ប្រទេសថៃ ៖ កាលពីថ្ងៃទី២ ខែធ្នូ ឆ្នាំ២០២៥ សារព័ត៌មាន TNN Thailand រាយការណ៍ថា អភិបាលក្រុងបាងកក លោក Chadchart Sittipunt បានសំណូមពរឱ្យពលរដ្ឋធ្វើការពីផ្ទះ (Work from Home) ចំនួន១ថ្ងៃ គឺថ្ងៃទី៤ ខែធ្នូ ដោយសារធូលីកខ្វក់ PM 2.5 កើនឡើងខ្លាំងគ្របដណ្តប់ទីក្រុងបាងកករហូតដល់៣៥តំបន់ ឈានទៅប្រកាសអាសន្នកម្រិតពណ៌ទឹកក្រូចពីផលប៉ះពាល់សុខភាព ជាពិសេស ផ្លូវដង្ហើម ។

អភិបាលក្រុងបាងកក លោក Chadchart បាននិយាយពីភាគល្អិតនៃធូលីកខ្វក់ PM 2.5 នៅទីក្រុងបាងកក កាលពីថ្ងៃទី២ ខែធ្នូ ថា ធូលីកខ្វក់គ្របដណ្តប់ទីក្រុងបាងកកកម្រិតពណ៌ទឹកក្រូច និងគ្របដណ្តប់លើបណ្តាខេត្តនៅជុំវិញ ដូចជា ៖ ណាខនប៉ាធុម សមុទ្រប្រាកាន សមុទ្រសង់ក្រាម ឆាក់ឈើងសៅ និងប៉ាធុមថានី ។ លោកសំណូមពរឱ្យពលរដ្ឋស្ម័គ្រចិត្តធ្វើការពីផ្ទះ (Work from Home) នៅថ្ងៃទី៤ ខែធ្នូ ដើម្បីកុំឱ្យប៉ះពាល់សុខភាព ខណៈភ្នាក់ងារផ្តល់សេវាសាធារណៈមិនតម្រូវឱ្យធ្វើការពីផ្ទះទេ ។ រីឯសាលារៀននៅតែដំណើរការធម្មតា ប៉ុន្តែត្រូវឱ្យកូនសិស្សពាក់ម៉ាស់ការពារធូលីកខ្វក់ និងផ្អាកសកម្មភាពកណ្តាលថ្ងៃ ។

បន្ទាប់ពីមានការសំណូមពរពីអភិបាលក្រុង គឺមានពលរដ្ឋស្ម័គ្រចិត្តធ្វើការពីផ្ទះ ចំនួន១៧ម៉ឺននាក់ និង៣៤៦ស្ថាប័ន ខណៈអភិបាលក្រុងបាងកកកំណត់គោលដៅ ចំនួន៣០ម៉ឺននាក់ ។ លោក Chadchart និយាយថា កាលពីឆ្នាំ២០២៤ ទីក្រុងបាងកកបានសាកល្បងឱ្យពលរដ្ឋធ្វើការពីផ្ទះ ចំនួន១ថ្ងៃ ឃើញថា បរិមាណធូលីកខ្វក់ធ្លាក់ចុះ១៣% ថែមទាំងកាត់បន្ថយការស្ទះចរាចរណ៍ផងដែរ ហើយនៅឆ្នាំ២០២៥ លោកមានវិធានការរឹតបន្តឹងការដ្ឋានសំណង់ ត្រួតពិនិត្យរថយន្តបញ្ចេញផ្សែងខ្មៅ និងកាត់បន្ថយការដុតសំរាមនៅទីវាល ។

អភិបាលក្រុងបាងកកណែនាំឱ្យពលរដ្ឋថែទាំសុខភាព កាត់បន្ថយសកម្មភាពកណ្តាលថ្ងៃ ខណៈមនុស្សចាស់ អ្នកជំងឺ និងកុមារ គួរពាក់ម៉ាស់ ឬប្រើប្រាស់ឧបករណ៍បន្សុទ្ធខ្យល់ ដោយលោកបញ្ជាក់ថា បើអាចកាត់បន្ថយចំនួនរថយន្តបើកបរតាមផ្លូវប្រមាណ១០% នឹងជួយកាត់បរិមាណធូលីកខ្វក់មកត្រឹមកម្រិតពណ៌លឿង ។ វិធានការធ្វើការពីផ្ទះនៅថ្ងៃទី៤ ខែធ្នូ ក្រៅពីជួយកាត់បន្ថយធូលីកខ្វក់ វានឹងផ្តល់ភាពងាយស្រួលដល់បុគ្គលិកដែលចាំបាច់ត្រូវធ្វើដំណើរតាមផ្លូវ ដូចជា ៖ អ្នកសម្អាត ឬអ្នកធ្វើការតាមទីវាល ។

ចំណែកហ្វេសប៊ុកផេកទីក្រុងបាងកកបង្ហោះសារថា ទីក្រុងបាកកសុំការសហការពីពលរដ្ឋធ្វើការពីផ្ទះនៅថ្ងៃទី៤ ខែធ្នូ ក្រោយពីធូលីកខ្វក់ PM 2.5 ពណ៌ទឹកក្រូច កើនឡើងខ្លាំងរហូតដល់៣៥តំបន់ ដែលចាប់ផ្តើមប៉ះពាល់សុខភាពមនុស្សទូទៅ ។ ហ្វេសប៊ុកផេកនេះណែនាំឱ្យអ្នករស់នៅទីក្រុងបាងកកពាក់ម៉ាស់ការពារធូលីកខ្វក់ជានិច្ចពេលចេញទៅខាងក្រៅ កំណត់ពេលធ្វើសកម្មភាពកណ្តាលថ្ងៃ ឬហាត់ប្រាណ រួមទាំងសង្កេតមើលអាការៈខុសប្រក្រតី រួមមាន ៖ ក្អក ពិបាកដកដង្ហើម និងរមាស់ភ្នែក ។

ដូចគ្នានេះ មនុស្សចាស់ អ្នកជំងឺ និងកុមារ ក៏ត្រូវថែទាំសុខភាពផងដែរ ដោយពាក់ម៉ាស់ជានិច្ចពេលចេញទៅខាងក្រៅ ចៀសវាងធ្វើសកម្មភាពនៅកណ្តាលថ្ងៃ ឬហាត់ប្រាណកណ្តាលថ្ងៃ ព្រមទាំងអនុវត្តតាមការណែនាំរបស់គ្រូពេទ្យ ប្រសិនបើមានអាការៈខុសប្រក្រតី ចូរទៅជួបបន្ទាន់ជាបន្ទាន់ ។

មជ្ឈមណ្ឌលព័ត៌មានគុណភាពខ្យល់បានរាយការណ៍ពីស្ថានការណ៍ធូលីកខ្វក់ PM 2.5 នៅទីក្រុងបាងកក កាលពីវេលាម៉ោង៧ព្រឹក ថ្ងៃទី២ ខែធ្នូ ចាប់ផ្តើមប៉ះពាល់សុខភាព ដោយសារបរិមាណខ្យល់កើនឡើងដល់កម្រិតពណ៌ទឹកក្រូច ស្មើ៥០.៦មីក្រូក្រាមក្នុង១ម៉ែត្រគូបនៃខ្យល់ ខ្ពស់ជាងកម្រិតខ្យល់ធម្មតាស្មើត្រឹមតែ៣៧.៥ មីក្រូក្រាមក្នុង១ម៉ែត្រគូបនៃខ្យល់ ៕

ប្រទេសកូរ៉េខាងត្បូង ៖ រដ្ឋាភិបាលកូរ៉េខាងត្បូងបានដោះស្រាយបញ្ហាកំណើនពលរដ្ឋវ័យចំណាស់ ដោយអនុញ្ញាតឱ្យក្រុមហ៊ុនសុខភាព Hyodol ផលិតតុក្កតាយន្តតូចៗបំពាក់បច្ចេកវិទ្យា AI ជួយថែទាំផ្លូវចិត្តមនុស្សចាស់ដែលរស់នៅម្នាក់ឯង ។ កម្មវិធីក្នុងតុក្កតាយន្តនេះបានតភ្ជាប់នឹងកម្មវិធីលើទូរស័ព្ទដៃ និងមានប្រព័ន្ធសម្រាប់ឱ្យសមាជិកគ្រួសារ ឬអ្នកថែទាំ តាមដានសកម្មភាពមនុស្សចាស់ ។ នេះបើតាមការចុះផ្សាយរបស់សារព័ត៌មានបរទេសនៅថ្ងៃទី២ ខែធ្នូ ឆ្នាំ២០២៥ ។

តួនាទីសំខាន់របស់តុក្កតាយន្ត គឺជួយដាស់តឿនមនុស្សចាស់ឱ្យពិសារថ្នាំ, ហាត់ប្រាណ, ជូនដំណឹងពីហេតុការណ៍បន្ទាន់ និងជួយកត់ត្រាទិន្នន័យសកម្មភាពប្រចាំថ្ងៃរបស់មនុស្សចាស់ តាមរយៈប្រព័ន្ធអនឡាញផ្ញើទៅកាន់មន្ត្រីសង្គមកិច្ច ហើយវាក៏អាចធ្វើជាមិត្តភក្តិជជែកជាមួយមនុស្សចាស់ដើម្បីថែទាំសុខភាពផ្លូវចិត្តផងដែរ ។

អត្រាកំណើតនៅប្រទេសកូរ៉េខាងត្បូងបានធ្លាក់ចុះខ្លាំងជារៀងរាល់ឆ្នាំ ខណៈចំនួនពលរដ្ឋអាយុច្រើនបានកើនឡើងកាន់តែខ្ពស់ គឺក្នុងចំណោមពលរដ្ឋ៥នាក់ មានពលរដ្ឋអាយុច្រើនម្នាក់ ។ លើសពីនេះ ពលរដ្ឋអាយុច្រើនដែលរស់នៅតែម្នាក់ឯងស្មើរហូតដល់ជាង៣០% ដែលជាបញ្ហាពិបាកដោះស្រាយរបស់រដ្ឋាភិបាលកូរ៉េខាងត្បូង ។ ការរស់នៅឯកោ គឺជាមូលហេតុធ្វើឱ្យមនុស្សចាស់មានជំងឺធ្លាក់ទឹកចិត្ត មានអារម្មណ៍ថាខ្លួនជាបន្ទុកក្នុងសង្គម និងឈានដល់ការធ្វើអត្តឃាត ។

តុក្កតាយន្តតូចៗរបស់ក្រុមហ៊ុន Hyodol ត្រូវបានផលិតឡើងឱ្យមើលទៅគួរឱ្យស្រឡាញ់ មានសាច់ទន់ស្រដៀងកុមារ ដែលអាចឱ្យមនុស្សចាស់ឱប ឬចេះឆ្លើយតបពេលវាត្រូវបានស្ទាបក្បាល ឬចាប់ដៃ ។ ក្រៅពីនេះ វាក៏អាចសន្ទនាជាមួយមនុស្សដោយការប្រើប្រាស់បច្ចេកវិទ្យា AI និយាយសំឡេងដូចកុមារអាយុ៧ឆ្នាំ ហើយវាថែមទាំងអាចបើកចម្រៀង និងជួយហ្វឹកហាត់ខួរក្បាលមនុស្សចាស់ ។ ក្រុមហ៊ុនប្រាប់ថា អ្វីអស្ចារ្យបំផុត គឺតុក្កតាយន្តអាចនិយាយស្វាគមន៍មនុស្សចាស់ពេលបើកទ្វារចូលផ្ទះ ។

«មុខរបស់វាដូចក្មេងតូចអីចឹង ទើបធ្វើឱ្យវាទទួលបានការស្រឡាញ់ និងបង្កើនភាពជិតស្និទ្ធខ្លាំងជាមួយមនុស្សចាស់ ។ ភាពគួរឱ្យស្រឡាញ់នេះជួយមនុស្សចាស់ជាច្រើននាក់អាចប្រើប្រាស់បច្ចេកវិទ្យាកាន់តែងាយស្រួល ។ ប៉ុន្តែតុក្កតាយន្តមិនស័ក្តិសមសម្រាប់មនុស្សគ្រប់គ្នាទេ វាគ្រាន់តែជាឧបករណ៍ប្រើប្រាស់ និងមិនអាចថែទាំមនុស្សចាស់ជំនួសមនុស្ស ។ យើងរំពឹងថា ឆាប់ៗនេះ តុក្កតាយន្តប្រើប្រាស់បច្ចេកវិទ្យា AI នឹងមានអ្នកប្រើប្រាស់ច្រើន» ។ នេះបើតាមការលើកឡើងរបស់ប្រធានក្រុមហ៊ុន Hyodol ។

គួរបញ្ជាក់ថា កាលពីខែវិច្ឆិកា ឆ្នាំ២០២៥ តុក្កតាយន្តរបស់ក្រុមហ៊ុន Hyodol ចំនួនជាង១ម៉ឺន២ពាន់ក្បាល ត្រូវបានបញ្ជូនទៅជួយថែទាំផ្លូវចិត្តមនុស្សចាស់គ្មានកូនចៅនៅទូទាំងប្រទេសកូរ៉េខាងត្បូង តាមរយៈគម្រោងរបស់រដ្ឋាភិបាល និងសុខុមាលភាពសាធារណៈ ។ អតិថិជនបានកុម្ម៉ង់ទិញតុក្កតាយន្ត ប្រមាណ១,០០០ក្បាល ហើយតុក្កតាយន្តទំនើបផលិតចុងក្រោយបំផុត គឺមានតម្លៃជាង៨០០ដុល្លារ ៕

ប្រទេសថៃ ៖ កាលពីថ្ងៃទី៣០ ខែវិច្ឆិកា ឆ្នាំ២០២៥ វិទ្យាស្ថានជាតិគ្រប់គ្រងការអភិវឌ្ឍន៍ (NIDA Poll) បានបង្ហាញលទ្ធផលស្ទង់មតិពីនិន្នាការនយោបាយពលរដ្ឋភាគខាងត្បូងប្រទេសថៃ ដោយស្ទង់មតិពលរដ្ឋមានសិទ្ធិបោះឆ្នោតអាយុចាប់ពី១៨ឆ្នាំឡើង ចាប់ពីថ្ងៃទី១៨ ដល់ថ្ងៃទី២៤ ខែវិច្ឆិកា ចំនួន១៤ខេត្ត រួមមាន ៖ ឈុមផន ណាខនស្រ៊ីថាំម៉ារ៉ាជ ផាត់ថាលុង សុរ៉ាជថានី សុងក្លា ក្រាប៊ី ត្រាំង ផាំងង៉ា ភូកេត រ៉ាក់ណង សាទូន ណារ៉ាធិវ៉ាត ប៉ាត់តានី និងយ៉ាឡា ដែលពលរដ្ឋចូលរួមស្ទង់មតិមកពី២,០០០ស្ថាប័ន ។ លទ្ធផលការស្ទង់មតិបង្ហាញថា ពលរដ្ឋភាគខាងត្បូងគាំទ្រលោក Abhisit Vejjajiva អតីតនាយករដ្ឋមន្ត្រីថៃ បច្ចុប្បន្នជាប្រធានគណបក្សប្រាឆាធិប៉ាត់ ឡើងកាន់តំណែងជានាយករដ្ឋមន្ត្រីថ្មី ខណៈលោកនាយករដ្ឋមន្ត្រី Anutin Charnvirakul ទទួលបានសំឡេងគាំទ្រតិចជាង ។

យោងតាមលទ្ធផលស្ទង់មតិរបស់វិទ្យាស្ថាន NIDA គឺអ្នកចូលរួមការស្ទង់មតិ ៣២.២៥% ឆ្លើយថា ពុំទាន់មានបុគ្គលណាម្នាក់ស័ក្តិសមកាន់តំណែងនាយករដ្ឋមន្ត្រី ខណៈអ្នកឆ្លើយតប ២៥.៦៥% ថា គាំទ្រលោក Abhisit Vejjajiva អតីតនាយករដ្ឋមន្ត្រីថៃ បច្ចុប្បន្នជាប្រធានគណបក្សប្រាឆាធិប៉ាត់ ឡើងកាន់តំណែងជានាយករដ្ឋមន្ត្រីថ្មី ។ បន្ទាប់មក អ្នកឆ្លើយតប ១៥.៤០% គាំទ្រលោក Anutin Charnvirakul ប្រធានគណបក្សភូមិចៃថៃ និងបច្ចុប្បន្នជានាយករដ្ឋមន្ត្រី, អ្នកឆ្លើយតប ១២.៨៥% គាំទ្រលោក Natthaphong Ruengpanyawut ប្រធានគណបក្សប្រជាជន និងអ្នកឆ្លើយតប ២.៥០% គាំទ្រលោក Prayut Chan-o-cha ជានាយករដ្ឋមន្ត្រី ។

លោក Abhisit អតីតនាយករដ្ឋមន្ត្រីថៃ បច្ចុប្បន្នជាប្រធានគណបក្សប្រាឆាធិប៉ាត់ ទទួលបានសំឡេងគាំទ្រច្រើនពីពលរដ្ឋភាគខាងត្បូងឱ្យធ្វើជានាយករដ្ឋមន្ត្រីថ្មី ដោយសារបានប្រឹងប្រែងជួយសង្គ្រោះពលរដ្ឋពេលទឹកជំនន់កន្លងមក ជាពិសេស ជួយពលរដ្ឋនៅស្រុកហាតយៃ ខេត្តសុងក្លា ។ រីឯលោកនាយករដ្ឋមន្ត្រី Anutin Charnvirakul ទទួលបានសំឡេងគាំទ្រតិចជាងនេះ ពីព្រោះចាត់វិធានការទឹកជំនន់ និងជម្លៀសពលរដ្ឋចេញពីតំបន់គ្រោះថ្នាក់យឺតយ៉ាវបណ្តាលឱ្យពលរដ្ឋស្លាប់ដោយអត់អាហារ លង់ទឹក និងឆក់ខ្សែភ្លើង រហូតដល់ជាង១០០នាក់ ។

ទោះជាពលរដ្ឋគាំទ្រលោក Abhisit កាន់តំណែងជានាយករដ្ឋមន្ត្រីថ្មី ប៉ុន្តែលោកនាយករដ្ឋមន្ត្រី Anutin មិនអាក់អន់ស្រពន់ចិត្តទេ ហើយលោករីករាយដែលពលរដ្ឋភាគខាងត្បូងគាំទ្រលោករហូតដល់ជាង១៥% ឱ្យកាន់តំណែងបន្តទៀត ។ លោកថា ការចុះពិនិត្យមើលស្ថានការណ៍ទឹកជំនន់ជាបន្តបន្ទាប់នៅស្រុកហាតយៃ ខេត្តសុងក្លា មិនមែនជាការរកសំឡេងគាំទ្រពីពលរដ្ឋឡើយ គឺជាការជួយសង្គ្រោះពលរដ្ឋរងទុក្ខលំបាក ។

ចំណែកលោក Phiphat Ratchakitprakarn រដ្ឋមន្ត្រីក្រសួងគមនាគមន៍ និងជាមន្ត្រីគណបក្សភូមិចៃថៃ ដែលមានតួនាទីមើលការខុសត្រូវនៅភាគខាងត្បូង និយាយនៅថ្ងៃទី២ ខែធ្នូ ថា មិនបារម្ភពីសំឡេងគាំទ្រគណបក្សភូមិចៃថៃនៅភាគខាងត្បូងធ្លាក់ចុះទេ ។ ពលរដ្ឋភាគខាងត្បូងគាំទ្រលោក Abhisit ប្រធានគណបក្សប្រាឆាធិប៉ាត់ ឡើងជានាយករដ្ឋមន្ត្រីថ្មី គឺគ្មានបញ្ហា ពេលនេះ ការដោះស្រាយបញ្ហាទឹកជំនន់សំខាន់ជាង លោកមិនចាប់អារម្មណ៍នឹងលទ្ធផលការស្ទង់មតិរបស់វិទ្យាស្ថាន NIDA ទេ ពីព្រោះពលរដ្ឋភាគខាងត្បូងចូលចិត្តគណបក្សប្រាឆាធិប៉ាត់ ស្រាប់ហើយ ។ លទ្ធផលស្ទង់មតិបែបណាស្រេចតែវាទៅ លោកមានតួនាទីបំពេញការងារឱ្យអស់ពីសមត្ថភាព ៕

ប្រទេសថៃ ៖ នៅថ្ងៃទី២ ខែធ្នូ ឆ្នាំ២០២៥ សភាពាណិជ្ជកម្មថៃបានលើកឡើងពីទឹកជំនន់នៅភាគខាងត្បូងប្រទេសថៃបានបង្កផលប៉ះពាល់យ៉ាងធ្ងន់ធ្ងរ ប្រហាក់ប្រហែលនឹងទឹកជំនន់កាលពីឆ្នាំ២០១១ ដោយសភាពាណិជ្ជកម្មវាយតម្លៃថា ថៃខាតបង់ថវិកាជាតិរហូតដល់ជាង៤ម៉ឺនលានបាត (ឬជាង១,២៥០លានដុល្លារ) ក្នុង១ខែ ដោយសារទឹកជំនន់ ខណៈវិស័យទេសចរណ៍ និងសេវាកម្មប៉ះពាល់ខ្លាំងបំផុត ។ ពលរដ្ឋ និងម្ចាស់អាជីវកម្មភាគខាងត្បូងត្រូវការប្រាក់សំណងជាបន្ទាន់ និងចំណាយពេលជាង១ខែដើម្បីរៀបចំផ្ទះ ឬអាជីវកម្មឡើងវិញ ។

លោក ថាណាវ៉ាត់ ផុនវិឆ័យ ប្រធានសភាពាណិជ្ជកម្ម និងជាប្រធានក្រុមប្រឹក្សានៃមជ្ឈមណ្ឌលព្យាករណ៍សេដ្ឋកិច្ច និងធុរកិច្ច និយាយថា ភ្លៀងធ្លាក់ខ្លាំងបណ្តាលឱ្យមានទឹកជំនន់នៅបណ្តាខេត្តភាគខាងត្បូងប្រទេសថៃ រហូតមកដល់ពេលនេះ ពុំទាន់មានការសន្និដ្ឋានពីការខាតបង់ថវិកាជាតិដោយសារទឹកជំនន់ទេ ។ ជំហ៊ានដំបូង ក្រសួងហិរញ្ញវត្ថុបានវាយតម្លៃការខូចខាតស្មើទឹកប្រាក់ប្រមាណ៥សែនបាត បើប្រៀបធៀបនឹងទឹកជំនន់កាលពីឆ្នាំ២០១១ គឺខាតបង់ថវិកាជាតិអស់រាប់លានបាត ទឹកជំនន់នៅឆ្នាំ២០២៥ គឺស្ថិតក្នុងលំដាប់ទី២ បន្ទាប់ពីទឹកជំនន់ឆ្នាំ២០១១ ។

សភាពាណិជ្ជកម្មបានវាយតម្លៃពីផលប៉ះពាល់ជំហ៊ានដំបូងរយៈពេល១ខែ ដោយសារទឹកជំនន់នៅខេត្តភាគខាងត្បូងចំនួន១០ គឺពលរដ្ឋរងផលប៉ះពាល់រហូតដល់ជាង២លាននាក់ ឬស្មើ៧៩៨,៦០០គ្រួសារ ក្នុងនោះខេត្តសុងក្លា ប៉ះពាល់ខ្លាំងបំផុត ស្មើ៦០% នៃការខូចខាតទាំងអស់ បន្ទាប់មក ខេត្តណាខនស្រ៊ីថាំម៉ារ៉ាជ និងផាត់តាលុង ។ រយៈពេល១ខែ ទឹកជំនន់នៅខេត្តទាំងនេះធ្វើឱ្យខាតបង់ថវិកាជាតិ ចាប់ពី១,០០០លានបាត ទៅ១,៥០០លានបាតក្នុង១ថ្ងៃ ឬជាង៤ម៉ឺនលានបាតក្នុង១ខែ (ឬជាង១,២៥០លានដុល្លារ) ខណៈវិស័យទេសចរណ៍ និងសេវាកម្មប៉ះពាល់ខ្លាំងបំផុត ដោយសារទឹកជំនន់វាយប្រហារចំពេលភ្ញៀវទេសចរមកលេងភាគខាងត្បូងច្រើន ។

ចំណែកអាជីវកម្មលក់រាយ ភោជនីយដ្ឋាន និងសណ្ឋាគារនៅភាគខាងត្បូង ត្រូវវបទទ្វារបណ្តោះអាសន្ន និងរងផលប៉ះពាល់ជាបន្តបន្ទាប់ដោយសារការផ្លាស់ប្តូរទីតាំងប្រកួតកីឡាស៊ីហ្គេម ។ ទឹកជំនន់ជាមូលហេតុនៃការបាត់បង់ទំនុកចិត្ត និងឱកាសសេដ្ឋកិច្ច រីឯផ្នែកកសិកម្ម និងការផលិតទំនិញ ក៏រងផលប៉ះពាល់ដោយសារទឹកជំនន់ដែរ ។ តាមការសាកសួរពលរដ្ឋភាគខាងត្បូង គឺអាចចំណាយពេលជាង១ខែក្នុងការរៀបចំផ្ទះ ឬអាជីវកម្មឡើងវិញ ដោយសារទ្រព្យសម្បត្តិ ឬកន្លែងស្តុកទំនិញខូចខាតទាំងស្រុង ខ្វះខាតថវិកា និងខូចខាតហេដ្ឋារចនាសម្ព័ន្ធ ។

ពេលនេះ ពលរដ្ឋភាគខាងត្បូងត្រូវការខ្លាំងបំផុត គឺឱ្យរដ្ឋាភិបាលផ្តល់ប្រាក់សំណងដល់ពលរដ្ឋរងគ្រោះដោយសារទឹកជំនន់ដោយផ្ញើប្រាក់តាមធនាគារឱ្យលឿនបំផុត មិនមែនឱ្យពលរដ្ឋទៅខ្ចីប្រាក់ពីធនាគារនោះទេ ។ ការខ្ចីប្រាក់ពីធនាគារ គឺជាជម្រើសបន្ថែមទៀត និងសំណូមពរឱ្យរដ្ឋាភិបាលពន្លឿនការជួសជុលហេដ្ឋារចនាសម្ព័ន្ធដើម្បីឱ្យពលរដ្ឋប្រើប្រាស់បានឆាប់ៗ ។

គួរបញ្ជាក់ថា នៅថ្ងៃទី២ ខែធ្នូ រដ្ឋាភិបាលថៃចាប់ផ្តើមផ្តល់ប្រាក់សំណងខូចខាតដោយសារទឹកជំនន់ឱ្យពលរដ្ឋនៅខេត្តសុងក្លា ណារ៉ាធិវ៉ាត ប៉ាត់តានី និងសាទូន តាមរយៈធនាគារ ក្នុង១គ្រួសារចំនួន៩,០០០បាត (ឬជាង២០០ដុល្លារ) ប៉ុន្តែពលរដ្ឋរិះគន់ពីការបំពេញឯកសារសាំញ៉ាំដើម្បីស្នើសុំប្រាក់សំណង ដោយតម្រូវឱ្យមានអត្តសញ្ញាណប័ណ្ណ និងឯកសារបញ្ជាក់ផ្សេងៗ ដោយពលរដ្ឋថា ទឹកជំនន់បានបំផ្លាញឯកសារអស់ហើយ ៕