ប្រទេសថៃ ៖ បន្ទាប់ពីមហាជនជជែកវែកញែកក្នុងបណ្តាញសង្គមពីបេក្ខជននាយករដ្ឋមន្ត្រីមកពីគណបក្សជម្រើសថ្មី លោក Mongkolkit Suksintharanon ដាក់ចេញនូវគោលនយោបាយប្លែកៗអនុញ្ញាតឱ្យស្ត្រីថៃអាចមានស្វាមីស្របច្បាប់រហូតដល់៤នាក់ដើម្បីរក្សាសមភាពយេនឌ័រក្នុងប្រទេស លោកក៏បានសន្យាជាមួយពលរដ្ឋថា ប្រសិនបើគណបក្សជម្រើសថ្មីជាប់ឆ្នោតនឹងទាក់ទងមហាសេដ្ឋីអាមេរិក លោក Elon Musk មកធ្វើជាទីប្រឹក្សានាយករដ្ឋមន្ត្រី ។

តាមការចុះផ្សាយរបស់សារព័ត៌មាន Thairath នៅថ្ងៃទី១៤ ខែមករា ឆ្នាំ២០២៦ បេក្ខជននាយករដ្ឋមន្ត្រីមកពីគណបក្សជម្រើសថ្មី លោក Mongkolkit និយាយថា ពលរដ្ឋជ្រាបហើយ លោក Anutin Charnvirakul ប្រធានគណបក្សភូមិចៃថៃ និងលោក Natthaphong Ruengpanyawuth ប្រធានគណបក្សប្រជាជន ធ្វើជានាយករដ្ឋមន្ត្រី ប្រទេសថៃមានសភាពដូចម្តេច ។ ដូចគ្នានេះ បើគណបក្សភឿថៃជាប់ឆ្នោតនឹងដឹកនាំប្រទេសដូចមុន ប៉ុន្តែបើគណបក្សជម្រើសថ្មីជាប់ឆ្នោតដឹកនាំរដ្ឋាភិបាល គឺប្រទេសថៃនឹងមិនដូចមុនទេ ។

បេក្ខជននាយករដ្ឋមន្ត្រីមកពីគណបក្សជម្រើសថ្មីរូបនេះបញ្ជាក់ថា ប្រទេសថៃនឹងមិនដូចមុនដាច់ខាត គឺគណបក្សរបស់លោកនឹងរៀបចំផែនការរយៈពេល១៥ឆ្នាំ ដើម្បីផលិតយានអវកាសសម្រាប់ឱ្យពលរដ្ឋជិះទៅលេងតាមភពផ្សេងៗ ដូចជា ៖ ឋានព្រះច័ន្ទ ភពអង្គារ និងភពពុធ ប៉ុន្តែការទៅលេងលើអវកាសក្បែរផែនដី គឺពលរដ្ឋនឹងបានទៅលេងនាពេលឆាប់ៗមិនខាន ។

បន្ទាប់មក គណបក្សជម្រើសថ្មីនឹងទាក់ទងមហាសេដ្ឋីអាមេរិក លោក Elon Musk ដែលជាប្រធានក្រុមហ៊ុន SpaceX មកធ្វើជាទីប្រឹក្សានាយករដ្ឋមន្ត្រីឈ្មោះ Mongkolkit Suksintharanon ក្រោយបញ្ចប់ការបោះឆ្នោតនៅថ្ងៃទី៨ ខែកុម្ភៈ ឆ្នាំ២០២៦ ។ លោកនឹងទូរស័ព្ទទៅលោក Elon Musk ភ្លាមៗពេលរាប់សន្លឹកឆ្នោតរួចរាល់ បើមានឱកាសកាន់តំណែងជានាយករដ្ឋមន្ត្រី ។

ក្រៅពីនេះ នឹងកំណត់គោលនយោបាយកងទ័ពអវកាសដោយត្រៀមការហ្វឹកហាត់ ព្រមទាំងប្រកាសជ្រើសរើសពលរដ្ឋចំនួន៣,០០០នាក់ មកបំពេញមុខតំណែងជាច្រើនលើអវកាស ដូចជា ៖ អវកាសយានិក ជាងបច្ចេកទេស គ្រូពេទ្យ វិស្វករ និងភ្នាក់ងារសន្តិសុខអវកាស ក៏ដូចជាជ្រើសរើសសមត្ថកិច្ចអវកាសផងដែរ ដើម្បីចាប់ខ្លួនជនល្មើសដែលប្រព្រឹត្តខុសលើអវកាស ។

គោលនយោបាយគណបក្សបានទាក់ទាញចំណាប់អារម្មណ៍យ៉ាងខ្លាំងក្នុងបណ្តាញសង្គម ដោយមហាជនជជែកវែកញែកថា គួរឱ្យអស់សំណើចណាស់ ដែលគណបក្សដាក់ចេញនូវគោលនយោបាយបែបនេះ បើជាប់ឆ្នោតមែន រដ្ឋាភិបាលនឹងគ្មានធ្វើអ្វី ក្រៅពីនាំពលរដ្ឋទៅលេងអវកាស ។ តើគណបក្សបានថវិកាពីណា គណបក្សនេះមិនផ្តោតលើការបោះឆ្នោតទេ គ្រាន់តែឱ្យគេចាប់អារម្មណ៍ ពីព្រោះប្រកាសជ្រើសរើសសន្តិសុខអវកាសទៅយាមចំណតយានអវកាស ។

គួរបញ្ជាក់ថា ក្រៅពីមហាជនចាប់អារម្មណ៍គណបក្សនេះជាប់ឆ្នោតនឹងទាក់ទងមហាសេដ្ឋីអាមេរិក លោក Elon Musk មកធ្វើទីប្រឹក្សានាយករដ្ឋមន្ត្រី មហាជនក៏អស់សំណើចផងដែរពីគណបក្សដាក់ចេញនូវគោលនយោបាយប្លែកៗអនុញ្ញាតឱ្យស្ត្រីថៃអាចមានស្វាមីស្របច្បាប់រហូតដល់៤នាក់ដើម្បីរក្សាសមភាពយេនឌ័រក្នុងប្រទេស ដែលផ្ទុយនឹងវប្បធម៌ប្រពៃណីថៃ ៕

ប្រទេសកូរ៉េខាងជើង ៖ ប្អូនស្រីរបស់លោក Kim Jong Un មេដឹកនាំកូរ៉េខាងជើង អ្នកស្រី Kim Yo Jong បាននិយាយកាលពីថ្ងៃទី១៣ ខែមករា ឆ្នាំ២០២៦ ថា ក្តីសង្ឃឹមរបស់កូរ៉េខាងត្បូងចង់ភ្ជាប់ទំនាក់ទំនងល្អឡើងវិញជាមួយកូរ៉េខាងជើង គឺគ្រាន់តែជាការបំភ័ន្តភ្នែកប៉ុណ្ណោះ វាមិនអាចក្លាយជាការពិតឡើយ ។ នេះបើតាមការចុះផ្សាយរបស់សារព័ត៌មាន KCNA ។

កាលពីថ្ងៃទី១៣ ខែមករា អ្នកស្រី Kim Yo Jong ប្អូនស្រីរបស់មេដឹកនាំដ៏មានឥទ្ធិពលកូរ៉េខាងជើង ដែលបច្ចុប្បន្ន កាន់តំណែងជាអនុប្រធានគណៈកម្មការកណ្តាលនៃគណបក្សការងារ បានរិះគន់ការលើកឡើងរបស់មន្ត្រីរដ្ឋាភិបាលកូរ៉េខាងត្បូង ថារដ្ឋាភិបាលក្រុងសេអ៊ូលសម្លឹងឃើញឱកាសចរចាជាមួយរដ្ឋាភិបាលក្រុងព្យុងយ៉ាងម្តងទៀត បន្ទាប់ពីអ្នកស្រីប្រតិកម្មជាមួយកូរ៉េខាងត្បូងបង្ហោះដ្រូនល្មើសដែនអាកាសកូរ៉េខាងជើង ។ អ្នកស្រីថា ៖ «ក្តីសង្ឃឹមរបស់កូរ៉េខាងត្បូងចង់ភ្ជាប់ទំនាក់ទំនងល្អជាមួយកូរ៉េខាងជើងនោះ មិនអាចក្លាយជាការពិតឡើយ» ។

មន្ត្រីក្រសួងបង្រួបបង្រួមជាតិរបស់កូរ៉េខាងត្បូងដែលបំពេញការងារពាក់ព័ន្ធនឹងទំនាក់ទំនងជាមួយកូរ៉េខាងជើង បាននិយាយមកកាន់អ្នកសារព័ត៌មានថា អ្នកស្រី Kim Yo Jong បានអំពាវនាវឱ្យរដ្ឋាភិបាលក្រុងសេអ៊ូលស៊ើបអង្កេតការបង្ហោះដ្រូនរំលោ.ភដែនអាកាសកូរ៉េខាងជើង ហើយកាលពីថ្ងៃទី១៣ ខែមករា អ្នកស្រីថា កូរ៉េខាងត្បូងធ្វើសកម្មភាពញុះញង់យ៉ាងខ្លាំង និងបំពានអធិបតេយ្យកូរ៉េខាងជើង ។

អ្នកស្រីបានបញ្ជាក់ជាថ្មីពីគោលជំហរមិនភ្ជាប់ទំនាក់ទំនងល្អជាមួយកូរ៉េខាងត្បូងដែលជាសត្រូវនោះឡើយ ព្រមទាំងអំពាវនាវឱ្យរដ្ឋាភិបាលកូរ៉េខាងត្បូងសូមទោស និងសន្យាឈប់បង្ហោះដ្រូនរំលោ.ភដែនអាកាសកូរ៉េខាងជើងម្តងទៀត ។

គួរបញ្ជាក់ថា រដ្ឋាភិបាលកូរ៉េខាងត្បូងរបស់លោកប្រធានាធិបតី Lee Jae Myung ព្យាយាមកែលម្អទំនាក់ទំនងជាមួយរដ្ឋាភិបាលក្រុងព្យុងយ៉ាងឡើងវិញ ប៉ុន្តែរហូតមកដល់ឆ្នាំ២០២៦នេះ ការព្យាយាមរបស់កូរ៉េខាងត្បូងត្រូវបានកូរ៉េខាងជើងបដិសេធ ។

កូរ៉េខាងជើងបានចាត់ទុកកូរ៉េខាងត្បូងជាសត្រូវសួពូជដោយសារបង្ហោះដ្រូនស៊ើបការណ៍ចូលដែនអាកាសរបស់ខ្លួនកាលពីថ្ងៃទី៤ ខែមករា ។ កូរ៉េខាងជើងចាត់ទុកសកម្មភាពនេះជាការបង្កភាពតានតឹង និងបង្កើតស្ថានការណ៍ ដោយទាមទារឱ្យមានការបកស្រាយលម្អិតពីកូរ៉ខាងត្បូង ។

បើតាមអ្នកនាំពាក្យយោធាកូរ៉េខាងជើង ដ្រូននេះទំនងហោះពីកោះមួយនៅទីក្រុងអ៊ីនឈុន ប្រទេសកូរ៉េខាងត្បូង បន្ទាប់ពីហោះបានចម្ងាយ៨គីឡូម៉ែត្រ ក៏ត្រូវយោធាកូរ៉េខាងជើងបាញ់ទម្លាក់ក្នុងដែនអាកាសកូរ៉េខាងជើង ។ ដ្រូននេះបំពាក់ដោយកាមេរ៉ាឃ្លាំមើលដើម្បីថតទីតាំងសំខាន់ៗរបស់កូរ៉េខាងជើង វាធ្វើឱ្យកូរ៉េខាងជើងខកចិត្តពីការញុះញង់របស់កូរ៉េខាងត្បូង ទោះជាផ្លាស់ប្តូរមេដឹកនាំក៏ដោយ ។

ទោះយ៉ាងណា យោធាកូរ៉េខាងត្បូងបដិសេធមិនបានបង្ហោះដ្រូនទៅក្បែរព្រំដែនកូរ៉េខាងជើងដូចការចោទប្រកាន់ទេ ហើយកូរ៉េខាងត្បូងនឹងស៊ើបអង្កេតយ៉ាងលម្អិតលើបញ្ហាដ្រូនដែលបង្កឱ្យមានការភ័ន្តច្រឡំ ។ កូរ៉េខាងត្បូងគ្មានបំណងញុះញង់កូរ៉េខាងជើងទេ ដោយបន្តចាត់វិធានការជាក់ស្តែងដើម្បីកាត់បន្ថយស្ថានការណ៍តានតឹង និងកសាងទំនុកចិត្តរវាងប្រទេសទាំងពីរជាថ្មី ៕

ខេត្តនគររាជសីមា ៖ យ៉ាងហោចណាស់មនុស្សចំនួន ២២នាក់បានស្លា.ប់ និងជាងរាប់សិបនាក់ផ្សេងទៀតរងរបួស បន្ទាប់ពីដងស្ទូចដែលប្រើក្នុងការសាងសង់ស្ពានរថភ្លើងល្បឿនលឿនលើអាកាស បានបាក់ធ្លាក់ទៅលើរថភ្លើងដែលកំពុងដឹកអ្នកដំណើរ បណ្តាលឱ្យរេធ្លាក់ផ្លូវ និងឆេះ។ នេះបើតាមការចេញផ្សាយរបស់កាសែត Khaosod នាព្រឹកថ្ងៃទី ១៤ ខែមករា ឆ្នាំ ២០២៦។

បើតាមអាជ្ញាធរក្នុងតំបន់ គ្រោះថ្នាក់នេះបានកើតឡើងនៅម៉ោងប្រហែល ០៩:០៥ នៅ Ban Thanon Khot ស្រុក Sikhio ខេត្តនគររាជសីមា ប្រទេសថៃ នៅពេលដែលស្ទូចដ៏ធំមួយបានធ្លាក់ទៅលើផ្លូវរថភ្លើង នៅខណៈដែលរថភ្លើងកំពុងដឹកអ្នកដំណើរពីទីក្រុងបាងកក ឆ្នពោះទៅ Ubon Ratchathani ហើយឆ្លងកាត់តំបន់នោះ។

គិតត្រឹមម៉ោង ១១ព្រឹកនេះ ក្រុមជួយសង្គ្រោះបានរកឃើញសា.កសពយ៉ាងហោចណាស់ ២២នាក់ហើយ ពីគំនរបា.ក់បែកនៃរថភ្លើងនៅកន្លែងកើតហេតុ ខណៈអ្នកដំណើរជាង ៤០ នាក់ផ្សេងទៀតនៅមានជីវិតបានរងរបួសជាទម្ងន់។

ជាមួយគ្នានេះ ក្រុមសង្រ្គោះបន្ទាន់មកពីការិយាល័យជួយសង្គ្រោះជាច្រើនផ្នែក បានប្រញាប់ប្រញាល់ទៅកាន់កន្លែងកើតហេតុ ដោយប្រើឧបករណ៍អារកាត់ និងគាស់កាយកម្ទេចកម្ទីរដែកដែលបានបា.ក់គ្របសង្កត់លើទូររថភ្លើង ដើម្បីជួយសង្គ្រោះអ្នកដំណើរដែលនៅជាប់គាំង។

យ៉ាងណាមិញ បច្ចុប្បន្នអាជ្ញាធរថៃកំពុងបើកការស៊ើបអង្កេតមូលហេតុនៃការដួលរលំនេះ ខណៈចំនួនអ្នកបាត់បង់ជីវិត និងរងរបួសត្រូវបានគេរំពឹងថា អាចមានការកើនើងបន្ថែមទៀត ដោយសារប្រតិបត្តិការជួយសង្រ្គោះកំពុងបន្តនៅឡើយ៕

បាងកក ៖ បេក្ខជននាយករដ្ឋមន្ត្រីថៃម្នាក់ កំពុងបង្កឱ្យមានការជជែកវែកញែកយ៉ាងទូលំទូលាយ បន្ទាប់ពីបានស្នើដាក់ចេញនូវគោលនយោបាយមួយ ដែលអនុញ្ញាតឱ្យស្ត្រីថៃអាចមានស្វាមីរហូតដល់បួននាក់ ដោយស្របច្បាប់ ដើម្បីរក្សាសមភាពយេនឌ័រនៅក្នុងប្រទេស។ នេះបើតាមការចុះផ្សាយដោយកាសែត Khaosod។

លោក Mongkolkit Suksintharanont បេក្ខជននាយករដ្ឋមន្ត្រីមកពីគណបក្សជម្រើសថៃ បាននិយាយនៅក្នុងការបង្ហោះលើប្រព័ន្ធផ្សព្វផ្សាយកាលពីថ្មីៗនេះថា “ទាក់ទងនឹងសមភាពយេនឌ័រ ឬភាពមានសិទ្ធិស្មើគ្នា ស្ត្រីគួរតែត្រូវបានអនុញ្ញាតឱ្យមានស្វាមីមិនលើសពីបួននាក់ ប្រសិនបើភាគីទាំងអស់ព្រមនទទួលយកគ្នាទៅវិញទៅមក”។

សំណើនេះបានទាក់ទាញចំណាប់អារម្មណ៍យ៉ាងឆាប់រហ័សតាមអ៊ីនធឺណិត ដោយអ្នកប្រើប្រាស់កំពុងជជែកវែកញែកថាតើវាឆ្លុះបញ្ចាំងពីការគិតបែបជឿនលឿន, ជាគោលនយោបាយលេងសើច ឬការប៉ុនប៉ងដោយចេតនាដើម្បីញុះញង់ឲ្យមានការពិភាក្សា។

តាមការកត់សម្គាល់របស់សាធារណជននៅក្នុងប្រទេសថៃ នេះមិនមែនទើបលើកទី១ឡើយ ដែលលោក Mongkolkit ដាក់ចេញគោលនយោបាយប្លែកខុសគេឯងបែបនេះ។ កន្លងមក បេក្ខភាពនាយករដ្ឋមន្រ្តីថៃរូបនេះ ធ្លាប់ស្នើឲ្យបង្កើត «កងកម្លាំងអវកាស» សម្រាប់ប្រទេសថៃ, ផ្តល់ការលើកទឹកចិត្តជាសាច់ប្រាក់ដល់ស្ត្រីដែលមានផ្ទៃពោះដើម្បីដោះស្រាយបញ្ហាអត្រាកំណើតធ្លាក់ចុះ, ការកំណត់ឲ្យពលរដ្ឋក្នុងវ័យធ្វើការ ត្រូវហាត់ប្រាណប្រចាំថ្ងៃជាថ្នូរនឹងការឡើងប្រាក់បៀវត្សរ៍ និងការពង្រឹងវិស័យយោធា រួមទាំងលទ្ធភាពនៃការទិញយកអាវុធនុយក្លេអ៊ែរជាដើម។

ទោះជាយ៉ាងណាក៏ដោយ អ្នករិះគន់បានច្រានចោលគំនិតនេះដោយអះអាងថា វាជារឿងមិនសមរម្យផ្នែកវប្បធម៌ ដោយព្រមានថាវាអាចមានជម្លោះជាមួយក្របខ័ណ្ឌច្បាប់ និងតម្លៃស្ដ្រីនៅក្នុងសង្គមរបស់ប្រទេសថៃ។

សរុបមកសំណើនេះមិនទាន់ត្រូវបានអនុម័តជាច្បាប់នៅឡើយទេ ប៉ុន្តែវាទទួលបានជោគជ័យក្នុងការទាក់ទាញការចាប់អារម្មណ៍ទៅលើការពិភាក្សាកាន់តែទូលំទូលាយអំពីសមភាពយេនឌ័រ សិទ្ធិអាពាហ៍ពិពាហ៍ និងកំណែទម្រង់ច្បាប់នៅក្នុងប្រទេសថៃ ខណៈអ្នកមួយចំនួនក៏បានបង្ហាញការគាំទ្រចំពោះគោលនយោបាយនេះផងដែរ៕

ប្រធានាធិបតីអាមេរិក លោក Donald Trump បាននិយាយកាលពីថ្ងៃទី១៣ ខែមករា ឆ្នាំ២០២៦ ជំរុញឱ្យពលរដ្ឋអ៊ីរ៉ង់បន្តបាតុកម្ម និងចងចាំឈ្មោះជនដែលប្រព្រឹត្តទង្វើអាក្រក់ដាក់ពួកគេ ព្រមទាំងសន្យាលូកដៃរឿងបាតុកម្ម ។ ការប្រកាសលូកដៃរបស់ប្រធានាធិបតីអាមេរិក បន្ទាប់ពីស្ថាប័នគ្រប់គ្រងសាសនាអ៊ីរ៉ង់បង្ក្រាបបាតុករយ៉ាងធ្ងន់ធ្ងរជាងពេលណាៗទាំងអស់ ដែលបណ្តាលឱ្យបាតុករស្លា.ប់រហូតដល់ជាង២,០០០នាក់ ត្រឹមរយៈពេលជាង២សប្តាហ៍ ។

លោកប្រធានាធិបតី Trump បានបង្ហោះសារក្នុងបណ្តាញសង្គមថា ពលរដ្ឋអ៊ីរ៉ង់ដែលស្រឡាញ់ជាតិត្រូវតែបន្តបាតុកម្មកាន់កាប់ស្ថាប័ននានារបស់ខ្លួន អាមេរិកនឹងលូកដៃរឿងបាតុកម្ម ប៉ុន្តែលោកមិនបានបញ្ជាក់ថា ការលូកដៃនេះធ្វើឡើងតាមវិធីណាទេ ។ លោកលុបចោលការប្រជុំទាំងអស់ជាមួយមន្ត្រីអ៊ីរ៉ង់ រហូតដល់ពួកគេឈប់បង្ក្រាបបាតុករដោយគ្មានមូលហេតុ បន្ទាប់មក លោកប្រាប់ពលរដ្ឋអ៊ីរ៉ង់ថា ឱ្យចងចាំឈ្មោះជនល្មើសសម្លាប់បាតុករ ពីព្រោះជនល្មើសត្រូវតែសងសំណងយ៉ាងច្រើន ។

កាលពីថ្ងៃទី១២ ខែមករា លោកប្រធានាធិបតី Trump បានប្រកាសយកពន្ធទំនិញស្មើ២៥% របស់ប្រទេសណាដែលធ្វើពាណិជ្ជកម្មជាមួយអ៊ីរ៉ង់ និងប្រទេសនាំចេញប្រេងឥន្ធនៈ ហើយលោកថា ការបង្កើនប្រតិបត្តិការកងទ័ពជាជម្រើសមួយក្នុងចំណោមជម្រើសជាច្រើនដែលអាមេរិកកំពុងពិចារណាដាក់ទណ្ឌកម្មអ៊ីរ៉ង់ ដើម្បីប្រឆាំងរដ្ឋាភិបាលអ៊ីរ៉ង់បង្ក្រាបបាតុករយ៉ាងធ្ងន់ធ្ងរ ។

រដ្ឋាភិបាលអ៊ីរ៉ង់បានកាត់ផ្តាច់បណ្តាញទំនាក់ទំនងនានា រួមទាំងអ៊ីនធើរណេតដើម្បីរារាំងការចែកចាយព័ត៌មាន ខណៈអង្គការសហប្រជាជាតិថា អាចប្រើប្រាស់ទូរស័ព្ទនៅអ៊ីរ៉ង់បានវិញហើយ ប៉ុន្តែអ៊ីនធើរណេតនៅតែមានបញ្ហា ។ មហាសេដ្ឋីម្ចាស់ក្រុមហ៊ុន SpaceX លោក Elon Musk គ្រោងផ្តល់សេវាអ៊ីនធើរណេតផ្កាយរណប Starlink មិនគិតថ្លៃឱ្យពលរដ្ឋអ៊ីរ៉ង់ប្រើប្រាស់ បន្ទាប់ពីលោកប្រធានាធិបតី Trump និយាយកាលពីថ្ងៃទី១១ ខែមករា ចង់ជជែកជាមួយលោកពាក់ព័ន្ធនឹងការផ្តល់សេវាអ៊ីនធើរណេតនៅអ៊ីរ៉ង់ឡើងវិញ ។

បាតុកម្មទ្រង់ទ្រាយធំនៅទូទាំងប្រទេសអ៊ីរ៉ង់ គឺបណ្តាលមកពីពលរដ្ឋខឹងសម្បារនឹងសេដ្ឋកិច្ចកាន់តែអាក្រក់ ដែលក្លាយជាបញ្ហាប្រឈមយ៉ាងខ្លាំងសម្រាប់មេដឹកនាំអ៊ីរ៉ង់ លោក Ayatollah Ali Khamenei ។ បាតុកម្មកើតឡើងស្របពេលទីក្រុងតេហេរ៉ង់រកការដាក់សម្ពាធពីសហគមន៍អន្តរជាតិ បន្ទាប់មក ក៏រងសម្ពាធពីអ៊ីស្រាអែល និងអាមេរិក កាលពីឆ្នាំ២០២៥ ។

នេះជាលើកដំបូងដែលបាតុករស្លាប់ដោយសារការបង្ក្រាបកើនឡើងដល់ជាង២,០០០នាក់ បន្ទាប់ពីពួកគេប្រមូលគ្នាតវ៉ានៅទូទាំងប្រទេសប្រឆាំងរដ្ឋាភិបាលអ៊ីរ៉ង់អស់រយៈពេលជាង២សប្តាហ៍ ។ អង្គការសិទ្ធិមនុស្សអាមេរិក (HRANA) រាយការណ៍ថា បាតុករបានស្លាប់ចំនួន២,០០៣នាក់ និងមានបាតុករចំនួន១៦,៧៨៤នាក់ទៀតត្រូវចាប់ខ្លួន ។

ចំណែករដ្ឋាភិបាលអ៊ីរ៉ង់មិនទាន់ប្រតិកម្មនឹងការយកពន្ធទំនិញរបស់អាមេរិកទេ ប៉ុន្តែចិនបានរិះគន់ការយកពន្ធនេះយ៉ាងខ្លាំង ដោយសារអ៊ីរ៉ង់កំពុងស្ថិតក្រោមការដាក់ទណ្ឌកម្មយ៉ាងធ្ងន់ធ្ងរពីអាមេរិករួចទៅហើយ ដោយសារអ៊ីរ៉ង់នាំចេញប្រេងទៅចិន តួកគី អ៊ីរ៉ាក់ អេមីរ៉ាតអារ៉ាប់រួម និងឥណ្ឌា ។

គួរបញ្ជាក់ថា ពលរដ្ឋអ៊ីរ៉ង់ចាប់ផ្តើមធ្វើបាតុកម្មតាំងពីថ្ងៃទី២៨ ខែធ្នូ ឆ្នាំ២០២៥ ដើម្បីប្រឆាំងនឹងតម្លៃប្រាក់អ៊ីរ៉ង់ធ្លាក់ចុះ ហើយបាតុកម្មក៏រាលដាលកាន់តែខ្លាំងឈានដល់ការផ្តួលរំលំស្ថាប័នគ្រប់គ្រងសាសនា ខណៈមន្ត្រីអ៊ីរ៉ង់បានចាត់វិធានការគាបសង្កត់បាតុករដែលតវ៉ាប្រឆាំងនឹងវិបត្តិសេដ្ឋកិច្ច ៕

ប្រទេសថៃ ៖ តាមការចុះផ្សាយរបស់សារព័ត៌មាន Naewna News នៅថ្ងៃទី១៣ ខែមករា ឆ្នាំ២០២៦ ថៃត្រៀមពង្រាយសមត្ថកិច្ចរហូតដល់១២ម៉ឺន ៦ពាន់នាក់ នៅខេត្តចំនួន៧ ជាប់ព្រំដែនកម្ពុជា រួមមាន ៖ បុរីរាំ សុរិន្ទ ស៊ីសាកេត ឧប៊ុនរ៉ាជថានី ចន្ទបុរី ស្រះកែវ និងត្រាត ព្រមទាំងខេត្តចំនួន៣ ជាប់ម៉ាឡេស៊ី នាថ្ងៃបោះឆ្នោតថ្ងៃទី៨ ខែកុម្ភៈ ក្រោមហេតុផលការពារសុវត្ថិភាព រីឯខេត្តផ្សេងទៀតគ្មានការពង្រាយសមត្ថកិច្ចទេ ។

នៅថ្ងៃទី១៣ ខែមករា អគ្គស្នងការរងនគរបាលជាតិថៃ លោក សាំរ៉ាន ណួនម៉ា បានលើកឡើងពីការបើកមជ្ឈមណ្ឌលសន្តិសុខ និងសណ្តាប់ធ្នាប់ការបោះឆ្នោត ដែលមជ្ឈមណ្ឌលដំណើរការចាប់ពីថ្ងៃទី១៣ ខែមករា ដល់ថ្ងៃទី១២ ខែកុម្ភៈ ថា មជ្ឈមណ្ឌលនឹងសហការជាមួយគណៈកម្មការរៀបចំការបោះឆ្នោត និងកងទ័ព ដើម្បីរក្សាសណ្តាប់ធ្នាប់ការិយាល័យបោះឆ្នោត ជាង៩ម៉ឺនកន្លែងនៅទូទាំងប្រទេសថៃ ។ មជ្ឈមណ្ឌលត្រូវការកម្លាំងសមត្ថកិច្ច ចំនួន១២ម៉ឺន ៦ពាន់នាក់ ដើម្បីជួយការពារសុវត្ថិភាពក្នុងថ្ងៃបោះឆ្នោត ហើយការិយាល័យបោះឆ្នោតមួយចំនួនត្រូវការសមត្ថកិច្ចល្បាតព្រំដែនផងដែរ ។

កិច្ចប្រជុំពាក់ព័ន្ធនឹងការពង្រាយសមត្ថកិច្ចនាថ្ងៃបោះឆ្នោតខាងមុខ គឺផ្តោតសំខាន់លើការពង្រាយសមត្ថកិច្ចនៅខេត្តចំនួន៧ ជាប់ព្រំដែនកម្ពុជា រួមមាន ៖ បុរីរាំ សុរិន្ទ ស៊ីសាកេត ឧប៊ុនរ៉ាជថានី ចន្ទបុរី ស្រះកែវ និងត្រាត ហើយកិច្ចប្រជុំបានពិភាក្សាពីស្ថានការណ៍អាក្រក់អាចកើតឡើង ។ ប្រសិនបើមានការប៉ះទង្គិចនៅព្រំដែនកម្ពុជា-ថៃនាថ្ងៃបោះឆ្នោត ថៃនឹងបញ្ជូនរថក្រោះ ព្រមទាំងជម្លៀសពលរដ្ឋចេញភ្លាមៗ ។

ក្រៅពីនេះ កម្លាំងសមត្ថកិច្ចនឹងដាក់ង្រាយក្នុងខេត្តចំនួន៣ នៅភាគខាងត្បូងផងដែរ បើមានហេតុការណ៍អាក្រក់កើតឡើង នឹងមានការទាក់ទងជាមួយគណៈកម្មការរៀបចំការបោះឆ្នោត ដើម្បីផ្លាស់ប្តូរទីតាំងការិយាល័យបោះឆ្នោត ឬបិទការិយាល័យបោះឆ្នោតមួយចំនួនក្នុងតំបន់ប្រឈម ដែលនេះងាយស្រួលដល់ការថែរក្សាសុវត្ថិភាព ។ សមត្ថកិច្ចល្បាតព្រំដែននឹងសហការជាមួយកងទ័ព បើមានអ្វីកើតឡើង រួមទាំងផ្លាស់ប្តូរពេលវេលាបោះឆ្នោត ក៏ដូចជាត្រួតពិនិត្យការបំផ្លាញស្លាកសញ្ញាឃោសនាបោះឆ្នោត ។

ចំណែកនៅបណ្តាខេត្តផ្សេងទៀត ក្រៅពីខេត្តជាប់ព្រំដែនកម្ពុជានិងម៉ាឡេស៊ី លោក សាំរ៉ាន ណួនម៉ា អគ្គស្នងការរងនគរបាលជាតិបានបញ្ជាឱ្យសមត្ថកិច្ចខេត្តនីមួយៗវាយតម្លៃហានិភ័យ និងរាយការណ៍ពីហេតុការណ៍បន្ទាន់ដើម្បីពិចារណាបញ្ជូនកម្លាំងសមត្ថកិច្ចទៅការពារ ។

ដោយឡែក សមាជិកសភាគណបក្សប្រជាជនបង្ហាញក្តីបារម្ភពីការដកប្រាក់ជាង១៦ម៉ឺនលានបាត (ស្មើជាង៥លានដុល្លារ) ទៅប្រើប្រាស់ក្នុងការទិញសន្លឹកឆ្នោតនោះ លោក សាំរ៉ាន ណួនម៉ា និយាយថា សមត្ថកិច្ចកំពុងតែស៊ើបអង្កេតករណីនេះ ប៉ុន្តែមិនទាន់មានពលរដ្ឋដាក់ពាក្យប្តឹងពីការទិញសន្លឹកឆ្នោតទេ ៕