រាជធានីគួឡាឡាំពួរ៖ នាយករដ្ឋមន្រ្ដីម៉ាឡេស៊ី ធ្វើដំណើរទៅកាន់ទីក្រុងប៉េកាំង ត្រូវគេរំពឹង ថា នឹងស្វះស្វែងរកចំណងទំនាក់ទំនងសេដ្ឋកិច្ច ឲ្យកាន់តែស៊ីជម្រៅ ជាមួយនឹងមហាយក្សអាស៊ី ហើយបន្ដរក្សាសន្ដិសុខជាមួយមហាអំណាចលោកខាងលិច ក៏ដូចជា ការដោះស្រាយបញ្ហាប្រឈមនឹងនានា នៅក្នុងសមុទ្រចិនខាងត្បូង និង ការពិភាក្សា អំពីបញ្ហាជាច្រើនទៀត ជាមួយនឹងលោក ស៊ី ជិនពីង (Xi Jinping) ប្រធានាធិបតីចិន។

សារ័ត៌មាន Al Jazeera បានចេញផ្សាយ កាលពីព្រឹក ថ្ងៃព្រហស្បតិ៍ ទី៣០ ខែមីនា ឆ្នាំ២០២៣ ថា ក្រុមអ្នកវិភាគ បានអះអាង ថា លោក អានវ៉ា អ៊ីប្រាហ៊ីម (Anwar Ibrahim) នាយករដ្ឋមន្រ្ដីម៉ាឡេស៊ី ត្រូវបានគេរំពឹង ថា នឹងស្វែងរកនូវទំនាក់ទំនងសេដ្ឋកិច្ច ឲ្យកាន់តែស៊ីជម្រៅ ជាមួយដៃគូពាណិជ្ជកម្មដ៏ធំបំផុត នៃប្រទេសរបស់គាត់ និង ការដោះស្រាយបញ្ហាដ៏រសើប ដូចជា បញ្ហាសមុទ្រចិនខាងត្បូង នៅក្នុងអំឡុងពេលដំណើរទស្សនកិច្ចជាលើកដំបូងរបស់គាត់ ទៅកាន់ប្រទេសចិន ក្នុងឋានៈជាប្រមុខរដ្ឋាភិបាល។

លោកនាយករដ្ឋមន្រ្ដីម៉ាឡេស៊ី បានទៅដល់រដ្ឋធានីប៉េកាំង កាលពីថ្ងៃពុធ ហើយគាត់មានគម្រោងជួបជាមួយនឹងលោក ហ្សាវ ឡេជី (Zhao Leji) ប្រធានសភាជាតិរបស់ប្រជាជន និង នាយកប្រតិបត្ដិរបស់ក្រុមហ៊ុនសាងសង់គមនាគមន៍ចិន ដែលជាក្រុមហ៊ុនម៉ៅការលើគម្រោងតភ្ជាប់ផ្លូវដែកឆ្នេរសមុទ្រខាងកើតរបស់ម៉ាឡេស៊ី។ លោក អានវ៉ា ក៏នឹងជួបលោក ស៊ី ជិនពីង ប្រធានាធិបតីចិន នៅថ្ងៃសុក្រ នៅក្នុងដំណើរទស្សនកិច្ចរបស់គាត់ រយៈពេល៤ថ្ងៃ នៅក្នុងប្រទេសមហាយក្សអាស៊ីមួយនេះ។ ក្រៅពីនេះ លោកនាយករដ្ឋមន្រ្ដី អានវ៉ា ក៏នឹងចរចាជាមួយមេដឹកនាំពាណិជ្ជកម្មរបស់ចិន និង លោក លី គាង (Li Qiang) នាយករដ្ឋមន្រ្ដីចិន។

លោក ហ្សាមប្រ៊ី អាប់ឌូល កាឌា (Zambry Abdul Kadir) រដ្ឋមន្ត្រីការបរទេសម៉ាឡេស៊ី បានបញ្ជាក់ កាលពីថ្ងៃពុធ ថា លោកនាយករដ្ឋមន្រ្ដី អានវ៉ា នឹងបើកកិច្ចពិភាក្សាជាមួយនឹងប្រធានាធិបតីចិន ហើយគេរំពឹង ថា នឹងផ្តោតទៅលើវិធានការជាក់ស្តែង អាចអនុវត្ត នៅក្នុងវិស័យពាណិជ្ជកម្ម កិច្ចសហប្រតិបត្តិការនយោបាយ ការទប់ស្កាត់នឹងអំពើពុករលួយ និង បញ្ហាជាច្រើនទៀត។

លោក អានវ៉ា បានជាប់ឆ្នោត ក្លាយជានាយករដ្ឋមន្រ្ដីទី១០របស់ម៉ាឡេស៊ី នៅក្នុងខែវិច្ឆិកា ឆ្នាំ២០២២ ហើយគាត់កំពុងតែធ្វើឲ្យដំណើរទស្សនកិច្ចរបស់គាត់ ប្រឆាំងនឹងការនៅពីក្រោយឆាកសង្គ្រាមពាណិជ្ជកម្ម និង បច្ចេកវិទ្យា រវាងសហរដ្ឋអាមេរិក និង ចិន ដែលកំពុងតែតានតឹងឡើង។ បញ្ហានេះ ធ្វើឲ្យមានភាពស្មុគស្មាញយ៉ាងខ្លាំង ដល់កិច្ចខិតខំប្រឹងប្រែងរបស់ប្រទេសម៉ាឡេស៊ី នៅក្នុងការរក្សាទំនាក់ទំនងជាវិជ្ជមាន ជាមួយនឹងប្រទេសមហាអំណាចសេដ្ឋកិច្ចកំពូលទាំង២របស់ពិភពលោក។

ប្រទេសចិន ក្លាយជាដៃគូពាណិជ្ជកម្មដ៏ធំបំផុតរបស់ម៉ាឡេស៊ី នៅក្នុងរយៈពេល១៤ឆ្នាំជាប់ៗគ្នា ជាមួយនឹងទំហំពាណិជ្ជកម្មទ្វេភាគី កើនឡើង រហូតដល់២០៣,៦ពាន់លានដុល្លារ នៅក្នុងឆ្នាំ២០២២។ ប៉ុន្តែទោះជាយ៉ាងណា ក្រុងគួឡាឡាំពួរ ក៏នៅតែរក្សាទំនាក់ទំនងសេដ្ឋកិច្ច និងសន្តិសុខយ៉ាងជិតស្និទ្ធ ជាមួយសហរដ្ឋអាមេរិក ខណៈទំហំពាណិជ្ជកម្ម នៃប្រទេសទាំង២ កើនដល់ដល់៧២,៩ពាន់លានដុល្លារ កាលពីឆ្នាំមុន។

ម៉ាឡេស៊ី ក្លាយជាប្រទេសនាំចេញ Semiconductor ដ៏ធំបំផុតលំដាប់លេខ៦ នៅលើពិភពលោក ដោយមានទំហំ៦,៣ភាគរយ នៃចំនួនសរុបបន្ទះឈីបរបស់ពិភពលោក។ បន្ទះឈីបនេះ ក្លាយជាសមាសធាតុដ៏សំខាន់បំផុត សម្រាប់គ្រឿងអេឡិចត្រូនិកប្រើប្រាស់ប្រចាំថ្ងៃ ហើយវាក៏ក្លាយជាគោលដៅដ៏សំខាន់ សម្រាប់ការទណ្ឌកម្មរបស់សហរដ្ឋអាមេរិក ដោយមានបំណង ពន្យឺតដល់ការរីកចម្រើន លើវិស័យបច្ចេកវិទ្យារបស់ចិន ផងដែរ។

លោក ហ៊ូ ឈីវ ភីង (Hoo Chiew Ping) សាស្ត្រាចារ្យផ្នែកទំនាក់ទំនងអន្តរជាតិ នៃសាកលវិទ្យាល័យជាតិម៉ាឡេស៊ី បានបញ្ជាក់ ថា កិច្ចសហប្រតិបត្តិការបែបនេះ នឹងមិនប៉ះពាល់ដល់ទំនាក់ទំនងទ្វេភាគីខាងនយោបាយនោះឡើយ។ ប៉ុន្ដែប្រសិនបើម៉ាឡេស៊ី មានបំណងចង់ជំរុញកិច្ចសហប្រតិបត្តិការ ជាមួយប្រទេសចិន ជាពិសេស នៅក្នុងវិស័យបច្ចេកវិទ្យានោះ ក្រុងគួឡាឡាំពួរ នឹងមានការចាំបាច់ ត្រូវតែពិចារណា អំពីលទ្ធភាព នៃសម្ពាធរបស់សហរដ្ឋអាមេរិក ហើយត្រូវតែស្វែងរកខ្សែបន្ទាត់ដ៏ពិសេសមួយ សម្រាប់ជំរុញកិច្ចសហប្រតិបត្តិការបច្ចេកវិទ្យា ដើម្បីផលប្រយោជន៍ជាតិ ព្រោះវានៅតែអាចបញ្ចុះបញ្ចូល ទាំងសហរដ្ឋអាមេរិក និងចិន បាន។

លោក ង៉ូវ ចូវប៊ីង (Ngeow Chow Bing) នាយកវិទ្យាស្ថានសិក្សាពីចិន នៃសាកលវិទ្យាល័យ Malaya បានអះអាង ថា ការដាក់ទណ្ឌកម្មបន្ថែមទៀតរបស់សហរដ្ឋអាមេរិក អាចនឹងប៉ះពាល់ដល់ក្រុមហ៊ុនមួយចំនួនរបស់ម៉ាឡេស៊ី ដែលបង្កើតជាខ្សែសង្វាក់ផ្គត់ផ្គង់ ដល់ប្រទេសចិន៕

តៃវ៉ាន់ ៖ ប្រធានាធិបតីតៃវ៉ាន់ លោកស្រី Tsai Ing-wen បានធ្វើដំណើរមកដល់ក្រុងញូវយ៉កហើយកាលពីថ្ងៃទី២៩ ខែមីនា កន្លងមក ដែលយន្តហោះបានចុះចតនៅអាមេរិក មុននឹងធ្វើដំណើរបន្តទៅកាន់ប្រទេសនៅអាមេរិកកណ្តាល ។ លោកស្រីមេដឹកនាំតៃវ៉ាន់ថ្លែងថា លោកស្រីនឹងមិនបណ្តោយឱ្យការដាក់សម្ពាធពីប្រទេសខាងក្រៅមករារាំងមិនឱ្យតៃវ៉ាន់បានចូលរួមក្នុងការងារសង្គមខាងក្រៅទេ ។ លោកស្រីថ្លែងបែបនេះក្រោយពីចិនបានគំរាមថា នឹងចាត់វិធានការលើតៃវ៉ាន់ បើលោកស្រីជួបជាមួយប្រធានសភាតំណាងរាស្ត្រអាមេរិក លោក Kevin McCarthy ។

លោកស្រី Tsai Ing-wen មានគម្រោងមកកាន់ទីក្រុងញូវយ៉ក និងទីក្រុង Los Angeles ក្នុងអំឡុងពេលលោកស្រីធ្វើដំណើរទៅកាន់ប្រទេសហ្គាតេម៉ាឡា និងបេលីស ចាប់ពីថ្ងៃទី២៩ ខែមីនា រហូតដល់ថ្ងៃទី៧ ខែមេសា ។ ហ្គាតេម៉ាឡា និងបេលីស គឺជាប្រទេសស្ថិតក្នុងចំណោមប្រទេសមានទំនាក់ទំនងការទូត និងទទួលស្គាល់តៃវ៉ាន់ជាផ្លូវការ ។

លោកស្រី Tsai Ing-wen នឹងស្នាក់នៅទីក្រុងញូវយ៉ករហូតដល់ថ្ងៃទី១ ខែមេសា បន្ទាប់មក លោកស្រីនឹងធ្វើដំណើរទៅកាន់ទីក្រុង Los Angeles ។ តាមព័ត៌មាននានាចុះផ្សាយថា លោកស្រី Tsai Ing-wen នឹងជួបជាមួយលោក Kevin McCarthy នៅរដ្ឋកាលីហ្វ័រញ៉ា ប៉ុន្តែលោកស្រីមិនបានបញ្ជាក់ពីព័ត៌មាននេះជាផ្លូវការទេ ។

លោកស្រី Tsai Ing-wen បានថ្លែងមុនពេលចាកចេញពីតៃវ៉ាន់ថា ៖ «ការដាក់សម្ពាធពីប្រទេសខាងក្រៅ មិនមែនជាឧបសគ្គដល់ការតាំងចិត្តរបស់យើងដែលចង់ជួបជាមួយពិភពលោកខាងក្រៅទេ ។ យើងមានសន្តិភាព និងទំនុកចិត្ត ហើយយើងក៏មិនព្រមចុះចាញ់ដែរ ។ តៃវ៉ាន់នឹងធ្វើដំណើរនៅលើវិថីសេរីភាព និងប្រជាធិបតេយ្យយ៉ាងមានស្ថេរភាព និងបោះជំហានទៅកាន់ពិភពលោកយ៉ាងធំទូលាយជាងមុន បើទោះជាផ្លូវដើររបស់យើងពិបាកក្តី ប៉ុន្តែតៃវ៉ាន់មិនមែននៅតែឯងទេ» ។

ចំណែកស្ថានទូតតៃវ៉ាន់ប្រចាំសហរដ្ឋអាមេរិកបញ្ជាក់ថា ក្នុងអំឡុងពេលលោកស្រី Tsai Ing-wen ស្នាក់នៅក្រុងញូវយ៉កនោះ គឺមិនអនុញ្ញាតឱ្យអ្នកសារព័ត៌មានចូលរួមក្នុងសកម្មភាពនានារបស់លោកស្រីទេ ។ រីឯប្រទេសចិនវិញបានដាស់តឿនជាញឹកញាប់ថា មន្ត្រីជាន់ខ្ពស់របស់អាមេរិកមិនគួរជួបគ្នាជាមួយលោកស្រី Tsai Ing-wen ទេ ព្រោះវាជាការបង្ហាញថា អាមេរិកគាំទ្រគោលបំណងរបស់តៃវ៉ាន់ ដែលត្រូវការបំបែកខ្លួនចេញពីប្រទេសចិន ។

គួរបញ្ជាក់ថា កាលពីលោកស្រី Nancy Pelosi អតីតប្រធានសភាតំណាងរាស្ត្រអាមេរិកបានធ្វើដំណើរមកកាន់តៃវ៉ាន់កាលពីលោកស្រីនៅកាន់តំណែង ចិនក៏បានចាត់វិធានការវិញដែរ ដោយបើកប្រតិបត្តិការសមយុទ្ធទ្រង់ទ្រាយធំ និងប្រើគ្រាប់ពិតបាញ់ចំនួន៦ទីតាំងនៅជុំវិញកោះតៃវ៉ាន់ ។ ហេតុនេះហើយទើបបច្ចុប្បន្ន កងទ័ពតៃវ៉ាន់តាមដានសកម្មភាពរបស់ចិនយ៉ាងដិតដល់ ៕ ប្រភព ៖ The standardth

ប្រទេសថៃ ៖ លោក Peeraphan Salirathaviphak ប្រធានគណៈកម្មការគ្រប់គ្រងយុត្តិធម៌ និងជំរុញគំនិតផ្តួចផ្តើមនៃការិយាល័យរបស់លោក ប្រាយុទ្ធ ចាន់អូចា ជានាយករដ្ឋមន្ត្រី និងជាប្រធានកិច្ចប្រជុំដើម្បីទទួលពាក្យបណ្តឹងរបស់តំណាងសមាគម និងក្រុមអ្នកចិញ្ចឹមជ្រូកនៅទូទាំងប្រទេសចំនួនជាង៥០នាក់ ដែលស្នើឱ្យរដ្ឋាភិបាលជួយដោះស្រាយបញ្ហាតម្លៃសាច់ជ្រូកក្នុងស្រុកធ្លាក់ចុះ ដោយសារការលួចនាំចូលសាច់ជ្រូកក្លាស្សេខុសច្បាប់ពីក្រៅប្រទេស ។

ការនាំចូលសាច់ជ្រូកខុសច្បាប់ពីក្រៅប្រទេសនេះ បានធ្វើឱ្យតម្លៃសាច់ជ្រូកក្នុងប្រទេសថៃធ្លាក់ចុះជាបន្តបន្ទាប់ ហើយក៏បានប៉ះពាល់ដល់ការលក់សាច់ជ្រូកនៅលើទីផ្សារផងដែរ ។ គេសង្កេតឃើញថា សាច់ជ្រូកនាំចូលខុសច្បាប់មិនបានឆ្លងកាត់ការពិនិត្យពីសុវត្ថិភាពតាមស្តង់ដារត្រឹមត្រូវទេ ជាពិសេស វាគ្មានអនាម័យ និងធ្វើឱ្យប៉ះពាល់ដល់អ្នកបរិភោគ ។

អ្នកតំណាងកសិករចិញ្ចឹមជ្រូកលើកឡើងថា កន្លងមក ពួកគេបានប្រឈមមុខនឹងការលំបាកក្នុងមុខរបរចិញ្ចឹមជ្រូកនេះ ដូចជា ការចំណាយដើមទុន ចំណីជ្រូកឡើងថ្លៃ និងជំងឺរាតត្បាតលើសត្វជ្រូក រហូតដល់ពេលចុងក្រោយនេះ ពួកគេត្រូវមកប្រឈមនឹងបញ្ហាសាច់ជ្រូកក្លាស្សេនាំចូលពីក្រៅប្រទេសទៀត គឺវាធ្វើឱ្យតម្លៃសាច់ជ្រូកដែលចិញ្ចឹមក្នុងស្រុកធ្លាក់ចុះ ។ ដូច្នេះ ពួកគេសូមសំណូមពរទៅកាន់ភ្នាក់ងារពាក់ព័ន្ធឱ្យរឹតបន្តឹង និងគ្រប់គ្រងការនាំចូលសាច់ជ្រូកខុសច្បាប់ពីក្រៅប្រទេស ។

លោក Peeraphan ប្រធានគណៈកម្មការគ្រប់គ្រងយុត្តិធម៌បញ្ជាក់ថា រដ្ឋាភិបាលនឹងតាមដាន និងដោះស្រាយបញ្ហានេះដើម្បីផ្តល់ភាពយុត្តិធម៌ដល់គ្រប់គ្នា ហើយរដ្ឋាភិបាលក៏បានយល់ពីទុក្ខលំបាករបស់អ្នកចិញ្ចឹមជ្រូកផងដែរ ជាពិសេស បញ្ហាការលួចនាំចូលសាច់ជ្រូកខុសច្បាប់ ។ លោកបន្តថា រដ្ឋាភិបាលនឹងចាត់ការបញ្ហានេះ ព្រមទាំងរកមុខអ្នកលួចនាំចូលសាច់ជ្រូកខុសច្បាប់ ៕ ប្រភព ៖ BTimes

អាកាសយានដ្ឋានអន្តរជាតិ សៀមរាបអង្គរ ដែលមានទីតាំងនៅស្រុកសូតនិគម ស្របលើផ្ទៃដីប្រមាណ៧៥០ ហិកតា មានចម្ងាយប្រមាណ៤០ គីឡូម៉ែត្រពីរមណីដ្ឋានអង្គរ សម្រេចលើការសាងសង់បាន៩០%ហើយ ខណៈដំណើរការតេស្តសាកល្បងនៅខែឧសភានឹងបើកដំណើរការនៅខែតុលា ឆ្នាំ២០២៣ ខាងមុខនេះ។

ព្រលានយន្តហោះអន្តរជាតិសៀមរាបអង្គរ អាចឱ្យយន្តហោះចុះចតចំនួន៣៨ គ្រឿង ជាអាកាសយានដ្ឋានអន្តរជាតិលំដាប់ 4E ជាមួយផ្លូវបត់រត់ប្រវែង ៣,៦០០ម៉ែត្រ មានសមត្ថភាពឱ្យយន្តហោះគ្រប់ប្រភេទចុះចតបាន ដោយបំពាក់បច្ចេកវិទ្យាថ្មីបំផុត។ បន្ថែមពីលើនេះ ប្រជាពលរដ្ឋដែលរស់នៅក្បែរតំបន់នេះ នឹងអាចប្រើប្រាស់អគ្គិសនីពីបណ្តាញរបស់រដ្ឋ ចាប់ពីពេលនេះ ដែលតភ្ជាប់ពីអនុស្ថានីយអាកាសយានដ្ឋានអន្តរជាតិ សៀមរាបអង្គរ។

គួរបញ្ជាក់ថាព្រលានយន្តហោះខាងលើនេះ បានចាប់ផ្តើមសាងសង់កាលពីខែមីនា ឆ្នាំ២០២០ ដោយប្រើទុនវិនិយោគប្រមាណ៩០០លានដុល្លារ ពីក្រុមហ៊ុន Angkor International Airport Investment (Cambodia) Co.,Ltd (AIAI) ៕

ប្រទេសថៃ ៖ កាលពីថ្ងៃទី២៩ ខែមីនា កន្លងមក នៅក្នុងបរិវេណអាកាសយានដ្ឋានកងទ័ពអាកាសលេខ៤១ ឃុំសុថេប ស្រុកមឿងឈៀងម៉ៃ ខេត្តឈៀងម៉ៃ គេបានបញ្ជូនឧទ្ធម្ភាគចក្រប្រភេទ KA-32 របស់នាយកដ្ឋានបង្ការ និងកាត់បន្ថយគ្រោះមហន្តរាយ ក្រសួងមហាផ្ទៃ ដើម្បីធ្វើការពន្លត់ភ្លើងឆេះព្រៃជាច្រើនកន្លែងក្នុងបរិវេណលើភ្នំខ្ពស់ស្ថិតក្នុងស្រុកម៉ែទែង ខេត្តឈៀងម៉ៃ ។

បច្ចុប្បន្ន នៅខេត្តឈៀងម៉ៃកំពុងប្រឈមនឹងបរិយាកាសកខ្វក់ខ្លាំង រួមផ្សំនឹងកើតមានភ្លើងឆេះព្រៃនៅតាមតំបន់ភ្នំទៀតនោះ ធ្វើឱ្យពលរដ្ឋរស់នៅក្នុងខេត្តនេះពិបាកយ៉ាងខ្លាំង ជាពិសេស ប៉ះពាល់ដល់សុខភាពដោយសារបរិយាកាសកខ្វក់ និងផ្សែងភ្លើងផងដែរ ។

នាយករងមជ្ឈមណ្ឌលបង្ការ និងដោះស្រាយបញ្ហាភ្លើងឆេះព្រៃ និងធូលីកខ្វក់ក្នុងបរិយាកាសថ្លែងថា ឈៀងម៉ៃបានត្រៀមកម្លាំងប្រតិបត្តិការលើអាកាសដើម្បីទប់ស្កាត់ភ្លើងឆេះព្រៃ ។ លើសពីនេះ ភ្នាក់ងារពន្លត់អគ្គិភ័យបានប្រមូលកម្លាំងមកធ្វើការពន្លត់ទាំងរយៈពេលខ្លី និងវែងផងដែរ ដើម្បីទប់ស្កាត់បញ្ហាភ្លើងឆេះព្រៃនៅឆ្នាំ២០២៣នេះ ។ នាយករងរូបនេះបន្តថា បញ្ហាមួយទៀត គឺដោយសារតែពោតលក់ចេញបានថ្លៃ ទើបធ្វើឱ្យកសិករនាំគ្នាដាំពោតកាន់តែច្រើន ហើយពួកគេបានដុតចម្ការពោតទាំងនោះដោយមិនបានសុំអនុញ្ញាតពីអាជ្ញាធរ ។

ការដោះស្រាយបញ្ហាផ្សែងភ្លើង និងធូលីកខ្វក់ដែលកើតឡើងនៅខេត្តភាគខាងជើងប្រទេសថៃ ជាពិសេស ខេត្តឈៀងម៉ៃ ភ្នាក់ងារពន្លត់ភ្លើងបានត្រៀមឧបករណ៍នានាជាស្រេច ដើម្បីដោះស្រាយបញ្ហាដែលកើតឡើងទាំងខាងផ្លូវគោក និងផ្លូវអាកាសដូចជា ៖

-យន្តហោះប្រភេទ DA-42 របស់កងទ័ពអាកាស ដែលបំពាក់ដោយកាមេរ៉ាសម្រាប់ពិនិត្យចាប់កំដៅ
-យន្តហោះប្រភេទ BT-67 របស់កងទ័ពអាកាស ជាយន្តហោះសម្រាប់បាចទឹក
-បាចសារធាតុគីមីសម្រាប់ពន្លត់ភ្លើង
-ឧទ្ធម្ភាគចក្រប្រភេទ Bell 407 របស់នាយកដ្ឋានទឹកភ្លៀង និងកសិកម្ម
-ឧទ្ធម្ភាគចក្រប្រភេទ MI-17 របស់កងទ័ពជើងគោក និង
-ឧទ្ធម្ភាគចក្រប្រភេទ KA-32 របស់នាយកដ្ឋានបង្ការ និងកាត់បន្ថយគ្រោះមហន្តរាយ ក្រសួងមហាផ្ទៃ ៕ ប្រភព ៖ The standardth

ប្រទេសឥណ្ឌូណេស៊ី ៖ សារព័ត៌មាន BBC របស់ប្រទេសអង់គ្លេសចុះផ្សាយថា ប្រទេសឥណ្ឌូណេស៊ីបានបណ្តេញបុរសជនជាតិរុស្ស៊ីម្នាក់ឱ្យត្រឡប់ទៅប្រទេសវិញ ក្រោយបុរសទេសចរណ៍រូបនេះបានបំពានច្បាប់ឥណ្ឌូណេស៊ី ។ បុរសរុស្ស៊ីរូបនេះបានលួចឡើងទៅលើភ្នំ Agung ជាកន្លែងគោរពរបស់ជនជាតិឥណ្ឌូណេស៊ី និងថតរូបអាក្រាតកាយលើកំពូលភ្នំនៅកោះបាលី ។ ឥណ្ឌូណេស៊ីបានហាមឃាត់បុរសនេះមិនឱ្យធ្វើដំណើរមកកាន់ឥណ្ឌូណេស៊ី រយៈពេល៦ខែ ។

អ្នកទេសចរណ៍ដែលមានឥរិយាបថមិនគប្បីនេះឈ្មោះថា យូរិ ដោយរូបគេបានស្រាតខោរបស់ខ្លួន រួចថតរូបនៅលើកំពូលភ្នំ Agung ក្រោយមក ក៏យករូបភាពទៅបង្ហោះក្នុងបណ្តាញសង្គម ដែលបណ្តាលឱ្យពលរដ្ឋឥណ្ឌូណេស៊ីជាច្រើនបានសម្តែងការមិនពេញចិត្តជាខ្លាំងពីការថតរូបអាក្រាតកាយនេះ ខណៈពួកគេចាត់ទុកថា ភ្នំនេះស័ក្តិសិទ្ធិ និងជាកន្លែងស្នាក់នៅរបស់ព្រះសាសនាហិណ្ឌូ ។

ការិយាល័យច្បាប់ និងសិទ្ធិមនុស្សរបស់ឥណ្ឌូណេស៊ីបញ្ជាក់ថា ការថតរូបអាក្រាតកាយរបស់បុរសរុស្ស៊ីនេះ គឺបានរំលោភលើទំនៀមទម្លាប់ប្រពៃណីរបស់ពលរដ្ឋឥណ្ឌូណេស៊ី ហើយមិនបានគោរពវប្បធម៌ឥណ្ឌូណេស៊ី ។

ទោះយ៉ាងណា លោក យូរិ ក៏បានធ្វើការសូមទោសចំពោះកំហុសឆ្គងរបស់ខ្លួនរួចហើយ ដោយលោក យូរិ ទទួលស្គាល់ថា ខ្លួនមិនដឹងពីមុនមកថា ភ្នំ Agung គឺជាទីកន្លែងស័ក្តិសិទ្ធិរបស់ជនជាតិឥណ្ឌូណេស៊ីទេ ។ លោក យូរិ ថា ៖ «ខ្ញុំពិតជាសោកស្តាយខ្លាំងណាស់ចំពោះទង្វើនេះ ហើយខ្ញុំប្រាកដជាមិនដឹងថា ភ្នំនេះជាកន្លែងស័ក្តិសិទ្ធិទេ» ៕ ប្រភព ៖ Mono News

ហូឡង់៖ កញ្ញាVanessa van Ewijk អាយុ ៣៤ ឆ្នាំដែលចង់ក្លាយជាម្តាយទោលបានស្វែងរកអ្នកផ្តល់មេជីវិតឈ្មោលតាមរយៈគេហទំព័រមួយដែលមានឈ្មោះថា Desire for Children ក្នុងឆ្នាំ ២០១៥ ។ ជាពិសេសនាងបានកត់សម្គាល់ពីប្រវត្តិរូបរបស់លោក Jonathan Jacob Meijer ដែលជាតន្ត្រីករហូឡង់ដែលមានភ្នែកពណ៌ខៀវ និងសក់ពណ៌ទង់ដែងអង្កាញ់។
នាងបាននិយាយជាមួយលោក Meijer តាមទូរស័ព្ទ គាត់ហាក់ដូចជាស្លូតបូត ចិត្តល្អ និងរួសរាយរាក់ទាក់ គាត់ស្រលាញ់តន្ត្រី ចូលចិត្តនិយាយអំពីគំនិតរបស់គាត់ក្នុងជីវិត ។
ប្រហែលមួយខែក្រោយមកកញ្ញា Ewijk និងលោក Meijer បានរៀបចំជួបនៅស្ថានីយ៍កណ្តាល គាត់បានផ្តល់មេជីវិតឈ្មោលដល់នាង ហើយជាថ្នូរនឹងប្រាក់ ២០០ ដុល្លារ។ លោកMeijer បាននិយាយថា នេះជាលើកទី ៨ របស់គាត់ដែលបានបរិច្ចាគមេជីវិត។ ប៉ុន្មានខែក្រោយមកកញ្ញា Ewijk បានផ្តល់កំណើតដល់កូនស្រីដំបូងរបស់នាង។

យោងតាមការស៊ើបអង្កេតរបស់អាជ្ញាធរលោក Meijer បានបរិច្ចាគមេជីវិតឈ្មោលដល់គ្លីនិកប្រហែល ២៤ នៅប្រទេសហូឡង់។ នៅពេលមានកម្រិតលោក Meijer បានបន្តបរិច្ចាគមេជីវិតឈ្មោលនៅក្រៅប្រទេសទៅកាន់ប្រទេសដាណឺម៉ាក អ៊ុយក្រែន។ គាត់បាននិយាយថាគាត់គ្រាន់តែ “ជួយស្ត្រីធ្វើឱ្យបំណងប្រាថ្នាដ៏ធំបំផុតរបស់ពួកគេក្លាយជាការពិត” ។ ដោយជារឿយៗលោកMeijer តែងតែធ្វើដំណើរផ្លូវឆ្ងាយទៅកាន់ប្រទេសដូចជា អាហ្សង់ទីន ចិន នូវែលសេឡង់ និងអូស្ត្រាលី នេះបើយោងតាមឯកសារ Cryos ។

មិនយូរប៉ុន្មានតាមប្រភព Times of London បានរាយការណ៍ថាលោក Jonathan Jacob Meijer អាយុ ៣០ ឆ្នាំដែលបានបរិច្ចាគមេជីវិតឈ្មោលរាប់រយដង ឥឡូវនេះក្លាយជាឪពុករបស់កូនយ៉ាងហោចណាស់ ១០២ នាក់ នៅក្នុងប្រទេសហូឡង់។

លោក Ties van der Meer ប្រធានមូលនិធិ DonorKind បាននិយាយថា “យើងកំពុងចាត់វិធានការពិតប្រាកដប្រឆាំងនឹងបុរសម្នាក់នេះ ដោយសារតែរដ្ឋាភិបាលមិនបានធ្វើអ្វីសោះ។ តាមរយៈអ៊ីនធឺណិត គាត់អាចទៅដល់នរណាម្នាក់ក្នុងពិភពលោក ឬធ្វើជំនួញជាមួយធនាគារមេជីវិតឈ្មោលអន្តរជាតិធំៗ” ។
អង្គការបានស្នើឱ្យតុលាការបញ្ជាឱ្យលោក Meijer បញ្ឈប់ការបរិច្ចាក និងបំផ្លាញមេជីវិតឈ្មោលដែលរក្សាទុកទាំងអស់។

ប្រទេសហូឡង់បានកត់ត្រាបុរសម្នាក់ឈ្មោះ Meijer ដែលមានកូនយ៉ាងហោចណាស់ ១០២នាក់ ។ មនុស្សមួយចំនួនដូចជាលោកបណ្ឌិត Jan Karbaat នៅប្រទេសហូឡង់ ជ្រើសរើសការបរិច្ចាកដោយខុសច្បាប់ ដោយបន្សល់ទុកនូវវិបត្តិសម្រាប់មនុស្សជំនាន់ក្រោយ។ កុមារដែលកើតចេញពីបុរសម្នាក់ជាប់គ្នាគឺងាយនឹងខូចទ្រង់ទ្រាយឆ្អឹង ពិការសតិបញ្ញា ពោះរីកធំ ឈាមកកពីកំណើត កោសិកាឈឺ ហើយហានិភ័យនៃការស្លាប់គឺខ្ពស់ណាស់។ ប្រភព៖vnexpress

ប្រទេសថៃ ៖ កាលពីថ្ងៃទី២៨ ខែមីនា កន្លងមក មានហេតុការណ៍ភ្លើងឆេះព្រៃនៅលើភ្នំឆាភ្លូ និងរាលដាលទៅដល់ភ្នំកែវ ភ្នំឡែម ដែលស្ថិតនៅឃុំផនម៉ានី ស្រុកមឿងណាខនណាយក ខេត្ត Nakhon Nayok ហើយគេរាយការណ៍ថា ភ្លើងក៏បានបន្តឆេះរាលដាលក្នុងប្រវែង២គីឡូម៉ែត្រឯណោះ ។

លោក Bancha Chaowarin អភិបាលខេត្ត Nakhon Nayok បានសហការជាមួយភ្នាក់ងារពន្លត់ភ្លើងដើម្បីបង្ការកុំឱ្យភ្លើងឆេះចូលដល់ក្នុងភូមិពលរដ្ឋ និងសាលារៀននៅក្បែរនោះ និងដាស់តឿនពលរដ្ឋទាំងអស់ឱ្យប្រុងប្រយ័ត្ននឹងហេតុការណ៍នេះ ។

ភ្នាក់ងារពន្លត់ភ្លើងនិយាយថា ពួកគេធ្វើបានត្រឹមតែមិនឱ្យភ្លើងឆេះរាលដាលមកដល់ទីប្រជុំជន និងផ្ទះសម្បែងរបស់ពលរដ្ឋប៉ុណ្ណោះ ដោយបានប្រើប្រាស់រថយន្តពន្លត់អគ្គិភ័យរបស់ខេត្ត Nakhon Nayok ដើម្បីរួមគ្នាទប់ស្កាត់កុំឱ្យភ្លើងរាលដាលកាន់តែច្រើនជាងនេះ ។ រីឯការពន្លត់ភ្លើងធ្វើទាំងពិបាក និងអាចមានគ្រោះថ្នាក់ដល់ភ្នាក់ងារពន្លត់ភ្លើង ។ ចំណែកនៅភ្នំឡែមដែលស្ថិតនៅខាងក្រោយសាលារៀនណាយរ៉យ គឺចំណុចភ្លើងឆេះនៅឆ្ងាយពីសាលារៀននេះត្រឹមតែ៦០០ម៉ែត្រប៉ុណ្ណោះ ហើយសាលារៀនមិនរងផលប៉ះពាល់ទេ ។

លោក Bancha Chaowarin អភិបាលខេត្ត Nakhon Nayok ថ្លែងថា ភ្លើងឆេះភ្នំនៅពេលយប់បែបនេះ ភ្នាក់ងារពន្លត់ភ្លើងមិនអាចធ្វើអ្វីឱ្យលើសពីនេះទេ ព្រោះភ្នំទាំងនេះខ្ពស់ ហើយលោកបានត្រឹមតែបង្កើនភ្នាក់ងារពន្លត់ភ្លើងប៉ុណ្ណោះ ។ លោកបន្តថា កាលពីពេលល្ងាច មានខ្យល់បក់ខ្លាំង រួមផ្សំនឹងអាកាសធាតុក្តៅផងទើបបណ្តាលឱ្យមានភ្លើងឆេះព្រៃរាលដាលនៅតាមជើងភ្នំ ។

លោកក៏បានសូមឱ្យពលរដ្ឋយល់ដែរថា ការពន្លត់ភ្លើងឆេះភ្នំដ៏ខ្ពស់បែបនេះនៅពេលយប់ គឺភ្នាក់ងារមិនអាចធ្វើបានទេ ព្រោះវាមានគ្រោះថ្នាក់ខ្លាំងណាស់ ជាពិសេស គ្រោះថ្នាក់ទៅលើភ្នាក់ងារពន្លត់ភ្លើង ។ លោកបន្តថា លោកបានសុំជំនួយឧទ្ធម្ភាគចក្រពន្លត់ភ្លើងរបស់នាយកដ្ឋានបង្ការ និងកាត់បន្ថយគ្រោះមហន្តរាយរបស់ខេត្តលបបុរី មកជួយពន្លត់ភ្លើងនេះ ។

ភ្លើងបានឆេះសន្ធោសន្ធៅយ៉ាងខ្លាំងនៅលើភ្នំ ហើយដោយសារភ្នំទាំងនេះធំខ្ពស់ ហេតុនេះ នៅពេលកើតភ្លើងឆេះធ្វើឱ្យមើលទៅគួរឱ្យខ្លាចខ្លាំងណាស់ ។ លើសពីនេះ វាបានធ្វើឱ្យសត្វព្រៃទាំងឡាយដែលរស់នៅលើភ្នំ ត្រូវងាប់ផុតពូជផងដែរដូចជា ជ្រូកព្រៃ ក្តាន់ និងកំប្រុក ៕ ប្រភព ៖ The standardth