ប្រទេសចិន ៖ សារព័ត៌មានក្នុងប្រទេសចិន Global Times បានរាយការណ៍ដោយបានដកស្រង់សម្តីរបស់លោក Jin Weigang ប្រធានវិទ្យាស្ថានវិទ្យាសាស្ត្រការងារ និងសន្តិសុខសង្គមរបស់ចិន កាលពីថ្ងៃទី១៤ ខែមីនា កន្លងមកថា ចិនគ្រោងនឹងបង្កើនអាយុចូលនិវត្តន៍ការងាររបស់ពលរដ្ឋបន្តិចម្តងៗ និងទៅតាមដំណាក់កាល ដើម្បីទប់ទល់នឹងការកើនឡើងយ៉ាងឆាប់រហ័សនៃចំនួនពលរដ្ឋមានអាយុច្រើន ។

លោក Jin Weigang បានថ្លែងថា ចិនកំពុងតែស្វែងរកការបោះជំហានទៅមុខ យូរអង្វែង និងការបង្កើនអាយុចូលនិវត្តន៍ការងាររបស់ពលរដ្ឋ ហើយជំហានដំបូង គឺចិននឹងបង្កើនអាយុចូលនិវត្តន៍ពលរដ្ឋ ចាប់ពី២ខែ ទៅ៣ខែ ហើយចិននឹងបង្កើនអាយុចូលនិវត្តន៍ជំហានបន្តបន្ទាប់ទៀតនៅពេលក្រោយ ។ លោក Jin Weigang ថ្លែងថា ៖ «បច្ចុប្បន្ននេះ ពលរដ្ឋចិនជាច្រើននាក់ជិតដល់អាយុចូលនិវត្តន៍ហើយ ហើយពួកគេត្រូវធ្វើការថែមក្នុងរយៈពេល២-៣ខែទៀត ប៉ុន្តែសម្រាប់អ្នកមានអាយុតិច គឺត្រូវធ្វើការងារយូរទៀតរយៈពេល២-៣ឆ្នាំ ។ រដ្ឋាភិបាលនឹងផ្តល់ពេលវេលាគ្រប់គ្រាន់សម្រាប់ឱ្យពួកគេសម្របខ្លួន និងយល់ពីគោលការណ៍ចូលនិវត្តន៍ថ្មី» ។

លោក Jin Weigang ថ្លែងបន្តថា ៖ «ចំណុចសំខាន់បំផុតក្នុងការធ្វើកំណែទម្រង់អាយុចូលនិវត្តន៍លើកនេះ គឺការអនុញ្ញាតឱ្យពលរដ្ឋអាចជ្រើសរើសពេលវេលាចូលនិវត្តន៍បានតាមស្ថានការណ៍ និងលក្ខខណ្ឌរបស់បុគ្គលម្នាក់ៗ» ។

ទោះយ៉ាងណា ប្រទេសចិននៅមិនទាន់បានប្រកាសផ្លាស់ប្តូរអាយុចូលនិវត្តន៍ការងារជាផ្លូវការទេ ហើយចិនត្រូវគេចាត់ទុកថា ស្ថិតក្នុងក្រុមប្រទេសដែលមានអាយុចូលនិវត្តន៍ទាបបំផុតនៅលើពិភពលោក ក្នុងនោះបុរសចូលនិវត្តន៍ក្នុងអាយុ៦០ឆ្នាំ រីឯស្ត្រីធ្វើការក្នុងការិយាល័យចូលនិវត្តន៍ក្នុងអាយុ៥៥ឆ្នាំ ខណៈស្ត្រីធ្វើការនៅតាមរោងចក្រចូលនិវត្តន៍ក្នុងអាយុ៥០ឆ្នាំ ៕ ប្រភព ៖ The better

ប្រទេសចិន ៖ នៅខែកុម្ភៈ ឆ្នាំ២០២៣ សកម្មភាពការផលិតទំនិញរបស់ចិនបានកើនឡើងលឿនបំផុតក្នុងរយៈពេលជាង១០ឆ្នាំមកនេះ ដែលវាមិនដូចការរំពឹងទុករបស់អ្នកវិភាគទេ បន្ទាប់ពីចិនបានលុបចោលវិធានការរឹតបន្តឹងជំងឺកូវីដ-១៩ កាលពីចុងឆ្នាំ២០២២ កន្លងមក និងបើកប្រទេសឡើងវិញ ។

ការិយាល័យស្ថិតិរបស់ចិនបង្ហាញថា សន្ទស្សន៍គ្រប់គ្រងការទិញ Purchasing Managers Index (PMI) បានកើនឡើងដល់៥២,៦ ពី៥០,១ នៅខែមករា ឆ្នាំ២០២៣ ហើយសន្ទស្សន៍គ្រប់គ្រងការទិញនៅពេលនេះ គឺលើសពីអ្វីដែលអ្នកវិភាគរំពឹងទុកថា ស្មើត្រឹមតែ៥០,៥ ប៉ុណ្ណោះ ។ គេចាត់ទុកថា វាជាចំនួនខ្ពស់បំផុតគិតចាប់តាំងពីខែមេសា ឆ្នាំ២០១២ មក ។

ចិន គឺជាប្រទេសផលិតទំនិញធំលំដាប់ទី២ នៅលើពិភពលោក ដែលបានប្រឈមនឹងស្ថានភាពអាក្រក់នៅឆ្នាំ២០២២ កន្លងមក ដោយសារតែការបិទប្រទេស និងវិធានការរឹតបន្តឹងជំងឺកូវីដ-១៩ ខណៈប្រទេសនានានៅលើពិភពលោកត្រេកអរជាមួយសន្ទស្សន៍គ្រប់គ្រងការទិញរបស់ចិន ។ ចំណែកទីផ្សារភាគហ៊ុននៅតំបន់អាស៊ី និងប្រាក់ដុល្លារអូស្ត្រាលីបានងើបឡើងវិញពីការខាតបង់កាលពីពេលមុន ខណៈបណ្តាវិនិយោគិនបានសម្លឹងមកកាន់សេដ្ឋកិច្ចចិនរីកចម្រើនជាងមុន ។

ទោះយ៉ាងណា បើទោះវិស័យផលិតកម្មរបស់ចិនបានងើបឡើងវិញក្តី ប៉ុន្តែនៅតែស្ថិតក្រោមសម្ពាធជាមួយតម្លៃទំនិញធ្លាក់ចុះនៅខែមករា ឆ្នាំ២០២៣ ដោយសារការប្រើប្រាស់ទំនិញក្នុងប្រទេសចិនមានកម្រិត ហើយការនាំចេញទំនិញទៅក្រៅប្រទេស ក៏មិនទាន់ច្បាស់លាស់ ។

ធនាគារកណ្តាលប្រទេសចិនជឿជាក់ថា សេដ្ឋកិច្ចចិននឹងងើបឡើងវិញនៅឆ្នាំ២០២៣នេះ បើទោះជាបរិយាកាសខាងក្រៅនៅតែអាក្រក់ និងស្មុគស្មាញក៏ដោយ ៕ ប្រភព ៖ AEC connect

ប្រទេសជប៉ុន ៖ កាលពីថ្ងៃទី១៥ ខែមីនា កន្លងមក ប្រទេសជប៉ុនបានប្រកាសជាផ្លូវការពីថ្ងៃចាប់ផ្តើមពិធីបុណ្យផ្កាសាគូរ៉ានៅទីក្រុងតូក្យូ ។ នៅឆ្នាំ២០២៣នេះ គេចាត់ទុកថា ដើមសាគូរ៉ាចាប់ផ្តើមចេញផ្កាលឿនជាងពេលធម្មតា១០ថ្ងៃ ហើយកាលពីពេលមុននេះ វាធ្លាប់បានចេញផ្កាមុនពេលកំណត់២ដង គឺនៅឆ្នាំ២០២០ និងឆ្នាំ២០២១ ។

អ្នកជំនាញផ្នែកឧតុនិយមរបស់ជប៉ុនបញ្ជាក់ថា ផ្កាសាគូរ៉ាបានរីកឡើងមុនពេលកំណត់បែបនេះ ដោយសារតែអាកាសធាតុផ្លាស់ប្តូរ ហើយក្នុងរយៈពេលជាច្រើនថ្ងៃកន្លងមក សីតុណ្ហភាពនៅទីក្រុងតូក្យូក្តៅជាងមុនខុសប្រក្រតី ។គេសង្កេតឃើញថា មានពលរដ្ឋជប៉ុន និងភ្ញៀវទេសចរជាច្រើននាក់បាននាំគ្នាទៅកម្សាន្តនៅសួនច្បារសាធារណៈអុអេណុ នៅទីក្រុងតូក្យូ ដើម្បីគយគន់ភាពស្រស់ស្អាតរបស់ផ្កាសាគូរ៉ា ដែលបានរីកឡើងយ៉ាងស្រស់បំព្រង ។

ពិធីបុណ្យផ្កាសាគូរ៉ាប្រចាំឆ្នាំ២០២៣ គឺជាពេញចិត្តរបស់ពលរដ្ឋជប៉ុន និងភ្ញៀវទេសចរបរទេសផងដែរ ហើយការប្រកាសចាប់ផ្តើមពិធីបុណ្យផ្កាសាគូរ៉ាជាផ្លូវការនេះ សារព័ត៌មានធំៗរបស់ជប៉ុនបានផ្សព្វផ្សាយទៅកាន់ពលរដ្ឋឱ្យបានជ្រាប និងមានការផ្សាយបន្តផ្ទាល់តាមទូរទស្សន៍ទៀតផង ។ តាមប្រពៃណីរបស់ជប៉ុន សម្រាប់ពិធីបុណ្យផ្កាសាគូរ៉ា គេនឹងប្រារព្ធពិធីមួយឈ្មោះថា ហាណាមិ ឬការគយគន់ផ្កាសាគូរ៉ា និងចូលរួមរីករាយទាំងអស់គ្នា ។

ពលរដ្ឋជប៉ុនក៏បាននាំគ្នាបរិភោគចំណីអាហារ និងភេសជ្ជៈផ្សេងៗនៅក្រោមដើមផ្កាសាគូរ៉ាផងដែរ ខណៈក្នុងអំឡុងពេលជំងឺកូវីដ-១៩ រាតត្បាតកន្លងមក មន្ត្រីជប៉ុនបានហាមឃាត់ពលរដ្ឋរបស់ខ្លួនរៀបចំពិធីនានានៅទីនេះ ហើយភ្ញៀវទេសចរបរទេស ដែលជាធម្មតានាំគ្នាមកកម្សាន្តនៅប្រទេសជប៉ុនក្នុងរដូវផ្កាសាគូរ៉ា ក៏មិនអាចធ្វើដំណើរមកកាន់ទីនេះ ដោយសារជប៉ុនបិទប្រទេស ។

ជប៉ុនបានចាប់ផ្តើមបើកប្រទេសឡើងវិញកាលពីខែតុលា ឆ្នាំ២០២២ ហើយនៅតាមសួនច្បារសាធារណៈផ្សេងៗ ក៏បានអនុញ្ញាតឱ្យភ្ញៀវទេសចរចូលមកមើលផ្កាសាគូរ៉ា រួមទាំងអនុញ្ញាតឱ្យពួកគេអាចអង្គុយបរិភោគចំណីអាហារយ៉ាងសប្បាយរីករាយក្រោមដើមសាគូរ៉ា ។ គេចាត់ទុកថា នេះជាលើកដំបូងហើយក្នុងឆ្នាំ២០២៣នេះ ដែលជប៉ុនអនុញ្ញាតឱ្យពលរដ្ឋ និងភ្ញៀវទេសចរបរទេសមកកម្សាន្តនៅសួនច្បារសាធារណៈនានា បន្ទាប់ពីខកខានអស់រយៈពេល៤ឆ្នាំ ៕ ប្រភព ៖ Tnn thailand

រដ្ឋធានីវ៉ាសាវី៖ ក្រុងវ៉ាសាវី ជាសម្ពន្ធមិត្តដ៏ជិតស្និទ្ធបំផុតមួយរបស់ក្រុងកៀវ ហើយឥឡូវនេះ សមត្ថកិច្ចរបស់ប៉ូឡូញ បានចាប់ឃាត់ខ្លួនជនស៊ីវិលមួយក្រុម មានការជាប់សង័្សយ អំពីការធ្វើចារកម្ម ជួយដល់ប្រទេសរុស្ស៊ី។

បណ្ដាញទូរទស្សន៍របស់ចក្រភពអង់គ្លេស BBC បានចេញផ្សាយ កាលពីព្រឹក ថ្ងៃព្រហស្បតិ៍ ទី១៦ ខែមីនា ឆ្នាំ២០២៣ ថា មន្រ្ដីរដ្ឋាភិបាលប៉ូឡូញ បានប្រាប់ដល់ BBC ថា ជនស៊ីវិលបរទេសមួយក្រុម ត្រូវបានចាប់ខ្លួន ដោយសារសង័្សយ ពីការលួចការណ៍ ទៅឲ្យប្រទេសរុស្ស៊ី។

ស្របគ្នានេះ ស្ថានីយវិទ្យុ RMF FM បានរាយការណ៍ ថា ទីភ្នាក់ងារសន្ដិសុខប៉ូឡូញ បានកាត់ផ្ដាច់បណ្ដាញចារកម្ម ធ្វើការបម្រើឲ្យរុស្ស៊ី។ មនុស្សចំនួន៦នាក់ ត្រូវបានចាប់ឃាត់ខ្លួន នាំទៅសាកសួរ ដោយមានការសង្ស័យ អំពីការដំឡើងកាមេរ៉ាសម្ងាត់ សម្រាប់ថតរូបភាព អំពីហេដ្ឋារចនាសម្ព័ន្ធដឹកជញ្ជូនសំខាន់ៗ ប្រើប្រាស់ ដើម្បីផ្តល់ជំនួយជួយដល់ប្រទេសអ៊ុយក្រែន។

ស្ថានីយវិទ្យុ RMF FM បានរាយការណ៍ទៀត ថា ការរៀបចំផែនការរបស់រុស្ស៊ី ត្រូវបានបំផ្លាញ។ បើទោះជាយ៉ាងណាក៏ដោយ រហូតមកដល់ពេលនេះ ជម្លោះអំពីរឿងចារកម្ម អស់រយៈពេលជាច្រើនទសវត្សរ៍ កន្លងមកនេះ កាន់តែមានភាពតានតឹងខ្លាំងឡើង ចាប់តាំងពីសង្គ្រាមរបស់ក្រុងមូស្គូ បានផ្ទុះឡើង នៅលើទឹកដីអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២។

ប៉ូឡូញ ជាសម្ពន្ធមិត្ត និង កម្លាំងសន្ដិសុខដ៏រឹងមាំមួយរបស់អ៊ុយក្រែន បានចាប់ខ្លួនមនុស្សជាច្រើននាក់ ដោយមានការសង័្សយ អំពីការធ្វើចារកម្ម ទៅឲ្យរុស្ស៊ី ចាប់តាំងពីការផ្ទុះសង្គ្រាម រហូតមក។ ក្រុមជនស៊ីវិលបរទេសទាំងនោះ បានលួចបំពាក់កាមេរ៉ាសុវត្ថិភាព រាប់សិបគ្រឿង នៅក្បែរផ្លូវរថភ្លើង និង ផ្លូវដឹកជញ្ជូនសំខាន់ៗ នៅក្នុងខេត្តប៉ូដកាប៉ាកគី (Podkarpackie) ប្រទេសប៉ូឡូញ ដែលនៅជិតព្រំដែនរបស់អ៊ុយក្រែន។ ចំណែកកាមេរ៉ាខ្លះទៀត ត្រូវបានប្រទះឃើញ នៅជិតអាកាសយានដ្ឋានតូចមួយ ប្រចាំតំបន់ ដែលប្រែក្លាយទៅជាមជ្ឈមណ្ឌលដឹកជញ្ជូនអន្តរជាតិ ផ្តល់ជំនួយផ្នែកយោធា និង មនុស្សធម៌ ជួយដល់អ៊ុយក្រែន។

យន្តហោះយោធា និង ការដឹកជញ្ជូនទំនិញ មកពីសហរដ្ឋអាមេរិក ហើយទូទាំងទ្វីបអឺរ៉ុប តែងតែហោះហើរចេញ-ចូល មកកាន់អាកាសយានដ្ឋាន Rzeszow-Jasionka (រ៉េសហ្សូវ-ចាសិនកា) ដែលជាកន្លែងទាហានអាមេរិក អាចចែកចាយនូវការផ្គត់ផ្គង់ ដល់រថយន្តធំៗ កំពុងរង់ចាំធ្វើដំណើរចម្ងាយ១០០គីឡូម៉ែត្រ ទៅកាន់ព្រំដែនរបស់អ៊ុយក្រែន។ នៅតំបន់នោះ ត្រូវបានគេចាត់ទុកជាចំណុចរសើប ហើយក្រុងវ៉ាស៊ីនតោន ក៏បានដាក់ពង្រាយប្រព័ន្ធការពារដែនអាកាស Patriot របស់សហរដ្ឋអាមេរិក ដើម្បីការពារដែនអាកាស។

លោក ចូ បៃដិន (Joe Biden) ប្រធានាធិបតីសហរដ្ឋអាមេរិក បានដំណើរតាមយន្ដហោះ Air Force One (អ៊ែរ ហ្វស វ៉ាន់) ទៅចុះចត នៅក្នុងអាកាសយានដ្ឋាននោះ នៅក្នុងដំណើររបស់គាត់ ទៅកាន់រដ្ឋធានីកៀវ ដើម្បីជួបជាមួយនឹងសមភាគីអ៊ុយក្រែន លោក វ៉ូឡូឌីមៀរ ហ្សេឡែនស្គី កាលពីពេលថ្មីៗនេះ។ ចំណែកសន្ដិសុខ នៅក្នុងកន្លែងហេដ្ឋារចនាសម្ព័ន្ធសំខាន់ៗទាំងនោះ ត្រូវបានរឹតបន្ដឹងយ៉ាងខ្លាំង៕

ប្រទេសជប៉ុន ៖ ក្រុមហ៊ុនធំៗរបស់ជប៉ុនបានប្រកាសដំឡើងប្រាក់ខែបុគ្គលិករបស់ខ្លួនក្នុងរយៈពេលជាច្រើនឆ្នាំមកនេះ ដែលកំពុងស្ថិតក្នុងដំណាក់កាលចរចាជាមួយសហជីពការងារនៅថ្ងៃទី១៥ ខែមីនា ក្រោយពីនាយករដ្ឋមន្ត្រីជប៉ុន លោក Fumio Kishida បានអំពាវនាវឱ្យក្រុមហ៊ុននានាដំឡើងប្រាក់ខែបុគ្គលិក ដើម្បីជួយពួកគេអាចទប់ទល់នឹងអត្រាអតិផរណាកើនឡើងខ្ពស់ ។

ចាប់តាំងពីឆ្នាំ១៩៩០ មក ប្រាក់ខែរបស់បុគ្គលិកជប៉ុនស្ទើរតែមិនកើនឡើងឡើយ ហើយបើតាមអង្គការកិច្ចសហប្រតិបត្តិការសេដ្ឋកិច្ច និងការអភិវឌ្ឍបង្ហាញថា ប្រាក់ខែជាមធ្យមរបស់បុគ្គលិកនៅតាមក្រុមហ៊ុននានាបានកើនឡើងត្រឹម៦,៣% ប៉ុណ្ណោះ គិតចាប់តាំងពីឆ្នាំ១៩៩០ ដល់ឆ្នាំ២០២១ ខណៈក្រុមប្រទេស G7 ដូចជា អាមេរិក និងអង់គ្លេស ប្រាក់ខែបុគ្គលិករបស់ពួកគេបានកើនឡើងរហូតដល់៥០% ក្នុងរយៈពេលដូចគ្នា ។

ទោះយ៉ាងណា បច្ចុប្បន្ន អត្រាអតិផរណានៅប្រទេសជប៉ុនបានកើនឡើងខ្ពស់ក្នុងរយៈពេល៤០ឆ្នាំ រីឯតម្លៃទំនិញប្រើប្រាស់ជាមូលដ្ឋានរបស់ជប៉ុនបានកើនឡើង៤,២% នៅខែមករា ឆ្នាំ២០២៣ បើធៀបពីមួយឆ្នាំទៅមួយឆ្នាំ ហើយជាការកើនឡើងឆាប់រហ័សបំផុត គិតចាប់ពីខែកញ្ញា ឆ្នាំ១៩៨១ មក ។ ការធ្លាក់ថ្លៃប្រាក់យេនរបស់ជប៉ុន រួមផ្សំនឹងការកើនឡើងថ្លៃដើមទំនិញបានធ្វើឱ្យរយៈពេលកន្លងមក រដ្ឋាភិបាលរបស់លោក Fumio Kishida ព្យាយាមជំរុញឱ្យបណ្តាក្រុមហ៊ុនផ្សេងៗដំឡើងប្រាក់ខែបុគ្គលិករបស់ខ្លួន ។

ក្រុមហ៊ុន Nissan ប្រកាសថា នឹងដំឡើងប្រាក់ខែបុគ្គលិកជាមធ្យមប្រមាណ១២.០០០យេន ដែលគេចាត់ទុកថា ជាការដំឡើងប្រាក់ខែដល់បុគ្គលិកខ្ពស់បំផុតគិតចាប់តាំងពីឆ្នាំ២០០៤មក ហើយក្រុមហ៊ុននឹងត្រៀមដំឡើងប្រាក់បំណាច់ឆ្នាំដល់បុគ្គលិកផងដែរតាមការអំពាវនាវរបស់សហជីពការងារ ។ ចំណែកក្រុមហ៊ុន Toyota Motor ក៏បានត្រៀមដំឡើងប្រាក់ខែបុគ្គលិកដែរក្នុងរយៈពេល២០ឆ្នាំ ខណៈក្រុមហ៊ុន Honda Motor ក៏បានយល់ព្រមដំឡើងប្រាក់ខែបុគ្គលិករបស់ខ្លួនដូចគ្នាដែរក្នុងរយៈពេល៣០ឆ្នាំ ។

ក្រៅពីវិស័យឧស្សាហកម្មរថយន្តប្រកាសដំឡើងប្រាក់ខែបុគ្គលិកហើយ ក៏មាន Hitachi ជាក្រុមហ៊ុនលក់សម្ភារអគ្គិសនីល្បីឈ្មោះបានសម្រេចចិត្តដំឡើងប្រាក់បុគ្គលិកចំនួន៧.០០០យេនផងដែរ ដែលជាការឡើងខ្ពស់បំផុតគិតចាប់ពីឆ្នាំ១៩៩៨ មក ។ ចំណែកក្រុមហ៊ុនភេសជ្ជៈឈ្មោះ Sapporo ក៏ត្រៀមដំឡើងប្រាក់ខែបុគ្គលិកដែរចំនួន៩.០០០យេន គឺខ្ពស់បំផុតក្នុងរយៈពេល៤០ឆ្នាំ ។

ទោះយ៉ាងណា នៅមិនទាន់ច្បាស់លាស់ទេថា តើក្រុមហ៊ុនតូចៗនៅជប៉ុននឹងមានគោលការណ៍ដំឡើងប្រាក់ខែបុគ្គលិកដូចក្រុមហ៊ុនធំៗដែរឬអត់ ដោយសារក្រុមហ៊ុនទាំងនេះទទួលស្គាល់ថា ពួកគេមានការបារម្ភ បើបណ្តោយឱ្យអតិថិជនទទួលបន្ទុកចំណាយខ្ពស់ជាងនេះ ៕ ប្រភព ៖ The standard