ប្រទេសថៃ ៖ បន្ទាប់ពីសារព័ត៌មាននានាចុះផ្សាយពីលោកនាយករដ្ឋមន្ត្រីថៃ Anutin Charnvirakul ត្រៀមរំលាយសភានៅថ្ងៃទី១២ ខែធ្នូ ឆ្នាំ២០២៥ បើគណបក្សប្រជាជនពុំអាចរង់ចាំបាន ដោយសារនឿយហត់នឹងការដឹកនាំប្រទេសមានបញ្ហាស្មុគស្មាញច្រើនដោះស្រាយមិនចេញ ដើម្បីប្រគល់អំណាចឱ្យពលរដ្ឋបោះឆ្និតជ្រើសរើសនាយករដ្ឋមន្ត្រីថ្មីនោះ កាលពីថ្ងៃទី១ ខែធ្នូ នាយករដ្ឋមន្ត្រីថៃថា ការរំលាយសភានឹងធ្វើឡើងតាមពេលកំណត់នៅថ្ងៃទី៣១ ខែមករា ឆ្នាំ២០២៦ ។ លោកសុំកាន់តំណែងបន្ត និងរីករាយដែលពលរដ្ឋភាគខាងត្បូងគាំទ្រលោកច្រើនឱ្យបន្តតំណែង ទោះជាសង្គមថៃថា លោកគ្មានសមត្ថភាពក្តី ។

កាលពីថ្ងៃទី១ ខែធ្នូ ឆ្នាំ២០២៥ នៅវិមានរដ្ឋាភិបាល លោក Anutin Charnvirakul នាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ បានផ្តល់សម្ភាសន៍ជាមួយសារព័ត៌មានពីគម្រោងរំលាយសភានៅថ្ងៃទី១២ ខែធ្នូ ថា ការរំលាយសភាអាស្រ័យលើស្ថានការណ៍នយោបាយ និងធ្វើឡើងតាមពេលកំណត់ គឺនៅថ្ងៃទី៣១ ខែមករា ឆ្នាំ២០២៦ ។ រដ្ឋាភិបាលពុំទាន់ជជែកជាមួយគណបក្សនយោបាយណាមួយពីការរំលាយសភាទេ រដ្ឋាភិបាលដឹកនាំប្រទេសតាមការកំណត់របស់ខ្លួន និងរក្សាពាក្យសន្យា ។ បន្ទាប់គណបក្សភូមិចៃថៃដឹកនាំរដ្ឋាភិបាល យើងបានធ្វើតាមលក្ខខណ្ឌរបស់គណបក្សប្រជាជន ពេលនេះ ការរំលាយសភាអាស្រ័យលើរដ្ឋាភិបាល ។

លោក Anutiin បញ្ជាក់ថា រដ្ឋាភិបាលបានប្រកាសរួចហើយ ការរំលាយសភានឹងធ្វើឡើងនៅថ្ងៃទី៣១ ខែមករា ឆ្នាំ២០២៦ ពីព្រោះបច្ចុប្បន្ន ប្រទេសថៃរងផលប៉ះពាល់ដោយសារទឹកជំនន់ និងចង់ឱ្យគ្រប់គ្នាជួយពលរដ្ឋរងគ្រោះឱ្យត្រឡប់មករស់នៅផ្ទះ និងស្តារសេដ្ឋកិច្ចថៃឡើងវិញ ។ ប្រសិនបើឆាប់រំលាយសភា រដ្ឋាភិបាលនឹងពិបាកជួយពលរដ្ឋរងផលប៉ះពាល់ ប៉ុន្តែបើចាំបាច់ ឬគ្មានជម្រើស ត្រូវតែត្រៀមរំលាយសភា ។

ទោះជាសង្គមថៃរិះគន់នាយករដ្ឋមន្ត្រីគ្មានសមត្ថភាពដឹកនាំប្រទេស ជាពិសេស ជួយជម្លៀសពលរដ្ឋភាគខាងត្បូងចេញពីតំបន់ទឹកជំនន់យឺតយ៉ាវ ប៉ុន្តែលោកមិនខឹងសម្បារនឹងការរិះគន់ទេ ពីព្រោះលោក និងគណៈរដ្ឋមន្ត្រីយល់ពីសុខទុក្ខពលរដ្ឋ ត្រូវជួយថែទាំ និងសង្គ្រោះពលរដ្ឋ ។ អ្នករិះគន់អាចតាមដានព័ត៌មានមិនត្រឹមត្រូវ ខណៈមន្ត្រីរដ្ឋាភិបាលព្យាយាមចុះពិនិត្យមើលទឹកជំនន់នៅតំបន់ដែលមានកម្ពស់ទឹកស្មើដើមទ្រូងដើម្បីដឹងពីទុក្ខវេទនារបស់ពលរដ្ឋ គ្រប់គ្នាមានសិទ្ធិរិះគន់រដ្ឋាភិបាល ។

រដ្ឋាភិបាលបានជួយសង្គ្រោះពលរដ្ឋតាមវិធីគ្រប់យ៉ាង និងកំណត់វិធានការផ្សេងៗដើម្បីកាត់បន្ថយផលប៉ះពាល់ដោយសារទឹកជំនន់ ។ លោក Anutin រីករាយដែលពលរដ្ឋភាគខាងត្បូងគាំទ្រលោកច្រើនឱ្យបន្តតំណែង គឺសំឡេងគាំទ្រស្មើ១៥% ខណៈអតីតនាយករដ្ឋមន្ត្រីថៃ លោក Abhisit Vejjajiva បច្ចុប្បន្នជាប្រធានគណបក្សប្រាឆាធិប៉ាត់ ទទួលបានសំឡេងគាំទ្រ២៥% ។ លោកថា ការចុះពិនិត្យស្ថានការណ៍ទឹកជំនន់ជាបន្តបន្ទាប់នៅស្រុកហាតយៃ ខេត្តសុងក្លា មិនមែនជាការរកសំឡេងគាំទ្រពីពលរដ្ឋទេ គឺជាការជួយសង្គ្រោះពលរដ្ឋ ។

គួរបញ្ជាក់ថា លោក Anutin បានប្រកាសកន្លងមកថា ត្រៀមខ្លួនរំលាយសភានៅថ្ងៃទី១២ ខែធ្នូ ខាងមុខ ប្រសិនបើគណបក្សប្រជាជនពុំអាចរង់ចាំបាន ដើម្បីប្រគល់អំណាចឱ្យពលរដ្ឋបោះឆ្នោតជ្រើសរើសនាយករដ្ឋមន្ត្រីថ្មី ដោយសាររដ្ឋាភិបាលរបស់លោកមានសំឡេងគាំទ្រតិច ។ ការប្រកាសរំលាយសភារបស់លោក Anutin មុនពេលកំណត់ធ្វើឱ្យសង្គមថៃយល់ថា លោកអាចនឿយហត់ខ្លាំងនឹងការងារដឹកនាំប្រទេសស្មុគស្មាញច្រើន ខណៈមន្ត្រីគណបក្សប្រជាជនចាត់ទុកការរំលាយសភាមុនពេលកំណត់ ដោយសារលោក Anutin ចង់យករួចខ្លួន និងរត់ចោលការទទួលខុសត្រូវ ៕

ប្រទេសថៃ ៖ បន្ទាប់ពីកងទ័ពថៃបិទព្រំដែនជាមួយកម្ពុជាជាឯកតោភាគីបណ្តាលឱ្យសេដ្ឋកិច្ចថៃរងផលប៉ះពាល់យ៉ាងធ្ងន់ធ្ងរ អាជីវកម្ម សណ្ឋាគារ ការលក់ដូរទំនិញ និងសេវាកម្មនៅព្រំដែនបិទទ្វារស្ទើរទាំងស្រុងដោយសារគ្មានភ្ញៀវទេសចរ ខណៈពលរដ្ឋថៃដែលធ្លាប់ទទួលចំណូលខ្ពស់ពីការបើកព្រំដែនបានបាត់បង់ការងារ ជំពាក់បំណុលធនាគារ គ្មានការជួយអន្តរាគមន៍ពីរដ្ឋាភិបាល ។ ស្របពេលសេដ្ឋកិច្ចថៃធ្លាក់ចុះខ្លាំង ទឹកជំនន់នៅខេត្តភាគខាងត្បូងកាន់តែធ្វើឱ្យសេដ្ឋកិច្ចថៃដាំក្បាលចុះថែមទៀត ពីព្រោះរដ្ឋាភិបាលត្រូវផ្តល់ប្រាក់សំណងឱ្យពលរដ្ឋបាត់បង់សមាជិកគ្រួសារដោយសារទឹកជំនន់ ផ្តល់ប្រាក់សម្រាប់ជួសជុលផ្ទះ កែលម្អតំបន់រងផលប៉ះពាល់ និងស្តារសេដ្ឋកិច្ច ។

អតីតរដ្ឋមន្ត្រីក្រសួងពាណិជ្ជកម្មថៃ លោក Pichai Naripthaphan បាននិយាយពីទឹកជំនន់នៅភាគខាងត្បូងបណ្តាលឱ្យពលរដ្ឋស្លាប់រហូតដល់១៧០នាក់ ខូចខាតទ្រព្យសម្បត្តិ ហើយវានឹងប៉ះពាល់ដល់កំណើនផលិតផលក្នុងស្រុកស្រុក (GDP) នៅត្រីមាសទី៤ ឆ្នាំ២០២៥ គឺស្មើត្រឹមតែជាង១% ប៉ុណ្ណោះ ខណៈការនាំចេញទំនិញថៃទៅក្រៅប្រទេសកាលពីខែតុលា ធ្លាក់ចុះខ្លាំងបំផុតក្នុងរយៈពេលជាង១ឆ្នាំ ។ នេះបើតាមការចុះផ្សាយរបស់សារព័ត៌មាន The Better News កាលពីថ្ងៃទី១ ខែធ្នូ ឆ្នាំ២០២៥ ។

លោក Pichai និយាយថា ទឹកជំនន់ស្រុកហាតយៃ ខេត្តសុងក្លា និងខេត្តផ្សេងៗនៅភាគខាងត្បូង ក្រៅពីធ្វើឱ្យពលរដ្ឋស្លាប់រហូតដល់១៧០នាក់ និងខូចខាតទ្រព្យសម្បត្តិ រួមមាន ៖ ផ្ទះ និងអាជីវកម្មយ៉ាងច្រើន វាក៏ប៉ះពាល់សេដ្ឋកិច្ចយ៉ាងខ្លាំងផងដែរ ដែលសេដ្ឋកិច្ចកំពុងដាំក្បាលចុះស្រាប់ហើយ ។ វាថែមទាំងធ្វើឱ្យកំណើនផលិតផលក្នុងស្រុកសរុប (GDP) នៅត្រីមាសទី៤ ឆ្នាំ២០២៥ ធ្លាក់ចុះរហូតដល់ជាង១% ខណៈ GDP ត្រីមាសទី៣ ស្មើត្រឹមតែ១.២% ហើយសេដ្ឋកិច្ចថៃនឹងមានវិបត្តិកាន់តែខ្លាំងដោយសារ GDP ធ្លាក់ចុះរយៈពេល២ត្រីមាសជាប់ៗគ្នា ។

ក្រៅពីនេះ ការនាំចេញទំនិញថៃកាលពីខែតុលា ឆ្នាំ២០២៥ កើនឡើងត្រឹមតែ៥.៧% ប៉ុណ្ណោះ ដែលជាកំណើនទាបបំផុតនៅឆ្នាំ២០២៥ ខណៈរយៈពេល៩ខែដំបូង (ចាប់ពីខែមករា ដល់ខែកញ្ញា) ការនាំចេញទំនិញកើនឡើងដល់១៣.៩% ក្នុងនោះការនាំចេញខែកញ្ញាកើនឡើង១៩% ខ្ពស់បំផុតក្នុងរយៈពេល៤២ខែ ។ ប៉ុន្តែការនាំចេញខែតុលា បែរជាធ្លាក់ចុះទាបបំផុតក្នុងរយៈពេល១៣ខែ ខណៈការនាំចូលកើនឡើងធ្វើឱ្យមានឱនភាពពាណិជ្ជកម្មខ្ពស់ ។

អតីតរដ្ឋមន្ត្រីក្រសួងពាណិជ្ជកម្មចង់ឱ្យរដ្ឋាភិបាលថៃសុំចរចាពន្ធទំនិញជាមួយអាមេរិក បន្ទាប់ពីមន្ត្រីពាណិជ្ជកម្មអាមេរិកជូនដំណឹងមកក្រសួងការបរទេសថៃ ផ្អាកការចរចាពន្ធទំនិញដោយសារថៃល្មើសកិច្ចព្រមព្រៀងសន្តិភាពជាមួយកម្ពុជា រហូតដល់ថៃងាកមកគោរពកិច្ចព្រមព្រៀងវិញ ។ ថៃមិនគួរសន្និដ្ឋានខ្លួនឯងថា អាមេរិកព្រមចរចាពន្ធទំនិញទេ ពីព្រោះអាមេរិកមិនបានបញ្ជាក់ជាផ្លូវការ បើអាមេរិកដំឡើងពន្ធទំនិញថៃ នឹងធ្វើឱ្យសេដ្ឋកិច្ចថៃកាន់តែដាំក្បាលចុះខ្លាំង ហើយថៃពិបាកស្វែងរកទីផ្សារថ្មីជំនួសអាមេរិក ឬមិនអាចស្វែងរកទីផ្សារថ្មី ។

បន្ទាប់ពីទឹកជំនន់នៅភាគខាងត្បូងស្រក ក្រសួងពាណិជ្ជកម្មមានតួនាទីតាមដានតម្លៃទំនិញកុំឱ្យឡើងថ្លៃ ដែលធ្វើឱ្យប៉ះពាល់ពលរដ្ឋរងគ្រោះដោយសារទឹកជំនន់ ។ រដ្ឋាភិបាលបានកំណត់គោលនយោបាយ «ហាមខ្វះខាតទំនិញ ហាមដំឡើងថ្លៃទំនិញ» ប៉ុន្តែតម្លៃសំបុត្រយន្តហោះពីក្រុងបាងកក ទៅស្រុកហាតយៃបែរជាឡើងថ្លៃ ព្រមទាំងស្នើឱ្យទប់ស្កាត់ការដំឡើងថ្លៃសេវាសម្អាតផ្ទះ និងហាងទំនិញនៅតំបន់ដីភក់ ។ បើថៃត្រូវអភិវឌ្ឍន៍ប្រទេសបន្តទៀតត្រូវតែបង្កើនការនាំចេញទំនិញ និងទាក់ទាញការវិនិយោគពីក្រៅប្រទេសឱ្យច្រើន ជាពិសេស ឧស្សាហកម្មទំនើប ដែលត្រូវប្រកួតប្រជែងជាមួយប្រទេសផ្សេងក្នុងការទាក់ទាញវិនិយោគិនមកប្រទេសថៃដើម្បីប្រមូលចំណូល ៕

ប្រទេសថៃ ៖ មន្ត្រីគណបក្សនយោបាយថៃជាបន្តបន្ទាប់បានអំពាវនាវឱ្យលោកនាយករដ្ឋមន្ត្រី Anutin Charnvirakul ចុះចេញពីតំណែង ដើម្បីទុកឱកាសឱ្យបុគ្គលមានសមត្ថភាពកាន់តំណែងជានាយករដ្ឋមន្ត្រីថ្មី ក្រោយពីលោកខ្វះសមត្ថភាពចាត់វិធានការទឹកជំនន់ និងជួយជម្លៀសពលរដ្ឋចេញពីតំបន់គ្រោះថ្នា.ក់យឺតយាវ រហូតបណ្តាលឱ្យពលរដ្ឋស្លា.ប់ដោយសារទឹកជំនន់កើនឡើងជាបន្តបន្ទាប់ ជាពិសេស នៅស្រុកហាតយៃ ខេត្តសុងក្លា ពលរដ្ឋស្លា.ប់រហូតដល់ជាង១០០នាក់ ។

នៅថ្ងៃទី១ ខែធ្នូ ឆ្នាំ២០២៥ អគ្គលេខាធិការរងគណបក្សភឿថៃ អ្នកស្រី លីនធីផន វ៉ារីនណាក់ឆារ៉ារូត បានសួរសំណួរទៅរកាន់ដ្ឋាភិបាលរបស់លោកនាយករដ្ឋមន្ត្រី Anutin ក្រោយពីអ្នកស្រី និងមន្ត្រីគណបក្សភឿថៃធ្វើដំណើរទៅស្រុកហាតយៃ ខេត្តសុងក្លា ដើម្បីចែករបស់របរប្រើប្រាស់ចាំបាច់ដល់ពលរដ្ឋរងគ្រោះដោយសារទឹកជំនន់ ថា អ្នកស្រីបានស្តាប់ពលរដ្ឋនិយាយពីរដ្ឋាភិបាលចាត់វិធានការទឹកជំនន់បរាជ័យ ។

អគ្គលេខាធិការរងគណបក្សភឿថៃ អ្នកស្រី លីនធីផន និយាយថា រដ្ឋាភិបាលគណបក្សភូមិចៃថៃរបស់លោកនាយករដ្ឋមន្ត្រី Anutin បានប្រព្រឹត្តខុសម្តងហើយម្តងទៀតមកលើពលរដ្ឋ ហើយរដ្ឋាភិបាលលាក់បាំងចំនួនពលរដ្ឋស្លាប់ដោយសារទឹកជំនន់នៅភាគខាងត្បូង ដោយមិនបង្ហាញចំនួនពលរដ្ឋស្លាប់ពិតប្រាកដ ។ ការលាក់បាំងនេះធ្វើឱ្យច្របូកច្របល់ពីចំនួនមនុស្សស្លាប់ ដោយចំនួនសាកសពដែលរដ្ឋាភិបាលប្រកាស គឺខុសគ្នានឹងការប្រកាសរបស់ភ្នាក់ងារសង្គ្រោះ វាគ្មានតម្លាភាពដែលពលរដ្ឋមិនអាចទទួលយកបាន ។

ចំនួនមនុស្សស្លាប់ដោយសារទឹកជំនន់នៅភាគខាងត្បូងមិនច្បាស់លាស់ ធ្វើឱ្យមតិនានាសួរទៅកាន់រដ្ឋាភិបាលថៃពីការគ្រប់គ្រងគ្រោះមហន្តរាយ និងទិន្នន័យត្រឹមត្រូវ ខណៈរដ្ឋាភិបាលបរាជ័យក្នុងការចាត់វិធានការទឹកជំនន់ និងបង្ហាញទិន្នន័យច្របូកច្របល់ជាបន្តបន្ទាប់ ។ ហេតុនេះ ពលរដ្ឋមិនគាំទ្រលោកនាយករដ្ឋមន្ត្រី Anutin ដឹកនាំប្រទេសបន្តទេ លោកគួរតែលាលែងពីតំណែង ពីព្រោះពលរដ្ឋសន្និដ្ឋានថា រដ្ឋាភិបាលលាក់បាំងចំនួនមនុស្សស្លាប់ដោយសារទឹកជំនន់ ដែលចំនួនពិតប្រាកដ គឺខ្ពស់ជាងចំនួនដែលរដ្ឋាភិបាលបង្ហាញ ។

អ្នកស្រី លីនធីផន បន្តថា ទោះជារដ្ឋាភិបាលរបស់លោក Anutin ព្យាយាមផ្តល់ប្រាក់សំណងឱ្យគ្រួសារដែលមានសមាជិកស្លាប់ដោយសារទឹកជំនន់ ចំនួន២លានបាតក្នុង១សាកសព (ឬជាង៦ម៉ឺនដុល្លារ) ប៉ុន្តែរដ្ឋាភិបាលតម្រូវឱ្យពលរដ្ឋបញ្ជាក់ពីសមាជិកគ្រួសារស្លាប់ដោយសារអ្វី ដូចជា ៖ ស្លាប់ដោយសារលង់ទឹក ខ្សែភ្លើងឆក់ និងត្រូវទឹកកួច ដែលទាំងការពិត ពលរដ្ឋស្លាប់យ៉ាងវេទនាប៉ុន្តែដ្ឋាភិបាលបរាជ័យក្នុងការដោះស្រាយទឹកជំនន់ភាគខាងត្បូង ។ ពលរដ្ឋមិនគួរស្លាប់ដោយសាររដ្ឋាភិបាលគ្មានសមត្ថភាពជួយពលរដ្ឋពីគ្រោះថ្នាក់ទឹកជំនន់ទេ ។

ការផ្តល់ប្រាក់សំណងដល់ពលរដ្ឋរងគ្រោះដោយសារទឹកជំនន់នៅភាគខាងត្បូងកំពុងតែបរាជ័យបណ្តាលមកពីដ្ឋាភិបាលផ្តល់ប្រាក់សំណងឱ្យពលរដ្ឋស្មុគស្មាញ និងបែងចែកសាកសពស្លាប់ដោយសារអ្វី វាធ្វើឱ្យប៉ះពាល់ជនរងគ្រោះយ៉ាងខ្លាំង ។ បើរដ្ឋាភិបាលរបស់លោក Anutin នៅតែឱ្យពលរដ្ឋបញ្ជាក់សមាជិកគ្រួសារពួកគេស្លាប់ដោយសារអ្វីដើម្បីបដិសេធមិនទទួលខុសត្រូវនោះ វាកាន់តែធ្វើឱ្យជនរងគ្រោះជួបវិបត្តិកាន់តែខ្លាំង ។

គួរបញ្ជាក់ថា ពលរដ្ឋចោទប្រកាន់រដ្ឋាភិបាលថៃបិទបាំងចំនួនតួលេខមនុស្សស្លាប់ដោយសារទឹកជំនន់នៅភាគខាងត្បូង ដែលតួលេខពិតប្រាកដអាចកើនឡើងរហូតដល់ជិត១ពាន់នាក់ឯណោះ ពីព្រោះខ្លាចរងការស្តីបន្ទោសឱ្យចុះចេញពីតំណែង ៕