ប្រទេសរុស្ស៊ី ៖ លោកប្រធានាធិបតីប្រទេសរុស្ស៊ី វ៉្លាឌីមៀរ ពូទីន បានថ្លែងក្រោយពីលោកជួបពិភាក្សាជាមួយប្រធានាធិបតីចិន លោក ស៊ី ជិនពីង ដែលបានធ្វើដំណើរមកកាន់ទីក្រុងមូស្គូ ប្រទេសរុស្ស៊ី ថា ប្រទេសចិនបានស្នើដាក់ផែនការសន្តិភាព១២ចំណុច ដើម្បីបញ្ចប់សង្គ្រាមនៅប្រទេសអ៊ុយក្រែន ។ លោក ពូទីន បន្តថា សង្គ្រាមអាចបញ្ចប់ទៅបាន ដរាបណាបណ្តាប្រទេសលោកខាងលិច និងអ៊ុយក្រែនយល់ព្រមស្វែងរកសន្តិភាព ប៉ុន្តែរុស្ស៊ីមើលមិនឃើញថា ពួកគេយល់ព្រមចរចាបញ្ចប់សង្គ្រាមទេ ។

ផែនការសន្តិភាព១២ចំណុចរបស់ប្រទេសចិន គឺបានអំពាវនាវឱ្យប្រទេសពាក់ព័ន្ធយល់ព្រមចរចាគ្នារកសន្តិភាព និងស្នើសុំឱ្យភាគីទាំងអស់ត្រូវគោរពអធិបតេយ្យភាពរបស់ប្រទេសនីមួយៗទៅវិញទៅមក ។ ប្រទេសចិនបញ្ជាក់ថា ខ្លួននៅតែប្រកាន់ជំហរកណ្តាលចំពោះសង្គ្រាមនៅអ៊ុយក្រែន ហើយមានតែការចរចាប៉ុណ្ណោះ ទើបអាចដោះស្រាយបញ្ហាសង្គ្រាមដែលអូសបន្លាយនេះបាន ។

គួរបញ្ជាក់ថា ប្រទេសអ៊ុយក្រែននៅតែស្នើឱ្យរុស្ស៊ីដកកងទ័ពចេញពីទឹកដីអ៊ុយក្រែនជាមុនសិនបើត្រូវការចរចាសន្តិភាព ប៉ុន្តែរហូតមកដល់ពេលនេះ ប្រទេសរុស្ស៊ីមិនទាន់បង្ហាញសញ្ញាថា ចង់ចរចាបញ្ចប់សង្គ្រាមជាមួយអ៊ុយក្រែនទេ ។

ដូចគ្នានេះដែរ លោក Anthony Blinken រដ្ឋមន្ត្រីក្រសួងការបរទេសសហរដ្ឋអាមេរិក ក៏បានអំពាវនាវឱ្យមានការឈប់បាញ់គ្នាផងដែរ មុននឹងរុស្ស៊ីដកកងទ័ពរបស់ខ្លួនចេញពីប្រទេសអ៊ុយក្រែន ៕ ប្រភព ៖ Mono News

តៃវ៉ាន់ ៖ លោក Wang Wen Bin អ្នកនាំពាក្យក្រសួងការបរទេសប្រទេសចិនបានរិះគន់យ៉ាងខ្លាំងក្លា និងបញ្ជាក់ថា ចិនប្រឆាំងយ៉ាងខ្លាំងចំពោះការផ្លាស់ប្តូរ មិនថាតាមវិធីណាទេរវាងអាមេរិកជាមួយរដ្ឋាភិបាលតៃវ៉ាន់ ហើយចិនប្រឆាំងនឹងដំណើរទស្សនកិច្ចមកកាន់អាមេរិករបស់មន្ត្រីតៃវ៉ាន់ មិនថាមន្ត្រីណាមួយ ឬមានលេសអ្វីផ្សេងទេ ។ លើសពីនេះ ចិនក៏ប្រឆាំងនឹងអាមេរិកផងដែរ ដែលរំលោភលើគោលការណ៍ «ចិនតែមួយ» និងទាក់ទងជាមួយមន្ត្រីតៃវ៉ាន់គ្រប់រូបភាពទាំងអស់ ។

លោក Wang Wen Bin ថ្លែងថា គម្រោងធ្វើទស្សនកិច្ចមកកាន់អាមេរិកកណ្តាលរបស់មេដឹកនាំតៃវ៉ាន់ គឺគ្រាន់តែជាលេសបាំងមុខប៉ុណ្ណោះ ប៉ុន្តែការពិត តៃវ៉ាន់ព្យាយាមបង្ហាញការគាំទ្រពីអាមេរិកដើម្បីឱ្យតៃវ៉ាន់មានសេរីភាព ហើយរដ្ឋាភិបាលចិនបានដាក់លិខិតតវ៉ាជាផ្លូវការហើយទៅកាន់អាមេរិក ។

មុននេះ រដ្ឋាភិបាលតៃវ៉ាន់លើកឡើងថា ប្រធានាធិបតីរបស់តៃវ៉ាន់ លោកស្រី Tsai Ing-wen នឹងទៅកាន់អាមេរិកចំនួន២លើក គឺនឹងទៅកាន់ទីក្រុង New York និង Los Angeles ក្នុងដំណើរទស្សនកិច្ចទៅកាន់អាមេរិកកណ្តាលចំនួន២ប្រទេស គឺហ្គាតេម៉ាឡា (Guatemala) និងបេលីស (Belize) ។ លោកស្រី Tsai Ing-wen នឹងធ្វើដំណើរចេញពីតៃវ៉ាន់នៅថ្ងៃទី២៩ ខែមីនា និងត្រឡប់មកតៃវ៉ាន់វិញនៅថ្ងៃទី៧ ខែមេសា ។

បើតាមព័ត៌មានផ្សាយថា ប្រធានសភាតំណាងរាស្ត្រអាមេរិក លោក Kevin McCarthy នឹងជួបជាមួយមេដឹកនាំតៃវ៉ាន់ នៅពេលមេដឹកនាំតៃវ៉ាន់មកកាន់ទីក្រុង Los Angeles ប៉ុន្តែខាងតៃវ៉ាន់មិនបាននិយាយអំពីរឿងនេះទេ ។

ក្នុងពេលលោកស្រី Tsai Ing-wen នឹងមកកាន់អាមេរិកកណ្តាល និងសហរដ្ឋអាមេរិកនោះ គឺជាពេលស្របគ្នាជាមួយអតីតប្រធានាធិបតីតៃវ៉ាន់ លោក Ma Yingjeew នឹងធ្វើដំណើរទៅប្រទេសចិន ចាប់ពីថ្ងៃទី២៧ មីនា ដល់ថ្ងៃទី៧ ខែមេសា ដែលជាការទៅកាន់ទឹកដីចិនជាប្រវត្តិសាស្ត្ររបស់អតីតមេដឹកនាំតៃវ៉ាន់រូបនេះ ។ អតីតប្រធានាធិបតីតៃវ៉ាន់ និងជាអ្នកនយោបាយនាំមុខនៅតៃវ៉ាន់ លោក Ma Yingjeew នឹងធ្វើដំណើរទៅចិនជាលើកដំបូងក្នុងរយៈពេល៧៤ឆ្នាំ ចាប់តាំងពីតៃវ៉ាន់បំបែកខ្លួនចេញពីចិនកាលពីឆ្នាំ១៩៤៩ ។

បច្ចុប្បន្ន លោក Ma Yingjeew នៅតែជាមេដឹកនាំជាន់ខ្ពស់ក្នុងគណបក្សគួមីនតាង ជាបក្សប្រឆាំងនៅតៃវ៉ាន់ ដោយលោកធ្លាប់ជួបជាមួយប្រធានាធិបតីចិន លោក ស៊ី ជិនពីង កាលពីឆ្នាំ២០១៥ ប៉ុន្តែជាការជួបគ្នានៅប្រទេសសិង្ហបុរី មិនមែនចិនទេ ។ រីឯគម្រោងទៅចិនលើកនេះ នៅមិនច្បាស់ទេថា អតីតមេដឹកនាំតៃវ៉ាន់រូបនេះនឹងបានជួបជាមួយ លោក ស៊ី ជិនពីង ឬអត់ ។

គួរបញ្ជាក់ថា គណបក្សគួមីនតាង មានគោលនយោបាយគាំទ្រឱ្យតៃវ៉ាន់មានសម្ព័ន្ធភាពជិតដិតជាមួយប្រទេសចិន ។ លោក Ma Yingjeew និយាយថា វាសំខាន់ដែលតៃវ៉ាន់ត្រូវរក្សាទំនាក់ទំនងជាមួយចិន ជាពិសេស ពេលស្ថានភាពកំពុងតានតឹងរវាងចិន និងតៃវ៉ាន់ នាពេលបច្ចុប្បន្ននេះ ៕ ប្រភព ៖ TNN World

សហរដ្ឋអាមេរិក ៖ CEO របស់ TikTok បានត្រៀមតវ៉ាទៅកាន់រដ្ឋសភាអាមេរិកដើម្បីបង្ហាញថា កម្មវិធីល្បីឈ្មោះរបស់ប្រទេសចិន TikTok ដែលបច្ចុប្បន្ននេះ មានពលរដ្ឋអាមេរិកប្រើប្រាស់ជាង១៥០លាននាក់នោះ មិនធ្លាប់បានបញ្ជូនទិន្នន័យរបស់អ្នកប្រើប្រាស់នៅអាមេរិកទៅកាន់រដ្ឋាភិបាលចិនទេ ហើយ TikTok ក៏គ្មានថ្ងៃធ្វើបែបនេះដែរ ។

CEO របស់ TikTok បានលើកឡើងបែបនេះក្រោយពីរដ្ឋាភិបាលអាមេរិក និងប្រទេសជាច្រើនទៀតនាំគ្នាហាមឃាត់ការប្រើ TikTok ក្នុងឧបករណ៍របស់រដ្ឋាភិបាល ដោយសារពួកគេបារម្ភថា ទិន្នន័យរបស់អ្នកប្រើប្រាស់នឹងធ្លាក់ទៅដល់ដៃរដ្ឋាភិបាលចិន ។

លោក Zhou Shou Zhi ជា CEO របស់ TikTok និយាយថា ៖ «TikTok មិនធ្លាប់បែងចែកទិន្នន័យ ឬបានទទួលការស្នើសុំពីរដ្ឋាភិបាលចិនឱ្យរាយការណ៍ទិន្នន័យពីអ្នកប្រើប្រាស់នៅអាមេរិកទេ» ។ លោកថា លោកនឹងទៅកាន់គណៈកម្មាធិការថាមពល និងពាណិជ្ជកម្មនៃសភាតំណាងរាស្ត្រអាមេរិក នៅថ្ងៃទី២៣ ខែមីនា ។

លោកបន្ថែមថា ក្រុមហ៊ុនមេរបស់ TikTok ឈ្មោះ ByteDance មិនត្រូវបានរដ្ឋាភិបាលចិនគ្រប់គ្រងទេ ហើយរដ្ឋាភិបាលចិន ក៏មិនមែនជាម្ចាស់ក្រុមហ៊ុននេះដែរ ។ លោកបញ្ជាក់ថា ៖ «ខ្ញុំសូមនិយាយរឿងនេះយ៉ាងច្បាស់លាស់ថា ក្រុមហ៊ុន ByteDance មិនមែនជាតំណាងប្រទេសចិន ឬតំណាងប្រទេសណាមួយក្នុងពិភពលោកទេ» ។

ការប្រកាសបដិសេធរបស់លោក Zhou Shou Zhi អំពីការលួចទិន្នន័យអ្នកប្រើប្រាស់ TikTok នេះ ក្រោយពីប្រទេសនានាសម្តែងការបារម្ភថា រដ្ឋាភិបាលចិនអាចប្រមូលទិន្នន័យអ្នកប្រើប្រាស់នៅអាមេរិកពីក្រុមហ៊ុន ByteDance ។ ដូច្នេះ ធ្វើឱ្យសភាអាមេរិកអំពាវនាវឱ្យពលរដ្ឋខ្លួនឈប់ប្រើប្រាស់កម្មវិធីនេះ ។

កាលពីសប្តាហ៍កន្លងមក មានការបារម្ភពីការលួចទិន្នន័យអ្នកប្រើប្រាស់កាន់តែខ្លាំងជាងមុន ក្រោយពីរដ្ឋាភិបាលអាមេរិកដាក់លក្ខខណ្ឌឱ្យក្រុមហ៊ុន ByteDance ដកការវិនិយោគពីកម្មវិធី TikTok បើមិនដូច្នោះទេ អាមេរិកនឹងហាមឃាត់ការប្រើកម្មវិធីនេះនៅទូទាំងប្រទេស ។

ចំណែក TikTok និយាយថា ប្រទេសនានាបាននាំគ្នាហាមឃាត់ប្រើប្រាស់ TikTok នេះ ដោយសារពួកគេយល់ច្រឡំ ហើយពាក់ព័ន្ធនឹងបញ្ហានយោបាយផងដែរ ។ ក្រុមហ៊ុនបានវិនិយោគក្នុងទឹកប្រាក់ជាង១,៥ពាន់លានដុល្លារអាមេរិកដើម្បីបង្កើនសុវត្ថិភាពទិន្នន័យអ្នកប្រើប្រាស់ ក្រោមគម្រោងឈ្មោះថា Project Texas និងព្យាយាមបញ្ចុះបញ្ចូលសមាជិកសភា និងរដ្ឋាភិបាលរបស់លោក ចូ បៃដិន ឱ្យគាំទ្រគម្រោងនេះ ៕ ប្រភព ៖ The standard

ប្រទេសរុស្ស៊ី ៖ វិស័យទេសចរណ៍រវាងប្រទេសចិន និងរុស្ស៊ី បានចាប់ផ្តើមងើបឡើងវិញហើយក្រោយពីស្ថានភាពជំងឺកូវីដ-១៩ បានធូរស្រាល ។ គេសង្កេតឃើញថា មានភ្ញៀវទេសចរចិនជាច្រើននាក់បានមកកម្សាន្តនៅទីកន្លែងទេសចរណ៍ល្បីល្បាញនៅទីក្រុងមូស្គូ ប្រទេសរុស្ស៊ី ។

Izmailovesky ជាផ្សារមួយក្នុងចំណោមផ្សារលក់វត្ថុអនុស្សាវរីយ៍ ដែលទទួលបានការពេញនិយមខ្លាំងបំផុតសម្រាប់ភ្ញៀវទេសចរបរទេស និងពលរដ្ឋរុស្ស៊ីនៅទីក្រុងមូស្គូ ហើយផ្សារនេះមានលក់របស់របរជាច្រើនប្រភេទដូចជា តុក្កតា និងកាដូផ្សេងៗផងដែរ ។ តូបនានាបើកលក់តែថ្ងៃចុងសប្តាហ៍ប៉ុណ្ណោះ ដើម្បីឱ្យអ្នកស្រុកនៅទីនេះអាចលក់របស់របរដើម្បីរកប្រាក់ចំណូលពិសេស ។ ជនជាតិរុស្ស៊ីប្រាប់ថា ពេលមកលេងផ្សារនេះ ភ្ញៀវទេសចរគួរតែយកថង់ទទេមកជាមួយដែរ ហើយពួកគេនឹងបានឃើញទំនិញជាច្រើនមុខ និងអាចតថ្លៃទំនិញបាន ។

Dmitry Knyazev ម្ចាស់តូបលក់វត្ថុអនុស្សាវរីយ៍កំពុងតែត្រៀមរបស់របរក្នុងតូបដើម្បីលក់ឱ្យភ្ញៀវទេសចរចិន និយាយថា គាត់បានបើកបញ្ជីរបស់ Alipay និង WeChat Pay រួចហើយ ដែលវាជាប្រព័ន្ធទូទាត់ប្រាក់តាមទូរស័ព្ទដៃរបស់ចិន ។

អាជីវកររុស្ស៊ីឈ្មោះ Victor បាននិយាយថា ជនជាតិចិនចាប់អារម្មណ៍ពីរឿងវប្បធម៌ ជាពិសេស វប្បធម៌របស់អឺរ៉ុប ហើយភ្ញៀវទេសចរភាគច្រើនចូលចិត្តការងារសិប្បកម្ម និងការគូរគំនូរ ។ ចំណែកអាជីវកររុស្ស៊ីម្នាក់ទៀតឈ្មោះ Olga ប្រាប់ថា ភ្ញៀវទេសចរចិនចូលចិត្តទីក្រុងរបស់រុស្ស៊ី ហើយពួកគេដឹងពីប្រវត្តិសាស្ត្ររុស្ស៊ី ជាពិសេស ប្រវត្តិសាស្ត្ររបស់សហភាពសូវៀតលេនីន និងស្តាលីន ។

គួរបញ្ជាក់ថា ក្រោយពីស្ថានភាពជំងឺកូវីដ-១៩ បានធូរស្រាល ពលរដ្ឋរុស្ស៊ីសង្ឃឹមថា វិស័យទេសចរណ៍ក្នុងប្រទេសរបស់ពួកគេនឹងត្រឡប់មកដូចដើមវិញ ៕ ប្រភព ៖ China face

Open AI គឺជាមន្ទីរពិសោធន៍ស្រាវជ្រាវបញ្ញាសិប្បនិមិត្តរបស់អាម៉េរិកដែលមាននាយកប្រតិបត្តិ(CEO)លោក Sam Altman ហើយបច្ចុប្បន្ន កម្មវិធី ChatGPT កំពុងតែមានភាពល្បីល្បាញខ្លាំងដោយមនុស្សអាចប្រើបច្ចេកវិទ្យា AI ដើម្បីបំពេញមុខងារជាច្រើន។ ទន្ទឹមនឹងទទួលបានការចាប់អារម្មណ៍ពីកម្មវិធីនេះ អ្នកមួយចំនួនក៏ចាប់អារម្មណ៍ទៅលើលោក Sam Altman ដូចគ្នា។

លោក Sam Altman បច្ចុប្បន្នមានវ័យ៣៧ឆ្នាំ មានម្តាយជាគ្រូពេទ្យជំនាញខាងសើស្បែក ហើយបានប្រើកុំព្យូទ័រដំបូងនៅអាយុ៨ឆ្នាំក្នុងគ្រួសារជ្វីហ្វ។ លោកបានសិក្សាផ្នែកវិទ្យាសាស្ត្រកុំព្យូទ័រនៅសាកលវិទ្យាល័យ Stanford ប៉ុន្តែលោក Altman បានសម្រេចចិត្តបោះបង់ការសិក្សារបស់ខ្លួននៅមហាវិទ្យាល័យនៅឆ្នាំ ២០០៥ ក្នុងវ័យ១៩ឆ្នាំ។

ក្នុងឆ្នាំដែល Altman សម្រេចចិត្តចាកចេញពីសាលា តែលោកក៏បានក្លាយជាសហស្ថាបនិក និងក្លាយជានាយកប្រតិបត្តិនៃ Loopt ដែលជាកម្មវិធីទូរស័ព្ទចល័តតាមបណ្តាញទំនាក់ទំនងសង្គមទៅហើយ។ ទោះយ៉ាងណាកម្មវិធីនេះក៏ត្រូវក្ស័យធននៅក្នុងឆ្នាំ២០១២ ដោយសារតែគ្មានភាពទាក់ទាញ។

Altman ត្រូវបានគេដាក់ឈ្មោះថាជាអ្នកវិនិយោគកំពូលដែលមានអាយុក្រោម ៣០ ឆ្នាំដោយទស្សនាវដ្ដី Forbes ក្នុងឆ្នាំ ២០១៥ ជា “សហគ្រិនវ័យក្មេងល្អបំផុតក្នុងបច្ចេកវិទ្យា” ដោយទស្សនាវដ្តី Businessweek ក្នុងឆ្នាំ ២០០៨ ហើយបានចុះបញ្ជីថាជាស្ថាបនិកចាប់ផ្តើមអាជីវកម្មដ៏គួរឱ្យចាប់អារម្មណ៍បំផុតមួយក្នុងចំនោម ៥ នាក់នៅចន្លោះឆ្នាំ ១៩៧៩ និង ២០០៩ ។ នៅខែមីនា ឆ្នាំ ២០១៩ YC បានប្រកាសពីការផ្លាស់ប្តូររបស់ Altman ទៅជាតំណែងប្រធាន ដើម្បីផ្តោតលើ OpenAI ដែលបានបង្កើតដំបូងក្នុងឆ្នាំ២០១៥ ដែលមានមហាសេដ្ឋីជាច្រើនរូបផ្តល់មូលនិធិស្រាវជ្រាវលើបច្ចេកវិទ្យា។ ក្នុងឆ្នាំ ២០១៧ នាយកប្រតិបត្តិរូបនេះបានទទួលសញ្ញាប័ត្របណ្ឌិតកិត្តិយសផ្នែកវិស្វកម្មពីសាកលវិទ្យាល័យ Waterloo ។

មែនទែនទៅ Altman ជាអ្នកហូបអាហារបួសតាំងពីក្មេង ហើយលោកជាមនុស្សស្រលាញ់ភេទដូចគ្នាតាំងពីនៅវ័យជំទង់។ លោកមានទំនាក់ទំនងស្នេហាជាមួយសហស្ថាបនិកក្រុមហ៊ុន Loopt លោក Nick Sivo អស់រយៈពេលប្រាំបួនឆ្នាំ មុនពេលពួកគេបែកបាក់គ្នាភ្លាមៗបន្ទាប់ពីក្រុមហ៊ុនត្រូវបានទិញ។ គិតត្រឹមខែមីនា ឆ្នាំ២០២៣នេះ នាយកប្រតិបត្តិ OpenAI មានទ្រព្យសម្បត្តិផ្ទាល់ខ្លួន ២ពាន់លានដុល្លារ៕