យោងតាមប្រព័ន្ធផ្សព្វផ្សាយ AllKpop វីដេអូផ្លូវការនៃការសម្តែងរបស់ Jennie នៅក្នុងកម្មវិធីប្រគល់ពានរង្វាន់ Golden Disc Awards លើកទី៤០ ត្រូវបានបង្ហោះនៅលើបណ្តាញសង្គម ដែលទាក់ទាញទស្សនិកជនយ៉ាងច្រើន។ បន្ទាប់ពីកម្មវិធីបង្ហោះវីដេអូនេះអ្នកគាំទ្របានកត់សម្គាល់ឃើញថាគណនីរបស់ G-Dragon បានចុច «Like» វីដេអូនោះ។
ទោះជាយ៉ាងណាក៏ដោយសកម្មភាពនេះបានបាត់ទៅវិញយ៉ាងឆាប់រហ័ស ដោយបន្សល់ទុកនូវសំណួរជាច្រើនដែលមិនទាន់មានចម្លើយពីព្រោះ G-Dragon បានលុបការចុច like នោះវិញ។ រូបភាព Screenshot ដែលបង្ហាញពី G-Dragon បានចុច Like វីដេអូរបស់ Jennie បានរីករាលដាលយ៉ាងឆាប់រហ័ស ដែលបង្កឱ្យមានការស្មានជាច្រើនថា៖ តើវាគ្រាន់តែជាទង្វើចៃដន្យ ឬវាមានអត្ថន័យផ្សេងទៀត?។ រហូតមកដល់ពេលនេះ សិល្បករទាំងពីរមិនទាន់បានផ្តល់ការឆ្លើយតបជាផ្លូវការនៅឡើយទេ។
នៅក្នុងវីដេអូឃ្លីបនេះ Jennie បានសម្តែងទោលដ៏គួរឱ្យចាប់អារម្មណ៍ជាមួយនឹងបទចម្រៀងជាបន្តបន្ទាប់ដែលបង្ហាញពីបុគ្គលិកលក្ខណៈរឹងមាំរបស់នាង រួមមាន Filter,Damn Right និង Like Jennie។
G-Dragon និង Jennie មានទំនាក់ទំនងពិសេសមួយតាំងពីពេលដែលពួកគេធ្វើការជាមួយគ្នាក្រោមផលិតកម្ម YG Entertainment។ ក្នុងឆ្នាំ ២០២១ អ្នកទាំងពីរត្រូវបានលេចឮថាកំពុងណាត់ជួបគ្នា បន្ទាប់ពីមានរបាយការណ៍ថា Jennie បានទៅលេងផ្ទះឯកជនរបស់ G-Dragon ជាញឹកញាប់។ នៅពេលនោះ ក្រុមហ៊ុនគ្រប់គ្រងរបស់ពួកគេបានបដិសេធមិនធ្វើអត្ថាធិប្បាយទេ ដោយសង្កត់ធ្ងន់លើសិទ្ធិឯកជនរបស់សិល្បករ។
នៅឯពានរង្វាន់ Golden Disc Awards G-Dragon បានឈ្នះពានរង្វាន់ធំមួយសម្រាប់បទ «HOME SWEET HOME» ប៉ុន្តែមិនបានចូលរួមដោយផ្ទាល់នោះទេហើយបានថ្លែងសុន្ទរកថាតាមរយៈវីដេអូដោយសារតែជាន់កាលវិភាគគ្នា៕
