០០លានដុល្លារអាមេរិក ដោយសារអាកាសធាតុមិនអំណោយផលដល់ការងារកសិកម្មរបស់ពួកគេ ។ ក្រៅពីនេះ គេប៉ាន់ស្មានថា ទិន្នផលកសិកម្មនៅប្រទេសអាហ្សង់ទីននឹងធ្លាក់ចុះប្រមាណ៥០លានតោនផងដែរ ដោយអាហ្សង់ទីនមិនធ្លាប់ជួបអាកាសធាតុអាក្រក់បែបនេះពីមុនមកក្នុងប្រវត្តិសាស្ត្រ ។

នាពេលកន្លងមក អាកាសធាតុក្តៅ និងគ្រោះរាំងស្ងួត ដែលជាបញ្ហាសំខាន់នៃការផ្លាស់ប្តូរអាកាសធាតុ បានធ្វើឱ្យប៉ះពាល់យ៉ាងខ្លាំងដល់ការរស់នៅរបស់ពលរដ្ឋអាហ្សង់ទីន ។ វាបានកើតឡើងស្របពេលប្រទេសនេះកំពុងជួបបញ្ហាអតិផរណាកើនឡើងរហូតដល់៩៩% ក៏ដូចជាការទូទាត់បំណុលក្នុងប្រទេស និងក្រៅប្រទេស ជាមួយមូលនិធិរូបិយវត្ថុអន្តរជាតិ (IMF) ៕ ប្រភព ៖ Tnn earth

ប្រទេសថៃ ៖ ការប្រកួតកីឡាស៊ីហ្គេមលើកទី៣២ នឹងប្រព្រឹត្តឡើងចាប់ពីថ្ងៃទី៥-១៧ ខែឧសភា ឆ្នាំ២០២៣ ខាងមុខ នៅទីក្រុងភ្នំពេញ ប្រទេសកម្ពុជា ថៃបានលើកឡើងថា ខ្លួនជាប្រទេសមួយដែលកម្ពុជាបានទាមទារឱ្យថៃទិញសិទ្ធិផ្សាយបន្តផ្ទាល់កីឡាស៊ីហ្គេមលើកនេះ ក្នុងទឹកប្រាក់ច្រើនបំផុតក្នុងចំណាមបណ្តាប្រទេសអាស៊ាន គឺ៨០ម៉ឺនដុល្លារអាមេរិក ដែលកម្ពុជាអះអាងថា បានពិចារណាផ្អែកតាមទិន្នន័យទីផ្សាររបស់ប្រទេសនីមួយៗ ។

ជុំវិញការទិញសិទ្ធិផ្សាយបន្តផ្ទាល់កីឡាស៊ីហ្គេមនេះ លោក Kongsak Yodmanee ប្រធានគ្រប់គ្រងនៃអាជ្ញាធរកីឡាប្រទេសថៃ ថ្លែងថា ចំនួនទឹកប្រាក់ការទិញសិទ្ធិផ្សាយបន្តផ្ទាល់កីឡាស៊ីហ្គេមពីកម្ពុជា គឺខាងកម្ពុជាបានស្នើមកកាន់ថៃ ហើយថៃចាត់ទុកថា វាជាចំនួនច្រើនខ្លាំងពេក ដូច្នេះ ប្រទេសទាំងពីរនឹងត្រូវពិភាក្សាគ្នាពីរឿងនេះម្តងទៀត ។ លើសពីនេះ ខាងអាជ្ញាធរកីឡាប្រទេសថៃបានជូនដំណឹងទៅខាងគណៈកម្មាធិការអូឡាំពិកថៃ ឱ្យជួយជជែកជាមួយគណៈកម្មាធិការអូឡាំពិកកម្ពុជា និងផ្នែករៀបចំការប្រកួតកីឡាផងដែរ ដើម្បីបញ្ចុះតម្លៃការទិញសិទ្ធិផ្សាយបន្តផ្ទាល់កីឡាស៊ីហ្គេម ។

នៅសប្តាហ៍ខាងមុខ អាជ្ញាធរកីឡាប្រទេសថៃនឹងធ្វើដំណើរមកប្រជុំជាមួយផ្នែករៀបចំការប្រកួតកីឡានៅកម្ពុជា ក្នុងគោលបំណងចរចាគ្នាពីការទិញសិទ្ធិផ្សាយបន្តផ្ទាល់កីឡាស៊ីហ្គេមពីកម្ពុជា ព្រោះនៅសល់ពេលត្រឹមតែជាង១ខែទៀតប៉ុណ្ណោះ គឺដល់ថ្ងៃបើកឆាកការប្រកួតកីឡាស៊ីហ្គេម ឆ្នាំ២០២៣ ។ បន្ទាប់ពីមានព័ត៌មានពីការទិញសិទ្ធិផ្សាយបន្តផ្ទាល់កីឡាស៊ីហ្គេមក្នុងតម្លៃខ្ពស់នេះ មានអ្នកគាំទ្រកីឡាថៃជាច្រើននាក់បញ្ចេញមតិថា បើថៃត្រូវទិញសិទ្ធិផ្សាយបន្តផ្ទាល់កីឡាស៊ីហ្គេមពីកម្ពុជាក្នុងចំនួនទឹកប្រាក់ដ៏ច្រើនបែបនេះ ថៃមិនចាំបាច់ទិញក៏បានដែរ ពលរដ្ឋថៃមិនចង់ទស្សនាការប្រកួតកីឡាស៊ីហ្គេមនេះទេ ។

ជាមួយគ្នានេះ ប្រទេសកម្ពុជាបានប្រកាសថា មានប្រទេសចំនួន៥ បានចុះឈ្មោះចូលរួមប្រកួតកីឡាល្បុកកាតោ ដូចជា វៀតណាម ឡាវ មីយ៉ាន់ម៉ា ហ្វីលីពីន និងឥណ្ឌូណេស៊ី ។ កីឡាល្បុកកាតោ គឺជាសិល្បៈនៃការតស៊ូបុរាណរបស់កម្ពុជា ហើយបើរួមទាំងកម្ពុជាដែលជាម្ចាស់ផ្ទះទៀត នឹងធ្វើឱ្យកីឡាប្រភេទនេះមាន៦ប្រទេសចូលរួមប្រកួត ។

មុនការប្រកួតកីឡាស៊ីហ្គេម លើកទី៣២ ឈានមកដល់ កម្ពុជាមានគម្រោងរៀបចំវគ្គបណ្តុះបណ្តាលសម្រាប់អាជ្ញាកណ្តាលកីឡាល្បុកកាតោជាលើកដំបូង ចាប់ពីថ្ងៃទី២៤-២៨ ខែមីនា ឆ្នាំ២០២៣ សម្រាប់ត្រៀមខ្លួនមុនដល់ថ្ងៃការប្រកួតកីឡាស៊ីហ្គេម ដោយកម្ពុជាអះអាងថា ការយកកីឡាប្រចាំជាតិរបស់ខ្លួនដូចជា គុនខ្មែរ និងល្បុកកាតោ មកដាក់បញ្ចូលក្នុងការប្រកួតកីឡាស៊ីហ្គេមនេះ ដើម្បីធ្វើឱ្យពលរដ្ឋលើពិភពលោកបានស្គាល់កីឡារបស់កម្ពុជាកាន់តែច្រើន ។

ទោះយ៉ាងណា ប្រទេសថៃលើកឡើងថា ការប្រកួតកីឡាស៊ីហ្គេមប្រចាំឆ្នាំ២០២៥ ខាងមុខ ដែលថៃនឹងធ្វើជាម្ចាស់ផ្ទះរៀបចំការប្រកួតនោះ ថៃនឹងមិនដាក់បញ្ចូលកីឡាគុនខ្មែរ និងល្បុកកាតោរបស់ខ្មែរទេ ៕

ប្រភព ៖ khaosod

ប្រទេសសិង្ហបុរី ៖ សេដ្ឋីចិនបានផ្លាស់មករស់នៅប្រទេសសិង្ហបុរីកាន់តែច្រើន ដោយសារអត្រាពន្ធទាប និងការសិក្សានៅប្រទេសសិង្ហបុរីមានគុណភាពល្អ ស្របពេលពលរដ្ឋចិនមួយចំនួនបារម្ភពីការដឹកនាំប្រទេសរបស់ប្រធានាធិបតីចិន លោក ស៊ី ជិនពីង ។

ការផ្លាស់ប្តូរមករស់នៅប្រទេសសិង្ហបុរីរបស់សេដ្ឋីចិនបានកើនឡើងជាបន្តបន្ទាប់ ខណៈចិនបានបើកប្រទេសឡើងវិញ ដោយអនុញ្ញាតឱ្យពលរដ្ឋរបស់ខ្លួនអាចធ្វើដំណើរចេញចូលក្រៅប្រទេសកាន់តែច្រើនឡើង ។ ដូច្នេះ វាងាយស្រួលសម្រាប់សេដ្ឋីចិនក្នុងការនាំក្រុមគ្រួសារផ្លាស់ប្តូរទីកន្លែងរស់នៅ និងអាចគ្រប់គ្រងទ្រព្យសម្បត្តិរបស់ពួកគេនៅក្រៅប្រទេសបាន ។

ទោះយ៉ាងណា រដ្ឋាភិបាលសិង្ហបុរីមិនបានផ្សព្វផ្សាយព័ត៌មានពីអ្នកមករស់នៅថ្មីក្នុងប្រទេសរបស់ខ្លួនទេ ប៉ុន្តែផ្នែកប្រឹក្សាជនអន្តោប្រវេសន៍របស់សិង្ហបុរីជាច្រើននាក់និយាយថា ជនជាតិចិនស្វែងរកលំនៅឋានថ្មីបានកើនឡើងជាបន្តបន្ទាប់ ។

ក្រៅពីនេះ តាមការប៉ាន់ស្មានរបស់ក្រុមហ៊ុនស្រាវជ្រាវ New World Wealth ឃើញថា មានសេដ្ឋីចិនជាង១០.៨០០នាក់បានផ្លាស់ទីលំនៅពីប្រទេសចិននៅឆ្នាំ២០២២ ។ លោក Andrew Amoils ប្រធានក្រុមស្រាវជ្រាវលើកឡើងថា ចំនួនការធ្វើដំណើរចេញពីប្រទេសចិននៅឆ្នាំ២០២៣នេះ នឹងកើនឡើងទៀត ស្របពេលអ្នកមានទ្រព្យសម្បត្តិបានធ្វើចំណាកស្រុកទៅរស់នៅបណ្តាប្រទេសនានាលើពិភពលោក ។

ក្រុមហ៊ុន New World Wealth រំពឹងថា មនុស្សចំនួន១២ម៉ឺន៥ពាន់នាក់ដែលមានទ្រព្យសម្បត្តិជាង១លានដុល្លារអាមេរិក នឹងផ្លាស់ប្តូរទីលំនៅក្នុងឆ្នាំ២០២៣នេះ ខណៈកាលពីឆ្នាំ២០១៩ មានមនុស្សចំនួន១១ម៉ឺននាក់បានផ្លាស់ប្តូរទីលំនៅ ហើយក្នុងចំណោមនោះមានជនជាតិចិនពី៨%-១០% ។

គួរបញ្ជាក់ថា សិង្ហបុរីជាប្រទេសមួយដែលបានទាក់ទាញជនជាតិចិនមករស់នៅ ខណៈប្រទេសនេះមានទម្លាប់ការរស់នៅស្រដៀងគ្នាជាមួយហុងកុង និងចិន ហើយមនុស្សភាគច្រើនក្នុងប្រទេសនេះនិយាយភាសាចិនកណ្តាល និងភាសាអង់គ្លេស ។ លើសពីនេះ ប្រទេសសិង្ហបុរីមានសាលារៀនល្អៗ ខណៈផ្នែកហិរញ្ញវត្ថុរបស់សិង្ហបុរី ក៏យកចិត្តទុកដាក់លើការគ្រប់គ្រងទ្រព្យសម្បត្តិផងដែរ ។ ម្យ៉ាងទៀត សូម្បីតែក្រុមហ៊ុនធំៗរបស់ចិន ក៏បានបង្កើតសាខានៅប្រទេសសិង្ហបុរីដែរ ដូចជា TikTok និងក្រុមហ៊ុនមេ ByteDance បានបញ្ជូនបុគ្គលិក និងនាយកគ្រប់គ្រងក្រុមហ៊ុនរបស់ខ្លួនមកសិង្ហបុរី ដើម្បីកាត់បន្ថយការបារម្ភពីភាពតានតឹងរវាងចិន និងអាមេរិក ៕ ប្រភព ៖ AEC connect

សហរដ្ឋអាមេរិក កាណាដា និងអឺរ៉ុប កំពុងព្រួតដៃគ្នា​ដាក់ចេញបម្រាម​មិនឱ្យប្រជាជនខ្លួន ​ប្រើបណ្តាញសង្គម Tiktok របស់​ចិន ដោយបានលើកហេតុផល​ថា ទប់ស្កាត់​ការគំរាម​កំហែង​ដល់​សន្តិសុខជាតិ និង​សុវត្ថិភាព​ទិន្នន័យ​របស់​ពួកគេ។

កាលពីដើមខែមីនានេះ ​លោក ចូ​ បៃឌិន បាន​ទុកពេល​ឱ្យភ្នាក់ងារ​សហព័ន្ធ រយៈពេល៣០ថ្ងៃ គិតចាប់ពីថ្ងៃទី២៨កុម្ភៈ ដើម្បីធានា​ថា គ្មាន​កម្មវិធី TikTok នៅលើ​ឧបករណ៍​របស់​ភ្នាក់ងារ​សហព័ន្ធណាមួយឡើយ។ វិធានការ​នេះ គឺ​ដើម្បី​ធានាសន្តិសុខ​​នូវ​ហេដ្ឋារចនាសម្ព័ន្ធ​ឌីជីថល​របស់ខ្លួន ព្រមទាំងការការពារ​សុវត្ថិភាព និង​ឯកជនភាព​របស់​ប្រជាជនអាមេរិក។

ដោយឡែកកាណាដា​ ក៏បានចាត់វិធានការ​ដូចគ្នាផងដែរ​ពោលគឺ​បាន​ហាមឃាត់​នូវការ​ដំឡើង​App​TikTok​នៅក្នុង​ឧបករណ៍​របស់​រដ្ឋាភិបាល​ទាំងអស់​ចាប់ពីថ្ងៃទី១​ខែមីនានេះតទៅ។

រីឯសភាអឺរ៉ុប​ឯណោះវិញ​បាន​ហាមឃាត់មិនឱ្យមាន​​TikTok​នៅលើ​ទូរសព្ទរបស់​មន្រ្តីខ្លួនឡើយ​ចាប់ពីថ្ងៃទី២០​ខែមីនាតទៅ​ដែលជាការដើរតាមគន្លងផ្លូវរបស់​គណៈកម្មការ​អឺរ៉ុប​និង​ក្រុមប្រឹក្សា​អឺរ៉ុប។​វិធានការ​នេះ​ដោយសារបារម្ភថា​រដ្ឋាភិបាលចិនអាចនឹងប្រមូលទិន្នន័យអ្នកប្រើប្រាស់​​តាមរយៈ​​App​ដែល​ជារបស់​ក្រុមហ៊ុន​ByteDance​នេះ​ខណៈពលរដ្ឋ​EU​ដែល​ប្រើ​App​នេះ​មានដល់​១២៥លាននាក់ឯណោះ៕

ប្រភព៖ AS

រដ្ឋធានីវ៉ាស៊ីនតោន៖ រុស្ស៊ី ជាប្រទេស មានប្រវត្ដិរកបានចំណូលដ៏ច្រើនបំផុត ពីឧស្សាហកម្មនាំចេញគ្រឿងសព្វាវុធរបស់ខ្លួន បន្ទាប់ពីសហរដ្ឋអាមេរិក ប៉ុន្ដែសង្គ្រាមរបស់មេដឹកនាំវិមានក្រឹមឡាំង លោក វ៉្លាឌីមៀ ពូទីន បានជំរុញឲ្យមានយុទ្ធនាការ ហ៊ុមព័ទ្ធ ដោយទណ្ឌកម្ម ពីបណ្ដាប្រទេសលោកខាងលិច និង សម្ពន្ធមិត្ត ទើបធ្វើឲ្យការនាំចេញឧស្សាហកម្មគ្រឿងសឹករបស់ប្រទេសមហាអំណាចមួយនេះ ប្រឈមមុខនឹងការដួលរលំ។

ទស្សនាវដ្ដីព័ត៌មាន Newsweek បានចេញផ្សាយ កាលពីព្រឹក ថ្ងៃចន្ទ ទី១៣ ខែមីនា ឆ្នាំ២០២៣ ថា អង្គការឃ្លាំងមើលឧស្សហកម្មគ្រឿងសព្វាវុធឈានមុខគេរបស់ពិភពលោក បានចេញសេចក្ដីរាយការណ៍របស់ខ្លួន ថា ឧស្សាហកម្មនាំចេញគ្រឿងសព្វាវុធរបស់រុស្ស៊ី មានប្រវត្តិសាស្ត្រ រកបានប្រាក់ចំណូលដ៏ច្រើនបំផុត លំដាប់ទី២ នៅលើពិភពលោក បន្ទាប់ពីសហរដ្ឋអាមេរិក។ ប៉ុន្ដែបច្ចុប្បន្ន ឧស្សាហកម្មគ្រឿងសឹករបស់ប្រទេសមហាអំណាចមួយនេះ ហាក់ដូចបីដូចជាបង្ហាញសញ្ញា អំពីការដួលរលំ នៅក្រោមទម្ងន់ផ្លាស់ប្តូរបច្ចេកវិទ្យា ភាពឯកោខាងនយោបាយ នៅលើអន្តរជាតិ និង សង្រ្គាមដ៏ឃោរឃៅ និង បង្កគ្រោះមហន្តរាយយ៉ាងខ្លាំង នៅក្នុងប្រទេសអ៊ុយក្រែន។

វិទ្យាស្ថានស្រាវជ្រាវសន្ដិភាពអន្ដរជាតិស្ដុកខម ហៅកាត់ SIPRI បានចេញផ្សាយនូុវទិន្នន័យរបស់ខ្លួន នៅថ្ងៃចន្ទ នេះ ថា ការនាំចេញសម្ភារយោធារបស់រុស្ស៊ី បានធ្លាក់ចុះ រហូតដល់៣១ភាគរយ នៅក្នុងរយៈពេល៥ឆ្នាំមកនេះ បើធៀបនឹងរយៈពេលដូចគ្នា កាលពីមុន។ សកម្មភាពបែបនេះ កំពុងតែគំរាមកំហែង ដល់តួនាទីរបស់ក្រុងមូស្គូ ជាអ្នកចុះកិច្ចព្រមព្រៀងលក់គ្រឿងសព្វាវុធដ៏មានឥទ្ធិពលបំផុតលំដាប់លេខ២ នៅលើពិភពលោក។

ចំណែកនាំចេញគ្រឿងសព្វាវុធនៅលើពិភពលោករបស់រុស្ស៊ី បានធ្លាក់ចុះ ពី២២ភាគរយ មកនៅត្រឹម១៦ភាគរយ ចន្លោះពីឆ្នាំ២០១៣-២០១៧ និង ចន្លោះពីឆ្នាំ២០១៨ ដល់ ឆ្នាំ២០២២។ សកម្មភាពបែបនេះ ធ្វើឲ្យកាន់តែឃ្លាតឆ្ងាយ ពីការនាំចេញសម្ភារយោធារបស់សហរដ្ឋអាមេរិក រហូតដល់៤០ភាគរយ ដោយបាននាំមុខតែបន្ដិច លើប្រទេសបារាំង ដែលនាំចេញ ចំនួន១១ភាគរយ នៅក្នុងរយៈពេល៥ឆ្នាំកន្លងមកនេះ។

លោក ស៊ាម៉ុន វេហ្សេម៉ាន់ (Siemon Wezeman) អ្នកស្រាវជ្រាវជាន់ខ្ពស់របស់វិទ្យាស្ថានស្រាវជ្រាវសន្ដិភាពអន្ដរជាតិស្ដុកខម ហៅកាត់ SIPRI បានប្រាប់ដល់ Newsweek ថា «ផ្អែកលើទិន្នន័យទាំងនេះ វាជាការបង្ហាញសញ្ញាដ៏អាក្រក់មួយ សម្រាប់ការនាំចេញសម្ភារយោធារបស់រុស្ស៊ី។ បញ្ហានេះ ពិតជាមានសារសំខាន់ខ្លាំងណាស់ ប៉ុន្តែវាពិតជាមិនគួរឱ្យភ្ញាក់ផ្អើលនោះឡើយ ហើយវាមិនមែនដោយសារតែអ្វីដែលកំពុងតែកើតឡើង នៅអ៊ុយក្រែន ចាប់តាំងពីឆ្នាំ២០២២មកនោះដែរ។ អ្វីមួយដែលអ្នកអាចមើលឃើញ ថា វានឹងកើតឡើង»។

បណ្ដាប្រទេសលោកខាងលិច និង សម្ពន្ធមិត្ត កំពុងតែដាក់ប្រទេសរុស្ស៊ី ឲ្យស្ថិតនៅឯកោ ចាប់តាំងពីការការឈ្លានពាន និង ដាក់ឧបទ្វីបគ្រីមៀ (Crimea) ហើយការបំផុសគំនិតបះបោរ នៅក្នុងតំបន់ដុនបាស (Donbas) របស់អ៊ុយក្រែន នាភាគខាងកើតប្រទេស ចាប់តាំងពីឆ្នាំ២០១៤រហូតមក។ កិច្ចខិតខំប្រឹងប្រែងទាំងនេះ ត្រូវបានបានដាក់បន្ទុកខ្លាំង ចាប់តាំងពីកងទ័ពរុស្ស៊ី បានវិលចូល ឈ្លានពាននៅលើទឹកដីរបស់អ៊ុយក្រែន ម្តងទៀត ចាប់តាំងពីថ្ងៃទី២៤ ខែកុម្ភៈ ឆ្នាំ២០២២រហូតមក។ ក្រុងវ៉ាស៊ីនតោន ជាសត្រូវដ៏ចម្បងរបស់ក្រុងម៉ូស្គូ កំពុងវាយលុក ទៅលើមូលដ្ឋានអតិថិជនរបស់វិមានក្រឹមឡាំង។

ទន្ទឹមនឹងនេះ អត្រាដ៏ខ្ពស់គួរឱ្យភ្ញាក់ផ្អើល ចំពោះការខូចខាតកម្លាំងទាហាន មានការស្លាប់ និង រងរបួស ហើយការបាត់បង់គ្រឿងយុទ្ធោបករណ៍របស់រុស្ស៊ី នៅក្នុងសង្គ្រាមរបស់ក្រុងមូស្គូ នៅលើទឹកដីរបស់អ៊ុយក្រែន កំពុងតែដាក់សម្ពាធ ទៅលើក្រុមហ៊ុនផលិតសម្ភារការពារជាតិ ក៏ដូចជា ការបង្ហាញតួលេខតិចជាងតារាងវេទិកាអាវុធសំខាន់ៗរបស់រុស្ស៊ី។ សកម្មភាពទាំងនេះ ហាក់បីដូចជា មិនអាចទប់ទល់នឹងអាវុធដ៏ទំនើបៗបំផុតរបស់អង្គការណាតូ ត្រូវបានប្រើប្រាស់ ដោយកងទ័ពរបស់អ៊ុយក្រែន។

លោក ដេនីស ម៉ាន់ទូរ៉ូវ (Denis Manturov) ឧបនាយករដ្ឋមន្រ្ដីរុស្ស៊ី ទទួលបន្ទុកវិស័យឧស្សាហកម្ម និង ពាណិជ្ជកម្ម បានប្រាប់ដល់សារព័ត៌មាន Interfax កាលពីខែមុន ថា «ផ្នែកសំខាន់ៗបំផុត សម្រាប់គ្រឿងសព្វាវុធ ផលិតនៅក្នុងប្រទេស កំពុងតែត្រូវបានបញ្ជូន ទៅកាន់សមរភូមិនៅអ៊ុយក្រែន។ ការផ្តល់គ្រឿងសព្វាវុធទាំងនេះ ជាអាទិភាពដាច់ខាតរបស់យើង ប៉ុន្តែសូម្បីតែនៅក្នុងលក្ខខណ្ឌទាំងនេះ យើងនៅតែបន្តធ្វើការជាមួយដៃគូរបស់យើង មកពីប្រទេសជាមិត្ត និង បំពេញកាតព្វកិច្ចរបស់យើង»។

លោក ស៊ាម៉ុន វែហ្សេម៉ាន់ (Siemon Wezeman) អ្នកស្រាវជ្រាវជាន់ខ្ពស់របស់វិទ្យាស្ថានស្រាវជ្រាវសន្ដិភាពអន្ដរជាតិស្ដុកខម ហៅកាត់ SIPRI បានសង្កត់ធ្ងន់ ថា «ជាការពិតណាស់ វាមានបញ្ហាផ្សេងគ្នា ខណៈរុស្ស៊ីត្រូវតស៊ូជាមួយនឹងសម្ពាធ ពីសហរដ្ឋអាមេរិក និង បណ្ដាប្រទេសដទៃទៀត កំពុងតែបន្ត ចាប់តាំងពីឆ្នាំ២០១៤មក។ បញ្ហានេះ ធ្វើឲ្យប៉ះពាល់ដល់អតិថិជនដ៏សក្តានុពល និង អតិថិជនដែលមានស្រាប់ សម្រាប់រុស្ស៊ី ដើម្បីបញ្ឈប់ និង មិនទិញអាវុធរបស់រុស្ស៊ី។ នៅក្នុងពេលជាមួយគ្នានេះ ក្រុងមូស្គូ ត្រូវផ្តល់នូវបច្ចេកវិទ្យា និង អាវុធផ្សេង ទៅដល់ប្រទេសជាអ្នកបញ្ជាទិញគ្រឿងសព្វាវុធ។ រុស្ស៊ី កំពុងតែធ្វើការឲ្យបានខ្លាំងក្លា ជាមួយនឹងឥណ្ឌា និង ប្រទេសដទៃទៀត មានដូចជា ឥណ្ឌូណេស៊ី ខណៈប្រទេសអាស៊ានមួយនេះ បានលុបចោលនូវការបញ្ជាទិញយន្ដហោះប្រយុទ្ធរបស់រុស្ស៊ី។

យុទ្ធនាការដាក់ទណ្ឌកម្មរបស់លោកខាងលិច មិនធ្លាប់មានពីមុនមក ប្រឆាំងនឹងក្រុងម៉ូស្គូ កំពុងតែវាយប្រហារយ៉ាងខ្លាំង ថ្វីបើសេដ្ឋកិច្ចរបស់រុស្ស៊ី មិនបានធ្លាក់ចុះ ដល់កម្រិតមួយ ដូចការរំពឹងទុក កាលពីឆ្នាំមុនយ៉ាងណាក្ដី ប៉ុន្តែឱនភាពថវិការបស់វិមានក្រឹមឡាំង កំពុងតែកើនឡើងខ្ពស់ ខណៈប្រាក់ចំណេញ មកពីការនាំចេញឥន្ធនៈហ្វូស៊ីលរបស់ខ្លួន កំពុងតែធ្លាក់ចុះខ្លាំង។ ដោយឡែក ក្រុមហ៊ុនបរទេសជាង ១០០០ បានដកខ្លួនចេញពីប្រទេសរុស្ស៊ី ហើយការគ្រប់គ្រងការនាំចេញ កំពុងតែធ្វើឱ្យក្រុមហ៊ុនផលិតនានា មានការលំបាក កាន់តែខ្លាំងឡើង នៅក្នុងការទទួលបានគ្រឿងបន្លាស់ទំនើបៗ ដែលត្រូវការចាំបាច់ សម្រាប់ទំនិញ និង អាវុធបំពាក់ដោយបច្ចេកវិទ្យាជាន់ខ្ពស់៕