គណនី Instagram ផ្លូវការរបស់ V ទទួលបានអ្នកតាមដានចំនួន ៧០លាននាក់ ជាមួយនឹងការបង្ហោះត្រឹមតែប្រហែល ១៥០ ប៉ុណ្ណោះ។ សមិទ្ធផលនេះបានបង្កើតកំណត់ត្រាពិភពលោកថ្មីសម្រាប់សិល្បករ ដោយវ៉ាដាច់តារាអន្តរជាតិជាច្រើន និងបង្ហាញពីភាពទាក់ទាញដ៏កម្ររបស់តារាចម្រៀងប្រុសរូបនេះបន្ថែមទៀតនៅលើប្រព័ន្ធផ្សព្វផ្សាយសង្គម។

ជាមួយនឹងតួលេខនេះ V បច្ចុប្បន្នគឺជាសិល្បករទោលបុរសកូរ៉េខាងត្បូងដែលមានអ្នកតាមដានច្រើនជាងគេនៅលើ Instagram ហើយជាសិល្បករបុរសកូរ៉េខាងត្បូងដែលមានអ្នកតាមដានច្រើនជាងគេលំដាប់ទីពីរផងដែរបន្ទាប់ពីគណនីផ្លូវការរបស់ BTS ដែលបច្ចុប្បន្នមានអ្នកតាមដានប្រហែល ៧៧ លាននាក់។

ចាប់តាំងពីសមាជិក BTS ទាំងអស់បានបើកគណនី Instagram ផ្ទាល់ខ្លួននៅក្នុងខែធ្នូ ឆ្នាំ ២០២១ មក V តែងតែកាន់តំណែងលេចធ្លោមួយនៅលើវេទិកានេះ។ មិនត្រឹមតែនាំមុខគេក្នុងចំនួនអ្នកតាមដានប៉ុណ្ណោះទេ ប៉ុន្តែគណនីរបស់ V ក៏ជាប់ចំណាត់ថ្នាក់ក្នុងចំណោមគណនីដែលចូលរួមច្រើនបំផុតនៅទូទាំងពិភពលោកផងដែរ ដោយរាល់ការបង្ហោះនីមួយៗទទួលបានការចុច Like រាប់លានយ៉ាងឆាប់រហ័ស។

ពីមុន V បានកាន់កាប់កំណត់ត្រាពិភពលោក Guinness ចំនួនពីរនៃចំនួនអ្នកតាមដាន លឿនបំផុតដែលឈានដល់អ្នកតាមដាន Instagram ចំនួន១ លាន និង ១០លាននាក់ ដែលទាំងពីរនេះក្នុងរយៈពេលប៉ុន្មានម៉ោងបន្ទាប់ពីបើកគណនីផ្លូវការ។ ចាប់តាំងពីពេលនោះមក តារាចម្រៀងរូបនេះបានរក្សាអត្រាកំណើនជាប់លាប់ ទោះបីជាមានការបង្ហាញខ្លួនជាសាធារណៈមានកម្រិតក្នុងអំឡុងពេលបម្រើយោធាក៏ដោយ។

យោងតាម HYPEBEAST Korea បានឱ្យដឹងថា V ក៏កាន់កាប់កំណត់ត្រាសម្រាប់ការបង្ហោះ Instagram ដែលទទួលបានការចូលចិត្តច្រើនបំផុតដោយជនជាតិកូរ៉េក្នុងឆ្នាំ ២០២៥ ផងដែរ។ រូបថតដែលបានបង្ហោះក្នុងអំឡុងពេលបម្រើកងទ័ព V ទទួលបានការចូលចិត្តប្រហែល ១៧.៧ លាន ដែលបង្ហាញពីឥទ្ធិពលដ៏យូរអង្វែងរបស់សិល្បករ សូម្បីតែពេលនៅឆ្ងាយពីសកម្មភាពកម្សាន្តជាបណ្តោះអាសន្នក៏ដោយ។

ការឈានដល់ចំនួនអ្នកតាមដានចំនួន ៧០ លាននាក់មិនត្រឹមតែជាតួលេខស្ថិតិដ៏គួរឱ្យចាប់អារម្មណ៍ប៉ុណ្ណោះទេ ប៉ុន្តែវាក៏ជាភស្តុតាងដែលបង្ហាញពី កន្លែងពិសេសរបស់ V ក្នុងវប្បធម៌ពេញនិយមទូទាំងពិភពលោក៕

កិច្ចប្រជុំពិសេសរបស់គណៈកម្មការចម្រុះខណ្ឌសីមាព្រំដែនគោក(JBC) កម្ពុជា-ថៃ ដែលគ្រោងនឹងរៀបចំឡើងនៅខេត្តសៀមរាប ត្រូវបានភាគីថៃឆ្លើយតបនិងស្នើលើកពេលសាជាថ្មី ជាលើកទី២ ដោយលើកហេតុផលរង់ចាំនីតិវិធី ផ្ទៃក្នុងដើម្បីតែងតាំងសមាសភាពថ្មីនៃគណៈកម្មការ-JBCភាគីថៃ បន្ទាប់ពីគណៈរដ្ឋមន្ត្រីថៃថ្មីត្រូវបានបង្កើតឡើង ក្រោយការបោះឆ្នោតសភានៅដើមខែកុម្ភៈនាពេលខាងមុខ។ នេះបើយោងតាមសេចក្ដីប្រកាសព័ត៌មានរបស់រដ្ឋលេខាធិការដ្ឋានកិច្ចការព្រំដែន ថ្ងៃទី១៤ ខែមករា ។

ស្របពេលដែលមានការសុំពន្យាពេលពីភាគីថៃដូចនេះ កម្ពុជាក៏បានលើកសំណើចំនួន២ទៅកាន់ភាគីថៃ ដើម្បីពន្លឿនការងារអនុវត្តលើដីជាក់ស្តែងដែលបានឯកភាពគ្នាកន្លងមក។ សំណើរទាំង២នេះរួមមាន៖
១- កម្ពុជាស្នើចាត់បញ្ជូនក្រុមវាស់វែងចម្រុះ (Joint Survey Teams) នៃភាគីទាំងពីរ ចុះលើដីជាក់ស្តែងឡើងវិញ ដើម្បីបន្តអនុវត្តការងារបោះបង្គោលបណ្តោះអាសន្ននៅកំណាត់ខ្សែព្រំដែនចន្លោះបង្គោលលេខ 42-47 និង បង្គោលលេខ 52-59 នៅកាលបរិច្ឆេទសមស្របណាមួយចន្លោះពីថ្ងៃទី១៩ ដល់ថ្ងៃទី២៣ ខែមករា ឆ្នាំ២០២៦។ ក្រុមវាស់វែងចម្រុះនៃភាគីទាំងពីរនឹងធ្វើការទំនាក់ទំនងគ្នាផ្ទាល់ ដើម្បីកំណត់ពេលវេលានិងទីតាំងជាក់លាក់ នៃការចុះលើដីជាក់ស្តែង។
សូមគូសបញ្ជាក់ផងដែរថា ក្រុមវាស់វែងចម្រុះនៃភាគីទាំងពីរកម្ពុជា-ថៃ បានចាប់ផ្តើមធ្វើការវាស់វែងនិង បោះបង្គោលបណ្តោះអាសន្ន នៅកំណាត់ខ្សែព្រំដែនចន្លោះបង្គោលលេខ 42-47 កាលពីថ្ងៃទី១៩ ខែវិច្ឆិកា ឆ្នាំ២០២៥ និងនៅកំណាត់ខ្សែព្រំដែនចន្លោះបង្គោលលេខ 52-59 កាលពីថ្ងៃទី៨ ខែវិច្ឆិកា ឆ្នាំ២០២៥ ហើយត្រូវបានផ្អាកកាលពីថ្ងៃទី៨ ខែធ្នូ ឆ្នាំ២០២៥ ដោយសារសង្រ្គាមឈ្លានពានមកលើអធិបតេយ្យនិង បូរណភាពទឹកដីកម្ពុជា។

២- កម្ពុជាស្នើចាត់បញ្ជូនក្រុមការងារវាស់វែងចម្រុះនៃភាគីទាំងពីរចុះធ្វើការលើដីជាក់ស្តែង នៅកាលបរិច្ឆេទ សមស្របណាមួយចន្លោះពីថ្ងៃទី២៦ ដល់ថ្ងៃទី៣០ ខែមករា ឆ្នាំ២០២៦ ដើម្បីសាងសង់ឡើងវិញនូវបង្គោល ព្រំដែនចំនួន ១៥ តាមគំរូដើមបង្គោលជំនាន់បារាំងនៅទីតាំងដើមពិតប្រាកដដែលភាគីទាំងពីរបានឯកភាពគ្នា។

ឆ្លៀតក្នុងឱកាសនេះ រដ្ឋលេខាធិការដ្ឋានកិច្ចការព្រំដែន សូមបញ្ជាក់ជាថ្មីថា គណៈកម្មការចម្រុះខណ្ឌសីមាព្រំដែនគោក(JBC)កម្ពុជា ប្រកាន់ជំហរយ៉ាងម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការ ព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែន របស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានា ដែលភាគីទាំងពីរបានឯកភាពគ្នានាពេលកន្លងមក៕

នៅថ្ងៃទី១៣​ ខែមករា ឆ្នាំ២០២៥ លោកនាយកសាលា នៃវិទ្យាល័យ ជាសុីម តាកែវ បានអញ្ជើញអ្នកគ្រូ ជឹម បុប្ផា និងសិស្សថ្នាក់ទី៩(ក)ចំនួន ៣២នាក់ ដើម្បីចូលរួមសម្រប សម្រួលដោះស្រាយដោយសន្តវិធី ករណីសិស្សចំនួន ៣២នាក់ បង្កើតក្រុមតេលេក្រាមជេអ្នកគ្រូម្នាក់។

ជាលទ្ធផល សិស្សទាំងអស់នោះបានសារភាពទទួល កំហុសថាក្រុមពួកគាត់ពិតជាបានជេរប្រមាថអ្នកគ្រូពិតប្រាកដមែន ដោយបានសំពះសុំទោសអ្នកគ្រូ ជឹម បុប្ផា ម្នាក់ម្តងៗ ក្នុងនោះដែរអ្នកគ្រូ ជឹម បុប្ផា បានឯក ភាពបញ្ចប់ រឿងដោយមានគណៈគ្រប់គ្រងសម្របសម្រួលបញ្ចប់រឿង។

មូលហេតុដែលនាំឱ្យសិស្សខឹងអ្នកគ្រូបែបនេះ ក៏ព្រោះតែកាលពីថ្ងៃទី ២៣-២៤ ខែធ្នូហ្នឹង មានធ្វើតេស្តស្តង់ដាប្រចាំខែរយៈពេល ២ ថ្ងៃ ហើយអ្នកគ្រូប្រមូលព្រីយ៉ុងចាប់ទូរស័ព្ទបានជាច្រើនគ្រឿង។

បន្ទាប់ពីប្រឡងបាន ២-៣ ថ្ងៃមក លទ្ធផលសិក្សាប្រចាំខែធ្នូចេញលទ្ធផល ក្នុងចំណោម ៤៧ នាក់ហ្នឹង គឺធ្លាក់ ១៨ នាក់ ហើយក្នុងចំណោមអ្នកធ្លាក់ ១៨ នាក់ហ្នឹង គឺមានម្នាក់ដែលបង្កើតគ្រុបនៅក្នុងទីកតុកហ្នឹង ដើម្បីជេអ្នកគ្រូ។

អ្នកគ្រូ ជឹម បុប្ផា  បានបង្ហោះសារដោយលើកឡើងថា៖”ឱសិស្សានុសិស្ស ពួកអ្នកបង្កើតគ្រុបជេរប្រមាថខ្ញុំហើយ ពួកអ្នកឈ្នះទៀត ពួកអ្នកពូកែមែន ព្រោះបានអាណាព្យាបាលជួយពីក្រោយ កុំសើចចំអកខ្ញុំណា ពួកអ្នកហែលទឹកភ្នែកខ្ញុំមិនរួចទេ”៕